ဧရာဝတီတိုင်းဒေသကြီးအစိုးရအဖွဲ့မှ ကြီးမှူးဖွင့်လှစ်သော ဗုဒ္ဓဘာသာ ယဉ်ကျေးလိမ္မာ သင်တန်းဆင်းပွဲ အခမ်းအနားအား ယနေ့ မွန်းလွဲပိုင်းက ပုသိမ်မြို့၊ ဧရာရွှေဝါခန်းမတွင် ကျင်းပရာ အခမ်းအနားသို့ ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ် ဦးတင်မောင်ဝင်း နှင့် ဇနီး၊ တိုင်းဒေသကြီးအစိုးရအဖွဲ့ဝင်ဝန်ကြီးများနှင့် ၎င်းတို့၏ဇနီးများ၊ တိုင်းဒေသကြီးအဆင့် ဌာနဆိုင်ရာများနှင့် သင်တန်းသား၊ သင်တန်းသူများ၊ နည်းပြ ဆရာ၊ ဆရာမများ တတ်ရောက် ခဲ့ကြသည်။ ဦးစွာ တက်ရောက်လာသူများက အခမ်းအနားအား နမောတဿ(၃) ကြိမ်ရွတ်ဆို ဘုရားကန်တော့ဖွင့်လှစ်ခဲ့ပါသည်။ ထို့နောက် တိုင်းဒေသကြီးဝန်ကြီးချုပ်က“အကျင့်စာရိတ္တ ကောင်းသူသည် လူကောင်းတစ်ယောက်ဖြစ်၍ နိုင်ငံနှင့်လူမျိုးအတွက် အားကိုးအားထားရပြီး အကျင့်စာရိတ္တယို့ယွင်းနေသူသည် လူဆိုးလူမိုက်ဖြစ်၍ အများပြည်သူအား အနှောက်အယှက်ပေးပြီး နိုင်ငံတော်နှင့်လူမျိုးကိုလည်း အန္တရာယ်ပြုစေနိုင်သူ ဖြစ်ပါကြောင်း၊ “ယနေ့လူငယ်၊ နောင်ဝယ်လူကြီး”ဟူသောဆိုရိုးစကားအတိုင်း လူငယ်များသည် နောင်အနာဂတ်ကာလ၏ ခေါင်းဆောင်ကောင်းများ ဖြစ်လာမည်ဖြစ်သောကြောင့် ယဉ်ကျေးမှုနှင့်ပြည့်စုံရန် အထူးလိုအပ်ပါကြောင်း၊ အကျင့်စာရိတ္တ ယဉ်ကျေးမှုနှင့်ပြည့်စုံရန် ငါးပါးသီလ၊ သုစရိုက်တရားဆယ်ပါး၊ မင်္ဂလာတရား (၃၈)ပါး၊ သိင်္ဂါလောဝါဒသုတ်လာ သားသမီးကျင့်ဝတ်၊ တပည့်ကျင့်ဝတ် စသည် များကို သိရှိနားလည်ပြီး ကျင့်သုံးရန်လည်းလိုအပ်ပါကြောင်း၊ အဆိုပါတရားများသည် မြန်မာလူမျိုးတို့အတွက် လိုက်နာရမည့် ကိုယ်ကျင့်စာရိတ္တ ယဉ်ကျေးမှုများ ဖြစ်ပါကြောင်း၊ သာသနာတော်ထွန်းကားပြန်ပွားရေးဦးစီးဌာနကလည်း နှစ်စဉ်မေလတွင် ဗုဒ္ဓဘာသာယဉ်ကျေးမှု စာမေးပွဲများ ကျင်းပပေးလျက်ရှိသည်ကိုတွေ့ရှိရပါကြောင်း၊ ယနေ့ယဉ်ကျေးလိမ္မာသင်တန်း ပြီးဆုံးအောင်မြင်ခဲ့သောသင်တန်းသားများအနေဖြင့် သဒ္ဓါတရားအပေါ် အခြေခံကာ တစ်ဆင့်တက်၍ ဗုဒ္ဓဘာသာယဉ်ကျေးမှုစာမေးပွဲကို ဖြေဆိုနိုင်အောင် ကြိုးစားအားထုတ်ကြရန် တိုက်တွန်းပြောကြားလိုပါကြောင်းနှင့် သင်တန်းပြီးဆုံးသည်အထိ သင်ကြားပြသပေးသည့် သင်တန်းနည်းပြဆရာများနှင့် သင်ယူလေ့လာမှတ်သားကြသည့် သင်တန်းသား၊ သင်တန်းသူ များအား အထူးပင်ကျေးဇူးတင်ရှိပါကြောင်း”သင်တန်းဆင်းအမှာစကားပြောကြားခဲ့သည်။ ထို့နောက် သင်တန်းဆင်းအောင်လက်မှတ်များကို တိုင်းဒေသကြီးလူမှုရေးရာဝန်ကြီးက သင်တန်းသား၊ သင်တန်းသူများကိုယ်စား သင်တန်းသားတစ်ဦးအား ပေးအပ်ခဲ့ပြီးနောက် သင်တန်းတွင် အထူးအောင်မြင်သူ(၃)ဦးအား ဂုဏ်ပြုလက်မှတ်နှင့် ဂုဏ်ပြုဆုငွေများကို တိုင်းဒေသကြီးဝန်ကြီးချုပ်၏ ဇနီးကလည်းကောင်း၊ တတိယဆု၊ ဒုတိယဆုနှင့်ပထမဆုရရှိသော သင်တန်းသူများနှင့် သင်တန်းနည်းပြ ဆရာ/ဆရာမများအား ဂုဏ်ပြုလက်မှတ်များနှင့် ဂုဏ်ပြု ဆုငွေများကို တိုင်းဒေသကြီးဝန်ကြီးချုပ်ကလည်းကောင်း အသီးသီးချီးမြှင့်ပေးအပ်ခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့် ဧည့်သည်တော်များ၊ သင်တန်းသား၊ သင်တန်းသူ များသည် စုပေါင်းမှတ်တမ်း ဓာတ်ပုံရိုက်ကူးခဲ့ကြပြီး အခမ်းအနားကို “ဗုဒ္ဓသာသနံ စိရံ တိဋ္ဌတု”သုံးကြိမ်ရွတ်ဆိုဆုတောင်း၍ ရုပ်သိမ်းခဲ့ပါသည်။ အဆိုပါ သင်တန်းအား ယခုလ(၅)ရက်နေ့မှ(၁၁)ရက်နေ့ထိ တစ်ပတ် ကြာဖွင့်လှစ်ခဲ့ပြီး တိုင်းဒေသကြီးအတွင်းရှိ ဌာနဆိုင်ရာဝန်ထမ်းများနှင့်ဝန်ထမ်းမိသားစုဝင်များ၊ ကျောင်းသား/ ကျောင်းသူများ စုစုပေါင်း သင်တန်းသား၊ သင်တန်းသူ(၂၅၆)ဦး တက်ရောက်ခဲ့ကြောင်း သိရသည်။

မြန်မာနိုင်ငံတစ်ဝန်းရှိ စာကြည့်တိုက်များဖွံ့ဖြိုးတိုးတက်ရေးအတွက် အလှူငွေနှင့်စာအုပ် စာစောင်များပေးအပ်လှူဒါန်းပွဲ အခမ်းအနားကို ယနေ့နံနက်ပိုင်းက ပုသိမ်မြို့၊ မြို့တော်ခန်းမ တွင် ကျင်းပခဲ့ရာ အခမ်းအနားသို့ တိုင်းဒေသကြီးဝန်ကြီးချူပ်နှင့်ဇနီး၊ အစိုးရအဖွဲ့ဝင်များနှင့် ဇနီးများ၊ ဌာနဆိုင်ရာများနှင့် အလှူရှင်များတက်ရောက်ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်နှင့်ဧည်သည်များသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာန(ရုံးချုပ်)မှပေးပို့သည့် “စာပဒေသာ ဝေဆာစေမည်” ဗီဒီယိုမှတ်တမ်းပြသမှုကို ကြည့်ရှုအားပေးပြီးနောက် တိုင်းဒေသကြီးဝန်ကြီးချုပ်က “ယနေ့တွင် မြန်မာနိုင်ငံတစ်ဝန်းရှိ စာကြည့်တိုက်များ ဖွံ့ဖြိုးတိုးတက်ရေးအတွက် အလှူငွေနှင့်စာအုပ်စာစောင်များပေးအပ် လှူဒါန်းပွဲတွင် အလှူရှင်အသီးသီးမှ အလှူငွေများနှင့် စာအုပ်စာပေမျိုးစုံ အုပ်ရေ တစ်သောင်းကျော် ပေးအပ်လှူဒါန်းကြပါကြောင်း၊ ဧရာဝတီတိုင်းဒေသကြီးအတွင်းရှိ မြို့နယ်များတွင် အခြေခံစာတတ်မြောက်ရေးလုပ်ငန်းကို ယခုလ ၈ ရက်နေ့မှစ၍ မေလ(၁၉) ရက်နေ့အထိ စာသင်ဝိုင်း(၁၇၇၁)ဝိုင်းတွင် စာသင်သား (၂၅၀၁၆)ဦးအား အခြေခံ စာတတ်မြောက်ရေးအတွက် သက်ဆိုင်ရာ စာဖတ်ဝိုင်းအသီးသီးတွင် သင်ကြားပေးလျက်ရှိပါကြောင်း၊ အလှူရှင်များ လှူဒါန်းသောစာအုပ်စာပေ များသည် အနယ်နယ်အရပ်ရပ်တွင် ရှိသည့် ကျေးရွာစာကြည့်များသို့ ရောက်ရှိသွားပြီး အခြေခံစာတတ်မြောက်ရေးလုပ်ငန်း စာသင်ဝိုင်းများမှ ပြည်သူများအနေဖြင့်လည်း ထိုစာအုပ်စာပေများကို ဖတ်ရှုနိုင်မည်ဖြစ်၍ များစွာအကျိုးရှိပါကြောင်း၊ စာပေတွင် ရသစာပေနှင့် သုတစာပေဟူ၍ရှိရာ လူတို့၏ နှလုံးသားအာဟာရ၊ ဦးနှောက်အာဟာရတို့အတွက် စာပေများကို ဖတ်ရှုသင့်ကြပါကြောင်း၊ လူအဖွဲအစည်းတွင် ဉာဏ်ပညာဗဟုသုတပြည့်စုံသူ၊ စောင့်စည်းမှုရှိသူ၊ ရင့်ကျက်တည်ငြိမ်သူတို့ကသာ ရှေ့တန်းမှဦးဆောင်တာဝန်ယူကြရပါကြောင်း၊ ထို့ကြောင့်သုတ၊ ရသ စာပေကောင်းများကို ငယ်စဉ်ကပင် စွဲစွဲမြဲမြဲ ဖတ်ရှုသည့် အလေ့အထ ရှိကြရန်လိုပါကြောင်း၊ အသိပညာမြင့်မားလာအောင် လုပ်ဆောင်ကြရန်အတွက် စာကြည့်တိုက်များ၏ အခန်းကဏ္ဍနှင့် စာကြည့်တိုက်ယဉ်ကျေးမှု ထွန်းကားရေးကို လုပ်ဆောင်ကြရန်လည်း လိုအပ်မည်ဖြစ်ပါကြောင်း၊ ပြန်ကြားရေးဝန်ကြီးဌာနက တာဝန်ယူဖွင့်လှစ်ပေးနေသည့် ခရိုင်၊ မြို့နယ်၊ မြို့အဆင့်ရှိ စာကြည့်တိုက်ပေါင်း (၃၄) တိုက်ရှိပြီး ဒေသဆိုင်ရာအဖွဲ့အစည်းများ၊ လူပုဂ္ဂိုလ်များနှင့် ရပ်ရွာပြည်သူလူထုအစီအစဉ်ဖြင့်ဖွင့်လှစ်နေသည့် စာကြည့်တိုက်ပေါင်း (၃၂၃)တိုက်ရှိပါကြောင်း၊ ၎င်းဒီစာကြည့်တိုက်များတွင် သုတ၊ ရသစာပေတွေကို ရှာဖွေဖတ်ရှုလိုသူများအား ဝမ်းမြောက်ဝမ်းသာ လက်ကမ်းကြိုဆို နေကြပါကြောင်းနှင့် စာပေဝမ်းစာပြည့်မီရေးအတွက် အားလပ်သည့်အချိန်များတွင် စာပေများဖတ်ရှုရန်လိုပါကြောင်း၊ တိုင်းဒေသကြီးအတွင်းရှိ စာကြည့်တိုက်များ ဖွံ့ဖြိုးတိုးတက်ရေးအတွက် တက်ညီလက်ညီဖြင့် အားလုံးဝိုင်းဝန်းဆောင်ရွက် ပေးကြရမည်ဖြစ်ကြောင်း”အမှာစကားပြောကြားသည်။ ထို့နောက် တိုင်းဒေသကြီးအစိုးရအဖွဲ့ ဝန်ကြီးချုပ်နှင့်ဇနီးမိသားစုက သုတရသစာအုပ် (၂၅၀)အားလှူဒါန်းရာ တိုင်းဒေသကြီးအစိုးရအဖွဲ့၊ လူမှုရေးရာဝန်ကြီးက လက်ခံရယူကာ ဂုဏ်ပြု မှတ်တမ်းလွှာများ ပေးအပ်ခဲ့ပြီးနောက် တိုင်းဒေသကြီးအစိုးရအဖွဲ့မှ လှူဒါန်းသော သုတရသ စာအုပ် (၅၀၀၀)အား တိုင်းဒေသကြီးအစိုးရအဖွဲ့ကိုယ်စား စီးပွားရေးရာဝန်ကြီးကလည်းကောင်း၊ တိုင်းဒေသကြီးအတွင်းရှိ ဌာနဆိုင်ရာများမှ လှူဒါန်းသော သုတရသစာအုပ်(၂၀၀၀)အား ဌာနဆိုင်ရာများကိုယ်စား တိုင်းဒေသကြီးအစိုးရအဖွဲ့ အတွင်းရေးမှူးကလည်းကောင်း၊ တိုင်းဒေသကြီး/ ခရိုင်/ မြို့နယ်များမှ လှူဒါန်းသည့်အလှူငွေ (၉၁၆၅၀၀၀)ကျပ် အား တိုင်းဒေသကြီးပြည်တွင်းအခွန်များဦးစီးဌာန တိုင်းဒေသကြီးဦးစီးမှူးကလည်းကောင်း၊ မြို့မိမြို့ဖ များမှ လှူဒါန်းသည့် သုတရသ စာအုပ်(၁၆၈၂) အုပ်အား မြို့မိမြို့ဖတစ်ဦးက လည်းကောင်း၊ မအူပင်မြို့နယ် မြို့မိမြို့ဖများမှ လှူဒါန်းသည့် သုတရသစာအုပ် (၁၆၈၁) အုပ်အား မြို့မိမြို့ဖ တစ်ဦးကလည်းကောင်း အသီးသီးပေးအပ်လှူဒါန်းရာ တိုင်းဒေသကြီးဝန်ကြီးချုပ်က လက်ခံရယူ ခဲ့ပြီး ဂုဏ်ပြုမှတ်တမ်းလွှာများပြန်လည်ပေးအပ်ခဲ့သည်။ ဆက်လက်၍ တိုင်းဒေသကြီး ဝန်ကြီးချုပ်နှင့် ဧည့်သည်တော်များက စုပေါင်းမှတ်တမ်းတင်ဓာတ်ပုံ ရိုက်ကူးခဲ့ကြပြီး လှူဒါန်းပေးအပ်သည့် စာအုပ်စာစောင်များ ခင်းကျင်းပြသထားမှုများအား လှည့်လည်ကြည့်ရှု အားပေးခဲ့ကြောင်းသိရသည်။

ဧရာဝတီတိုင်းဒေသကြီးအစိုးရအဖွဲ့က ကြီးမှူးကျင်းပသည့် စုပေါင်းရဟန်းခံရှင်ပြု အလှူတော် မင်္ဂလာရေစက်ချအခမ်းအနားကို ပုသိမ်မြို့၊ သာသနာ့ဗိမာန်တော်ကြီး၌ ယနေ့ နံနက်ပိုင်းကပြုလုပ်ခဲ့ရာ တိုင်းဒေသကြီး ဝန်ကြီးချုပ် ဦးတင်မောင်ဝင်းနှင့်ဇနီး၊ အနောက်တောင် တိုင်းစစ်ဌာနချုပ် တိုင်းမှူးနှင့်ဇနီး၊ ပုသိမ်လေတပ်စခန်းဌာနချုပ်မှူးနှင့်ဇနီး၊ အစိုးရအဖွဲ့ဝင် ဝန်ကြီးများနှင့် ဇနီးများ၊ ဌာနဆိုင်ရာများ၊ ပုသိမ်မြို့ပေါ်ရပ်ကွက်များမှ ရဟန်းနှင့်ရှင်သာမဏေ များ၏ မိသားစုဝင်များ တက်ရောက်ခဲ့ကြသည်။ ရှေးဦးစွာ တိုင်းဒေသကြီးဝန်ကြီးချုပ်နှင့် ဧည့်ပရိသတ်များသည် ဘုရားအမှူးပြုသော ဆရာတော်ကြီးများနှင့် သိမ်တော်ဆင်း သံဃာတော်များ၊ ရှင်သာမဏေများအား လှူဖွယ် ဝတ္ထုပစ္စည်းများဖြင့် သိမ်ဆင်းလောင်းလှူပူဇော်ခဲ့သည်။ ထို့နောက် ရေစက်ချမင်္ဂလာ အခမ်းအနားအားပြုလုပ်ရာ တိုင်းဒေသကြီးဝန်ကြီးချုပ်နှင့် ဧည့်ပရိသတ်များက အခမ်းအနားကို “နမောတဿ”သုံးကြိမ်ရွတ်ဆို ဘုရားကန်တော့ဖွင့်လှစ်ခဲ့ပြီးနောက် နိုင်ငံတော်ဩဝါဒါစရိယ၊ ပုသိမ်မြို့၊ ညောင်ပင်သာပရိယတ္တိစာသင်တိုက် ဦးစီးပဓာနနာယက ဆရာတော် (အဘိဓဇမဟာ ရဋ္ဌဂုရု၊ အဘိဓဇအဂ္ဂမဟာသဒ္ဓမ္မဇောတိက၊ အဂ္ဂမဟာပဏ္ဍိတ) ဘဒ္ဒန္တဝိဿုတ မဟာထေရ်မြတ် ထံမှ ဧည့်ပရိသတ်များကငါးပါးသီလ ခံယူဆောက်တည်ခဲ့ကြပြီး ဆရာတော်၊ သံဃာတော်များ ချီးမြှင့်တော်မူသော ပရိတ်တရားတော်များကို ဆက်လက်နာယူကြည်ညို ခဲ့ကြသည်။ ထို့နောက် သံဃာတော်အရှင်သူမြတ်များအား တိုင်းဒေသကြီးဝန်ကြီးချုပ်နှင့်ဇနီး၊ တိုင်းမှူးနှင့်ဇနီး၊ ပုသိမ်လေတပ်စခန်းဌာနချုပ်မှူးနှင့်ဇနီးနှင့် အစိုးရအဖွဲ့ဝင်များက လှူဖွယ်ဝတ္တု ပစ္စည်းများ ဆက်ကပ်လှူဒါန်းခဲ့သည်။ ထို့နောက် တိုင်းဒေသကြီးသံဃနာယကအဖွဲ့ဩဝါဒါစရိယ၊ ပုသိမ်မြို့၊ မရမ်းချိုကျောင်းတိုက်၏ ပဓာနနာယကဆရာတော် (အဂ္ဂမဟာဂန္ထဝါစကပဏ္ဍိတ၊ အဂ္ဂမဟာသဒ္ဓမ္မဇောတိကဓဇ) ဘဒ္ဒန္တသောဘိတ မဟာထေရ်အရှင်သူမြတ်ထံမှ အနုမောဒနာ တရားနာကြား၍ လှူဒါန်းမှုအစုစုတို့အတွက် ရေစက်သွန်းချ အမျှပေးဝေခဲ့ကာ “ဗုဒ္ဓသာသနံ စိရံ တိဋ္ဌတု”သုံးကြိမ်ရွတ်ဆို ဆုတောင်း၍ အခမ်းအနားအား ရုပ်သိမ်းခဲ့ပြီး ရတနာရွှေမိုး၊ ငွေမိုးများ ရွာသွန်းဖြိုးခဲ့သည်။ ယင်းနောက် တိုင်းဒေသကြီးဝန်ကြီးချုပ်နှင့်ဇနီး၊ အစိုးရအဖွဲ့ဝင်များနှင့် ၎င်းတို့၏ ဇနီးများက သံဃာတော်အရှင်သူမြတ်များနှင့် ရဟန်း၊ သာမဏေများအား နေ့ဆွမ်းဆက်ကပ်လှူဒါန်းခဲ့ပြီး ဧည့်ပရိတ်သတ်များအား နေ့လယ်စာဖြင့် ဧည့်ခံကျွေးမွေးခဲ့ပါသည်။ ဧရာဝတီတိုင်းဒေသကြီးအစိုးရအဖွဲ့က ကြီးမှူးကျင်းပသည့် စုပေါင်းရဟန်းခံရှင်ပြု အလှူတော် မင်္ဂလာအခမ်းအနားတွင် တိုင်းဒေသကြီး၊ ခရိုင်၊ မြို့နယ် ဌာနဆိုင်ရာများမှ အရာထမ်း၊ အမှုထမ်းများနှင့် မြို့ပေါ်ရပ်ကွက်များမှ ရဟန်း(၁၄၆)ပါး၊ ရှင်သာမဏေ(၅၆)ပါး၊ စုစုပေါင်း (၂၀၂)ပါးအား မြင့်မြတ်သော သာသနာ့ဘောင်သို့ သွတ်သွင်းချီးမြှင့်ခဲ့ပါသည်။

ဧရာဝတီတိုင်းဒေသကြီးအစိုးရအဖွဲ့က ကြီးမှူးကျင်းပသည့် စုပေါင်းရဟန်းခံ ရှင်ပြုအလှူတော်မင်္ဂလာအခမ်းအနား ရဟန်းလောင်းနှင့် ရှင်သာမဏေလောင်းများ ပုသိမ်မြို့တွင်းသို့ လှည့်လည်ခြင်းကို ယနေ့နံနက်ပိုင်းက ပုသိမ်မြို့၊ သာသနာ့ဗိမာန်တော်ကြီးတွင် စုရပ်ပြုလုပ်၍ လှည့်ခဲ့ကြသည်။ ရှေးဦးစွာ ရဟန်းလောင်း(၁၄၆ )ဦးနှင့် ရှင်သာမဏေလောင်း(၅၆)ဦး၊ စုစုပေါင်း (၂၀၂)ဦးတို့အား သာသနာ့ဗိမာန်တော်ကြီးမှတဆင့် မဟာဗန္ဓုလလမ်း တစ်လျှောက်သို့ မော်တော်ယာဉ်များဖြင့် စည်ကားသိုက်မြိုက်စွာ ရှင်လောင်းလှည့်လည်၍ ပုသိမ်မြို့၏ ကျက်သရေဆောင် ရှေးဟောင်းသမိုင်းဝင် ရွှေမုဋ္ဌောမဟာစေတီတော်မြတ်ကြီး၏ ရင်ပြင်တော် ဗောဓိညောင်ပင်တွင် ရဟန်းလောင်းများနှင့် ရှင်သာမဏေလောင်းများအား နတ်ပြခဲ့ပြီး စေတီတော်မြတ်ကြီး၏ အရှေ့ဘက်ရင်ပြင်တွင် စုပေါင်းဘုရားရှိခိုးပူဇော်ခဲ့ကြသည်။ ထိုမှတဆင့် ကုန်သည်လမ်း၊ ကမ်းနားလမ်း၊ မဟာဗန္ဓုလလမ်းမှတဆင့် ဝန်ကြီးများအိမ်ရာသို့ စည်ကား သိုက်မြိုက်စွာ ရှင်လောင်းလှည့်လည်ခဲ့ပြီး သာသနာ့ဗိမာန်တော်ကြီးသို့ ပြန်လည်ပို့ဆောင် ခဲ့ကြသည်။ ထို့သို့ ရှင်လောင်းလှည့်လည်မှုများကို တိုင်းဒေသကြီးဝန်ကြီးချုပ် နှင့်တာဝန်ရှိသူများက ကြည့်ရှုအားပေးခဲ့ကြပြီး သာသနာ့ဗိမာန်တော်ကြီးတွင် ရဟန်းလောင်း များနှင့် ရှင်သာမဏေလောင်းများအား နံနက်စာကျွေးမွေးနေမှုများကို ကြည့်ရှုအားပေးခဲ့သည်။ ထို့နောက် ဆံချပရိတ်တရားတော်နာ မင်္ဂလာအခမ်းအနားအား ဆက်လက်ပြုလုပ်ရာ တိုင်းဒေသကြီးဝန်ကြီးချုပ်နှင့်ဇနီး တိုင်းဒေသကြီးအစိုးရအဖွဲ့ဝင်ဝန်ကြီးများနှင့် ဇနီးများ၊ ဧည့်ပရိသတ်များ၊ ရဟန်းလောင်း၊ ရှင်သာမဏေလောင်းများသည် ကျောင်းထိုင်ဘုန်းကြီး သင်တန်းကျောင်း ကျောင်းအုပ်ဆရာတော် ဒေါက်တာဘဒ္ဒန္တ ဇောတိဿရ MA.Ph.D(India) အရှင်သူမြတ်ထံမှ ငါးပါးသီခံယူဆောက်တည်၍ ဆရာတော်၊ သံဃာတော်အရှင်သူမြတ်များ ရွတ်ပွားချီးမြှင့်တော်မူသော ပရိတ်တရားတော်များအား နာယူကြည်ညိုကြခဲ့ကြသည်။ ဆက်လက်၍ ဆံချမင်္ဂလာအခမ်းအနားအားပြုလုပ်ရာ အလှူ့ဒါယကာ၊ အလှူ့ဒါယကာမများမှ ရဟန်းလောင်းများနှင့် ရှင်သာမဏေလောင်းများအား ဆရာတော်၊ သံဃာတော် အရှင်သူမြတ်များက ဆံချမင်္ဂလာပြုလုပ်ပေးခြင်းအား ကြည်ညိုသဒ္ဒါပွားခဲ့ကြသည်။ ထို့နောက် ပဗ္ဗဇ္ဇမင်္ဂလာအခမ်းအနားအား ဆက်လက်ပြုလုပ်ရာ ကျောင်းထိုင်ဘုန်းကြီးသင်တန်းကျောင်း ကျောင်းအုပ်ဆရာတော် ဒေါက်တာဘဒ္ဒန္တ ဇောတိဿရ MA.Ph.D (India)အရှင်သူမြတ်က ရဟန်းလောင်းများနှင့် ရှင်သာမဏေလောင်းများအား ရှင်သာမဏေအဖြစ်သို့ သွပ်သွင်းချီးမြှင့် ပေးခဲ့ပြီး အသီးသီးဘွဲ့များ ဆက်ကပ်ခဲ့ကြကာ မြောင်းမြကျောင်းပရိယတ္တိစာသင်တိုက်၊ တိုက်ကြီးကျောင်းပရိယတ္တိစာသင်တိုက်နှင့် ပုသိမ်မြို့ပေါ်ရှိ ဘုန်းတော်ကြီးကျောင်းများတွင် သိမ်တက်မင်္ဂလာ ပြုလုပ်ခဲ့ကြသည်။ ဧရာဝတီတိုင်းဒေသကြီးအစိုးရအဖွဲ့က ကြီးမှူးကျင်းပသည့် စုပေါင်းရဟန်းခံရှင်ပြု အလှူတော် မင်္ဂလာအခမ်းအနားတွင် ရဟန်း(၁၄၆)ပါး၊ ရှင်သာမဏေ (၅၆)ပါး၊ စုစုပေါင်း (၂၀၂)ပါးအား မြင့်မြတ်သော သာသနာ့ဘောင်သို့ သွတ်သွင်းချီးမြှင့်ခဲ့ပါသည်။

၂၀၂၄-၂၀၂၅ ဘဏ္ဍာရေးနှစ်၊ ဒေသန္တရစီမံကိန်းတာဝန်ပေးအပ်ပွဲအခမ်းအနားအား ယနေ့ မွန်းလွဲပိုင်းက ပုသိမ်မြို့၊ ဧရာရွှေဝါခန်းမတွင်ပြုလုပ်ခဲ့ရာ တိုင်းဒေသကြီးဝန်ကြီးချုပ် ဦးတင်မောင်ဝင်း၊ အစိုးရအဖွဲ့ဝင်ဝန်ကြီးကြီးများ၊ ဌာနဆိုင်ရာများနှင့် ခရိုင်(၈)ခရိုင်မှ ခရိုင်စီမံအုပ်ချုပ်ရေးအဖွဲ့ ဥက္ကဋ္ဌများ တက်ရောက်ခဲ့ကြသည်။ ဒေသန္တရစီမံကိန်းတာဝန်ပေးအပ်ပွဲတွင် တိုင်းဒေသကြီး ဝန်ကြီးချုပ်က “ ၂၀၂၄-၂၀၂၅ ဘဏ္ဍာရေးနှစ်အတွက် ဒေသန္တရစီမံကိန်းများ အောင်မြင်စွာ အကောင်အထည်ဖော် ဆောက်ရွက် နိုင်ရေးအတွက် တာဝန်ပေးအပ်ခြင်းဖြစ်ပါကြောင်း၊ တိုင်းဒေသကြီး၏ စီးပွားရေး (GDP) အခြေအနေကို လေ့လာကြည့်ပါက ၂၀၂၂-၂၀၂၃ ဘဏ္ဍာရေးနှစ်တွင် ၂.၄ ရာခိုင်နှုန်းတိုးတက်ရန် ရည်မှန်းထားရာ ၂.