၂၀၂၂ခုနှစ်၊ ပြည်နယ်နှင့်တိုင်းဒေသကြီးတင်းနစ် အားကစားပြိုင်ပွဲသို့ ဝင်ရောက် ယှဉ်ပြိုင်မည့် ဧရာဝတီတိုင်းဒေသကြီးကိုယ်စားပြု တင်းနစ်အသင်းအား အောင်နိုင်ရေးအလံ ပေးအပ်ပွဲအခမ်းအနားကို ယနေ့နံနက်ပိုင်းက  တိုင်းဒေသကြီးအစိုးရအဖွဲ့ရုံး ၊ အစည်းအဝေးခန်းမ(၁)၌ ပြုလုပ်ရာ တိုင်းဒေသကြီး ဝန်ကြီးချုပ်ဦးတင်မောင်ဝင်း၊ တိုင်းဒေသကြီးအစိုးရအဖွဲ့ဝင် ဝန်ကြီးများ၊ အားကစားနှင့်ကာယပညာဦးစီးဌာနမှ တာဝန်ရှိသူ များနှင့် ပြိုင်ပွဲဝင် အားကစားသမားများ တက်ရောက်ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်အား ပြည်နယ်နှင့်တိုင်းဒေသကြီး တင်းနစ်အားကစား ပြိုင်ပွဲသို့ ဝင်ရောက်ယှဉ်ပြိုင်မည့်  အုပ်ချုပ်သူ၊ နည်းပြ ၊ အားကစားသမားများနှင့် တစ်ဦးချင်း မိတ်ဆက်ပေးပြီး အသင်းအုပ်ချုပ်သူက ပြိုင်ပွဲဝင်ရောက်ယှဉ်ပြိုင်မည့် အစီအစဉ်များအား ရှင်းလင်းတင်ပြသည်။ ထို့နောက် တိုင်းဒေသကြီးဝန်ကြီးချုပ်က “ ယခုအခမ်းအနားသည် ပြည်နယ်နှင့် တိုင်းဒေသကြီး  တင်းနစ်ပြိုင်ပွဲသို့ သွားရောက်ယှဉ်ပြိုင်မည့်  ဧရာဝတီတိုင်းဒေသကြီး ကိုယ်စားပြု အမျိုးသား၊ အမျိုးသမီး တင်းနစ်အားကစားအသင်းအား တွေ့ဆုံ၍ အောင်နိုင်ရေး အလံပေးအပ်ခြင်း ဖြစ်ပါကြောင်း၊ အားကစားသမားများအနေဖြင့် ယခင်နှစ်ကရရှိခဲ့သည့် ဆုတံဆိပ်များထက် ပိုမိုရရှိအောင် ကြိုးစားသွားရမှာဖြစ်ပါကြောင်း၊ နည်းစနစ်မှန်မှန်ဖြင့် စခန်းသွင်းလေ့ကျင့်သွားရန်၊ မျိုးဆက်သစ်လူငယ် အားကစားသမားများအား လေ့ကျင့်ပျိုးထောင်ပေးရန်နှင့် မိမိတို့ရှေ့က လက်ရွေးစင်အားကစားသမားကြီးများနည်းတူ အောင်မြင်မှု ရရှိအောင် ကြိုးစားယှဉ်ပြိုင်ကြရန်”တိုက်တွန်းပြောကြားပြီး  ဧရာဝတီတိုင်းဒေသကြီး ကိုယ်စားပြု တင်းနစ်အသင်းမှ တာဝန်ရှိသူများထံသို့ အောင်နိုင်ရေးအလံနှင့် ချီးမြှင့်ထောက်ပံ့ ငွေများ ပေးအပ်ခဲ့သည်။ ဆက်လက်၍  တိုင်းဒေသကြီး ဝန်ကြီးချုပ်နှင့် အစိုးရအဖွဲ့ဝင် ဝန်ကြီးများသည် ပုသိမ်မြို့၊ ကိုးသိန်း တင်းနစ်အားကစားကွင်း၌ ၂၀၂၃ခုနှစ်၊ ပြည်နယ်နှင့်တိုင်းဒေသကြီး တင်းနစ်အားကစား ပြိုင်ပွဲသို့ ဝင်ရောက်ယှဉ်ပြိုင်မည့် တိုင်းဒေသကြီးကိုယ်စားပြု အမျိုးသား၊ အမျိုးသမီးအသင်း တို့၏ လေ့ကျင့်ယှဉ်ပြိုင်နေမှုများကို ကြည့်ရှုအားပေးခဲ့ပြီး အသင်းအုပ်ချုပ်သူ၊ နည်းပြများနှင့် ပြိုင်ပွဲဝင်ကစားသမားအား ရင်းရင်းနှီးနှီးနှုတ်ဆက် အားပေးစကားများ ပြောကြားခဲ့သည်။ ဧရာဝတီတိုင်းဒေသကြီးအနေဖြင့် ၂၀၂၃ခုနှစ်၊ ပြည်နယ်နှင့်တိုင်းဒေသကြီး တင်းနစ်အားကစား ပြိုင်ပွဲသို့ အုပ်ချုပ်သူနှင့်နည်းပြ(၃)ဦး၊ ပြိုင်ပွဲဝင်ကစားသမား အမျိုးသား၊ အမျိုးသမီး စုစုပေါင်း(၈)ဦးဖြင့် ဝင်ရောက်ယှဉ်ပြိုင်သွားမည်ဖြစ်ပါသည်။

