စိုက်ပျိုးမွေးမြူ ရေးကဏ္ဍ၊ ပညာရေးကဏ္ဍ၊ ကုန်ဈေးနှုန်းကိစ္စရပ်များနှင့် စပ်လျဉ်း၍ လုပ်ငန်းညှိနှိုင်းအစည်းအဝေးကို စက်တင်ဘာလ ၁၀ ရက်နေ့မွန်းလွဲပိုင်းက တိုင်းဒေသကြီး အစိုးရအဖွဲ့ရုံး၊ အစည်းအဝေးခန်းမ(၁)၌ ပြုလုပ်ရာ အစည်းအဝေးသို့ တိုင်းဒေသကြီး ဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင် ဝန်ကြီးများ၊ တိုင်းဒေသကြီးအဆင့် ဌာနဆိုင်ရာများ၊ ခရိုင်စီမံအုပ်ချုပ်ရေးအဖွဲ့ ဥက္ကဋ္ဌများ တက်ရောက်ခဲ့ကြသည်။ လုပ်ငန်းညှိနှိုင်းအစည်းအဝေးတွင် တိုင်းဒေသကြီး ဝန်ကြီးချုပ်က“ တိုင်းဒေသကြီးသည် ပညာရေးတွင်တိုးတက်မြင့်မားသည့်တိုင်းဒေသကြီးဖြစ်သည်နှင့်အညီ ကျောင်းသားကျောင်းသူများ ပညာသင်ယူမှုအခွင့်အရေးများ မဆုံးရှုံးစေရန်အတွက် ကျောင်းနေအရွယ်ကလေးတိုင်း ကျောင်းတက်ရောက်စေရေးနှင့် အတန်းစဉ်ကူးပြောင်းနိုင် ရေးဆောင်ရွက်လျက်ရှိပါကြောင်း၊ တက္ကသိုလ်ဝင်တန်းအောင်ချက်မြင့်မားရေးအတွက်လည်း ဆရာ၊ ဆရာမများ၊ မိဘများ၊ အုပ်ချုပ်ရေးအဖွဲ့များကဝိုင်းဝန်းကြိုးပမ်းဆောင်ရွက်လျက်ရှိပါကြောင်း၊ အခြေခံစားသောက်ကုန်များနှင့်ပတ်သက်၍ ဆန်ဈေးနှုန်းများကြီးမြင့်မှုမရှိစေရေးအတွက်လည်း တာဝန်ရှိသူများက ထိန်းကျောင်းကြပ်မတ်ရန်နှင့် ဈေးနှုန်းသက်သာစွာ ရောင်းချပေးနိုင်ရေး ေဆာင်ရွက်လျက်ရှိပါကြောင်း၊ သီးနှံများ ပန်းတိုင်အထွက်နှုန်းတိုးတက်ထွက်ရှိစေရေးအတွက်  မျိုး၊မြေ၊ရေ၊ နည်းစသည့် နည်းလမ်း(၄)သွယ်ဖြင့် စိုက်ပျိုးရေးလုပ်ငန်းများအား စနစ်တကျအကောင်အထည်ဖော်ဆောင်ရွက်လျက်ရှိပါကြောင်း၊ သီးထပ်စွမ်းအားမြှင့်တင်နိုင်ရေး၊ ၂၀၂၄ မိုးစပါး ရေတော်မိုးတော်စိုက်ဧကအားလုံး ပိုက်ဆံလျှော် ထည့်သွင်းစိုက်ပျိုးနိုင်ရေး နည်းလမ်းပေါင်းစုံဖြင့် ထည့်သွင်းစိုက်ပျိုးဆောင်ရွက်ကြရမှာဖြစ်ပါကြောင်း၊ စားသုံးဆီ ဖူလုံစေရေးအတွက် ဆီထွက်သီးနှံများတိုးချဲ့စိုက်ပျိုးရန်နှင့် အောင်မြင်အောင်ဆောင်ရွက်ရန်လိုပါကြောင်း၊ စားသုံးဆီများဖြန့်ဝေပေးရာတွင် ကော်မတီများအ နေဖြင့် စာရင်းဇယားများတိကျမှန်ကန်စေရေး၊ ဖြန့်ဖြူးမှုများစနစ်တကျရှိစေရေးဆောင်ရွက်ရန်လိုပါကြောင်း၊ တိုင်းဒေသကြီးအတွင်းရှိ အသက်၉နှစ်ပြည့်ပြီး ၁၂နှစ်မပြည့်သေးသော မိန်းကလေးငယ်များကို သားအိမ်ခေါင်းကင်ဆာ ရောဂါကာကွယ်ဆေးအား ကျောင်းအခြေပြုနှင့်ရပ်ရွာအခြေပြုထိုးနှံပေးမည်ဖြစ်ရာ ေဆးထိုးအင်အားစာရင်းများမှန်ကန် စေရေး၊ ကာကွယ်ဆေးများကို အလေအလွင့်မရှိ စေ ရေး၊ လမ်းညွှန်ချက်များနှင့်အညီ အသုံးပြုဆောင်ရွက်ကြဖို့လည်း အုပ်ချုပ်ရေးအဖွဲ့များက ကူညီဆောင်ရွက်ပေးကြရန်နှင့် စိုက်ပျိုးမွေးမြူ ရေးကဏ္ဍ၊ ပညာရေးကဏ္ဍ၊ ကုန်ဈေးနှုန်းကိစ္စရပ်များနှင့် စပ်လျဉ်း၍ အောင်မြင်အောင်ဆောင်ရွက်နိုင်စေရေးတက်ရောက်လာကြသူများက အကြံပြုဆွေးနွေးပေးရန် ”အမှာစကားများပြောကြားသည်။ ဆက်လက်၍ အစိုးရအဖွဲ့ဝင် လူမှုရေးရာ ဝန်ကြီးက အိမ်ထောင်စုလူဦးရေစာရင်းကောက်ယူခြင်းဆိုင်ရာကိစ္စရက်များအားလည်းကောင်း၊ တိုင်းဒေသကြီးလယ်ယာမြေစီမံခန့်ခွဲမှုနှင့်စာရင်းအင်းဦးစီးဌာန တိုင်းဦးစီးမှူးမှ လယ်ယာမြေကို အခြားနည်းသုံးစွဲထားမှုများ ဖြေရှင်းဆောင်ရွက်မည့်နည်းလမ်းနှင့် နောင်ထပ်မံ မဖြစ်ပွားစေရေးအတွက် ဆောင်ရွက်မည့်နည်းလမ်းများ လုပ်ထုံးလုပ်နည်းစံနှုန်း (Standard Operating Procedure SOP) ရေးဆွဲရေးဆိုင်ရာကိစ္စရပ်များအားလည်းကောင်း၊ တိုင်းဒေသကြီးပြည်သူ့ကျန်းမာရေးဦးစီးဌာနမှူးက  တိုင်းဒေသကြီးအတွင်းရှိ အသက်၉နှစ်ပြည့်ပြီး ၁၂နှစ်မပြည့်သေးသော မိန်းကလေးငယ်များကို သားအိမ်ခေါင်းကင်ဆာ ရောဂါကာကွယ်ဆေးထိုးနှံပေးမည့်အစီအစဉ်များအားလည်းကောင်း၊ တိုင်းဒေသကြီး ပညာရေးမှူးမှ ကျောင်းနေအရွယ်ကလေးတိုင်း ကျောင်းတက်ရောက်စေရေး၊ အတန်းစဉ်ကူးပြောင်းမှု ရာနှုန်းပြည့်ဖြစ်စေရေးနှင့် တက္ကသိုလ်ဝင်တန်းအောင်ချက်မြင့်မားရေးအတွက်ဆောင်ရွက်မည့်အခြေအနေများအားလည်းကောင်း၊ တိုင်းဒေသကြီးစားသုံးသူရေးရာဦးစီးဌာနမှူးမှတိုင်းဒေသကြီး  ကုန်ဈေးနှုန်းတည်ငြိမ်ရေးနှင့် စားသုံးဆီဖြန့်ဖြူးပေးနိုင်မည့်အခြေအနေများအားလည်းကောင်း၊ ခရိုင်စီမံအုပ်ချုပ်ရေးအဖွဲ့ ဥက္ကဋ္ဌများမှ သက်ဆိုင်ရာခရိုင်အလိုက် ဆွေးနွေးတင်ပြချက်များအပေါ် တိုင်းဒေသကြီး ဝန်ကြီးချုပ်က လိုအပ်သည်များ ဖြည့်စွက်ဆွေးနွေးခဲ့ပြီး ပေါင်းစပ်ညှိနှိုင်းဆောင်ရွက်ပေးခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် ညနေပိုင်းတွင် ဧရာရွှေဝါခန်းမ၌ပြုလုပ်သည့် ဧရာဝတီတိုင်းဒေသကြီးအတွင်းရှိ ဆန်စက်လုပ်ငန်းရှင်များ၊ ဆီကုန်သည်များနှင့် တွေ့ဆုံပွဲအခမ်းအနားတက်ရောက်၍ မိမိတို့တိုင်းဒေသကြီးသည် နိုင်ငံ၏ စပါးကျီဖြစ်ပြီး ပိုလျှံသည့်ဆန်များကို ပြည်တွင်း၊ ပြည်ပသို့ တင်ပို့လျက်ရှိပါကြောင်း၊ ဆန်စက်ပေါင်း ၂၅၀၀ကျော်ရှိ၍ စပါးခွံလောင်စာအသုံးပြုgasifier စနစ်ဖြင့် လည်ပတ်ကြိတ်ခွဲသည့် ဆန်စက်များအနက် ၄၅၂ လုံး လည်ပတ်လျက်ရှိပါကြောင်း၊  ထို့အပြင် စပါးခွံမှလျှပ်စစ်ထုတ်လုပ်နိုင်ရေးဆောင်ရွက်လျက်ရှိသဖြင့် စပါးခွံလုံလောက်စွာရှိရမည်ဖြစ်ပါကြောင်း၊ တိုင်းဒေသကြီးမှထွက်ရှိသည့်စပါးများအား ဆန်စက်များမှ ကြိတ်ခွဲနိုင်ပါက အလုပ်အကိုင်အခွင့်အလမ်းများ ပိုမိုရရှိလာမည်ဖြစ်ကာ စပါးခွံဖြင့် Gasifier အသုံးပြုလျှပ်စစ်ထုတ်ခြင်း၊ ဆန်ကွဲ၊ ဖွဲနုစသည်တို့မှလည်း တိရစ္ဆာန်အစာထုတ်လုပ်နိုင်မည်ဖြစ်၍ တိရစ္ဆာန်အစာဈေးကြီးမြင့်မှုကိုလည်းသက်သာစေမှာဖြစ်ပါကြောင်း၊ နိုင်ငံ့စီးပွားမြှင့်တင်ရေးရန်ပုံငွေဖြင့် စိုက်ပျိုး ရေးလုပ်ငန်းများအတွက် သွင်းအားစုများထောက်ပံ့ပေးလျက်ရှိရာ ဆန်စက်လုပ်ငန်းရှင်များ၊ ကုန်သည်များအနေဖြင့် Contract