ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် တာဝန်ရှိသူများနှင့်အတူ ယနေ့မွန်းလွဲပိုင်းက သာပေါင်းမြို့နယ်၊ ဂုံမင်းကျေးရွာအုပ်စု၌ ၂၀၂၃-၂၀၂၄ ဘဏ္ဍာနှစ်ရေးနှစ်၊ တိုင်းဒေသကြီးရန်ပုံငွေဖြင့် ဆောင်ရွက်သည့် အမှတ် (၁၂)၊ အမှတ်(၁၃)၊ အမှတ်(၁၄)မြောင်းများ တူးဖော်ခြင်း လုပ်ငန်းများအား ကြည့်ရှုစစ်ဆေးခဲ့သည်။ ဦးစွာ တိုင်းဒေသကြီးဝန်ကြီးချုပ်သည် သာပေါင်းမြို့နယ်၊ ဂုံမင်းကျေးရွာအုပ်စုရှိ အမှတ်(၁၄)မြောင်း အလျား(၁.၅)မိုင်၊ ထိပ်ဝအကျယ် (၄၀)ပေ၊ အောက်ခြေအကျယ် (၂၀)ပေ၊ ပျမ်းမျှအမြင့်( ၁၀)ပေရှိ မြောင်းတူးဖော်ခြင်း လုပ်ငန်းအား ကြည့်ရှုစစ်ဆေးခဲ့ပြီး ဆည်​မြောင်းနှင့်​ရေအသုံးချမှုစီမံခန့်ခွဲ​ရေးဦးစီးဌာနတိုင်းဦးစီးမှူးနှင့် လယ်ယာမြေစီမံခန့်ခွဲနှင့်စာရင်းအင်းဦးစီးဌာနတိုင်းဦးစီးမှူးတို့က ၂၀၂၂-၂၀၂၃ခုနှစ်၊ ရိုးပြတ်ကျန်ဧရိယာများအပေါ် ၂၀၂၃-၂၀၂၄ ခုနှစ်တွင် ရေရရှိရေးဆောင်ရွက်ပြီး ဖော်ထုတ်ဆောင်ရွက်လျှက်ရှိသည့် အ​ခြေအ​နေများအား ရှင်းလင်းတင်ပြမှုအပေါ် လုပ်ငန်းများ အချိန်မီဆောင်ရွက်ပြီးစီးစေရေးမှာကြားခဲ့ပြီး ဒေသခံတောင်သူများနှင့် တွေ့ဆုံ၍ "တိုင်း​ဒေသကြီးတွင် သီးထပ်စွမ်းအားတိုး​တက်​အောင်​ဆောင်ရွက်လျက်ရှိ​ပြီး စိုက်ဧကများအားတိုးချဲ့စိုက်ပျိုးလျှက်ရှိကြောင်း၊ ရိုးပြတ်ကျန်ဧကများ၊ ​မြေလွတ်များမထားပဲ စိုက်ပျိုးဆောင်ရွက်ရမည်ဖြစ်ကြောင်း၊ သီးထပ်သီးနံအဖြစ် စပါးသီးနှံအပြင်၊ ဆီထွက်သီးနှံများနှင့် အခြားသီးနှံများ ထပ်မံစိုက်ပျိုးကြရန်လို​ကြောင်း၊ အထွက်​တိုး မျိုး​ကောင်းမျိုးသန့်များကိုစိုက်ပျိုးကြပြီး သဘာဝ​မြေသြဇာနှင့် ဓါတ်​မြေသြဇာများ အချိန်ကိုက် အချိုးကျထည့်သွင်းစိုက်ပျိုးကြရန်လို​ကြောင်း၊ တိုင်း​ဒေသကြီးအစိုးရအဖွဲ့​အ​နေဖြင့်လည်း ​ဒေသခံ​တောင်သူဦးကြီးများ၏ လိုအပ်ချက်များကို ဖြည့်ဆည်း​ဆောင်ရွက်​ပေးလျှက်ရှိပါ​ကြောင်း၊ ယခုကဲ့သို့ ​ရေ​မြောင်းများတူး​ဖော်​ပေးသဖြင့် ​စိုက်ပျိုး​ရေးအတွက် ​အောင်​ရေရရှိပြီး စိုက်ဧကများ တိုးချဲ့စိုက်ပျိုးနိုင်သည့်အပြင် လမ်းပန်းဆက်သွယ်​ရေးအတွက်လည်း အ​ထောက်အကူဖြစ်ပါ​ကြောင်း၊ ​တောင်သူကြီးများဘက်မှလည်း စိုက်ပျိုးသီးနှံများ ပန်းတိုင်အထွက်နှုန်း​ရောက်ရှိ​ရေးအတွက် တက်ညီလက်ညီဝိုင်းဝန်း​ဆောင်ရွက်​ပေးကြရန်" ​ပြောကြားပြီး ​တောင်သူကြီးများမှ လိုအပ်ချက်များတင်ပြရာ တိုင်း​ဒေသကြီးဝန်ကြီးချုပ်က ​ပေါင်းစပ်​ဆောင်ရွက်​ပေးခဲ့ပြီး သက်ဆိုင်ရာဌာနများအား ကွင်းဆင်းစစ်​ဆေးတင်ပြကြရန်လမ်းညွှန်မှာကြားခဲ့ပါသည်။ အလားတူ တိုင်းဒေသကြီးဝန်ကြီးချုပ်နှင့်အဖွဲ့သည် ​ကျောင်းကုန်းမြို့နယ်၊ ဘူတာစု​ကျေးရွာကွင်းသို့​ရောက်ရှိ၍ ကွင်းအမှတ်(၁၂)မြောင်းနှင့် အမှတ်(၁၃)မြောင်း တူးဖော်ခြင်းလုပ်ငန်း ၊အပိုင်း(၃)(က) အမှတ်(၁၃)မြောင်း၊ အလျား(၂.၄၀၅)မိုင်၊ ထိပ်ဝအကျယ် (၄၀)ပေ၊ အောက်ခြေအကျယ် (၂၀)ပေ၊ ပျမ်းမျှအမြင့်( ၁၀)ပေ မြောင်းတူးဖော်နေမှုများအား ဆက်လက်ကြည့်ရှုစစ်ဆေးခဲ့ပြီး တာဝန်ရှိသူများက လုပ်ငန်း​ဆောင်ရွက်​နေမှုအ​ခြေအ​နေများအား ရှင်းလင်းတင်ပြရာ တိုင်း​​ဒေသကြီးဝန်ကြီးချုပ်က သတ်မှတ်ထားသောကာလအတွင်း အချိန်မီပြီးစီးစေရေး လမ်းညွှန်မှာကြားခဲ့ပြီး​ဒေသခံ​တောင်သူများနှင့် ရင်းရင်းနှီးနှီး​တွေ့ဆုံ့ခဲ့ပါသည်။ အဆိုပါ အမှတ် (၁၂)၊ အမှတ်(၁၃)၊ အမှတ်(၁၄)မြောင်းများ တူး​ဖော်ပြီးစီးပါက သာ​ပေါင်းမြို့နယ်နှင့် ​ကျောင်းကုန်းမြို့နယ်ရှိ လယ်မြေဧက (၃၀၀၀)အတွက် ရေသွင်းရေထုတ် ကောင်းမွန်စေမည်ဖြစ်ပြီး ရေကျနောက်စိုက်စပါးစိုက်ပျိုးရေးအတွက် စိုက်ပျိုးရေနှင့် အောင်ရေကိုလုံလောက်စွာရရှိမည်ဖြစ်ကြောင်းသိရသည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် ပုသိမ်ခရိုင်၊ ကန်ကြီးထောင့်မြို့နယ်၊ ဝါးဒူးကျေးရွာအုပ်စုရှိ အနောက်စုကြီးမြောင်း၊ ပုလဲကူး- အနောက်စုကုန်းမြောင်းနှင့် ပုလဲကူးမှ သပြေကွင်းရွာအထိမြောင်းတူးဖော်ခြင်း မြောင်းအလျား(၇.၅)မိုင်၊ ထိပ်ဝအကျယ် (၂၁)ပေ၊ အောက်ခြေအကျယ်(၇)ပေ၊ ပျမ်းမျှအမြင့် (၇)ပေရှိပြီး စိုက်ဧက(၅၀၀)အား အကျိုးပြုမည့် မြောင်းတူးဖော်နေမှုအား ကြည့်ရှုစစ်ဆေးခဲ့ပါသည်။

တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ(၁)၌ တိုင်းဒေသကြီး ကလေးအလုပ်သမားပပျောက်ရေးဆိုင်ရာကော်မတီ လုပ်ငန်းညှိနှိုင်း အစည်းအဝေးပြုလုပ်ခဲ့ရာ အစည်းအဝေးသို့ တိုင်းဒေသကြီးဝန်ကြီးချုပ် ဦးတင်မောင်ဝင်း၊ တိုင်းဒေသကြီးအစိုးရဖွဲ့ဝင်ဝန်ကြီးများနှင့် ဌာနဆိုင်ရာကော်မတီဝင်များ တက်ရောက်ခဲ့ကြသည်။ လုပ်ငန်းညှိနှိုင်းအစည်းအဝေးတွင် တိုင်းဒေသကြီးကလေးအလုပ်သမားပပျောက်ရေးဆိုင်ရာကော်မတီနာယက၊ တိုင်းဒေသကြီးဝန်ကြီးချုပ်က“တိုင်းဒေသကြီးကလေးအလုပ်သမား ပပျောက်ရေးဆိုင်ရာကော်မတီအနေဖြင့် လုပ်ငန်းကော်မတီများအလိုက် လုပ်ငန်းဆောင်ရွက်မှု၊ တွေ့ကြုံရသည့်အခက်အခဲ၊ အားနည်းချက်၊ အားသာချက်များအား သုံးသပ်အကြံပြု ဆွေးနွေးတင်ပြကြရန်ဖြစ်ကြောင်း၊ လုပ်ငန်းကော်မတီများအနေဖြင့် မိမိတို့၏ လုပ်ငန်းတာဝန် များကို ပီပီပြင်ပြင်အောင်မြင်အောင် အကောင်အထည်ဖော် ဆောင်ရွက်ကြရာတွင် ကလေး အလုပ်သမားပပျောက်ရေးအတွက် မည်သည့်အတိုင်းအတာအထိ ဆောင်ရွက်နိုင်သည်ကို တင်ပြကြရန်ဖြစ်ကြောင်း၊ ကလေးများအား အထူးသဖြင့် အဆိုးရွားဆုံးပုံစံဖြင့် ခိုင်းစေမှုများအား လျော့နည်းပပျောက်စေရန်နှင့် ထိရောက်စွာတားဆီး ကာကွယ်ရမည်ဖြစ်ပြီး အသိပညာပေး လုပ်ငန်းများကိုလည်း ကျယ်ကျယ်ပြန့်ပြန့်သိရှိအောင် ဆောင်ရွက်ပေးရမည်ဖြစ်ပါကြောင်း၊ ဥပဒေအရ တရားဝင်အလုပ်လုပ်ကိုင်ခွင့်ရှိသည့် ကလေး အလုပ်သမားများအား ဥပဒေနှင့်အညီ ထိရောက်စွာ အကာအကွယ်ပေးရမှာဖြစ်ကြောင်း၊ အန္တရာယ်ရှိသောအလုပ်နှင့် လုပ်ငန်းခွင် များတွင် လုပ်ကိုင်နေသည့် ကလေးအလုပ်သမားများအား ဖယ်ရှားပြီး ပညာရေးနှင့် သက်မွေး ဝမ်းကျောင်းပညာအခွင့်အလမ်းများ ဖန်တီးပေးကာ မိသားစုများအတွက် ပိုမိုကောင်းမွန်သော အသက်မွေးဝမ်းကျောင်း၊ အလုပ်အကိုင်အခွင့်အလမ်းများ ရရှိအောင် စီမံဆောင်ရွက်ပေးရမည် ဖြစ်ပါကြောင်း၊ ကလေးအလုပ်သမားများအား ကာကွယ်နိုင်ရေးအတွက် နည်းလမ်းများ အကြံပြု တင်ပြနိုင်ရန် ကော်မတီများအလိုက် ဆွေးနွေးပေးကြစေ လိုကြောင်း” အမှာစကားပြောကြား သည်။ ဆက်လက်၍ တိုင်းဒေသကြီးကလေးအလုပ်သမားပပျောက်ရေးဆိုင်ရာ ကော်မတီဥက္ကဋ္ဌ၊ တိုင်းဒေသကြီးအစိုးရအဖွဲ့၊ လူမှုရေးရာဝန်ကြီးက ကလေးအလုပ်သမားပပျောက်ရေးဆိုင်ရာ လုပ်ငန်းဆောင်ရွက်မှု အခြေအနေများအားလည်းကောင်း၊ ကော်မတီအတွင်းရေးမှူးက ကလေး အလုပ်သမားဆိုင်ရာ အခြေခံဗဟုသုတပြန့်ပွားရေးအတွက် အသိပညာနှင့်ဗဟုသုတတိုးမြှင့် ပေးခြင်း၊ နိုင်ငံတကာစံချိန်စံညွှန်းများနှင့်အညီ ဥပဒေများပြင်ဆင်ရေးဆွဲခြင်း၊ ကလေးအလုပ် သမားပြဿနာအပေါ် ဖြေရှင်းနိုင်ရန် တိုင်းဒေသကြီးအဆင့် ဌာနဆိုင်ရာအဖွဲ့အစည်းများ၏ စွမ်းဆောင်ရည်မြှင့်တင်ပေးခြင်း၊ တာဝန်ဝတ္တရားများသတ်မှတ်ခြင်း၊ အကောင်အထည်ဖော် ဆောင်ရွက်မည့် လုပ်ငန်းစီမံကိန်းချမှတ်၍ တိုးတက်မှုကို အကဲဖြတ်ခြင်းဖြင့် ရေရှည်တွင် ကလေးအလုပ်သမား လျော့နည်းပပျောက်စေရေးကိစ္စရပ်များနှင့် တိုင်းဒေသကြီးကလေးအလုပ် သမား ပပျောက်ရေးဆိုင်ရာ လုပ်ငန်းကော်မတီ(၈)ရပ်၏ လုပ်ငန်းဆောင်ရွက်မှု၊ တွေ့ကြုံရသည့် အခက်အခဲ၊ အားနည်းချက်၊ အားသာချက်များကိုလည်းကောင်း ရှင်းလင်းတင်ပြသည်။ ထို့နောက်အစည်းအဝေးသို့တက်ရောက်လာသည့် တိုင်းဒေသကြီးကလေးအလုပ်သမား ပပျောက်ရေးဆိုင်ရာလုပ်ငန်းကော်မတီများအလိုက် တာဝန်ရှိသူများက လုပ်ငန်းဆောင်ရွက်မှု အခြေအနေများအား ဆွေးနွေးတင်ပြမှုများအပေါ် တိုင်းဒေသကြီးကလေးအလုပ်သမား ပပျောက်ရေးဆိုင်ရာကော်မတီ နာယက၊ တိုင်းဒေသကြီးဝန်ကြီးချုပ်က ဖြည့်စွက်ဆွေးနွေးခဲ့ပြီး ညှိနှိုင်း ပေါင်းစပ်ဆောင်ရွက်ပေးခဲ့ပါသည်။

၂၀၂၃-၂၀၂၄ ပညာသင်နှစ်၊ ကွန်ပျူတာတက္ကသိုလ်(ပုသိမ်)၏ မောင်မယ်သစ်လွင်ကြိုဆိုပွဲအခမ်းအနားကို ယနေ့နံနက်ပိုင်းက အဆိုပါတက္ကသိုလ်၏ ဘွဲ့နှင်းသဘင်ခန်းမ၌ ပြုလုပ်ခဲ့ရာ တိုင်းဒေသကြီး ဝန်ကြီးချုပ် ဦးတင်မောင်ဝင်းသည် အစိုးရအဖွဲ့ဝင်ဝန်ကြီးများနှင့် အတူ တက်ရောက်ခဲ့ပြီး ကြိုဆိုနှုတ်ခွန်းဆက်စကားများပြောကြားခဲ့သည်။ ဦးစွာ ကွန်ပျူတာတက္ကသိုလ်(ပုသိမ်)မှ ကျောင်းသား၊ ကျောင်းသူများက“ ဧရာဝတီရဲ့ နှလုံးသား” သီချင်းဖြင့်အခမ်းအနားအား သီဆိုဖျော်ဖြေဖွင့်လှစ်ခဲ့ပြီးနောက် တိုင်းဒေသကြီး ဝန်ကြီးချုပ်က ကြိုဆိုနှုတ်ခွန်းဆက် အမှာစကားပြောကြားရာ "၂၀၂၃-၂၀၂၄ပညာသင်နှစ် ကွန်ပျူတာတက္ကသိုလ်(ပုသိမ်)၏ ယနေ့ မောင်မယ်သစ်လွင်ကြိုဆိုပွဲခမ်းအနားသည် မင်္ဂလာ ရှိသော နေ့တစ်နေ့ဖြစ်ပါကြောင်း၊ ယနေ့ကမ္ဘာတစ်ဝန်းတွင် နိုင်ငံအသီးသီးသည် ဒစ်ဂျစ်တယ်အသွင်ကူးပြောင်းခြင်း (Digital Transformation) အစီအစဉ်များအား ဦးစားပေး၍ အရှိန် အဟုန်ဖြင့် ဆောင်ရွက်လျက်ရှိပါကြောင်း၊ နိုင်ငံ၏ လူမှုစီးပွားဖွံ့ဖြိုးတိုးတက်လာစေရန် အတွက် နယ်ပယ်အသီးသီးတွင် Digital Economy ၊ Digital Government ၊ Digital Infrastructure နှင့် Digital Community အစရှိသည့် ဒစ်ဂျစ်တယ်အသွင်သို့ ကူးပြောင်း ဆောင်ရွက်ခြင်းအားဖြင့် ကမ္ဘာလုံးဆိုင်ရာတန်ဖိုးကွင်းဆက် (The Global Value Chain) သို့ ချိတ်ဆက်လာနိုင်ကြပြီး တန်ဖိုးမြင့်မားသော အကျိုးရလဒ်များကို ရရှိခဲ့ကြသည်ကို