အပြည်ပြည်ဆိုင်ရာ မူးယစ်ဆေးဝါးအလွဲသုံးမှုနှင့် တရားမဝင်ရောင်းဝယ်မှု တိုက်ဖျက်ရေးနေ့အခမ်းအနားအား ယနေ့နံနက်ပိုင်းက ပုသိမ်မြို့၊ မြို့တော်ခန်းမ၌ ကျင်းပခဲ့ရာ အခမ်းအနားသို့ တိုင်းဒေသကြီး ဝန်ကြီးချုပ် ဦးတင်မောင်ဝင်း၊ အစိုးရအဖွဲ့ဝင် ဝန်ကြီးများ၊ မြန်မာနိုင်ငံရဲတပ်ဖွဲ့ဝင်များ၊ တိုင်း၊ ခရိုင်၊ မြို့နယ်အဆင့် ဌာနဆိုင်ရာများ၊ ဗဟိုအဆင့်နှင့် တိုင်းအဆင့်တွင် ဆုရရှိသည့် ကျောင်းသား၊ ကျောင်းသူများ တက်ရောက်ခဲ့ကြသည်။ ရှေးဦးစွာ အခမ်းအနားအား ရဲတပ်ဖွဲ့ဝင်များက “မြန်မာ့ရဲ”သီချင်းဖြင့် သီဆိုဖျော်ဖြေ ဖွင့်လှစ်ခဲ့ပြီးနောက် တိုင်းဒေသကြီးဝန်ကြီးချုပ်က“ယနေ့ ကျင်းပပြုလုပ်သည့် (၃၆) ကြိမ်မြောက် အပြည်ပြည်ဆိုင်ရာမူးယစ်ဆေးဝါးအလွဲသုံးမှုနှင့် တရားမဝင်ရောင်းဝယ်မှု တိုက်ဖျက်ရေးနေ့ အခမ်းအနားမှာ ပြောကြားလိုသည်မှာ မူးယစ်ဆေးဝါး ပြဿနာသည် လူတစ်ဦးတစ်ယောက်တည်း ရင်ဆိုင်ကြုံတွေ့နေရသည့် ပြဿနာမဟုတ်ဘဲ ကမ္ဘာ့လူသား အားလုံး ရင်ဆိုင်ကြုံတွေ့လာနေရသည့် ပြဿနာကြီးတစ်ခုဖြစ်ပြီး ကမ္ဘာနဲ့ အဝှမ်း ဖွံ့ဖြိုးပြီးနိုင်ငံများသာမက မဖွံ့ဖြိုးသေးသည့်နိုင်ငံများပါ တွေ့ကြုံရင်ဆိုင်နေရပါကြောင်းနှင့် ၎င်းအထဲတွင် မြန်မာနိုင်ငံသည်လည်း အပါအဝင်ဖြစ်ပါကြောင်း၊ နှစ်စဉ် ဇွန်လ (၂၆)ရက်နေ့တွင် မူးယစ်ဆေးဝါးဆန့်ကျင်သည့်ပွဲကို တိုင်းဒေသကြီး၊ ပြည်နယ်အသီးသီးတွင် ကျင်းပပြုလုပ်ခဲ့ကြပါကြောင်း၊ ရန်ကုန်၊ မန္တလေးနှင့် တောင်ကြီးမြို့တို့တွင် ဖမ်းဆီးရမိ မူးယစ်ဆေးဝါးများကို မီးရှို့ဖျက်ဆီးအခမ်းအနားများဖြင့် ခမ်းခမ်းနားနား ကျယ်ကျယ်ပြန့်ပြန့် ပြုလုပ်​နေပါကြောင်း၊ တရားမဝင် မူးယစ်ဆေးဝါး ရောင်းဝယ်မှုမှ ရရှိလာသည့် ငွေကြေးသည် ငွေကြေးခဝါချမှုနှင့် အကျင့်ပျက်ခြစားမှုကို ဖြစ်ပေါ်စေပြီး တိုင်းပြည်၏ စီးပွားရေးလုပ်ငန်းများကို ထိခိုက်ပျက်ပြားစေခဲ့ပါကြောင်း၊ မူးယစ်ဆေးဝါး သုံးစွဲမှုကြောင့် လူငယ်များ၏ဘဝသည် မျှော်လင့်ချက်ကင်းမဲ့စေပြီး မိသားစုဝင်များသည် လူမှုရေး၊ စီးပွားရေး ပြဿနာပေါင်းများစွာနှင့် ထပ်မံရင်ဆိုင်နေရပါကြောင်း၊ ပညာပေး လုပ်ငန်းများ အနေဖြင့် ကျောင်းသားလူငယ်များအား အသိပညာပေးရေး၊ လှုံ့ဆော်ရေးနှင့် လူငယ်များ မိမိတို့အားလပ်ချိန်များတွင် သုတ၊ ရသ စာပေများ ဖတ်ရှုနိုင်ရေး ပူးပေါင်း ဆောင်ရွက်ကြရန်လိုပါကြောင်း၊ အမျိုးသားမူးယစ်ဆေးဝါးထိန်းချုပ်ရေးမူဝါဒကို လျှင်မြန်စွာ အကောင်အထည်ဖော်ဆောင်ရွက်နိုင်ရန်အတွက် တိုင်းဒေသကြီး/ ခရိုင်/ မြို့နယ် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများအန္တရာယ် တားဆီးကာကွယ်ရေး အဖွဲ့နှင့် အရပ်ဖက်အဖွဲ့အစည်း၊ ပြည်သူလူထုတို့မှလည်း ဘုံပြဿနာ/ဘုံရန်သူအဖြစ် ခံယူ၍ အမျိုးသားရေး တာဝန်တစ်ရပ်အနေဖြင့် အဖွဲ့အစည်းတစ်ခုချင်းစီမှ လူတစ်ယောက်ချင်းစီအထိ ကိုယ်စီတာဝန်ရှိစွာဖြင့်အင်တိုက်အားတိုက် ပူးပေါင်းပါဝင်ဆောင်ရွက်ပေးကြဖို့ တိုက်တွန်း လိုပါကြောင်း” ပြောကြားခဲ့ပါသည်။  ယင်းနောက် ၂၀၂၃ ခုနှစ်၊ ဇွန်လ(၂၆) ရက်နေ့ (၃၆)ကြိမ်မြောက် အပြည်ပြည်ဆိုင်ရာ မူးယစ်ဆေးဝါးအလွဲသုံးမှုနှင့် တရားမဝင် ရောင်းဝယ်မှု တိုက်ဖျက်ရေးနေ့အတွက် နိုင်ငံတော်စီမံ အုပ်ချုပ်ရေးကောင်စီအဖွဲ့ဝင်၊ ဒုတိယဝန်ကြီးချုပ်နှင့် ပြည်ထဲရေးဝန်ကြီးဌာန၊ ပြည်ထောင်စုဝန်ကြီး  မူးယစ်ဆေးဝါးနှင့်စိတ်ကိုပြောင်းလဲစေသော  ဆေးဝါးများအန္တရာယ် တားဆီးကာကွယ် ရေးအဖွဲ့ဥက္ကဋ္ဌ၊ ဒုတိယဗိုလ်ချုပ်ကြီး စိုးထွဋ်ထံမှ ပေးပို့သည့် သဝဏ်လွှာအား ဧရာဝတီတိုင်းဒေသကြီး မူးယစ်ဆေးဝါးနှင့်စိတ်ကိုပြောင်းလဲစေသော  ဆေးဝါးများအန္တရာယ် တားဆီး ကာကွယ်ရေးအဖွဲ့ ဥက္ကဋ္ဌ၊ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးမိုးမင်းနိုင်က ဖတ်ကြားသည်။ ဆက်လက်၍ (၃၆)ကြိမ်မြောက် အပြည်ပြည်ဆိုင်ရာ မူးယစ်ဆေးဝါးအလွဲသုံးမှုနှင့် တရားမဝင်ရောင်းဝယ်မှု တိုက်ဖျက်ရေးနေ့အထိမ်းအမှတ် ဗဟိုအဆင့်  ပန်းချီ၊ ပိုစတာ၊ ဆောင်ပုဒ်၊ ဝတ္ထုတို ဆုရရှိသူများအား တိုင်းဒေသကြီး ဝန်ကြီးချုပ်ကလည်းကောင်း၊ တိုင်းဒေသကြီးအဆင့် ဆုရရှိသူများအား အစိုးရအဖွဲ့ဝင် ဝန်ကြီးများနှင့် တာဝန်ရှိသူများက လည်းကောင်း ဆုများအသီးသီးချီးမြှင့်ခဲ့သည်။ ယင်းနောက် တိုင်းဒေသကြီးဝန်ကြီးချုပ်နှင့် တာဝန်ရှိသူများသည် မူးယစ်ဆေးဝါးနှင့်စိတ်ကိုပြောင်းလဲစေသော  