၂၀၂၂ခုနှစ်၊ ပြည်နယ်နှင့်တိုင်းဒေသကြီး ဝူရှူးအားကစားပြိုင်ပွဲသို့ ဝင်ရောက်ယှဉ်ပြိုင်မည့် တိုင်းဒေသကြီးကိုယ်စားပြု ဝူ ရှူးအသင်းအားအောင်နိုင်ရေးအလံပေးအပ်ပွဲအခမ်းအနားကို ယနေ့နေ့လည်ပိုင်းက  တိုင်းဒေသကြီးအစိုးရအဖွဲ့ရုံး ၊ အစည်းအဝေးခန်းမ(၂)၌ ပြုလုပ်ရာ တိုင်းဒေသကြီး ဝန်ကြီးချုပ်ဦးတင်မောင်ဝင်း ၊ တိုင်းဒေသကြီးအစိုးရအဖွဲ့ဝင် ဝန်ကြီးများ၊ အားကစားနှင့်ကာယပညာဦးစီးဌာနမှ တာဝန်ရှိသူများနှင့် ပြိုင်ပွဲဝင် အားကစားသမားများတက်ရောက်ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်အား ပြည်နယ်နှင့်တိုင်းဒေသကြီး ဝူ ရှူးအားကစားပြိုင်ပွဲသို့ ဝင်ရောက်ယှဉ်ပြိုင်မည့်  အုပ်ချုပ် ၊ နည်းပြ ၊ အားကစားသမားများနှင့် တစ်ဦးချင်းမိတ်ဆက်ပေးပြီး အသင်းအုပ်ချုပ်သူမှ  ပြိုင်ပွဲဝင်ရောက်ယှဥ်ပြိုင်မည့် အစီအစဉ်များအား ရှင်းလင်းတင်ပြသည်။ ထို့နောက် တိုင်းဒေသကြီးဝန်ကြီးချုပ်က “ အားကစား အောင်နိုင်ရေးအတွက်အကောင်းဆုံးအားကစားသမားများရွေးချယ်ပြီး လေ့ကျင့်သားပြည့်ဝစေရန်နှင့်ပြိုင်ပွဲစည်းကမ်းများနှင့်အညီ ကြိုတင်ပြင်ဆင်၍ နည်းစနစ်မှန်မှန်ဖြင့် စခန်းသွင်းလေ့ကျင့်ခဲ့ပါကြောင်း၊ တစ်ဦးချင်းကျွမ်းကျင်မှု၊ အသင်းလိုက်စည်းလုံးမှုဖြင့် အောင်မြင်မှုရရှိစေရေးကြိုးစားကြမှာဖြစ်ပါကြောင်း၊ တိုင်းဒေသကြီး ဝူရှူးအသင်းအနေဖြင့်  အောင်မြင်မှုရရှိသည့်အစဉ်အလာကောင်းများရှိခဲ့သဖြင့် ပိုမိုအောင်မြင်စေရေးကြိုးစားကြရန်လိုပါကြောင်း၊ အားကစားသမားအနေဖြင့် ကျန်းမာကြံ့ခိုင်စေရေး ဂရုစိုက်နေထိုင်ကြရန်၊ လေ့ကျင့်မှုမပြက်ဆောင်ရွက်ကြရန်နှင့် တိုင်းဒေသကြီးဂုဏ်ဆောင် အောင်မြင်မှုများရရှိစေရေး အစွမ်းကုန်ကြိုးစာကြရန်”‌ပြော ကြားပြီး ဧရာဝတီတိုင်းဒေသကြီးကိုယ်စားပြု ဝူရှူးအသင်းမှတာဝန်ရှိသူများထံသို့ အောင်နိုင်ရေးအလံနှင့် ချီးမြှင့်ထောက်ပံ့ငွေများပေးအပ်ခဲ့ပါသည်။  တိုင်းဒေသကြီးအနေဖြင့် ၂၀၂၂ခုနှစ်၊ ပြည်နယ်နှင့်တိုင်းဒေသကြီး ဝူရှူး အားကစားပြိုင်ပွဲသို့ နည်းပြ၊ အုပ်ချုပ်၊ အားကစားသမားများ စုစုပေါင်း ၁၈ ဦးဖြင့်ဝင်ရောက်ယှဉ်ပြိုင်သွားမှာဖြစ်ကြောင်းသိရှိရသည်။

ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ်ဦးတင်မောင်ဝင်းသည် ယနေ့နံနက်ပိုင်းတွင် တိုင်းဒေသကြီးအစိုးရအဖွဲ့ဝင် ဝန်ကြီးများ၊ တိုင်း၊ ခရိုင်၊ မြို့နယ်အဆင့်ဌာနဆိုင်များနှင့်အတူ ပုသိမ်မြို့၊ အမျိုးသမီးအိမ်တွင်းမှုသက်မွေးလုပ်ငန်းပညာသင်တန်းကျောင်း၊ အဆင့်မြင့်အိမ်တွင်းမှုစက်ချုပ်သင်တန်းအမှတ်စဉ်(၄) သင်တန်းဆင်းပွဲသို့တက်ရောက်ခဲ့ပါသည်။ အခမ်းအနားတွင် တိုင်းဒေသကြီးဝန်ကြီးချုပ်မှ အမျိုးသမီးအိမ်တွင်းမှုသက်မွေးလုပ်ငန်းပညာသင်တန်းကျောင်း(ပုသိမ်) အနေဖြင့် အခြေခံသင်တန်း၊ အဆင့်မြင့်သင်တန်း၊ ဟိုတယ်ဝန်ဆောင်မှုဆိုင်ရာသင်တန်း၊ အဆင့်မြင့်အိမ်တွင်းမှုစက်ချုပ်သင်တန်းစသည်ဖြင့် သင်တန်းစုစုပေါင်း (၂၆) ကြိမ်ဖွင့်လှစ်ခဲ့ပြီး သင်တန်းသူ ၁၂၀၀ဦးတို့ကို အသက်မွေးဝမ်းကြောင်းပညာရပ်များသင်ကြားပေးနိုင်ခဲ့ပါကြောင်း၊ တိုင်းဒေသကြီးတွင် လူငယ်လူရွယ်များပြားပြီး ယခုကဲ့သို့ သင်တန်းများဖွင့်လှစ်နိုင်ခြင်းကြောင့်   အလုပ်အကိုင်အခွင့်အလမ်းများ ပိုမိုရရှိလာပါကြောင်း၊ သင်တန်းနည်းပြများအုပ်ချုပ်သူများမှ စနစ်တကျသင်ကြားပြသမှုများကို မမေ့မလျော့ဘဲ ဆည်းပူးလေ့လာ၍ လက်တွေ့ဘဝနယ်ပယ်တွင် မိသားစုဝင်ငွေရရှိပြီး လူမှုစီးပွားဘဝဖွံ့ဖြိုးတိုးတက်စေရေး ကြိုးစားကြရမှာဖြစ်ပါကြောင်းနှင့် သင်တန်းကျောင်းရည်ရွယ်ချက်များကိုကောင်း စွာသိရှိနားလည်ပြီး မိမိတို့ဒေသဖွံံ့ဖြိုးတိုးတက်ရေးဝိုင်းဝန်းကြိုးစားကြရန် ပြောကြားခဲ့ပြီး သင်တန်းတွင်ထူးချွန်ဆုနှင့်  သင်တန်းဆင်းအောင်လက်မှတ်များချီးမြှင့်ပေးခဲ့ပါသည်။  ထို့နောက် သင်တန်းသူများကိုယ်စား သင်တန်းသူတစ်ဦးမှ ကျေးဇူးတင်စကားပြန်လည်ပြောကြားခဲ့ပြီး တိုင်းဒေသကြီးဝန်ကြီးချုပ်နှင့်အဖွဲ့သည် သင်တန်းဆင်းသင်တန်းသူများချုပ်လုပ်ထားရှိသည့်လက်ရာများအား ကြည့်ရှုအားပေးခဲ့ပါသည်။ အဆင့်မြင့်အိမ်တွင်းမှုစက်ချုပ်သင်တန်းကို သင်တန်းကာလ (၂၂)ပတ်ကြာသင်ကြားပို့ချခဲ့ပြီး သင်တန်းသူ ၃၅ ဦးကို သင်တန်းဆင်းပေးနိုင်ခဲ့ကြောင်းသိရသည်။

(၂၃)ကြိမ်မြောက်မြန်မာ့ရိုးရာယဉ်ကျေးမှု အဆို၊အက၊အရေး၊အတီး ဗဟိုအဆင့်ပြိုင်ပွဲဝင် ဧရာဝတီတိုင်းဒေသကြီးကိုယ်စားပြုအသင်းအား အောင်နိုင်ရေးအလံပေးအပ်ပွဲ အခမ်းအနားကို ယနေ့နေ့လည်က  ပုသိမ်မြို့၊မြို့တော်ခန်းမ၌ကျင်းပပြုလုပ်ရာ တိုင်းဒေသကြီး ဝန်ကြီးချုပ်ဦးတင်မောင်ဝင်းနှင့်ဇနီး၊အစိုးရအဖွဲ့ဝင် ဝန်ကြီးများ နှင့်၎င်းတို့၏ဇနီး များ၊ တိုင်း၊ ခရိုင်၊ မြို့နယ်ဌာနဆိုင်ရာများ၊တိုင်းဒေသ ကြီးကိုယ်စားပြု ပြိုင်ပွဲဝင်များနှင့် ဖိတ်ကြားထားသူများ  တက်ရောက်အားပေးခဲ့ကြသည်။  ဦးစွာ  တိုင်းဒေသကြီးဝန်ကြီးချုပ်က“ (၂၃)ကြိမ်မြောက် မြန်မာ့ရိုးရာယဥ်‌ကျေးမှု အဆို၊အက၊အရေး၊အတီးဗဟိုအဆင့်ပြိုင်ပွဲ ဝင်ရောက်ယှဉ်ပြိုင်နိုင်ရေး ခရိုင်အဆင့်၊ တိုင်းဒေသကြီးအဆင့် ပြိုင်ပွဲများပြုလုပ်၍ အရည်အချင်းပြည့်မီသူများအား စနစ်တကျရွေးချယ်စခန်းသွင်းလေ့ကျင့်ပေးခဲ့ပါကြောင်း၊ ပြိုင်ပွဲဝင်များအနေဖြင့် ပညာရှင်များ၊ အကဲဖြတ်ဒိုင်များ၏ အကြံပြုသုံးသပ်ချက်များကို ကောင်းစွာနာယူမှတ်သားလိုက်နာပြီး ပြိုင်ပွဲဝင်သွားရမှာဖြစ်ပါကြောင်း၊ တစ်ဦးချင်းပြိုင်ပွဲများတွင် မိမိတို့၏ ပြိုင်ပွဲဝင်ဘာသာရပ်အားကျွမ်းကျင်ပိုင်နိုင်စွာ ယှဉ်ပြိုင်နိုင်ရေး၊ အဖွဲ့လိုက်ပြိုင်ပွဲများတွင် စည်းလုံးညီညွတ်မှု၊ အပေးအယူမျှတမှုရှိစေရေး၊ ပံ့ပိုးသူများအနေဖြင့်လည်းမိမိတို့ပြိုင်ပွဲဝင်အတွက်အကောင်းဆုံးဖြစ်စေရေး ကြိုးစားဆောင်ရွက်ပေးကြရမှာဖြစ်ပါကြောင်း၊ (၂၂) ကြိမ်မြောက် ဗဟိုအဆင့်ပြိုင်ပွဲတွင် တိုင်းဒေသကြီးအနေဖြင့် ပြိုင်ပွဲဝင် ၁၂၅ဦးပါဝင်ယှဉ်ပြိုင်ခဲ့ပြီး