ဧရာဝတီတိုင်းဒေသကြီးဝန်ကြီးချုပ် ဦးအေးကျော်သည် ယမန်နေ့ညနေပိုင်းက ပုသိမ်မြို့၊ ကမ်းနားလမ်းရှိ ဧရာဝတီစာကြည့်တိုက်သို့သွားရောက်၍ ပြည်သူများ စာပေလာရောက်ဖတ်ရှုနေမှုများကို ကြည့်ရှုအားပေးပြီး စာကြည့်တိုက်များတွင် ခေတ်စနစ်နှင့် လျော်ညီသည့် သုတ/ရသ စာအုပ် စာစောင် အသစ်များတိုးပွားအောင် ဖြည့်တင်းပေးမှသာ စာဖတ်ပရိသတ်များ၊ ကျောင်းသား၊ ကျောင်းသူများနှင့် လူငယ်များ၏ စာဖတ်လိုစိတ်နှင့် လေ့လာလိုစိတ်ကို ပိုမိုလှုံ့ဆော်ဖန်တီးပေးနိုင်မည်ဖြစ်ပါကြောင်း၊ စာပေမှတစ်ဆင့် အသိပညာများ စဉ်ဆက်မပြတ် လေ့လာ နိုင်ရေး အခွင့်အလမ်းများ ဖန်တီးပေးရန် စာကြည့်တိုက်များ ဖွံ့ဖြိုးတိုးတက်တက်အောင် ဆောင်ရွက် ရမည် ဖြစ်ပါကြောင်း” ပြောကြားပြီး သုတ၊ ရသ စာအုပ်များစုံလင်စွာထားရှိစေရေး၊ သတင်းစာ၊ မဂ္ဂဇင်း၊ ဆောင်းပါးများ စုံလင်စွာထားရှိစေရေး၊ စာဖတ်သူများပိုမို စိတ်ပါဝင်စားစွာ လာရောက်ဖတ်ရှုနိုင်ရေးပြင်ဆင်ထားရှိစေရေး၊ စာအုပ်များပျက်စီးမှုများမဖြစ်ပေါ်ရေးနှင့် စာကြည့်တိုက်များ ရေရှည်ဖွံ့ဖြိုးတိုးတက်စေရေးအတွက် လိုအပ်သည်များကို မှာကြားခဲ့သည်။

ဧရာဝတီတိုင်းဒေသကြီးဝန်ကြီးချုပ် ဦးအေးကျော်သည် တာဝန်ရှိသူများနှင့်အတူ ပုသိမ်မြို့၊ ဧရာရွှေဝါခန်းမတွင် ပြုလုပ်သည့် အပြည်ပြည်ဆိုင်ရာသက်ကြီးပုဂ္ဂိုလ်များနေ့ အခမ်းအနားသို့ တက်ရောက်ခဲ့ပြီး တိုင်းဒေသကြီးဝန်ကြီးချုပ်က“ သက်ကြီးရွယ်အိုများအပါအဝင် လူသားအားလုံး၏ ဂုဏ်သိက္ခာ နှင့်အညီခံစားခွင့်ရှိသည့် အခွင့်အရေးများကို အသိအမှတ်ပြုခြင်းသည် လွတ်လပ်မှု၊ တရားမျှတမှု၊ ငြိမ်းချမ်းမှုတို့၏ အခြေခံအုတ်မြစ်ဖြစ်ပါကြောင်း၊ သက်ကြီးပုဂ္ဂိုလ်များကို လေးစားတန်ဖိုးထားပြီး အခွင့်အရေးများကို အသိအမှတ်ပြုဖော်ဆောင်ပေးခြင်း၊ လေးစားစွာဆက်ဆံပေးခြင်း၊ ပြုစုစောင့်ရှောက်မှုပေးခြင်းများကိုလုပ်ဆောင်ပေးကြရန်၊ ဌာနဆိုင်ရာတာဝန်ရှိပုဂ္ဂိုလ်များ အနေ ဖြင့်လည်း လူ့စွမ်းအားအရင်းအမြစ်တစ်ခုဖြစ်သည့် ဘိုးဘွားများအရေးကို နိုင်ငံတော် ဖွံ့ဖြိုးတိုးတက်ရေးလုပ်ငန်းများတွင် ထည့်သွင်းဆောင်ရွက်ပေးကြရန်နှင့် ဥပဒေ၊ နည်းဥပဒေများနှင့်အညီ ပြုစုစောင့်ရှောက်ပေးကြရန်” ပြောကြားသည်။

ဧရာဝတီတိုင်းဒေသကြီးအစိုးရအဖွဲ့ရုံး၊ ဧည့်ခန်းမ၌ ဟင်္သာတခရိုင်၊ လေးမျက်နှာမြို့နယ်ရေဘေးကယ်ဆယ်ရေးလုပ်ငန်းများအတွက် ပြည်သူ့လွှတ်တော် တပ်မတော်သားကိုယ်စားလှယ်များက အလှူငွေကျပ်သုံးဆယ့်ရှစ်သိန်းငါးသောင်းအားလာရောက် လှူဒါန်းရာ တိုင်းဒေသကြီးဝန်ကြီးချုပ်က လက်ခံရယူခဲ့ပြီး ဂုဏ်ပြုမှတ်တမ်းလွှာ ပြန်လည်ပေးအပ်ခဲ့သည်။

ဧရာဝတီတိုင်းဒေသကြီး၊ ပုသိမ်မြို့၊ မြို့တော်ခန်းမ၌ (၆၂) နှစ်မြောက် မြန်မာနိုင်ငံ ရဲတပ်ဖွဲ့နေ့ အခမ်းအနားကို ယနေ့နံနက်ပိုင်းကကျင်းပခဲ့ရာ အခမ်းအနားသို့ တိုင်းဒေသကြီး ဝန်ကြီးချုပ်ဦးအေးကျော်သည် တာဝန်ရှိသူများနှင့်အတူ တက်ရောက်ခဲ့ပြီး ဆုရရှိသူများအား ဆုများချီးမြှင့်ခဲ့သည်။

ဧရာဝတီတိုင်းဒေသကြီးအတွင်း ရေကြီးရေလျှံမှုများ မဖြစ်ပေါ်စေရေးအတွက် ကြိုတင် ကာကွယ်ရေးလုပ်ငန်းများကို ခရိုင်၊ မြို့နယ်၊ ရပ်ကွက်နှင့် ကျေးရွာများအထိ သက်ဆိုင်ရာ ဌာနများ၊ လူမှုရေးအဖွဲ့အစည်းများ၊ ပြည်သူများ စုပေါင်း၍ လူအင်အားနှင့်စက်ယန္တရားများ အသုံးပြုကာ အရှိန်အဟုန်မြှင့်ဆောင်ရွက်လျက်ရှိရာ ဧရာဝတီတိုင်းဒေသကြီး ဝန်ကြီးချုပ် ဦးအေးကျော်သည် တာဝန်ရှိသူများနှင့်အတူ သွားရောက်ကြည့်ရှုစစ်ဆေးသည်။