ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်စိုက်ပျိုးရေးဦးစီးဌာနရုံးတွင် ဆီထွက်သီးနှံဇုန်(၂) ပန်းတိုင်အထွက်နှုန်းရရှိရေး တောင်သူပညာပေးဆွေးနွေးပွဲအား (၁၄.၅.၂၀၂၄)ရက်နေ့ ညနေပိုင်းကပြုလုပ်ခဲ့ရာ ဆွေးနွေးပွဲတွင် တိုင်းဒေသကြီးဝန်ကြီးချုပ် ဦးတင်မောင်ဝင်းက“ တိုင်းဒေသကြီးအတွက် ဆီထွက်သီးနှံ ပန်းတိုင်အထွက်နှုန်း ရောက်ရှိစေရေးနှင့် ဆီဖူလုံရေးအတွက် တောင်သူအသိပညာပေး လာရောက်ဆွေးနွေးပေးသည့် ပညာရှင်များအား များစွာကျေးဇူးတင်ရှိပါကြောင်း၊ တောင်သူများအနေဖြင့် လာရောက်ဆွေးနွေးပေးသည့် ပညာရှင်များအား သိရှိလိုသည်များကို ဆွေးနွေးမေးမြန်းကြရန်လိုကြောင်း၊ တိုင်းဒေသကြီးအနေဖြင့် ဆီဖူလုံမှုရှိစေရေး အားလုံးက ကြိုးပမ်းဆောင်ရွက်ရမည်ဖြစ်ပါကြောင်း၊ ဆီထွက်သီးနှံ မြေပဲ၊ နှမ်း၊ နေကြာများကို အင်တိုက်အားတိုက်ဆောင်ရွက်နိုင်ရေး ဇုန်အလိုက် သတ်မှတ်၍ စုဖွဲ့စိုက်ပျိုးဆောင်ရွက်နိုင်ရေးအတွက် မြန်အောင်ခရိုင်နှင့် ဟင်္သာတခရိုင်အား ဇုန်(၁)နှင့် မအူပင်ခရိုင်အား ဇုန်(၂)အဖြစ် သတ်မှတ်ထားပါကြောင်း၊ ဆီထွက်သီးနှံစိုက်ပျိုးမည့် ဇုန် ၂ ခုအပါအဝင် တိုင်းဒေသကြီးတစ်ခုလုံးတွင် အောင်မြင်အောင် စိုက်ပျိုးရမှာဖြစ်ကြောင်း၊ တိုင်းဒေသကြီး၏ ဆီဖူလုံမှု၊ နိုင်ငံတော်၏ ဆီဖူလုံမှုကို တစ်ခန်းတစ်ကဏ္ဍအနေဖြင့် အထောက် အကူပြုနိုင်ရေး အောင်မြင်အောင် ဆောင်ရွက်သွားမည်ဖြစ်ပါကြောင်း၊ စိုက်ပျိုးရေးပညာရှင် များ၏ ဆွေးနွေးမှုများကို တောင်သူများအနေဖြင့် လိုက်နာမှတ်သား၍ လက်တွေ့အကောင် အထည်ဖော် ဆောင်ရွက်ပေးကြစေလိုကြောင်း” အမှာစကားများပြောကြားခဲ့သည်။

ဧရာဝတီတိုင်းဒေသကြီးဝန်ကြီးချုပ်နှင့်အဖွဲ့သည် ဟင်္သာတမြို့နယ်၊ တလုတ္ထော်မြို့၊ အမှတ်(၂)ရပ်ကွက်ရှိ ရွှေငြိမ်းအေးကျောင်းတိုက် စာသင်ဝိုင်းသို့သွားရောက်၍ အခြေခံစာတတ်မြောက်ရေးလုပ်ငန်းအဖြစ် တိုင်းရင်းသားပြည်သူများအား စာသင်ကြားပေးနေမှုများကို ကြည့်ရှုအားပေးခဲ့ပြီး ဆရာ၊ ဆရာမများနှင့် စာသင်သားများအား အာဟာရဖြည့် စားသောက်ဖွယ်ရာများနှင့် စာအုပ်များ ပေးအပ်ခဲ့သည်။ ဆက်လက်၍ တိုင်း​ဒေသကြီးဝန်ကြီးချုပ်နှင့်အဖွဲ့သည် တလုတ္ထော်မြို့၊ အမှတ်(၂)ရပ်ကွက်ရှိ အခြေခံပညာမူလတန်းလွန်ကျောင်းသို့ သွားရောက်၍ ကိုယ့်အားကိုယ်ကိုး ကျောင်းစာကြည့်တိုက် ဆောက်လုပ်နေမှုကို ကြည့်ရှုအား​ပေးခဲ့ပြီး လိုအပ်သည်များကို ဖြည့်ဆည်း​ဆောင်ရွက်​ပေးခဲ့သည်။ ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ဟင်္သာတမြို့၊ အိပ်ပျက်ကျေးရွာအုပ်စု၊ ဖောင်ဆိပ်ကျေးရွာရှိ ဖြတ်တာတည်ဆောက်‌နေမှုများကို ကြည့်ရှုစစ်ဆေးခဲ့ရာ ဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာနမှ တာဝန်ရှိသူတစ်ဦးက ဖောင်ဆိပ်ကျေးရွာအနီး နှစ်အလိုက်မြစ်ကမ်းပါးနှင့် တာတမံအခြေအနေများ၊ အိပ်ပျက်ကျေးရွာအုပ်စုရှိ ကျေးရွာများ၏ကမ်းပါးများ ဧရာဝတီမြစ်ရေတိုက်စားမှုကြောင့် နှစ်အလိုက်ကမ်းပါးပြောင်းလဲလာမှုအခြေအနေများ၊ တာလုံး​ရွှေ့ခြင်းလုပ်ငန်း​ဆောင်ရွက်​နေမှုများအား ရှင်းလင်းတင်ပြခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် အိပ်ပျက်ကျေးရွာအုပ်စုရှိ ကျေးရွာများအား ကမ်းပြို၍ ကိုင်းချောင်းကျေးရွာအုပ်စုသို့ ပြောင်းရွှေ့မည့် အိမ်ရာအကွက်ချထားမှုများကို ကြည့်ရှုစစ်ဆေးခဲ့ပြီး ဒုတိယခရိုင်အုပ်ချုပ်ရေးမှူးက အိပ်ပျက်ကျေးရွာအုပ်စုရှိ တာငုတ်၊ ငှက်ပျောတော၊ အုန်းတော၊ ဖောင်ဆိပ်ကျေးရွာများအား ကမ်းပြို၍ ကိုင်းချောင်းကျေးရွာအုပ်စု၊ ကွင်းအမှတ်(၁၃၈၇-ခ)၊ (၁၄၄၁)ကွင်းသို့ ပြောင်းရွှေ့ရန်လျာထားမှုများကို ရှင်းလင်းတင်ပြခဲ့ရာ တိုင်း​ဒေသကြီးဝန်ကြီးချုပ်က အိမ်ရာအကွက်ချထားမှုများအား စနစ်တကျဖြစ်​စေ​ရေးမှာကြားခဲ့ပါသည်။ ထို့​နောက် တိုင်းဒေသကြီးဝန်ကြီးချုပ်သည် ဟင်္သာတမြို့နယ်၊ အိပ်ပျက်ကျေးရွာအုပ်စု၊ ဖောင်ဆိပ်ကျေးရွာအနီးရှိ ဟင်္သာတကမ်းနားတာ တာမိုင်(၅/၄+၁၀၀')နှင့် ဧရာဝတီ-ဟင်္သာတတာ တာမိုင်(၅/၀+၄၅၀')ကြားတွင် အလျား (၀.၆၇၂)မိုင်၊ ထိပ်ဝအကျယ်(၁၄)​ပေ၊ ​အောက်​ခြေအကျယ်(၇၅)​ပေ၊ ပျမ်းမျှအမြင့်(၁၇)​ပေ ရှိ ဖြတ်တာ(၁-င) တည်ဆောက်ခြင်းလုပ်ငန်းများအား ကြည့်ရှုစစ်ဆေးခဲ့ပြီးတိုင်း​ဒေသကြီးဝန်ကြီးချုပ်က တာဝန်ရှိသူများအား မိုးဦးကျကာလတွင် ​ရေ​ဘေးအန္တရာယ်မဖြစ်​စေ​ရေး​ဆောင်ရွက်ရန်၊ ဖြတ်တာတည်​ဆောက်ခြင်းလုပ်ငန်းများအား သတ်မှတ်ကာလအတွင်း အချိန်မီပြီးစီး​ရေးနှင့် ကြံ့ခိုင်မှုရှိ​စေ​ရေး