၂ ရာခိုင်နှုန်း တိုးတက်ခဲ့ပါကြောင်း၊ ၂၀၂၃-၂၀၂၄ ဘဏ္ဍာရေးနှစ်တွင် ၁.၂ ရာခိုင်နှုန်း တိုးတက်ရန် ရည်မှန်းထားရာ ခန့်မှန်းခြေစာရင်းများအရ ၂.၆ ရာခိုင်နှုန်း တိုးတက်မည်ဟု ခန့်မှန်းရပါကြောင်း၊ ယခု ၂၀၂၄-၂၀၂၅ ဘဏ္ဍာရေးနှစ်တွင် ယခင်နှစ်၏ အားနည်းချက်များအား သုံးသပ်ပြီး ရည်မှန်းချက်များအောင်မြင်အောင် အကောင်အထည်ဖော် ဆောင်ရွက်ရမည်ဖြစ်ကြောင်း၊ ဒေသလိုအပ်ချက်များနှင့် ဒေသခံပြည်သူများ၏ တင်ပြချက် များအား အလေးထား၍ သက်ဆိုင်ရာ ကဏ္ဍအလိုက် ဖြည့်ဆည်းဆောင်ရွက် ပေးနိုင်ရေး ဘဏ္ဍာနှစ်အလိုက်လျာထားဆောင်ရွက်လျက်ရှိပါကြောင်း၊ စိုက်ပျိုးသီးနှံများ သီးနှံစုံပန်းတိုင် အထွက်နှုန်းရောက်စေရေးနှင့်စိုက်ပျိုးရေးစံပြ တိုင်းဒေသကြီးဖြစ်စေရေးဆောင်ရွက်လျက် ရှိပါကြောင်း၊ စားသုံးဆီဖူလုံရေးအတွက် နေကြာ၊ မြေပဲ၊ နှမ်း အစရှိသည့် ဆီထွက်သီးနှံ များကိုလည်း ပန်းတိုင်အထွက်နှုန်းရရှိရေးနှင့် စိုက်ဧကပြည့်မီရေး အကောင်အထည်ဖော် ဆောင်ရွက်လျက်ရှိပါကြောင်း၊ ရိုးပြတ်ကျန် ဧကများလျော့နည်းစေရေး၊ တစ်နှစ်သုံးသီး စိုက်ပျိုးနိုင်ရေးကိစ္စရပ်များကိုလည်း အကောင်အထည်ဖော်ဆောင်ရွက်ရမည်ဖြစ်ပါကြောင်း၊ တိုင်းဒေသကြီးအတွင်း MSME လုပ်ငန်းများ ဖွံ့ဖြိုးတိုးတက်ရန်အတွက် စိုက်ပျိုး၊ မွေးမြူရေး ထွက်ကုန်အခြေခံ ကုန်ထုတ်လုပ်ငန်းများ တိုးတက်လာရန် ကြိုးပမ်းရမည်ဖြစ်ပါကြောင်း၊ ဒေသန္တရစီမံကိန်းပါ ရည်မှန်းချက်များ အောင်မြင်အောင် အကောင်အထည်ဖော်ဆောင်ရွက်ရန် တိုင်းဒေသကြီးအစိုးရအဖွဲ့ဝင်များ၊ ဌာနဆိုင်ရာတာဝန်ရှိသူများအနေဖြင့် မိမိတို့တာဝန်ယူ ထားသည့် ကဏ္ဍများအလိုက် စနစ်တကျကြပ်မတ်၍ အလေးထားဆောင်ရွက်ရန်လိုပါကြောင်း”အမှာစကားများပြောကြားသည်။ ထို့နောက် တိုင်းဒေသကြီးဝန်ကြီးချုပ်က အစိုးရအဖွဲ့ဝင်ဝန်ကြီးများနှင့် တိုင်းဒေသကြီးအဆင့် ဌာနဆိုင်ရာများအား တိုင်းဒေသကြီး၏ ဒေသန္တရစီမံကိန်းတာဝန်များအားလည်းကောင်း၊ ခရိုင်စီမံအုပ်ချုပ်ရေးအဖွဲ့ ဥက္ကဋ္ဌများအား သက်ဆိုင်ရာခရိုင်များ၏ ဒေသန္တရစီမံကိန်း တာဝန်များ အားလည်းကောင်း အသီးသီးပေးအပ်ခဲ့ကြောင်းသိရသည်။