တိုင်းဒေသကြီး/ပြည်နယ် ဆုရရှိမှုတန်းစီဇယား စတုတ္ထနေရာရရှိခဲ့ပါကြောင်း၊ (၂၃)ကြိမ်မြောက် မြန်မာ့ရိုးရာယဉ်ကျေးမှု အဆို၊အက၊အရေး၊အတီး ဗဟိုအဆင့်ပြိုင်ပွဲကို ပြိုင်ပွဲဝင် ၁၉၃ဦးဖြင့် ပြိုင်ပွဲဘာသာရပ် များအားပါဝင်ယှဉ်ပြိုင်သွားမှာဖြစ်ပြီး ယခင်နှစ်ထက် အောင်မြင်မှုများပိုမိုရရှိစေရေးကြိုးစားဆောင်ရွက် နေသည်ကိုတွေ့ရှိရပါကြောင်း၊ ပြိုင်ပွဲဝင်ကာလတစ်လျှောက်လုံးကျန်းမာရေးအထူးဂရုပြုကြရန်နှင့် ဗဟိုအဆင့်ပြိုင်ပွဲတွင် ဆုတံဆိပ်များစွာရရှိ၍ အောင်ပွဲနှင့်အတူ တိုင်းဒေသကြီးဂုဏ်ဆောင်နိုင်ရေး ပြိုင်ပွဲဝင်များ၊ နည်းပြအုပ်ချုပ်အဖွဲ့များ ဝိုင်းဝန်းကြိုးပမ်းကြရန်”ပြောကြားသည်။ ဆက်လက်၍ (၂၃)ကြိမ်မြောက် မြန်မာ့ရိုးရာယဉ်ကျေးမှု အဆို၊အက၊အရေး၊အတီး ဗဟိုအဆင့် ပြိုင်ပွဲဝင်ရောက်ယှဉ်ပြိုင်မည့် တိုင်းဒေသကြီးကိုယ်စားပြု ပြိုင်ပွဲဝင်များ၏ ဝါသနာရှင်(ဒုတိယတန်း) ခေတ်ဟောင်းကာလပေါ်၊ ဝါသနာရှင် (ဒုတိယတန်း)အမျိုးဂုဏ်၊ဇာတိဂုဏ်၊ အဆင့်မြင့်ပညာ ခေတ်ဟောင်းကာလပေါ်၊ အခြေခံပညာ(၁၅-၂၀) ခေတ်ဟောင်းကာလပေါ်တေးများဖြင့်လည်းကောင်း၊ အခြေခံပညာ(၁၀-၁၅)တစ်ဦးချင်းအကများကိုလည်းကောင်း၊ ဝါသနာရှင်ဒုတိယတန်းဆိုင်းတစ်ဦးချင်း၊ ဝါသနာရှင်ဒုတိယတန်း စောင်း၊ အဆင့်မြင့်ပညာ ဂီတာ၊ အခြေခံပညာ(၁၅-၂၀) မယ်ဒလင်၊  အခြေခံပညာ(၁၀-၁၅)စန္ဒရား၊ အခြေခံပညာ (၁၅-၂၀)ဆိုင်းအဖွဲ့လိုက်တို့၏ အနုပညာစွမ်းရည်များပြသမှုများကို ကြည့်ရှုအားပေးခဲ့ပြီး တိုင်းဒေသကြီးဝန်ကြီးချုပ်မှ  (၂၃) ကြိမ်မြောက် မြန်မာ့ရိုးရာယဉ်ကျေးမှု အဆို၊အက၊အရေး၊အတီး ဗဟိုအဆင့်ပြိုင်ပွဲ ဝင်ရောက်ယှဉ်ပြိုင်မည့် ဧရာဝတီတိုင်းဒေသကြီးကိုယ်စားပြုအသင်းအား အောင်နိုင်ရေးအလံနှင့် ဂုဏ်ပြုထောက်ပံ့ငွေများပေးအပ်ခဲ့ပါသည်။ ထို့နောက် တေးရေးဆရာဦးသန်းရှိန်ရေးစပ်သီကုံးသည့် လက်တွဲညီညီရှေ့သို့ချီ သီချင်းသီဆို၍ အခမ်းအနားရုပ်သိမ်းခဲ့ပြီး တိုင်းဒေသကြီးဝန်ကြီးချုပ်မှ တိုင်းဒေသကြီးကိုယ်စားပြု အဆို၊ အက၊ အရေး၊ အတီးပြိုင်ပွဲဝင်များ၊ နည်းပြအုပ်ချုပ်သူများနှင့်ရင်းရင်းနှီးနှီးတွေ့ဆုံအားပေးခဲ့ကြောင်းသိရသည်။