ဆေးဝါးများအန္တရာယ် တားဆီးကာကွယ်ရေးဗဟိုအဖွဲ့၏ ဆောင်ရွက်ချက်မှတ်တမ်း ဗွီဒီပြသမှုအား ကြည့်ရှု အားပေးခဲ့ပြီး ဆုရရှိသူများနှင့်အတူ စုပေါင်းမှတ်တမ်းတင် ဓာတ်ပုံများရိုက်ကူး၍ မူယစ်ဆေးဝါး အသိပညာပေးပြခန်းများအား ပြခန်းများအား လှည့်လည်ကြည့်ရှုအားပေးခဲ့ကြောင်းသိရသည်။

ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်းသည် အစိုးရအဖွဲ့ဝင်ဝန်ကြီးများ၊ ဌာနဆိုင်ရာတာဝန်ရှိသူများနှင့်အတူ (၂၅.၆.၂၀၂၃)နေ့ မွန်းလွဲပိုင်းက မြောင်းမြမြို့နယ်၊ ကြာဖူးငုံကျေးရွာ၌ ပြုလုပ်သည့် ကောက်စိုက်စက်ဖြင့်စိုက်ပျိုးခြင်းသရုပ်ပြပွဲ၊ ဝါးခယ်မမြို့နယ်၊ ရေလိန်ကျေးရွာနှင့် အိမ်မဲမြို့နယ်၊ ကညင်ကွင်းကျေးရွာတို့၌ ပြုလုပ်သည့် သစ်စိမ်းမြေဩဇာ(ပိုက်ဆံလျှော်)စုပေါင်း ထည့်သွင်းခြင်းအခမ်းအနားများသို့ တက်ရောက်ကြည့်ရှုအားပေးခဲ့ကြောင်းသိရသည်။ ရှေးဦးစွာ တိုင်းဒေသကြီး ဝန်ကြီးချုပ်သည် မြောင်းမြမြို့နယ်၊ ကြာဖူးငုံကျေးရွာ တောင်သူ ဦးမြင့်သန်း၏ လယ်ဧက(၃၀)ဧက၌ ပြုလုပ်သည့် ကောက်စိုက်စက်ဖြင့် ဆင်းသုခမျိုး စိုက်ပျိုးသရုပ်ပြမှုအား ကြည့်ရှုအားပေးခဲ့ပြီး တိုင်း​ဒေသကြီးစက်မှုလယ်ယာဦးစီးမှူးက စက်မှုလယ်ယာဦးစီးဌာနအ​နေဖြင့် ​တောင်သူများထံသို့ လယ်ယာသုံးစက်ကရိယာများ ငှားရမ်း​ဆောင်ရွက်​ပေး​နေမှုအ​ခြေအ​နေများ၊ ​​​ကောက်စိုက်စက်ဖြင့် စိုက်ပျိုးရာတွင် တစ်ဧကကုန်ကျစရိတ်များအား ရှင်းလင်းတင်ပြခဲ့ပါသည်။ ထို့​နောက် တိုင်း​ဒေသကြီးဝန်ကြီးချုပ်သည် ​ဒေသခံ​တောင်သူများနှင့် ရင်းရင်းနှီးနှီး​တွေ့ဆုံနှုတ်ဆက်ခဲ့ပြီး ​" တောင်သူကြီးများအနေဖြင့် အထွက်တိုး မျိုးကောင်းမျိုးသန့်များ သုံးစွဲကြရန်၊ ​မြေဆီလွှာဖွံ့ဖြိုးတိုးတက်​ရေးအတွက် သစ်စိမ်း​မြေသြဇာ(ပိုက်ဆံ​လျှော်)ထည့်သွင်းစိုက်ပျိုးကြရန်၊ သဘာဝ​မြေသြဇာများ အသုံးပြု၍ ဓါတ်​မြေသြဇာသုံးစွဲမှုများ​လျော့ချကြရန်" မှာကြားခဲ့ပါသည်။ ဆက်လက်၍ တိုင်းဒေသကြီး ဝန်ကြီးချုပ်သည် ဝါးခယ်မမြို့နယ်၊ ရေလိန်ကျေးရွာရှိ တောင်သူ (၃၁)ဦး၏ လယ်​မြေ ဧက(၁၀၀)နှင့် အိမ်မဲမြို့နယ်၊ ကညင်ကွင်း​ကျေးရွာရှိ တောင်သူဦး(၃)ဦး၏ လယ်​မြေ(၁၀) ဧကတို့တွင် ထွန်စက်ကြီးများဖြင့် သစ်စိမ်းမြေဩဇာ(ပိုက်ဆံလျှော်) စုပေါင်းထည့်သွင်းထွန်ယက်ခြင်း အခမ်းအနားများသို့ တက်ရောက်ကြည့်ရှုအားပေးခဲ့ပြီး တောင်သူများနှင့်တွေ့ဆုံ၍ "မြေဆီလွှာကောင်းမွန်စေရေးအတွက် သစ်စိမ်းမြေသြဇာ(ပိုက်ဆံ​လျှော်)များ ပိုမိုထည့်သွင်းစိုက်ပျိုးစေရေး၊ တောင်သူများအနေဖြင့် အထွက်တိုး မျိုးကောင်းမျိုးသန့်များ သုံးစွဲကြရန်နှင့် တစ်ဧက အထွက်နှုန်း ပိုမိုထွက်ရှိ​စေရေး ကြိုးစားဆောင်ရွက်ရန်" မှာကြားခဲ့ကြောင်းသိရသည်။ ​မြေဆီလွှာဖွံ့ဖြိုးတိုးတက်​ရေးအတွက် ဧရာဝတီတိုင်း​ဒေသကြီးအတွင်း ၂၀၂၃-၂၀၂၄ ခုနှစ်တွင် သစ်စိမ်း​မြေသြဇာ(ပိုက်ဆံ​လျှော်) ဧက တစ်သိန်း​ကျော် ကြဲပက်ပြီး ယခုအချိန်ထိ ဧက ခုနှစ်သောင်း​ကျော် ထည့်သွင်းထွန်ယက်ပြီးဖြစ်ပါသည်။

ဧရာဝတီတိုင်းဒေသကြီး ဝန်ကြီးချုပ်သည် အသောကသီတဂူဘေးမဲ့တောရကျောင်း ဝန်းအတွင်း၌ ပြုလုပ်သည့် ၂၀၂၃ခုနှစ်၊ မိုးရာသီသစ်ပင်စိုက်ပျိုးပွဲ၊ တိရစ္ဆာန် အစာပင်စိုက်ပျိုးပွဲနှင့် ကော်ဖီသီးနှံ စိုက်ပျိုးပွဲအခမ်းအနားသို့တက်ရောက်၍ အမှာစကား​ပြောကြားရာတွင် “နိုင်​ငံ​တော်ဝန်ကြီးချုပ်၏လမ်းညွှန်ချက်နှင့်အညီ သဘာဝပတ်ဝန်းကျင် စိမ်းလန်းစိုပြည်ရေး၊ သန့်ရှင်းသောပတ်ဝန်းကျင်နှင့်ကောင်းမွန်သော ဂေဟစနစ် ထိန်းသိမ်းနိုင်ရေး၊ စိမ်းလန်းမြေ(Green Space)များ တိုးပွားလာစေရေးတို့အတွက် သစ်ပင်စိုက်ပွဲ​တော်များ ပြုလုပ်စိုက်ပျိုးလျှက်ရှိပါ​ကြောင်း၊ တိုင်းဒေသကြီးအနေဖြင့် နှစ်စဥ်နှစ်တိုင်း သစ်​တောစိုက်ခင်းများကို ပိုမိုတိုးချဲ့ ထူ​ထောင်စိုက်ပျိုး​ခဲ့ပါ​ကြောင်း၊ တိုင်းဒေသကြီးအနေဖြင့် နှစ်စဥ် စိုက်ခင်းများကို ဧကငါးထောင်မှ ခြောက်ထောင်အထိတည်​ထောင် စိုက်ပျိုးလျက်ရှိပါကြောင်း၊ တိုင်း​ဒေသကြီးအတွင်း သစ်ပင်စိုက်ပွဲ​တော်များ၊ ဌာနဆိုင်ရာအသီးသီးမှ မိုးရာသီစိုက်ပျိုးနိုင်ရန်အတွက် နှစ်စဉ်လူထုဖြန့် ပျိုးပင်ပေါင်း(၁၃)သိန်းမှ(၁၄)သိန်းကျော်အထိ ပျိုးထောင်စိုက်ပျိုးလျက်ရှိပါကြောင်း၊ သစ်ပင်စိုက်ပျိုးခြင်းသည် လွယ်ကူသော်လည်း