Farming စနစ်ဖြင့် အကျိုးပူးပေါင်းဆောင်ရွက်ပေးကြစေလိုကြောင်း၊ ဆန်ဈေးကြီးမြင့်မှုမရှိစေရေးနှင့် ဈေးနှုန်းသက်သာစွာရောင်းချပေးနိုင်ရေးဆောင်ရွက်ရန်နှင့် တိုင်းဒေသကြီး စိုက်ပျိုးရေးလုပ်ငန်းများအောင်မြင်အောင် ပူးပေါင်းဆောင်ရွက်ပေးကြရန်ပြောကြားခဲ့သည်။ ထို့နောက် လုံခြုံရေးနှင့်နယ်စပ်ရေးရာဝန်ကြီးမှ နိုင်ငံ့စီးပွားမြှင့်တင်ရေးရန်ပုံငွေဖြင့် ဝယ်ယူကြိတ်ခွဲသူအစုအဖွဲ့များ၊ သွင်းအားစုတင်သွင်းသူအစုအဖွဲ့များနှင့်အကျိုးတူပူးပေါင်းဆောင်ရွက်မည့်အခြေအနေများအားလည်းကောင်း၊ စီးပွားရေးရာဝန်ကြီးမှ ကုန်ဈေးနှုန်းတည်ငြိမ်ရေးနှင့်ပတ်သက်၍ ဆောင်ရွက်နေမှုအခြေအနေများရှင်းလင်းတင်ပြခဲ့ပြီး တိုင်းဒေသကြီးဝန်ကြီးချုပ်က လိုအပ်သည်များ ဖြည့်ဆည်းပေါင်းစပ်ဆောင်ရွက်ပေးခဲ့ကြောင်းသိရသည်။

ဧရာဝတီတိုင်းဒေသကြီး၏ (၂၄)ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲ ဖွင့်ပွဲအခမ်းအနားကို ယနေ့နံနက်ပိုင်းက ပုသိမ်မြို့၊ မြို့တော်ခန်းမ၌ ပြုလုပ်ရာ တိုင်းဒေသကြီး ဝန်ကြီးချုပ်ဦးတင်မောင်ဝင်းနှင့်ဇနီး၊ အနောက်တောင်တိုင်းစစ်ဌာနချုပ် တိုင်းမှူးနှင့်ဇနီး၊ ပုသိမ်လေတပ်စခန်းဌာနချုပ်မှူးနှင့်ဇနီး၊ အစိုးရအဖွဲ့ဝင် ဝန်ကြီးများနှင့် ဇနီးများ၊ ဌာနဆိုင်ရာများ၊ ပြိုင်ပွဲအကဲဖြတ်ပညာရှင်များနှင့် ပြိုင်ပွဲဝင်များတက်ရောက်ခဲ့ကြသည်။ ရှေးဦးစွာ  (၂၄)ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲအား ပြိုင်ပွဲကျင်းပရေးနာယက၊ တိုင်းဒေသကြီး ဝန်ကြီးချုပ်နှင့် တာဝန်ရှိသူများက ဖဲကြိုးဖြတ်ဖွင့်လှစ်ပေးပြီး“မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲကြီးကို ၁၉၉၃ ခုနှစ်က စတင်၍ မြို့နယ်၊ ခရိုင်၊ တိုင်းဒေသကြီးနှင့် ပြည်နယ်အဆင့်မှသည် နိုင်ငံတော်အဆင့်အထိ နှစ်စဉ်ရည်ရွယ်ချက်ပေါင်းများစွာဖြင့် ခမ်းနားသိုက်မြိုက်စွာ ကျင်းပပြုလုပ်ခဲ့ရာ ၂၀၁၆ခုနှစ်အထိ (၂၂)ကြိမ်တိုင်တိုင်ကျင်းပပြုလုပ်နိုင်ခဲ့ပါကြောင်းနှင့် ၂၀၁၇ ခုနှစ်မှ ၂၀၂၁ ခုနှစ်အထိ (၅)နှစ်တာကာအတွင်း ကျင်းပပြုလုပ်နိုင်ခဲ့ခြင်း မရှိခဲ့ပါကြောင်း၊ နိုင်ငံတော်စီမံအုပ်ချုပ်ရေး ကောင်စီဥက္ကဌ၏ လမ်းညွှန်မှုဖြင့် ၂၀၂၂ခုနှစ်တွင် ပြိုင်ပွဲကျင်းပရေး ဦးစီးကော်မတီအနေဖြင့် လုပ်ငန်းကော်မတီအဖွဲ့ဝင်များ၊ ဆပ်ကော်မတီဝင်များဖြင့် (၂၃) ကြိမ်မြောက် အဆို၊ အက၊ အရေး၊ အတီး ပြိုင်ပွဲကြီးကို နိုင်ငံတော်အဆင့် ခမ်းနားသိုက်မြိုက်စွာဖြင့် ရွက်ပုန်းသီးအနုပညာရှင်များစွာ ပေါ်ထွက်လာမှုနှင့်အတူ အောင်မြင်စွာ ကျင်းပပြီးစီးခဲ့ပါကြောင်း၊ တိုင်းဒေသကြီးအနေဖြင့်လည်း အဆိုပါ(၂၃) ကြိမ်မြောက် မြန်မာ့ရိုးရာ အဆို၊ အက၊ အရေး၊ အတီး ဗဟိုအဆင့်ပြိုင်ပွဲတွင် တတိယဆု ကိုထိုက်ထိုက်တန်တန် ရရှိခဲ့ပါကြောင်း၊ (၂၄) ကြိမ်မြောက် မြန်မာ့ရိုးရာ အဆို၊ အက၊ အရေး၊ အတီး ဗဟိုအဆင့်ပြိုင်ပွဲကို ပါဝင်ယှဉ်ပြိုင်နိုင်ရန်အတွက် တိုင်းဒေသကြီးအနေဖြင့် မြို့နယ်အဆင့်၊ ခရိုင်အဆင့်ပြိုင်ပွဲများမှ စိစစ်ရွေးချယ် ထားသည့် ပြိုင်ပွဲဝင်များကို ယနေ့ကျင်းပပြုလုပ်သည့် တိုင်းဒေသကြီးအဆင့်ပြိုင်ပွဲတွင် အနုပညာအရည်အသွေးပြည့်ဝသည့် ပြိုင်ပွဲဝင်တွေကိုစိစစ်ရွေးချယ်ပြီး ဝင်ရောက်ယှဉ်ပြိုင်စေမှာဖြစ်ပါကြောင်း၊ အကဲဖြတ် ပညာရှင်ကြီးများအနေဖြင့်လည်း မျက်နှာသာပေးခြင်း၊ လူပုဂ္ဂိုလ် ရင်းနှီးမှုအခြေခံခြင်း၊ ခရိုင်/မြို့နယ် အစွဲအလမ်းထားရှိပြီးအမှတ်ပေးခြင်းများ မပြုလုပ်ကြရန် မှာကြားလို ပါကြောင်း၊  (၂၄) ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲကြီး၏ ချမှတ်ထားသည့် ဦးတည်ချက် (၄)ရပ်နှင့်အညီ လက်ဆင့်ကမ်း ထိန်းသိမ်းခဲ့ကြသည့် ရိုးရာယဉ်ကျေးမှုအနုပညာအမွေအနှစ်တွေကို ဖော်ထုတ်ပြသမည့် ပြိုင်ပွဲဝင် မောင်မယ်များ အားလုံးသည် မိမိတို့မှာရှိသည့် အနုပညာအရည်အသွေးတွေကို အစွမ်းကုန် ဖော်ထုတ်ယှဉ်ပြိုင် သွားကြရန်နှင့် အကဲဖြတ်ပညာရှင်ကြီးများကလည်း ခရိုင်အသီးသီးမှ မျိုးဆက်သစ် ရွက်ပုန်းသီး အနုပညာရှင်များကို ရွေးချယ်ဖော်ထုတ်ပေးကြစေလိုကြောင်း” တိုင်းဒေသကြီး ဝန်ကြီးချုပ်က အမှာစကားများပြောကြားသည်။ ဆက်လက်၍ ဧရာဝတီတိုင်းဒေသကြီး၏(၂၄)ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲအဖွင့်တေးသီချင်းဖြစ်သည့် “အောင်လံလွှင့်ချီ ဧရာဝတီ” တေးသီချင်းအား “တူယှဉ်နွှဲပျော် ဂီတပွဲတော် Season 2” Winner ဆုရှင် မောင်စိုးထက်အောင်နှင့် ပညာအလင်္ကာအဖွဲ့မှသီဆိုပြီး  အကပြိုင်ပွဲဝင်များက တင်ဆက်ကပြပြီးနောက် (၂၄)ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးဗဟိုအဆင့်ပြိုင်ပွဲတွင် ရှမ်းတိုင်းရင်းသား ရိုးရာအက၊ကျေးလက်ရိုးရာအကများဖြင့်  ဧရာဝတီတိုင်းဒေသကြီးကိုယ်စားပြု ပါဝင်ယှဉ်ပြိုင် မည့် ပုသိမ်ပညာရေးဒီဂရီကောလိပ်ယိမ်းအဖွဲ့များက ဆက်လက် ဖျော်ဖြေတင်ဆက်ကပြခဲ့ကြ၍ အခမ်းအနားကို ရုပ်သိမ်းခဲ့ကြပြီး  ပထမနေ့ပွဲစဉ်အဖြစ် ယှဉ်ပြိုင်ကြသည့် ကဗျာလွတ်အကပြိုင်ပွဲ အခြေခံပညာ (၁၀-၁၅)(အမျိုးသမီး)၊ အခြေခံပညာ (၁၀-၁၅)(အမျိုးသား)၊ တစ်ဦးချင်းအက၊ အခြေခံပညာ (၁၀-၁၅)(အမျိုးသမီး)၊ တစ်ဦးချင်းအက၊ အခြေခံပညာ (၁၅-၂၀)(အမျိုးသား)၊ တစ်ဦးချင်းအက၊ အခြေခံပညာ (၁၅-၂၀)(အမျိုးသမီး)၊ တစ်ဦးချင်းအက၊ အဆင့်မြင့်ပညာ (အမျိုးသား)၊ တစ်ဦးချင်းအက၊ အဆင့်မြင့်ပညာ (အမျိုးသမီး)၊ တစ်ဦးချင်းအက၊ ဝါသနာရှင်ဒုတိယတန်း၊ အမျိုးသားတစ်ဦးချင်းအက၊ ဝါသနာရှင်ဒုတိယတန်း၊ အမျိုးသမီးတစ်ဦးချင်းအက ဘာသာရပ်များအား ခရိုင်များမှ ယှဉ်ပြိုင်ကပြ မှုများအားကြည့်ရှုအားပေးခဲ့ကာ တိုင်းဒေသကြီး ဝန်ကြီးချုပ်နှင့် ဧည့်သည်တော်များသည် အကဲဖြတ်ပညာရှင်များ၊ ပြိုင်ပွဲဝင်များနှင့် ရင်းရင်းနှီးနှီးနှုတ်ဆက်ခဲ့ကြသည်။ ယနေ့စတင်ကျင်းပပြုလုပ်သည့် ဧရာဝတီတိုင်းဒေသကြီးအဆင့် (၂၄)ကြိမ်မြောက် မြန်မာ့ရိုးရာ ယဉ်ကျေးမှု အဆို၊ အက၊ အရေး၊ အတီး ပြိုင်ပွဲကြီးတွင် အဆိုပြိုင်ပွဲဝင်(၁၁၁)ဦး၊ အကပြိုင်ပွဲဝင်(၁၆၈)ဦး၊ အရေးပြိုင်ပွဲဝင်(၁၃)ဦး၊ အတီးပြိုင်ပွဲဝင်(၂၃၇)ဦး၊ စုစုပေါင်းပြိုင်ပွဲဝင် (၅၂၉)ဦးဖြင့် ယခုလ(၁၀)ရက်နေ့မှ (၁၅)ရက်နေ့အထိ ကျင်းပပြုလုပ်သွားမည်ဖြစ်ကြောင်း သိရသည်။

ဧရာဝတီတိုင်းဒေသကြီးအတွင်းရှိ ဆေးရုံများတွင် တပ်ရင်းတပ်ဖွဲ့ဝင်များ၊ ဌာနဆိုင်ရာများ၊ ပြည်သူများမှ စုပေါင်းသန့်ရှင်းရေးလုပ်ငန်းများ ဆောင်ရွက်လျက်ရှိရာ တိုင်းဒေသကြီးအစိုးရအဖွဲ့ ဝန်ကြီးချုပ်ဦးတင်မောင်ဝင်းသည် အစိုးရအဖွဲ့ဝင် ဝန်ကြီးများနှင့်အတူ ယနေ့နံနက်ပိုင်းက သန့်ရှင်းရေးဆောင်ရွက်နေမှုများအား လှည့်လည် ကြည့်ရှုအားပေးခဲ့သည်။ ဦးစွာ တိုင်းဒေသကြီးဝန်ကြီးချုပ်နှင့်အဖွဲ့သည်  ပုသိမ်မြို့၊ အမှတ်(၈)ရပ်ကွက်ရှိ တိုင်းရင်းဆေးရုံဝန်းအတွင်း၌ တပ်ရင်းတပ်ဖွဲ့များ၊ ဌာနဆိုင်ရာများ၊ ပြည်သူများမှ စုပေါင်းသန့်ရှင်းရေး ဆောင်ရွက်နေမှုအားကြည့်ရှုစစ်ဆေးခဲ့ပြီး အမှိုက်များကင်းစင်စေရေး၊ ရေစီးရေလာကောင်းမွန်စေရေး၊ သစ်ပင်သစ်ကိုင်းများခုတ်ထွင်ရှင်းလင်းရေး၊ အမှိုက်များစနစ်တကျစွန့်ပစ်ရေး မှာကြားခဲ့ပြီး ဆေးရုံတက်ရောက်ကုသနေသည့် လူနာများနှင့် ရင်းရင်းနှီးနှီးတွေ့ဆုံ၍ အားပေးစကားများပြောကြားခဲ့သည်။ အလားတူ တိုင်းဒေသကြီးဒေသကြီး ဝန်ကြီးချုပ်နှင့်တာဝန်ရှိသူများသည် ပုသိမ်မြို့ကုတင်(၅၀၀)ဆံ့ပြည်သူ့ဆေးရုံကြီးသို့သွားရောက်၍ စုပေါင်းသန့်ရှင်းရေးဆောင်ရွက်နေမှုအား ကြည့်ရှုအားပေးခဲ့ပြီး  ဆေးရုံအတွင်းအပြင်သန့်ရှင်းစေရေး၊ ရေညှိများတိုက်ချွတ်ဆေးကြောရေး၊ အမှိုက်များစနစ်တကျစွန့်ပစ်စေရေးမှာကြားခဲ့သည်။ ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ကန်ကြီးထောင့်မြို့နယ်သို့သွားရောက်၍ ကန်ကြီးထောင့်မြို့နယ်ပြည်သူ့ဆေးရုံ၊ ဒါးကတိုက်နယ်ဆေးရုံများရှိ သန့်ရှင်းလုပ်ငန်းဆောင်ရွက်မှုများအားကြည့်ရှုအားပေးခဲ့ပြီး ဆေးရုံဝန်းအတွင်းအပြင်သန့်ရှင်းရေးလုပ်ငန်းများဆောင်ရွက်ရန်၊ အမှိုက်များတစ်ပါတည်းစွန့်ပစ်ရန်မှာကြားခဲ့ပြီးဆေးရုံဝန်းအတွင်းလှည့်လည်ကြည့်ရှုစစ်ဆေးခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် အိမ်မဲမြို့နယ်ပြည်သူ့ဆေးရုံနှင့် ကျောင်းကုန်းမြို့နယ်ပြည်သူ့ဆေးရုံတို့၌ စုပေါင်းသန့်ရှင်းရေး ဆောင်ရွက်ပြီးစီးမှုအားကြည့်ရှုစစ်ဆေးခဲ့ပြီး သန့်ရှင်း ရေးလုပ်ငန်းများ အဆက်မပြက်ဆောင်ရွက်ကြရန်၊ ပြည်သူများအား ကျန်းမာရေးစောင့်ရှောက်မှုများ အပြည့်အဝ ပေးနိုင်ရေး​ ဆောင်ရွက်ကြရန် မှာကြားခဲ့ကြောင်း သိရသည်။