မိုခါမုန်တိုင်း လေဘေးသင့်ဒေသများ၌ ကူညီကယ်ဆယ်‌ရေးနှင့်ပြန်လည်ထူထောင်ရေး လုပ်ငန်းများအတွက် အလှူငွေပေးအပ်ပွဲအခမ်းအနားအား ယနေ့မွန်းလွဲပိုင်းက ပုသိမ်မြို့၊ ဧရာရွှေဝါခန်းမ၌ ပြုလုပ်ခဲ့ရာ အခမ်းအနားသို့ တိုင်းဒေသကြီး ဝန်ကြီးချုပ် ဦးတင်မောင်ဝင်း၊အစိုးရအဖွဲ့ဝင် ဝန်ကြီးများ၊ အနောက်တောင်တိုင်းစစ်ဌာနချုပ်ဒုတိယတိုင်းမှူး၊ ပုသိမ်လေတပ်စခန်းဌာနချုပ်မှူး၊ ဌာနဆိုင်ရာများနှင့် ‌အလှူရှင်များတက်ရောက်ခဲ့ကြသည်။ မိုခါမုန်တိုင်း လေဘေးသင့်ဒေသများ၌ ကူညီကယ်ဆယ်‌ရေးနှင့်ပြန်လည်ထူထောင်ရေး လုပ်ငန်းများအတွက် အလှူငွေပေးအပ်ပွဲတွင် တိုင်းဒေသကြီး ဝန်ကြီးချုပ်က“မိုခါမုန်တိုင်း၏ အရှိန်ကြောင့် တိုင်းဒေသကြီးအတွင်း ပျက်စီးမှုများလည်းရှိခဲ့ပါကြောင်း၊မုန်တိုင်းသတိပေးချက်များ ထုတ်ပြန်ချိန်မှစ၍ ကမ်းခြေဒေသများ၌ ကြိုတင်ပြင်ဆင်မှုအ‌နေဖြင့်  ဘေးလွတ်ရာများနေရာများသို့ရွေ့ပြောင်းမှုများလုပ်ဆောင်ပေးခဲ့ပါကြောင်း၊ နာဂစ်မုန်တိုင်းကဲ့သို့ ပျက်စီးဆုံးရှုံးမှုများ မ‌ဖြစ်ပေါ်စေရန် ကြိုတင်စီမံဆောင်ရွက်မှုများကြောင့် တိုင်းဒေသကြီးအတွင်း ပျက်စီးဆုံးမှု နည်းပါးသည်ဟုပြောရမှာဖြစ်ပါကြောင်း၊ မုန်တိုင်းဘေးကင်းစင်၍ မိမိတို့၏ နေရပ်အသီးသီးသို့ပြန်လည်ထွက်ခွာမည့် လပွတ္တာမြို့နယ်အတွင်းရှိ မုန်တိုင်းရှောင်ပြည်သူများအား မိမိတို့အနေဖြင့် ပို့ဆောင်နှုတ်ဆက်၍  အားပေးစကားများ ပြောကြားကာ စားသောက်ဖွယ်ရာများ ထောက်ပံ့ပေးအပ်မှုများလည်း ဆောင်ရွက်ခဲ့ပါကြောင်း၊ဇွန်လ(၁)ရက်နေ့တွင် ကျောင်းများပြန်လည်ဖွင့်လှစ်မည်ဖြစ်၍ စာသင်ဆောင်များအမြန်ဆုံး ပြင်ဆင်ဆောင်ရွက်ပေး လျက်ရှိပါကြောင်း၊ယခုကဲ့သို့ စေတနာသဒ္ဓါတရားထက်သန်စွာဖြင့် လှူဒါန်းခဲ့သည့် အလှူရှင်အသီးသီးအား ကျေးဇူးတင်ရှိပါကြောင်းနှင့် မုန်တိုင်းသင့်ဒေသများအတွက် လိုအပ်ချက်များရှိပါကလည်း ဆက်လက် လှူဒါန်းပေးနိုင်ကြပါစေကြောင်း”အမှာစကားပြောကြားသည်။ ဆက်လက်၍  မိုခါမုန်တိုင်း လေဘေးသင့်ဒေသများ၌ ကူညီကယ်ဆယ်‌ရေးနှင့်ပြန်လည်ထူထောင်ရေး လုပ်ငန်းများအတွက် ဧရာဝတီတိုင်းဒေသကြီးအစိုးရအဖွဲ့က လှူဒါန်းငွေ သိန်းတစ်ထောင်ကျပ်ကို ဝန်ကြီးချုပ်က လှူဒါန်းပေးအပ်ရာ စီးပွားရေးရာ ဝန်ကြီးကလည်းကောင်း၊စေတနာရှင်ပြည်သူများနှင့် ဌာနဆိုင်ရာများ၏ အလှူငွေများကို တိုင်းဒေသကြီး ဝန်ကြီးချုပ်နှင့် စီးပွားရေးရာဝန်ကြီးတို့ကလည်းကောင်း ဆက်လက် လက်ခံရယူခဲ့ပြီး ဂုဏ်ပြုမှတ်တမ်းလွှာများပေးအပ်ခဲ့ပြီး လှူဒါန်းရရှိမှုငွေစုစုပေါင်း ( ၃၂၀၃၀၀၀၀၀ )သိန်းကျပ်အား လှူဒါန်းခဲ့ကြောင်းသိရသည်။

ဧရာဝတီတိုင်းဒေသကြီး၂၀၂၃-၂၀၂၄ပညာသင်နှစ်၊ဇုန်အဆင့်အခြေခံပညာအလယ်တန်း(Grade-9သင်ရိုးသစ်)ဆင့်ပွားသင်တန်းဖွင့်ပွဲအား  ယနေ့နံနက်ပိုင်းက ပုသိမ်မြို့၊အမှတ်(၁)အခြေခံပညာအထက်တန်းကျောင်း ရတနာတန်ဆောင်ခန်းမ၌ ပြုလုပ်ခဲ့ရာ သင်တန်းဖွင့်ပွဲသို့ တိုင်းဒေသကြီးဝန်ကြီးချုပ် ဦးတင်မောင်ဝင်း၊အစိုးရအဖွဲ့ဝင် ဝန်ကြီးများ၊ပုသိမ်တက္ကသိုလ်မှ ဆရာကြီး၊ဆရာမကြီးများနှင့် သင်တန်းသား၊သင်တန်းသူ ဆရာ၊ဆရာမများတက်ရောက်ခဲ့ကြသည်။ ၂၀၂၃-၂၀၂၄ပညာသင်နှစ်၊ဇုန်အဆင့်အခြေခံပညာအလယ်တန်း(Grade-9သင်ရိုးသစ်)ဆင့်ပွားသင်တန်းဖွင့်ပွဲတွင် တိုင်းဒေသကြီး ဝန်ကြီးချုပ်က“အခြေခံပညာအလယ်တန်း(Grade-9သင်ရိုးသစ်)ဆင့်ပွားသင်တန်းအား ပုသိမ်၊ဟင်္သာတ၊မအူပင် မြို့များ၌ ဇုန်(၃)ဇုန်ခွဲ၍ ပြုလုပ်သွားမည်ဖြစ်ပါကြောင်း၊နွေရာသီ ကျောင်းပိတ်ရင်များတွင် ဆင့်ပွားသင်တန်းများ ဖွင့်လှစ်ပို့ချခြင်းဖြင့် ဆရာကြီး၊ဆရာမကြီးများ၏ အရည်အသွေးများလည်း ပိုမိုမြင့်မားလာမည်ဖြစ်ပါကြောင်း၊ ဇွန်လ(၁)ရက်နေ့တွင် ကျောင်းများစတင်ဖွင့်လှစ်တော့မည်ဖြစ်၍ ကျောင်းနေအရွယ်ကလေးတိုင်း ကျောင်းတက်ရောက်ရေး ဆောင်ရွက်ရမှာဖြစ်ပါကြောင်း၊ ဆရာကြီး၊ဆရာမကြီးသည် တပည့်များ၏ စံနမူနာပြများဖြစ်ပါကြောင်း၊ ပညာရေးဖြင့် ခေတ်မီဖွံ့ဖြိုးတက်သည့် နိုင်ငံတော်တည်ဆောက်ရာတွင် ဆရာ၊ဆရာမများ၏ အခန်းကဏ္ဍသည်လွန်စွာအရေးပါပါကြောင်း၊ ဆရာကြီး၊ဆရာမကြီးများအနေဖြင့် ဆင့်ပွားသင်တန်းမှ ပို့ချပေးလိုက်သည့် သင်ခန်းစာများအား သေချာမှတ်သား၍ ပြန်လည်ပို့ချပေးကြစေလိုကြောင်းနှင့်( Grade - 9 )သည် အခြေခံပညာအလယ်တန်းဆင့်ပြီးမြောက်ကြောင်း လက်မှတ်ထုတ်ယူမည့်နောက်ဆုံးအတန်းဖြစ်သဖြင့်ပညာရေးစနစ်သစ် အောင်မြင်စေရန် ကြိုးပမ်းဆောင်ရွက်ပေးရန်”အမှာစကားပြောကြားသည်။ ဆက်လက်၍ ပုသိမ်ခရိုင်ပညာရေးမှူးက ဆင့်ပွားသင်တန်းဖွင့်လှစ်ရခြင်း၏ ရည်ရွယ်ချက်များကို ရှင်းလင်းပြောကြားပြီးနောက် တိုင်းဒေသကြီးဝန်ကြီးချူပ်က