ဧရာဝတီတိုင်းဒေသကြီး၊ ပုသိမ်ပြည်သူ့ဆေးရုံကြီး အစည်းအဝေးခန်းမ၌ အပတ်စဉ်(၃)၊ အကူသူနာပြု(ပြင်ပ)(၉)လသင်တန်းဆင်းပွဲအခမ်းအနားကို ယနေ့နံနက်ပိုင်းက ပြုလုပ်ခဲ့ရာ အခမ်းအနားသို့ တိုင်းဒေသကြီးအစိုးရအဖွဲ့ဝန်ကြီးချုပ် ဦးတင်မောင်ဝင်း၊ တိုင်းဒေသကြီးအစိုးရ အဖွဲ့ဝင်ဝန်ကြီးများ၊ တိုင်းဒေသကြီးကုသရေးဦးစီးဌာနမှ တာဝန်ရှိသူများ၊ ပုသိမ်ပြည်သူ့ဆေးရုံ ကြီးမှ တာဝန်ရှိသူများ၊ သူနာပြုနှင့်သားဖွားသင်တန်းကျောင်းမှ ကျောင်းအုပ်ကြီးနှင့် ဆရာ၊ ဆရာမများ၊ သင်တန်းသား၊ သင်တန်းသူများတက်ရောက်ခဲ့ကြသည်။ သင်တန်းဆင်းပွဲတွင် တိုင်းဒေသကြီးဝန်ကြီးချုပ်က“အပတ်စဉ်(၃)၊ အကူသူနာပြု(ပြင်ပ) (၉)လသင်တန်းမှ ပြည်သူများအား ကျန်းမာရေးစောင့်ရှောက်မှုပေးနိုင်မည့် သင်တန်းသား၊ သင်တန်းသူ (၃၂)ဦးအား မွေးထုတ်ပေးနိုင်ခဲ့ပါကြောင်း၊ အကူသူနာပြုပညာကို စာတွေ့၊ လက်တွေ့လေ့လာသင်ယူပြီး အရည်အချင်းပြည့်ဝစွာဖြင့် အောင်မြင်ခဲ့ကြ၍ ထိုက်တန်သည့် အကူသူနာပြု သင်တန်းဆင်းလက်မှတ်ကို လက်ခံရရယူရမှာဖြစ်ပါကြောင်း၊ ပညာရေးဘက်တွင် ထူးချွန်ရုံသာမက လက်တွေ့လုပ်ဆောင်မှု စွမ်းရည်မှာလည်း မြင့်မားရန်လိုအပ်ပါကြောင်း၊ လူနာများအပေါ်တွင်လည်း ဝါသနာ၊ စေတနာ၊ အကြင်နာ၊ ဂရုဏာ၊ စာနာမှု၊ အနစ်နာခံမှုများ စသည့် နာ(၆)နာနှင့်အတူ ပြုစုစောင့်ရှောက်ပေးရန်လိုအပ်ပါကြောင်း၊ သင်တန်းသား၊ သင်တန်းသူများသည် အကူသူနာပြုအလုပ်ကို ဂုဏ်ယူစွာ၊ ကျေနပ်စွာဖြင့် အကောင်းဆုံး လုပ်ဆောင်ခဲ့ကြပါကြောင်း၊ ထိုကဲ့သို့ ကောင်းမွန်သည့် အစဉ်အလာများကို ဆက်လက်ထိန်းသိမ်း သွားကြရန် တိုက်တွန်းပါကြောင်း၊ အကူသူနာပြုများသည် ပြည်သူထဲမှ ပေါက်ဖွားလာကြ သည်နှင့်အညီ ပြည်သူကိုအလုပ်အကျွေးပြုရန် အဓိကဟုခံယူထားပြီး ဖြစ်ပါကြောင်း၊ ထို့အပြင် လုပ်ငန်းခွင်တွင်လည်း သူနာပြုများကိုကူညီပြီး လူနာပြုစုသည့်နေရာများတွင် တစ်ထောင့် တစ်နေရာမှပါဝင်ပြီး ရှေ့ယခင် အကူသူနာပြုများနည်းတူ ပြစုစောင့်ရှောက်ပေးရန် မှာကြား လိုပါကြောင်း၊ ပြည်သူကို ဗဟိုပြုသော ကျန်းမာရေးစနစ်ကို အောင်မြင်အောင် ဖော်ဆောင်ရန် အကူသူနာပြုများက ပါဝင်ရန်လိုအပ်ပြီး အကူသူနာပြုများ ကိုယ်တိုင်ကလည်း အရည်အသွေး ပြည့်မီအောင်၊ ကိုယ်ရည်ကိုယ်သွေး ထက်မြတ်ထူးချွန်အောင် လူမူဝန်းကျင်မှာ ပြေလည်ညီညွတ် မျှတအောင် နေတတ်ရန် ကိုယ်တိုင်သင်ယူလေ့ကျင့်ကြရန် အလေးအနက်ထား ပြောကြားလို ပါကြောင်း၊ အကူသူနာပြုများသည် ကျန်းမာရေးဝန်ဆောင်မှု လုပ်ငန်းများကို ကြိုးပမ်း ဆောင်ရွက်သွားကြရန်”အဖွင့်အမှာစကားများပြောကြားခဲ့ပြီး သင်တန်းတွင် ထူးချွန်သူ သင်တန်းသား၊ သင်တန်းသူများကို ဆုများချီးမြှင့်ခဲ့သည်။ ဆက်လက်၍ အပတ်စဉ်(၃)၊ အကူသူနာပြု(ပြင်ပ) (၉)လသင်တန်းသား၊ သင်တန်းသူ များကိုယ်စား သင်တန်းသားတစ်ဦးက ကျေးဇူးတင်စကားများ ပြောကြားခဲ့ပြီးနောက် တိုင်းဒေသကြီးဝန်ကြီးချုပ်နှင့် အစိုးရအဖွဲ့ဝင်ဝန်ကြီးများ၊ သင်တန်းသား၊ သင်တန်းသူများက စုပေါင်းမှတ်တမ်းတင် ဓာတ်ပုံများရိုက်ကူးခဲ့ပါသည်။

ဧရာဝတီတိုင်းဒေသကြီး ၂၀၂၄ ခုနှစ်၊ တက္ကသိုလ်ဝင်စာမေးပွဲအောင်ချက်မြင့်မားရေး လုပ်ငန်းညှိနှိုင်းအစည်းအဝေးအား ယနေ့နံနက်ပိုင်းက ပုသိမ်မြို့၊ အထက(၁)၊ ရတနာတန်ဆောင် ခန်းမတွင် ကျင်းပပြုလုပ်ရာ အစည်းအဝေးသို့ တိုင်းဒေသကြီးဝန်ကြီးချုပ် ဦးတင်မောင်ဝင်း၊ တိုင်းဒေသကြီးအစိုးရအဖွဲ့ဝင်ဝန်ကြီးများ၊ တိုင်း၊ ခရိုင်၊ မြို့နယ်ပညာရေးမှူးများ၊ မြို့နယ်အလိုက် အထက်တန်းကျောင်းအုပ်ကြီးများနှင့် အထက်တန်းကျောင်းခွဲ ကျောင်းအုပ်များ တက်ရောက် ကြပါသည်။ ဦးစွာ တိုင်းဒေသကြီးဝန်ကြီးချုပ်က “ ဧရာဝတီတိုင်းဒေသကြီးသည် ပညာရေးကဏ္ဍနှင့် ပတ်သက်၍ ကျောင်းတက်ရောက်မှု၊ ကျောင်းဖွင့်လှစ်မှုနှင့် အတန်းစဉ်ကူးပြောင်းမှု အများဆုံး ဖြစ်ပါကြောင်း၊ ပညာရေးမြင့်မားသည့်တိုင်းဒေသကြီးဖြစ်ပြီး ပညာသင်ကြားမှုအခွင့်အရေးများ ရရှိစေရေး ကြိုးစားဆောင်ရွက်ကြရမှာဖြစ်ပါကြောင်း၊ တက္ကသိုလ်ဝင်စာမေးပွဲစနစ်ဟောင်းတွင် ကျရှုံးခဲ့သည့် ကျောင်းသား၊ ကျောင်းသူများနှင့် ဖြေဆိုမှုမရှိခဲ့သည့်ကျောင်းသား၊ ကျောင်းသူ များသည် ယခုနှစ် စနစ်သစ် တက္ကသိုလ်ဝင်စာမေးပွဲသို့ ဝင်ရောက်ဖြေဆိုခွင့်ရမည်ဖြစ်၍ ဖြေဆိုစေရေးအတွက် ဆောင်ရွက်ပေးကြရမှာဖြစ်ပါကြောင်း၊ နိုင်ငံတော်အကြီးအကဲမှ ကျေးလက်နေပြည်သူများနှင့် တိုင်းရင်းသားပြည်သူများ စာတတ်မြောက်ရေး "ဝ၊ ထ၊ က၊ လ၊ သ" စီမံကိန်းအား အကောင်အထည်ဖော် ဆောင်ရွက်ရန်လမ်းညွှန်ခဲ့ပါကြောင်း၊ မြို့ပေါ်နှင့်ကျေးလက် နှိုင်းယှဉ်ပါက ကျေးလက်၌ စာတတ်မြောက်မှုအားနည်းသည်ကိုတွေ့ရှိပါကြောင်း၊ ဗလငါးတန်နှင့် ပြည့်စုံသောလူငယ်များ ဖြစ်ပေါ်လာစေရေးအတွက် လူငယ်များ၏ အခန်းကဏ္ဍ များကို မြှင့်တင်ပေးလျက်ရှိပါကြောင်း၊ တိုင်းဒေသကြီးအတွင်း လူငယ်စကားဝိုင်းများ ကျင်းပ ပြုလုပ်ပေးလျက်ရှိပြီး ဆွေးနွေးပွဲများသာမက ပြည်သူ့အကျိုးပြု လက်တွေ့လုပ်ငန်းများပါ ဆောင်ရွက်ပေးလျက်ရှိပါကြောင်း၊ ကျောင်းနေအရွယ်ကလေးတိုင်း ကျောင်းတက်ရောက်စေရေး တွန်းအားပေးဆောင်ရွက်သွားကြရန်လိုကြောင်း၊ အခြေခံပညာကျောင်းများတွင် စာပေကဏ္ဍ၊ အားကစားကဏ္ဍ၊ အနုပညာကဏ္ဍများ တိုးတက်မြင့်မားအောင် စနစ်တကျ လေ့ကျင့်သင်ကြားပေးရမှာဖြစ်ကြောင်း၊ တိုင်းဒေသကြီးအတွင်း စက်မှု၊ စိုက်ပျိုး၊ မွေးမြူရေးအထက်တန်းကျောင်းများကို ဖွင့်လှစ်ပေးလျက်ရှိရာ  ကျောင်းသား၊ ကျောင်းသူများ ဝါသနာအလိုက် တက်ရောက်နိုင်ရေး အသိပညာပေးဆောင်ရွက်သွားကြဖို့လိုကြောင်း၊ တိုင်းဒေသကြီးသည် မြစ်ဝကျွန်းပေါ်ဒေသဖြစ်ပြီး မြစ်ချောင်းများနှင့်နီးစပ်သည့်ဒေသများတွင် ကမ်းပြိုမှုများဒဏ်ကိုခံစားရ သဖြင့် ကျောင်းနေရာများရွေးချယ်ရာတွင် မြစ်ကမ်းနှင့်ဝေးသည့်နေရာများတွင်ရွေးချယ်ကြရန် လိုကြောင်း၊ ကျောင်းအဆောက်အဦ၊ ပရိဘောဂများကိုလည်း ရေရှည်တည်တံ့ခိုင်မြဲအောင် ထိန်းသိမ်းစောင့်ရှောက်ကြရမှာဖြစ်ပါကြောင်း၊ ပညာရေးကိုအခြေခံ၍ အားကစားနှင့် အနုပညာကဏ္ဍများ တိုးတက်လာစေရေး ဝိုင်းဝန်းကြိုးပမ်းဆောင်ရွက်ကြရမှာဖြစ်ပါကြောင်း၊ လိုအပ်ချက်များရှိပါကလည်း