အပြည်ပြည်ဆိုင်ရာသဘာဝဘေးအန္တရာယ် ထိခိုက်ဆုံးရှုံးနိုင်ခြေလျှော့ချရေးနေ့ အထိမ်းအမှတ်အခမ်းအနားကို ယနေ့နံနက်ပိုင်းက ပုသိမ်မြို့၊ ဧရာရွှေဝါခန်းမ၌ ပြုလုပ်ခဲ့ရာ တိုင်းဒေသကြီးဝန်ကြီးချုပ် ဦးတင်မောင်ဝင်း၊ အနောက်တောင်တိုင်း စစ်ဌာနချုပ် တိုင်းမှူး၊ ပုသိမ်လေတပ်စခန်းဌာနချုပ်မှူး၊ အစိုးရအဖွဲ့ဝင်ဝန်ကြီးများနှင့် ဌာနဆိုင်ရာများ တက်ရောက်ခဲ့ကြသည်။ ဦးစွာတိုင်းဒေသကြီးဝန်ကြီးချုပ်က“ အပြည်ပြည်ဆိုင်ရာသဘာဝဘေးအန္တရာယ် ထိခိုက် ဆုံးရှုံးနိုင်ခြေလျှော့ချရေးနေ့ကို ၂၀၀၉ ခုနှစ်၊ ဒီဇင်ဘာလ(၂၁)ရက်နေ့တွင် ပြုလုပ်ခဲ့သည့် ကမ္ဘာ့ကုလသမဂ္ဂအထွေထွေညီလာခံ၏ ဆုံးဖြတ်ချက်အမှတ် (၆၄/၂၀၀)အရ နှစ်စဉ် အောက်တိုဘာလ (၁၃)ရက်နေ့တွင် ပြုလုပ်ရန် အတည်ပြုသတ်မှတ်ခဲ့ပါကြောင်း၊ မြန်မာနိုင်ငံ တွင်လည်း ၂၀၁၀ ခုနှစ်မှစတင်၍ နိုင်ငံတော်အဆင့်အခမ်းအနားများ စတင်ကျင်းပပြုလုပ်ခဲ့ပြီး ဧရာဝတီတိုင်းဒေသကြီးတွင် ၂၀၁၃ ခုနှစ်က စတင်ကျင်းပပြုလုပ်ခဲ့ရာ ယခုနှစ်သည် နဝမအကြိမ် မြောက်အဖြစ် ဆောင်ရွက်ခြင်းဖြစ်ပါကြောင်း၊ ယခုနှစ် ၂၀၂၃ခုနှစ်အတွက် အပြည်ပြည်ဆိုင်ရာ သဘာဝဘေးလျော့ပါးရေးနေ့ အထိမ်းအမှတ်အခမ်းအနားအဖြစ် ကမ္ဘာ့ကုလသမဂ္ဂအဖွဲ့ကြီးက “ Fighting Inequality for A Resilient Future” “ ဘေးဒဏ်ကြံ့ကြံ့ခံနိုင်ဖို့၊ မညီမျှမှုတွေ တိုက်ဖျက်စို့ ”ဟူသော ဆောင်ပုဒ်ဖြစ်ပါကြာင်း၊ ၂၀၂၃ခုနှစ်၊ ဇန်နဝါရီလမှ စက်တင်ဘာလအတွင်း ဧရာဝတီတိုင်းဒေသကြီးတွင် မီးဘေး၊ လေဘေး၊ ရေဘေး၊ ကမ်းပြိုဘေး၊ မိုးကြိုးဘေး၊ ငလျင်ဘေး၊ ထူးခြားဘေး (တောဆင်ရိုင်းဘေးနဲ့ မိချောင်းဘေး) စုစုပေါင်းဘေးဖြစ်ပွားမှု (၃၂၂) ကြိမ် ရှိခဲ့ပါကြောင်း၊ ၎င်းဖြစ်စဉ်များကို ကြည့်ခြင်းအားဖြင့် ရာသီဥတုပြောင်းလဲမှုကြောင့်သော် လည်းကောင်း ဘက်ညီမျှမှုမရှိသောဖွံ့ဖြိုးတိုးတက်မှုကြောင့်သော်လည်းကောင်း လက်ရှိကြုံတွေ့ နေရသောအန္တရာယ်ကျရောက်နိုင်ခြေများဟာ အဆများစွာတိုးပွားလာနိုင်သည်ကိုစိစစ်တွေ့ရှိ ရပါကြောင်း၊ ဧရာဝတီတိုင်းဒေသကြီးအတွင်းဖြစ်ပွားသည့် ဘေးအန္တရာယ်များအနက် (၅၀%) ကျော်သည် လေပြင်းဘေးဖြစ်ကြောင်း စိစစ်တွေ့ရှိရသည့်အတွက် လေပြင်းဘေးဒဏ်ကြံ့ကြံ့ ခံနိုင်ရန် ရည်ရွယ်ပြီးရပ်ရွာအတွင်းရှိ ကြံ့ခိုင်မှုအားနည်းသောအိုးအိမ်များကို အားဖြည့်မွမ်းမံ ပြုပြင်ပေးခြင်းများကိုလည်း ဆောင်ရွက်ပေးလျက်ရှိပါကြောင်း၊ မိမိတို့တိုင်းဒေသကြီးအနေဖြင့် မေလ (၁၃) ရက်နေ့က ဝင်ရောက်တိုက်ခတ်ခဲ့သည့် အလွန့်အလွန်အားကောင်းသည့် မိုခါ ဆိုင်ကလုန်းမုန်တိုင်းဘေးအတွက် ကြိုတင်သတိပေးချက်များရရှိချိန်မှစတင်၍ တိုင်းဒေသကြီး သဘာဝဘေးအန္တရာယ်ဆိုင်ရာ စီမံခန့်ခွဲမှုအဖွဲ့အစည်းအဝေးခေါ်ယူပြီး  ကြိုတင်ပြင်ဆင်ခြင်း၊ အရေးပေါ်တုံ့ပြန်ခြင်းနှင့် ပြန်လည်ထူထောင်ရေး လုပ်ငန်းစဉ်အဆင့်ဆင့်အားဆွေးနွေး၍ ခရိုင်၊ မြို့နယ်၊ ရပ်ကျေး များအထိ လိုက်ပါဆောင်ရွက်နိုင်ရန်နှင့် ဆုံးရှုံးမှုများနည်းနိုင်သမျှနည်းအောင် ကြိုတင်စီမံဆောင်ရွက်ခဲ့ပါကြောင်း၊ ဘေးအန္တရာယ်ကိုတုံ့ပြန်ဆောင်ရွက်တဲ့အခါ ပထမဦးစွာ ထိခိုက်ဆုံးရှုံးမှု နည်းအောင်ဆောင်ရွက်ရတာဖြစ်သည့်အတွက် ကြိုတင်ပြင်ဆင်သည့်အပိုင်းက ပိုအရေးကြီးပါကြာင်း၊ ကြိုတင်ပြင်ဆင်မှုအပိုင်းမှာလည်း ကြိုတင်သတိပေးစနစ်နှင့် ကြိုတင် ပြင်ဆင်ခြင်း စနစ်ကလွန်စွာကောင်းမွန်ရမှာဖြစ်ပြီး အချိန်မီသိ၊ အချိန်မီဆောင်ရွက် တုံ့ပြန်နိုင်မှသာ ကျရောက်လာတဲ့ဘေးအန္တရာယ်များကို ရင်ဆိုင်နိုင်မှာဖြစ်ပါကြောင်းနှင့် ယခုနှစ် အပြည်ပြည်ဆိုင်ရာသဘာဝဘေးအန္တရာယ် ထိခိုက်ဆုံးရှုံးနိုင်ခြေလျှော့ချရေးနေ့ အထိမ်းအမှတ် ဆောင်ပုဒ်ဖြစ်သည့် “ Fighting Inequality for A Resilient Future” “ ဘေးဒဏ်ကြံ့ကြံ့ခံနိုင်ဖို့၊ မညီမျှမှုတွေတိုက်ဖျက်စို့ ” ဟူသော ဆောင်ပုဒ်အတိုင်း မိမိနိုင်ငံ၊ မိမိတိုင်းဒေသကြီးကို ဘေးအန္တရာယ်များမှလျော့နည်းသက်သာစေရန်အားလုံးပူးပေါင်းဆောင်ရွက်ကြစို့ဟု” တိုက်တွန်း အမှာစကားများ ပြောကြားသည်။ ဆက်လက်၍  တိုင်းဒေသကြီးဝန်ကြီးချုပ်နှင့်ဧည့်သည်တော်များသည် အပြည်ပြည်ဆိုင်ရာ သဘာဝဘေးအန္တရာယ် ထိခိုက်ဆုံးရှုံးနိုင်ခြေလျှော့ချရေးနေ့ အထိမ်းအမှတ်သို့ ကုလသမဂ္ဂအထွေထွေ အတွင်းရေးမှူးချုပ်က ပေးပို့သော သဝဏ်လွှာသတင်းစကားရုပ်သံနှင့် မိုခါမုန်တိုင်း တုံ့ပြန်ဆောင်ရွက်မှုဆိုင်ရာ မှတ်တမ်းဗီဒီယိုပြသမှုအား ကြည့်ရှုအားပေးပြီးနောက် စုပေါင်းမှတ်တမ်းတင်ဓာတ်ပုံများရိုက်ကူးခဲ့ကာ အပြည်ပြည်ဆိုင်ရာသဘာဝဘေးအန္တရာယ် ထိခိုက်ဆုံးရှုံးနိုင်ခြေလျှော့ချရေးနေ့ အထိမ်းအမှတ်အဖြစ်ပြသထားသောပြခန်းများအား လှည့်လည် ကြည့်ရှုခဲ့ကြကြောင်းသိရသည်။

ဧရာဝတီတိုင်းဒေသကြီး၊ ပုသိမ်မြို့၊ ပုသိမ်ပညာရေးဒီဂရီကောလိပ် ပညာရတနာခန်းမ၌ ယနေ့နံနက်ပိုင်းကပညာရေးဘွဲ့(B.Ed)စာပေးစာယူ ပထမနှစ်(၄/၂၃)နှင့် ဒုတိယနှစ်(၂/၂၂) သင်တန်းသား၊ သင်တန်းသူများကြိုဆိုပွဲကိုပြုလုပ်ခဲ့ရာ တိုင်းဒေသကြီးဝန်ကြီးချုပ် ဦးတင်မောင်ဝင်းသည် အစိုးရအဖွဲ့ဝန်ကြီးများနှင့်အတူ တက်ရောက်၍ ကြိုဆိုဂုဏ်ပြု အားပေး စကားများပြောကြားခဲ့သည်။ ဦးစွာ ကြိုဆိုပွဲအခမ်းအနားကို သင်တန်းသား၊ သင်တန်းသူ ဆရာ၊ ဆရာမများက“ ကြိုဆိုလက်ကမ်းကံ့ကော်တန်း” သီချင်းဖြင့်သီဆိုဖွင့်လှစ်ခဲ့ပြီးနောက် တိုင်းဒေသကြီး ဝန်ကြီးချုပ်က “ မိမိတို့တိုင်းဒေသကြီး၏ ပညာရေးကဏ္ဍတွင် အားကိုးအားထားရသည့် ဆရာ၊ ဆရာမ များနှင့် တွေ့ဆုံခွင့်ရရှိသည့်အတွက် ဂုဏ်ယူဝမ်းမြောက်မိပါကြောင်း၊ ဆရာ၊ ဆရာမများသည် မိမိတို့ဖြတ်သန်းလာခဲ့သည့် အတွေ့အကြုံများကိုအခြေခံ၍ ဘာသာရပ်များအား ခေတ်နှင့်လျော်ညီစွာ လေ့လာသင်ယူ၍ ပြန်လည်သင်ကြားပေးလျက်ရှိနေပါကြောင်း၊ ခေတ်မီဖွံ့ဖြိုးတိုးတက်သော နိုင်ငံတော်သစ်တည်ဆောက်ရာတွင် ပညာရေးဖြင့်ရင်းနှီးမြှုပ်နှံရမှာ ဖြစ်ပါ ကြောင်းနှင့် ဆရာ၊ ဆရာမများသည် ပြုပြင်ပြောင်းလဲနေသော ပညာရေးစနစ်ကို မျက်ချည်ပြတ် မခံဘဲ အစဉ်လေ့လာသင်ယူပြီး အမြဲကြိုးစားနေရမည့် ထာဝရကျောင်းသားကြီးများဖြစ်ပါကြောင်း၊ ပညာရေးနှင့်ပတ်သက်၍ မိဘများက မိမိတို့၏သားသမီးများအပေါ် မျှော်မှန်းချက် များထားရှိသကဲ့သို့ ဆရာ၊ ဆရာမများအနေဖြင့်လည်း မိမိတို့တပည့်သားသမီးများအား ပညာရေး မြင့်သထက်မြင့်၍ ထူးချွန်ထက်မြက်သူများဖြစ်အောင် ရည်မှန်းသင်ကြားနေသူများ လည်းဖြစ်ကြပါကြောင်း၊ ဆရာ၊ ဆရာမများသည် တပည့်ပေါင်းမြောက်များစွာ မွေးထုတ်ပေးလျက်ရှိရာ တပည့်များ၏ စံနမူနာပြများဖြစ်ကြပါကြောင်း၊ ကျောင်းသန့်ရှင်းရေးနှင့် ကျောင်းဥပဓိရုပ် ကောင်းမွန်ရေးအတွက်လည်း ဆရာ၊ ဆရာမများ၊ ကျောင်းသားကျောင်းသူများ၊ မိဘပြည်သူ များနှင့် အုပ်ချုပ်ရေးအဖွဲ့အစည်းများ ပူးပေါင်းဆောင်ရွက်သွားကြရန်လည်း လိုအပ်ပါကြောင်း၊  ဆရာ၊ ဆရာမများအနေဖြင့် ဗလငါးတန်နှင့်ပြည့်စုံသည့် တပည့်ကောင်းများပေါ်ထွက်လာစေရန် ပြုစုပျိုးထောင်ပေးရန် လိုပါကြောင်း၊ စနစ်သစ်Grade-12 တွင် မိမိတို့၏တပည့်များ ထူးထူး ချွန်ချွန်ဖြင့် ရာနှုန်းပြည့်အောင်မြင်စေရေးအတွက်လည်း ဝိုင်းဝန်းဆောင်ရွက်ပေးကြရန်” ကြိုဆိုဂုဏ်ပြုအားပေးစကားများပြောကြားခဲ့ပြီး ထောက်ပံ့ငွေများကိုပေးအပ်ခဲ့ရာ ပုသိမ်ပညာရေး ဒီဂရီကောလိပ်မှ ကျောင်းအုပ်ကြီးက လက်ခံရယူခဲ့သည်။ ထို့နောက် တိုင်းဒေသကြီးဝန်ကြီးချုပ်အား ပညာရေးဘွဲ့(B.Ed)စာပေးစာယူပထမနှစ် (၄/၂၃)နှင့်ဒုတိယနှစ်(၂/၂၂)သင်တန်းသို့ တက်ရောက်လာသည့် ဘာသာရပ်အလိုက် ဆရာမများ စာရင်းအားတင်ပြခဲ့ပြီးနောက် ဝန်ကြီးချုပ်သည် ဆရာ၊ ဆရာများနှင့် ရင်းရင်းနှီးနှီး တွေ့ဆုံ နှုတ်ခဲ့သည်။ ပုသိမ်ပညာရေးဒီဂရီကောလိပ်တွင် ပညာရေးဘွဲ့ B.Ed စာပေးစာယူ သင်တန်း အမှတ်စဉ် (၄/၂၃) ပထမနှစ် သင်တန်းသား၊ သင်တန်းသူ (၃၇၈)ဦး၊ (၂/၂၂)ဒုတိယနှစ် သင်တန်းသား၊ သင်တန်းသူ(၃၈၁)ဦး၊ စုစုပေါင်း(၇၅၉)ဦး သင်တန်းတက်ရောက်လျက်ရှိကြောင်း သိရသည်။

ပညာရေးဘွဲ့ B.Ed စာပေးစာယူသင်တန်းအမှတ်စဉ် (၄/၂၃) ပထမနှစ်သင်တန်းသား၊ သင်တန်းသူများအား ကြိုဆိုပွဲအခမ်းအနားကို ယနေ့နံနက်ပိုင်းက ဧရာဝတီတိုင်းဒေသကြီး၊ ဘိုကလေးမြို့၊ ဘိုကလေးပညာရေးဒီဂရီကောလိပ်၊ ပညာဂုဏ်ရည်ခန်းမတွင် ပြုလုပ်ခဲ့ရာ ကြိုဆိုပွဲသို့ တိုင်းဒေသကြီးဝန်ကြီးချုပ်ဦးတင်မောင်ဝင်းသည် အစိုးရအဖွဲ့ဝန်ကြီးများနှင့်အတူ တက်ရောက်၍ အားပေးစကားများပြောကြားခဲ့သည်။ ဦးစွာ တိုင်းဒေသကြီးဝန်ကြီးချုပ်က“ မိမိတို့တိုင်းဒေသကြီးအတွက် အားထားရသည့် ဆရာ၊ ဆရာမများ ဖြစ်သည့်အတွက် ယခုကဲ့သို့လာရောက်အားပေးစကားပြောကြားခြင်း ဖြစ်ပါကြောင်း၊ အခြေခံပညာ(Grade-12) တက္ကသိုလ်ဝင်စာမေးပွဲကို ယခင်နှစ်က အကြောင်း ကြောင်းကြောင့်မဖြေဆိုဖြစ်ခဲ့သည့် ကျောင်းသား၊ ကျောင်းသူများ၊ စာမေးပွဲကျရှုံးခဲ့သူများ အနေဖြင့်လည်း ယခုနှစ်တွင် ဝင်ရောက်ဖြေဆိုခွင့်များရရှိမည်ဖြစ်၍ ကျောင်းသားကျောင်းသူများ အားလုံးဝင်ရောက်ဖြေဆိုနိုင်ရေးနှင့် အောင်ချက်မြင့်မားရေးအတွက် တက္ကသိုလ်များမှ ပါမောက္ခဆရာ၊ ဆရာမများ၊ အခြေခံပညာကျောင်းများမှ ဆရာ၊ ဆရာမများပူးပေါင်း၍ ဆွေးနွေး ပွဲများပြုလုပ်ရန် ဆောင်ရွက်လျက်ရှိပါကြောင်း၊ ခေတ်မီဖွံ့ဖြိုးတိုးတက်သော နိုင်ငံတော်သစ်တည်ဆောက်ရာတွင် ပညာရေးဖြင့်ရင်းနှီးမြှုပ်နှံရမှာဖြစ်ပါကြောင်းနှင့် ဆရာ၊ ဆရာမများသည် ပြုပြင်ပြောင်းလဲနေသော ပညာရေးစနစ်ကို မျက်ချည်ပြတ်မခံဘဲ အစဉ်လေ့လာသင်ယူပြီး အမြဲကြိုးစားနေရမည့် ထာဝရကျောင်းသားကြီးများဖြစ်ပါကြောင်း၊ ဆရာ၊ ဆရာမများသည် နာသုံးနာကိုအခြေခံ၍ ကျောင်းသား ကျောင်းသူများ၏ စွမ်းရည်သတ္တိနှင့် ကိုယ်ရည်ကိုယ်သွေး ပြည့်ဝစေရေးနှင့် လမ်းမှန်ရောက်အောင် သွန်သင်ဆုံးမပေးကြသူများဖြစ်သည်ကို တွေ့နေရပါကြောင်း၊ ဆရာ၊ ဆရာများသည်  ကျောင်းသား၊ ကျောင်းသူများ၏ စံနမူပြများဖြစ်သဖြင့် ဝတ်စားဆင်ယင်မှုစနစ်တကျရှိရန်လည်း လိုအပ်ပါကြောင်း၊ ယခုသင်တန်းသို့ တက်ရောက် လာသည့် ဆရာ၊ ဆရာမများအား လေးစားအားထားပါကြောင်းနှင့် ပညာပြည့်ဝ နှလုံးလှ၍ ဗလငါးတန်နှင့်ပြည့်စုံသော ကျောင်းသား၊ ကျောင်းသူများမွေးထုတ်ပေးနိုင်သည့် စံနမူနာပြ ဆရာ၊ ဆရာမများဖြစ်ကြပါစေကြောင်း” အားပေးအမှာစကားပြောကြားသည်။ ဆက်လက်၍ တိုင်းဒေသကြီးဝန်ကြီးချုပ်အား (၄/၂၃) ပထမနှစ်သို့ မြို့နယ်အလိုက် တက်ရောက်သည့်ဆရာ၊ ဆရာမများစာရင်းအားတင်ပြခဲ့ပြီးနောက် တိုင်းဒေသကြီး ဝန်ကြီးချုပ်က ထောက်ပံ့ငွေများကိုပေးအပ်ခဲ့ရာ ဘိုကလေးပညာရေးဒီဂရီကောလိပ် ကျောင်းအုပ်ကြီးကလက်ခံရယူခဲ့သည်။ ဘိုကလေးပညာရေးဒီဂရီကောလိပ်တွင် ပညာရေးဘွဲ့ B.Ed စာပေးစာယူသင်တန်းအမှတ်စဉ် (၄/၂၃) ပထမနှစ် သင်တန်းသား၊ သင်တန်းသူ (၃၅၇)ဦး၊ (၂/၂၂)ဒုတိယနှစ် သင်တန်းသား၊ သင်တန်းသူ(၃၄၃)ဦး၊ စုစုပေါင်း(၇၀၀)ဦး သင်တန်း တက်ရောက်လျက်ရှိကြောင်းသိရသည်။

ဧရာဝတီတိုင်းဒေသကြီး အသေးစား၊ အငယ်စားနှင့် အလတ်စားစီးပွားရေးလုပ်ငန်းများ ဖွံ့ဖြိုးတိုးတက်ရေးအေဂျင်စီ၏ ဦးဆောင်မှုဖြင့် အသေးစား၊ အငယ်စားနှင့် အလတ်စားစီးပွားရေလုပ်ငန်း(MSME)ကြိမ်၊ ဝါး၊ ဗေဒါလက်မှုထုတ်ကုန်ပစ္စည်းပြပွဲနှင့်ဈေးရောင်းပွဲတော်ဖွင့်ပွဲ အခမ်းအနားကို ယနေ့နံနက်ပိုင်းက ငွေဆောင်မြို့၊ ယမုံနာဦးဟိုတယ်၌ ကျင်းပခဲ့ရာ တိုင်းဒေသကြီး ဝန်ကြီးချုပ်ဦးတင်မောင်ဝင်းနှင့် ဇနီး၊ အနောက်တောင်တိုင်းစစ်ဌာနချုပ်တိုင်းမှူးနှင့် ဇနီး၊ အစိုးရအဖွဲ့ဝင်ဝန်ကြီးများနှင့် ဇနီးများ၊ ဌာနဆိုင်ရာများတက်ရောက်ခဲ့သည်။  ဦးစွာ အသေးစား၊ အငယ်စားနှင့် အလတ်စားစီးပွားရေးလုပ်ငန်း (MSME) ကြိမ်၊ ဝါး၊ ‌ဗေဒါ လက်မှုထုတ်ကုန်ပစ္စည်းပြပွဲနှင့် ဈေးရောင်းပွဲတော်ဖွင့်ပွဲအခမ်းအနားအား အသေးစား၊ အငယ်စားနှင့် အလတ်စားစီးပွားရေးလုပ်ငန်းများ ဖွံ့ဖြိုးတိုးတက်ရေးအေဂျင်စီနာယက တိုင်းဒေသကြီးဝန်ကြီးချုပ်၊ အနောက်တောင်တိုင်းစစ်ဌာနချုပ်တိုင်းမှူးနှင့်အသေးစား၊ အငယ်စားနှင့် အလတ်စားစီးပွားရေးလုပ်ငန်းများ ဖွံ့ဖြိုးတိုးတက်ရေးအေဂျင်စီဥက္ကဋ္ဌ စီးပွားရေးရာဝန်ကြီးတို့က ဖဲကြိုးဖြတ်ဖွင့်လှစ်ပေးသည်။ ဆက်လက်၍ အသေးစား၊ အငယ်စားနှင့် အလတ်စားစီးပွားရေးလုပ်ငန်းများ ဖွံ့ဖြိုးတိုးတက်ရေးအေဂျင်စီနာယက တိုင်းဒေသကြီးဝန်ကြီးချုပ်က“ ပွင့်လင်းရာသီကို ရောက်ရှိလာပြီဖြစ်၍ ခရီးသွားများပိုမိုဝင်ရောက်လာတော့မည် ဖြစ်ပါကြောင်း၊ မိမိတို့တိုင်းေဒသကြီးတွင်ကြိမ်၊ ဝါး၊ ‌ဗေဒါ လက်မှုထုတ်ကုန်ပစ္စည်းများကို အရည်အသွေးရှိရှိ ထုတ်လုပ်နိုင်ပြီး ပြည်တွင်းသာမက ပြည်ပအထိတင်ပို့ရောင်းချလျက်ရှိပါကြောင်း၊ ကြိမ်၊ ဝါး၊ ‌ဗေဒါ လက်မှုထုတ်ကုန်ပစ္စည်းများကို အခြေခံ၍ MSME ထုတ်ကုန်ပစ္စည်းများ ပြပွဲနှင့်ဈေးရောင်းပွဲတော် ပြုလုပ်ရန်စီစဉ်ဆောင်ရွက်ခဲ့ပြီး ဇုန်အလိုက်ပြသဆောင်ရွက်သွားမှာဖြစ်ပါကြောင်း၊ ခရီးသွားဝင်ရောက်မှုအနေဖြင့် ယခုနှစ် ဇန်နဝါရီလမှ စက်တင်ဘာလအထိ (၁၁)သိန်းခွဲကျော် ဝင်ရောက်ခဲ့ပြီးဖြစ်ပါကြောင်း၊ တိုင်းဒေသကြီးအတွင်းရှိ  ခရီးသွားလုပ်ငန်းများသည် အလုပ်အကိုင်အခွင့်အလမ်းနှင့် ဝင်ငွေရှာဖွေပေးနေသည့် မီးခိုးမထွက်သည့် စက်ရုံများဖြစ်ပါကြောင်းနှင့်  ကမ်းခြေခရီးသွားလုပ်ငန်းများပိုမို ဖွံ့ဖြိုးတိုးတက်အောင် တစ်ဖက်မှလည်း ကုန်စည်ပြပွဲ၊ ဈေးရောင်းပွဲတော်များဖြင့် ဆောင်ရွက်ပေးခြင်းဖြစ်ပါကြောင်း”အဖွင့်အမှာစကားပြောကြားသည်။ ထို့နောက် တိုင်းဒေသကြီး ဝန်ကြီးချုပ်နှင့်ဧည့်သည်တော်များသည်  ဝါဝါဝင်းစိုက်ပျိုးေမွးမြူရေးကုမ္ပဏီမှပြသထားသည့် နွားနို့၊ ဒိန်ချဉ် ငါးဆီ၊ ပိုးရည် စသည့်ပစ္စည်း(၉)မျိုးအားလည်းကောင်း၊ ပုသိမ်ခရိုင်မှပြသထားသည့် ပုသိမ်ထီး၊ ဟာလဝါ၊ ငရုတ်ဆီ၊ ပဲငံပြာရည်၊ ပဲငါးပိ၊ ကိတ်၊ ပုစွန်၊ ငါးပိ၊ ငါးခြောက် အစရှိသည့်ထုတ်ကုန်ပစ္စည်း(၆၆ )မျိုးအားလည်းကောင်း၊ ဟင်္သာတခရိုင်မှပြသထားသည့် ကြက်အူချောင်း၊ ဝက်အူချောင်း၊ မုန့်ဟင်းခါးအနှစ်၊ မရွေး၊ ဘာလချောင်ကြော်၊ ပဲဆီ၊ ကြိမ်ထည်ပစ္စည်း၊ သင်ဖြူးဖျာ စသည့်ပစ္စည်း(၂၁)မျိုးတို့ကိုလည်းကောင်း၊ မြန်အောင်ခရိုင်မှပြသထားသည့် ထမင်းထုပ်၊ ထမင်းဘူး၊ ပဲလှော်၊ ငှက်ပျောခြောက်၊ ပဲဆီ၊ ကရေကရာ၊ မြေပဲယို၊ နှမ်းယို စသည့်ပစ္စည်း(၂၅)မျိုးအားလည်းကောင်း၊ မြောင်းမြခရိုင်မှပြထားသည့် ကြာဆန်၊ မရွေး၊ ငရုတ်ကောင်း၊ ကပ်စေးနှဲ၊ ငံပြာရည်ကြော်၊ ငါးပိထောင်း စသည့်ကုန်ပစ္စည်းများ(၁၅)မျိုးအားလည်းကောင်း၊ ကျုံပျော်ခရိုင်မှပြသထားသည့် ကြိမ်ထည်ပစ္စည်းများဖြင့်ပြုလုပ်သည့် စားပွဲအစုံ၊ ဆက်တီအစုံ၊ ဆုံလည်ကုလားထိုင်၊ ပိုက်ဆံအိတ်၊ လက်ဆွဲခြင်း စသည့် ပစ္စည်း(၆၁)မျိုးအားလည်းကောင်း၊ တိုင်းဒေသကြီးအသေးစားစက်မှုလက်မှုလုပ်ငန်းဦးစီးဌာနနှင့် အမျိုးသမီးအိမ်တွင်းမှုသက်မွေးလုပ်ငန်းပညာသင်တန်းကျောင်းတို့မှပြသထားသည့် ငှက်ပျော်ချည်နှင့်ယက်လုပ်သည့် အသုံး အဆောင်ပစ္စည်း(၄၄)မျိုးအားလည်းကောင်း၊ မအူပင်ခရိုင်မှပြသထားသည့် ပဲမုန့်၊ ဖရုံမုန့်၊ ကိတ်မုန့်၊ ငှက်ပျောကြော်၊ မရွေး၊ သင်ဖြူးဖျာ၊ ဖော့ဖျာစသည့်ပစ္စည်း(၂၉)မျိုးအားလည်းကောင်း၊ ဖျာပုံခရိုင်မှပြသထားသည့် ငါးရံ့ခြောက်၊ ငါးနှပ်ခြောက်၊ မျှင်ငါးပိ၊ ပုစွန်ခြောက်၊ မျှင်ငါးပိ စသည့်ပစ္စည်း(၅)မျိုးအားလည်းကောင်း၊ လပွတ္တာခရိုင်မှပြသထားသည့် ပုစွန်ချဉ်၊ ငါးပိ၊ ငါးခြောက်၊ ငံပြာရည်၊ ဂဏန်းပျော့၊ ဆား၊ ဆန်၊ လောင်စာတောင့်စသည့်ပစ္စည်း(၂၇ ) မျိုးအားလည်းကောင်း၊ Global Earth Agro & Aqua Industry Public Co., Ltdမှပြသထားသည့် ငါးတန်ငါး၊ ငါးအရေခွံကြော်၊ အသင့်စားဟင်းလျာစသည့်ပစ္စည်း(၇)မျိုးအားလည်းကောင်း လှည့်လည်ကြည့်ရှုအားပေးခဲ့သည်။ အဆိုပါ အသေးစား၊ အငယ်စားနှင့် အလတ်စားစီးပွားရေးလုပ်ငန်း (MSME) ကြိမ်၊ ဝါး၊ ‌ဗေဒါ လက်မှုထုတ်ကုန်ပစ္စည်းပြပွဲနှင့် ဈေးရောင်းပွဲတော်ကို ယခုလ ၁၅ရက်နေ့မှ ၁၆ရက်နေ့အထိ ၂ရက်တိုင်တိုင်ကျင်းပပြုလုပ်ရောင်းချပေးသွားမှာဖြစ်ကြောင်းသိရသည်။