အ​လေးထား​ဆောင်ရွက်ရန် မှာကြားခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် ဟင်္သာတမြို့နယ်အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမတွင် ပြုလုပ်သည့် ဆီထွက်သီးနှံအထူးဇုန် စိုက်ပျိုးထုတ်လုပ်မည့် အခြေအနေနှင့်ပတ်သက်သည့် ​တောင်သူများနှင့် တွေ့ဆုံပွဲသို့ တက်ရောက်ခဲ့ပြီး တိုင်းဒေသကြီးဝန်ကြီးချုပ်က“ တိုင်း​ဒေသကြီးတွင် ဆီထွက်သီးနှံက်စိုက်ပျိုးဖြစ်ထွန်း​အောင်မြင်သည့် ​ဒေသများတွင်မြေပဲ၊ နှမ်း၊ ​နေကြာများကို အင်တိုက်အားတိုက်ဆောင်ရွက်နိုင်​ရေးအတွက် ဇုန်အလိုက်သတ်မှတ်၍ စုဖွဲ့စိုက်ပျိုး​ဆောင်ရွက်မှာဖြစ်​ကြောင်း၊ ဟင်္သာခရိုင်နှင့် မြန်အောင်ခရိုင်အား ဆီထွက်သီးနှံဇုန်(၁)နှင့် မအူပင်ခရိုင်အား ဇုန်(၂)အဖြစ်သတ်မှတ်ထားပါကြောင်း၊ ​ဆီထွက်ထွက်သီးနှံစိုက်ပျိုးမည့် ဇုန် ၂ ခုအပါအဝင် တိုင်း​ဒေသကြီးတစ်ခုလုံ ​အောင်မြင်​အောင် စိုက်ပျိုးရမှာဖြစ်​ကြောင်း၊ တောင်သူ အသိပညာပေးခြင်းလုပ်ငန်းများ ဆောင်ရွက်နိုင်ရန် ပညာရှင်များလည်းဖိတ်​ခေါ်​​ဆောင်ရွက်ထားပါ​ကြောင်း၊ တိုင်းဒေသကြီးတွင် ဆီဖူလုံမှုရှိရန် ဆီထွက်သီးနှံစိုက်ဧက များကို တိုးချဲ့စိုက်ပျိုးလျှက်ရှိပါ​ကြောင်း၊ ၂၀၂၅-၂၀၂၆ ခုနှစ်တွင် တိုင်း​ဒေသကြီးတွင် ဆီဖူလုံမှုရှိ​စေ​ရေး ရည်မှန်းချက်ထား​ဆောင်ရွက်လျက်ရှိပါ​ကြောင်း၊ နေကြာသီးနံအား သီးညှပ်စိုက်ပျိုးခြင်းထက် သီးသန့်စိုက်ပျိုးခြင်းသည် ပိုမိုဖြစ်ထွန်း​အောင်မြင်သည်ကို​တွေ့ရှိရပါ​ကြောင်း၊ နေကြာသီးနှံ အောင်မြင်ဖြစ်ထွန်းရေးအတွက် ဝတ်မှုံကူးရာတွင် အ​​ထောက်အကူပြုသည့် ပျားမွေးမြူရေးလုပ်ငန်းကိုလည်း​အောင်မြင်​အောင်​ဆောင်ရွက်ရမည်ဖြစ်​ကြောင်း၊ ​ဖွဲနုဆီထုတ်လုပ်နိုင်ရေးအတွက်လည်း ဖွဲနုဆီစက်ရုံများတည်​ထောင်နိုင်​ရေး ဆောင်ရွက်လျက်ရှိပါကြောင်းနှင့် တိုင်း​ဒေသကြီးမှ နှစ်စဥ်ဖွဲနုမက်ထရစ်တန်ချိန် ခြောက်သိန်း​ကျော် ထွက်ရှိပါကြောင်း၊ ဆီထွက်သီးနှံစိုက်ပျိုးရေးနှင့်ပတ်သက်သည့် ထောက်ပံ့မှုများရရှိရန်အတွက်လည်း ​ဆောင်ရွက်​ပေးမည်ဖြစ်ပါ​ကြောင်း၊ စိုက်ပျိုးသီးနှံများပန်းတိုင်အထွက်နှုန်း​ရောက်ရှိ​ရေး၊ ဆီဖူလုံမှုရှိ​စေ​ရေးနှင့် ရည်မှန်းချက်များ​အောင်မြင်​စေ​ရေးအတွက် အားလုံးဝိုင်းဝန်းကြိုးပမ်းဆောင်ရွက် ကြစေလိုကြောင်း” အမှာစကားများပြောကြားသည်။ ထို့နောက် ဆီထွက်သီးနှံအထူးဇုန်(၁) တာဝန်ခံက ၂၀၂၄-၂၀၂၅ခုနှစ်၊ ဆီထွက်သီးနှံ(မြေပဲ၊ နှမ်း၊ နေကြာ) အထူးဇုန်ဧရိယာများ စိုက်ပျိုးထုတ်လုပ် ဆောင်ရွက်ထားရိမှုများကို ရှင်းလင်းတင်ပြခဲ့ပြီးနောက် တောင်သူများနှင့် အစည်းအဝေးသို့တက်ရောက်လာသူများ၏ အထွေထွေဆွေးနွေးတင်ပြချက်များအပေါ် တိုင်းဒေသကြီးဝန်ကြီးချုပ်က လိုအပ်သည်များကို ဖြည့်စွက်ဆွေးနွေးခဲ့ပြီး ‌ဆီထွက်သီးနှံအထူးဇုန် စိုက်ပျိုးထုတ်လုပ်မည့် အခြေအနေနှင့်ပတ်သက်၍ အောင်မြင်စွာအကောင်အထည်ဖော် ဆောင်ရွက်နိုင်ရေးတွက် ပေါင်းစပ်ညှိနှိုင်းဆောင်ရွက်ပေးခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် ဟင်္သာတမြို့နယ်၊ ဒူးယားမြို့ရှိ သုတရွှေကြယ်စင်စာကြည့်တိုက်သို့ သွားရောက်ကာ နွေရာသီကျောင်းပိတ်ရက်တွင် အချိန်ကိုအကျိုးရှိစွာ အသုံးချ၍ စာကြည့်တိုက်၌စာပေလာရောက်ဖတ်ရှုသည့် ကလေးငယ်များအား ရင်းရင်းနှီးနှီးနှုတ်ဆက်အားပေးပြီး တိုင်းဒေသကြီးဝန်ကြီးချုပ်က စာကြည်တိုက်များတွင် သုတ၊ ရသစာအုပ်စာပေများပိုမိုပြည့်စုံစွာထားရှိရေး၊ တောင်သူများအတွက်အကျိုးပြုစေမည့် စိုက်ပျိုးရေးနှင့်ပတ်သက်သည့် စာအုပ်စာပေများ၊ နေ့စဉ်ထုတ်သတင်းစာများထားရှိရေးနှင့် ရှင်သန်ခိုင်မာသည့် စာကြည့်တိုက်အဖြစ် ဆက်လက်ရပ်တည်နိုင်ရေး၊ စာကြည့်တိုက်များဖွံ့ဖြိုးတိုးတက်​ရေးနှင့် စာဖတ်ရှိန်မြှင့်တင်​ရေးအတွက် စာကြည့်တိုက်ကော်မတီစနစ်တကျဖွဲ့စည်းနိုင်ရန် တာဝန်ရှိသူများက ဝိုင်းဝန်ကူညီဆောင်ရွက်ပေးစေရေးတို့ကိုမှာကြားခဲ့ပြီး စာကြည့်တိုက်အတွက် အလှူငွေများပေးအပ်ရာ စာကြည့်တိုက်မှူးနှင့် တာဝန်ရှိသူများက လက်ခံရယူခဲ့သည်။

ဧရာဝတီတိုင်းဒေသကြီး၊ မြန်​အောင်ခရိုင်၊ အင်္ဂပူမြို့နယ်၊ ကွင်းကောက်မြောက်ကျေးရွာအုပ်စုရှိ တောင်သူဦးပြည့်ဖြိုးဟန်၏ စိုက်ဧက(၃)ဧကတွင် ၂၀၂၃-၂၀၂၄ ခုနှစ်၊ ဆင်းသုခစပါး နွေစပါးစံကွက်ရိတ်သိမ်းပွဲ အခမ်းအနားကို ယနေ့နံနက်ပိုင်းက ပြုလုပ်ခဲ့ရာ တိုင်းဒေသကြီးဝန်ကြီးချုပ်ဦးတင်မောင်ဝင်းသည် တာဝန်ရှိသူများနှင့်အတူ တက်ရောက်ကြည့်ရှုအားပေးခဲ့သည်။