အသက်(၉)နှစ်ပြည့်ပြီး မှ (၁၂)နှစ်မကျော်သော မိန်းကလေးများအား သားအိမ်ခေါင်းကင်ဆာရောဂါကာကွယ်ဆေး(HPV) ထိုးနှံနိုင်ရေးအတွက် လုပ်ငန်းညှိနှိုင်းအစည်းအဝေးကို ယနေ့မွန်းလွဲပိုင်းက တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ(၁)၌ပြုလုပ်ခဲ့ရာ တိုင်းဒေသကြီးဝန်ကြီးချုပ်၊ အစိုးရအဖွဲ့ဝင် ဝန်ကြီးများ၊ တိုင်းဒေသကြီး ပြည်သူ့ကျန်းမာရေးဦးစီးဌာနမှူးနှင့် ကျန်းမာရေးဌာနများမှ တာဝန်ရှိသူများ၊ တိုင်းဒေသကြီးပညာရေးမှူးနှင့်တာဝန်ရှိသူများ၊ လူမှုရေးအသင်းအဖွဲ့များတက်ရောက်ခဲ့ကြသည်။ လုပ်ငန်းညှိနှိုင်းအစည်းအဝေးတွင် တိုင်းဒေသကြီးဝန်ကြီးချုပ်က“ ကမ္ဘာ့ကျန်းမာရေးအဖွဲ့၏ (၂၀၂၀)ခုနှစ် စာရင်းများအရ ကမ္ဘာတစ်ဝန်းလုံးတွင် သားအိမ်ခေါင်း ကင်ဆာရောဂါဖြစ်ပွားသူ အမျိုးသမီးလူနာအသစ် ၆သိန်းကျော်ရှိပြီး သားအိမ်ခေါင်းကင်ဆာ ရောဂါကြောင့် နှစ်စဉ်အမျိုးသမီး ၃သိန်းကျော်သေဆုံးလျက်ရှိပါကြောင်း၊ နှစ်စဉ်သားအိမ်ခေါင်း ကင်ဆာဖြစ်ပွားမှုနှုန်းမှာ အမျိုးသမီးဦးရေ တစ်သိန်းတွင် (၁၃.၃)ဦးရှိကြောင်းနှင့် သေဆုံးမှုနှုန်းမှာ (၆.၉)ရှိပါကြောင်း၊ (၂၀၂၃)ခုနှစ်၊ မတ်လတွင် WHOထုတ်ပြန်ထားသော အချက်အလက်များအရ မြန်မာနိုင်ငံတွင် သားအိမ်ခေါင်းကင်ဆာအဖြစ်များဆုံး အသက်အုပ်စုမှာ အသက်(၁၅)နှစ်မှ အသက် (၄၄)နှစ်ဖြစ်ပြီး အမျိုးသမီးလူဦးရေ တစ်သိန်းတွင် (၂၅.၃)ဦးဖြစ်ပွားသည်ဟုသိရပါကြောင်း၊ သားအိမ်ခေါင်းကင်ဆာရောဂါသည် ကမ္ဘာတစ်ဝန်းလုံးရှိ အမျိုးသမီးများတွင် စတုတ္ထမြောက်အဖြစ်အများဆုံး ကင်ဆာဖြစ်ပြီး အထူးသဖြင့် ဖွံ့ဖြိုးဆဲနိုင်ငံများတွင် နေထိုင်သော အမျိုးသမီးများ၌ ဒုတိယမြောက် အဖြစ်အများဆုံး ကင်ဆာဖြစ်ပါကြောင်း၊ သားအိမ်ခေါင်းကင်ဆာရောဂါအားလုံး အနက် (၇၀)ရာခိုင် နှုန်းသည် HPV ပိုး အမျိုးအစား (၂) မျိုးဖြစ်သည့် အမျိုးအစား(၁၆)နှင့်(၁၈) ကူးစက်ခံရခြင်းကြောင့် ဖြစ်ပြီး သားအိမ်ခေါင်းကင်ဆာ ရောဂါကာကွယ်ဆေးသည် အဆိုပါပိုးအမျိုးအစား (၂)မျိုး ကူးစက်ခံရခြင်းမှ (၉၅)ရာခိုင်နှုန်းအထိ ကာကွယ် ပေးနိုင်ပါကြောင်း၊  ထို့ကြောင့်သားအိမ်ခေါင်းကင်ဆာ ရောဂါကာကွယ် ဆေးကို မိန်းကလေးငယ်များအား ဆောလျင်စွာထိုးနှံခြင်းက သားအိမ်ခေါင်းကင်ဆာ ရောဂါကို အစောဆုံးကာကွယ်မှုရရှိနိုင်မယ့် အခွင့်အလမ်း တစ်ခုဖြစ်ပါကြောင်း၊ တိုင်းဒေသကြီးအတွင်းရှိ အသက်၉နှစ်ပြည့်ပြီး မှ ၁၂နှစ်ပြည့်သူ မိန်းကလေးငယ်များကို သားအိမ်ခေါင်းကင်ဆာစောဂါကာကွယ်ဆေးထိုးနှံပေးရာမှာ ကျောင်းအခြေပြုနှင့်ပြည်သူလူထုအခြေပြု ကာကွယ်ဆေးထိုးနှံပေးခြင်းဖြင့်ဆောင်ရွက်ပေးသွားမှာဖြစ်ပါကြောင်း၊ ဧရာဝတီတိုင်းဒေသကြီးအနေဖြင့်အသက်(၉)နှစ်ပြည့်ပြီး (၁၂)နှစ်မကျော်သော ကျောင်းသူများအား ယခုလ(၁၈)ရက်နေ့မှစတင်၍ ကာကွယ်ဆေးထိုးဖွဲ့ (၁,၄၃၅)ဖွဲ့ဖြင့် ကျောင်းအခြေပြုသားအိမ်ခေါင်းကင်ဆာရောဂါကာကွယ်ဆေး