နယ်စပ်ရေးရာဝန်ကြီးဌာန၊ ပညာရေးနှင့်လေ့ကျင့်ရေးဦးစီးဌာန၊ အမျိုးသမီးအိမ်တွင်းမှု သက်မွေးလုပ်ငန်းပညာသင်တန်းကျောင်း(ပုသိမ်)၌ အဆင့်မြင့်အိမ်တွင်းမှုစက်ချုပ်သင်တန်း အမှတ်စဉ်(၅) သင်တန်းဖွင့်ပွဲအခမ်းအနားကို ယနေ့နံနက်ပိုင်းက  ကျင်းပပြုလုပ်ရာ ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်း၊ အနောက်တောင်တိုင်းစစ်ဌာနချုပ်တိုင်းမှူးနှင့် တိုင်းဒေသကြီးအစိုးရအဖွဲ့ဝင်ဝန်ကြီးများ၊ ခရိုင်/မြို့နယ်ဌာနဆိုင်ရာများတက်ရောက်ခဲ့ကြသည်။ အခမ်းအနားတွင် တိုင်းဒေသကြီးဝန်ကြီးချုပ်က အိမ်တွင်းမှုအဆင့်မြင့်စက်ချုပ်သင်တန်းများကို စဉ်ဆက်မပြတ် ဖွင့်လှစ်ပေးလျက်ရှိကြောင်း၊ ဒေသအတွက်လိုအပ်ချက်များကို ဖြည့်ဆည်းပေးနေတာဖြစ်ပြီး လူမှုစီးပွားဘဝဖွံ့ဖြိုး တိုးတက်ရန်အတွက် အလုပ်အကိုင်အခွင့်အလမ်းများကို ရှာဖွေပေးရမှာဖြစ်ကြောင်း၊ လူစွမ်းအားအရင်းအမြစ်များဖွံ့ဖြိုးတိုးတက်ဖို့ အတွက် ယခုလိုသင်တန်းများဖွင့်လှစ်ရခြင်းဖြစ်ကြောင်း၊ တိုင်းဒေသကြီးအတွင်းရှိ အမျိုးသမီးအိမ်တွင်းမှုသင်တန်းကျောင်းအသီးသီးမှ သင်တန်းဆင်း သင်တန်းသူ (၁၃၆၅)ဦးရှိရာ အလုပ်အကိုင်ရရှိသူ (၆၉၄)ဦးရှိသည့်အတွက် (၅၀.၈၄%) ရှိကြောင်း၊ သင်တန်းတွင် အခြေခံမှစ၍ စနစ်တကျကျွမ်းကျင်တက်မြောက်စေရန် အချိန်ယူပြီး လေ့ကျင့် သင်ကြားပေးလျက်ရှိရာ သင်တန်းဆင်းသည်နှင့် အလုပ်အကိုင်အခွင့်အလမ်းများရရှိပြီး မိသားစုအတွက် ဝင်ငွေရရှိစေမှာဖြစ်ကြောင်း၊ သင်တန်းကျောင်း အနေဖြင့် သင်တန်းသူများ နေထိုင်စားသောက်ရေးမှစ၍ ပြည့်ပြည့်စုံစုံ ထောက်ပံ့ ဆောင်ရွက်ပေးလျက်ရှိကြောင်း၊ သင်တန်းသူများအနေဖြင့် လုပ်ငန်းကျမ်းကျင်မှုရှိစေရန် ကြိုးကြိုးစားစား သင်ယူကြရန် လိုကြောင်း၊ မိမိတို့ထုတ်လုပ်လိုက်တဲ့ထုတ်ကုန်များကိုလည်း ဆန်းသစ်နေအောင်ဆောင်ရွက်ရန် လိုကြောင်း၊ သင်တန်းကာလအတွင်း ကိုဗစ်-၁၉ဆိုင်ရာ စည်းကမ်းချက်များနှင့်အညီ စနစ်တကျပြုမူနေထိုင်သွားရန်လိုကြောင်း ပြောကြားခဲ့သည်။ ထို့နောက် တိုင်းဒေသကြီးဝန်ကြီးချုပ်က ထောက်ပံ့ငွေပေးအပ်ရာ ကျောင်းအုပ်ကြီး ဒေါ်ခင်အိမွန် မှ လက်ခံရယူခဲ့ပြီး ဝန်ကြီးချုပ်နှင့်တာဝန်ရှိသူများက သင်တန်းသူများအား  ရင်းရင်းနှီးနှီးတွေ့ဆုံ နှုတ်ဆက်ခဲ့ပြီးနောက် အခမ်းအနားတွင်ခင်းကျင်းပြသထားသော သင်တန်းသုံး သင်ထောက်ကူ ထောက်ပံ့ပစ္စည်းများအား ကြည့်ရှုစစ်ဆေးခဲ့ပြီး ယခု အဆင့်မြင့်အိမ်တွင်းမှုစက်ချုပ်သင်တန်း အမှတ်စဉ်(၅)သို့ သင်တန်းသူ (၃၅)ဦး တက်ရောက်လျက်ရှိကာ သင်တန်းကာလမှာ ရက်သတ္တ(၂၁)ပတ် ကြာမြင့်မည်  ကြောင်းသတင်းရရှိသည်။ ဆက်လက်၍ တိုင်းဒေသကြီး ဝန်ကြီးချုပ်နှင့်အစိုးရအဖွဲ့ဝင်များသည် ပေါက်ကုန်းကျေးရွာအုပ်စုရှိ MSMEsလုပ်ငန်းဖြစ်သည့် ရွှေပျား ပဲငံပြာရည်နှင့် ငရုတ်ဆီစက်ရုံသို့ သွားရောက်ကြည့်ရှုစစ်ဆေးခဲ့ရာ စက်ရုံတာဝန်ရှိသူများမှ စက်ရုံမှ ထုတ်လုပ်လျက်ရှိသော ငရုတ်ဆီ၊ ခရုဆီ၊  ရှာလကာရည်၊ ပဲငံပြာရည် (အကြည်/အနောက်)ထုတ်လုပ်ပုံအဆင့်ဆင့်နှင့် ကုန်ကြမ်းသိုလှောင်ထားရှိမှု၊ အသုံးချမှုတို့အား ရှင်းလင်းတင်ပြခဲ့မှုအပေါ် တိုင်းဒေသကြီးဝန်ကြီးချုပ်က စားသောက် ကုန်ပစ္စည်းများ ထုတ်လုပ်ရာတွင် အဆင့်မီစက်ပစ္စည်းများ အသုံးပြုထုတ်လုပ်နိုင်သဖြင့် လုပ်ငန်းခွင်အန္တရာယ်ကင်းရှင်းပြီး ကျန်းမာရေးနှင့် ညီညွတ်မျှတစေပါကြောင်း၊ ထုပ်ပိုးမှုစနစ် ပိုမိုကောင်းမွန်ပြီးဈေးကွက် ပိုမိုရရှိစေရန် အလေးထားဆောင်ရွက်ရန် မှာကြားသည်။ အဆိုပါစက်ရုံ၌ ဝန်ထမ်းနှင့်လုပ်သား စုစုပေါင်း ၅၀ ဦးခန့် အလုပ်အကိုင်အခွင့်အလမ်းရရှိကြောင်း သိရသည်။

ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်းနှင့် အစိုးရအဖွဲ့ဝင်များ၊ တိုင်းဒေသကြီး/ ခရိုင်/မြို့နယ်အဆင့် ဌာနဆိုင်ရာများသည် ယနေ့မွန်းလွဲပိုင်းတွင် ငပုတောမြို့နယ်၊ ကွင်းချောင်းကျေးရွာအုပ်စုရှိ မော်တင်ကော်ဖီစိုက်ခင်းအား သွားရောက်ကြည့်ရှုလေ့လာခဲ့ရာ တာဝန်ယူဆောင်ရွက်လျက်ရှိသည့် Myanmar Agri-Tech Ltd မှ တာဝန်ရှိသူများက လိုက်လံရှင်းလင် ပြသခဲ့ကြသည်။ အဆိုပါ မော်တင်ကော်ဖီစိုက်ခင်းသည် ဧရိယာဧက (၃၁၀)ကျယ်ဝန်းပြီး ၂၀၁၄ ခုနှစ်မှစ၍ Robusta(TR4/TR9)(ဗီယက်နမ်မျိုး) တစ်ဧကလျင် ကော်ဖီပင် ၄၃၅ ပင် စိုက်ပျိုးထားကြောင်း၊ အပင်သက်တမ်း ၃ နှစ်ကျော်ချိန်မှ စတင်၍ အသီးမှည့် ခူးဆွတ်လာခဲ့ရာ နှစ်စဉ် တိုးတက်လာခဲ့ပြီး ၂၀၂၂-၂၀၂၃ ခုနှစ်တွင်လည်း ကော်ဖီအသီးမှည့် ကီလိုဂရမ် ၁၂၀၀၀၀ ခန့် ဆွတ်ခူးရရှိနိုင်မည်ဟု