ရှင်သန်အောင်ပြုစုထိန်းသိမ်းကြရန်လိုပါကြောင်းနှင့် တစ်ပင်စိုက်လျှင် တစ်ပင်ရှင်သန်အောင် ပျိုးပင် (၂)နှစ်သားနှင့် အနည်းဆုံး(၂)​ပေ ရှိသည့် ပျိုးပင်များကိုစိုက်ပျိုးကြရမည် ဖြစ်ပါ​ကြောင်း၊ ယခုကဲ့သို့ သစ်ပင်များ စု​ပေါင်းစိုက်ပျိုးကြခြင်းအားဖြင့် တိုင်း​ဒေသကြီးအတွင်း စိမ်းလမ်းစိုပြည်လာမည်ဖြစ်ပါ​ကြောင်း၊ သဘာဝ​ဘေးအန္တရာယ်နှင့်ပတ်သက်၍ မိုးဦးကျကာလတွင် ဖြစ်တတ်သည့် မုန်တိုင်းဘေးနှင့် ၎င်းနှင့်ဆက်စပ်၍ မိုးအဆက်မပြတ် ရွာသွန်းမှုကြောင့် ရေကြီးခြင်း၊ မြေပြိုခြင်းစသည့် သဘာဝေးဘေးများ ကြုံတွေ့ရပါကြောင်း၊  သစ်တောသစ်ပင်များ ထိန်းသိမ်းစိုက်ပျိုးနိုင်ပါက သစ်တောဖုံးလွှမ်းမှုများပြားလာပြီး သဘာဝ​ဂေဟစနစ်များကိုထိန်းသိမ်းနိုင်ကာ သဘာဝပတ်ဝန်းကျင်ထိခိုက်မှုများကြောင့် ဖြစ်ပေါ်လာသည့် ဘေးဒဏ်များကို ကြံ့ကြံ့ခံနိုင်မည်ဖြစ်၍ သစ်ပင်များစိုက်ပျိုးဆောင်ရွက်နေခြင်း ဖြစ်ပါကြောင်း၊ တိုင်းဒေသကြီးအတွင်း၌ နှစ်စဉ်စိုက်ပျိုးလျက်ရှိသည့် သစ်ပင်များ၊ သစ်​တောများနှင့် ဒီ​ရေ​တောများအား ပြုစုပျိုးထောင်၍ ထိန်းသိမ်း​စောင့်​ရှောက်ကြစေလိုကြောင်း”အမှာစကားများပြောကြားသည်။ ဆက်လက်၍ တိုင်းဒေသကြီး ဝန်ကြီးချုပ်က ဦးဆောင်၍ ဌာနဆိုင်ဆိုင်ရာ​ပေါင်းစုံမှ ဝန်ထမ်းများ၊ ​ဒေသခံများနှင့်အတူ စုပေါင်းသစ်များစိုက်ပျိုးခြင်း၊ တိရစ္ဆာန် အစာပင်စိုက်ပျိုးခြင်းနှင့် ကော်ဖီသီးနှံ စိုက်ပျိုးခြင်းတို့ကို ဆောင်ရွက်ခဲ့ပြီး ဝန်ကြီးချုပ်သည် တာဝန်ရှိသူများနှင့်အတူ ဌာနဆိုင်ရာများနှင့် ပြည်သူများ၏ မိုးရာသီသစ်ပင်၊ တိရစ္ဆာန် အစာပင်နှင့် ကော်ဖီသီးနှံစိုက်ပျိုးခြင်းများကို လှည့်လည်ကြည့်အားပေးခဲ့ကာ ကုမ္ပဏီမှ ပြသထားသည့် ငါး၊ပုစွန်၊ ကြက်၊ ဘဲ၊ ဝက်၊ ဆိတ်၊ နွား အစာ ဘက်စုံသုံးကြိတ်/ဖြတ်စက်၊ အစာအမှုန့်ကြိတ်စက်၊ အစာ​တောင့်ထုတ်စက်များအား လက်တွေ့ပြသနေမှုများကို ကြည့်ရှုအားပေးခဲ့ကာ ​မွေးမြူ​ရေးခြံသုံး ဆေးဝါးများ​ထောက်ပံ့​ပေးအပ်ခဲ့ပါသည်။ အဆိုပါသစ်ပင်စိုက်ပွဲ​တော်မှ ကျွန်း၊ မ​ဟော်ဂနီ၊ ပျဥ်းကတိုး၊ မန်ဂျန်ရှား၊ အစရှိသည့် အပင်​စုစု​ပေါင်း (၁၄၃၆)ပင်၊ ​ကော်ဖီအပင်စုစု​ပေါင်း (၄၀၀)ပင်နှင့် တိရိစာန်အစာပင်များ စု​ပေါင်းစိုက်ပျိုးခဲ့ကြပါသည်။