တင်ပြဆောင်ရွက်ကြရန်လိုကြောင်း” အမှာစကားပြောကြားသည်။ ဆက်လက်၍ တိုင်းဒေသကြီးအစိုးရအဖွဲ့ဝင်ဝန်ကြီးများ၊ ခရိုင်မြို့နယ်ပညာရေးမှူးများနှင့် အထက်တန်းကျောင်းအုပ်ကြီးများက ၂၀၂၄ ခုနှစ် တက္ကသိုလ်ဝင် စာမေးပွဲအောင်ချက်မြင့်မားရေးအတွက် ကဏ္ဍအလိုက် အသီးသီးဆွေးနွေးခဲ့ကြပြီး တိုင်းဒေသကြီးဝန်ကြီးချုပ်က ဆွေးနွေးတင်ပြချက်များအပေါ် ဖြည့်စွက်ဆွေးနွေးခဲ့ကာ ဆရာ၊ ဆရာမများ၏ တင်ပြချက်များအပေါ် သက်ဆိုင်ရာတာဝန်ရှိသူများနှင့် ပေါင်းစပ်ညှိနှိုင်းဆောင်ရွက်ပေးခဲ့ပါသည်။ ထို့နောက် တိုင်းဒေသကြီးဝန်ကြီးချုပ်က နိဂုံးချုပ်အမှာစကားပြောကြားခဲ့ကာ ဆရာကြီး ဆရာမကြီးများအား ရင်းရင်းနှီးနှီးနှုတ်ဆက်ခဲ့ပါသည်။

ဧရာဝတီတိုင်းဒေသကြီး၊ ပုသိမ်ခရိုင်၊ သာပေါင်းမြို့နယ်၊ ဒည်ကုန်းကျေးရွာအုပ်စု၊ ဂွေးတောက်ကွင်းကျေးရွာရှိ အလျား၂၀၀ပေခန့် သစ်/ဝါးတို့ဖြင့် ဆောက်လုပ်ထားသည့် ရွာလယ်တံတားသည် ယခုလ၁၁ရက်နေ့က ရေတိုက်စားမှုကြောင့် ကျိုးကျပျက်စီးမှုဖြစ်ပွားခဲ့သဖြင့် အသစ်ပြန်လည်တည်ဆောက်နိုင်ရေးအတွက် တိုင်းဒေသကြီး ဝန်ကြီးချုပ်သည် တာဝန်ရှိသူများနှင့်အတူ ယနေ့မွန်းလွဲပိုင်းက သွားရောက်ကြည့်ရှုစစ်ဆေးခဲ့သည်။ ထိုသို့စစ်ဆေးခဲ့ရာတွင် တိုင်းဒေသကြီးကျေးလက်လမ်းဦးစီးဌာနဦးစီးမှူး၊ ခရိုင်၊ မြို့နယ်အုပ်ချုပ်ရေးမှူးတို့မှ တံတားသစ်ပြန်လည်တည်ဆောက်နိုင်ရေးအခြေအနေများ၊ ပြည်သူများသွားလာရေးအဆင်စေရေးဆောင်ရွက်ထားရှိမှုအခြေအနေများရှင်းလင်းတင်ပြချက်များနှင့် ပြည်သူများ၏လိုအပ်ချက်များတင်ပြမှုအပေါ် တိုင်းဒေသကြီး ဝန်ကြီးချုပ်က“ ကျေးရွာနေပြည်သူများနှင့်ကျောင်းသား၊ ကျောင်းသူများ သွားရေးလာရေး အခက်အခဲမရှိစေရေးအတွက်  တံတားအသစ်ပြန်လည်တည်ဆောက်ပေးနိုင်ရန် လာရောက်ကြည့်ရှုစစ်ဆေးခြင်းဖြစ်ပါကြောင်း၊ သက်ဆိုင်ရာတာဝန်ရှိသူများကလည်း တံတားအသစ်ပြန်လည်ဆောက်နိုင်ရေးအတွက် အမြန်ဆုံးတိုင်းတာတွက်ချက်၍ တင်ပြပေးကြစေလိုကြောင်း”မှ ာကြားခဲ့ကာ ​​ကျေးရွာသူရွာသားများနဲ့ရင်းရင်းနှီးနှီး​တွေ့ဆုံအားပေးခဲ့ပြီး