၂၀၂၂ခုနှစ်၊ ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ်ဖလား ( ၈)ခရိုင် အသက် (၁၈) နှစ်အောက် အမျိုးသမီးဘောလုံးပြိုင်ပွဲ ဖွင့်ပွဲအခမ်းအနားကို နိုဝင်ဘာလ ၁၆ ရက်နေ့ ညနေပိုင်းက ပုသိမ်မြို့၊ ကိုးသိန်းအားကစားကွင်း၌ ပြုလုပ်ရာ  တိုင်းဒေသကြီးဝန်ကြီးချုပ် ဦးတင်မောင်ဝင်းနှင့်ဇနီး၊အစိုးရအဖွဲ့ဝင် ဝန်ကြီးများနှင့်ဇနီးများ၊ တိုင်း၊ ခရိုင်၊ မြို့နယ်အဆင့်ဌာနဆိုင်ရာများ၊ ပြိုင်ပွဲဝင်အသင်းများမှ အားကစားသမားများနှင့်အသင်းနည်းပြ၊ အုပ်ချုပ်သူများတက်ရောက်ခဲ့သည်။ ဖွင့်ပွဲတွင်တိုင်းဒေသကြီးဝန်ကြီးချုပ်က "ယနေ့ကျင်းပသည့် ဘောလုံးပြိုင်ပွဲကို ဧရာဝတီတိုင်းသကြီးအတွင်းရှိ ခရိုင်အသီးသီးမှ ဘောလုံးအားကစားသမားအချင်းချင်း ချစ်ကြည်ရင်းနှီးမှု ခိုင်မာလာစေရေး၊ ခရိုင်တစ်ခုနှင့်တစ်ခု အပြန်အလှန်ပူးပေါင်း ဆောင်ရွက်လာနိုင်စေရေးအစရှိတဲ့ ရည်ရွယ်ချက်များအပြင် ဧရာဝတီတိုင်းဒေသကြီးကိုယ်စားပြု ထူးချွန်ထက်မြက်သည့် အမျိုးသမီးဘောလုံးအားကစားသမားကောင်းများ ပေါ်ထွက်လာစေရေးကို ရည်ရွယ်ပြီးကျင်းပပြုလုပ်တဲ့ ပြိုင်ပွဲဖြစ်တဲ့အတွက် ပြိုင်ပွဲဝင်အသင်းများမှ အားကစားသမားများအနေဖြင့်အားကစားသမားကောင်း ပီသစွာယှဉ်ပြိုင်ကစားကြရန် တိုက်တွန်းလိုပါကြောင်း၊ အားကစားဆိုသည်မှာ "ခွန်အားနဲ့ဉာဏ်ရည်ကို အသုံးချပြီး လှုပ်ရှားယှဉ်ပြိုင်မှု" ဖြစ်ရာ ကြိုးစားယှဉ်ပြိုင်ရမှာဖြစ်ကြောင်း၊ပြိုင်ပွဲယှဉ်ပြိုင်နေစဉ်အတွင်းမှာလည်း ပြိုင်ဘက်အသင်းအား သည်းခံမှု၊ စိတ်ရှည်မှု၊နားလည်မှုရှိပြီး ယှဉ်ပြိုင်ကြရန်လိုအပ်ပါကြောင်း၊ အသင်းများကို အုပ်ချုပ်လိုက်ပါလာကြတဲ့ အုပ်ချုပ်သူများ၊ နည်းပြများအနေနဲ့လည်း  မိမိတို့အုပ်ချုပ်သည့် အားကစားသမားများကို နိုင်နင်းစွာ အုပ်ချုပ် ထိန်းသိမ်းနိုင်ရမှာဖြစ်ပါကြောင်း၊ဧရာဝတီတိုင်းဒေသကြီး အနေဖြင့် တိုင်းဒေသကြီး/ပြည်နယ် အားကစားပြိုင်ပွဲ အဆင့်တွင် အဆင့် ၅ နေရာ ရပ်တည်လျက်ရှိပြီး အမျိုးသမီးအားကစားသမားများ၏ စွမ်းဆောင်နိုင်မှုသည် ၆၀ ရာခိုင်နှုန်း အောင်မြင်မှုရရှိနေသည်ကို တွေ့ရမှာဖြစ်ပါကြောင်း၊ယခုပြိုင်ပွဲကို ကြီးကြပ်ဆောင်ရွက်ကြမည့် ဒိုင်လူကြီးများအနေဖြင့်လည်း ဘက်လိုက်မှုကင်းစွာဖြင့် ပြိုင်ပွဲစည်းမျဉ်းစည်းကမ်းများအတိုင်း ဆုံးဖြတ်ပေးကြဖို့ ပြောကြားလိုပါကြောင်း၊ယခုပြိုင်ပွဲမှတစ်ဆင့် မိမိတို့၏ခရိုင်၊မိမိတို့တိုင်းဒေသကြီး၏ ဂုဏ်ကိုဆောင်နိုင်ပြီး နိုင်ငံ့ဂုဏ်ဆောင် အားကစားသမားများဖြစ်အောင် ကြိုးစားဆောင်ရွက်ကြရန်” တိုက်တွန်းမှာကြား၍ ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ်ဖလား(၈)ခရိုင် အသက် (၁၈) နှစ်အောက် အမျိုးသမီးဘောလုံးပြိုင်ပွဲအား ဖွင့်လှစ်ပေးသည်။ ဆက်လက်၍ စစ်ကြောင်းမှူးဦးဆောင်၍ ပြိုင်ပွဲဝင်အသင်းများက ဝန်ကြီးချုပ်အား အလေးပြုခြင်း၊ အားကစားသစ္စာအဓိဌာန် ၄ ချက်အားရွတ်ဆိုခြင်းများကို ဆောင်ရွက်ခဲ့ကြပြီး  ကွင်းအတွင်းမှပြန်လည်ထွက်ခွာခဲ့ကြသည်။ ယင်းနောက် တိုင်းဒေသကြီးဝန်ကြီးချုပ်နှင့်တာဝန်ရှိသူများသည် ပြိုင်ပွဲပထမပွဲစဉ်အဖြစ် ယှဉ်ပြိုင်ကစားကြသည့်  ကျုံပျော်ခရိုင်အသင်းနှင့်မြန်အောင်ခရိုင်တို့၏ ယှဉ်ပြိုင်ကစားမှုများကို ကြည့်ရှုအားပေးခဲ့သည်။ ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ်ဖလား (၈)ခရိုင် အသက် (၁၈) နှစ်အောက် အမျိုးသမီး ဘောလုံးပြိုင်ပွဲအား ယခုလ(၁၆ )ရက်နေ့မှ (၂၃)ရက်နေ့အထိ ကျင်းပပြုလုပ်သွားမည်ဖြစ်ပြီး တိုင်းဒေသကြီးအတွင်းရှိ ခရိုင်(၈)ခရိုင်မှပြိုင်ပွဲအသင်း(၈)သင်းက ဝင်ရောက်ယှဉ်ပြိုင်သွားကြမည်ဖြစ်ကြောင်း သိရသည်။