ဧရာဝတီတိုင်းဒေသကြီး၊ ပုသိမ်မြို့၏ ကျက်သရေဆောင် ရှေးဟောင်းသမိုင်းဝင် ရွှေမုဋ္ဌောစေတီတော်မြတ်ကြီး၏ ရင်ပြင်တော်၌ ၁၃၈၆ ခုနှစ်၊ ကဆုန်ညောင်ရေသွန်းလောင်းပူဇော်ပွဲနှင့် ဆွမ်းဆန်တော်ဆက်ကပ်လှူဒါန်းပွဲကျင်းပနိုင်ရေး လုပ်ငန်းညှိနှိုင်းအစည်းအဝေးကို ယနေ့နံနက်ပိုင်းက တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ(၁) တွင် ပြုလုပ်ခဲ့သည်။

နိုင်ငံတော်စီမံအုပ်ချုပ်ရေးကောင်စီအဖွဲ့ဝင်၊ တိုင်းဒေသကြီးဝန်ကြီးချုပ်နှင့်အဖွဲ့သည် မအူပင်ခရိုင်၊ ပန်းတနော်မြို့နယ်၊ ဘုရားချောင်းကျေးရွာအုပ်စုရှိ Global Earth Agro & Aqua Industry Public Co., Ltd သို့သွားရောက်၍ စပါးခွံလောင်စာသုံး Gasifier engine ဖြင့် လျှပ်စစ်ဓါတ်အားပေးစက်ရုံ တည်ဆောက်တပ်ဆင်ရေးလုပ်ငန်းဆောင်ရွက်နေမှုများအား သွားရောက်ကြည့်ရှုအားပေးခဲ့ရာ Global Earth Agro & Aqua Industry Public Co., Ltd ဥက္ကဋ္ဌနှင့် တာဝန်ရှိသူများက စက်ရုံတွင် Gasifier စနစ်ဖြင့် လျှပ်စစ် 12MW ထုတ်လုပ်ရန်အတွက် Reactor မီးဖို (၁၂) လုံးတည်ဆောက်ထားရှိမှု၊ မီးဖိုနှင့်ဆက်စပ်လည်ပတ်မည့် gas engine (၁၃) လုံး ရောက်ရှိတပ်ဆင်ထားမှု၊ Gas ပို့လွှတ် စမ်းသပ်ထုတ်လုပ်နေမှုနှင့် အဆင့်ဆင့်ထုတ်လုပ်သွားမည့်အခြေအနေများ၊ သန့်စင်ဓာတ်ငွေ့များကို ဓာတ်ငွေ့လှောင်ကန်တွင် စုဆောင်းပြီး Gasifier Engine သို့ ပို့လွှတ်ကာ လျှပ်စစ်ထုတ်လုပ်သည့်စနစ်၊ စပါးခွံများစနစ်တကျ သိုလှောင်နိုင်ရန် သိုလှောင်ရုံများ တည်ဆောက်နေမှု၊ CARBON-BASED ORGANIC NPK FERTILIZER စက်ရုံတည်ဆောက်ရေးစီမံကိန်း လျာထားဆောင်ရွက်နေမှု၊ ရေထိန်းကန်များ၊ ရေသွင်းရေထုတ် မြောင်းများ၊ ရေထိန်းတံခါးနှင့် ငါးမွေးကန်များတည်ဆောက်ပြီးစီးမှု၊ ဇီဝလောင်စာသုံး စပါးခွံလျှပ်စစ်ဓါတ်အားပေးစက်ရုံ တည်ဆောက်တပ်ဆင်ရေးလုပ်ငန်းများ ဆောင်ရွက်နေမှု၊ ဇီဝလောင်စာသုံး Biomass စပါးခွံ အသုံးပြု၍ Steam Turbine စနစ်ဖြင့် လျှပ်စစ်ဓါတ်အားထုတ်လုပ်သည့်စက်ရုံတွင် Steam Turbine နှစ်လုံးနှင့် ဆက်စပ်ပစ္စည်းများ တပ်ဆင်ပြီးစီးမှု၊ ခေတ်မီ circular tank (intensive culture) စနစ်ဖြင့် စမ်းသပ်ငါးမွေးမြူနေခြင်း၊ ငါးအသားလွှာပြုပြင်ထုတ်လုပ်ခြင်းနှင့် ထွက်ရှိငါးများအား အေးခဲစက်ရုံတွင် အအေးပေးသည့် စနစ်အတွက် စက်ပစ္စည်းများ တပ်ဆင်ပြီးစီးနေမှုများ၊ Automatic cold storage warehouse စနစ်အတွက် racking system များ တပ်ဆင်နေမှုများနှင့် ပတ်သက်၍ လိုက်လံရှင်းလင်းတင်ပြခဲ့သည်၊၊ ထို့နောက် ကုမ္ပဏီ အစည်းအဝေးခန်းမတွင် Global Earth Agro & Aqua Industry Public ကုမ္ပဏီလိမိတက်ဥက္ကဌက စီမံကိန်းလုပ်ငန်း ဆောင်ရွက်ပြီးစီမှု၊ စီမံကိန်းလုပ်ငန်းအတွက် လိုအပ်သော လျှပ်စစ်ဓာတ်အားကို စပါးခွံလောင်စာသုံး(Gasifier)မှ (၁၂)မဂ္ဂါဝပ်နှင့် စပါးခွံလောင်စာသုံး ရေနွေးငွေ့လျှပ်စစ်ဓာတ်အားမှ (၃၀)မဂ္ဂါဝပ်ဖြန့်ဖြူး ထုတ်လုပ်ပေးနိုင်ရန် အကောင်အထည်ဖော်ဆောင်ရွက်နေမှု၊ စီမံကိန်းတစ်ခုလုံး ပြီးစီးပါက ငါးမွေးမြူရေးမှစ၍ တန်ဖိုးမြင့်ထုတ်ကုန်အမျိုးမျိုးကို ပြည်တွင်း၊ ပြည်ပဈေးကွက် များထံသို့ ရောင်းချနိုင်မည့်အခြေအနေများ၊ ပြည်တွင်းစားသုံးမှုဖူလုံရေး၊ သွင်းကုန်အစားထိုး စီမံချက်နှင့် နိုင်ငံခြားဝင်ငွေတိုးမြှင့်ရရှိရေးအတွက် အထောက်အကူပြုနိုင်မည့်အခြေအနေများ၊ ငါး၊ ပုဇွန်မွေးမြူရေးလုပ်ငန်းများနှင့် တိရစ္ဆာန်အစာတောင့်ထုတ်လုပ်မည့်အခြေအနေများ၊ ISO လက်မှတ်ရ ဓာတ်ခွဲခန်းလုပ်ငန်းဆောင်ရွက်မည့်အခြေအနေများနှင့် ၂၀၂၄ ခုနှစ် လူရည်ချွန် မောင်မယ်များ လာရောက်လေ့လာခြင်း မှတ်တမ်းများအား ရှင်းလင်းတင်ပြခဲ့သည်။ ထို့နောက် တိုင်းဒေသကြီးဝန်ကြီးချုပ်က “ gasifier engine နှင့် Steam Turbine တို့ဖြင့် လျှပ်စစ်ထုတ်ယူနိုင်ရေးအတွက် စပါးခွံလိုအပ်ချက်နှင့် ငါးအစာတောင့်အတွက် ကုန်ကြမ်းလိုအပ်ချက်အပေါ် " ဖြည့်စွက်ဆွေးနွေးခဲ့ပြီး နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်က "နိုင်ငံတော်၏လျှပ်စစ်လိုအပ်ချက်အား တစ်ဘက်တစ်လမ်းမှဖြည်ဆည်းပေးသည့်အနေဖြင့် စပါးခွံလောင်စာအသုံးပြု gasifier engine စနစ်/Steam Turbine စနစ်တို့ဖြင့် (၄၂)မဂ္ဂါ၀ပ်ထုတ်လုပ်နိုင်ရေးစက်တပ်ဆင်လျက်ရှိရာ လျာထားသတ်မှတ်ကာလအတွင်းပြီးစီးနိုင်ရေးနှင့် ငါးအစာတောင့်ထုတ်လုပ်ရာတွင်လိုအပ်သောကုန်ကြမ်းများအား တိုင်းဒေသကြီးမှဖြည့်ဆည်း​ပေးနိုင်ရေး လုပ်ငန်းအောင်မြင်အောင်ကြိုးပမ်းဆောင်ရွက်ရေး" ညှိနှိုင်း ပေါင်းစပ်ဆောင်ရွက်ပေးခဲ့ကာ နိုင်ငံတော်စီမံအုပ်ချုပ်ရေးကောင်စီအဖွဲ့ဝင်နှင့် တိုင်းဒေသကြီးဝန်ကြီးချုပ်တို့က ဧည့်သည်တော် မှတ်တမ်းလွှာတွင် လက်မှတ်ရေးထိုးခဲ့ကြောင်းသိရှိရပါသည်။