တွေ့မြင်ကြရမည်ဖြစ်ပါကြောင်း၊ အဆင့်မြင့်ပညာများကိုလေ့လာသင်ယူကြမည့် ကျောင်းသား၊ ကျောင်းသူများသည် ကိုယ်ပိုင် အတွေးအခေါ်များ၊ လေ့လာတီထွင်မှုများဖြင့် သင်ယူကြရမှာ ဖြစ်ပါကြောင်း၊ တက္ကသိုလ်ကြီးမှ ကွန်ပျူတာသိပ္ပံနှင့် ကွန်ပျူတာနည်းပညာများတွင် ကျွမ်းကျင်သည့် လူ့စွမ်းအားအရင်းအမြစ်များ မွေးထုတ်ပေးပြီး တက္ကသိုလ်ဂုဏ်၊ တိုင်းဒေသကြီးဂုဏ်နှင့် နိုင်ငံ့ဂုဏ်ဆောင်နိုင်သည့်သူများ ဖြစ်လာစေရန်လည်း မျှော်မှန်းပါကြောင်း၊ နိုင်ငံတစ်နိုင်ငံ၏ဖွံ့ဖြိုးတိုးတက်မှုသည် ထိုနိုင်ငံတွင် ရှိသော အသိပညာ၊ အတတ်ပညာရှင်များပေါ်မှာ မူတည်သည့်အတွက် အနာဂတ်မှာ နိုင်ငံတော် က အားထားရသော အသိပညာရှင်၊ အတတ်ပညာရှင်များဖြစ်အောင် ကြိုးစားကြရန်လိုပါ ကြောင်း၊ ကွန်ပျူတာတက္ကသိုလ်(ပုသိမ်)အနေဖြင့် ကျောင်းသား၊ ကျောင်းသူများအား နိုင်ငံတော်က အားထားရသော ICT ဆိုင်ရာ အသိပညာရှင်၊ အတတ်ပညာရှင်များဖြစ်အောင် ပြုစုပျိုးထောင်ပေးကြရန် မှာကြားလိုပါကြောင်း၊ ကျောင်းသူ၊ ကျောင်းသားအားလုံး ဧရာဝတီ တိုင်းဒေသကြီး၏ ဖွံဖြိုးတိုးတက်မှုမှသည် နိုင်ငံတော်ဖွံ့ဖြိုးတိုးတက်ရေးလုပ်ငန်းများတွင် ကျရာ ကဏ္ဍမှ အုတ်တစ်ချပ်၊ သဲတစ်ပွင့် အနေဖြင့် ပါဝင်ထမ်းဆောင်နိုင်သော အသိပညာရှင်၊ အတတ် ပညာရှင် များဖြစ်အောင် ကြိုးစားကြရန်လိုပါကြောင်း” ပြောကြားသည်။ ဆက်လက်၍ တိုင်းဒေသကြီးဝန်ကြီးချုပ်က ကွန်ပျူတာတက္ကသိုလ်(ပုသိမ်)အတွက် ဂုဏ်ပြုထောက်ပံ့ငွေများ ပေးအပ်ချီးမြှင့်ခဲ့ရာ ဒုတိယပါမောက္ခချုပ်က လက်ခံရယူခဲ့ပါသည်။ ထို့နောက် ကွန်ပျူတာတက္ကသိုလ်(ပုသိမ်)ဒုတိယပါမောက္ခချုပ်က ကျေးဇူးတင်စကားပြောကြားခဲ့ပြီး တိုင်းဒေသကြီးဝန်ကြီးချုပ်နှင့် ဧည့်သည်တော်များသည် ကွန်ပျူတာတက္ကသိုလ်(ပုသိမ်)မှ ကျောင်းသား၊ ကျောင်းသူများ၏ တေးသီချင်းများဖြင့် သီဆိုကပြဖျော်ဖြေမှုများကို ကြည့်ရှုအားပေးခဲ့ပါသည်။

နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်သည် ယနေ့နံနက်ပိုင်းတွင် ကျုံပျော်ခရိုင်၊ ကျောင်းကုန်းမြို့နယ်၊ ရောင်ပစ်ကွင်းကျေးရွာတွင်ပြုလုပ်သည့် နိုင်ငံ့စီးပွားမြှင့်တင်ရေးရံပုံငွေဖြင့်ဆောင်ရွက်သည့် နွေစပါးစိုက်ဧကများဓါတ်မြေဩဇာစု ပေါင်းကြဲပတ်ပွဲတက်ရောက်အားပေးခဲ့သည်။ ဦးစွာ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်သည် ကျေးရွာအုပ်ချပ်ရေးအဖွဲ့များ၊ တောင်သူများနှင့်တွေ့ဆုံ၍ မိုးစပါးရိတ်သိမ်းပြီးမှု၊ နွေစပါးစိုက်ပျိုးမှုအခြေအနေများမေးမြန်းခဲ့ပြီး ဆိုလာစနစ်ဖြင့်စိုက်ပျိုးရေတင်ဆောင်ရွက်နေမှုနှင့် တောင်သူ ဦးစိုးမင်းအောင်၏ လယ်မြေ ၇.