ဧရာဝတီတိုင်းဒေသကြီးအတွင်းရှိ ဆေးရုံများတွင် တပ်ရင်းတပ်ဖွဲ့ဝင်များ၊ ဌာနဆိုင်ရာများ၊ ပြည်သူများမှ စုပေါင်းသန့်ရှင်းရေးလုပ်ငန်းများ ဆောင်ရွက်လျက်ရှိရာ တိုင်းဒေသကြီးအစိုးရအဖွဲ့ ဝန်ကြီးချုပ်ဦးတင်မောင်ဝင်းသည် အစိုးရအဖွဲ့ဝင် ဝန်ကြီးများနှင့်အတူ ယနေ့နံနက်ပိုင်းတွင် သန့်ရှင်းရေးဆောင်ရွက်နေမှုများအား လှည့်လည် ကြည့်ရှုအားပေးခဲ့သည်။ ဦးစွာ တိုင်းဒေသကြီးဝန်ကြီးချုပ်နှင့်အဖွဲ့သည်  ပုသိမ်မြို့ ခုတင်(၅၀၀)ဆံ့ပြည်သူ့ဆေးရုံကြီးသို့သွားရောက်၍ စုပေါင်းသန့်ရှင်းရေးဆောင်ရွက်နေမှုအား ကြည့်ရှုအားပေးခဲ့ပြီး  ပုသိမ်မြို့၊ အမှတ်(၈)ရပ်ကွက်ရှိ တိုင်းရင်းဆေးရုံဝန်းအတွင်း၌ တပ်ရင်းတပ်ဖွဲ့များ၊ ဌာနဆိုင်ရာများ၊ ပြည်သူများမှ စုပေါင်းသန့်ရှင်းရေး ဆောင်ရွက်နေမှုအားကြည့်ရှုအားပေးခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့်တာတန်ရှိသူများသည် ဓနုဖြူမြို့နယ်၊ ဖန်းခါးကွင်းကျေးရွာအုပ်စု၊ ကျွဲတလင်းကျေးရွာရှိ တောင်သူဦး မျိုးမြင့်၏ လယ် မြေတွင် ပြုလုပ်သည့် (   မှော်ဘီ-၃  )မျိုးစပါး (၉)ဧကအား ရိတ်သိမ်းခြွေလှေ့စက်ဖြင့် ရိတ်သိမ်းနေမှုများကို ကြည့်ရှုအားပေးခဲ့ပြီး တောင်သူများနှင့်တွေ့ဆုံ၍ တစ်ဧက (၁၀)တင်းပိုမိုတိုးတက်ထွက်ရှိစေရေးအတွက် အထွက်တိုး မျိုးစပါးများပြောင်းလဲအသုံးပြုခြင်း၊ စိုက်နည်းစနစ်များပြောင်းလဲစိုက်ပျိုးခြင်း၊ သဘာဝမြေဩဇာများအချိုးကျသုံးစွဲခြင်း၊ ပိုက်ဆံလျှော်သစ်စိမ်းမြေဩဇာ များမြေခံထည့်သွင်း စိုက်ပျိုးခြင်းများဆောင်ရွက်ခဲ့ရာ တစ်ဧက အထွက်နှုန်းများတိုးတက်လာသည်ကိုတွေ့ရှိနေပြီဖြစ်ပါကြောင်း၊ သီးထပ်စွမ်းအားများတိုးမြှင့် ဆောင်ရွက်ရန်လိုပါကြောင်းနှင့် ပန်းတိုင်အထွက်နှုန်းများ ရရှိစေရေးဆက်လက်ဆောင်ရွက် သွားကြရန်ဆွေးနွေးပြောကြားခဲ့သည်။ အဆိုပါ တောင်သူဦးမျိုးမြင့်၏ လယ်မြေတွင်(မှော်ဘီ -၃  )မျိုးစပါးအား ရိတ်သိမ်းခြွေလှေ့စက်ဖြင့် ရိတ်သိမ်းခဲ့ရာတစ်ဧကလျှင် ပျမ်းမျှ အထွက်နှုန်း( ၁၂၇) တင်းထွက်ရှိခဲ့ကြောင်းသိရသည်။