တိုင်းဒေသကြီးအဆင့် ပင်လယ်ကမ်းရိုးတန်းသယံဇာတ စီမံအုပ်ချုပ်လုပ်ကိုင်မှုကော်မတီ (ဒုတိယအကြိမ်) လုပ်ငန်းညှိနှိုင်းအစည်းအဝေးအား ဇူလိုင်လ ၂၂ ရက်နေ့ ညနေပိုင်းတွင် ဧရာဝတီတိုင်းဒေသကြီး အစိုးရအဖွဲ့ရုံး အစည်းအဝေးခန်းမ (၁)၌ ပြုလုပ်ရာ တိုင်းဒေသကြီးအဆင့် ပင်လယ်ကမ်းရိုးတန်း သယံဇာတ စီမံအုပ်ချုပ်လုပ်ကိုင်မှုကော်မတီဥက္ကဌ၊ တိုင်းဒေသကြီး ဝန်ကြီးချုပ် ဦးတင်မောင်ဝင်း၊ အစိုးရအဖွဲ့ဝင် ဝန်ကြီးများနှင့်တိုင်းဒေသကြီးပင်လယ်ကမ်းရိုးတန်း သယံဇာတ စီမံအုပ်ချုပ်လုပ်ကိုင်မှုကော်မတီဝင်များတက်ရောက်ခဲ့ကြသည်။ ဦးစွာ တိုင်းဒေသကြီးအဆင့် ပင်လယ်ကမ်းရိုးတန်း သယံဇာတ စီမံအုပ်ချုပ်လုပ်ကိုင်မှုကော်မတီဥက္ကဌ၊ တိုင်းဒေသကြီး ဝန်ကြီးချုပ်က “ မိမိတို့တိုင်းဒေသကြီးသည် ပင်လယ်ကမ်းရိုးတန်းမိုင်ရှည်လျားသောကြောင့် ပင်လယ်ကမ်းရိုးတန်းသယံဇာတများပေါကြွယ်ဝပြီး ထိုသယံဇာတများပျက်စီးဆုံးရှုံးမှုမရှိစေရေးအလေးထားဆောင်ရွက်ကြရမှာဖြစ်ပါကြောင်း၊ မုန်တိုင်း တိုက်ခတ်မှု များကြောင့် ဖြစ်ပေါ်သည့် ထိခိုက်ပျက်စီး ဆုံးရှုံးမှုများ သည် ဒီရေတောများ ပျက်စီးဆုံးရှုံးမှုနှင့် သက်ဆိုင်သဖြင့် ဒီရေတောကြိုးဝိုင်း/ကြိုးပြင်ကာကွယ်တောများစနစ်တကျဖွဲ့စည်းခြင်းနှင့် ဒီရေတောပင်နှင့်လေကာပင်များနှစ်စဉ်တိုးချဲ့စိုက်ပျိုးရန်လိုပါကြောင်း၊  ဒီရေတောများပျက်စီးဆုံးရှုံးမှု၊  ငါးသယံဇာတအပါအဝင် သန္တာကျောက်တန်းများ ပျက်စီးဆုံးရှုံးမှုများသည် လူတို့၏ ပြုမူဆောင်ရွက်မှုကြောင့် ဖြစ်ပါကြောင်း၊  မိမိတို့တိုင်းဒေသကြီးသည် ခရီးသွားလုပ်ငန်းဖွံ့ဖြိုးသော တိုင်းဒေသကြီးတစ်ခုဖြစ်၍ ကမ်းခြေသို့လာရောက်သူများ၊ ကမ်းခြေဒေသတွင်နေထိုင်သူများ များပြားသဖြင့် အမှိုက်များ စနစ်တနကျစွန့်ပစ်စေရေး၊ ဒီရေတောဂေဟစနစ်ထိန်းသိမ်းရေးဆိုင်ရာများ၊ ကမ်းရိုးတန်းသယံဇာတထိန်းသိမ်းရေးဆိုင်ရာများကို အသိပညာပေးလုပ်ငန်းများဆောင်ရွက်ရန်လိုပါကြောင်း၊ ရေနေသတ္တဝါများ ပျက်စီးဆုံးရှုံးမှုများ မရှိစေရေးအတွက်ငါးဖမ်းခြင်းလုပ်ငန်းများစနစ်တကျရှိစေရေး၊ ငါးမဖမ်းရဇုန်များ၊ ထိန်းသိမ်းရေးဧရိယာများသတ်မှတ်ထားရှိပြီး  အလေးထားလိုက်နာစေရေးကြပ်မက်ဆောင်ရွက်ရမှာဖြစ်ကြောင်းနှင့် ပင်လယ်ကမ်းရိုးတန်းအဏ္ဏဝါသယံဇာတကာကွယ်ထိန်းသိမ်းရေးဆိုင်ရာလုပ်ငန်းများ၊ ပင်လယ်ကမ်းခြေနှင့် ပင်လယ်ရေထုညစ်ညမ်းမှု ကင်းစင်ရေးဆိုင်ရာလုပ်ငန်းများတွင် ဝိုင်းဝန်းကြိုးပမ်းဆောင်ရွက်ကြရန်” ပြောကြားခဲ့ပါသည်။  ဆက်လက်၍ တိုင်းဒေသကြီးအဆင့် ပင်လယ်ကမ်းရိုးတန်းသယံဇာတ စီမံအုပ်ချုပ်လုပ်ကိုင်မှုကော်မတီ အတွင်းရေးမှူး၊ တိုင်းဒေသကြီး သစ်တောဦးစီးဌာန ညွှန်ကြားရေးမှူးက နိုင်ငံအဆင့်ပင်လယ်ကမ်းရိုးတန်းသယံဇာတစီမံအုပ်ချုပ်လုပ်ကိုင်မှုဗဟို​ကော်မတီ၏ဒုတိယအကြိမ် အစည်းအဝေး ဆုံးဖြတ်ချက်များအပေါ် ဆောင်ရွက်ထားရှိမှုနှင့် ရှေ့ဆက်လက်ဆောင်ရွက်မည့် အစီအမံများအားဆွေးနွေးတင်ပြပြီးနောက် တိုင်းဒေသကြီးအဆင့် ပင်လယ်ကမ်းရိုးတန်း သယံဇာတ စီမံအုပ်ချုပ်လုပ်ကိုင်မှုကော်မတီဝင်များက သက်ဆိုင်ရာဌာနအလိုက် စွန့်ပစ်ပစ္စည်းစီမံခန့်ခွဲရေး၊ ပညာပေးလုပ်ငန်းများ၊ သုတေသနနှင့်ဖွံ့ဖြိုးရေးလုပ်ငန်းများ၊ ဒီရေတောအပင်များ၏ ဇုန်အလိုက်ပေါက်ရောက်နေသော မျိုးစိတ်မျိုးကွဲများလေ့လာခြင်း၊ ဒီရေတောဂေဟစနစ်တွင်အရေးပါသည့် ခရုနှင့်အခွံနှစ်ခြမ်းရှိသည့်မျိုးစိတ်များ၏အခြေအနေ၊ ဒီရေတောအမျိုးအစားလိုက်ပြီး ၎င်းတို့၏ပျံနှံ့မှု၊ပေါများမှုအခြေအနေကိုလေ့လာခြင်းဖြင့်လက်ရှိဒီရေတော၏ဂေဟစနစ်ကိုခန့်မှန်းနိုင်သည့်သုတေသနလုပ်ငန်းများဆောင်ရွက်ခြင်း၊ ဒီရေတောမြေဆီလွှာအတွင်းရှိ ကာဗွန်ပါဝင်မှုအခြေအနေများကို တိုင်းတာလုပ်ဆောင်သည့် သုတေသနလုပ်ငန်းများဆောင်ရွက်ခြင်း၊ ဒီရေချောင်းများအတွင်းရှိ အပင်မျှောလှေများ၏ မျိုးစိတ်အလိုက် ပျံ့နှံ့မှု၊ ပေါများမှု၊ ပါဝင်မှုများကိုလေ့လာခြင်းဖြင့် ငါးလုပ်ငန်းတိုးတက်မှုကိုသိရှိစေနိုင်မည့် သုတေသနပြုလုပ်ငန်းများဆောင်ရွက်မည့် အစီအမံများအား ဆွေးနွေးတင်ပြကြရာ တိုင်းဒေသကြီးဝန်ကြီးချုပ်က လိုအပ်သည်များကို ဖြည့်စွက်မှာကြားခဲ့ပါသည်။

ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ် ဦးတင်မောင်ဝင်းသည် အစိုးရအဖွဲ့ဝင်ဝန်ကြီးများ၊ ဌာနဆိုင်ရာများနှင့်အတူ ဇူလိုင်လ ၂၁ ရက်နေ့ ညနေပိုင်းက ကန်ကြီးထောင့်မြို့နယ်ရှိ အမှတ် (၅)  ဓာတ်မြေဩဇာစက်ရုံသို့သွားရောက်၍ ယူရီးယားဓာတ်မြေသြဇာထွက်ရှိမှုကိုကြည့်ရှုအားပေးခဲ့ပါသည်။ ဦးစွာ တိုင်းဒေသကြီးဝန်ကြီးချုပ်နှင့်အဖွဲ့သည် ယူရီးယားထုတ်လုပ်သည့်နေရာ(prilling tower) တွင် ယူရီးယားထွက်ရှိမှုကိုကြည့်ရှုစစ်ဆေးပါသည်။ ထို့နောက်ယူရီးယားသိုလှောင်ရုံသို့သွားရောက်၍ ယူရီးယားထုတ်ပိုးသိုလှောင်ထားရှိမှုကို ကြည့်ရှုစစ်ဆေးခဲ့ပြီးယူရီးယားဓာတ်မြေသြဇာများထွက်ရှိလာပြီဖြစ်၍ စပါး၊ ဆီထွက်သီးနှံ၊ ပဲမျိုးစုံ စိုက်ပျိုးရေးအတွက် များစွာအထောက် အကူရမည်ဖြစ်ပါကြောင်း၊ စက်ရုံစွမ်းအားပြည့် လည်ပတ်ထုတ်လုပ်နိုင်ရေး ကြိုးစားကြစေလိုကြောင်း၊ ထုတ်ပိုးမှုစနစ်များသေသပ်ကောင်းမွန်ပြီး စနစ်တကျ သိုလှောင်ထားရှိကာ  အဆင်သင့်ဖြန့်ဖြူးပေးနိုင်ရေး ဆောင်ရွက်ထားရှိရန်မှာကြားခဲ့ပါသည်။ အမှတ် (၅)  ဓာတ်မြေဩဇာစက်ရုံသည် စက်ရုံ နှစ်ပတ်လည်စက်ပြုပြင်မှု (Annual Shutdown) လုပ်ငန်းများဆောင်ရွက်ပြီးစီး၍ ယခုလ ၁၃ ရက်နေ့တွင် သဘာဝဓာတ်ငွေ့စတင်ပို့လွှတ်လည်ပတ်ခဲ့ရာ ယနေ့နေ့လည်တွင် ယူရီယားစတင်ထွက်ရှိခဲ့ပြီး တစ်နေ့လျှင် ယူရီယားတန်၃၀၀ ထုတ်လုပ်နိုင်မည်ဖြစ်ကြောင်းသိရှိရပါသည်။

ဧရာဝတီတိုင်းဒေသကြီးအတွင်းရှိ ကန်ကြီးထောင့်မြို့နယ်နှင့် ကျောင်းကုန်းမြို့နယ်များ၌ ၂၀၂၂ -ခုနှစ် မိုးစပါးရာသီ တစ်ဧက တင်း(၁၀၀) နှုန်းထွက်ရှိရေး ဧက(၁၀၀)စံပြကွက်ရှိတောင်သူများအား ကွန်ပေါင်းဓာတ်မြေဩဇာထောက်ပံ့ပေးအပ်ပွဲကို ယနေ့နံနက်ပိုင်းက ကန်ကြီးထောင့်မြို့နယ်နှင့်ကျောင်းကုန်းမြို့နယ်များမြို့နယ်များ၌ ပြုလုပ်ရာ တိုင်းဒေသကြီး ဝန်ကြီးချုပ် ဦးတင်မောင်ဝင်းတက်ရောက်၍ တောင်သူများထံသို့ ထောက်ပံ့ပေးအပ်ခဲ့သည်။ ဦးစွာ တိုင်းဒေသကြီးဝန်ကြီးချုပ်သည် ပုသိမ်ခရိုင်၊ကန်ကြီးထောင့်မြို့နယ်၊ကွင်းယားကြီးကျေးရွာရှိ ဧက(၁၀၀) စံပြကွက်ရှိတောင်သူများအား ကွန်ပေါင်းဓာတ်မြေဩဇာ (၁၀၀)အိတ်အား ထောက်ပံ့ပေးအပ်ခဲ့ပြီး တောင်သူများနှင့် ရင်းရင်းနှီးနှီးတွေ့ဆုံခဲ့ပါသည်။ အလားတူ ကျုံပျော်ခရိုင်၊ ကျောင်းကုန်းမြို့နယ်၊ ကောက်ကြီးကုန်းကျေးရွာရှိ ဧက(၁၀၀)စံပြကွက်ရှိတောင်သူများအား ကွန်ပေါင်းဓာတ်မြေဩဇာများ ဆက်လက်ထောက်ပံ့ပေးအပ်ခဲ့ပြီး  တောင်သူများနှင့်ရင်းရင်းနှီးနှီးတွေ့ဆုံခဲ့ပါသည်။ အဆိုပါ ဓာတ်မြေသြဇာထောက်ပံ့ပေးအပ်ရာတွင် တိုင်းဒေသကြီးဝန်ကြီးချုပ်မှ အထွက်တိုး မျိုးကောင်းမျိုးသန့်များသုံးစွဲကြစေရေး၊ စနစ်တကျမြေပြင်ခြင်းလုပ်ငန်းများဆောင်ရွက်ကြစေရေး၊ သဘာဝမြေသြဇာနှင့် ဓာတ်မြေသြဇာများကိုအချိုးကျသုံးစွဲကြစေရေး၊ မိရိုးဖလာစိုက်ပျိုးနည်းများအပြင်ခေတ်မီစိုက်ပျိုးနည်းစနစ်များ၊ စက်ကိရိယာများအသုံးပြုဆောင်ရွက်ကြရန်နှင့် တိုင်းဒေသကြီး၏ပန်းတိုင်အထွက်နှုန်းများရရှိစေရေး ကြိုးစားဆောင်ရွက်ကြရန်မှာကြားခဲ့ပါသည်။ ဆက်လက်၍ ဝန်ကြီးချုပ်သည် တိုင်းဒေသကြီး ကျေးလက်လမ်းဖွံ့ဖြိုးရေးဦးစီးဌာနမှ ၂၀၂၂-၂၀၂၃ အမျိုးသားသဘာဝဘေးအန္တရာယ်ဆိုင်ရာစီမံခန့်ခွဲမှုရန်ပုံငွေဖြင့်ဆောင်ရွက်သည့် ကျောင်းကုန်းမြို့နယ်၊ ဆိပ်သာကြီးကျေးရွာနှင့် ကန်ကြီးထောင့်မြို့နယ်၊ ဆိပ်သာလေးကျေးရွာသို့ ဆက်သွယ်ထားသည့် ကျုံလမုချောင်းကူးတံတား (၁၂ဝပေ×၁၄ပေ) တည်ဆောက်မှုအခြေအနေများအား ကြည့်ရှုစစ်ဆေးခဲ့ပြီး တံတားတည်ဆောက်ရေးရှင်းလင်း‌ဆောင်၌ ခရိုင်ကျေးလက်လမ်းဦးစီးမှူးက တံတားဆောက်လုပ်နေမှုအခြေအနေများအား ရှင်းလင်းတင်ပြရာ တိုင်းဒေသကြီးဝန်ကြီးချုပ်က တံတားအရည်အ‌သွေး ပြည့်မီရေးနှင့်တည်‌ဆောက်ရေး လုပ်ငန်းများအချိန်မီပြီးစီး‌အောင် ဆောင်ရွက်နိုင်ရေး မှာကြားခဲ့သည်။

ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်းသည် တာဝန်ရှိသူများနှင့်အတူ  ပုသိမ်တက္ကသိုလ်ဝင်း၌ ဌာနဆိုင်ရာဝန်ထမ်းများ၊ စည်ပင်သာယာရေးအဖွဲ့ဝန်ထမ်းများ၊ တက္ကသိုလ်ဝန်ထမ်းများ၊ ရပ်ကွက်နေပြည်သူလူထုများနှင့် နယ်မြေခံ တပ်ရင်း တပ်ဖွဲ့ဝင်များ စုစုပေါင်းအင်အား ၃၀၀ကျော်ဖြင့်  ပုသိမ်တက္ကသိုလ် မိန်းလမ်းမတလျှောက် လမ်းဘေးဝဲယာ၊ လမ်းလယ်ကျွန်းများရှိ ခြုံနွယ်များရှင်းလင်းခြင်း၊ သစ်ပင်သစ်ကိုင်းများခုတ်ထွင်ရှင်းလင်းခြင်း၊ ပန်းအလှပင်များ ညီညာစွာရိတ်ဖြတ်ခြင်းများစသည့် စုပေါင်းသန့်ရှင်းရေး ဆောင်ရွက်နေမှုများအား ကြည့်ရှုအားပေးခဲ့ပြီး အမှိုက်များစနစ်တကျစွန့်ပစ်စေရေး၊  ပန်းအလှပင်များ၊ အရိပ်ရအပင်များစနစ်တကျ စိုက်ပျိုးရန်နှင့်ရေစီးရေလာကောင်းမွန်စေရေးနှင့် သန့်ရှင်းရေးလုပ်ငန်းများအား အပတ်စဉ် အလေးထားဆောင်ရွက်ရန် ပြောကြားခဲ့ပြီး အဝေးသင်တက္ကသိုလ် ဓာတုဗေဒဘာသာရပ်၊ ပထမနှစ်၊ ဒုတိယနှစ် နှင့် တတိယနှစ် ကျောင်းသား၊ကျောင်းသူများ တက်ရောက်ပညာသင်ကြားနေမှုအား ကြည့်ရှုအားပေးစကားများ ပြောကြားခဲ့ပါသည်။ ယင်းနောက် ဝန်ကြီးချုပ်နှင့် တာဝန်ရှိသူများသည် မဉ္ဇူလမ်း၊ အောင်သုခလမ်းနှင့် ကမ်းနားလမ်းတစ်လျှောက်သို့ ရေမြောင်းများတူးဖော်ဆောင်ရွက်နေမှုများအား ကြည့်ရှုစစ်ဆေးခဲ့ကာ ရေစီးရေလာကောင်းမွန်စေရေးအတွက်ရေမြောင်းများအတွင်း ခြုံနွယ်များရှင်းလင်းရန်နှင့် အမှိုက်များစွန့်ပစ်မှုမရှိစေရေး အလေးထားကြပ်မက်ဆောင်ရွက်ရန် မှာကြားခဲ့ပြီး ကမ်းနားလမ်းတစ်လျောက်မြို့သန့်ရှင်းသာယာရေးဆောင်ရွက်ထားရှိမှုများကိုလှည့်လည်ကြည့်ရှုစစ်ဆေးသည်။ အလားတူ တိုင်းဒေသကြီးအတွင်းရှိ မြို့နယ် ၂၆ မြို့နယ်တွင် မြို့၊ ရပ်ကွက်၊ ကျေးရွာများ သန့်ရှင်းသာယာလှပစေရေးစုပေါင်းသန့်ရှင်းရေးလုပ်ငန်းများကို ဌာနဆိုင်ရာများ၊ တပ်ရင်းတပ်ဖွဲ့များ၊ ပြည်သူများမှ အပတ်စဉ် စနေနေ့တိုင်း စဉ်ဆက်မပြက်ဆောင်ရွက်လျက်ရှိကြောင်းသိရှိရပါသည်။

အဋ္ဌာရသမ(၁၈)ကြိမ်မြောက် ဝါတွင်းကာလ မဟာသံဃိကဒါန အရုဏ်ဆွမ်းလောင်းလှူပွဲကို ဇူလိုင်လ ၁၆ ရက်နေ့ နံနက် ၀၄း၃၀ အချိန်တွင်ပုသိမ်မြို့ရွှေမုဋ္ဌော မဟာစေတီတော်မြတ်ကြီး၊ ဒေါ်လှယဥ်(ဝိသာခါ)ဓမ္မာရုံ၌ပြုလုပ်ရာ ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ် ဦးတင်မောင်ဝင်းနှင့်ဇနီး၊ အစိုးရအဖွဲ့ဝင်ဝန်ကြီးများနှင့်ဇနီးများ၊တိုင်း၊ ခရိုင်နှင့်မြို့နယ်အဆင့်ဌာနဆိုင်ရာများ၊ စေတနာရှင်အလှူရှင်များတက်ရောက်၍အရုဏ် ဆွမ်းလောင်းလှူခဲ့ကြပါသည်။ ဦးစွာ ပုသိမ်မြို့ရှိ ကျောင်းတိုက်အသီးသီးတွင် ဝါဆိုဝါကပ်တော်မူကြသောသံဃာတော်အရှင်သူမြတ်များမှ အရုဏ်ဆွမ်းခံကြွရောက်တော်မူလာကြကုန်သော သံဃာတော်(၁၉၃၄) ပါးတို့အား တိုင်းဒေသကြီးဝန်ကြီးချုပ် အမှူးပြုသော စေတနာရှင်အလှူရှင်များမှ အရုဏ်ဆွမ်းလောင်းလှုပူဇော်ခဲ့ကြသည်။ ထို့နောက် ပုသိမ်မြို့ရှိ ထေရ်ကြီးဝါကြီးသံဃာတော်အရှင်သူမြတ်ငါးပါးတို့ကို ဝါဆိုသက်န်းနှင့်လှူဖွယ်ပစ္စည်းများ ဆက်ကပ်ခြင်းနှင့် ဝါတွင်းကာလ အဋ္ဌာရသမ(၁၈)ကြိမ်မြောက် အရုဏ်ဆွမ်းလောင်းလှူပူဇော်ပွဲ ရေစက်ချမင်္ဂလာ အခမ်းအနား ဆက်လက်ပြုလုပ်ရာ ဆရာတော် အရှင်သူမြတ်များနှင့် ဧည့်ပရိတ်သတ်တို့မှ “နမောတဿ ”  (၃)ကြိမ်ရွတ်ဆို ဘုရားကန်တော့၍ဖွင့်လှစ်ခဲ့ပြီး နိုင်ငံတော်ဩဝါဒစရိယ၊ ပုသိမ်မြို့၊ နိဂြောဓာရုံညောင်ပင်သာ ပရိယတ္တိစာသင်တိုက် ပဓာန နာယကဆရာတော် အဂ္ဂမဟာပဏ္ဍိတ၊အဂ္ဂမဟာသဒ္ဓမ္မဇောတိကဓဇ၊အဘိဓဇမဟာရဌဂုရု ဘဒ္ဒန္တဝိဿုတ မဟာထေရ် အရှင်သူမြတ်ထံမှ ဝန်ကြီးချုပ်နှင့်ဧည့်ပရိသတ်များက ငါးပါးသီလ ခံယူဆောက်တည်ကြကာ ဆရာတော်သံဃာတော်အရှင်သူမြတ်များ ရွတ်ပွားသရဇ္ဈာယ် ချီးမြှင့်တော်မူသော ပရိတ်တရားတော်များအား ဆက်လက်နာယူ ကြည်ညိုကြသည်။ ယင်းနောက် အခမ်းအနားသို့  ကြွရောက်တော်မူလာကြသော ဆရာတော်သံဃာတော်  အရှင်သူမြတ်များအား တိုင်းဒေသကြီး ဝန်ကြီးချုပ်နှင့်ဇနီးတို့က ဝါဆိုသင်္ကန်းနှင့်   လှူဖွယ်ဝတ္ထုပစ္စည်းများနှင့် အသီးသီး ဆက်ကပ်လှူဒါန်းခဲ့ကြသည်။ ဆက်လက်၍   ဧရာဝတီတိုင်းဒေသကြီး  သံဃနာယကအဖွဲ့၊ ဥက္ကဌ (သုဓမ္မာ) မရမ်းချိုကျောင်းတိုက်  ပဓာန နာယကဆရာတော် အဂ္ဂမဟာဂန္ထဝါစကပဏ္ဍိတ၊  အဂ္ဂမဟာသဒ္ဓမ္မဇောတိကဓဇ၊ ဘဒ္ဒန္တသောဘိတမဟာထေရ် အရှင်သူမြတ်ထံမှ အနုမောဒနာတရား နာကြား၍ လှူဒါန်းမှု အစုစုတို့အတွက် ရေစက်သွန်းချ အမျှပေးဝေခဲ့ကာ အခမ်းအနားအား “ဗုဒ္ဓသာသနံ စိရံ တိဌတု” (၃)ကြိမ်ရွတ်ဆို ဆုတောင်း၍ ရုပ်သိမ်းခဲ့ပြီး ဆရာတော်သံဃာတော် အရှင်သူမြတ်များအား အရုဏ်ဆွမ်းဆက်ကပ်လှူဒါန်းခဲ့ကြောင်းသိရသည်။