ခန့်မှန်းကြောင်းနှင့် ရေမြေရာသီဥတုနှင့်ကိုက်ညီသော မျိုး၊ မြေဩဇာ၊ ဆေးဝါးသုံးစွဲမှု၊ ရေလိုအပ်မှုနှင့် ပျိုးခြံတွင် ပျိုးထောင်မှုတို့အားရှင်းလင်း တင်ပြခဲ့သည်။ အဆိုပါ မော်တင်ကော်ဖီစိုက်ခင်း၌ ဝန်ထမ်း ၂၁ ဦးနှင့် လုပ်သားဦးရေ ၁၀၀ ကျော်အား အလုပ်အကိုင်အခွင့်အလမ်းများ ပေးထားပြီး ကော်ဖီအထွက်နှုန်းတိုးတက်ရေး ဆောင်ရွက်လျက်ရှိကြောင်းသိရသည်။

ဧရာဝတီတိုင်းဒေသကြီး ဗဟိုစာရင်းအင်းအဖွဲ့ ရုံးအဆောက်အဦနှင့် ဝန်ထမ်းအိမ်ရာအဆောက်အဦဖွင့်ပွဲ  အခမ်းအနားကို ယနေ့နံနက်ပိုင်းက ပုသိမ်မြို့၊ အမှတ် ၅ ရပ်ကွက်၊ ပပဝတီကွက်သစ်၊ အကွက်အမှတ်(၃၃၈၊၃၃၉)ရှိ တိုင်းဒေသကြီး ဗဟိုစာရင်းအင်းအဖွဲ့ရုံးဝန်း ၌ ကျင်းပရာ တိုင်းဒေသကြီး ဝန်ကြီးချုပ် ဦးတင်မောင်ဝင်း၊ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဒေါ်သန်းသန်းလင်းနှင့် တိုင်းဒေသကြီး အစိုးရအဖွဲ့ဝင်များ၊ ဗဟိုစာရင်းအင်းအ‌ဖွဲ့ နှင့် စီမံကိန်းရေးဆွဲရေးဦးစီးဌာန ညွှန်ကြားရေးမှူးချုပ်များ၊ ခရိုင်နှင့် မြို့နယ်စီမံအုပ်ချုပ်ရေးအဖွဲ့ဝင်များ၊ ဌာနဆိုင်ရာများနှင့် တာဝန်ယူတည်‌ဆောက်ခဲ့သည့် ကုမ္ပဏီများမှ တာဝန်ရှိသူများ တက်ရောက်ခဲ့သည်။ ဦးစွာ တိုင်းဒေသကြီး ဝန်ကြီးချုပ်၊ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး နှင့် တိုင်းဒေသကြီးစီးပွားရေးရာဝန်ကြီးတို့မှ သတ်မှတ်နေရာများ၌ နေရာယူ၍ ရုံးအဆောက်အဦနှင့် ဝန်ထမ်းအိမ်ရာ အဆောက်အဦအား ဖဲကြိုးဖြတ်ဖွင့်လှစ်၍ ကမ္ဗည်းမော်ကွန်းအား အမွှေးနံ့သာရည်များ ပတ်ဖျန်းပေးပြီးနောက် အခမ်းအနားအားဆက်လက် ပြုလုပ်ရာ တိုင်းဒေသကြီးဝန်ကြီးချုပ်က တိုင်းဒေသကြီးရုံး (၄၀‌ပေx ၄၅ပေ) RC ၃ ထပ် နှင့် ဝန်ထမ်းအိမ်ရာ (၃၀ပေx၄၀‌ပေ) ၂ ခန်းတွဲ RC ၄ ထပ် အား ဖွင့်လှစ်နိုင်ခဲ့ပြီဖြစ်ပါကြောင်း၊ ရုံးဝန်းအတွင်းမှာဘဲ ရုံးနဲ့ အိမ်ရာ တည်ဆောက်ပေးနိုင်ခဲ့တဲ့အတွက် ဝန်ထမ်းများ ရုံးလုပ်ငန်းများကို ပိုမိုထိရောက်စွာ ဆောင်ရွက်နိုင်မည်ဖြစ်ပါကြောင်း၊ တာဝန်ယူတည်ဆောက်ပေးခဲ့တဲ့ ကုမ္ပဏီမှ တာဝန်ရှိသူများကိုလည်း ဂုဏ်ပြုမှတ်တမ်းတင်ပါကြောင်း၊ ဝန်ထမ်းများအနေနဲ့ မိမိတို့ရုံးနဲ့အိမ်ရာအဆောက်အဦကို ရေရှည်တည်တံ့ခိုင်မြဲအောင် ထိန်းသိမ်းစောင့်ရှောက်ရန်နှင့် မိမိရုံး၊ မိမိအိမ်ရာဝန်းကျင် သန့်ရှင်းသာယာရေး စိမ်းလန်းစိုပြည်ရေးကို ဆောင်ရွက်ကြရန်လိုကြောင်း၊ ဧရာဝတီတိုင်းဒေသကြီး စာရင်းကောက်ယူရေးကော်မတီအနေဖြင့် ၂၀၁၉ -၂၀၂၀ ဘဏ္ဍာနှစ် ကလေးလုပ်သားဆိုင်ရာ စစ်တမ်းကို ပထမအကြိမ် ကွင်းဆင်းကောက်ယူခဲ့ပြီး အစီရင်ခံစာအား မြန်မာနိုင်ငံ ကလေးအလုပ်သမားပပျောက်ရေးဆိုင်ရာ အမျိုးသားကော်မတီသို့ တင်ပြနိုင်ခဲ့ပြီး ၂၀၂၂-၂၀၂၃ဘဏ္ဍာနှစ် ဒုတိယအကြိမ်က‌ေလးအလုပ်သမား ပပျောက်ရေး စစ်တမ်းကို ကွင်းဆင်းကောက်ယူရာမှာလည်း တိုင်းဒေသကြီးအစိုးရအဖွဲ့အနေဖြင့် ပေါင်းစပ်ညှိနှိုင်းဆောင်ရွက်ပေးခဲ့ရာ ၃၀.၆.၂၀၂၂ရက်နေ့မှာ ပြီးစီးခဲ့ကြောင်း၊ အလားတူ သဘာဝဘေးအန္တရာယ်ဆိုင်ရာ စစ်တမ်း၊ ကျေးလက်ဒေသဖွံ့ဖြိုးရေးနှင့် ဆင်းရဲနွမ်းပါးမှု လျှော့ချရေးဆိုင်ရာ ညွှန်းကိန်းများ၊  လူမှုစီးပွားဖွံ့ဖြိုးတိုးတက်မှုဆိုင်ရာ ညွှန်းကိန်းများ နှင့်အခြားသော စစ်တမ်းတွေ၊ စာရင်းအင်းတွေ ကောက်ယူတဲ့အခါမှာလည်း သက်ဆိုင်ရာဌာနတွေနဲ့ ပေါင်းစပ်ညှိနှိုင်းဆောင်ရွက်ပေးလျက်ရှိပါကြောင်း၊ နိုင်ငံရဲ့စီးပွားရေးဖွံ့ဖြိုးတိုးတက်မှုမှာ အရေးပါတဲ့ ညွှန်းကိန်းများဖြစ်တဲ့ စားသုံးသူဈေးဆနှုန်း(CPI)နဲ့ ငွေကြေးဖောင်းပွမှုနှုန်း(inflation)တို့ကိုတွက်ချက်တင်ပြရာမှာလည်း ကိန်းဂဏန်းအချက်အလက်များ မှန်ကန်ဖို့လို့ကြောင်း၊ မွေးဖွားမှု သေဆုံးမှုနဲ့ အခြားသောစစ်တမ်းတွေ ကောက်ယူရာမှာ မြေပြင်ကိန်းဂဏန်းမှန်ကန်‌စေရန် အတွက် မြေပြင်ရှိ မြို့နယ်အထွေထွေအုပ်ချုပ်ရေးဦးစီးဌာနအပါအဝင် ဌာနဆိုင်ရာ အသီးသီးမှ ပေါင်းစပ်ဆောင်ရွက်ပေးလျက်ရှိပါကြောင်း ပြောကြားသည်။ ထို့နောက် စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီးက အမှာစကားပြောကြားပြီး အဆောက်အဦဆိုင်ရာ အချက်အလက်များအား တိုင်းဒေသကြီးတာဝန်ခံ ဒေါ်ဆွေဆွေမြင့်က Power Pointဖြင့် ရှင်းလင်းတင်ပြပြီးနောက် စီမံကိန်းနှင့်ဘဏ္ဍာရေးဝန်ကြီးဌာန ဒုတိယ ဝန်ကြီးက တိုင်းဒေသကြီးဝန်ကြီးချုပ်အား ဂုဏ်ပြုမှတ်တမ်းလွှာပေးအပ်ခဲ့ပါသည်။ ဆက်လက်၍ Royal Ayar Creative & Construction Co.Ltdမှ ဗဟိုစာရင်းအင်းအဖွဲ့ရုံးနှင့်အိမ်ရာအဆောက်အဦဖွင့်ပွဲအထိမ်းအမှတ် လက်ဆောင်ပေးအပ်ခဲ့ရာ တိုင်းဒေသကြီးဝန်ကြီးချုပ်၊ စီမံကိန်းနှင်ဘဏ္ဍာရေးဝန်ကြီးဌာန ဒုတိယဝန်ကြီးနှင့် တိုင်းဒေသကြီးစီးပွားရေးရာဝန်ကြီးတို့က လက်ခံရယူခဲ့ပြီး တာဝန်ယူတည်ဆောက်ခဲ့သည့်ကုမ္ပဏီများအား ဒုတိယဝန်ကြီးက ဂုဏ်ပြုမှတ်တမ်းလွှာများ ပြန်လည်ပေးအပ်ခဲ့သည်။ ဆက်လက်၍ တိုင်းဒေသကြီးအစိုးရအဖွဲ့ ဝန်ကြီးချုပ်နှင့်အစိုးရအဖွဲ့ဝင် ဝန်ကြီးများနှင့် စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီးနှင့်အဖွဲ့တို့သည် ဧရာဝတီတိုင်းဒေသကြီးအစိုးရအဖွဲ့ အစည်းအဝေးခန်းမ(၁)တွင်  တိုင်းဒေသကြီးအတွင်း လူမှု စီးပွားဘဝ ဖွံ့ဖြိုးတိုးတက်ရေးလုပ်ငန်းများနှင့် ပတ်သက်၍ တွေ့ဆုံဆွေးနွေးခဲ့ကြောင်း သိရသည်။

ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ် ဦးတင်မောင်ဝင်းသည် ယနေ့ နေ့လည်ပိုင်းတွင် တိုင်းဒေသကြီးအစိုးရအဖွဲ့ဝင်များ၊ တိုင်းဒေသကြီး/ခရိုင်နှင့်မြို့နယ်အဆင့်ဌာနဆိုင်ရာများလိုက်ပါလျက် တက္ကသိုလ်ဝင်တန်းအောင်ချက်မြင့်မားရေးအတွက် ပြင်ပဖြေဆိုကြမည့် ကျောင်းသားကျောင်းသူများကိုအချိန်ပိုသင်ကြားပို့ချပေးလျက်ရှိသည့် ကျုံပျော်ခရိုင်အတွင်းရှိ အခြေခံပညာကျောင်းများသို့သွားရောက်၍ ကျောင်းသားကျောင်းသူများ၊ ဆရာ၊ဆရာမများနှင့်ရင်းရင်းနှီးနှီးတွေ့ဆုံအားပေးခဲ့ပါသည်။ ရှေးဦးစွာ ကျောင်းကုန်းမြို့၊ အမှတ်(၁) အခြေခံပညာအထက်တန်းကျောင်းသို့သွားရောက်၍ တက္ကသိုလ်ဝင်တန်းအောင်ချက်မြင့်မားရေးအတွက် ပြင်ပဖြေဆိုကြမည့် ကျောင်းသားကျောင်းသူများနှင့်တွေ့ဆုံအားပေးစကားများပြောကြားခဲ့ပြီး ကျောင်းသုံးဗလာစာအုပ်များ၊စာရေးကိရိယာများထောက်ပံ့ပေးအပ်ခဲ့ပါသည်။ ထို့နောက် အသုတ်မြို့ အခြေခံပညာအထက်တန်းကျောင်းသို့သွားရောက်၍ တက္ကသိုလ်ဝင်တန်းအောင်ချက်မြင့်မားရေးအတွက် ပြင်ပဖြေဆိုကြမည့် ကျောင်းသားကျောင်းသူများနှင့်တွေ့ဆုံအားပေးစကားများပြောကြားခဲ့ပြီး ကျောင်းသုံးဗလာစာအုပ်များ၊ စာရေးကိရိယာများထောက်ပံ့ပေးအပ်ခဲ့ပါသည်။  အလားတူ ရေကြည်မြို့ အခြေခံပညာအထက်တန်းကျောင်းသို့သွားရောက်၍ တက္ကသိုလ်ဝင်တန်းအောင်ချက်မြင့်မားရေးအတွက် ပြင်ပဖြေဆိုကြမည့် ကျောင်းသားကျောင်းသူများနှင့်တွေ့ဆုံအားပေးစကားများပြောကြားခဲ့ပြီး