နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်၊ တိုင်းဒေသကြီး ဝန်ကြီးချုပ်နှင့်အဖွဲ့သည် ကျုံပျော်မြို့နယ်၊ ကျီးအိုင်ကျေးရွာအုပ်စုရှိ တောင်သူဦးကျော်သူရ၏ စိုက်ဧက(၈)ဧကတွင် နိုင်ငံ့စီးပွားမြှင့်တင်ရေးရန်ပုံငွေဖြင့် စိုက်ပျိုးထုတ်လုပ်သော ပီလောပီနံ(RayRong-9)အမျိုးအစား၊ ဘောင်စနစ်ဖြင့်စိုက်ပျိုးသော ပီလောပီနံစံပြစိုက်ခင်းအား သွားရောက် ကြည့်ရှုအားပေးခဲ့ရာဒေသစိုက်မျိုး (ကိုင်းရှုတ်)မျိုးနှင့် (RayRong-9)အထွက်ကောင်းမျိုးအား ဘောင်စနစ်ဖြင့်ယှဉ်ပြိုင်စမ်းသပ်စိုက်ပျိုးထားရှိမှု၊ သက်တမ်းတို အထွက်ကောင်းမျိုးများဖြစ်သည့် (RayRong-72)မျိုးများစမ်းသပ်စိုက်ပျိုးထားရှိမှုအခြေအနေများ၊ ၆လ သက်တမ်းရှိ(RayRong-72)၊ (RayRong-9) မျိုးစမ်းသပ်တူးဖော်၍ အထွက်တိုးကောင်းမွန်မှုအခြေအနေများ၊ ကျုံပျော်မြို့နယ်အတွင်း ပီလောပီနံစိုက်ပျိုးထားရှိမှုနှင့် ပီလောပီနံမှထွက်ရှိသည့် ကုန်ကြမ်း၊ ကုန်ချောများအား ပြည်တွင်းပြည်ပ တင်ပို့နိုင်ရေးဆောင်ရွက်နေမှုအခြေအနေများအား တာဝန်ရှိသူများမှရှင်းလင်းတင်ပြမှုအပေါ် နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်က ပီလောပီနံအထွက်ကောင်းမျိုးများ၊ စိုက်ပျိုးေရးနည်းစနစ်များအား တောင်သူများကျယ်ကျယ်ပြန့်ပြန့် သိရှိအသုံးပြုနိုင်စေရေးနှင့် မျိုးပွားဖြန့်ဝေဆောင်ရွက်ရန်၊ သီးထပ်စွမ်းအားများ တိုးတက်စိုက်ပျိုးနိုင်ရေးအတွက် သက်တမ်းတိုအထွက် ကောင်းမျိုးများ တိုးတက်ထုတ်လုပ်စိုက်ပျိုးရန်နှင့် အောင်မြင်အောင်ဆောင်ရွက်စေရေးမှာကြားခဲ့သည်။ အဆိုပါ တောင်သူဦးကျော်သူရ၏ စိုက်ဧက(၈)ဧကရှိ ၆လ သက်တမ်းရှိ ပီလောပီနံ (RayRong-72)၊ (RayRong-9) မျိုးစမ်းသပ်တူးဖော်ရာတွင် ( RayRong-72) မျိုးတစ်ပင်လျှင် ပိသာချိန်၅ပိသာကျော်ထွက်ရှိပြီး (RayRong-9)မျိုးတစ်ပင်လျှင် ပိသာချိန်၆ပိသာကျော်ထွက်ရှိခဲ့ကာ တစ်ဧကပျမ်းမျှအထွက်နှုန်း ပိသာချိန်တစ်သောင်းကျော်ထွက်ရှိကြောင်းသိရသည်။ ဆက်လက်၍ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်၊ တိုင်းဒေသကြီး ဝန်ကြီးချုပ်နှင့်အဖွဲ့သည် ဟင်္သာတခရိုင်၊လေးမျက်နှာမြို့နယ်၊ လှော်ကထားကျေးရွာအုပ်စုရှိ ပိုင်ရှင်ဦးအောင်မြင့်၏ တိုးတက်ကုမ္ပဏီရာဘာခြံသို့သွားရောက်၍ ရာဘာစိုက်ခြင်း၊ အစေးခြစ်ခြင်းနှင့် ရာဘာကုန်ကြမ်း ထုတ်လုပ်မှု အဆင့်ဆင့်တို့အားမေးမြန်းခဲ့ပြီး ကုမ္ပဏီမှ တာဝန်ရှိသူများက ရာဘာစိုက်ပျိုးထားရှိမှု၊ ရာဘာပြားများထုတ်လုပ်မှုနှင့် ရောင်းချနေမှု အခြေအနေများရှင်လင်းတင်ပြမှုအပေါ် နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်က စိုက်ဧကများအပြည့်အဝ စိုက်ပျိုးစေနိုင်ရေး၊ ဖြစ်ထွန်းအောင်မြင် အောင်စိုက်ပျိုးရေး၊ ကုန်ကြမ်းအရည်အသွေးများပြည့်မီစေရေး၊ ကုန်ကြမ်းများမှကုန်ချော ထုတ်လုပ်နိုင်သည်အထိနည်းလမ်းများရှာဖွေ၍ ပူးပေါင်းဆောင်ရွက်ကြစေရေး၊ တန်ဖိုးမြင့် ထုတ်ကုန်များထုတ်လုပ်နိုင်ရေးဆောင်ရွက်ရန်နှင့် မိမိတို့အနေဖြင့်လည်း လိုအပ်သည်များ ပူးပေါင်းဆောင်ရွက်ပေးသွားမည်ဖြစ်ကြောင်းပြောကြားခဲ့ပြီး ရာဘာစိုက်ပျိုးထားရှိမှု၊ အစေးခြစ် နိုင်ရေးကြိုတင်ပြင်ဆင်ဆောင်ရွက်ထားရှိမှု၊ ရာဘာေစးများအားခဲကန်အတွင်းထည့်သွင်းခြင်း၊ခဲကန်အတွင်းရှိ အပြားများအားကြိတ်ခြင်း၊ ရေစစ်ခြင်း၊ နေလှမ်းခြင်း၊ မှိုင်းခံခြင်းနှင့် မှိုင်းခံပြီးရာဘာပြားများအားထုတ်ပိုးခြင်းစသည့်ကုန်ကြမ်းထုတ်လုပ်မှုများအား ကြည့်ရှု စစ်ဆေးခဲ့သည်။ တိုးတက်ကုမ္ပဏီအနေဖြင့် ရာဘာစိုက်ဧက(၅၆၂)ဧက ကျော် စိုက်ပျိုးထားရာ (BPM 24) ရာဘာမျိုးအား အဓိကထားစိုက်ပျိုးထားရှိပြီး (RSS -1) အဆင့်ရာဘာပြားများအားဆိုလာစနစ်အသုံးပြု၍ တစ်နေ့လျှင် ၁တန်ခန့် ထုတ်လုပ်လျက်ရှိပြီးရန်ကုန်ဈေးကွက် သို့ပို့ဆောင်လျက် ရှိကြောင်းသိရသည်။ ဆက်လက်၍ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်၊ တိုင်းဒေသကြီး ဝန်ကြီးချုပ်နှင့်အဖွဲ့သည် နိုင်ငံ့စီးပွားမြှင့်တင်ရေးရံပုံငွေဖြင့်ဆောင်ရွက်သည့် ငါးသိုင်းချောင်းမြို့၊ အောင်ဆန်းရပ်ကွက်ရှိ “အောင်မိသားစု” သင်၊ ကြိမ်၊ ဝါး၊ ဗေဒါရိုးလက်မှုပစ္စည်း အရောင်းဆိုင်သို့သွားရောက်၍ လူသုံးကုန်ပစ္စည်းအမျိုးမျိုးရက်လုပ်နေမှုများကို ကြည့်ရှုအားပေးပြီး ကုန်ထုတ်လုပ်မှု၊ ရောင်းချရမှုအခြေအနေများမေးမြန်းခဲ့ကာ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်က “မိမိတို့တိုင်းဒေသကြီးမှ ထွက်ရှိသည့် MSMEsထုတ်ကုန်ပစ္စည်းများအား အခြားသောတိုင်းဒေသကြီးနှင့် ပြည်နယ်များကပါ သိရှိရန်နှင့် ပြည်တွင်းပြည်ပ ဈေးကွက်များအထိထိုးဖောက်နိုင်ရေး ဖော်ဆောင်ရန်လိုပါကြောင်း၊ တိုင်းဒေသကြီးမှ ထုတ်ကုန်ပစ္စည်းများသည် မိမိတို့တိုင်းမှထွက်ရှိသည့်ကုန်ကြမ်းများကို အခြေခံထုတ်လုပ်ရန်နှင့်ကုန်ကြမ်းများရရှိစေရေးဆောင်ရွက်ပေးရန်နှင့် နိုင်ငံ့စီးပွားမြှင့်တင်ရေးရံပုံငွေထောက်ပံ့ဆောင်ရွက်ပေးထားသဖြင့် လုပ်ငန်းများပိုမိုတိုးတက်အောင်ဆောင်ရွက်ရန်နှင့်လုပ်ငန်းတိုးတက်မှုအခြေအနေများအား စနစ်တကျမှတ်တမ်းထားဆောင်ရွက်ရန်” မှာကြားခဲ့သည်။

နိုင်ငံတော်စီမံအုပ်ချုပ်ရေးကောင်စီ အဖွဲ့ဝင် မန်းငြိမ်းမောင်၊ တိုင်းဒေသကြီး ဝန်ကြီးချုပ်နှင့် အစိုးရအဖွဲ့ဝင် ဝန်ကြီးများသည် ယနေ့နံနက်ပိုင်းက ကျုံ‌ပျော်ခရိုင်၌ပြုလုပ်သည့် (MSMEs)ဒေသထွက်ကုန်ပစ္စည်းများ ပြပွဲအားတက်ရောက်ကြည့်ရှုအားပေးခဲ့ပြီး မြို့နယ်အားကစားခန်းမတွင် ခရိုင်အတွင်းရှိဌာနဆိုင်ရာများ၊ မြို့မိမြို့ဖများ၊ တောင်သူများနှင့် တွေ့ဆုံခဲ့သည်။ ဦးစွာ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင် ၊ တိုင်းဒေသကြီး ဝန်ကြီးချုပ်နှင့် အစိုးရအဖွဲ့ဝင် ဝန်ကြီးများသည် GBS ကုမ္ပဏီမှပြသထားသည့် စက်ပစ္စည်းအရောင်းပြခန်း၊ ကျုံပျော်မြို့နယ်မှပြသထားသည့် မြန်မာ့ပီလောပီနံနှင့် ပီလောပီနံ ကော်မှုန့်ပါဝင်သည့် လူသုံးကုန်၊ စားသောက်ကုန်၊ ပီလောပီနံ ပျော့ဖတ်တိရစ္ဆာန်အစာ၊ ပီလောပီနံမှထုတ်လုပ်သောသဘာဝမြေဩဇာ၊ ငှက်ပျောနှင့် ငှက်ပျော်ချည်ဖြင့်ပြုလုပ်သည့် လက်မှုထည်များ၊ ဒေသထွက်ထုတ်ကုန်များပြခန်း၊ ကျောင်းကုန်းမြို့နယ်မှပြသထားသည့် ကြက်အူချောင်း၊ ဝက်အူချောင်း၊ ဆီထွက်ကုန်ပစ္စည်းများ၊ ဆန်နှင့်ထွက်ကုန်ပစ္စည်းများပြခန်း၊ ငါးလုပ်ငန်းဦးစီးဌာန၊ မွေးမြူရေးနှင့်ကုသရေးဦးစီးဌာနပြခန်း၊ ရေကြည်မြို့နယ်မှပြသထားသည့် ဒေသထွက်ကြိမ်၊ ဝါး၊ ဗေဒါ လက်မှုပစ္စည်းများ၊ နုထွေးလက်ဖက်နှင့်ဂျင်းသုပ်လုပ်ငန်းမှ ထုတ်ကုန်ပစ္စည်းများပြခန်းများကို လှည့်လည်ကြည့်ရှုအားပေးခဲ့ပြီး ဒေသထွက်ကုန်ပစ္စည်းများအား တိုးတက်ထုတ်လုပ်နိုင်ရေးနှင့် ပြည်တွင်းဈေးကွက်သာမက ပြည်ပဈေးကွက်အထိ တင်ပို့ရောင်းချနိုင်ရေး မှာကြားခဲ့သည်။ ဆက်လက်၍ နိုင်ငံတော်စီမံအုပ်ချုပ်ရေးကောင်စီ အဖွဲ့ဝင် မန်းငြိမ်းမောင်၊ တိုင်းဒေသကြီး ဝန်ကြီးချုပ်နှင့် အစိုးရအဖွဲ့ဝင် ဝန်ကြီးများသည် ကျုံပျော်ခရိုင်အတွင်းရှိဌာနဆိုင်ရာများ၊ မြို့မိမြို့ဖများ၊ တောင်သူများနှင့်တွေ့ဆုံခဲ့ရာ ဉီးစွာ ကျုံပျော်ခရိုင်စီမံအုပ်ချုပ်ရေးအဖွဲ့ ဥက္ကဋ္ဌက ကျုံပျော်ခရိုင်၏ အုပ်ချုပ်ရေး၊ စီးပွားရေး၊ လူမှုရေးအခြေအနေများအား ရှင်းလင်းတင်ပြသည်။ ယင်းနောက် နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်က“ ယခုကဲ့သို့ ကျုံပျော်ခရိုင်အတွင်းမှ ဌာနဆိုင်ရာများ၊ ပြည်သူများ၊ တောင်သူများနှင့်တွေ့ဆုံခွင့်ရသည့်အတွက် ကျေးဇူးတင်ဝမ်းသာဂုဏ်ယူရပါကြောင်း၊မိမိတို့နိုင်ငံသည် တိုင်းရင်းသားပေါင်းစုံ စုပေါင်းနေထိုင်သည့်နိုင်ငံဖြစ်သည့်အတွက် တစ်ဦးနှင့်တစ်ဉီး နားလည်ရန်နှင့် တစ်ဦး၏အခက်အခဲကို တစ်ဦးကဖေးမကူညီရန်လိုအပ်ပါကြောင်း၊ နိုင်ငံသားတိုင်းအနေဖြင့် မိမိတို့၏ နောင်လာနောင်သားများအား ကောင်းသည့်သမိုင်းကြောင်းမှတ်တမ်းများကို လက်ဆင့်ကမ်းပေးရန်လိုပါကြောင်း၊ တိုင်းပြည်ငြိမ်းချမ်းမှ ဖွံ့ဖြိုးတိုးတက်မှုများ ရရှိလာနိုင်မည်ဖြစ်ပါကြောင်း၊ နိုင်ငံတော်စီမံအုပ်ချုပ်ရေးကောင်စီအနေဖြင့် ၂၀၂၀ ပြည့်နှစ် ပါတီစုံဒီမိုကရေစီအထွေထွေ ရွေးကောက်ပွဲတွင် မဲမသမာမှုများကြောင့် နိုင်ငံတော်အာဏာကို ထိန်းသိမ်းရယူဆောင်ရွက်ခဲ့ရပါကြောင်း၊ ၂၀၂၄ခုနှစ် သန်းခေါင်စာရင်းကောက်ယူ ထုတ်ပြန်အတည်ပြုပြီးပါက လွတ်လပ်၍ တရားမျှတသောရွေးကောက်ပွဲအား ကျင်းပမည်ဖြစ်ပြီး အသက်(၁၈)နှစ်ပြည့်ပြီးသူတိုင်း မဲပေးခွင့်များရရှိလာမည်ဖြစ်ပါ‌ကြောင်း၊ မိမိတို့နိုင်ငံသည် တိုင်းရင်းသားပေါင်းစုံမှီတင်းနေထိုင်သည့် နိုင်ငံဖြစ်သည်နှင့်အညီ တိုင်းပြည်အား စုပေါင်းခေါင်းဆောင်မှုဖြင့်သာ သွားရမည်ဖြစ်ပါကြောင်း၊ လူမျိုးတိုင်း ပါတီတိုင်းသည် နိုင်ငံတော်ကိုခေါင်းဆောင်သည့်အခါ ကိုယ်စီတာဝန်ယူ၍ စုပေါင်းခေါင်းဆောင်မှုဖြင့် ပါတီစုံဒီမိုကရေစီစနစ်ကို ဖော်ဆောင်သွားမည်ဖြစ်ပါကြောင်း၊ ယနေ့တိုင်းပြည်တွင်ဖြစ်ပေါ်နေသည့် အကြမ်းဖက်မှုများသည် အသိပညာချို့တဲ့ခြင်း၊ ဆင်ခြင်တုံတရားနည်းပါးခြင်းကြောင့် အာဏာနိုင်ငံ‌ရေးကို အသက်သွင်းလိုသူ လူတစ်စု၏ အဖျက်အားပေးဆွဲဆောင်စည်းရုံးခံရမှုကြောင့် ဖြစ်ပါကြောင်း၊ အသိပညာချို့တဲ့ခြင်းကြောင့် နိုင်ငံတော်မှပညာရေးကို အစွမ်းကုန်မြှင့်တင်ကြိုးစားဆောင်ရွက်ပေးလျက်ရှိပါကြောင်း၊တိုင်းပြည်အပေါ်စေတနာရှိသည့် သဘောထားပြည့်ဝသည့် ခေါင်းဆောင်များကို ရွေးချယ်နိုင်ရန်လိုအပ်ပါပါကြောင်း၊ နယ်မြေဒေသတစ်ခုအေးချမ်းတည်ငြိမ်မှုရှိသည့်အခါ နိုင်ငံတော်၏ ရည်မှန်းချက်များအား ကိုယ်စွမ်းဉာဏ်စွမ်းရှိသလောက် အကောင်အထည်ဖော်ဆောင်ရွက်ခွင့်ရရှိမည်ဖြစ်ပါကြောင်း၊ နိုင်ငံတော်စီမံအုပ်ချုပ်ရေးေကာင်စီအနေဖြင့် ရှေ့လုပ်ငန်းစဉ်(၅)ရပ်နှင့် ဦးတည်ချက် (၉)ရပ်တို့အား ချမှတ်အကောင်အထည်ဖော်လျက်ရှိရာ နိုင်ငံတော်တည်ငြိမ် အေးချမ်းရေးနှင့် ဘက်စုံဖွံ့ဖြိုးတိုးတက် စေရေး ကဏ္ဍစုံကြိုးပမ်းဆောင်ရွက်လျက်ရှိပါကြောင်း၊ နိုင်ငံသားတိုင်းအနေဖြင့်လည်း ကိုယ်စီကိုယ်စီကိုယ့်တာဝန်ကျေပွန်၍ တိုင်းပြည်၏မျက်နှာ ပြည်သူ၏မျက်နှာကိုထောက်ထား၍ ဒေသဖွံ့ဖြိုးရေး၊ နိုင်ငံတော်ဖွံ့ဖြိုးတိုးတက်ရေးအတွက် နိုင်ငံသားတစ်ဦး၏တာဝန်ကို ကြိုးစားဆောင်ရွက်ကြစေလိုကြောင်း” လမ်းညွှန်အမှာစကားပြောကြားသည်။ ဆက်လက်၍ တိုင်းဒေသကြီးဝန်ကြီးချုပ်က“ တိုင်းဒေသကြီးအစိုးရအဖွဲ့အနေဖြင့် နိုင်ငံတော်စီမံအုပ်ချုပ်ရေးကောင်စီ၏ အမျိုးသားရေးလုပ်ငန်းစဉ် (၂)ရပ်ဖြစ်သည့် တိုင်းပြည်သာယာဝပြောရေးနှင့် စားရေရိက္ခာဖူလုံရေးကို ကြိုးပမ်းဆောင်ရွက်လျက်ရှိပါကြောင်း၊ စိုက်ပျိုးရေးနှင့် မွေးမြူရေးများကိုလည်း အင်တိုင်အားတိုက် ဆောင်ရွက်နေသည့် တိုင်းဒေသကြီးလည်းဖြစ်ပါကြောင်းနှင့် ကျေးလက်နေလူဦးရေအများဆုံးနေထိုင်သည့် တိုင်းလည်းဖြစ်ပါကြောင်း၊ တိုင်းဒေသကြီးသည် ကျောင်းတက်ရောက်မှု၊ ကျောင်းဖွင့်လှစ်မှု၊ အတန်းစဉ်ကူးပြောင်းမှုနှင့် အောင်ချက်မြင့်မားသော တိုင်းဒေသကြီးဖြစ်ပြီး ရေခံမြေခံကောင်းမွန်သည့် ပညာရေးကဏ္ဍတိုးတက်မြင့်မားကာ လူ့စွမ်းအားအရင်းအမြစ်များစွာ မွေးထုတ်ရာတိုင်းဒေသကြီးလည်းဖြစ်ပါကြောင်း၊ စနစ်သစ် Grade-12 တက္ကသိုလ်ဝင်စာမေးပွဲတွင် အောင်ချက်မြင့်မားရေးအတွက် ဘာသာရပ်ဆိုင်ရာ သိကောင်းစရာ ဆွေးနွေးဟောပြောပွဲများအား တက္ကသိုလ်များမှ ပါမောက္ခချုပ်များ၊ ပါမောက္ခဌာနမှူးနှင့် အခြေခံပညာ အထက်တန်းကျောင်းများမှ ဆရာ၊ ဆရာမများပူးပေါင်း၍ ပုသိမ် တက္ကသိုလ်၊ ဟင်္သာတတက္ကသိုလ်နှင့် မအူပင်တက္ကသိုလ်တို့တွင် ဇုန်ကြီး(၃)ဇုန်ခွဲ၍ ပြုလုပ်ခဲ့ပါကြောင်း၊ တိုင်းဒေသကြီး၏ စိုက်ပျိုလုပ်ငန်များပန်းတိုင်အထွက်နှုန်းရရှိစေရေးဆောင်ရွက်လျက်ရှိပါကြောင်း၊ စိုက်ပျိုးရေးလုပ်ငန်းများတိုးတက်စေရေးအတွက် နိုင်ငံ့စီးပွားမြှင့်တင်ရေးရံပုံငွေဖြင့် ထောက်ပံ့ဆောင်ရွက်ပေးလျက်ရှိရာ ဌာနဆိုင်ရာများ၊ တောင်သူကြီးများက စိုက်ပျိုးရေးလုပ်ငန်းပိုမိုတိုးတက်အောင်မြင်စေရေးနှင့် စိုက်ပျိုးရေးစံပြတိုင်းဒေသကြီးဖြစ်စေရေး ဆောင်ရွက်ပေးကြရန်နှင့် ရည်မှန်းချက်များအား အောင်မြင်အောင် ပူးပေါင်းဆောင်ရွက် ပေးကြစေလိုကြောင်း” အမှာစကားပြောကြားသည်။ ယင်းနောက် နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်၊ တိုင်းဒေသကြီး ဝန်ကြီးချုပ်တို့သည် နိုင်ငံစီးပွားမြှင့်တင်ရေးနွေစပါးစီမံကိန်း သွင်းအားစုများအား ကျုံပျော်မြို့နယ်၊ ရေကြည်မြို့နယ်၊ ကျောင်းကုန်းမြို့နယ်များမှ တောင်သူများထံသို့ပေးအပ်ခဲ့ပြီးနောက် ရေကြည်မြို့နယ်အတွင်းမှ ဒေသခံတောင်သူတစ်ဦးက ကျေးဇူးတင်စကားများ ပြန်လည်ပြောကြားခဲ့ကာ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်က နိဂုံးချုပ်အမှာစကားများပြောကြားခဲ့သည်။

နိုင်ငံတော်စီမံအုပ်ချုပ်ရေးကောင်စီ အဖွဲ့ဝင် မန်းငြိမ်းမောင်နှင့်ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ် ဦးတင်မောင်ဝင်း မြန်အောင်ခရိုင် ဒေသခံပြည်သူများနှင့်တွေ့ဆုံပွဲ အခမ်းအနားကို ယနေ့ မွန်းလွဲပိုင်းက မြန်အောင်မြို့ အောင်ဇေယျအားကစားခန်းမ၌ပြုလုပ်ခဲ့သည်။ ဦးစွာ နိုင်ငံတော်စီမံအုပ်ချုပ်ရေးကောင်စီ အဖွဲ့ဝင် မန်းငြိမ်းမောင်က“ နိုင်ငံတော်စီမံအုပ်ချုပ်ရေးကောင်စီအနေဖြင့် ၂၀၂၀ ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲတွင် မဲမသမာမှုများကြောင့် နိုင်ငံတော်အာဏာကို ထိန်းသိမ်းရယူဆောင်ရွက်ခဲ့ရပါကြောင်း၊ ၂၀၂၄ခုနှစ် သန်းခေါင်စာရင်း ကောက်ယူ ထုတ်ပြန်အတည်ပြုပြီးပါက လွတ်လပ်၍ တရားမျှတသောရွေးကောက်ပွဲအားကျင်းပမည်ဖြစ်ပြီး အနိုင်ရရှိသည့်ပါတီအား အာဏာလွှဲပြောင်းပေးမည်ဖြစ်ပါကြောင်း၊ ရွေးကောက်ပွဲအားကျင်းပသည့်အခါ အချိုးကျကိုယ်စားပြုစနစ်ကို သွားမည်ဖြစ်ပါကြောင်း၊ မိမိတို့နိုင်ငံသည် တိုင်းရင်းသားပေါင်းစုံမှီတင်းနေထိုင်သည့် နိုင်ငံဖြစ်သောကြောင့် နိုင်ငံသားတိုင်းအနေဖြင့် နိုင်ငံတော်၏ အကျိုးစီးပွားကိုကာကွယ်ရန်နှင့် အခွင့်အရေးကိုရယူရန်အတွက် လူမျိုးတိုင်းပါတီတိုင်းအနေဖြင့် ပါဝင်ခွင့်ရရှိစေရန် အချိုးကျကိုယ်စားပြုစနစ်ကို ရွေးချယ်ခြင်းဖြစ်ပါကြောင်း၊ မိမိတို့နိုင်ငံသည် တိုင်းရင်းသားပေါင်းစုံမှီတင်းနေထိုင်သည့် နိုင်ငံဖြစ်သည်နှင့်အညီ တိုင်းပြည်အား စုပေါင်းခေါင်းဆောင်မှုဖြင့်သာ သွားရမည်ဖြစ်ပါကြောင်း၊ လူမျိုးတိုင်းပါတီတိုင်းသည် နိုင်ငံတော်ကိုခေါင်းဆောင်သည့်အခါ ကိုယ်စီတာဝန်ယူ၍ စုပေါင်းခေါင်းဆောင်မှုဖြင့် ပါတီစုံဒီမိုကရေစီစနစ်ကို