ဧရာဝတီတိုင်းဒေသကြီး၊ပုသိမ်မြို့၊မြို့တော်ခန်းမ၌ အမျိုးသမီးများအပေါ်အကြမ်းဖက်မှုပပျောက်ရေး (၁၆)ရက်တာလှုပ်ရှားမှုအခမ်းအနားအား ယနေ့ညနေပိုင်းကပြုလုပ်ရာ တိုင်းဒေသကြီးဝန်ကြီးချုပ်ဦးတင်မောင်ဝင်းနှင့်ဇနီး၊အစိုးရအဖွဲ့ဝင် ဝန်ကြီးများနှင့် ဇနီးများ၊ဌာနဆိုင်ရာများနှင့် လူမှုရေးအသင်းအဖွဲ့များတက်ရောက်ခဲ့ကြသည်။ အမျိုးသမီးများအပေါ်အကြမ်းဖက်မှုပပျောက်ရေး (၁၆)ရက်တာလှုပ်ရှားမှုအခမ်းအနားတွင် တိုင်းဒေသကြီး ဝန်ကြီးချုပ်က“၁၉၉၁ ခုနှစ်ကစပြီး နှစ်စဉ်နိုဝင်ဘာလ (၂၅)ရက်ကို အမျိုးသမီးများ အပေါ်အကြမ်းဖက်မှုရပ်တန့်ရေးနေ့ (Elimination of Violenceagainst Women Day ) (ဖဲကြိုးဖြူ နေ့)ကို ကျင်းပခဲ့ကြပါကြောင်း၊ ဖဲကြိုးဖြူကိုတပ်ဆင်ရခြင်း အဓိပ္ပာယ်သည်  အမျိုးသမီးတွေအပေါ်ကိုယ်တိုင်လည်း အကြမ်းမဖက်ဘူး၊ အကြမ်းဖက်မှုတွေကိုလည်းတတ်နိုင်သမျှ ကာကွယ်တားဆီးပေးမယ်လို့ ဆိုလိုခြင်းဖြစ်ပါကြောင်း၊အမျိုးသမီးများနှင့် မိန်းကလေးငယ်များအပေါ် အကြမ်းဖက်မှုသည် လူ့အဖွဲ့အစည်းတိုင်းတွင် ရှိနေသကဲ့သို့ မတူညီသောအခြေအနေများ၌ မတူညီသောပုံစံများဖြင့်ရှိနေပါကြောင်း၊အမျိုးသမီးများအပေါ် အကြမ်းဖက်မှု တားဆီးကာကွယ်ရေး လှုံ့ဆော်မှုများသည် အိမ်တွင်းအကြမ်းဖက်ခံရမှုအပေါ် အာရုံစိုက်လာပြီး အမျိုးသမီးများနှင့် မိန်းကလေးငယ်များအပေါ် အကြမ်းဖက်မှုအား လျော့နည်း ပပျောက်သွားစေမှာဖြစ်ပါကြောင်း၊ပြဿနာဆိုသည်မှာ မဖြစ်ခင်ကြိုတင်တားဆီးနိုင်မှ ဆုံးရှုံးနစ်နာမှုမရှိမှာဖြစ်ကြောင်း၊ကာကွယ်စောင့်ရှောက်ရန်လိုအပ်သည့် အမျိုးသမီးများနှင့် မိန်းကလေးငယ်များအား သင်တန်းကျောင်းအခြေပြုနှင့် ရပ်ရွာအခြေပြုဆိုပြီး နည်းလမ်းနှစ်သွယ်ဖြင့် ဆောင်ရွက်ပေးရာတွင် ၎င်းတို့၏ စိတ်ပိုင်းဆိုင်ရာ၊ရုပ်ပိုင်းဆိုင်ရာ လုံခြုံစိတ်ချမှုရှိရန် အရေးကြီးပါကြောင်း၊ သင်တန်းကျောင်း၌ စောင့်ရှောက်သူများထက် ရပ်ရွာထဲ၌ စောင့်ရှောက်ထားသည့်သူများအတွက် လုံခြုစိတ်ချမှုရှိစေရန် ရပ်ရွာ၌ရှိသည့် အုပ်ချုပ်သူများ၊ရပ်မိ၊ရပ်ဖများက အလေးထားပြီး ဝိုင်းဝန်းစောင့်ရှောက်ရမှာ ဖြစ်ပါကြောင်း၊ထို့အပြင် အကြမ်းဖက်ခံရသူအတွက် စိတ်ပိုင်းဆိုင်ရာ ပံ့ပိုးပေးမှု၊နှစ်သိမ့်ဆွေးနွေးပေးမှု၊ကျန်းမာရေးဝန်ဆောင်မှု၊ ဥပဒေရေးရာဝန်ဆောင်မှု၊ လူမှုရေးဝန်ဆောင်မှုနှင့် နားခိုရန်နေရာတို့ကိုလည်း စီစဉ်ဆောင်ရွက်ပေးနိုင်ရန် ဌာနဆိုင်ရာအချင်းချင်းချိတ်ဆက် ဆောင်ရွက်ပေးရမှာဖြစ်ပါကြောင်း၊ အကြမ်းဖက်ခံရသောအမျိုးသမီးများ နားခိုရန် center ကိုတည်ဆောက်နိုင်ဖို့ မြေနေရာချထားပေးပြီးဖြစ်ကြောင်း၊ယနေ့ကျင်းပသည့် အမျိုးသမီးများအပေါ် အကြမ်းဖက်မှုပပျောက်ရေး (၁၆) ရက်တာ လှုပ်ရှားမှုသည် နိုဝင်ဘာလ(၂၅)ရက်နေ့မှ ဒီဇင်ဘာလ(၁၀)ရက် နေ့အထိသာလှုပ်ရှားမှု မဟုတ်ဘဲ အသက်ရှင်နေသည့်ကာလ တစ်‌ေလျှာက်လုံး အကြမ်းဖက်မှုကင်းဝေးပြီး နိုင်ငံတော် ဖွံ့ဖြိုးတိုးတက်ရေး ကဏ္ဍများ၌ ပါဝင်ဆောင်ရွက်ခွင့် ရရှိရေး ပံ့ပိုးကူညီဆောင်ရွက်သွားရမှာဖြစ်ပါကြာင်း၊ ယခုနှစ်၏ဆောင်ပုဒ်ဖြစ်သော " အမျိုးသမီးများအပေါ်အကြမ်းဖက်မှု အဆုံးသတ်ရေး အားလုံးပေါင်းစုလှုပ်ရှားပေး" ဆိုသကဲ့သို့ အားလုံးပူးပေါင်း ဆောင်ရွက်မှသာလျင် ကျား၊ မ တန်းတူညီမျှမှု မြင့်တက်လာပြီး ခွဲခြားဆက်ဆံမှု ပပျောက်ကာ အကြမ်းဖက်မှုများ လျော့နည်းပပျောက်မည်ဖြစ်ပါကြောင်း”ပြောကြားသည်။ ယင်းနောက် တိုင်းဒေသကြီးဝန်ကြီးချုပ်က နိုင်ငံတော်အဆင့် ကျင်းပပြုလုပ်ခဲ့သည့် အမျိုးသမီးများအပေါ်အကြမ်းဖက်မှုပပျောက်ရေး (၁၆)ရက်တာလှုပ်ရှားမှု ဆောင်းပါးပြိုင်ပွဲတွင် နှစ်သိမ့်ဆုရရှိသူတစ်ဦးအား ဆုချီးမြှင့်ခဲ့ပြီး အမျိုးသမီးများ ဘဝတစ်လျောက် အကြမ်းဖက်ခံရမှုနှင့်ပတ်သက်သည့် အသိပညာပေး Video Clip ပြသမှုအားကြည့်ရှု၍  စုပေါင်းမှတ်တမ်းတင်ဓာတ်ပုံများ ရိုက်ကူးခဲ့ကြောင်းသိရသည်။

