ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်းသည် အစိုးရအဖွဲ့ဝင်ဝန်ကြီးများ၊ တိုင်း၊ ခရိုင်၊ မြို့နယ်၊ မြို့အဆင့် ဌာနဆိုင်ရာများ လိုက်ပါလျက် ယမန်နေ့ နံနက်ပိုင်းတွင် ငပုတောမြို့နယ်၊ ဟိုင်းကြီးကျွန်းမြို့နယ်အတွင်းရှိ ဒေသဖွံ့ဖြိုးရေးလုပ်ငန်းများအား လိုက်လံကြည့်ရှုစစ်ဆေးခဲ့ပါသည်။ ဦးစွာ တိုင်းဒေသကြီးဝန်ကြီးချုပ်သည် ငပုတောမြို့နယ်၊ ဟိုင်းကြီးကျွန်းမြို့၊ ကံချိုင်ရွာ အခြေခံပညာအထက်တန်း ကျောင်းဝန်းအတွင်း ၂၀၂၂-၂၀၂၃ ဘဏ္ဍာရေးနှစ်၊ ခွင့်ပြုရန်ပုံငွေကျပ်သန်း (၇၀.၁၇၅)သန်းဖြင့် ဆောင်ရွက်သည့် ၁၂၀ ပေx ၃၀ ပေ၊ RC (၁)ထပ် ကျောင်းဆောင်သစ်ဆောက်လုပ်ပြီးစီးမှုအား ကြည့်ရှုစစ်ဆေးခဲ့ပြီး မြို့ပတ်ကွန်ကရစ်လမ်း ၃ မိုင် ၄ ဖာလုံပေါ်တွင် အမှတ်(၂)ရပ်ကွက်အနီး ရေတိုက်စားမှုကြောင့် ကမ်းပါးပြိုကျမှု ဖြစ်ပေါ်လျက်ရှိသဖြင့် ကျောက်စီမြေထိန်းနံရံ ပြုလုပ်ဆောင်ရွက်ရန် လိုအပ်မှုများအား ကြည့်ရှုစစ်ဆေးခဲ့ပါသည်။ ထို့နောက် ရွှေဟိုင်းကြီး ငါး၊ပုဇွန်အအေးခန်းစက်ရုံ ကုမ္ပဏီလီမိတက်၏ အအေးခန်း စက်ရုံလည်ပတ်နေမှုအားလည်းကောင်း၊ စက်ရုံမှ ဝယ်ယူလျက်ရှိသည့် ငါးပုစွန် အမျိုး အစားများ၊ ရေခဲစက်မှ ရေခဲထုတ်လုပ်မှုနှင့် အေးခဲ ငါး၊ပုဇွန် ထုပ်ပိုးနေမှုများအား လည်းကောင်း ကြည့်ရှုစစ်ဆေးခဲ့ရာ စက်ရုံတာဝန်ရှိသူများမှ ရှင်းလင်းတင်ပြခဲ့ကြပြီး အဆိုပါစက်ရုံ၌ ဒေသခံ(၁၀၀)ကျော် အလုပ်အကိုင် အခွင့်အလမ်းများ ရရှိလျက်ရှိကြောင်း သိရှိရပါသည်။ ဆက်လက်၍ တက္ကသိုလ်ဝင်တန်း အောင်ချက်မြင့်မားရေးအတွက် ကျောင်းသား ကျောင်းသူ များကို အချိန်ပိုသင်ကြားပို့ချပေးလျက်ရှိသည့် ဟိုင်းကြီးကျွန်းမြို့ရှိ အခြေခံပညာ အထက်တန်းကျောင်း(စံထူး-စံပြ-အဏ္ဏဝါ) နှင့် အခြေခံပညာအထက်တန်းကျောင်း(ဟိုင်းကြီး)သို့ သွားရောက်၍ ကျောင်းသားကျောင်းသူများနှင့် ဆရာ၊ဆရာမများအား ရင်းရင်းနှီးနှီး တွေ့ဆုံ အားပေးခဲ့ပြီး ကျောင်းသုံးဗလာစာအုပ်များနှင့် စာရေးကိရိယာများ ထောက်ပံ့ပေးအပ်ခဲ့ပါသည်။ ထို့နောက် အခြေခံပညာအထက်တန်းကျောင်း(ဟိုင်းကြီး)၊ မြကျွန်းသာယာခန်းမ၌ မြို့အဆင့် ဌာနဆိုင်ရာများနှင့်တွေ့ဆုံခဲ့ပြီး ဌာနအလိုက် လုပ်ငန်းဆောင်ရွက်ချက်များ တင်ပြခဲ့မှုအပေါ် တိုင်းဒေသကြီးဝန်ကြီးချုပ်က လိုအပ်သည်များ ညှိနှိုင်းပေါင်းစပ် ဆောင်ရွက်ပေးခဲ့ကြောင်း သိရသည်။