၂၀၂၂ခုနှစ်၊ ကမ္ဘာ့ဆရာများနေ့ အထိမ်းအမှတ် အခမ်းအနားကို ယနေ့နံနက်ပိုင်းကဧရာဝတီတိုင်းဒေသကြီး၊ ပုသိမ်မြို့၊ အမှတ်(၁) အခြေခံပညာအထက်တန်းကျောင်း၊ ရတနာတန်ဆောင်ခန်းမတွင်ကျင်းပပြုလုပ်ရာ တိုင်းဒေသကြီးဝန်ကြီးချုပ် ဦးတင်မောင်ဝင်းနှင့်ဇနီး၊ တိုင်းဒေသကြီးအစိုးရအဖွဲ့ဝင် ဝန်ကြီးများနှင့်၎င်းတို့၏ဇနီးများ၊ တိုင်း၊ ခရိုင်၊ မြို့နယ်အဆင့် ဌာနဆိုင်ရာများ၊ ကန်တော့ခံဆရာကြီး၊ဆရာမကြီးများနှင့် ဆရာ၊ဆရာမများတက်ရောက်ခဲ့ကြသည်။ ဦးစွာ အမှတ်(၁) အခြေခံပညာအထက်တန်းကျောင်းဆရာ၊ဆရာမများက ကမ္ဘာ့ဆရာများနေ့ အထိမ်းအမှတ် ဆရာ့ဂုဏ်ပြုတေး မြတ်ဆရာ သီချင်းသီဆိုဖျော်ဖြေဂုဏ်ပြုပြီး ဆရာများ၏ ဂုဏ်ရည်ကိုဖော်ညွှန်းသည့်ပိုက်စုံရတုဖြင့် ဆရာတစ်ဦးမှ သီဆိုဂုဏ်ပြုခဲ့ကြပါသည်။ ဆက်လက်၍ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်ထံမှ ကမ္ဘာ့ဆရာများနေ့ အထိမ်းအမှတ်အခမ်းအနားသို့ပေးပို့သည့်သဝဏ်လွှာကို တိုင်းဒေသကြီး ဝန်ကြီးချုပ်က ဖတ်ကြားခဲ့ပြီး  ဂုဏ်ပြုအမှာစကားပြောကြားခဲ့သည်။ ဆက်လက်၍ တိုင်းဒေသကြီးပညာရေးမှူးမှ ကမ္ဘာ့ကုလသမဂ္ဂအဖွဲ့လက်အောက်ခံအဖွဲ့(၅)ဖွဲ့၏ အဖွဲ့ခေါင်းဆောင်များက ပေးပို့သော ၂၀၂၂ခုနှစ်၊ ကမ္ဘာ့ဆရာများနေ့အထိမ်းအမှတ် သဝဏ်လွှာကို ဖတ်ကြားခဲ့ပြီး အသက် (၇၀)နှစ်နှင့်အထက် အငြိမ်းစားဆရာကြီး၊ ဆရာကြီးများအား ဂါရဝပြုလက်ဆောင်များဖြင့်ပူဇော်ကန်တော့ခဲ့ကြပြီး ဆရာကြီးတစ်ဦးမှကျေးဇူးတင်ဝမ်းမြောက်စကားပြန်လည်ပြောကြားခဲ့ပါသည်။  ထို့နောက်၂၀၂၂ခုနှစ်၊ ကမ္ဘာ့ဆရာများနေ့ အထိမ်းအမှတ်တိုင်းဒေသကြီးအဆင့် အခြေခံပညာအထက်တန်းနှင့်အလယ်တန်းစာစီစာကုံးနှင့်က