ကျောင်းသုံးဗလာစာအုပ်များ၊စာရေးကိရိယာများထောက်ပံ့ပေးအပ်ခဲ့ပါသည်။ ထို့နောက် ရေကြည်မြို့နယ်အခြေခံပညာကျောင်းအုပ်ကြီးများစီမံခန့်ခွဲမှုစွမ်းဆောင်ရည်မြင့်မားရေးအလုပ်ရုံဆွေးနွေးပွဲ တက်ရောက်နေသည့် ကျောင်းအုပ်ကြီးများတွေ့ဆုံခဲ့ကာ ကျောင်းအုပ်ကြီးများ၏ စီမံခန့်ခွဲမှု၊ ခေါင်းဆောင်မှုဆိုင်ရာအရည်အသွေးများတိုးတက်ကောင်းမွန်လာစေရေးလေ့လာဆွေးနွေးနိုင်တဲ့အတွက် များစွာအကျိုးရှိပါကြောင်း၊ မိမိတို့ကျောင်းများတွင်ဆွေးနွေးပွဲမှရရှိသည့် ရလဒ်များ၊ မူဝါဒများနှင့်ကိုက်ညီအောင်ဆောင်ရွက်ကြရမှာဖြစ်ပါကြောင်း၊ ကျောင်းဥပဓိရုပ်ကောင်းမွန်စေရေးအတွက် လိုအပ်သည်များဖြည်းဆည်းဆောင်ရွက်ပေးလျက်ရှိရာ ကျောင်းအုပ်ကြီးများအနဖြင့် မိမိတို့ကျောင်း၏ လိုအပ်ချက်များကိုလည်း တစ်ပါတည်းတင်ပြပေးစေလိုကြောင်းနှင့် တက္ကသိုလ်စာမေးပွဲအောင်ချက်မြင့်မားစေရေး အားသွန်ခွန်စိုက်ဆောင်ရွက်ပေးကြရန်ပြောကြားခဲ့ပြီး ကျောင်းအုပ်ကြီးများနှင့် ရင်းရင်းနှီးနှီးတွေ့ဆုံခဲ့ပါသည်။ ဆက်လက်၍ ငါးသိုင်းချောင်းမြို့၊ အခြေခံပညာအထက်တန်းကျောင်းသို့သွားရောက်၍ တက္ကသိုလ်ဝင်တန်းအောင်ချက်မြင့်မားရေးအတွက် ပြင်ပဖြေဆိုကြမည့် ကျောင်းသားကျောင်းသူများနှင့်တွေ့ဆုံအားပေးစကားများပြောကြားခဲ့ပြီး ကျောင်းသုံးဗလာစာအုပ်များ၊စာရေးကိရိယာများထောက်ပံ့ပေးအပ်ခဲ့ပါသည်။ ထို့နောက် ငါးသိုင်းချောင်းမြို့ရှိ ဝင်းဧရာဝါးတူစက်ရုံနှင့်  Aung Family သင်၊ ကြိမ်၊ ဝါး၊ ဗေဒါရိုး လက်မှုပစ္စည်းအရောင်းဆိုင်နှင့် ရေကြည်မြို့ရှိ ဒေါ်အေးနံ့သာ ကြိမ်အချောထည်လုပ်ငန်းများသို့သွားရောက်၍ ဝါးတူထုတ်လုပ်မှုအဆင့်ဆင့်နှင့် ဖြန့်ဖြူးရောင်းချနေမှု၊ သင်၊ ကြိမ်၊ ဝါး၊ ဗေဒါရိုးတို့ဖြင့်ပြုလုပ်သည့် ဖိနပ်၊ လက်ကိုင်အိတ်အမျိုးမျိုး၊ ခမောက်၊ ဦးထုတ်၊ခြင်း၊ တစ်ရှုးဘောက်၊ အလှပန်းအိုးထုတ်လုပ်ရောင်းချမှုအခြေအနေများ၊ ကြိမ်ဖြင့် အပူခံပြား၊ တစ်ရှူးဘောက်၊ခြင်း၊ထိုင်ခုံ၊ ပန်းအိုးများပြည်တွင်းပြည်ပဈေးကွက်များသို့ ထုတ်လုပ်ရောင်းချနေမှုများကိုကြည့်ရှုစစ်ဆေးခဲ့ပြီး ဒေသထွက်ကုန်ကြမ်းများအသုံးပြုမှု၊ ဒေသခံပြည်သူများအလုပ်အကိုင်အခွင့်အလမ်းရရှိမှုအခြေအနေများကိုမေးမြန်းခဲ့ပြီး