တံတားပျက်စီးမှုအ‌ေခြအနေများကို ကြည့်ရှုစစ်ဆေးခဲ့သည်။ ဆက်လက်၍ တိုင်းဒေသကြီး ဝန်ကြီးချုပ်သည် တာဝန်ရှိသူများနှင့်အတူ ပုသိမ်မြို့၊ နိဂြောဓာရုံညောင်ပင်သာစာသင်တိုက်အတွင်းဝန်း၌  ဘုန်းတော်ကြီးသင်ပညာရေးကျောင်းဆောင် နံရံအုတ်စီခြင်းလုပ်ငန်းများ ဆောင်ရွက်နေမှုအခြေအနေများကို ကြည့်ရှုစစ်ဆေးခဲ့ပြီး လုပ်ငန်းများစနစ်တကျ ဆောင်ရွက်စေရေး၊ အရည်အသွေးပြည့်မီစေရေးနှင့် သတ်မှတ်ချိန်အတွင်းပြီးစီးစေရေးနှင့် လုပ်ငန်းခွင်အန္တရာယ်ကင်းရှင်းစေရေးအလေးထားဆောင်ရွက်ရန်မှာကြားခဲ့ပြီး နိဂြောဓာရုံ ညောင်ပင်သာပရိယတ္တိ စာသင်တိုက်၏ ပဓာနနာယဆရာတော် ဘဒ္ဒန္တဝိဿုတ (အဘိဓဇမဟာရဋ္ဌဂုရု၊ အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မဇောတိကဓဇ)  မဟာထေရ်မြတ်အား ဖူးမြော်ကြည်ညို၍ သာသနာရေးဆိုင်ရာကိစ္စရပ်များနှင့် ကျောင်းဆောင်ဆောက်လုပ်နေမှုအခြေအနေများနှင့်ဆက်လက် ဆောင်ရွက်မည့်အစီအစဉ်များအား တင်ပြလျှောက်ထားကာ လှူဖွယ်ဝတ္ထုပစ္စည်းနှင့် နဝကမ္မအလှူငွေများဆက်ကပ်လှူဒါန်းခဲ့ေကြာင်းသိရသည်။

ဧရာဝတီတိုင်းဒေသကြီး ဝန်ကြီးချုပ်နှင့် အစိုးရအဖွဲ့ဝင် ဝန်ကြီးများသည် ကွန်ပျူတာတက္ကသိုလ်(ပုသိမ်)၌ ဧရာဝတီတိုင်းဒေသကြီးလူငယ်ရေးရာကော်မတီနှင့် ကွန်ပျူတာ တက္ကသိုလ်တို့ ပူးပေါင်းကျင်းပသည့်လူငယ်စကားဝိုင်းသို့ တက်ရောက်၍ “ တိုင်းဒေသကြီး အတွင်းရှိ ဝိဇ္ဇာ၊ သိပ္ပံ တက္ကသိုလ်များ၊ ဒီဂရီကောလိပ်များနှင့် အခြေခံပညာကျောင်းများ၌ လူငယ်စကားဝိုင်းများကို ပြုလုပ်လျက်ရှိပါကြောင်းနှင့်  နောင်တစ်ချိန်တွင် နိုင်ငံ့တာဝန်များကို ပုခုံးပြောင်းထမ်းဆောင်မည့်ဗလငါးတန်နှင့်ပြည့်စုံသော  လူငယ်လူရွယ်များထွက်ပေါ်လာစေရန် အတွက် ရည်ရွယ်ပြုလုပ်ခြင်းလည်းဖြစ်ပါကြောင်း၊ အခြေခံပညာကိုကောင်းမွန်စွာ သင်ကြားတတ်မြောက်လာကြပြီး ကွန်ပျူတာတက္ကသိုလ်တွင် အဆင့်မြင့်ပညာများကိုလေ့လာသင်ယူ နေကြသည့် ကျောင်းသား၊ကျောင်းသူများသည် လူငယ်ကာလအသက်အပိုင်းအခြားသို့ ရောက်ရှိ နေကြသူများဖြစ်ကြ၍ ဗလငါးတန်နှင့်ပြည့်စုံသည့် လူငယ်လူရွယ်များဖြစ်စေရေး ကြိုးစား ဆောင်ရွက်ကြရမှာဖြစ်ပါကြောင်း၊ ကျောင်းသားကျောင်းသူလူငယ်များအနေဖြင့်လည်း မိမိတို့ လေ့လာသည့်ဘာသာရပ်များကို ကျွမ်းကျင်တတ်မြောက်အောင် လေ့လာသင်ယူ၍ တိုင်းဒေသကြီးနှင့် နိုင်ငံတော်အတွက် ကောင်းမွန်စွာအကျိုးပြုနိုင်ပါစေကြောင်းနှင့် ယနေ့ ပြုလုပ်သည့် စကားဝိုင်းမှတဆင့် ဗလငါးတန်နှင့်ပြည့်စုံပြီး နိုင်ငံ့တာဝန်များကို ပုခုံးပြောင်း ထမ်းဆောင်မည့် လူငယ်လူရွယ်များ ဖြစ်ပါစေကြောင်း” အမှာစကားများ ပြောကြားခဲ့ပြီး ထောက်ပံ့ငွေများနှင့် အားကစားပစ္စည်းများကိုပေးအပ်ခဲ့ရာ ကွန်ပျူတာတက္ကသိုလ်(ပုသိမ်)မှ ဒုတိယပါမောက္ခချုပ်က လက်ခံရယူခဲ့သည်။ ထို့နောက် ကွန်ပျူတာတက္ကသိုလ်(ပုသိမ်)မှ ဒုတိယပါမောက္ခချုပ်ကလူငယ်စကားဝိုင်း ကျင်းပရခြင်းရည်ရွယ်ချက်များကို ရှင်းလင်းပြောကြားခဲ့ပြီးနောက် လူငယ်စကားဝိုင်းကို ဆက်လက်ပြုလုပ်ရာ ကွန်ပျူတာတက္ကသိုလ်(ပုသိမ်)မှ  ဒေါ်စန်းစန်းမြိုင်၊ တွဲဖက်ပါမောက္ခ(မြန်မာစာဌာနမှူး)က ဦးဆောင်ဆွေးနွေးသူအဖြစ် ဆောင်ရွက်ခဲ့ပြီး ပထမနှစ်ကျောင်းသား မောင်ရန်နိုင်က “လူငယ်နှင့်အားကစား”ခေါင်းစဉ်ဖြင့်လည်းကောင်း၊ ဒုတိယနှစ်ကျောင်းသား မောင်ဝေဖြိုးအောင်က “လူငယ်နှင့် ကျန်းမာကြံ့ခိုင်ရေး”ခေါင်းစဉ်ဖြင့်လည်းကောင်း၊ စတုတ္ထနှစ်ကျောင်းသား မောင်မြတ်မင်းထွန်းက “လူငယ်နှင့်ကွန်ပျူတာပညာ” ခေါင်းစဉ်ဖြင့်လည်းကောင်း၊ ပထမနှစ်ကျောင်းသူ မအင်ကြင်းမွန်က“ လူငယ်နှင့်မူးယစ်ဆေးဝါးအန္တရာယ်”ခေါင်းစဉ်ဖြင့်လည်းကောင်း အသီးသီး ဆွေးနွေးခဲ့ကြကြောင်းသိရှိရသည်။

အသက်(၉)နှစ်ပြည့်ပြီး (၁၂)နှစ်မကျော်သောမိန်းကလေးများအား သားအိမ်ခေါင်း ကင်ဆာရောဂါကာကွယ်ဆေး (HPV) စတင်ထိုးနှံခြင်း တိုင်းဒေသကြီးအဆင့် ဖွင့်ပွဲအခမ်းအနားကို ယနေ့နံနက်ပိုင်းက ပုသိမ်မြို့၊ ဧရာရွှေဝါခန်းမ၌ ပြုလုပ်ခဲ့ရာ အခမ်းအနားသို့ တိုင်းဒေသကြီး ဝန်ကြီးချုပ်ဦးတင်မောင်ဝင်းနှင့်ဇနီး၊ အနောက်တောင်တိုင်းစစ်ဌာနချုပ်တိုင်းမှူး၏ဇနီး၊ အနောက်တောင်တိုင်းစစ်ဌာနချုပ်ဒုတိယတိုင်းမှူး၏ဇနီး၊ပုသိမ်လေတပ်စခန်းဌာနချုပ်မှူး၏ဇနီး၊  အစိုးရအဖွဲ့ဝင်ဝန်ကြီးများနှင့်ဇနီးများ၊ လူမှုရေးအသင်းအဖွဲ့များနှင့်၊ ကျောင်းသူလေးများ တက်ရောက်ခဲ့ကြသည်။ အခမ်းအနားတွင် တိုင်းဒေသကြီးဝန်ကြီးချုပ်က“ ကမ္ဘာ့ကျန်းမာရေးအဖွဲ့၏ (၂၀၂၀)ခုနှစ် စာရင်းများအရ ကမ္ဘာတစ်ဝန်းလုံးတွင် သားအိမ်ခေါင်းကင်ဆာရောဂါဖြစ်ပွားသူ အမျိုးသမီးလူနာအသစ် (၆)သိန်းကျော်ရှိပြီး သားအိမ်ခေါင်းကင်ဆာရောဂါကြောင့် နှစ်စဉ် အမျိုးသမီး (၃)သိန်းကျော်သေဆုံးလျက်ရှိပါကြောင်း၊ နှစ်စဉ်သားအိမ်ခေါင်းကင်ဆာဖြစ်ပွားမှုနှုန်းမှာ အမျိုးသမီးဦးရေတစ်သိန်းတွင် (၁၃.၃)ဦးရှိကြောင်းနှင့် သေဆုံးမှုနှုန်းမှာ (၆.၉)ရှိကြောင်း သိရပြီး သားအိမ်ခေါင်းကင်ဆာရောဂါကြောင့် သေဆုံးသူများ၏ (၉၀)ရာခိုင်နှုန်းသည် ဖွံ့ဖြိုးမှု နည်းသော နိုင်ငံများကဖြစ်သည့်အတွက် ဖွံ့ဖြိုးမှုနည်းသောဒေသများ၌ သားအိမ်ခေါင်းကင်ဆာဖြစ်ပွားမှုနှုန်းနှင့် သေဆုံးမှုနှုန်းမြင့်မားသည်ကိုတွေ့ရှိရပါကြောင်း၊ မြန်မာနိုင်ငံတွင် သားအိမ်ခေါင်းကင်ဆာအဖြစ်များဆုံးအသက်အုပ်စုမှာ အသက်(၁၅)နှစ်မှ အသက်(၄၄)နှစ်ဖြစ်ပြီး အမျိုးသမီးလူဦးရေ တစ်သိန်းတွင် (၂၅.၃) ဦး ဖြစ်ပွားသည်ဟုသိရပါကြောင်း၊ ကမ္ဘာတစ်ဝန်းမှာ သားအိမ်ခေါင်းကင်ဆာရောဂါ ကာကွယ်ဆေးထိုးနှံထားပါက နောက်(၅)နှစ်မှ (၈)နှစ်ကြာတဲ့ အခါမှာ အသက်(၁၃)နှစ်မှ အသက် (၁၉)နှစ် အတွင်းရှိတဲ့ မိန်းကလေးများမှာ ကင်ဆာဖြစ်စေသည့် သားအိမ်ခေါင်းကင်ဆာဗိုင်းရပ်စ်ပိုး ကူးစက်မှုနှုန်း (၈၃) ရာခိုင်နှုန်းလျှော့ချနိုင်မှာဖြစ်ပြီး အသက် (၁၅)နှစ်မှ (၁၉) နှစ်အရွယ်မိန်းကလေးများ၌ အဖြစ်များသည့် ကနဦးကင်ဆာ ဖြစ်ပွားမှုနှုန်းကို (၃၁) ရာခိုင်နှုန်းထိ လျှော့ချနိုင်မှာဖြစ်ပါကြောင်း၊ သားအိမ်ခေါင်း ကင်ဆာရောဂါကာကွယ်ဆေး (HPV) ထိုးနှံထားခြင်းဖြင့် လာမယ့် (၂၀၃၀)ခုနှစ်မှာ လူဦးရေ(၂၄)သန်းစာအတွက် ကျန်းမာရေး စောင့်ရှောက်မှု ကုန်ကျစရိတ်များ လျော့ကျသွားစေမှာဖြစ်ပါကြောင်း၊  မြန်မာနိုင်ငံတစ်ဝန်းလုံးတွင် သားအိမ်ခေါင်းကင်ဆာရောဂါကာကွယ်ဆေး(HPV)ထိုးနှံရခြင်း၏ ရည်ရွယ်ချက်သည် မိန်းကလေးငယ်များကို အသက်(၉)နှစ်အရွယ်တွင်ထိုးပေးခြင်းအားဖြင့် ဗိုင်းရပ်(စ်)ပိုးနှင့် စတင် ထိတွေ့ခြင်းမရှိမီအချိန်တွင် ကြိုတင်ကာကွယ်ထားနိုင်ပြီး သားအိမ်ခေါင်းကင်ဆာရောဂါ ဖြစ်ပွားခြင်းမှ ကာကွယ်နိုင်ရန်နှင့် သားအိမ်ခေါင်းကင်ဆာရောဂါကူးစက်မှုကို ကာကွယ်ထိန်းချုပ်နိုင်ရန် အတွက် အသက်(၉)နှစ်မှ(၁၂)နှစ်ကြား ကျောင်းသူများနှင့် ကျောင်းပြင်ပ မိန်းကလေးငယ် အားလုံးကို ထိုးနှံပေးရန်ဖြစ်ပါကြောင်း၊ အမျိုးသမီးများတွင် ဖြစ်ပွားမှုအများဆုံးကင်ဆာဖြစ်ပြီး ကာကွယ်ဆေးဖြင့် ကာကွယ်၍ရသောရောဂါဖြစ်သည့် သားအိမ်ခေါင်းကင်ဆာရောဂါ ဖြစ်ပွား သေဆုံးမှုမှလျှော့ချနိုင်ရန် တိုင်းဒေသကြီးအတွင်းရှိ အသက် (၉)နှစ်ပြည့်ပြီး အသက်(၁၂)နှစ် မကျော်သော မိန်းကလေးငယ်များအား သားအိမ်ခေါင်းကင်ဆာရောဂါ ကာကွယ်ဆေး (HPV) ကာကွယ်ဆေးထိုးလွှမ်းခြုံမှု အပြည့်အဝရရှိစေရန် တာဝန်ရှိသူများအားလုံးကကြိုးပမ်း ဆောင်ရွက်လျက်ရှိပါကြောင်း၊ သားအိမ်ခေါင်းကင်ဆာရောဂါကာကွယ်ဆေး (HPV) ထိုးနှံ ပေးခြင်းကျောင်းအခြေပြုအစီအစဉ်ကို ယနေ့ (၁၈-၉-၂၀၂၃) ရက်နေ့မှ စတင်ပြီး တိုင်းဒေသကြီး အတွင်းတွင် ဆက်လက်ထိုးနှံသွားမည်ဖြစ်ပါကြောင်းနှင့် ဝိုင်းဝန်းကူညီ ဆောင်ရွက်ပေးကြမည့် တာဝန်ရှိသူများအားလုံး၊ အဖွဲ့အစည်းများအားလုံးကို ကျေးဇူးတင်ရှိပါကြောင်း” အဖွင့် အမှာစကားပြောကြားသည်။ ဆက်လက်၍ သားအိမ်ခေါင်းကင်ဆာရောဂါကာကွယ်ဆေး(HPV) ထိုးနှံခြင်း အထိမ်းအမှတ် မှတ်တမ်းဗီဒီယိုအားပြသခဲ့ပြီးနောက် တိုင်းဒေသကြီးဝန်ကြီးချုပ်နှင့် ဧည့်သည်တော်များက ကျောင်းသူများအား သားအိမ်ခေါင်းကင်ဆာရောဂါကာကွယ်ဆေး (HPV) ထိုးနှံခြင်းအားကြည့်ရှုအားပေးခဲ့ပြီး ကျောင်းသူများအား အမှတ်တရပစ္စည်းများ ပေးအပ်ခဲ့သည်။