တိုင်းရင်းသားဘာသာစကားသင် ဆရာ၊ဆရာမများအတွက် အရည်အသွေးမြှင့်အထောက်အကူဆွေးနွေးပွဲ သင်တန်းဆင်းပွဲအခမ်းအနားအား ယနေ့နံနက်ပိုင်းတွင် ပုသိမ်ပညာရေးဒီဂရီကောလိပ်၊မြောင်းမြပညာရေးဒီဂရီကောလိပ်နှင့်ဘိုကလေးပညာရေးဒီဂရီကောလိပ်၌ ပြုလုပ်ရာ တိုင်းဒေသကြီး ဝန်ကြီးချုပ်ဦးတင်မောင်ဝင်း၊အစိုးရအဖွဲ့ဝင် ဝန်ကြီးများ၊ ပညာရေးဒီဂရီကောလိပ်အသီးသီးမှ ဆရာ၊ဆရာများနှင့် တိုင်းရင်းသားဘာသာစကား သင် ဆရာ၊ဆရာမများ တက်ရောက်ခဲ့ကြသည်။ အခမ်းအနားများတွင် တိုင်းဒေသကြီး ဝန်ကြီးချုပ်က "ယခုသင်တန်းအား နိုင်ငံတစ်ဝှမ်း လုံးရှိ ပညာရေးဒီကရီကောလိပ်များတွင် ဖွင့်လှစ်ဆွေးနွးခဲ့ပါကြောင်း၊ ဧရာဝတီတိုင်းဒေသကြီးတွင် တိုင်းရင်းသားလူမျိုးပေါင်းစုံ မှီတင်းနေထိုင်လျက်ရှိပါကြောင်း၊တိုင်းရင်းသားဘာသာ စကားသင် ဆရာ/ဆရာမများ အနေဖြင့်မိမိတတ်ကျွမ်းသည့် ဘာသာရပ် များအပြင် အခြားလိုအပ်သော ဘာသာရပ်များကိုလည်း တစ်ဖက်တစ်လမ်းမှ အားဖြည့်သင်ကြားပေးလျက်ရှိသည်ကို သိရှိရသည့်အတွက် ဝမ်းသာဂုဏ်ယူမိပါကြောင်း၊သင်တန်းသား ဆရာ၊ဆရာမများအနေဖြင့် မိမိ၏ တပည့်သားသမီးများအား မတတ်သည်များကို တတ်အောင်၊  မသိတာသည်များကို သိအောင်၊ နားမလည် သည်များကို နားလည်အောင်၊ မကျွမ်းကျင်သည်များကို ကျွမ်းကျင်အောင်၊ မလိမ္မာသည်များကို လိမ္မာအောင်၊ လမ်းမှားရောက်နေသည်များကို လမ်းမှန်ရောက်စေရန်အတွက် သွန်သင်ဆုံးမပေးရမှာ ဖြစ်ပါကြောင်း၊  ဆရာ/ဆရာမများသည် လက်ဦးဆရာ ပုံသွင်းသူများဖြစ်သဖြင့် တပည့်များကိုလမ်းမှန်​ရောက်​အောင် လမ်းပြရမည်ဖြစ်​ကြောင်း၊ သင်တန်းတွင် ဆွေးနွေးခဲ့သည့် အကြောင်းအရာများကိုလည်း မိမိတာဝန်ကျရာဒေသများတွင် ဆင့်ပွားမျှဝေခြင်း ထပ်ဆင့်ဆွေးနွေးခြင်းများ ဆောင်ရွက်ပေးကြရန် တိုက်တွန်းလိုပါကြောင်း၊  ရရှိလာသည့် ရလဒ်များကိုလည်း လက်တွေ့ အကောင်အထည်ဖော် ဆောင်ရွက်ကြရန် လိုပါကြောင်း၊ "ဆရာ၊ ဆရာမများသည် အမြဲမပြတ်သင်ယူ လေ့လာနေသည့် ထာဝရကျောင်းသားကြီးများဖြစ်သည်"ဆိုသည့်အတိုင်း စာ​ပေပညာရပ်များကို အစဥ်အမြဲ​လေ့လာ​နေဖို့လိုအပ်​ကြောင်း၊ တပည့်​တွေရဲ့ စွမ်းရည်သတ္တိ ကိုယ်ရည်ကိုယ်​သွေးများကို မြှင့်တင်​ပေးရမှာဖြစ်​ကြောင်း၊ လက်ဦးဆရာ​ကောင်းမှ တပည့်​တွေရဲ့ ဘဝ ​ကောင်းမွန်မှာဖြစ်​ကြောင်း၊ ​​​ခေတ်မီဖွံ့ဖြိုးတိုးတက်​သောနိုင်ငံ​တော်တည်​ဆောက်ရာတွင် ပညာ​ရေးဖြင့်ရင်းနှီးမြှုပ်နှံရမှာဖြစ်​ကြောင်း၊ဆရာ၊ဆရာမများသည် ကျောင်းသား၊ ကျောင်းသူများ၏ စံနမူနာပြ ဖြစ်ဖို့ လိုပါကြောင်း၊ ပြည်ထောင်စုစိတ်ဓာတ် အရင်းတည်ပြီး နိုင်ငံတော်ရဲ့ အနာဂတ်ခေါင်းဆောင်များ ဖြစ်လာမည့် တပည့်များအား အရည်အချင်းပြည့်ဝသည့် လူတော်လူကောင်းများဖြစ်အောင် လမ်းပြသွန်သင်‌ေပးကြရန်နှင့်တက္ကသိုလ်ဝင်တန်း​အောင်ချက်မြင့်မား​ရေးအတွက် ဝိုင်းဝန်း​ဆောင်ရွက်ရန် တိုက်တွန်း‌ပါ‌ကြောင်း၊" ပြောကြားခဲ့သည်။ ထို့နောက် တိုင်းရင်းသားဘာသာစကားသင်ဆရာ၊ဆရာမများအား သင်တန်းဆင်းလက်မှတ်များနှင့် ဂုဏ်ပြု ထောက်ပံ့ငွေများ အသီးသီးပေးအပ်ခဲ့ပြီး သင်တန်းသား သင်တန်းသူ ဆရာ ဆရာမများ၏တိုင်းရင်းသားရိုးရာအကများဖြင့် ဧည့်ခံဖျော်ဖြေမှုအား ကြည့်ရှုအားပေးခဲ့ပြီး တိုင်းဒေသကြီးဝန်ကြီးချုပ်သည် မြောင်းမြပညာရေးဒီဂရီကောလိပ်၌ သင်တန်းသား သင်တန်းသူ ဆရာ ဆရာမများနှင့် နေ့လည်စာ အတူတကွ သုံးဆောင်ခဲ့ကြောင်း သိရသည်။ အဆိုပါသင်တန်းများတွင် ပုသိမ်ပညာရေးဒီဂရီကောလိပ်၌ ပုသိမ်၊ ကန်ကြီးထောင့်နှင့် သာပေါင်းမြို့နယ်များအပါအဝင် မြို့နယ်(၇)မြို့နယ်မှ  တိုင်းရင်းသားဘာသာစကားသင် ဆရာ၊ဆရာမ (၃၇၂)ဦး၊ ဘိုကလေးပညာရေးဒီကရီကောလိပ်၌ ဖျာပုံ၊ဘိုကလေး၊ကျိုက်လတ်မြို့နယ်အပါအဝင် မြို့နယ်(၁၀)မြို့နယ်မှ တိုင်းရင်းသား ဘာသာစကားသင် ဆရာ/ဆရာမ (၁၃၇)ဦးနှင့် မြောင်းမြပညာရေးဒီဂရီကောလိပ်၌ မြောင်းမြ၊အိမ်မဲ၊ဝါးခယ်မြို့နယ်များ အပါအဝင် မြို့နယ်(၁၂)မြို့နယ်မှ တိုင်းရင်းသား ဘာသာစကားသင် ဆရာ၊ဆရာမ (၄၀၀)ဦးတို့ အသီးသီးတက်ရောက်ခဲ့ကြကြောင်း သိရသည်။

ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်းသည် အစိုးရအဖွဲ့ဝင် ဝန်ကြီးများ လိုက်ပါလျှက် ကျောင်းကုန်းမြို့နယ်၊ ပေါက်ဆိန်ပဲ့ကျေးရွာတွင် မဲခေါင်-လန်ချန်း ပူးပေါင်းဆောင်ရွက်မှုအထူးရန်ပုံငွေဖြင့် သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ ဆောင်ရွက်သည့် ပြည်သူအခြေပြုရေသန့်စင်စနစ်နှင့် အိမ်သွယ်ရေတိုင်စနစ်ပါဝင်သော ကျေးရွာရေရရှိရေးစီမံကိန်း မိတ်ဆက်ရှင်းလင်းပွဲ အခမ်းအနားသို့တက်ရောက်ခဲ့ပြီး တိုင်းဒေသကြီး ဝန်ကြီးချုပ်က "နိုင်ငံတော်အစိုးရအနေဖြင့် ပြည်သူများလူမှုစီးပွားဘဝဖွံ့ဖြိုး တိုးတက်စေရေး၊ မြို့ပြနှင့်ကျေးလက်ဒေသများအကြားကွာဟချက် ကျဉ်းမြောင်းစေရေးတို့အတွက် ဘက်စုံ၊ ကဏ္ဍစုံမှ အကောင်အထည်ဖော် ဆောင်ရွက်ပေးလျက်ရှိပါကြောင်း၊  မဲခေါင်-လန်ချန်း ပူးပေါင်းဆောင်ရွက်မှုအထူးရန်ပုံငွေနဲ့ ကျောင်းကုန်း၊ မြောင်းမြ၊ ဒေးဒရဲမြို့နယ်အတွင်းက ကျေးရွာ(၁)ရွာစီမှာ “ပြည်သူအခြေပြု ရေသန့်စင်စနစ်နှင့် အိမ်သွယ်ရေတိုင်စနစ်ပါဝင်သော ကျေးရွာရေရရှိရေး စီမံကိန်း”ကို ဆောင်ရွက်သွားမှာ ဖြစ်ကြောင်း၊ ကျေးရွာသူ/သားများအတွက် သန့်ရှင်းသော သောက်သုံးရေရရှိလာစေပြီး တစ်ကိုယ်ရည်ကျန်းမာရေးနှင့် သန့်ရှင်းရေး အတွက်လည်း များစွာ အကျိုးကျေးဇူးရရှိစေနိုင်သည့်အပြင် အိမ်သွယ်ရေတိုင်တပ်ဆင်ခြင်း အားဖြင့်လည်း ရေလေလွင့် ဆုံးရှုံးမှုနည်းပါးလာမှာဖြစ်ပါကြောင်း၊ တိုင်း​ဒေသကြီးအစိုးရအဖွဲ့ အ​နေဖြင့်အမျိုးသား​ရေးလုပ်ငန်းစဥ် ၂ ရပ် ဖြစ်သည့်တိုင်းပြည်သာယာ၀​ပြော​ရေးနှင့် စား​ရေရိက္ခာဖူလုံ​စေ​ရေးအတွက် ကြိုးပမ်း​ဆောင်ရွက်လျက်ရှိပါ​ကြောင်း၊ နိုင်ငံ့စီးပွားမြှင့်တင်​ရေး ရန်ပုံ​ငွေဖြင့်​ လယ်ယာကဏ္ဍဖွံ့ဖြိုးတိုးတက်​စေ​ရေး နွေစပါးနှင့် ပဲတီစိမ်းစိုက်​ တောင်သူများကို သွင်းအားစုများ​ ထောက်ပံ့​ပေးနိုင်​ရေး​ ဆောင်ရွက်ပေးနေပါ​ကြောင်း၊ တိုင်းဒေသကြီးအတွင်း စိုက်ပျိုးရေရရှိရေး ဆောင်ရွက်ပေးလျက်ရှိရာ ရိုးပြတ်ကျန် ဧကများပေါ်တွင် နွေစပါး၊ ပဲ၊ ဆီထွက်သီးနှံနေကြာများ ပိုမိုတိုးချဲ့ စိုက်ပျိုးကြရန်၊  မိမိတို့တိုင်းဒေသကြီး စားသုံးဆီဖူလုံမှုရှိစေရေး အတွက် ဝိုင်းဝန်းကြိုးပမ်းဆောင်ရွက်ရန်" ပြောကြားခဲ့သည်။ ထို့နောက် ကျေးလက်ဒေသဖွံ့ဖြိုးတိုးတက်ရေးဦးစီးဌာန ဒုတိယညွှန်ကြားရေးမှူးချုပ်နှင့် တိုင်းဒေသကြီးဦးစီးမှူးတို့က စီမံကိန်းလုပ်ငန်းဆိုင်ရာအချက်အလက်များအား ရှင်းလင်းပြောကြားခဲ့ကြပြီး ကျေးရွာဒေသခံကိုယ်စားလှယ်တစ်ဦးမှ ကျေးဇူးတင်စကား ပြန်လည်ပြောကြားပြီးနောက် တိုင်းဒေသကြီးဝန်ကြီးချုပ်နှင့်တာဝန်ရှိသူများမှ စီမံကိန်း ဆိုင်းဘုတ်အား စက်ခလုပ်နှိပ်ဖွင့်လှစ်ပေးခဲ့ပြီး အမွှေးနံ့သာပက်ဖြန်းပေးခဲ့ကာ အမှတ်တရ မှတ်တမ်းတင် ဓါတ်ပုံရိုက်ကူးခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် ရေကြည်မြို့၊ ရေကြည်ဦး ရိပ်သာသို့ရောက်ရှိ၍ မြို့နယ်ကျေးလက်လမ်းဖွံ့ဖြိုးရေးဦးစီးဌာနမှ ဆောင်ရွက်မည့် ဆီဆုံကုန်း-ကြို့ကုန်း-လှေဆွဲရိုး-မဲဇလီကုန်းလမ်း  (၂ မိုင် ၇.၂ ဖာလုံ) ဆောင်ရွက်နေမှုအခြေအနေများအား တိုင်းဒေသကြီးကျေးလက်လမ်းဦးစီးဌာန၊ ညွှန်ကြားရေးမှူးနှင့် ကျုံပျော်ခရိုင်ကျေးလက်လမ်းဦးစီးဌာန၊ လက်ထောက် ညွှန်ကြားရေးမှူးတို့က ရှင်းလင်းတင်ပြခဲ့ရာ တိုင်းဒေသကြီးဝန်ကြီးချုပ်က လိုအပ်သည်များ ပေါင်းစပ်ဆောင်ရွက်ပေးခဲ့ကြောင်း သတင်းရရှိသည်။

ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်းသည် အစိုးရအဖွဲ့ဝင် ဝန်ကြီးများ လိုက်ပါလျှက် ယနေ့နံနက်ပိုင်းက ကျောင်းကုန်းမြို့နယ်၊ သဲကုန်ကျေးရွာ၊ တောင်သူ ဦးမင်းစိန်၏ လယ်မြေ ၁၂ ဧကတွင် ရေဆင်း၁ စပ်မျိုးနေကြာ သီးသန့်စိုက်ပျိုးနေမှုအား ကြည့်ရှုအားပေးခဲ့ ကာ ဒေသခံတောင်သူများနှင့် ရင်းရင်းနှီးနှီးတွေ့ဆုံခဲ့ပြီး နွေစပါး၊ ပဲအမျိုးမျိုး၊ နေကြာ စိုက်ပျိုး ပြီးစီးမှုအခြေအနေများ၊ စိုက်ပျိုးရေရရှိမှုအခြေအနေများ၊ သစ်စိမ်းမြေသြဇာ (ပိုက်ဆံလျှော်) ထည့်သွင်းစိုက်ပျိုးမှုအခြေအနေများနှင့် ဓါတ်မြေသြဇာသုံးစွဲမှုအခြေအနေများအား မေးမြန်းခဲ့ပြီးနောက် ဒေသခံတောင်သူများ၏ လိုအပ်ချက်များတင်ပြခဲ့မှုအပေါ် တိုင်းဒေသကြီး ဝန်ကြီးချုပ် မှ ဌာနဆိုင်ရာများနှင့်ပေါင်းစပ်ဆောင်ရွက်ပေးခဲ့သည်။

ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများနှင့် ဌာနဆိုင်ရာများသည် ပုသိမ်တက္ကသိုလ် Recreation Centre ဖွင့်ပွဲနှင့် အနုပညာအသင်းအတွက် တူရိယာပစ္စည်းများထောက်ပံ့ပေးအပ်ပွဲ အခမ်းအနားသို့ တက်ရောက်၍ “၂၀၂၂ ခုနှစ်၊ တက္ကသိုလ်ဝင်စာမေးပွဲအောင်မြင်ခဲ့ကြသည့် ကျောင်းသား၊ ကျောင်းသူများ စတင်ကျောင်းတက်ရောက်သည့်နေ့တွင် တက္ကသိုလ်၏အင်္ဂါရပ်နှင့် ပိုမိုပြည့်စုံစေရန် Recreation Centreအားဖွင့်လှစ်ပေးခြင်းဖြစ်ပါကြောင်း၊ ယခင် စာကြည့်တိုက်အဆောက်အဦအား ပြန်လည်ပြုပြင်၍ ဆောင်ရွက်ပေးခြင်း ဖြစ်ပါကြောင်း၊ တက္ကသိုလ်များတွင် စာပေ၊ ဂီတ၊ အနုပညာ နှင့် အားကစား ဘက်စုံထူးချွန်သော ဘွဲ့ရပညာတတ် များကို မွေးထုတ်ပေးလျက်ရှိပါကြောင်း၊ မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲများတွင်လည်း အဆင့်မြင့်ပညာ အဆင့်မှ တိုင်းဒေသကြီးဂုဏ်ဆောင် အနုပညာရှင်များ ပေါ်ထွက်လာရန် ရည်ရွယ်ပါကြောင်း၊  တက္ကသိုလ်ကြီး၏ အရိပ်ကိုခိုလှုံ၍ ပညာဆည်းပူးကြမည့် ကျောင်းသား၊ ကျောင်းသူများသည် ဘာသာရပ်အသီးသီးကို လေ့လာဆည်းပူးရင်းဖြင့် ဝါသနာပါရာအလိုက် လေ့လာဆည်းပူး သင်ကြားခွင့် ရရှိပြီး ဘက်စုံထူးချွန်သော ဘွဲ့ရပညာတတ်များ ဖြစ်ပါစေကြောင်း "ပြောကြားကာ အဆောက်အဦအား တာဝန်ရှိသူများနှင့်အတူဖဲကြိုးဖြတ်ဖွင့်လှစ်ပေးသည်။  ယင်းနောက် တိုင်းဒေသကြီးဝန်ကြီးချုပ်သည် အနုပညာအသင်းခန်းမအား လှည့်လည်ကြည့်ရှုစစ်ဆေးပြီး (၂၃)ကြိမ်မြောက် မြန်မာ့ရိုးရာ ယဉ်ကျေးမှု အဆို၊ အက၊ အရေး၊ အတီးပြိုင်ပွဲ ဗဟိုအဆင့်၌ ဆုရရှိခဲ့သော ကျောင်းသား၊ ကျောင်းသူများနှင့် အနုပညာအသင်းဝင်များ၏ ဖျော်ဖြေတင်ဆက်မှုအား ကြည့်ရှုအားပေးခဲ့သည်။ ဆက်လက်၍တိုင်းဒေသကြီး ဝန်ကြီးချုပ်သည် ပုသိမ်တက္ကသိုလ် အနုပညာအသင်းသို့  တူရိယာ ပစ္စည်းများ ပေးအပ်ခဲ့ရာ ပုသိမ်တက္ကသိုလ် ပါမောက္ခချုပ်နှင့် အနုပညာအသင်းဥက္ကဋ္ဌတို့မှ လက်ခံခဲ့ကြောင်း သိရသည်။