ဧရာဝတီတိုင်းဒေသကြီး ဝန်ကြီးချုပ်နှင့်အဖွဲ့သည် ပုသိမ်မြို့နယ်၊ မရမ်းချောင်းကျေးရွာ၌ တောင်သူများတွေ့ဆုံပွဲ၊ ဆီထွက်သီးနှံနေကြာစိုက်ပျိုးခြင်းနှင့် သစ်စိမ်းမြေဩဇာ (ပိုက်ဆံလျှော်) ကွင်းပိတ်စိုက်ပျိုးပွဲ အခမ်းအနားတက်ရောက်၍ တိုင်းဒေသကြီးဝန်ကြီးချုပ်က“ လာမည့်မိုးစပါးစိုက်ရာသီတွင် ရေတော်မိုးတော် စိုက်ဧက (၂၇)သိန်းကျော်အား ပိုက်ဆံလျှော်များ အပြည့်အဝထည့်သွင်း စိုက်ပျိုးနိုင်ရေးအတွက် မျိုးစေ့ထုတ်လုပ်နိုင်ရန် တိုင်းဒေသကြီးအတွင်းရှိ ခရိုင်အသီးသီး၌ ရည်မှန်းချက်ထားဆောင်ရွက်ခဲ့ပါကြောင်း၊ ပိုက်ဆံလျှော်ထည့်သွင်း စိုက်ပျိုးခြင်းဖြင့်တောင်သူများ၏ လယ်ဧကများ၌ ဓာတ်မြေဩဇာလိုအပ်ချက်လျော့ချနိုင်ပြီး မြေဆီလွှာပျက်စီးမှုများကို ပြန်လည်ကောင်းမွန်စေမည်ဖြစ်ပါကြောင်း၊ ယခုနှစ်မိုးစပါးစိုက် ရာသီတွင် ရေတော်မိုးတော်စိုက်ဧကတစ်သိန်းအား ပိုက်ဆံလျှော်များ ထည့်သွင်းစိုက်ပျိုးခဲ့ပြီး လာမည့်မိုးစပါးစိုက်ရာသီ ရေတော်မိုးတော်စိုက်ဧက (၂၇)သိန်းကျော်အား ပိုက်ဆံလျှော်များ အပြည့်အဝထည့်သွင်းစိုက်ပျိုးနိုင်ရေးအတွက် သက်ဆိုင်ရာမြို့နယ်အလိုက် အဖွဲ့လိုက်စုပေါင်း စနစ်ဖြင့် အချိန်မီစိုက်ပျိုးနိုင်စေရေးဆောင်ရွက်ခဲ့ပါကြောင်း၊ သီးနှံများစိုက်ပျိုးရာတွင် မြေမှန်၊ မျိုးမှန်၊ စိုက်နည်းမှန်၊ ရာသီမှန်အောင်စိုက်ပျိုးရမည် ဖြစ်ပါကြောင်းနှင့် ရာသီမီအောင်စိုက်ပျိုးနိုင်ရေးအတွက် တာဝန်ရှိသူများအား ကွင်းဆင်းကြပ်မတ် ဆောင်ရွက် စေလျက်ရှိပါကြောင်း၊ ဆီဖူလုံရေးအတွက် မြေပဲ၊ နှမ်းအပြင်ဆီထွက်သီးနှံ(နေကြာ)ကိုလည်း အောင်မြင်အောင် တိုးချဲ့စိုက်ပျိုးလျက်ရှိပါကြောင်းနှင့် တောင်သူများ၊ ဌာနဆိုင်ရာများ ပူးပေါင်းဆောင်ရွက်ခြင်းဖြင့် ယနေ့တွင် ပိုက်ဆံလျှော်မျိုးစေ့ထုတ် စိုက်ပျိုးခြင်းများအား ကွင်းပိတ်စိုက်ပျိုးပေးနိုင်ခဲ့ခြင်းဖြစ်၍ တောင်သူများ၊ ဌာနဆိုင်ရာများအား ကျေးဇူးတင်ရှိကြောင်း” အမှာစကားပြောကြားသည်။ ဆက်လက်၍ ဆက်လက်၍ စိုက်ပျိုးရေးဦးစီးဌာန၊ တိုင်းဦးစီးမှူးက သစ်စိမ်းမြေဩဇာ (ပိုက်ဆံလျှော်)၊ ဆီထွက်သီးနှံနေကြာစိုက်ပျိုးရခြင်းရည်ရွယ်ချက်များအား ရှင်းလင်းတင်ပြခဲ့ပြီးနောက် တိုင်းဒေသကြီးဝန်ကြီးချုပ်နှင့်အဖွဲ့သည် ဆီထွက်သီးနှံနေကြာနှင့် သစ်စိမ်းမြေဩဇာ (ပိုက်ဆံလျှော်)ကွင်းပိတ်စိုက်ပျိုးပွဲအား ဌာနဆိုင်ရာများက စုပေါင်းစိုက်ပျိုးပေးနေမှုများကို ကြည့်ရှုအားပေးခဲ့ကြောင်းသိရသည်။ ပုသိမ်မြို့နယ်အနေဖြင့် ၂၀၂၃-၂၀၂၄ ဆောင်းရာသီ သစ်စိမ်းမြေဩဇာ (ပိုက်ဆံလျှော်) မျိုးစေ့ထုတ် စိုက်ဧက (၂၅၀၀)ဧကအား ကွင်းပိတ်စိုက်ပျိုး ပြီးစီးကြောင်းသိရသည်။

ဧရာဝတီတိုင်းဒေသကြီးအတွင်း ကျောင်းကုန်းမြို့နယ်၊ ကန်ကြီးထောင့်မြို့နယ်၊ ပုသိမ်မြို့နယ်များ၌ ယခုလ၁၁ရက်နေ့မှ ၁၄ရက်နေ့အထိ ဒေသခံပြည်သူများအား သွားနှင့်ခံတွင်းအခမဲ့ကုသပေးခြင်း၊ သွားနှင့်ခံတွင်းကျန်းမာရေးစစ်ဆေးပေးခြင်း၊ သွားနှင့်ခံတွင်းကျန်းမာရေးစစ်တမ်းကောက်ယူခြင်းနှင့် သွားနှင့်ခံတွင်းကျန်းမာရေးအသိပညာပေးခြင်း ဆောင်ရွက်ပေးခဲ့သည့် သွားဘက်ဆိုင်ရာဆေးတက္ကသိုလ်(ရန်ကုန်)မှ ကွင်းဆင်းကုသရေးအဖွဲ့အား တိုင်းဒေသကြီးဝန်ကြီးချုပ်သည် အစိုးရအဖွဲ့ဝင်ဝန်ကြီးများနှင့်အတူ ယနေ့နံနက်ပိုင်းက မြောင်းမြကျောင်းတိုက်သို့ သွားရောက်၍ ရင်းရင်းနှီးနှီးတွေ့ဆုံ အားပေးခဲ့သည်။ အဆိုပါကုသရေးအဖွဲ့သည် ဧရာဝတီတိုင်းဒေသကြီးအတွင်း ကျောင်းကုန်းမြို့နယ်၊ ကန်ကြီးထောင့်မြို့နယ်၊ ပုသိမ်မြို့နယ်များရှိဒေသခံပြည်သူများအား သွားနှင့်ခံတွင်းအခမဲ့ ကုသပေးခြင်း(၁၀၂၂)ဦး၊ သွားနှင့်ခံတွင်းကျန်းမာရေးစစ်ဆေးပေးခြင်း (၁၉၅၂)ဉီး၊ သွားနှင့်ခံတွင်းကျန်းမာရေးစစ်တမ်းကောက်ယူခြင်း(၁၆၇၃)ဦး၊ သွားနှင့်ခံတွင်းကျန်းမာရေး အသိပညာပေးခြင်း (၂၁၉၀)ဦးအား ကုသဆောင်ရွက်ပေးခဲ့ကြောင်းသိရသည်။

ဧရာဝတီတိုင်းဒေသကြီး၊ ပုသိမ်မြို့မရမ်းချိုကျောင်းပရိယတ္တိစာသင်တိုက်နှင့် ဓာတုဝိဇ္ဇာပရိယတ္တိပဋိပတ္တိကျောင်းတိုက်များ၏ ပဓာနမဟာနာယက ဘဒ္ဒန္တသောဘိတ(အဂ္ဂမဟာဂန္ထဝါစကပဏ္ဍိတ၊ အဂ္ဂမဟာသဒ္ဓမ္မဇောတိကဓဇ)ဆရာတော်ဘုရာကြီး၏ သက်တော်(၈၃)နှစ်ပြည့် ဝိဇာတမွေးနေ့မင်္ဂလာအခမ်းအနားကို ယနေ့နံနက်ပိုင်းက မရမ်းချိုကျောင်းပရိယတ္တိစာသင်တိုက်၌ ကျင်းပခဲ့ရာ တိုင်းဒေသကြီးဝန်ကြီးချုပ်နှင့် ဇနီး၊ အနောက်တောင်တိုင်းစစ်ဌာနချုပ် တိုင်းမှူးနှင့် ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ အစိုးရအဖွဲ့ဝင် ဝန်ကြီးများတက်ရောက်ခဲ့ကြသည်။ ဦးစွာ တိုင်းဒေသကြီး ဝန်ကြီးချုပ်နှင့် ဧည့်သည်တော်များသည် ဆရာတော်ကြီးများအား လှူဖွယ်ဝတ္တုပစ္စည်းများ ဆက်ကပ်လှူဒါန်းခဲ့ပြီး သာသနာရေးဆိုင်ရာ ကိစ္စရပ်များအား တင်ပြလျှောက်ထားခဲ့ကြသည်။ ထို့နောက် ဆရာတော်ကြီးအမှူးရှိသော ရဟန်း ၅၁ပါး၊ သာမဏေ ၂၀၁ပါး စုစုပေါင်းသံဃာတော် ၂၅၂ပါးတို့အား နေ့ဆွမ်းများ ဆက်ကပ်လှူဒါန်းခဲ့ကြောင်းသိရသည်။

(၇၆)နှစ်မြောက်လွတ်လပ်ရေးနေ့ကို ကြိုဆိုဂုဏ်ပြုသောအားဖြင့် ၂၀၂၃-၂၀၂၄ခု ဘဏ္ဍာရေးနှစ်၊ သာပေါင်းမြို့နယ်စည်ပင်သာယာရေးအဖွဲ့ ငွေလုံးငွေရင်းရန်ပုံငွေဖြင့် ဆောင်ရွက်ခဲ့သည့် သာပေါင်းမြို့၊ အမှတ်(၃) ရပ်ကွက်ရှိ ကွင်းသာယာကွန်ကရစ်လမ်းသစ် ဖွင့်ပွဲ အခမ်းအနားကို ယနေ့နံနက်ပိုင်းက အဆိုပါလမ်းတွင်ပြုလုပ်ခဲ့ရာ တိုင်းဒေသကြီးဝန်ကြီးချုပ် ဦးတင်မောင်ဝင်းသည် တာဝန်ရှိသူများနှင့်အတူ တက်ရောက်ဖွင့်လှစ်ပေးခဲ့သည်။ ဦးစွာ တိုင်းဒေသကြီးစည်ပင်သာယာရေးအဖွဲ့၊ ခေတ္တညွှန်ကြားရေးမှူးက ကွင်းသာယာကွန်ကရစ်လမ်းသစ်ဖွင့်ပွဲ အထိမ်းအမှတ်အလံအားတိုင်းဒေသကြီးဝန်ကြီးချုပ်ထံသို့လည်းကောင်း၊ မြို့နယ်စည်ပင်သာရေးအဖွဲ့ အမှုဆောင်အရာရှိက လုံခြုံရေးနှင့်နယ်စပ်ရေးရာ ဝန်ကြီးထံသို့လည်းကောင်း အသီးသီးပေးအပ်ခဲ့ပြီးနောက် တိုင်းဒေသကြီးဝန်ကြီးချုပ်၊ လုံခြုံရေးနှင့်နယ်စပ်ရေးရာဝန်ကြီး၊ ခရိုင်စီမံအုပ်ချုပ်ရေးအဖွဲ့ ဥက္ကဋ္ဌတို့က ကွန်ကရစ်လမ်းသစ် အား ဖဲကြိုးဖြတ်ဖွင့်လှစ်ပေးခဲ့ပြီး ကွင်းသာယာကွန်ကရစ်လမ်းသစ်ကို လှည့်လည်ကြည့်ရှုစစ်ဆေးခဲ့ကာ ရေရှည်တည်တံ့စေရေးထိန်းသိမ်းစောင့်ရှောက်ကြရန်မှာကြားခဲ့ပြီး ဖျော်ဖြေရေး အဖွဲ့များအတွက် ချီးမြှင့်ငွေများပေးအပ်ခဲ့သည်။ အဆိုပါကွန်ကရစ်လမ်းသည် ၂၀၂၃-၂၀၂၄ ဘဏ္ဍာရေးနှစ်တွင် သာပေါင်းမြို့နယ်စည်ပင်သာယာရေးအဖွဲ့ ငွေလုံးငွေရင်းအသုံးစရိတ်ဖြင့်ဆောင်ရွက်သောလမ်းဖြစ်ပြီး အလျား ၇၃၀ပေ၊ အကျယ်၁၂ပေနှင့် ထု ၈ လက်မ ရှိကြောင်းသိရပြီး ဒေသတွင်းဖွံ့ဖြိုးတိုးတက်စေရန်နှင့် မြို့အင်္ဂါရပ်နှင့်အညီ သာယာလှပစေရန် ရည်ရွယ်၍ ဆောင်ရွက်ခဲ့သော လမ်းဖြစ်ကြောင်းသိရသည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် ပုသိမ်ခရိုင်၊ သာပေါင်းမြို့နယ်၊ သံလျက်စွန်းကျေးရွာတွင်ပြုလုပ်သည့် တောင်သူများတွေ့ဆုံပွဲနှင့် သစ်စိမ်းမြေဩဇာ (ပိုက်ဆံလျှော်)၊ ဆီထွက်သီးနှံနေကြာ စိုက်ပျိုးပွဲ အခမ်းအနားအား တက်ရောက်ခဲ့ကြပြီး တိုင်းဒေသကြီးဝန်ကြီးချုပ်က“ ယခုကဲ့သို့ တောင်သူများနှင့်တွေ့ဆုံပွဲများအား မြို့နယ်တိုင်းတွင်ပြုလုပ်၍ တိုင်းဒေသကြီး၏ စိုက်ပျိုးရေးလုပ်ငန်းများအောင်မြင်စေရေး ဆွေးနွေးခဲ့ပါကြောင်း၊ သီးနှံများစိုက်ပျိုးရာတွင် မြေမှန်၊ မျိုးမှန်၊ စိုက်နည်းမှန်၊ ရာသီမှန်အောင်စိုက်ပျိုးရမည် ဖြစ်ပါကြောင်းနှင့် ရာသီမီအောင်စိုက်ပျိုးနိုင်ရေးအတွက် တာဝန်ရှိသူများအား ကွင်းဆင်းကြပ်မတ် ဆောင်ရွက်စေလျက်ရှိပါကြောင်း၊ အောင်မြင်စေရေးအတွက် တောင်သူများကလည်း ဝိုင်းဝန်းပူးပေါင်း ဆောင်ရွက်ကြစေလိုကြောင်း၊ ဆီဖူလုံရေးအတွက် ဆီထွက်သီးနှံ နေကြာအား စိုက်ပျိုးစေခြင်းဖြစ်ပါကြောင်းနှင့် လာမည့်မိုးစပါးစိုက်ရာသီတွင် ရေတော်မိုးတော် စိုက်ဧက (၂၇)သိန်းအား ပိုက်ဆံလျှော်များ အပြည့်အဝထည့်သွင်း စိုက်ပျိုးနိုင်ရေးအတွက် သက်ဆိုင်ရာ မြို့နယ်အလိုက်အဖွဲ့လိုက်စုပေါင်းစနစ်ဖြင့်အချိန်မီမျိုးစေ့ရရှိရေးဆောင်ရွက်လျက်ရှိပါကြောင်း” ပြောကြားသည်။ ဆက်လက်၍ စိုက်ပျိုးရေးဦးစီးဌာန၊ တိုင်းဦးစီးမှူးက သစ်စိမ်းမြေဩဇာ (ပိုက်ဆံလျှော်)၊ ဆီထွက်သီးနှံနေကြာစိုက်ပျိုးရခြင်းရည်ရွယ်ချက်များအား ရှင်းလင်းတင်ပြခဲ့ပြီးနောက် သာပေါင်းမြို့နယ်၊ ငါးဘတ်ချောင်းကျေးရွာ၊ တောင်သူဦးကံဌေး၏ စိုက်ဧက(၀.၂၅)ဧက၌ ဆင်းသုခစပါးမျိုးအား ပိုက်ဆံလျှော်ထည့်သွင်းအသုံးပြုခြင်း၊ ပိုက်ဆံလျှော်- သဘာဝမြေဩဇာ ထည့်သွင်းအသုံးပြုခြင်း၊ ပိုက်ဆံလျှော်- သဘာဝမြေဩဇာ-ဓါတ်မြေဩဇာ ထည့်သွင်းအသုံး ပြုခြင်းစသည့် စမ်းသပ်စိုက်ပျိုးထားရှိသည့် ဆန်၊ စပါးနမူနာများကိုကြည့်ရှုစစ်ဆေးခဲ့ပြီး စတင်စိုက်ပျိုးချိန်မှစ၍ ဆန်ကြိတ်ခွဲသည်အထိစနစ်တကျမှတ်တမ်းများ ထားရှိစေရေး နှင့် ဆန်၊ စပါးအရည်အသွေးကောင်းမွန်မှုအခြေအနေများအား စမ်းသပ်မှုများဆောင်ရွက်နိုင်စေရေး မှာကြားခဲ့သည်။ ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ၂၀၂၃-၂၀၂၄ခုနှစ်၊ သစ်စိမ်းမြေဩဇာ (ပိုက်ဆံလျှော်) မျိုးစေ့ထုတ်စိုက်ခင်းနှင့် ဆီထွက်သီးနှံ ဆောင်းနေကြာများအား ဌာနဆိုင်ရာများနှင့် တောင်သူများက မျိုးစေ့ချစိုက်ပျိုးပေးနေမှုများကို ကြည့်ရှုအားပေးခဲ့သည်။

ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် အစိုးရအဖွဲ့ဝင် ဝန်ကြီးများ၊ တိုင်း၊ ခရိုင်၊ မြို့နယ်ဌာနဆိုင်ရာများနှင့်အတူ ယနေ့မွန်းလွဲပိုင်းက ရေကြည်မြို့နယ်အတွင်းရှိ ဟင်းသီးဟင်းရွက်စိုက်ခင်းများနှင့် စိုက်ပျိုးရေးလုပ်ငန်းများအားကြည့်ရှုအားပေးခဲ့သည်။ ဦးစွာ တိုင်းဒေသကြီးဝန်ကြီးချုပ်နှင့်အဖွဲ့သည် ရေကြည်မြို့နယ်၊ အင်းလျာကုန်းကျေးရွာအုပ်စုအတွင်းရှိ ဆင်ကူးအနောက်ကျေးရွာ၊ လှေတော်ရုံကျေးရွာ၊ လယ်ဒီကျေးရွာ၊ ဆင်ကူးအရှေ့ကျေးရွာနှင့် အင်းလျာကုန်းကျေးရွာတို့မှ တောင်သူ(၂၃၈)ဦး၏ ပန်းအမျိုးမျိုး၊ ပန်းဂေါ်ဖီ၊ ဂေါ်ဖီထုပ်၊ ချဉ်ပေါင်၊ မုံလာ၊ ဆလပ်၊ ကန်စွန်း၊ စားပြောင်း၊ ငရုတ်စသည့် ဟင်းသီးဟင်းရွက် (၁၃၅)ဧက စိုက်ပျိုးထားရှိမှုများကို ကြည့်ရှု့အားပေးခဲ့ပြီး ဌာနဆိုင်ရာများ၊ တောင်သူများအား သီးနှံများပိုမိုစိုက်ပျိုးထုတ်လုပ်နိုင်စေရေး၊ စားဖိုဆောင်သီးနှံများစျေးနှုန်းသက်သာစွာထုတ်လုပ်ရောင်းချနိုင်ရေးဆောင်ရွက်ရန်မှာကြားခဲ့သည်။ အဆိုပါ စိုက်ခင်းမှထွက်ရှိသည့် သီးနှံများအား ပုသိမ်၊ ဟင်္သာတမြို့များသို့တင်ပို့ရောင်းချလျက်ရှိကြောင်းသိရသည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် ရေကြည်မြို့နယ်၊ ကျေးလက်လမ်းဖွံ့ဖြိုးရေးဦးစီးဌာနမှ တာဝန်ယူဆောင်ရွက်လျက်ရှိသည့် အင်းလျားကုန်း-သံဒင်း-နတ်စင်ငူ-ဇရပ်လှလမ်း(၉မိုင်၂ဖာလုံ)မှ ၄.