ဖော်ဆောင်သွားမည်ဖြစ်ပါကြောင်း၊ ယနေ့တိုင်းပြည်တွင်ဖြစ်ပေါ်နေသည့် အကြမ်းဖက်မှုများသည် အသိပညာချို့တဲ့ခြင်း၊ ဆင်ခြင်တုံတရားနည်းပါးခြင်းကြောင့် ဖြစ်ပါကြောင်း၊ အသိပညာချို့တဲ့ခြင်းကြောင့် နိုင်ငံတော်မှပညာရေးကို အစွမ်းကုန်မြှင့်တင်ကြိုးစားဆောင်ရွက်ပေးလျက်ရှိပါကြောင်း၊ တိုင်းပြည်တွင် ပညာတတ်များပေါများစေရန်နှင့် ပညာတတ်များဖြင့် လူ့အဖွဲ့အစည်းတစ်ခုဖြစ်ရန်အတွက် နိုင်ငံ့ခေါင်းဆောင်မည့်လူတော်လူကောင်းများ၊ တိုင်းပြည်အပေါ်စေတနာရှိသည့် သဘောထားပြည့်ဝသည့် ခေါင်းဆောင်များကို ရွေးချယ်နိုင်မည်ဖြစ်ပါကြောင်း၊ နယ်မြေဒေသတစ်ခုအေးချမ်းတည်ငြိမ်မှုရှိသည့်အခါ နိုင်ငံတော်၏ရည်မှန်းချက်များအား ကိုယ်စွမ်းဉာဏ်စွမ်းရှိသလောက် အကောင်အထည်ဖော်ဆောင်ရွက်ခွင့်ရရှိမည်ဖြစ်ပါကြောင်း၊ နိုင်ငံတော်အတွက် ဆီဖူလုံရေးအတွက် နေကြာများကိုလည်းတိုးချဲ့စိုက်ပျိုးလျက်ရှိပါကြောင်းနှင့် တောင်သူများအား အသိပညာပေးခြင်း၊ နည်းပညာများပံ့ပိုးမှုများဖြင့် ဆောင်ရွက်လျက်ရှိပါကြောင်း၊ နိုင်ငံသားတိုင်းအနေဖြင့်လည်း ကိုယ်စီကိုယ်စီကိုယ့်တာဝန်ကျေပွန်၍ တိုင်းပြည်၏မျက်နှာ ပြည်သူ၏မျက်နှာကိုထောက်ထား၍ နိုင်ငံသားတစ်ဦး၏တာဝန်ကို ကြိုးစားဆောင်ရွက်ကြစေလိုကြောင်း” အဖွင့်အမှာစကားပြောကြားသည်။ ဆက်လက်၍ တိုင်းဒေသကြီးဝန်ကြီးချုပ်က“ ဧရာဝတီတိုင်းဒေသကြီးသည် စိုက်ပျိုးရေးတိုင်းဒေသကြီးဖြစ်ပြီး မိုးစပါးနွေစပါးဧက(၅၂)သိန်းကျော် စိုက်ပျိုးလျက်ရှိ၍ စပါးတင်းသိန်းပေါင်း လေးထောင်ကျော်ထွက်ရှိပါကြောင်းနှင့် ဖူလုံမှုအနေဖြင့် (၃၄၈)ရာခိုင်နှုန်းဖူလုံမှုရှိပါကြောင်း၊ စပါးပန်းတိုင်အထွက်နှုန်းရောက်ရှိရန်အတွက် ပြီးခဲ့သည့် တောင်သူလယ်သမားနေ့တွင် တစ်ဧက ၁၀ တင်းနှုန်း ပိုမိုထွက်ရှိစေရေး ရည်မှန်းချက်များချမှတ် အကောင်အထည်ဖော်ဆောင်ရွက်ခဲ့ပါကြောင်း၊ဆီဖူလုံရေးအတွက် မြေပဲ၊ နှမ်းအပြင်ဆီထွက်သီးနှံ(နေကြာ)ကိုလည်း အောင်မြင်အောင် တိုးချဲ့စိုက်ပျိုးလျက်ရှိပါကြောင်း၊ တိုင်းဒေသကြီး၏ သီးနှံအထွက်တိုးရေး ကြိုးပမ်းဆောင်ရွက်နေသည့်အတွက် တောင်သူကြီးများအား ကျေးဇူးတင်ပါကြောင်းနှင့် ဆက်လက်၍လည်း ပေးထားသည့်ရည်မှန်းချက်များအား အောင်မြင်အောင် ပူးပေါင်းဆောင်ရွက် ပေးကြစေလိုကြောင်း၊ တိုင်းဒေသကြီးအစိုးရအဖွဲ့အနေဖြင့်လည်း တင်ပြချက်များအပေါ် ဖြည့်ဆည်းဆောင်ရွက်ပေးသွားမည်ဖြစ်ပါကြောင်း” အမှာစကားပြောကြားသည်။ ထို့နောက်မြန်အောင်ခရိုင်စီမံအုပ်ချုပ်ရေးအဖွဲ့ ဥက္ကဋ္ဌက မြန်အောင်ခရိုင် ၏ အုပ်ချုပ်ရေး ၊ စီးပွားရေး လူမှုရေးအခြေအနေများအား ရှင်းလင်းတင်ပြခဲ့သည်။ ဆက်လက်၍ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်နှင့် တိုင်းဒေသကြီးဝန်ကြီးချုပ်တို့က နိုင်ငံစီးပွားမြှင့်တင်ရေးနွေစပါးစီမံကိန်း သွင်းအားစုများအား မြန်အောင်၊ ကြံခင်း၊ အင်္ဂပူမြို့နယ်တို့မှ တောင်သူများထံသို့ပေးအပ်ခဲ့ပြီး တိုင်းဒေသကြီးဝန်ကြီးချုပ် က ၂၀၂၃-၂၀၂၄ ဘဏ္ဍာရေးနှစ် တိုင်းဒေသကြီးအစိုးရအဖွဲ့ ငွေလုံးငွေရင်းအသုံးစရိတ် ဒေသဖွံဖြိုးရေးရန်ပုံငွေဖြင့်ဆောင်ရွက်သည့် လုပ်ငန်းများအနက်မှ မြန်အောင်မြို့နယ်၌ မီးလင်းရေးလုပ်ငန်းအတွက် ကျေးရွာအုပ်စုများသို့ ဆိုလာမီးများဆက်လက်ထောက်ပံ့ပေးအပ်ရာ ညောင်ဝိုင်းကျေးရွာအုပ်စုမှ လက်ခံရယူခဲ့ပြီး မြန်အောင်မြို့နယ်မှ တောင်သူဦးဝင်းနိုင်က ကျေးဇူးတင်စကားပြန်လည်ပြောကြားခဲ့သည်။ ဆက်လက်၍ နိုင်ငံတော်စီမံအုပ်ချုပ်ရေးကောင်စီ အဖွဲ့ဝင် မန်းငြိမ်းမောင်နှင့် ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ် ဦးတင်မောင်ဝင်းတို့သည် တိုင်းဒေသကြီးအစိုးရအဖွဲ့ ဝန် ကြီးများ၊ တိုင်း/ခရိုင်/မြို့နယ်အဆင့်ဌာနဆိုင်ရာအကြီးအကဲများနှင့်အတူ မြန်အောင်မြို့ ပြည်သူ့ရင်ပြင်၌ (၇၆)နှစ်မြောက်လွတ်လပ်ရေးနေ့ကို ကြိုဆိုဂုဏ်ပြုသောအားဖြင့် ကျင်းပပြုလုပ်သော မြန်အောင်ခရိုင်အသေးစား၊အငယ်စားနှင့်အလတ်စားစီးပွားရေးလုပ်ငန်းများ ဖွံ့ဖြိုးတိုးတက်ရေး(MSMEs) ထုတ်ကုန်ပြပွဲ ပြခန်းများကို လှည့်လည်ကြည့်ရှု၍ မြန်အောင်ခရိုင်အတွင်းဒေသထွက်ထုတ်ကုန်ပစ္စည်းများ တိုးတက်ထုတ်လုပ်ရေး မှာကြားခဲ့သည်။ အဆိုပါ မြန်အောင်ခရိုင်အသေးစား၊အငယ်စားနှင့်အလတ်စားစီးပွားရေးလုပ်ငန်းများ ဖွံ့ဖြိုးတိုးတက်ရေး(MSMEs) ထုတ်ကုန်ပြပွဲ ကို အများပြည်သူများလေ့လာလည်ပတ်နိုင်ရေး ပြခန်းပေါင်း ၁၁ခန်းဖြင့် ယနေ့မှ့ ၁၈ရက်နေ့အထိ ၃ရက်တိုင်တိုင်ပြသသွားမှာဖြစ်ကြောင်းသိရသည်။

နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင် ၊ တိုင်းဒေသကြီးဝန်ကြီးချုပ်နှင့် အစိုးရအဖွဲ့ဝင် ဝန်ကြီးများသည် မြန်အောင်ခရိုင်၊ ကြံခင်းမြို့နယ်အထွေထွေအုပ်ချုပ်ရေးဦးစီးဌာနရုံး၌ ပြုလုပ်သည့် အရှိုချင်းရိုးရာ ကောက်သစ်စားပွဲတော် မိတ်ဆုံစားပွဲ အခမ်းအနားအား တက်ရောက်ခဲ့သည်။ အရှိုချင်းရိုးရာ ကောက်သစ်စားပွဲတော် မိတ်ဆုံစားပွဲ အခမ်းအနားတွင် နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်က“ အရှိုချင်းလူမျိုးများသည် ရှေးယခင်အချိန်မှစပြီး တောင်ယာလုပ်ငန်း၊ အမဲလိုက်ခြင်းလုပ်ငန်းများကို အဓိကထားလုပ်ကိုင်လျက်ရှိပြီးတောင်ယာနှင့်ပတ်သက်သော ပွဲတော်များအနက် "ကောက်သစ်စားပွဲ"သည် အရှိုချင်းတို့၏ အဓိကကျသော ပွဲတော်တစ်ခုပင် ဖြစ်ပါကြောင်း၊ အရှိုချင်းတို့၏ ကောက်သစ်စားပွဲတော်ကို နှစ်စဉ်နှစ်တိုင်း ကျင်းပကြပြီး ကောက်သစ်စားပွဲအား အရှိုဘာသာစကားဖြင့် "စောင်ထာအေဘွေ" ဟုခေါ်ဆိုကြသည်ကိုလည်း သိရှိရပါကြောင်း၊ အရှိုချင်းတို့၏ ကောက်သစ်စားပွဲကို စပါးပင်များ ရင့်သန်လာသည့်“နတ်တော်လ” အချိန်တွင်ကျင်းပလေ့ရှိသည်ကို မှတ်သားသိရှိရပါကြောင်း၊ ချင်းတိုင်းရင်းသားများအနေဖြင့် မိမိတို့၏ ကောင်းမြတ်သောဓလေ့ထုံးတမ်း အစဉ်အလာများကို ဘိုးဘွားများ လက်ဆင့်ကမ်းထိန်းသိမ်းလာသကဲ့သို့ ချင်းတိုင်းရင်းသား မောင်မယ်များကိုလည်း လက်ဆင့်ကမ်း ထိန်းသိမ်းတတ်စေရေး ဆောင်ရွက်ကြရန်နှင့် မိမိတို့တိုင်းရင်းသားစာပေ၊ ယဉ်ကျေးမှုနှင့် ဘက်စုံဖွံ့ဖြိုးတိုးတက်စေရေး၊ ရပ်ရွာအေးချမ်းသာယာရေး၊ ဒီမိုကရေစီနှင့် ဖက်ဒရယ်စနစ်ကိုအခြေခံသည့် ပြည်ထောင်စုကြီးတည်ဆောက်ရေး တို့တွင် ပူးပေါင်းပါဝင်ဆောင်ရွက်ကြရန် လိုအပ်ပါကြောင်း၊ နိုင်ငံတော်အစိုးရအနေဖြင့် ရှေ့လုပ်ငန်းစဉ်(၅)ရပ်နှင့် ဦးတည်ချက် (၉)ရပ်တို့အား ချမှတ်အကောင်အထည်ဖော်လျက်ရှိရာ တိုင်းရင်းသားပြည်သူလူထု၏ ဝိုင်းဝန်းကြိုးပမ်းမှုကြောင့် ေဒသတွင်း လုံခြုံမှု၊ တည်ငြိမ် အေးချမ်းမှုနှင့်ဖွံ့ဖြိုးမှုတို့သည်များစွာ တိုးတက်ဖြစ်ထွန်းလာခဲ့ပါကြောင်း၊ မိမိတို့နိုင်ငံတွင် ကျေးလက်နေလူဦးရေ (၇၀) ရာခိုင်နှုန်းကျော် ရှိသဖြင့် စီးပွားရေးမြှင့်တင်မှုများ ဆောင်ရွက်ချိန်တွင်ကျေးလက်နှင့်မြို့ပြ ကွာခြားချက်များ အနည်းဆုံးဖြစ်အောင် လျှော့ချနိုင်ရန် လိုအပ်သည့်အတွက် ကျေးလက်နေပြည်သူများ ဘဝတိုးတက်အောင် စဉ်းစားဆောင်ရွက်လျက် ရှိပါကြောင်း၊ သို့မှသာ မိမိတို့တိုင်းပြည်ရေရှည်အကျိုး စီးပွားများ ဖြစ်ထွန်းမည်ဖြစ်ပါကြောင်း၊ မိမိတို့နိုင်ငံ၊ မိမိဒေသ၏ ဂုဏ်ယူဝင့်ကြွားဖွယ်ရာ အမွေအနှစ်များ၊ဓလေ့ထုံးစံများကို လေးစားလိုက်နာပြီး အမျိုးသားယဉ်ကျေးမှုစရိုက်လက္ခဏာများ မပျောက်ပျက်အောင် ထိန်းသိမ်းစောင့်ရှောက်ရန် မိမိဒေသအတွင်းရှိ ပြည်သူလူထုသာမက နိုင်ငံသားတိုင်း အားလုံး တာဝန်ရှိပါကြောင်း၊ ထိုတာဝန်ကိုတက်ညီလက်ညီ ဝိုင်းဝန်းဆောင်ရွက်ရင်း ပြည်ထောင်စုစိတ်ဓာတ်၊ မျိုးချစ်စိတ်ဓာတ်ကိုအခြေခံ၍ တိုင်းဒေသကြီး၏အကျိုး၊ ပြည်ထောင်စု၏အကျိုးတို့ကို ထာဝစဉ်သယ်ပိုးနိုင်ပါစေကြောင်း”အမှာစကားပြောကြားသည်။ ဆက်လက်၍ တိုင်း‌ဒေသကြီးဝန်ကြီးချုပ်က“ ဧရာဝတီတိုင်းဒေသကြီးသည် နိုင်ငံတော်စီမံအုပ်ချုပ်ရေးကောင်စီ၏ အမျိုးသားရေးလုပ်ငန်းစဉ် (၂)ရပ်ဖြစ်သည့် တိုင်းပြည်သာယာဝပြောရေးနှင့် စားရေရိက္ခာဖူလုံရေးကို ကြိုးပမ်းဆောင်ရွက်နေသည့် တိုင်းဒေသကြီးဖြစ်ပါကြောင်း၊ ယခုကဲ့သို့ကောက်သစ်စားပွဲအား ကျင်းပဆောင်ရွက်နိုင်ခြင်းသည် တိုင်းဒေသကြီး၏ တည်ငြိမ်အေးချမ်းမှုရှိခြင်းနှင့် နယ်မြေဒေသ၏ စိုက်ပျိုးရေးဖြစ်ထွန်း အောင်မြင်မှုများကြောင့်လည်းဖြစ်ပါကြောင်း၊ မိမိတို့ဧရာဝတီတိုင်းဒေသကြီးသည် တိုင်းရင်းသား လူမျိုးပေါင်းစုံမှီတင်းနေထိုင်လျက်ရှိပြီး တိုင်း​ဒေသကြီးအစိုးရအဖွဲ့အ​နေဖြင့် တိုင်း​ဒေသကြီးအတွင်းမှီတင်​နေထိုင်ကြသည့် တိုင်းရင်းသားများ၏ တိုင်းရင်းသားစာ​ပေသင်ကြား​ရေး၊ တိုင်းရင်းသားရိုးရာဓ​လေ့ပွဲ​တော်များ၊ ​နေ့ထူး​နေ့မြတ်များနှင့် တိုင်းရင်းသား​ရေးရာကိစ္စရပ်များအား အစဥ်အလာမပြတ် ကျင်းပနိုင်​စေ​ရေး ​ဆောင်ရွက်​ပေးလျှက်ရှိပါ​ကြောင်း၊ ဧရာဝတီတိုင်းဒေသကြီးတွင် ကချင်၊ ကယား၊ ကရင်၊ ချင်း၊ ဗမာ၊ မွန်၊ ရခိုင်၊ ရှမ်း တိုင်းရင်းသား(၈)မျိုးလုံး စုပေါင်းနေထိုင်ကြပြီး နေထိုင်မှုအများဆုံး တိုင်းရင်းသားများမှာ ဗမာ၊ ကရင်၊ ရခိုင်နှင့်ချင်း တိုင်းရင်းသားများဖြစ်ကြပါကြောင်း၊ တိုင်းရင်းသား လူမျိုးများစွာဖြင့် စုစည်းနေထိုင်လျက်ရှိသော မိမိတို့နိုင်ငံအနေဖြင့် တိုင်းရင်းသားစည်းလုံး ညီညွတ်မှုနှင့် အမျိုးသားရေးစိတ်ဓာတ်တို့မှာလည်း မည်မျှအရေးကြီးကြောင်း သမိုင်းကပြသလျက်ရှိသည့်အတွက် ပြည်ထောင်စုအတွင်း မှီတင်းနေထိုင်ကြသည့် တိုင်းရင်းသား ပြည်သူအားလုံးသည် အေးအတူပူအမျှ အတူတကွ လက်တွဲနေထိုင်ကြပြီး စစ်မှန်သော မျိုးချစ်စိတ်ဓာတ်ဖြင့် နိုင်ငံတော်ကိုဘက်ပေါင်းစုံမှ ကာကွယ်စောင့်ရှောက်သွားကြရန် ” နှုတ်ခွန်း‌ဆက်စကားများပြောကြားခဲ့သည်။ ထို့နောက် ဧရာဝတီတိုင်းဒေသကြီး ချင်းအမျိုးသားစာပေနှင့်ယဉ်ကျေးမှုအသင်း ဥက္ကဋ္ဌက ဆုတောင်းမေတ္တာများပို့သခဲ့ပြီး အတွင်းရေးမှူးက ကျေးဇူးတင်စကားများပြောကြားခဲ့သည်။ ဆက်လက်၍ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်၊ တိုင်းဒေသကြီးဝန်ကြီးချုပ်နှင့်ဧည့်သည်တော်များသည် ချင်းတိုင်းရင်းသူများ၏ တေးသီချင်းများ၊ ရိုးရာအကများဖြင့် သီဆိုကပြဖျော်ဖြေမှုများကို ကြည့်ရှုအားပေးခဲ့ပြီး ဂုဏ်ပြုချီးမြှင့်ငွေများ ပေးအပ်ခဲ့သည်။ ထို့နောက် အရှိုချင်းရိုးရာ​ကောက်သစ်စားပွဲ​တော် မိတ်ဆုံစားပွဲကို ဆက်လက်ကျင်းပရာ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင် ၊ တိုင်းဒေသကြီးဝန်ကြီးချုပ်နှင့် အစိုးရအဖွဲ့ဝင် ဝန်ကြီးများသည် ဒေသခံချင်းတိုင်းရင်းသားများနှင့် ချစ်ကြည်ရင်းနှီးစွာ ​နေ့လယ်စာများ အတူတကွသုံး​ဆောင်ခဲ့ကြသည်။ ဆက်လက်၍ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်၊ တိုင်းဒေသကြီးဝန်ကြီးချုပ်နှင့်အဖွဲ့သည် ကြံခင်းမြို့နယ်၊ သောကြာဒူးကျေးရွာ၌ တောင်သူဦးဇော်ခိုင်၏ စိုက်ဧက (၀.