ဧရာဝတီတိုင်းဒေသကြီး အစိုးရအဖွဲ့က ကြီးမှူးကျင်းပသည့်ဒွါဒသမအကြိမ်မြောက် စုပေါင်းမဟာဘုံကထိန်လျာ သင်္ကန်းဆက်ကပ်လှူဒါန်းပွဲကျင်းပရန်အတွက် ပဒေသာပင်များ ပုသိမ်မြို့အတွင်းလှည့်လည်ခြင်းအခမ်းအနားကို ယမန်နေ့ နံနက်ပိုင်းက ပုသိမ်ခရိုင်အထွေထွေအုပ်ချုပ်ရေးဦးစီးဌာနရုံးရှေ့မှစတင်ကာစီ တန်းလှည့်လည်ခဲ့ကြပြီး မြို့ပေါ်ရှိဌာနဆိုင်ရာအသီးသီးမှလာရောက်ပို့ဆောင်ကြသည့်ပဒေသာပင်များနှင့်ရပ်ကွက်နေပြည်သူများမှလာရောက်ပို့ဆောင်သည့်ပဒေသာပင်စုစုပေါင်း(၈၃)ခုအား ခရိုင်အထွေထွေအုပ်ချုပ်ရေးဦးစီးဌာနရုံးရှေ့မှ ကုန်သည်လမ်းတလျှောက်နှင့်ကမ်းနားလမ်း၊ မကျည်းပင်တန်းလမ်း၊မင်းကြီးလမ်း၊တံတားကြီးတန်းလမ်းတို့မှ ပုသိမ်မြို့သာသနာ့ဗိမာန်တော်ကြီးသို့ စနစ်တကျပို့ဆောင်ခဲ့ကြသည်။ ဆက်လက်၍  စုပေါင်းမဟာဘုံကထိန်လျာသင်္ကန်းဆက်ကပ်လှူဒါန်းပွဲအား ယနေ့နံနက်ပိုင်းက ပုသိမ်မြို့၊ သာသနာ့ဗိမာန်တော်ကြီး၌ ပြုလုပ်ရာ တိုင်းဒေသကြီးဝန်ကြီးချုပ်ဦးတင်‌မောင်ဝင်းနှင့်ဇနီး၊အနောက်တောင်တိုင်းစစ်ဌာနချုပ်တိုင်းမှူးနှင့်ဇနီး၊အစိုးရအဖွဲ့ဝင် ဝန်ကြီးများနှင့်ဇနီးများ၊ တိုင်း၊ ခရိုင်၊ မြို့နယ်မှ ဌာနဆိုင်ရာဝန်ထမ်းများ တက်ရောက်ခဲ့ကြသည်။ ဦးစွာ အခမ်းအနားအား “နမောတဿ” (၃)ကြိမ် ရွတ်ဆိုဘုရားကန်တော့၍ ဖွင့်လှစ်ခဲ့ပြီး နိုင်ငံတော်ဩဝါဒါစရိယ၊ ပုသိမ်မြို့၊ ညောင်ပင်သာပရိယတ္တိစာသင်တိုက် ပဓာနနာယကဆရာတော် ဘဒ္ဒန္တဝိသုတ (အဘိဓဇမဟာရဋ္ဌဂုရု၊ အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မဇောတိကဓဇ)မဟာထေရ်မြတ်ထံမှ ဝန်ကြီးချုပ်နှင့် ဧည့်ပရိသတ်များကငါးပါးသီလ ခံယူဆောက်တည်ခဲ့ကြကာ ဆရာတော် သံဃာတော်အရှင်သူမြတ်များ ရွတ်ပွားသရဇ္ဈာယ် ချီးမြှင့်တော်မူသော ပရိတ်တရားတော်များကို နာယူကြည်ညိုကြသည်။ ဆက်လက်၍ ကထိန်မည်ပုံ၊ ကထိန်ခင်းခြင်းနှင့် စပ်လျဉ်းသည့် အမေး(ကထိနပုစ္ဆာ)ကို မိဂဒါဝုန်ကျောင်းတိုက် ဆရာတော်ဒေါက်တာ ဘဒ္ဒန္တ အရိယဉာဏ၊သာသနဓဇဓမ္မာစရိယ၊ MA.Ph.D (India) အရှင်သူမြတ်ကမေး၍(ကထိနဝိသဇ္ဇနာ) ကထိန်ခင်းခြင်းအဖြေကို ကျောင်းထိုင်ဘုန်းကြီးသင်တန်းကျောင်း ကျောင်းအုပ်ဆရာတော် ဒေါက်တာ ဘဒ္ဒန္တဇောတိဿရ MA.Ph.D (India)အရှင်သူမြတ်မှ ဖြေကြားတော်မူခဲ့ပြီး ဧည့်ပရိတ်သတ်များက နာယူကြည်ညိုခဲ့ကြသည်။ ထို့နောက် တိုင်းဒေသကြီး ဝန်ကြီးချုပ်နှင့်ဇနီးတို့က ကျောင်းထိုင်ဘုန်းကြီးသင်တန်းကျောင်းတွင် ပုရိမဝါဆိုဝါကပ်၍ ပုရိမဝါမှ ထတော်မူကြသည့် သံဃာတော်များကိုယ်စား  ညောင်ပင်သာကျောင်းတိုက် ဆရာတော် ဘဒ္ဒန္တဝိသုတ မဟာထေရ်မြတ်ထံ ကထိန်လျာဉတ်သင်္ကန်းနှင့် အခြံအရံလှူဖွယ်ပစ္စည်းများအားလည်းကောင်း၊အနောက်တောင်တိုင်းစစ်ဌာနချုပ်တိုင်းမှူးနှင့် တာဝန်ရှိသူများက ပင့်သံဃာတော်အရှင်သူမြတ်များအား လှူဖွယ်ဝတ္ထုပစ္စည်းများအားလည်းကောင်း အသီးသီးဆက်ကပ်လှူဒါန်းခဲ့ကြသည်။ ယင်းနောက် တိုင်းဒေသကြီးသံဃနာယကအဖွဲ့ ဥက္ကဋ္ဌ၊ မရမ်းချိုကျောင်းတိုက်ဆရာတော် ဘဒ္ဒန္တသောဘိတ (အဂ္ဂမဟာဂန္ထဝါစကပဏ္ဍိတ၊ အဂ္ဂမဟာသဒ္ဓမ္မဇောတိကဓဇ) မဟာထေရ်မြတ်ထံမှ ဝန်ကြီးချုပ်နှင့်ဧည့်ပရိသတ်များက အနုမောဒနာတရားများနာကြား၍ လှူဒါန်းမှုအစုစုတို့အတွက် ရေစက်သွန်းချ အမျှပေးဝေခဲ့ကာ“ဗုဒ္ဓသာသနံ စိရံ တိဋ္ဌတု” (၃)ကြိမ် ရွတ်ဆိုဆုတောင်း၍ အခမ်းအနားအားရုပ်သိမ်းခဲ့ပြီး ရတနာရွှေမိုး ငွေမိုးများရွာသွန်းဖြိုးပြီးနောက် ဆရာတော် သံဃာတော်အရှင်သူမြတ်များအား နေ့ဆွမ်းများ ဆက်ကပ်လှူဒါန်းခဲ့ကြောင်းသိရသည်။ အဆိုပါ အခမ်းအနားတွင် ပဒေသာပင် ၈၃ခု ပစ္စည်းနှင့်ငွေသား ပဒေသာပင်တန်ဖိုး( ၃‌၆,၉၃၅,၄၅၀) အားကျောင်းတိုက် ၈၃ကျောင်းတိုက်သို့ လှူဒါန်းဆက်ကပ်နိုင်ခဲ့ကြောင်းသိရသည်။

ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် တာဝန်ရှိသူများလိုက်ပါလျှက် နိုဝင်ဘာလ ၂ ရက်နေ့က သာပေါင်းမြို့ အဆင့်မြင့်စက္ကူစက်ရုံ (သာပေါင်း)နှင့် သတင်းစာစက္ကူစက်ရုံ(သာပေါင်း)သို့သွားရောက်၍ စက်ရုံဝန်ထမ်းများနှင့် တွေ့ဆုံခဲ့ရာ စက်ရုံမှူးက စက်ရုံဆိုင်ရာ အချက်အလက်များအား ပါဝါပွိုင့်ဖြင့်ရှင်းလင်း တင်ပြသည်။ ယင်းနောက် တိုင်းဒေသကြီးဝန်ကြီးချုပ်က “သာပေါင်းအဆင့်မြင့်စက္ကူစက်ရုံနှင့် သတင်းစာ စက္ကူစက်ရုံသည် နိုင်ငံတော်အတွက် အရေးပါသည့်လုပ်ငန်းတစ်ခုဖြစ်ပါကြောင်း၊ စက်ရုံပြန်လည် လည်ပတ်နိုင်ရန်အတွက် လိုအပ်သည်များကို ကြိုတင်ပြင်ဆင်ထားရမည် ဖြစ်ပါကြောင်းနှင့် စက်ရုံလည်ပတ်ပါက ကုန်ကြမ်းရရှိရေး ပေါင်းစပ်ညှိနှိုင်းဆောင်ရွက်ရန်နှင့် ယခင်စက်ရုံ လည်ပတ်စဉ်က လိုအပ်ချက်များဖြစ်သည့် ပျော့ဖတ်ထုတ်လုပ်မည့် ဝါးလိုအပ်ချက်အတွက်  တောင်သူများ၊ လုပ်ငန်းရှင်များနှင့် ကုမ္ပဏီများအား ဖိတ်ခေါ်ဆောင်ရွက်ရမည် ဖြစ်ပါကြောင်း၊ ကုန်ကြမ်းအခက်အခဲမရှိ ရရှိစေရေးအတွက် စီမံချက်များချမှတ်၍ ဆောင်ရွက်ရန်လိုပါကြောင်း၊ ပွင့်လင်းကာလကို ရောက်ရှိလာပြီဖြစ်၍ မီးဘေးလုံခြုံရေးနှင့် သန့်ရှင်းရေးအား အလေးထား ဆောင်ရွက်ရန် လိုပါကြောင်း”မှာကြားသည်။ ဆက်လက်၍ တိုင်းဒေသကြီးဝန်ကြီးချုပ်နှင့် တာဝန်ရှိသူများသည် စက္ကူစက်ရုံနှင့် သတင်းစာစက္ကူစက်ရုံသို့ လှည့်လည်ကြည့်ရှုစစ်ဆေးခဲ့ရာ စက်ရုံမှူးက လည်ပတ်မှုအဆင့်ဆင့်နှင့် ထုတ်လုပ်မှုအဆင့်ဆင့်တို့အား လိုက်လံရှင်းလင်းပြသခဲ့ပြီး တိုင်းဒေသကြီးဝန်ကြီးချုပ်မှ လိုအပ်သည်မျာကို လမ်းညွှန်မှာကြားခဲ့ကြောင်း သတင်းရရှိသည်။

ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် တာဝန်ရှိသူများလိုက်ပါလျှက် နိုဝင်ဘာလ ၂ ရက်နေ့ မွန်းလွဲပိုင်းက ပုသိမ်မြို့ ဧရာဝတီအပြည်ပြည်ဆိုင်ရာစက်မှုဆိပ်ကမ်း၌ MV MCL-7 သင်္ဘောဖြင့် ဘင်္ဂလားဒေ့ရှ်နိုင်ငံသို့ ဆန်တင်ပို့ရန်ဆောင်ရွက်နေမှုများအား ကြည့်ရှုစစ်ဆေးခဲ့သည်။ ဦးစွာ တိုင်းဒေသကြီးဝန်ကြီးချုပ်သည် သင်္ဘောဝန်ထမ်းများနှင့် တွေ့ဆုံ၍ ရေကြောင်း အန္တရာယ်ကင်းရှင်းစွာဖြင့် မောင်းနှင်ရန်နှင့် နှစ်နိုင်ငံအစိုးရ သဘောတူညီချက်အရတင်ပို့သည့် ဆန်များအား အရေအသွေးကောင်းမွန်စေရေးနှင့် အရေအတွက်ပြည့်မီစေရေးအလေးထား ဆောင်ရွက်ရန် မှာကြားခဲ့ပြီး အမှတ်တရလက်ဆောင်ပစ္စည်းများ ပေးအပ်ခဲ့သည်။ အဆိုပါ MV MCL-7 သင်္ဘောသည် ဧရာဝတီအပြည်ပြည်ဆိုင်ရာစက်မှုဆိပ်ကမ်းမှ ဘင်္ဂလားဒေ့ရှ်နိုင်ငံသို့ ယခုလ ၄ ရက်နေ့တွင် ဆန်တန်ချိန် ၂၆၅၀ အိတ်ပေါင်း ၅၃၀၀၀ အားတင်ဆောင်၍ စတင်ထွက်ခွာမည်ဖြစ်ပါသည်။