၃၆ဧကနှင့် တောင်သူဦးသန်းအောင်၏လယ်မြေ ၃.၀၂ဧက တို့တွင် GW-11မျိုးစပါးများအား သဘာဝမြေဩဇာနှင့်ဓါတ်မြေဩဇာအချိုးကျပေါင်းစပ်၍ စုပေါင်းကြဲပတ်နေမှုများကိုကြည့်ရှုအားပေးခဲ့ကာ တောင်သူများနှင့်ရင်းရင်းနှီးနှီးတွေ့ဆုံ၍ စိုက်ပျိုး မြေများတွင် မိုးစပါးများစိုက်ပျိုးပြီးပါက စိုက်ဧကများအားလုံး နွေစပါးအပါအဝင် သီးနှံများစိုက်ဧက အပြည့်အဝစိုက်ပျိုးစေရေး၊ သီးထပ်စွမ်းအားမြှင့်တင်စိုက်ပျိုးနိုင်စေရေး၊ သဘာဝမြေဩဇာများပိုမိုထုတ်လုပ်သုံးစွဲစေရေး၊ အထွက်တိုးမျိုးကောင်းမျိုးသန့်စပါးများအသုံးပြုစေရေးနှင့်ခေတ်မီစိုက်နည်းစနစ်များအသုံးပြုစေရေး၊ နေကြာအပါအဝင် ဆီထွက်သီးနှံများ တိုးချဲ့စိုက်ပျိုးစေရေးမှာကြားခဲ့ပြီး တောင်သူများ၏တင်ပြချက်များအပေါ် သက်ဆိုင်ရာတာဝန်ရှိသူများနှင့်ပေါင်းစပ်ဆောင်ရွက်ပေးခဲ့သည်။ ဆက်လက်၍ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်သည် ကျောင်းကုန်းမြို့နယ်၊ တံခွန်တိုင်ကျေးရွာ၊ အခြေခံပညာအထက်တန်းကျောင်းသို့သွားရောက်၍ ၂၀၂၂- ၂၀၂၃၊ ၂၀၂၃-၂၀၂၄ နှစ်ဆက် ပြည်ထောင်စုဘဏ္ဍာရံပုံငွေဖြင့်ဆောင်ရွက်သည့် (၁၃၀ပေ×၃၀ပေ) RCC နှစ်ထပ် ကျောင်းဆောင်သစ်ဆောက်လုပ်နေမှုများအား ကြည့်ရှုစစ်ဆေးခဲ့ပြီး တာဝန်ရှိသူများ၏တင်ပြချက်များအပေါ် တည်ဆောက်ရေးလုပ်ငန်းများအရည်အသွေးပြည့်မီစေရေး၊ လုပ်ငန်းများဆောင်ရွက်ရာတွင်စနစ်တကျရှိစေရန်တာဝန်ရှိသူများနှင့်ပေါင်းစပ်ဆောင်ရွက်စေရေးနှင့် သတ်မှတ်ကာလအတွင်းပြီးစီးစေရေးမှာကြားခဲ့ပြီး ရပ်မိရပ်ဖများ၊ ကျောင်းအကျိုးတော်ဆောင်များ၊ ဆရာ၊ ဆရာမများ ပြည်သူများနှင့်တွေ့ဆုံ၍ တင်ပြချက်များအပေါ် သက်ဆိုင်ရာတာဝန်ရှိသူများနှင့်ညှိနှိုင်းပေါင်းစပ်ဆောင်ရွက်ပေးခဲ့သည်။ ထို့နောက် နိုင်ငံတော်စီမံအုပ်ချုပ်ရေးကောင်စီ အဖွဲ့ဝင် မန်းငြိမ်းမောင်သည် တံခွန်တိုင်ကျေးရွာ၊ စိုက်ပျိုးရေးဦးစီးဌာန၊ နည်းပညာပြန့်ပွားရေးစင်တာ(Knowledge Center) တွင် လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန၊ ကျောင်းကုန်းမြို့နယ် ဦးစီးမှူးရုံးမှ ပန်းခင်းစီမံချက်ဖြင့် အိမ်ထောင်စုလူဦးရေစာရင်းနှင့် နိုင်ငံသားစိစစ်ရေးကတ်ပြား ဆောင်ရွက်ပေးနေမှုများ၊ နိုင်ငံသားတစ်ဦးချင်း၏ ကိုယ်ရေးအချက်အလက် (Biographic)နှင့် ဇီဝဆိုင်ရာအချက်အလက် ( Biometric) ကောက်ယူခြင်းအား ကြည့်ရှုစစ်ဆေးခဲ့ပြီး စာရင်းရေးသွင်းရာတွင် အချက်အလက်များမှားယွင်းမှုမရှိစေရေး၊ ဆောင်ရွက်ပြီးစီးသည့် နိုင်ငံသားစိစစ်ရေးကတ်ပြား များအားပြည်သူများထံအမြန်ဆုံးရရှိစေရေး ဆောင်ရွက်ရန် မှာကြားခဲ့ပြီး ပြည်သူများထံသို့ ပြုလုပ်ပြီးစီးသည့် နိုင်ငံသားစိစစ်ရေးကတ်ပြားများပေးအပ်ခဲ့သည်။ ဆက်လက်၍ နိုင်ငံတော်စီမံအုပ်ချုပ်ရေးကောင်စီ အဖွဲ့ဝင် မန်းငြိမ်းမောင်သည် ဖျာပုံခရိုင်၊ ကျိုက်လတ်မြို့နယ်ရှိ ဝေမာမြန်မာဆန်စက်လုပ်ငန်း( Wilmar Myanmar Riceland Kyailat Limited )သို့သွားရောက်ခဲ့ရာ တာဝန်ရှိသူများမှ လုပ်ငန်းလည်ပတ်ဆောင်ရွက်နေမှုအခြေအနေများ၊ နည်းပညာမြင့်ဆန်ကြိတ်ခွဲစက်ရုံ လုပ်ငန်းလည်ပတ်မှုအဆင့်ဆင့်နှင့်ပေါင်းဆန်ကြိတ်ခွဲတင်ပို့မှုအခြေအ​နေများ၊ စပါးဝယ်ယူမှုအခြေအနေများ၊ စပါးခွံ လောင်စာသုံးဘွိုင်လာစနစ်ဖြင့် လျှပ်စစ်ထုတ်လုပ်၍ ဆန်စက်လည်ပတ်နေမှုအခြေအနေများရှင်းလင်းတင်ပြ မှုအပေါ် နိုင်ငံတော်စီမံ အုပ်ချုပ်ရေးကောင်စီအဖွဲ့ဝင် မန်းငြိမ်းမောင်က ဒေသအတွင်းမှထွက်ရှိသည့် စပါးများအားပိုမိုဝယ်ယူကြိတ်ခွဲနိုင်စေရေး၊ Contrat Farming စနစ်ဖြင့်တောင်သူများဖြင့်အကျိုးတူပူးပေါင်းဆောင်ရွက်နိုင်စေရေးနှင့် စွန့်ပစ်ပစ္စည်းများအား တန်ဖိုးမြင့်ထုတ်ကုန်များအဖြစ်အကျိုးရှိ စွာ ပြန်လည်အသုံးပြုနိုင်စေရေးမှာကြားခဲ့ပြီး ပေါင်းဆန်ကြိတ်ခွဲထုတ်လုပ်နေမှု၊ စပါးအခြောက်ခံခြင်းလုပ်ငန်းဆောင်ရွက်နေမှု၊ သယ်ယူပို့ဆောင်ရေးဆိပ်ကမ်းများတွင် ဝန်ချီစက်များထားရှိဆောင်ရွက်ထားရှိမှုနှင့် စပါးခွံလောင်စာသုံးဘွိုင်လာစနစ်ဖြင့် လျှပ်စစ်ဓါတ်အားထုတ်လုပ်လည်ပတ်နေမှုများကိုကြည့်ရှုစစ်ဆေးခဲ့ကြောင်းသိရသည်။