ဗျာပြိုင်ပွဲတွင် ဆုရရှိကြသည့်ကျောင်းသားကျောင်းသူများအား တိုင်းဒေသကြီးဝန်ကြီးချုပ်နှင့်ဇနီးတို့က ဂုဏ်ပြုဆုများအသီးသီးပေးအပ်ချီးမြှင့်ခဲ့ကြပြီးနောက် စုပေါင်းမှတ်တမ်းဓာတ်ပုံများရိုက်ကူးခဲ့ကြကာ ၂၀၂၂ခုနှစ်၊ ကမ္ဘာ့ဆရာများနေ့ အထိမ်းအမှတ်ပြခန်းများကိုလှည့်လည်ကြည့်ရှုခဲ့ကြပါသည်။ ဆက်လက်၍ တိုင်းဒေသကြီးဝန်ကြီးချုပ်သည် ယုဇနဆောင်ခန်းမတွင် ခရိုင်၊ မြို့နယ် ပညာရေးမှူးများနှင့် တွေ့ဆုံပွဲသို့ တက်ရောက်ခဲ့ပြီး ၂၀၂၂-၂၀၂၃ ပညာသင်နှစ်၊ တက္ကသိုလ်ဝင်စားမေးပွဲအောင်ချက်မြင့်မားစေရေး ဆရာ၊ဆရာမများ၊ ပညာရေးမှူးများ၊ အုပ်ချုပ်ရေးအဖွဲ့များဝိုင်းဝန်းဆောင်ရွက်ကြရမှာဖြစ်ပါကြောင်း၊ ယခုနှစ်သည် စနစ်ဟောင်းနောက်ဆုံးနှစ်ဖြစ်၍   စာမေးပွဲဖြေဆို အောင်မြင်နိုင်စေရေး မိဘများကသားသမီးများ၏ရှေ့ရေးအတွက်အခွင့်အရေးပေးစေလိုပါကြောင်း၊ ပြင်ပဖြေဆိုသူများကိုလည်း အောင်မြင်စွာဖြေဆိုနိုင်ရေး လိုအပ်သည်များတင်ပြပေးရန်ပြောကြားခဲ့သည်။ ဆက်လက်၍ တိုင်းဒေသကြီးပညာရေးမှူးနှင့် ခရိုင်၊ မြို့နယ်ပညာရေးမှူးများမှ တက္ကသိုလ်ဝင်စာမေးပွဲဖြေဆိုခွင့်လျှောက်ထားမှု၊ ပြင်ပကျောင်းသားကျောင်းသူများအတွက် စာသင်ကြားပို့ချနိုင်ရေးစီစဉ်ဆောင်ရွက်မှုအခြေအနေများရှင်းလင်းတင်ပြချက်များအပေါ်  တိုင်းဒေသကြီးဝန်ကြီးချုပ်က လိုအပ်သည်များပေါင်းစပ်ဖြည့်ဆည်းဆောင်ရွက်ပေးခဲ့ကြောင်းသိရသည်။

ပုသိမ်ပြည်သူ့ဆေးရုံကြီးမှ အကူသူနာပြု(ပြင်ပ)(၉)လသင်တန်း၊ သင်တန်းဆင်းပွဲအခမ်းအနားကို ယနေ့နံနက်ပိုင်းက ပုသိမ်ပြည်သူ့ဆေးရုံကြီး အစည်းအဝေးခန်းမတွင် ကျင်းပပြုလုပ်ရာ တိုင်းဒေသကြီးအစိုးရအဖွဲ့ဝန်ကြီးချုပ် ဦးတင်မောင်ဝင်း၊ တိုင်းဒေသကြီးအစိုးရအဖွဲ့ဝန်ကြီးများ၊ တိုင်းဒေသကြီး ပြည်သူ့ကျန်းမာရေးဦးစီးဌာနမှူး၊ ပုသိမ်ပြည်သူ့ဆေးရုံကြီးအုပ်ကြီးနှင့်တာဝန်ရှိသူများ၊ သင်တန်းသားသင်တန်းသူများတက်ရောက်ကြပါတယ်။ ဦးစွာ တိုင်းဒေသကြီးဝန်ကြီးချုပ်မှ ကျန်းမာရေးစနစ်ရဲ့အရေးအကြီးဆုံးဒေါက်တိုင်ကြီးတစ်ခုဖြစ်တဲ့ အရည်အချင်းပြည့်ဝသော ကျန်းမာရေးလူ့စွမ်းအားအရင်းအမြစ်များမွေးထုတ်ပေးနိုင်ရေးဆောင်ရွက်ပေးလျက်ရှိပါကြောင်း၊ အကူသူနာပြုများဟာ ပင်ကိုယ်စိတ်ရောကိုယ်ပါဖြူစင်သူများ၊ ယဉ်ကျေးပျူငှာသူများဖြစ်ကြပြီး ပြည်သူကိုအလုပ်အကျွေးပြုရန်ရည်ရွယ်၍ အကူသူနာပြုကျင့်ဝတ်များကိုလိုက်နာစောင့်ထိန်းပြီး မိမိတို့၏တာဝန်များကိုကျေပွန်စွာထမ်းဆောင်သွားရန်လိုပါကြောင်း၊ အကူသူနာပြုများအနေဖြင့် သင်တန်းမှပို့ချသင်ကြားပေးသော ဆေးပညာဆိုင်ရာပညာရပ်များ၊ လက်တွေ့ကုသမှုများကို ကောင်းစွာမှတ်သားနာယူပြီး လူနာများပေါ် ဝါသနာ၊ စေတနာ၊ အကြင်နာ၊ ဂရုဏာ၊ အနစ်နာ၊ စာနာမှုစသည့် နာ (၆) နဲ့အတူ ပြုစုစောင့်ရှောက်ပေးကြရမှာဖြစ်ပါကြောင်း၊ ပြည်သူကိုဗဟိုပြုသောကျန်းမာရေးစနစ်ကို အောင်မြင်အောင် ဖော်ဆောင်နိုင်ရေးပါဝင်ဆောင်ရွက်ကြရမည့်အပြင် ကိုယ်တိုင်ကလည်း အရည်အသွေးပြည့်မီစေရေး၊ ပြည်သူများပါဝင်လာစေရေး၊ လူမှုဆက်ဆံရေးကောင်းမွန်စေရေးစသည်တို့ကိုလည်း ဆက်လက်သင်ယူလေ့ကျင့်ကြရမှာဖြစ်ပါကြောင်းနှင့် နိုင်ငံတော်၏ လိုအပ်ချက်အတွက် တစ်ထောင့်တစ်နေရာမှာ ဖြည့်တင်းလုပ်ကိုင်ရင်း ပြည်သူတစ်ရပ်လုံးအတွက် အလုပ်အကျွေးပြုသည့် ကျန်းမာရေးဝန်ဆောင်မှုလုပ်ငန်းများကို ဦးဆောင်ကြိုးပမ်းဆောင်ရွက်ကြရန် အမှာစကားပြောကြားခဲ့ကာ ထူးချွန်သင်တန်းသားသင်တန်းသူများကို ဆုများနှင့် သင်တန်းဆင်းအောင်လက်မှတ်များချီးမြှင့်ပေးခဲ့ပါသည်။ ထို့နောက်သင်တန်းသားသင်တန်းသူများကိုယ်စား သင်တန်းသားတစ်ဦးမှ ကျေးဇူးတင်စကားပြန်လည်ပြောကြားခဲ့ပြီး စုပေါင်းမှတ်တမ်းဓာတ်ပုံများရိုက်ကူးခဲ့ပါတယ်။ အဆိုပါသင်တန်းကို ( ၁၃.၁.၂၀၂၂)ရက်နေ့ မှယနေ့အထိ (၉)လတာဖွင့်လှစ်သင်ကြားခဲ့ပြီး သင်တန်းသားသင်တန်းသူစုစုပေါင်း (၅၃)ဦးတက်ရောက်ခဲ့ကြောင်းသိရှိရသည်။