ဧရာဝတီတိုင်းဒေသကြီး၊ ကျောင်းကုန်းမြို့နယ်၊ ဇရပ်ကွင်းအုပ်စုကျေးရွာ မုန်းသီတာကုမ္ပဏီလီမိတက်၏ ကန်ထရိုက်လယ်ယာဧက (၆၀၁)ဧက၌ ဆာဖိုးသာ-၁ စပါးမျိုးသစ် စမ်းသပ် မိုးစပါးစံကွက်ရိတ်သိမ်းပွဲအား ယနေ့နက်ပိုင်းက ပြူလုပ်ရာ တိုင်းဒေသကြီးဝန်ကြီးချုပ်ဦးတင်မောင်ဝင်း၊ အစိုးအဖွဲ့ဝင် ဝန်ကြီးများနှင့် ဒေသခံတောင်သူများတက်ရောက်ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်သည် တောင်သူများနှင့်ရင်းရင်းနှီးနှီးတွေ့ဆုံ၍ စပါးစိုက်ပျိုးရာတွင် ယူရီးယားဓာတ်မြေဩဇာ လျှော့ချသုံးစွဲရေး၊ပိုက်ဆံလျှော်(သစ်စိမ်းမြေဩဇာ) ထည့်သွင်းသုံးစွဲရေး၊ မျိုးသန့်စပါးများ ပိုမိုစိုက်ပျိုးနိုင်ရေးတို့အားမှာကြားသည်။ယင်းနောက် မိုးစပါးစံကွက်ရိတ်သိမ်းမှုအား ကြည့်ရှုအားပေးရာ တစ်ဧကစပါး အထွက်နှုန်းမှာ အ‌‌ခြောက်(၁၄၈.၂၆)တင်းထွက်ရှိခဲ့သည်။ ဆက်လက်၍  တိုင်းဒေသကြီးဝန်ကြီးချုပ်သည် လမ်းဦးစီးဌာန၊လမ်းအထူးအဖွဲ့(၂၁)မှ ၂၀၂၂-၂၀၂၃ ဘဏ္ဍာနှစ် ပြည်ထောင်စုရန်ပုံငွေဖြင့် ဆောင်ရွက်လျှက်ရှိသည့် ကြိမ်ပင်ဆယ်-စက္ကော့-ဓနုဖြူ-ဇလွန်လမ်း ၁မိုင်၂ဖာလုံ ၃၃၀ပေ ကွန်ကရစ်လမ်းခင်းနေမှုအား ကြည့်ရှုစစ်ဆေးပြီး လုပ်ငန်းဆောင်ရွက်ရာတွင် သတ်မှတ်အရည်အသွေး စံချိန်စံညွှန်းများပြည့်မီရေး၊သတ်မှတ်ထားသော ဘဏ္ဍာနှစ်အတွင်းလုပ်ငန်းများပြီးစီးစေရေးနှင့် လုပ်ငန်းခွင်အတွင်း အန္တရာယ်ကင်းရှင်းစေရေးအတွက် အလေးထားဆောင်ရွက်‌ရေးတို့ကို မှာကြားသည်။ ဆက်လက်၍ တိုင်းဒေသကြီး ဝန်ကြီးချုပ်နှင့်အဖွဲ့သည် ဇလွန်မြို့နယ်၊ မေရီလန်းကျေးရွာရှိ တောင်သူဦးဝင်းမြင့်ဦး၏  ပိုက်ဆံလျှော်(သစ်စိမ်းမြေဩဇာ)ထည့်သွင်း