နိုင်ငံတော်စီမံအုပ်ချုပ်ရေးကောင်စီ အဖွဲ့ဝင် မန်းငြိမ်းမောင်၊ တိုင်းဒေသကြီး ဝန်ကြီးချုပ်နှင့် အစိုးရအဖွဲ့ဝင် ဝန်ကြီးများသည် ရေကြည်မြို့နယ်၊ နွားရေတိုက်ကျေးရွာရှိ ၂၀၂၃-၂၀၂၄ ခုနှစ်၊ မိုးစပါး " ဓာတုကင်းလွတ် ရေကြည်ပေါ်ဆန်း" ဧက (၂၀၀) စံပြစိုက်ခင်းအား သွားရောက်ကြည့်ရှုအားပေးခဲ့ရာ တိုင်းဒေသကြီးစိုက်ပျိုးရေးဦးစီးဌာန၊ တိုင်းဦးစီးမှူးတို့မှ ရေကြည်မြို့နယ်၊ မိုးစပါးစိုက်ပျိုးမှု အခြေအနေများအား လည်းကောင်း၊ နွားရေတိုက်ကျေးရွာတွင် ဓါတုကင်းလွတ် ပေါ်ဆန်းစိုက်ပျိုးမှုအခြေအနေများအားလည်းကောင်း၊ စိုက်ပျိုးရေးသုတေသနဦးစီးဌာန၊ ဒေသသုတေသနဗဟိုဌာန (မြောင်းမြ)၏ သုတေသနအရာရှိ (တာဝန်ခံ)မှ ဓာတုကင်းလွတ် ရေကြည်ပေါ်ဆန်းစိုက်ပျိုးမှု အခြေအနေများ၊ သဘာဝမြေသြဇာအသုံးပြု စိုက်ပျိုးမှု အခြေအနေများ၊ ပေါ်ဆန်းစပါးမျိုးကွဲများ၏ အထွက်နှင့်အထွက်နှုန်း မိတ်ဖက်လက္ခဏာများအား သုတေသနဆောင်ရွက်ချက် ရလဒ်များအားလည်းကောင်း၊ တောင်သူဦးကြည်ခိုင်စိုးမှ မြေဆွေး၊ နွားချေးမှုန့်၊ ဖွဲနု၊ ထုံး၊ ဒရိုင်ဂိုဒါးမား၊ ဟူးမားသဘာဝမြေဩဇာတို့အား အချိုးကျရောစပ်၍ သဘာဝမြေဩဇာ ထုတ်လုပ်သုံးစွဲမှု အခြေအနေများအားလည်းကောင်း အသီးသီးရှင်းလင်းတင်ပြခဲ့ကြပြီး ၂၀၂၃-၂၀၂၄ ခုနှစ်၊ မိုးစပါး " ဓာတုကင်းလွတ် ရေကြည် ပေါ်ဆန်းတစ်ဧကအထွက်နှုန်းစမ်းသပ်မှုအားကြည့်ရုအားပေးခဲ့သည်။ ထို့နောက် နိုင်ငံတော်စီမံအုပ်ချုပ်ရေးကောင်စီ အဖွဲ့ဝင် မန်းငြိမ်းမောင်က တောင်သူများ၊ ဌာနဆိုင်ရာများအား သဘာဝမြေဩဇာ အသုံးပြုမှုကြောင့် မြေဆီလွှာပြန်လည်ကောင်းမွန်လာမှု၊ ဆန်/ စပါးအရည်အသွေး တိုးတက်ကောင်းမွန်လာမှုအခြေအနေများဆွေးနွေးမေးမြန်းခဲ့ပြီး သဘာဝမြေဩဇာအသုံးပြု၍ ဓါတုကင်းလွတ်ပေါ်ဆန်းများ ပိုမိုတိုးချဲ့စိုက်ပျိုးနိုင်စေရေး၊ ခေတ်မီနည်းပညာ အကူအညီများဖြင့် အနံ့အရသာနှင့်ပြည့်စုံသည့် အရည်အသွေးပြည့် ဆန်များထွက်ရှိစေရေး၊ သဘာဝမြေဩဇာသုံးစွဲခြင်းဖြင့်ရရှိလာသည့်အကျိုးကျေးဇူးများအား တောင်သူများ ကျယ်ကျယ်ပြန့်ပြန့် သိရှိစေရေး၊ အထွက်တိုးသည့် ပေါ်ဆန်းမျိုးစပါးများ ပြောင်းလဲစိုက်ပျိုးစေရေးနှင့် စိုက်ပျိုးရေး သုတေသန၊ ထုတ်လုပ်ရေးသုတေသနနှင့် ဈေးကွက်သုတေသနလုပ်ငန်းများ ဆက်လက်ဆောင်ရွက်ရန်နှင့် တိုင်းဒေသကြီး၏စိုက်ပျိုးရေးလုပ်ငန်းများ ပိုမိုတိုးတက်အောင်မြင်စေရေး ဝိုင်းဝန်းကြိုးပမ်း ဆောင်ရွက်ကြရန် မှာကြားခဲ့ပြီး ဓာတုကင်းလွတ် ရေကြည်ပေါ်ဆန်း စိုက်ပျိုးသည့်တောင်သူများနှင့် ရင်းရင်းနှီးနှီးတွေ့ဆုံ၍ အမှတ်တရဓါတ်ပုံများရိုက်ကူးခဲ့သည်။