ဧရာဝတီတိုင်းဒေသကြီးဝန်ကြီးချုပ် ဦးအေးကျော်သည် ရန်ကုန်-ပုသိမ်လမ်း မိုင် ၄၈ မိုင် ၇ ဖာလုံမှ ၄၉ မိုင်အတွင်း Oriental Highway Co.,Ltd မှ လမ်း ဘယ်ဘက်ခြမ်း ၄ဝဝ ပေခန့် ကွန်ကရစ်ခင်းခြင်း လုပ်ငန်းအားလည်း‌ကောင်း၊ ကြိမ်ပင်ဆည်-စက္ကော့-ဓနုဖြူ-ဇလွန် လမ်းပိုင်း ၃၅ မိုင် ၇ ဖာလုံအတွင်း လမ်းအထူးအဖွဲ့ ၂၁ မှ ၃ ဖာလုံအရှည်ခန့် ကတ္တရာလမ်းအနိမ့်အမြင့် ဖြေညှိခြင်းလုပ်ငန်းဆောင်ရွက် နေမှုအားလည်းကောင်း၊ ဟင်္သာတ-ဒူးယား-ဒေါင့်ကြီး-ဇလွန် လမ်းပိုင်း ၁၅ မိုင် ၁ ဖာလုံ အတွင်း အရှည် ၃ ဖာလုံ၊ အကျယ် ၁၈ ပေအား လမ်းဦးစီးဌာနမှ ကတ္တရာလမ်း အနိမ့်အမြင့် ဖြေညှိခြင်းလုပ်ငန်း ဆောင်ရွက်နေမှုအားလည်းကောင်း ကြည့်ရှုစစ်ဆေးခဲ့ပြီး လမ်းလုပ်ငန်းများ သတ်မှတ်စံချိန်စံညွှန်း များနှင့်အညီ အရည်အသွေးပြည့်မီစေရေး၊ လမ်းပိုင်းအလိုက် လုပ်ငန်းများဆောင်ရွက်နေစဉ်အတွင်း ယာဉ်ကြောကြပ်တည်းမှုမဖြစ်စေရေးနှင့် ယာဉ်/လမ်းအန္တရာယ် ကင်းရှင်းစေရေး စနစ်တကျ ဆောင်ရွက်ရန် မှာကြားခဲ့ပါသည်။

ဧရာဝတီတိုင်းဒေသကြီးဝန်ကြီးချုပ် ဦးအေးကျော်သည် တာဝန်ရှိသူများနှင့်အတူ ဓနုဖြူမြို့နယ်၊ ယင်းကတစ်ကျေးရွာရှိ ရေနက်ကွင်းတွင် ရေတစ်ဘောင်၊ ကုန်းတစ်ဘောင် စိုက်ပျိုးနည်းစနစ်ဖြင့် အလွိုင်းကုမ္ပဏီမှ စိုက်ပျိုးထားရှိသော အုန်းချိုမွှေးစိုက်ပျိုးရေးခြံ ဧက(၁၈၀) သို့ သွား‌ရောက်၍ အုန်းချိုမွှေးပင်များ စိုက်ပျိုးအောင်မြင်ဖြစ်ထွန်းနေမှု၊ ရိုဘက်စတာ မြေနိမ့်ကော်ဖီပင်များနှင့် ကွမ်းသီးပင်များ သီးညှပ် စိုက်ပျိုးထားရှိမှုများအား လိုက်လံကြည့်ရှုအားပေးခဲ့ပြီး ကုမ္ပဏီတာဝန်ရှိသူမှ နှစ်အလိုက် အုန်းချိုမွှေး စိုက်ခင်းလုပ်ငန်းဆောင်ရွက်ခဲ့မှုများ၊ အုန်းချိုမွှေးဘောင်တန်းစိုက်ပျိုးမှုများ၊ အောင်မြင်ဖြစ်ထွန်းမှု၊ အသီးစတင်ရရှိမှု၊ ဈေးကွက်သို့တင်ပို့ရောင်းချမှု အခြေအနေများအား ရှင်းလင်းတင်ပြခဲ့ရာ တိုင်းဒေသကြီးဝန်ကြီးချုပ်က အုန်းချိုမွှေးလုပ်ငန်းအပြင် အုန်းအခြေခံ တန်ဖိုးမြင့်ထုတ်ကုန်များ ထုတ်လုပ်နိုင်ရေးနှင့် မွေးမြူရေးလုပ်ငန်းများပါ တွဲဖက်လုပ်ကိုင်နိုင်ရေး ကြိုးပမ်းဆောင်ရွက်ရန် မှာကြားခဲ့ပြီး လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့ပါသည်။

ဧရာဝတီတိုင်းဒေသကြီးဝန်ကြီးချုပ်နှင့်အဖွဲ့သည် ဟင်္သာတခရိုင်၊ ဇလွန်မြို့နယ်၊ ကံ့ကော်ကုန်းကျေးရွာရှိ တောင်သူဦးဝင်းမြင့်ဦး၏ လယ်မြေတွင် ကျင်းပပြုလုပ်သည့် ၂၀၂၆-၂၀၂၇ ခုနှစ်၊ မိုးစပါး(RS-CS)မျိုးစေ့ထုတ်စံပြစိုက်ခင်း ဆင်းသုခစပါးမျိုး မိုးစပါးစံကွက်ရိတ်သိမ်းပွဲသို့ တက်ရောက် ကြည့်ရှုအားပေးပြီး ဆီထွက်သီးနှံ (နေကြာ)စိုက်ပျိုးမည့် တောင်သူများထံသို့ နေကြာမျိုးစေ့များ ပေးအပ်ခဲ့သည်။