ဧရာဝတီတိုင်းဒေသကြီး၊ မြောင်းမြမြို့နယ်၊ လပွတ်ကုလားကျေးရွာအုပ်စု၊ ရွှေဂူကြီးကျေးရွာရှိ အလောင်းစည်သူမင်းကြီး တည်ထားကိုးကွယ်တော်မူခဲ့သော ရှေးဟောင်းရွှေဂူကြီးဘုရား ဌာပနာပိတ်ပွဲမင်္ဂလာအခမ်းအနားအား ယနေ့နံနက်ပိုင်းက အဆိုပါစေတီတော်မြတ်ကြီး၌ ကျင်းပခဲ့ရာ ဌာပနာပိတ်ပွဲသို့ ဆရာတော် သံဃာတော်အရှင်သူမြတ်များ၊ တိုင်းဒေသကြီးဝန်ကြီးချုပ် ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများ၊ အလှူရှင်များနှင့် ဒေသခံပြည်သူများ တက်ရောက်ကြည်ညိုပူဇော်ခဲ့ကြသည်။ ရှေးဦးစွာ ဌာပနာပိတ်ပွဲမင်္ဂလာအခမ်းအနားအား “နမောတဿ”သုံးကြိမ်ရွတ်ဆို ဘုရားကန်တော့၍ အခမ်းအနားကို ဖွင့်လှစ်ခဲ့ပြီးနောက် နိုင်ငံတော်ဗဟိုသံဃာ့ဝန်ဆောင်၊ အဂ္ဂမဟာပဏ္ဍိတ၊ မြောင်းမြမြို့၊အလယ်တောရကျောင်းတိုက် ဆရာတော် ဘဒ္ဒန္တပညာသီဟ အရှင်သူမြတ်ထံမှ ဝန်ကြီးချုပ်နှင့် ဧည့်ပရိသတ်များက ငါးပါးသီလခံယူဆောက်တည်ကြပြီး ဆရာတော် သံဃာတော်အရှင်သူမြတ်များ ရွတ်ပွားချီးမြှင့်တော်မူသော“မေတ္တာသုတ်”ပရိတ်တရားတော်အား ဆက်လက်နာယူကြည်ညိုခဲ့ကြကာ တိုင်းဒေသကြီး ဝန်ကြီးချုပ်၊ဘုရားဒါယိကာ၊ဒါယိကာမများ၊‌ စေတနာရှင်၊ အလှူရှင်များနှင့် တာဝန်ရှိသူများက ဆရာတော် သံဃာတော်အရှင်သူမြတ်များထံသို့ ပရိတ်ပန်း ၊ပရိတ်ရေ၊ ပရိတ်ချည်၊ပရိတ်သဲများ၊ ဘုရားဌာပဌာများနှင့် လှူဖွယ်ဝတ္ထုပစ္စည်းများ ဆက်ကပ်လှူဒါန်းခဲ့ကြသည်။ ယင်းနောက် နိုင်ငံတော်ဗဟိုသံဃာ့ဝန်ဆောင်၊ အဂ္ဂမဟာပဏ္ဍိတ၊ မြောင်းမြမြို့၊ အလယ်တောရကျောင်းတိုက် ဆရာတော် ဘဒ္ဒန္တပညာသီဟ အရှင်သူမြတ်ထံမှ လှူဖွယ်ဝတ္ထုအစုစုတို့အတွက် အနုမောဒနာတရားနာကြား၍ ဝန်ကြီးချုပ်နှင့်ဧည့်ပရိသတ်များက ရေစက်သွန်းချအမျှပေးဝေခဲ့ကြသည်။ ဆက်လက်၍ အခမ်းအနား ဒုတိယပိုင်းအားကျင်းပရာ တိုင်းဒေသကြီးဝန်ကြီးချုပ်၊ ဘုရားဒါယိကာ၊ ဒါယိကာမများ၊‌ စေတနာရှင်၊ အလှူရှင်များနှင့် တာဝန်ရှိသူများက ဘုရားဌာပနာ​တော်ပစ္စည်းများကို ပင့်ဆောင်ပူဇော်ခဲ့ကြပြီး ဘုရားဌာပနာ​တော်များကို