ထိုးနှံပေးသွားမှာ ဖြစ်သည့်အတွက် ကာကွယ်ဆေးများကို အလေအလွင့်မရှိ စေရန်လမ်းညွှန်ချက်များနှင့်အညီ အသုံးပြုဆောင်ရွက်ကြဖို့လည်း မှာကြားလိုပါကြောင်း၊  ကမ္ဘာပေါ်တွင်သာမက မြန်မာနိုင်ငံမှာတွင်ရှိသည့် အမျိုးသမီးများမှာ ဖြစ်ပွားမှုနှုန်းမြင့်မာနေသည့် သားအိမ်ခေါင်းကင်ဆာ ရောဂါကို ပဏာမအဆင့်ကာကွယ်ခြင်း ဖြစ်တဲ့ သားအိမ်ခေါင်းကင်ဆာ ရောဂါကာကွယ်ဆေး (HPV) ကို ရည်မှန်းအမျိုးသမီးငယ်များအား ထိုးနှံခြင်း လုပ်ငန်းဆောင်ရွက်ရာမှာ လွှမ်းခြုံမှုမြင့်မားစွာ ဆောင်ရွက်နိုင်ရေးအတွက် တာဝန်ရှိသူများအားလုံးက ကြိုးပမ်းဆောင်ရွက်ကြရန်နှင့် အသက်၉နှစ်ပြည့်ပြီး ၁၂နှစ်မပြည့်သေးသော မိန်းကလေးငယ်များအား ကာကွယ်ဆေးအပြည့်အဝထိုးနှံပေးနိုင်ရေး သက်ဆိုင်ရာဌာနများ၊ အုပ်ချုပ်ရေးအဖွဲ့များ၊ လူမှုရေးအသင်းအဖွဲ့များပူးပေါင်း ဆောင်ရွက်ကြရန်နှင့် မိမိတို့အစိုးရအဖွဲ့အနေဖြင့်လိုအပ်သည်များ ပံ့ပိုးဆောင်ရွက်ပေးသွားမှာဖြစ်ကြောင်း” အမှာစကားပြောကြားသည်။ ဆက်လက်၍ တိုင်းဒေသကြီးပြည်သူ့ကျန်းမာရေးဦးစီးဌာနမှူးက  သားအိမ်ခေါင်းကင်ဆာရောဂါဖြစ်ပွားမှုအခြေအနေ၊ မြန်မာနိုင်ငံတွင် သားအိမ်ခေါင်းကင်ဆာ ရောဂါကာကွယ်ဆေး စတင်ထိုးနှံမှုနှင့် ကာကွယ်ဆေးလွှမ်းခြုံမှုအခြေအနေ၊ (HPV)ပိုး ကူးစက်ပျံ့နှံ့ခြင်းနှင့် သားအိမ်ခေါင်းကင်ဆာရောဂါ ကာကွယ်ခြင်းနှင့်ကုသခြင်း၊ ဆေးထိုးရန်ဆောင်ရွက်မည့် အစီအမံများကို ရှင်းလင်းတင်ပြသည်။ထို့နောက် အစည်းအဝေးသို့ တက်ရောက်လာသူများ၏ အထွေထွေဆွေးနွေးတင်ပြချက်များအပေါ် တိုင်းဒေသကြီး ဝန်ကြီးချုပ်က လိုအပ်သည်များ ဖြည့်စွက်ဆွေးနွေးခဲ့ပြီး ပေါင်းစပ်ညှိနှိုင်း ဆောင်ရွက်ပေးခဲ့သည်။

ဧရာဝတီတိုင်းဒေသကြီး၊ ပုသိမ်မြို့အမှတ်(၁) အခြေခံပညာအထက်တန်းကျောင်း၊ ရတနာ တန်ဆောင်ခန်းမ၌ ယနေ့နံနက်ပိုင်းက ၂၀၂၃ခုနှစ်၊ နိုင်ငံတကာစာတတ်မြောက်ရေးနေ့ အခမ်းအနားကိုကျင်းပခဲ့ရာ အခမ်းအနားသို့ တိုင်းဒေသကြီးဝန်ကြီးချုပ် ဦးတင်မောင်ဝင်း၊ အနောက်တောင်တိုင်းစစ်ဌာနချုပ်တိုင်းမှူး၊ အစိုးရအဖွဲ့ဝင် ဝန်ကြီးများ၊ ဌာနဆိုင်ရာများ၊ ဆရာ၊ ဆရာမများနှင့် ကျောင်းသား၊ ကျောင်းသူများတက်ရောက်ခဲ့ကြကြောင်း သိရသည်။ ဦးစွာ အခမ်းအနားကို ပုသိမ်မြို့ အမှတ်(၆)အခြေခံပညာအထက်တန်းကျောင်းမှ ကျောင်းသား၊ ကျောင်းသူလေးများက “ဒို့အင် ဒို့အား” သီချင်းဖြင့်ဂုဏ်ပြုသီဆိုဖွင့်လှစ်ပြီးနောက် တိုင်းဒေသကြီးဝန်ကြီးချုပ်က “ ကမ္ဘာ့နိုင်ငံအများစုက နှစ်စဉ်နှစ်တိုင်း စက်တင်ဘာလ (၈)ရက်နေ့ကို နိုင်ငံတကာစာတတ်မြောက်ရေးနေ့အဖြစ် ကျင်းပလာသည်မှာ ၂၀၂၃ခုနှစ်၊ ယခုလ(၈)ရက်နေ့တွင် သက်တမ်း(၅၇)နှစ်ရှိပြီဖြစ်ပါကြောင်း၊ စာမတတ်သူဦးရေ များပြား နေခြင်းသည် တိုင်းပြည်ဖွံ့ဖြိုးတိုးတက်ရေးအတွက် ကြီးမားသည့်စိန်ခေါ်မှုတစ်ရပ် ဖြစ်နေသည် ကိုတွေ့ရှိရပါကြောင်း၊  