လုပ်ငန်းမျတိုးချဲ့ဆောင်ရွက်နိုင်ရေး၊ လက်မှုပစ္စည်းများ ဆန်းသစ်တီထွင်ဆောင်ရွက်စေရေးမှာကြားခဲ့ပါသည်။ ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ရေကြည်မြို့နယ်ရှိ ကံကလေး(ပုသိမ်-မုံရွာ)လမ်း မိုင် ၁၉/၅၂၊ ဟင်္သာတ-နိဗ္ဗာန် သောင်ကြီး ကျုံပျော် ရေကြည် လမ်းမိုင် ၁၄/၀ ဆုံသည့်နေရာ Junction အား လမ်းချဲ့ခြင်း လုပ်ငန်းဆောင်ရွက်နေမှုများကိုကြည့်ရှုစစ်ဆေးခဲ့ပြီး လုပ်ငန်းများဆောင်ရွက်နေစဉ်ကာလအတွင်း ယာဉ်အန္တရာယ်ကင်းရှင်းစေရေး၊ လမ်းပုခုံးများစနစ်တကျရှိစေရေး၊ အရည်အသွေးပြည့်မီစေရေးအလေးထား ဆောင်ရွက်ရန် မှာကြားခဲ့ပါသည်။

ဧရာဝတီတိုင်းဒေသကြီးစီးပွားဖွံ့ဖြိုးမှုမြှင့်တင်ရေးနှင့် ပြည်ပပို့ကုန်တိုးမြှင့်ရေး အလုပ်ရုံဆွေးနွေးပွဲ အခမ်းအနားကို ယနေ့နံနက်ပိုင်းက ပုသိမ်မြို့၊ မြို့တော်ခန်းမ၌ ကျင်းပပြုလုပ်ရာ တိုင်းဒေသကြီးအစိုးရအဖွဲ့ဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများ၊ တိုင်းဒေသကြီးအဆင့် ဌာနဆိုင်ရာများ၊ စီးပွားရေးလုပ်ငန်းရှင်များနှင့်ဖိတ်ကြားထားသူများတတ်ရောက်ကြပါသည်။ ဦးစွာ တိုင်းဒေသကြီးဝန်ကြီးချုပ် ဦးတင်မောင်ဝင်းက အဖွင့်အမှာစကားပြောကြားရာ တိုင်းဒေသကြီး၏ စီးပွားဖွံ့ဖြိုးမှုမြှင့်တင်ရေးနှင့် ပြည်ပပို့ကုန်တိုးမြှင့်ရေးအတွက် ကျယ်ကျယ်ပြန့်ပြန့်ဆွေးနွေးနိုင်ရေး သက်ဆိုင်ရာဌာနဆိုင်ရာများ၊ လုပ်ငန်းရှင်များအားလုံးဖိတ်ကြားထားပါကြောင်း၊ အသေးစား၊ အငယ်စားနှင့် အလတ်စားစီးပွားရေးလုပ်ငန်းများ(MSMEs)မှ  စိုက်ပျိုးမွေးမြူရေးကိုအခြေခံသည့် ဒေသထွက်ကုန်ကြမ်းများအားအသုံးပြု၍ အရည်အသွေးပြည့်မီသည့်ကုန်ချောများထုတ်လုပ်ပြီး ပြည်တွင်းပြည်ပဈေးကွက်များသို့ တင်ပို့ရောင်းချနိုင်ရေးဆောင်ရွက်ရန်လိုပါကြောင်း၊ စိုက်ပျိုးရေးလုပ်ငန်းများအနေဖြင့် ပန်းတိုင်ရည်မှန်းချက်အထွက်နှုန်းရရှိစေရေးမိရိုးဖလာစိုက်ပျိုးမှုများအပြင်သိပ္ပံနည်းကျစနစ်တကျစိုက်ပျိုးနိုင်ရေး၊ မျိုးကောင်းမျိုးသန့်များအသုံးပြု၍ Eating Quality ပြည့်မီသည့် အရည်အသွေးပြည့်ဆန်များထုတ်လုပ်နိုင်ပြီး ပြည်တွင်း၊ပြည်ပဈေးကွက်ထိုးဖောက်နိုင်ရေးဆောင်ရွက်ကြရမှာဖြစ်ပါကြောင်း၊ မွေးမြူရေးနှင့်သားငါးထုတ်လုပ်နိုင်မှုတွင်လည်းတိုင်းဒေသကြီးအနေဖြင့် ကမ်းနီးကမ်းဝေးငါးဖမ်းလုပ်ငန်းများ၊မြစ်ချောင်းအင်းအိုင်များ၊ မွေးမြူရေးကန်များဖြင့် စနစ်တကျမွေးမြူခြင်း၊ နိုးစားနွား၊ အသားတိုးနွားများစနစ်တကျမွေးမြူခြင်း၊အသားတိုးဝက်စနစ်တကျမွေးမြူခြင်း၊ ဥစားကြက်၊အသားစားကြက်များစနစ်တကျမွေးမြူခြင်းစသည့်လုပ်ငန်းများဖြင့် ပြည်ပပို့ကုန်မြှင့်တင်နိုင်ရေးဆောင်ရွက်လျက်ရှိပါကြောင်း၊ ထင်းအစားထိုးလောင်စာ၊ စပါးခွံသုံးလောင်စာထုတ်လုပ်ခြင်းလုပ်ငန်းများ၊ လျှပ်စစ်ထုတ်လုပ်ခြင်းလုပ်ငန်းများကျယ်ကျယ်ပြန့်ပြန့်ဆောက်ရွက်ရန်လိုပါကြောင်း၊ဆင့်မြင့်စက်ရုံ၊ အလုပ်ရုံများ စနစ်တကျလည်ပတ်ဆောင်ရွက်နိုင်စေရေး ခရိုင်အလိုက် စက်မှုဇုန်များတည်ဆောင်ရွက်ကြရမှာဖြစ်ပါကြောင်း၊ ဆီဖူလုံမှုရှိစေရေးအတွက် ဆီထွက်သီးနှံ မြေပဲ၊ နှမ်းစိုက်ပျိုးခြင်းများအပြင် နေကြာတိုးချဲ့စိုက်ပျိုးနိုင်ရေး ဆောင်ရွက်လျက်ရှိပြီး ဖွဲနုဆီထုတ်လုပ်နိုင်ရေးအတွက် ဖွဲနုဆီစက်များလည်ပတ်နိုင်ရေးကြိုးစားဆောင်ရွက်လျက်ရှိပါကြောင်း၊ One Region One Product ထုတ်လုပ်နိုင်ရေး အရည်အသွေးမြင့်ကုန်ထုတ်လုပ်ငန်းများဖော်ထုတ်နိုင်ရေးဆောင်ရွက်ကြရန်လိုပါကြောင်းနှင့် ဧရာဝတီတိုင်းဒေသကြီးစီးပွားဖွံ့ဖြိုးမှုမြှင့်တင်ရေးနှင့် ပြည်ပပို့ကုန်တိုးမြှင့်ရေးတက်ရောက်လာကြသူများမှ သက်ဆိုင်ရာကဏ္ဍအလိုက် အသေးစိတ်ဆွေးနွေးပေးကြစေလိုကြောင်းပြောကြားပါသည်။ ထို့နောက် ဧရာဝတီတိုင်းဒေသကြီးအစိုးရအဖွဲ့၊ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးမိုးမင်းနိုင်က စိုက်ပျိုးရေး၊ မွေးမြူရေးနှင့် ဆည်မြောင်းလုပ်ငန်းများနှင့်ပတ်သက်၍ဆွေးနွေးပြောကြားခဲ့ပြီး ဧရာဝတီတိုင်းဒေသကြီးအစိုးရအဖွဲ့၊ စီးပွားရေးရာဝန်ကြီး ဦးတင်အေးက အလုပ်ရုံဆွေးနွေးပွဲ ဖြစ်ပေါ်လာပုံကို ဆွေးနွေးပြောကြားခဲ့ကာ တိုင်းဒေသကြီးဝန်ကြီးချုပ်မှ လိုအပ်သည်များဖြည့်စွက်ဆွေးနွေးမှာကြားခဲ့ပါသည်။ ထို့နောက် တိုင်းဒေသကြီးဌာနဆိုင်ရာများနှင့် အလုပ်ရုံဆွေးနွေးပွဲတက်ရောက်လာကြသူများက တိုင်းဒေသကြီးစီးပွားဖွံ့ဖြိုးမှုမြှင့်တင်ရေးနှင့် ပြည်ပပို့ကုန်တိုးမြှင့်ရေးအလုပ်ရုံ ဆွေးနွေးပွဲအား ဆက်လက်ဆွေးနွေးခဲ့ကြကြောင်းသိရှိရသည်။