၄၇၄ဖာလုံအား အမာခံခင်းခြင်းလုပ်ငန်း ဆောင်ရွက်နေမှုများကို ကြည့်ရှုစစ်ဆေးပြီး တာဝန်ရှိသူများ၏ ရှင်းလင်းတင်ပြချက်ချက်များအပေါ် တိုင်းဒေသကြီး ဝန်ကြီးချုပ်က အရည်အသွေးပြည့်မီရေး၊ သတ်မှတ်ထားသောကာလအတွင်း ပြီးစီးစေရေးနှင့် လမ်းဘေး ဝဲယာများ၊ လမ်းပုခုံးများ စနစ်တကျရှိစေရေးမှာကြားခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် သပြေကွင်းစံပြကျေးရွာ ပွင့်သစ်စ သမအသင်း၏ နေကြာတစ်ဧကနှင့် ပိုက်ဆံလျှော်မျိုးစေ့ထုတ်တစ်ဧကအားစိုက်ပျိုးနေမှုများနှင့် ကွင်းသုံးဆင့်ကျေးရွာအုပ်စု၊ သပြေကွင်းခေတ်မီစံပြကျေးရွာမှ တောင်သူများ စုပေါင်း၍ အကောင်အထည်ဖော်ဆောင်ရွက်သော ၂၀၂၃-၂၀၂၄ခုနှစ်၊ ဆောင်းသီးနှံ(ပိုက်ဆံလျှော်)မျိုးစေ့ထုတ်(၁၀)ဧကနှင့် နေကြာတစ်ဧက စိုက်ပျိုးပြီးစီးမှုအခြေအနေများ ကြည့်ရှုစစ်ဆေးခဲ့ပြီး ပိုက်ဆံလျှော်မျို့စေ့ထုတ်စိုက်ခင်းများအောင်မြင်စွာဆောင်ရွက်စေရေး၊ နေကြာစိုက်ပျိုးမှုများဖြစ်ထွန်းအောင်မြင်စေရေးနှင့် စိုက်ပျိုးမြေများကျန်လပ်မှုမရှိစေရေးနှင့် သီးထပ်စွမ်းအားများမြှင့်တင်စိုက်ပျိုးရန်မှာကြားခဲ့သည်။ ထို့နောက်သပြေကွင်းကျေးရွာ အခြေခံပညာမူလတန်းကျောင်းသို့ သွားရောက်ကြည့်ရှုစစ်ဆေးခဲ့ပြီး ကျောင်းအုပ်ကြီးမှ ကျောင်း၏လိုအပ်ချက်များကိုတင်ပြခဲ့ရာ တိုင်းဒေသကြီးဝန်ကြီးချုပ်က သက်ဆိုင်ရာတာဝန်ရှိသူများနှင့် ပေါင်းစပ်ညှိနှိုင်းဆောင်ရွက်ပေးခဲ့ကာ ဆရာ၊ ဆရာမများအတွက် ထောက်ပံ့ငွေများပေးအပ်ခဲ့သည်။ ထို့နောက် တိုင်းဒေသကြီး ဝန်ကြီးချုပ်သည် ပုသိမ်(ကံကလေး)-မုံရွာလမ်း မိုင်(၀/၀-၂၀/၃)အထိ(၂၀မိုင်၃)ဖာလုံ အတွင်းမိုင်(၁မိုင်၅ဖာလုံမှ မိုင်၇ဖာလုံ)အထိ ၂ဖာလုံ ၁၈ပေအကျယ်မှ ၂၄ပေအကျယ်ကတ္တရာလမ်းချဲ့ခြင်း၊ မိုင်(၁၀မိုင်၀ဖာလုံမှ ၁၀မိုင် ၂‌.၅ဖာလုံ)အထိ (၂.၅ဖာလုံ) ၁၈ပေအကျယ်မှ ၂၄ပေအကျယ်ကတ္တရာလမ်းချဲ့ခြင်းနှင့် မိုင် (၁၂မိုင် ၃ဖာလုံမှ ၁၂မိုင် ၅ဖာလုံ)အတွင်း (၁)ဖာလုံ လမ်းအနိမ့်အမြင့်ဖြေညှိခြင်းလုပ်ငန်းဆောင်ရွက်မှုများကို ကြည့်ရှုစစ်ဆေးပြီး တာဝန်ရှိသူများအား အရည်အသွေးပြည့်မီရေး၊ သတ်မှတ်ထားသောကာလအတွင်း ပြီးစီးစေရေးနှင့် လမ်းဘေး ဝဲယာများ၊ လမ်းပုခုံးများ စနစ်တကျရှိစေရေးမှာကြားခဲ့သည်။