အမွှေးနံ့သာရည်များ ပက်ဖျန်း၍ ဌာပနာတိုက်အတွင်း စတင်ထည့်သွင်းပူဇော်ခဲ့ကြရာ ဆရာတော် သံဃာတော်အရှင်သူမြတ်များက “ဇယန္တော ဗောဓိယာ မူလေ”အစရှိသော ဇယမင်္ဂလာ အောင်ဂါထာတော်များကို ရွတ်ဖတ်ပူ​ဇော်ခဲ့ကြသည်။ ယင်းနောက် ဘုရားဌာပနာများ ထည့်သွင်းပူဇော်ပြီးသောအခါ ဌာပနာပိတ်ခြင်းလုပ်ငန်း ဆောင်ရွက်ခဲ့ပြီး “ဗုဒ္ဓသာသနံ စိရံ တိဋ္ဌတု”သုံးကြိမ်ရွတ်ဆို ဆုတောင်း၍ မင်္ဂလာအခမ်းအနားအား ရုပ်သိမ်းကာ ရတနာ ရွှေမိုး ငွေမိုးများ ရွာသွန်းဖြိုးခဲ့သည်။ ဆက်လက်၍ တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် ​မြောင်းမြမြို့နယ်၊ လပွတ်ကုလားကျေးရွာ၊ တောင်သူ ဦးအောင်ရွှေ၏ ဘဲကောင်ရေ(၄၂၀၀)မွေးမြူထားရှိမှု၊ ဈေးကွက်များသို့ ဘဲဥဖြန့်ဖြူးနေမှုအခြေအနေများနှင့် ဈေးကွက်အတွင်း ရောင်းချရသည့် ဈေးနှုန်းများကို မေးမြန်းခဲ့ရာ တောင်သူဦးအောင်ရွှေက သိလိုသည်များကို ‌ရှင်းလင်းဖြေကြားခဲ့သည်။  ယင်းနောက် တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် မြောင်းမြမြို့၊ ရေပြာစမ်းကျေးရွာရှိ အသောကသီတဂူဘေးမဲ့တောရ​ကျောင်းတိုက်ဆရာတော် ဦးဝဏ္ဏောဘာသအားဖူးမြော်ကြည်ညို၍ သာသနာရေးဆိုင်ရာ ကိစ္စရပ်များအား တင်ပြလျှောက်ထာခဲ့ပြီး လှူဖွယ်ဝတ္ထုပစ္စည်းများ ဆက်ကပ်လှူဒါန်းခဲ့သည်။ ထို့​နောက် တိုင်း​ဒေသကြီးဝန်ကြီးချုပ်နှင့် တာဝန်ရှိသူများသည် အသောကသီတဂူဘေးမဲ့တောရကျောင်းဝန်းအတွင်း​ မွေးမြူထားရှိသည့် ​ဒေသနွား​မွေးမြူ​ရေးခြံသို့သွား​ရောက်ခဲ့ပြီး တိုင်း​ဒေသကြီး​မွေးမြူ​ရေးနှင့်ကုသ​ရေးဦးစီးဌာန၊ တိုင်းဦးစီးမှူးက နွား​မွေးမြူထားရှိမှုအ​ခြေအ​နေများ၊ နွား​ချေး၊ သစ်ရွက်​ခြောက်၊ ​ကောက်ရိုး၊ အီးအမ် များဖြင့် သဘာဝ​မြေသြဇာပြုလုပ်ပြီး စိုက်ပျိုး​ရေးလုပ်ငန်းများတွင် အသုံးပြု​နေမှုအ​ခြေအ​နေများအား လိုက်လံရှင်းလင်းတင်ပြခဲ့ပါသည်။