စာတတ်မြောက်ခြင်းဖြင့် ဆင်းရဲမှုကို လျော့နည်းကျဆင်းစေရန် အထောက်အကူပြုသည်ကို တွေ့ရှိရပါကြောင်း၊ သို့ဖြစ်၍ နိုင်ငံသားတိုင်း စာတတ်မြောက်မှသာ နိုင်ငံတော် ဖွံ့ဖြိုးတိုးတက်ရေးအတွက် အောင်မြင်စွာဆောင်ရွက်သွားနိုင်မှာဖြစ်ပါကြောင်း၊ နိုင်ငံတိုင်းတွင် စာပေသည်လွန်စွာအရေးကြီးသည့်ကဏ္ဍတွင်ပါဝင်နေပါကြောင်း၊ နိုင်ငံတစ်နိုင်ငံ ၏ ဖွံ့ဖြိုးတိုးတက်မှုကိုတိုင်းတာရာတွင် ပညာရည်မြင့်မားခြင်းသည်လည်း အဓိကအချက် တစ်ချက်ပင်ဖြစ်ပါကြောင်း၊ လူတိုင်းတွင် ကာယဗလ၊ ဉာဏဗလ၊ စာရိတ္တဗလ၊ မိတ္တဗလ၊ ဘောဂဗလ၊ ကိုယ်စီရှိရမည်ဖြစ်ပေရာ စာပေမတတ်ခြင်းသည် ဗလငါးတန်အားလုံးကို ဆုံးရှုံးသည်နှင့် တူပါကြောင်း၊ ကျောင်းနေအရွယ်ကလေးတိုင်း ကျောင်းတက်ရောက်နိုင်ရေးကြိုးပမ်းဆောင်ရွက်ခြင်းသည် စာမတတ်သူပပျောက်ရေးကို ဦးတည်နေခြင်းဖြစ်ပါကြောင်း၊ ကျောင်းနေအရွယ်ကလေးတိုင်း ကျောင်းနေမြဲမှ အရွယ်လွန်သက်ကြီး စာမတတ်သူများ ပပျောက်သွားမှာဖြစ်ပါကြောင်း၊ တိုင်းဒေသကြီးအနေဖြင့်လည်း ကျောင်းနေအရွယ်ကလေးတိုင်း ကျောင်းတက်ရောက်နိုင်ရေး၊ ရာနှုန်းပြည့်အတန်းစဉ်ကူးပြောင်းစေရေးနှင့် ပညာသင်ကြားမှု အခွင့်အရေးများ ထိခိုက်နစ်နာမှုမရှိစေရေးဆောင်ရွက်လျက်ရှိပါကြောင်းနှင့်  ၂၀၂၃ ခုနှစ်၊ နိုင်ငံတကာ စာတတ်မြောက်ရေးနေ့ ဆောင်ပုဒ်ဖြစ်သည့် “ တည်ငြိမ်အေးချမ်းသော လူ့အဖွဲ့ အစည်း ကမ္ဘာကြီးသို့ ကူးပြောင်းဖို့ စာတတ်မြောက်ရေးမြှင့်တင်စို့” ဟူသောဆောင်ပုဒ်နှင့်အညီ တည်ငြိမ်အေးချမ်းသော လူ့အဖွဲ့အစည်းတစ်ရပ် တည်ဆောက်နိုင်ရန်လူသားအားလုံး စာတတ်မြောက်နိုင်ရေး ဝိုင်းဝန်းကြိုးပမ်းကြပါစို့လို့ဟု” တိုက်တွန်းအမှာစကားများ ပြောကြား သည်။ ဆက်လက်၍ တိုင်းဒေသကြီးပညာရေးမှူးက ၂၀၂၃ခုနှစ်၊ နိုင်ငံတကာစာတတ်မြောက်ရေးနေ့ အထိမ်းအမှတ်အခမ်းအနားသို့  ယူနက်စကို ညွှန်ကြားရေးချုပ်ကပေးပို့သည့် သဝဏ်လွှာကို ဖတ်ကြားပြီးနောက် စာတတ်မြောက်ရေးလုပ်ငန်းဆောင်ရွက်မှု ဗီဒီယိုအားပြသည်။  ထို့နောက် ပုသိမ်မြို့ အမှတ်(၂၀)အခြေခံပညာမူလတန်းကျောင်းမှ ကျောင်းသား၊ ကျောင်းသူလေးများက “ထာဝရမီးအိမ်ရှင်”သီချင်းဖြင့်လည်းကောင်း၊  ပုသိမ်မြို့ အမှတ်(၁၀)အခြေခံပညာမူလတန်း ကျောင်းမှ ကျောင်းသား၊ ကျောင်းသူလေးများက“စာ စာ စာ” သီချင်းဖြင့်လည်းကောင်း တေးသရုပ်ဖော်ဖျော်ဖြေတင်ဆက်ခဲ့ပြီး ပုသိမ်မြို့ အမှတ်(၂)အခြေခံပညာအထက်တန်းကျောင်းမှ ကျောင်းသား၊ ကျောင်းသူလေးများက ”စာတတ်မြောက်ရေး ဝိုင်းကူပေး” သီချင်းဖြင့် သီဆိုဂုဏ်ပြုနှုတ်ဆက်၍ အခမ်းအနားကိုရုပ်သိမ်းခဲ့ပြီး တိုင်းဒေသကြီးဝန်ကြီးချုပ်နှင့် ဧည့်သည် တော်များသည် ၂၀၂၃ခုနှစ်၊ နိုင်ငံတကာစာတတ်မြောက်ရေး လှုပ်ရှားဆောင်ရွက်မှု ပြခန်းအား လှည့်လည်ကြည့်ရှုအားပေးခဲ့သည်။