ဧရာဝတီတိုင်းဒေသကြီး၊ ပုသိမ်ခရိုင်၊ ငပုတောမြို့နယ်၊ ဟိုင်းကြီးကျွန်းမြို့၊ ဇီးချိုင်ကျေးရွာအုပ်စု မဟာမကုဋရံသီ ဆံတော်ရှင် မြတ်မော်တင်စေတီတော်မြတ်ကြီး၏ ရင်ပြင်တော်တိုးချဲ့ခြင်းနှင့် ဘက်စုံပြုပြင်ရေးအတွက် အလှူတော်ငွေပေးအပ်လှူဒါန်းပွဲ အခမ်းအနားကို ယမန်နေ့ ညနေပိုင်းတွင် စေတီတော်ရင်ပြင် ၌ ကျင်းပရာ ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်းနှင့် ဇနီး၊ အနောက်တောင်တိုင်းစစ်ဌာနချုပ် တိုင်းမှူးနှင့်ဇနီး၊ နယ်မြေခံရေတပ်စခန်းဌာနချုပ် ဌာနချုပ်မှူးနှင့်ဇနီး၊ တိုင်းဒေသကြီး အစိုးရအဖွဲ့ဝင် ဝန်ကြီးများနှင့် ဇနီးများ၊  တိုင်းခရိုင်၊မြို့နယ်အဆင့် ဌာနဆိုင်ရာများနှင့် အလှူရှင်များ တက်ရောက်ခဲ့ကြသည်။ ဦးစွာ ဝန်ကြီးချုပ်နှင့်ဧည့်သည်တော်များသည် သဲဖြူနှင့် မဟာမြိုင်တောရဓမ္မရိပ်သာတို့၏ ဦးစီးပဓာနနာယက ဘဒ္ဒန္တပညာဇောတ၊ သာသနဓဇဓမ္မာစရိယ၊ ကမ္မဋ္ဌာနာစရိယ မဟာထေရ်မြတ်ထံမှ ပရိတ်တရားတော်များ နာယူကြည်ညိုခဲ့ကြပါသည်။ ထို့နောက် ရင်ပြင်တော်တိုးချဲ့ခြင်းနှင့် ဘက်စုံပြုပြင်ရေးအတွက် အလှူတော်ငွေများ ပေးအပ်လှူဒါန်းပွဲအခမ်းအနားအား သံဃာ‌‌တော်အရှင်သူမြတ်များနှင့် ဧည့်သည်တော်များက နမောတဿ (၃)ကြိမ် ရွတ်ဆိုဘုရားကန်‌တော့၍ ဖွင့်လှစ်ခဲ့ကာ ဆရာတော်ထံမှ ဧည့်ပရိတ်သတ်များက ငါးပါးသီလခံယူဆောက်တည်ပြီး အလှူတော်ငွေများ ပေးအပ်လှူဒါန်းရာ သယံဇာတရေးရာဝန်ကြီး ဦးအုန်းမြင့်မှ လက်ခံရယူခဲ့ပြီးနောက် အလှူရှင်များအား ဂုဏ်ပြုမှတ်တမ်းလွှာများ ပြန်လည်ပေးအပ်ခဲ့ပါသည်။ ပြီးနောက် ဆရာတော်မှ ရေစက်သွန်းချ အမျှပေးဝေခဲ့ပြီး ဗုဒ္ဓသာသနံ စိရံတိဋ္ဌတု (၃)ကြိမ်ရွတ်ဆို ဆုတောင်း၍ အခမ်းအနားကို ရုပ်သိမ်းခဲ့ပါသည်။ ဆက်လက်၍ ဝန်ကြီးချုပ်နှင့် ဧည့်သည်တော်များ၊ အလှူရှင်များသည် ယနေ့ နံနက်ပိုင်း၌ မဟာမကုဋရံသီ ဆံတော်ရှင် မြတ်မော်တင်စွန်းစေတီတော်မြတ်ကြီး၏ ရင်ပြင်တော်တွင် ဟိုင်းကြီးကျွန်းဒေသရှိ ကျောင်းတိုက်အသီးသီးမှ ဆရာတော်သံဃာတော်များအား ဆွမ်းသပိတ်လောင်းလှူခြင်း အခမ်းအနားကျင်းပခဲ့ရာ ဦးစွာ ဆရာတော်ထံမှ ပရိတ်တရားတော်များ နာယူကြည်ညိုခဲ့ကြပြီး တိုင်းဒေသကြီးဝန်ကြီးချုပ်နှင့်ဇနီးတို့မှမော်တင်စွန်းစေတီတော်မြတ်ကြီးအား အရုဏ်ဆွမ်း  ဆက်ကပ်လှူဒါန်းပြီးနောက် ဆရာတော်အား အရုဏ်ဆွမ်း ဆက်ကပ်လှူဒါန်းခဲ့ပါသည်။ ထို့နောက် ဝန်ကြီးချုပ်နှင့် ဧည့်သည်တော်များ၊ အလှူရှင်များသည် ဟိုင်းကြီးကျွန်းဒေသရှိ ကျောင်းတိုက်အသီးသီးမှ ဒေသခံ ဆရာတော် သံဃာတော် ၁၆၂ ပါးအား ဆွမ်းသပိတ် ၊ သင်္ကန်း၊ ထီး ၊ ဖိနပ် အစရှိ သည့် လှူဖွယ်ဝတ္ထုပစ္စည်းများနှင့် အလှူတော်ငွေများ လောင်းလှူခဲ့ကြပြီး ဆရာ‌တော်ထံမှ ငါးပါးသီလ ခံယူဆောက်တည်ကြကာ လှူဒါန်းမှု အစုစုအား ရေစက်သွန်းချ အမျှပေးဝေခဲ့ပါသည်။ ဆက်လက်၍ မြတ်မော်တင် ဆံတော်ရှင်စေတီတော်၏ ရင်ပြင်တော်တိုးချဲ့ခြင်းနှင့် ပြုပြင်မွမ်းမံခြင်း တည်ဆောက်ရေး စီမံကိန်းရှင်းလင်းဆောင်၌ စေတီတော်ရင်ပြင်တိုးချဲ့ခြင်းနှင့် ပြုပြင်မွမ်းမံခြင်းလုပ်ငန်းများနှင့်ပတ်သက်၍ ကုမ္ပဏီမှစေတီတော် ပုံစံငယ်နှင့် Power Pointတို့ဖြင့် ရှင်းလင်းတင်ပြရာ ဆရာတော်နှင့် တိုင်းဒေသကြီးဝန်ကြီးချုပ်တို့က ရင်ပြင်တိုးချဲ့ခြင်းနှင့်ပတ်သက်သည့်တင်ပြချက်များအပေါ် ဖြည့်စွက်ဆွေးနွေးခဲ့ပါသည်။  ထို့နောက် မြတ်မော်တင်ဆံတော်ရှင်စေတီတော် ရင်ပြင်တော် တိုးချဲ့တည်ဆောက်ရေးစီမံကိန်း ပန္နက်တော်တင် မင်္ဂလာအခမ်းအနားအား ဆက်လက်ကျင်းပရာ ဆရာတော် ကြီးမှူး၍ မြတ်မော်တင်ဆရာတော်၊ တိုင်းဒေသကြီးဝန်ကြီးချုပ်၊ အနောက်တောင်တိုင်းစစ်ဌာနချုပ်တိုင်းမှူး၊ နယ်မြေခံရေတပ်စခန်းဌာနချုပ် ဌာနချုပ်မှူး၊ လုံခြုံရေးနှင့်နယ်စပ်ရေးရာဝန်ကြီး၊ စီးပွားရေးရာဝန်ကြီး၊ သယံဇာတရေးရာဝန်ကြီးနှင့် လမ်းပန်းဆက်သွယ်ရေးဝန်ကြီးတို့က သတ်မှတ်နေရာအသီးသီးတွင် နေရာယူကာ မင်္ဂလာအချိန်၌ ပန္နက်တိုင်များ အသီးသီးစိုက်ထူပေးပြီး အမွှေးနံ့သာရည်များ ပက်ဖျန်းပေးခဲ့ပြီးနောက် ဆရာတော်အရှင်သူမြတ်များနှင့်တက်ရောက်လာသည့် ဧည့်သည်တော်များမှ ဗုဒ္ဓသာသနံ စိရံတိဋ္ဌတု ၃ ကြိမ်ရွတ်ဆို ဆုတောင်း၍ အခမ်းအနားကို ရုပ်သိမ်းခဲ့ကြောင်း သိရသည်။

ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ်ဦးတင်မောင်ဝင်းသည် ယမန်နေ့ မွန်းလွဲ ပိုင်းတွင် တိုင်းဒေသကြီးအစိုးရအဖွဲ့ဝင်များ၊ တိုင်းဒေသကြီး/ခရိုင်နှင့်မြို့နယ်အဆင့် ဌာနဆိုင်ရာများလိုက်ပါလျက် တက္ကသိုလ်ဝင်တန်း အောင်ချက်မြင့်မားရေးအတွက် ကျောင်းသား၊ ကျောင်းသူများကို အချိန်ပိုသင်ကြားပို့ချပေးလျက်ရှိသည့် ပုသိမ်မြို့နယ်အတွင်းရှိ အခြေခံပညာ ကျောင်းများသို့ သွားရောက်၍ ကျောင်းသားကျောင်းသူများ၊ ဆရာ၊ဆရာမများနှင့်ရင်းရင်းနှီးနှီး တွေ့ဆုံ အားပေးခဲ့ပါသည်။ တိုင်းဒေသကြီးဝန်ကြီးချုပ်သည် ပုသိမ်မြို့၊ အမှတ်(၈) အခြေခံပညာအထက်တန်း ကျောင်းနှင့် အမှတ်(၇)အခြေခံပညာအထက်တန်းကျောင်းများသို့ သွားရောက်၍  တက္ကသိုလ် ဝင်တန်း ဖြေဆိုကြမည့် ကျောင်းသားကျောင်းသူများနှင့် အချိန်ပိုသင်ကြားပို့ချပေးလျှက်ရှိသည့် ဆရာ၊ ဆရာမများအား ရင်းရင်းနှီးနှီးတွေ့ဆုံ၍ အားပေးစကားများပြောကြားခဲ့ပြီး ထောက်ပံ့ငွေ များ ပေးအပ်ခဲ့ပါသည်။

ဧရာဝတီတိုင်းဒေသကြီး၊ ဝါးခယ်မမြို့၊ ရွှေခယ်သီရိအားကစားခန်းမ၌ ကျောင်းအုပ်ကြီးများ စီမံခန့်ခွဲမှုစွမ်းဆောင်ရည် မြင့်မားရေးအလုပ်ရုံဆွေးနွေးပွဲအား ယနေ့ မွန်းလွဲပိုင်းက ပြုလုပ်ရာ တိုင်းဒေသကြီးဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင် ဝန်ကြီးများ၊ ခရိုင်နှင့်မြို့နယ်အဆင့် ဌာနဆိုင်ရာများ တက်ရောက်အားပေးခဲ့ကြသည်။ အလုပ်ရုံဆွေးနွေးပွဲတွင် တိုင်းဒေသကြီးဝန်ကြီးချုပ်က “အခြေခံပညာမူလတန်း၊ အလယ်တန်း၊ အထက်တန်း ကျောင်းအုပ်ဆရာကြီး၊ ဆရာမကြီးများ အလုပ်ရုံဆွေးနွေးပွဲ ဖြစ်ပါကြောင်း၊ ဆရာကြီး၊ဆရာမကြီးအနေဖြင့် ခရိုင်ပညာရေးမှူး၊ မြို့နယ်ပညာရေးမှူးနှင့် တိုက်ရိုက်ဆွေးနွေးခွင့်ရမှာဖြစ်ပါကြောင်း၊ ကျောင်းအုပ် ဆရာကြီး၊ဆရာမကြီးများအနေဖြင့် ကျောင်းတစ်ကျောင်းအား ဦးဆောင်ဉီးရွက်ပြကြရသူများဖြစ်သဖြင့် စီမံခန့်ခွဲရေးသည်လည်း အရေးကြီးပါကြောင်း၊ ယခုအလုပ်ရုံဆွေးနွေးပွဲတွင် ဆွေးနွေးကြရမည့် စီမံခန့်ခွဲမှု၊ သင်ကြားသင်ယူမှု၊ ဘဏ္ဍာရေးဆိုင်ရာ၊ စီမံကိန်းရေးဆွဲရေး ဆိုင်ရာများအား လက်တွေ့ကျကျ ဆွေးနွေး၍ ရလဒ်ကောင်းများထွက်ပေါ်လာစေရေး၊ လက်တွေ့အသုံးချနိုင်ရေး ဆွေးနွေးဆောင်ရွက် ကြရန်လိုပါကြောင်း၊ အတန်းစဉ်ကူးပြောင်းရေး၊ ကျောင်းနေမြဲရေး၊ သင်ယူတတ်မြောက်စေရေး ဆရာကြီး၊ဆရာမကြီးများက ဝိုင်းဝန်းဆောင်ရွက်ရမည် ဖြစ်ပါကြောင်း၊ ပြင်ပဖြေဆိုမည့် ကျောင်းသား ကျောင်းသူများ အောင်မြင်စွာ ဖြေဆိုနိုင်ရေးအဘက်ဘက်မှ ကြိုးစားဆောင်ရွက်ကြရန် လိုပါကြောင်း၊ ဆရာကြီးဆရာမကြီးများ အနေဖြင့် ယခုလိုစီမံခန့်ခွဲမှု စွမ်းဆောင်ရည်မြင့်မားရေး အလုပ်ရုံဆွေးနွေးပွဲများ တက်ရောက်ပြီး တိုင်းဒေသကြီးပညာရေးကဏ္ဍတိုးတက်မြင့်မားစေရေး၊ အသိပညာ အတတ်ပညာနှင့်ပြည့်စုံသည့် အနာဂတ်ခေါင်းဆောင် လူငယ်လူရွယ်များ မွေးထုတ်ပေးနိုင်ရေး ကြိုးပမ်းဆောင်ရွက်ပေးကြရန်”ပြောကြားခဲ့ကြောင်း သိရသည်။

ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်းသည် အစိုးရအဖွဲ့ဝင် ဝန်ကြီးများ လိုက်ပါလျှက် ယနေ့နံနက်ပိုင်းက ကန်ကြီးထောင့်မြို့နယ်နှင့် ဝါးခယ်မမြို့နယ်များ၌ ပြုလုပ်သော မိုးစပါးစံကွက်ရိတ်သိမ်းပွဲ အခမ်းအနားများသို့ တက်ရောက်ခဲ့ကြသည်။ ဦးစွာ တိုင်းဒေသကြီး ဝန်ကြီးချုပ်သည်  ကန်ကြီးထောင့်မြို့နယ်၊ ကွင်းယားအရှေ့ ကျေးရွာအုပ်စု၊ စာဖြူစုကျေးရွာရှိ တောင်သူဦးချစ်ထွေး၏ စိုက်ဧက (၃.၃)ဧက၌ စိုက်ပျိုးထားသော မှော်ဘီ-၂ အမျိုးအစား မိုးစပါးစံပြကွက် ရိတ်သိမ်းနေမှုအား ကြည့်ရှုအားပေးခဲ့ရာ တစ်ဧက စပါးအထွက်နှုန်းမှာအခြောက် (၁၀၂)တင်း ထွက်ရှိခဲ့ပါသည်။  ယင်းနောက် ကွင်းယားကြီးကျေးရွာ၌ ပိုက်ဆံလျှော်(သစ်စိမ်းမြေဩဇာ) ထည့်သွင်းစိုက်ပျိုးထားသည့် ဧက(၁၀၀)စံပြကွက်ရှိ တောင်သူဒေါ်သီတာ၏ စိုက်ဧက (၉)ဧက၌ စိုက်ပျိုးထားသော ဆင်းသုခအမျိုးအစား မိုးစပါးစံပြကွက် ရိတ်သိမ်းနေမှုအား ကြည့်ရှုအားပေးခဲ့ရာ တစ်ဧက စပါးအထွက်နှုန်းမှာ အခြောက်(၁၂၃.၆၉)တင်းထွက်ရှိခဲ့ပါသည်။ ဆက်လက်၍ တိုင်းဒေသကြီးဝန်ကြီးချုပ်သည် ကွင်းယားကြီးကျေးရွာ၊ ရွှေကွင်းသာယာ ခန်းမ၌ ပြုလုပ်သည့် ဆောင်းသီးနှံနေကြာမျိုးစေ့ ပေးအပ်ပွဲသို့ တက်ရောက်၍ တောင်သူ(၈၁) ဦးထံသို့ ရေဆင်း-၁ နေကြာမျိုးစေ့များ ထောက်ပံ့ပေးအပ်ခဲ့သည်။ ဆက်လက်၍ တိုင်းဒေသကြီးဝန်ကြီးချုပ်သည် ဝါးခယ်မမြို့နယ်၊ သဲကုန်းကျေးရွာရှိ ပိုက်ဆံလျှော် (သစ်စိမ်းမြေဩဇာ) ထည့်သွင်းစိုက်ပျိုးထားသည့် ဧက(၁၀၀)စံပြကွက်ရှိ တောင်သူ ဦးစလားသာ၏ စိုက်ဧက(၈)ဧက၌ စိုက်ပျိုးထားသော ဆင်းသုခအမျိုးအစား မိုးစပါးစံပြကွက်ရိတ်သိမ်းပွဲသို့ တက်ရောက်ကြည့်ရှုအားပေးခဲ့ရာ  တစ်ဧက စပါးအထွက်နှုန်းမှာ အခြောက်(၁၂၀.၉၀)တင်း ထွက်ရှိခဲ့ကြောင်းသိရသည်။