သင်တန်းသား၊သင်တန်းသူ ဆရာကြီး၊ဆရာမကြီးအတွက်   ထောက်ပံ့ငွေများကို ပေးအပ်ရာ ပုသိမ်ခရိုင်ပညာရေးမှူးက လက်ခံရယူခဲ့သည်။ယင်းနောက် တိုင်းဒေသကြီး ဝန်ကြီးချုပ်သည် ၂၀၂၃-၂၀၂၄ ပညာသင်နှစ်၊ ဇုန်အဆင့်အခြေခံပညာအလယ်တန်း(Grade-9သင်ရိုးသစ်)ဆင့်ပွားသင်တန်းတက်ရောက်လာကြသည့် ကျောင်းအုပ်ဆရာကြီး၊ဆရာမကြီးများနှင့် ရင်းရင်းနှီးနှီးတွေ့ဆုံ၍ အားပေးစကားများ ပြောကြားခဲ့ပြီး ဆရာကြီး၊ဆရာမကြီးများ၏ လုပ်ငန်းလိုအပ်မှု တင်ပြချက်များအပေါ် ဖြည့်ဆည်းပေးနိုင်ရေးအတွက်သက်ဆိုင်ရာ တာဝန်ရှိသူများနှင့် ပေါင်းစပ်ညှိနှိုင်းဆောင်ရွက်ပေးခဲ့သည်။  ၂၀၂၃-၂၀၂၄ပညာသင်နှစ်၊ ဇုန်အဆင့်အခြေခံပညာအလယ်တန်း (Grade-9 သင်ရိုးသစ်)ဆင့်ပွားသင်တန်းအား ပုသိမ်ဇုန်တွင် သင်တန်းသားသင်တန်းသူဆရာ၊ဆရာမ (၆၃၀၀)ဦး၊ ဟင်္သာတဇုန်တွင် (၃၅၂၀)ဦး၊ မအူပင်ဇုန်တွင် (၄၁၉၄) ဦး စုစုပေါင်း (၁၄၀၁၄)ဦးတက်ရောက်လျက်ရှိကြောင်းသိရသည်။  ဆက်လက်၍ တိုင်းဒေသကြီး ဝန်ကြီးချုပ်သည် ကန်ကြီးထောင့်မြို့နယ်၊အပင်နှစ်ဆယ်ကျေးရွာ အခြေခံပညာမူတန်းကျောင်း၌ လေပြင်းတိုက်ခတ်မှုကြောင့် မျက်နှာကျက်ပျက်စီးမှုများနှင့် တကုန်းကြီးကျေးရွာအခြေခံပညာအထက်တန်းကျောင်း သစ်ပင်လဲကျ၍ သွပ်အမိုးလန်ပျက်စီးမှုများအား ပြန်လည်ပြုပြင်ပြီးစီးမှု အခြေအနေများအား ကြည့်ရှုစစ်ဆေးခဲ့သည်။ ယင်းနောက် ကွင်းယားကြီးကျေးရွာ ရွှေကျွန်းသာယာခန်းမ၌ ပြုလုပ်သည့် မိုးစပါးတစ်ဧက(၁၀)တင်းနှုန်းပိုမိုထွက်ရှိရေးအတွက် တောင်သူများအား အထွက်ကောင်းမျိုးသန့်စပါးများ ပေးအပ်ပွဲအခမ်းအနားသို့ တက်ရောက်ခဲ့ရာ မြို့နယ်စိုက်ပျိုးရေးဦးစီးဌာနဦးမှူးနှင့်တိုင်းဒေသကြီးစိုက်ပျိုးရေးဦးစီးဌာနမှူးတို့က မိုးစပါးတစ်ဧက(၁၀)တင်းနှုန်းပိုမိုထွက်ရှိရေးအတွက်  ဆောင်ရွက်ထားရှိမှုများအားရှင်းလင်းတင်ပြခဲ့ကြပြီး တိုင်းဒေသကြီး ဝန်ကြီးချုပ်က“မိမိတို့ဒေသကြီးသည် လယ်ယာစိုက်ပျိုးသော တိုင်းဒေသကြီးဖြစ်ပြီး ဒေသအတွင်း ဖူလုံမှုရှိသော်လည်း ပန်းတိုင်အထွက်နှုန်း ရောက်ရှိ‌ရန်လိုအပ်နေပါသေးကြောင်း၊ သို့ဖြစ်ရာ တစ်ဧက(၁၀)တင်းနှုန်း ပိုမိုထွက်ရှိရေးအတွက် တောင်သူများအား တွန်းအားပေးဆောင်ရွက်လျက်ပါကြောင်းနှင့် လာမည့်မိုးစပါးစိုက်ရာသီတွင် အထွက်နှုန်းတိုးစေရေးအတွက် ဆွေးနွေးပွဲများပြုလုပ်ပြီး ရလဒ်များအပေါ်စီမံချက်များရေးဆွဲဆောင်ရွက်လျက်ရှိပါကြောင်း၊ ၂၀၂၃ခုနှစ်၊ မိုးစပါးစိုက်ရာသီတွင် ရေတော်မိုးတော် စိုက်ဧက (၁)သိန်းအားသစ်စိမ်းမြေဩဇာ (ပိုက်ဆံလျှော်)ထည့်သွင်းစိုက်ပျိုးသွားမည်ဖြစ်ပါကြောင်း၊ သီးထပ်စွမ်းအားတိုးတက်စေရေးနှင့် တစ်သီးမှနှစ်သီး၊ နှစ်သီးမှသုံးသီး တိုးတက်စိုက်ပျိုးနိုင်စေရေးကြိုးစားဆောင်ရွက်ကြရမှာဖြစ်ပါကြောင်း၊ တစ်ဧကအထွတ်တိုးစေရေး စီမံချက်များအားအောင်မြင်အောင်အကောင်အထည်ဖော်ဆောင်ရွက်ကြရန်နှင့် စိုက်ပျိုးရေးစံပြတိုင်းဒေသကြီးဖြစ်စေရေး ဝိုင်းဝန်းကြိုးစားပေးကြရန်လိုပါကြောင်း”အမှာစကားများ ပြောကြားခဲ့သည်။ယင်းနောက် ဒေသခံတောင်သူများက မိုးစပါးစိုက်ပျိုးရေးအတွက် ပြင်ဆင်ဆောက်ရွက်ထားရှိမှုနှင့် လိုအပ်ချက်များကို တင်ပြခဲ့ကြပြီး တိုင်းဒေသကြီး ဝန်ကြီးချုပ်က  တောင်သူများအား ဆင်းသုခမျိုးစပါးများအား ထောက်ပံ့‌ပေးအပ်ခဲ့သည်။ ဆက်လက်၍ တိုင်းဒေသကြီး ဝန်ကြီးချုပ်သည် တာဝန်ရှိသူများနှင့်အတူ တကုန်းကြီးကျေးရွာ၊စိုက်ပျိုးရေးနည်းပညာစင်တာဝန်း အတွင်း၌ နွားချေး၊ ကောက်ရိုး၊ ဖွဲနု၊ ငါးအမိုင်နို၊ အီးအမ်ဘိုကာရှီနှင့် သဘာဝမြေသြဇာပြုလုပ်မှုများကို ကြည့်ရှုစစ်ဆေးခဲ့ပြီး သိလိုသည်များကိုမေးမြန်းခဲ့ရာ တာဝန်ရှိသူများက ပြန်လည်ဖြေကြားခဲ့ပြီး သဘာဝမြေသြဇာများပိုမိုထုတ်လုပ်နိုင်ရေး၊ တောင်သူများ တွင်တွင်ကျယ်ကျယ်အသုံးစေရေး ပညာပေးလုပ်ငန်းများဆောင်ရွက်ရန်မှာကြားခဲ့ကြောင်းသိရသည်။

မုန်တိုင်းဘေးကင်းစင်၍ မိမိတို့၏နေရပ်အသီးသီးသို့ သင်္ဘော၊စက်လှေများဖြင့် ပြန်လည်ထွက်ခွာမည့် လပွတ္တာမြို့နယ်အတွင်းရှိ မုန်တိုင်းရှောင်ပြည်သူများအား နယ်‌မြေခံတပ်ရင်းရင်းတပ်ဖွဲ့ဝင်များ၊ဌာနဆိုင်ရာများက ကူညီဆောင်ရွက်ပေးလျက်ရှိပြီး ထို့သို့ပြန်လည်ထွက်ခွာမည့် မုန်တိုင်းရှောင်ပြည်သူများအား တိုင်းဒေသကြီးအစိုးရအဖွဲ့ ဝန်ကြီးချုပ်ဦးတင်မောင်ဝင်းနှင့် အစိုးရအဖွဲ့ဝင် ဝန်ကြီးများက ယနေ့နံနက်ပိုင်းတွင်  လပွတ္တာမြို့၊အမှတ်(၄)ရပ်ကွက်၊ကမ်းနားလမ်း ဦးဟိုက်ပင့်ဆိပ်ကမ်းသို့ သွားရောက်၍ နံနက်စာ စားသောက်ဖွယ်ရာထောက်ပံ့ပေးအပ်ခဲ့ပြီး နေရပ်ပြန်ပြည်သူများအား ရင်းရင်းနှီးနှီးတွေ့ဆုံ၍ အားပေးစကားများပြောကြားခဲ့သည်။ ဆက်လက်၍ တိုင်းဒေသကြီး ဝန်ကြီးချုပ်နှင့် အစိုးရအဖွဲ့ဝင် ဝန်ကြီးများသည် လပွတ္တာမြို့၊အမှတ်(၆)ရပ်ကွက် အောင်တော်မူ စေတီတော်မြတ်ကြီးအား ဖူးမြော်ကြည်ညိုခဲ့ပြီး တာဝတိံသာအရုဏ်ခံ တန်ဆောင်းတော်ကြီးအတွင်းရှိ မုန်တိုင်းရှောင်ပြည်သူများအား ကိုဗစ်-၁၉ရောဂါ ကာကွယ်ဆေးထိုးနှံပေးနေမှုများကို ကြည့်ရှုအားပေးခဲ့ပြီး စားသောက်ဖွယ်ရာများထောက်ပံ့ပေးအပ်ကာ ပြည်သူများအားရင်းရင်းနှီးနှီးတွေ့ဆုံအားပေးစကားများ ပြောကြားခဲ့သည်။ ယင်းနောက် တိုင်းဒေသကြီး ဝန်ကြီးချုပ်သည် မြို့နယ်အထွေထွေအုပ်ချုပ်ရေးဦးစီးဌာန၊‌ရွေးနဒီခန်းမ၌ပြုလုပ်သည့် လပွတ္တာမြို့နယ်အတွင်း လေပြင်းတိုက်ခတ်မှုကြောင့် နေအိမ်ပျက်စီးမှုများအား အိမ်ဆောက်ပစ္စည်းဖိုးနှင့် ဆန်ရိက္ခာဖိုးငွေများ ထောက်ပံ့ပေးအပ်မှုအခမ်းအနားသို့ တက်ရောက်၍ “လပွတ္တာမြို့နယ်အတွင်းရှိ မုန်တိုင်းရှောင်ပြည်သူများ သက်ဆိုင်ရာနေရပ်အသီးသီးသို့ လုံခြုံအန္တရာယ်ကင်းရှင်းစွာဖြင့် ပြန်လည်ရောက်ရှိရေးအတွက် အားပေးတွေ့ဆုံခဲ့ပြီး လိုအပ်သည့်ထောက်ပံ့မှုများပြုလုပ်နိုင်ရန် လာရောက်ခဲ့ခြင်းဖြစ်ပါကြောင်း၊လေပြင်းတိုက်ခတ်မှုများကြောင့် မိမိတို့တိုင်းဒေသကြီးအတွင်း၌လည်း ပျက်စီးဆုံးရှုံးမှုများရှိခဲ့ပြီး အမြန်ဆုံးပြန်လည်ထူထောင်နိုင်ရေး တတ်နိုင်သမျှဝိုင်းဝန်းကူညီ ဆောင်ရွက်ပေးကြစေလိုကြောင်း၊ဇွန်လ(၁)ရက်နေ့တွင် ကျောင်းများပြန်လည်ဖွင့်လှစ်တော့မည်ဖြစ်၍ စာသင်ကျောင်းပျက်စီးမှုများအား အမြန်ဆုံးပြန်လည်ပြုပြင်ပေးမည်ဖြစ်ပါကြောင်း"အမှာစကားပြောကြားခဲ့ပြီး တိုင်းဒေသကြီးဝန်ကြီးချုပ်နှင့် တာဝန်ရှိသူများမှ လေပြင်းတိုက်ခတ်မှုကြောင့် နေအိမ်ပျက်စီးမှုများအား အိမ်ဆောက်ပစ္စည်းဖိုးနှင့် ဆန်ရိက္ခာဖိုးငွေများ၊ စားသောက်ဖွယ်ရာများအား ဘေးသင့်ကျေးရွာအုပ်စုများထံအသီးသီးပေးအပ်ခဲ့သည်။ ဆက်လက်၍ ဝန်ကြီးချုပ်သည် လပွတ္တာမြို့နယ် ခြင်းလုံးအားကစားရုံနှင့် မြို့နယ်သုံးသူရေးရာဦးစီးဌာနရုံးသို့သွားရောက်၍ လေပြင်းတိုက်ခတ်မှုကြောင့် အမိုးလန်ပျက်စီးမှုများကို ကြည့်ရှုစစ်ဆေးခဲ့ပြီး ပြန်လည်ပြင်ဆင်မှုများအမြန်ဆုံးပြုလုပ်နိုင်ရန် တာဝန်ရှိသူများအား လမ်းညွှန်မှာကြားခဲ့သည်။ ထို့​နောက် တိုင်း​ဒေသကြီးဝန်ကြီးချုပ်သည် မြန်မာနိုင်ငံမီးသတ်တပ်ဖွဲ့၊ လပွတ္တာခရိုင်မီးသတ်စခန်းသို့​သွားရောက်၍  လေပြင်းတိုက်ခတ်မှုကြောင့် ဝန်ထမ်းအိမ်ရာ အမိုးလန်ပျက်စီးမှုများကို ကြည့်ရှုစစ်ဆေးခဲ့ပြီး အထက်အဆင့်ဆင့်သို့ တင်ပြ၍ အမြန်ပြုပြင်ဆောင်ရွက်ရန်လမ်းညွှန်မှာကြားခဲ့ပြီး ပျက်စီးမှုများမှ ဆယ်ယူရရှိသည့် ထုပ်၊ရောက်၊ဒိုင်း၊မြှားနှင့် သွပ်များအား ကြည့်ရှု၍ မီးသတ်တပ်ဖွဲ့ဝင်များနှင့် မိသားစုဝင်များအား