၅၀)ဧကတွင် ဆင်းရွှေကြာ-၂ ဆောင်းနေကြာစိုက်ပျိုးထားရှိမှုအားကြည့်ရှုအားပေးခဲ့ရာ တိုင်းဒေသကြီးစိုက်ပျိုးရေးဦးစီးဌာနနှင့် လယ်ယာမြေစီမံခန့်ခွဲနှင့်စာရင်းအင်းဦးစီးဌာန တိုင်းဦးစီးမှူးတို့မှ မြန်အောင်ခရိုင်အတွင်း နေကြာစိုက်ပျိုးထားရှိမှုနှင့် မိုးနေကြာဖြစ်ထွန်းအောင်မြင်မှုအခြေအနေများရှင်းလင်းတင်ပြခဲ့ကြသည်။ ထို့နောက် တောင်သူများနှင့်တွေ့ဆုံခဲ့ပြီး ဆီဖူလုံစေရေးအတွက် နေကြာအပါအဝင်ဆီထွက်သီးနှံများ တိုးချဲ့စိုက်ပျိုးနေမှုအခြေအနေများ၊ သီးထပ်စွမ်းအားမြှင့်တင်စိုက်ပျိုးနိုင်ရေး၊ စိုက်ပျိုးမြေများအားမြေလွတ်မြေလပ်များမကျန်ရှိစေရေးစိုက်ပျိုးကြရန်ဆွေးနွေးပြောကြားခဲ့ပြီး တောင်သူများ၏တင်ပြချက်များအပေါ်သက်ဆိုင်ရာဌာနများနှင့် ညှိနှိုင်းပေါင်းစပ် ဆောင်ရွက်ပေးခဲ့သည်။ ဆက်လက်၍ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်၊ တိုင်းဒေသကြီးဝန်ကြီးချုပ်နှင့်အဖွဲ့သည် တောင်သူဦးအေးထွန်း၏ စိုက်ဧက(၀.၅၀)ဧက ဆင်းရွှေကြာ-၂ မိုးနေကြာစိုက်ခင်းနှင့် တောင်သူဦးကြည်ညွန့်၏ စိုက်ဧက(၁.၅၀)ဧက၌ ဆင်းရွှေကြာ-၂ မိုးနေကြာစိုက်ခင်းတို့၏ ဖြစ်ထွန်းအောင်မြင်နေမှုများကိုကြည့်ရှုအားပေးခဲ့ပြီးရိတ်သိမ်းချိန် လေလွင့်မှုမရှိစေရေး၊ စနစ်တကျရိတ်သိမ်းစေရေးမှာကြားခဲ့သည်။

တစ်မျိုးသားလုံးကျန်းမာသန်စွမ်းပြီး ကိုယ်လက်ကြံ့ခိုင်ရေးအတွက် တစ်နိုင်ငံလုံးအတိုင်းအတာဖြင့် ဒီဇင်ဘာလအား လူထုလှုပ်ရှား အားကစားလအဖြစ်သတ်မှတ်၍ နှစ်စဉ်နှစ်တိုင်း စုပေါင်းလမ်းလျှောက်ပွဲကို ပြုလုပ်လျှက်ရှိရာ ဧရာဝတီတိုင်းဒေသကြီး၊ ပုသိမ်မြို့တွင်လည်း စုပေါင်းလမ်းလျှောက်ပွဲကို ယနေ့နံနက်ပိုင်းက နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်၊ တိုင်းဒေသကြီးဝန်ကြီးချုပ် ဦးတင်မောင်ဝင်းနှင့်ဇနီး၊ အနောက်တောင်တိုင်းစစ်ဌာနချုပ်တိုင်းမှူးနှင့် ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ အစိုးရအဖွဲ့ဝင် ဝန်ကြီးများနှင့်ဇနီးများ၊ ဌာနဆိုင်ရာများ၊ ပြည်သူများပါဝင်ဆင်နွှဲခဲ့ကြသည်။ ဦးစွာ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်က သေနတ်ပစ်ဖောက်၍ စုပေါင်းလမ်းလျှောက်ပွဲအား ဖွင့်လှစ်ပေးပြီးနောက် ရွှေရုပ်တုအဝိုင်းရှေ့မှစတင်၍ မဟာဗန္ဓုလလမ်းမကြီးအတိုင်း တပျော်တပါး စုပေါင်းလမ်းလျှောက်ခဲ့ကြပြီး ကိုးသိန်းအားကစားကွင်းသို့ရောက်ရှိကာ ကိုယ်လက် လှုပ်ရှားလေ့ကျင့်ခန်းများ၊ Physical Fitness dance များအား အတူတကွ စုပေါင်းဆောင်ရွက်ခဲ့ကြသည်။ ဧရာဝတီတိုင်းဒေသကြီး၊ ပုသိမ်မြို့တွင် ဒီဇင်ဘာလ တတိယပတ် စုပေါင်း လမ်းလျှောက်ပွဲသို့ ဌာနဆိုင်ရာများ၊ လူမှုရေးအသင်းအဖွဲ့များ၊ ဒေသခံပြည်သူများ၊ ကျောင်းသားကျောင်းသူများ စုစုပေါင်း(၅၀၀၀)ဦးခန့်က တပျော်တပါး ပါဝင်ဆင်နွှဲခဲ့ကြကြောင်းသိရသည်။ ဆက်လက်၍ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင် ၊ တိုင်းဒေသကြီးဝန်ကြီးချုပ်နှင့် ဇနီး၊အနောက်တောင်တိုင်းစစ်ဌာနချုပ်တိုင်းမှူးနှင့် ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ အစိုးရအဖွဲ့ဝင် ဝန်ကြီးများနှင့် ဇနီးများသည် ပုသိမ်မြို့၊ ကိုးသိန်းမိုးလုံလေလုံအားကစားကွင်း၌ပြုလုပ်သည့် ဒီဇင်ဘာလူထုအားကစားလ ဌာနပေါင်းစုံ ဘော်လီဘောပြိုင်ပွဲဗိုလ်လုပွဲစဉ် ယှဉ်ပြိုင်ကစားနေမှုများကို ကြည့်ရှုအားပေးခဲ့ပြီးနောက် ဆုချီးမြှင့်ပွဲအခမ်းအနားကို ဆက်လက်ပြုလုပ်ရာ ဒုတိယဆုရရှိသည့်အသင်းအား တိုင်းဒေသကြီးဝန်ကြီးချုပ်ကလည်းကောင်း၊ ပထမဆုရရှိသည့်အသင်းအားနိုင်ငံတော်စီမံအုပ်ချုပ်ရေးကောင်စီအဖွဲ့ဝင် မန်းငြိမ်းမောင်ကလည်းကောင်း တစ်ဦးချင်းဆုတံဆိပ်နှင့် ငွေသားဆုများ အသီးသီးချီးမြှင့်ခဲ့ကြသည်။