ဧရာဝတီတိုင်းဒေသကြီး အစိုးရအဖွဲ့က ကြီးမှူးကျင်းပပြုလုပ်သော ဗုဒ္ဓပူဇာမင်္ဂလာနှင့် မဟာပဋ္ဌာန်းပူဇော်ပွဲ ပဋ္ဌာန်းသိမ်းအောင်ပွဲ အခမ်းအနားအား ဇွန်လ ၂၁ရက်နေ့ ညနေပိုင်းက ပုသိမ်မြို့၊သာသနာ့ဗိမာန်တော်ကြီး၌ ကျင်းပခဲ့ရာ အခမ်းအနားသို့ ဩဝါဒါစရိယဆရာတော်ကြီးများ၊ တိုင်းဒေသကြီး ဝန်ကြီးချုပ်၏ဇနီး ၊အစိုးရအဖွဲ့ဝင် ဝန်ကြီးများနှင့် ဇနီးများ၊ဌာနဆိုင်ရာများ တက်ရောက်ခဲ့ကြသည်။ ရှေးဦးစွာ ဗုဒ္ဓပူဇာမင်္ဂလာနှင့် အသံမစဲမဟာပဋ္ဌာန်းရွတ်ဖတ်ပူဇော်ပွဲ ပဋ္ဌာန်းသိမ်းအောင်ပွဲ အခမ်းအနားအား  ဧည့်ပရိသတ်များက “နမောတဿ”သုံးကြိမ်ရွတ်ဆို ဘုရားကန်တော့၍ ဖွင့်လှစ်ခဲ့ကြပြီးနောက်နိုင်ငံတော်ဩဝါဒါစရိယ၊ ပုသိမ်မြို့၊ ညောင်ပင်သာပရိယတ္တိစာသင်တိုက် ပဓာန နာယကဆရာတော် (အဘိဓဇမဟာရဋ္ဌဂုရု၊အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မဇောတိကဓဇ)  ဘဒ္ဒန္တဝိဿုတ မဟာထေရ်မြတ်ထံမှ ဧည့်ပရိသတ်များက ငါးပါးသီလ ခံယူ ဆောက်တည်ခဲ့ကြသည်။ယင်းနောက် ကျောင်းထိုင်ဘုန်းကြီးသင်တန်းကျောင်း၊ကျောင်းအုပ်ဆရာတော် ဒေါက်တာဘဒ္ဒန္တဇောတိဿရ MA,Ph.D (India) အရှင်သူမြတ်က ပဋ္ဌာန်းအောင်ပွဲ အနုမောဒနာဂါထာကို ရွတ်ဖတ်ပူဇော်ခဲ့ပြီး ဗုဒ္ဓပူဇာမင်္ဂလာနှင့် အသံမစဲမဟာပဋ္ဌာန်းရွတ်ဖတ်ပူဇော်ပွဲ ပဋ္ဌာန်းသိမ်းအောင်ပွဲ အခမ်းအနားသို့ ကြွရောက်တော်မူလာကြသည့် ဆရာတော်၊သံဃာတော်များအား တိုင်းဒေသကြီး ဝန်ကြီးချုပ်၏ဇနီး၊အစိုးရအဖွဲ့ဝင် ဝန်ကြီးများနှင့် ဇနီးများ၊ဌာနဆိုင်ရာများက လှူဖွယ်ပစ္စည်းများ ဆက်ကပ်လှူဒါန်းခဲ့ကြသည်။ ဆက်လက်၍  တိုင်းဒေသကြီးဩဝါဒါစရိယ မရမ်းချိုကျောင်းတိုက် ပဓာနနာယကဆရာတော် (အဂ္ဂမဟာဂန္ထဝါစကပဏ္ဍိတ၊ အဂ္ဂမဟာသဒ္ဓမ္မဇောတိကဓဇ) ဘဒ္ဒန္တသောဘိတ မဟာထေရ်မြတ်ထံမှ ဧည့်ပရိသတ်များက အနုမောဒနာတရားများနာကြား၍ လှူဒါန်းမှုအစုစုတို့အတွက် ရေစက်သွန်းချအမျှပေးဝေခဲ့ကြသည်။ ယင်းနောက် တိုင်းဒေသကြီးသာသနာရေးမှူးရုံးမှ ဦးစီးအရာရှိက နတ်၊ဗြဟ္မာများအား ပြန်လည်ပို့ဆောင်ခဲ့ပြီး အခမ်းအနားကို “ဗုဒ္ဓသာသနံံ စိရံ တိဋ္ဌတု”သုံးကြိမ်ရွတ်ဆို ဆုတောင်း၍အောင်မြင်စွာ ရုပ်သိမ်းခဲ့ကြောင်းသိရသည်။ အဆိုပါ ဗုဒ္ဓပူဇာမင်္ဂလာနှင့် အသံမစဲမဟာပဋ္ဌာန်းပူဇော်ပွဲ အခမ်းအနားအား သံဃာတော်အရှင်သူမြတ်များက ယခုလ (၁၇) ရက်နေ့မှ (၂၁)ရက်နေ့ အထိ ငါးရက်တိုင်တိုင် ရွတ်ဖတ်ပူဇော်ခဲ့ကြကြောင်းသိရသည်။