အားပေးစကားများပြောကြားခဲ့ပြီး သွပ်နှင့် စားသောက်ဖွယ်ရာများထောက်ပံ့ပေးခဲ့သည်။ ဆက်လက်၍ တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် လပွတ္တာမြို့နယ်၊မြွေဟောက်ကျေးရွာ အုပ်စု၌ ပြုလုပ်သည့်  သစ်စိမ်းမြေဩဇာ(ပိုက်ဆံလျှော်)မျိုးစေ့ပေးအပ်ပွဲအပ်ပွဲ အခမ်းအနားသို့တက်ရောက်၍ တောင်သူများအား မျိုးစေ့များထောက်ပံ့ပေးအပ်ကာ တစ်ဧက(၁၀)တင်းနှုန်းပိုမိုထွက်ရှိရေးအတွက် လျာထားစီမံချက်အတိုင်းအောင်မြင်အောင် ကြိုးစားဆောင်ရွက်ရန် လမ်းညွှန်မှာကြားခဲ့ပြီး တောင်သူများနှင့်အတူ ပိုက်ဆံလျှော်မျိုးစေ့များကြဲပက်ပေးခဲ့သည်။ ယင်းနောက် တိုင်းဒေသကြီး ဝန်ကြီးချုပ်သည် မောင်းဒီးကျေးရွာအုပ်စု၊ဂေါင်းတိုကျေးရွာရှိ အခြေခံပညာမူလန်းကျောင်းလေပြင်းတိုက်ခတ်မှုကြောင့် ကျောင်းဆောက်ပျက်စီးမှုများကို ကြည့်ရှုစစ်ဆေးခဲ့ပြီး ကျောင်းဖွင့်ချိန်မတိုင်မီ အမြန်ဆုံးပြန်လည်ပြုပြင်ပေးမည်ဖြစ်ပါကြောင်းပြောကြားခဲ့ပြီး ကျောင်းအုပ်ဆရာမကြီးထံသို့ ဗလာစာအုပ်၊သွပ်၊စားသောက်ဖွယ်ရာများနှင့် ထောက်ပံ့ငွေများပေးအပ်ခဲ့သည်။

ဧရာဝတီတိုင်းဒေသကြီး သဘာဝဘေးအန္တရာယ်ဆိုင်ရာ စီမံခန့်ခွဲမှုအဖွဲ့၏လုပ်ငန်းညှိနှိုင်းအစည်းအဝေးအား ယနေ့ညနေပိုင်းက တိုင်းဒေသကြီးအစိုးရအဖွဲ့ရုံး၊အစည်းအဝေးခန်းမ(၁)၌ ပြုလုပ်ခဲ့ရာ အစည်းအဝေးသို့ တိုင်းဒေသကြီး ဝန်ကြီးချုပ်ဦးတင်မောင်ဝင်း၊အစိုးရအဖွဲ့ဝင် ဝန်ကြီးများ၊ သဘာဝဘေးအန္တရာယ်ဆိုင်ရာ စီမံခန့်ခွဲမှုအဖွဲ့ကော်မတီဝင်များနှင့်  တိုင်းဒေသကြီးအတွင်းရှိ ခရိုင်(၈)ခရိုင်မှ စီမံအုပ်ချုပ်ရေးအဖွဲ့ ဥက္ကဋ္ဌများက Video Conferencing စနစ်ဖြင့် တက်ရောက်ခဲ့ကြသည်။ လုပ်ငန်းညှိနှိုင်းအစည်းအဝေးတွင် တိုင်းဒေသကြီး ဝန်ကြီးချုပ်က“မုန်တိုင်းမဝင်ရောက်မီကပင် တိုင်းဒေသကြီးသဘာဝဘေးစီမံခန့်ခွဲမှုကော်မတီအစည်းအဝေးပြုလုပ်ခဲ့ပြီး ပျက်စီးဆုံးရှုံးမှု အနည်းဆုံးဖြစ်စေရန်အတွက် ကြိုတင်ကာကွယ်ခြင်း၊ အရေးပေါ်တုန့်ပြန်ခြင်းနှင့်ပြန်လည်ထူထောင်ရေးလုပ်ငန်းဆောင်ရွက်နိုင်စေရေးစီမံဆောင်ရွက်ခဲ့ပါကြောင်း၊ တိုင်းဒေသကြီးအတွင်းပျက်စီးဆုံးရှုံးမှုများအနေဖြင့် နေအိမ်၊စာသင်ကျောင်း၊ဆေးရုံ၊ဆေးခန်းများ ထိခိုက်ပျက်စီးမှုများရှိခဲ့ပြီး စာရင်းဇယားများတိကျမှန်ကန်မှုရှိစေရေး စစ်ဆေးကြပ်မတ်ရန်လိုပါကြောင်း၊ဇွန်လ(၁)ရက်နေ့တွင် အခြေခံပညာကျောင်းများ ပြန်လည်ဖွင့်လှစ်မည်ဖြစ်သောကြောင့် စာသင်ကျောင်းဆောင် ပျက်စီးမှုများအား အမြန်ဆုံးပြန်လည်ပြုပြင်ရမှာဖြစ်ပါကြောင်းနှင့် ပြန်လည် ထူထောင်ရေးလုပ်ငန်းများအား အချိန်နှင့်တပြေးညီပြုပြင်ဆောင်ရွက်ရမှာဖြစ်ပါကြောင်း၊ ပြန်လည်ထူ ထောင်ရေးလုပ်ငန်းများအင်တိုက်အားတိုက်ဆောင်ရွက်နေသကဲ့သို့ တစ်ဖက်တွင်လည်း မိုးရာသီရောက်ရှိလာပြီဖြစ်၍ စိုက်ပျိုးရေးလုပ်ငန်းများကိုလည်း တိုးတက်အောင်မြင်အောင်ဆောင်ရွက်ကြရမှာဖြစ်ပါကြောင်း၊ မိုးစပါးတစ်ဧက(၁၀)တင်းနှုန်းပိုမိုထွက်ရှိရေးအတွက် တောင်သူလယ်သမားနေ့အခမ်းအနားတွင် စကားဝိုင်း‌များပြုလုပ်ဆွေးနွေးခဲ့ပြီးရည်မှန်းချက်များချမှတ်ဆောင်ရွက်ခဲ့ပါကြောင်း၊ စိုက်ပျိုးရေးဦးစီးဌာနမှရေးဆွဲထားသည့် မိုး စပါးတစ်ဧက(၁၀)တင်းနှုန်းပိုမိုထွက်ရှိရေးစီမံချက်များအား တောင်သူများသိရှိနားလည်လိုက်ပါဆောင်ရွက်နိုင်စေရေး အသိပညာပေးလုပ်ငန်းများဆောင်ရွက်ရန်လိုပါကြောင်း၊ နိုင်ငံ့စီးပွားမြှင့်တင်ရေးရန်ပုံငွေဖြင့် နွေစပါးနှင့်ပဲတီစိမ်းစိုက်တောင်သူများအားထောက်ပံ့ပေးခဲ့ပြီး တောင်သူများမှအချိန်မီပြန်လည် ပေးသွင်းနိုင်ရေး ကြပ်မတ်ရန်လိုပါကြောင်း” အမှာစကားပြောကြားသည်။ ဆက်လက်၍ ပုသိမ်ခရိုင်၊ကျုံပျော်ခရိုင်၊ဟင်္သာတခရိုင်၊မြန်အောင်ခရိုင်၊မြောင်းမြခရိုင်၊မအူပင်ခရိုင်၊ဖျာပုံခရိုင်နှင့် လပွတ္တာခရိုင်တို့မှ စီမံအုပ်ချုပ်ရေးအဖွဲ့ဥက္ကဋ္ဌများက သဘာဝဘေးအန္တရာယ်ကြောင့် နေအိမ်၊စာသင်ကျောင်း၊ဘုန်းတော်ကြီးကျောင်းနှင့် ဘာသာရေးအဆောက်အဦ၊ဌာနဆိုင်ရာအဆောက်အဦးများ ပျက်စီးဆုံးရှုံးမှုများ၊ ထိခိုက်ဒဏ်ရာရရှိမှုအခြေအနေများ၊ ပြန်လည်ထူထောင်ရေးနှင့်ပြန်လည်တည်ဆောက်ရေးလုပ်ငန်းများဆောင်ရွက်မှုအခြေအနေများ၊ နိုင်ငံ့စီးပွားမြှင့်တင်ရေးရန်ပုံငွေဖြင့် သွင်းအားစုများ ပြန်လည်ကောက်ခံရရှိမှုအခြေအနေများနှင့် ၂၀၂၃-၂၀၂၄ခုနှစ်၊မိုးစပါးတစ်ဧက(၁၀)တင်းနှုန်းပိုမိုထွက်ရှိရေးကြိုတင်ပြင်ဆင်ဆောင်ရွက်မှုနှင့် သစ်စိမ်းမြေသြဇာပိုက်ဆံလျှော် ထည့်သွင်းစိုက်ပျိုးပြီးစီးမှုအခြေအနေများကို အသီးသီးရှင်းလင်းတင်ပြချက်များနှင့်  အစည်းအဝေးသို့တက်ရောက်လာသူများက အထွေထွေဆွေးနွေးတင်ပြချက်ချက်များအပေါ် တိုင်းဒေသကြီး ဝန်ကြီးချုပ်က လိုအပ်သည်များကိုဖြည့်စွက်ဆွေးခဲ့ပြီး ပြန်လည် ထူထောင်ရေးလုပ်ငန်းများအမြန်ဆုံးဆောင်ရွက်စေရေးသက်ဆိုင်ရာတာဝန်ရှိသူများနှင့် ပေါင်းစပ်ညှိနှိုင်းဆောင်ရွက်ပေးခဲ့သည်။