စိုက်ပျိုးထားသည့် လယ်ဧက(၁၂)ဧက၌ ဆင်းသုခမျိုး မိုးစပါးစံကွက်ရိတ်သိမ်းသိမ်းနေမှုအား ကြည့်ရှုအားပေးခဲ့ရာ  တစ်ဧက စပါးအထွက်နှုန်းမှာ အခြောက်(၁၀၇)တင်းထွက်ရှိခဲ့သည်။ ဆက်လက်၍ တိုင်းဒေသကြီး ဝန်ကြီးချုပ်နှင့်အဖွဲ့သည် ဟင်္သာတမြို့နယ်၊ ဒူးယားမြို့ အခြေခံပညာအထက်တန်းကျောင်းသို့ သွားရောက်၍  တက္ကသိုလ်ဝင်တန်းဖြေဆိုကြမည့် ကျောင်းသားကျောင်းသူများနှင့် အချိန်ပိုသင်ကြားပို့ချပေးလျှက်ရှိသည့် ဆရာ၊ဆရာမများအား ရင်းရင်းနှီးနှီးတွေ့ဆုံ၍ အားပေးစကားများပြောကြားခဲ့ပြီး ကျောင်းသုံးဗလာစာအုပ်များနှင့်စာရေးကိရိယာပစ္စည်းများ ထောက်ပံ့ပေးအပ်ခဲ့သည်။ ထို့နောက် တိုင်းဒေသကြီး ဝန်ကြီးချုပ်သည်ဟင်္သာတမြို့နယ်၊ တောင်ဂလုံကျေးရွာ၊ ဇလွန်-ပျဉ်းမကုန်း-ရှမ်းစုကားလမ်းဘေး ဝဲယာရှိ စိုက်ပျိုးရေးဦးစီးဌာနက စိုက်ပျိုးထားသော ပိုက်ဆံလျှော်(သစ်စိမ်းမြေဩဇာ) စိုက်ခင်းအား ကြည့်ရှုခဲ့သည်။ ဆက်လက်၍ တိုင်းဒေသကြီးဝန်ကြီးချုပ်သည် ရေကြည်မြို့နယ်၊ ဆီဆံကုန်းကျေးရွာရှိ ပိုက်ဆံလျှော်(သစ်စိမ်းမြေဩဇာ)ထည့်သွင်း စိုက်ပျိုးထားသည့် ဧက(၁၀၀)စံပြကွက် တောင်သူဦးနိုင်ဝင်းဆွေ၏  လယ်ဧက(၅ )ဧက၌ ဆင်းသုခမျိုး မိုးစပါးစံကွက်ရိတ်သိမ်းသိမ်းနေမှုအား ကြည့်ရှုအားပေးခဲ့ရာ  တစ်ဧက စပါးအထွက်နှုန်းမှာ အခြောက်( ၁၀၇)တင်းထွက်ရှိခဲ့သည်။ ယင်းနောက် တိုင်းဒေသကြီး ဝန်ကြီးချုပ်သည် ကျေးလက်ဒေသဖွံ့ဖြိုးတိုးတက်ရေးဦးစီးဌာနက ရေကြည်မြို့နယ်၊ဆီဆုံကုန်းကျေးရွာ အမှတ်(၁၊၂၊၃၊၄)ကုန်ထုတ်လမ်းဖောက်လုပ်နေမှုနှင့် ဆီဆုံကုန်း-ကြို့ကုန်း-လှေဆွဲရိုး-မဲဇလီကုန်းလမ်းပေါ်ရှိ ကြို့ကုန်း ကွန်ကရစ်တံတား တည်ဆောက်နေမှုများအား ကြည့်ရှုစစ်ဆေးပြီး အရည်အသွေး ပြည့်မီရေး၊သတ်မှတ် ဘဏ္ဍာနှစ်အတွင်း လုပ်ငန်းမျာ ပြီးစီးစေရေးနှင့် လုပ်ငန်းခွင် အန္တရာယ်ကင်းရှင်းစေရေးအတွက် အလေးထားဆောင်ရွက်‌ရေးတို့ကို မှာကြား ခဲ့ကြောင်း သိရသည်။