ဧရာဝတီတိုင်းဒေသကြီး၊ လပွတ္တာခရိုင်အတွင်းရှိ ရေငန်ထိုးဒေသများတွင် စပါးနှင့် ရေငန်ပုစွန် စိုက်ပျိုးမွေးမြူလုပ်ကိုင်သည့် တောင်သူများနှင့်တွေ့ဆုံပွဲကို ယနေ့နံနက်ပိုင်းက လပွတ္တာမြို့နယ်အထွေထွေအုပ်ချုပ်ရေးဉီးစီးဌာန၊ ရွေးနဒီခန်းမတွင်ပြုလုပ်ခဲ့ရာ တိုင်း‌ဒေသကြီး ဝန်ကြီးချုပ်ဦးတင်မောင်ဝင်း၊ တိုင်းဒေသကြီး အစိုးရအဖွဲ့ဝင်များ၊ တိုင်း၊ ခရိုင်၊ မြို့နယ်ဌာနဆိုင်ရာများ၊ စိုက်ပျိုး​မွေးမြူ​ရေး​တောင်သူများတက်ရောက်ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်က “ ဧရာဝတီတိုင်း​ဒေသကြီးအတွင်းရှိ ​ရေငန်ဒဏ်ခံရသည့် ​မြေဧရိယာ (၉)သိန်း​ကျော်တွင် စပါးတစ်သီးတည်းစိုက်ပျိုးခြင်းထက် ပို၍အကျိုးရှိနိုင်မည့် ​ရေငန် ငါး၊ ပုစွန် ​မွေးမြူ​ရေး​လုပ်ငန်းကို စမ်းသပ်​ဆောင်ရွက်ရန်နှင့်အကျိုးရှိပါက ဆက်လက်​ဆောင်ရွက်ရန်လို​ကြောင်း၊ လယ်​မြေဖြစ်သည့်အတွက် စိုက်ပျိုး​ရေးမှ ​မွေးမြူ​ရေးသို့​ပြောင်းလဲအသုံးချနိုင်ရေး ဗဟိုလယ်စီသို့တင်ပြရမည်ဖြစ်ပါ​ကြောင်း၊ ရေငန်ဝင်​ရောက်သဖြင့် စိုက်ပျိုး​ရေးလုပ်ငန်းများဖြစ်ထွန်း​အောင်မြင်မှုမရှိသည့်​နေရာများတွင် ​ရေငန် ငါး၊ ပုစွန်၊ ကဏန်း ​မွေးမြူ​ရေးလုပ်ငန်းများ အောင်မြင်မည်ဆိုပါက တိုးချဲ့မွေးမြူရန်လိုပါကြောင်းနှင့် ​မြေအား အကျိုးရှိစွာ အသုံးချရန်လို​ကြောင်း၊ ​​​မွေးမြူ​ရေးလုပ်ငန်းလုပ်ကိုင်သည့်​တောင်သူများအ​နေဖြင့် ​ကောင်းမွန်​သော​မွေးမြူ​ရေးကျင့်စဥ်များအတိုင်း လိုက်နာ၍ စနစ်တကျ​အောင်မြင်ဖြစ်ထွန်း​အောင် ​ဆောင်ရွက်ကြရန်လို​ကြောင်းနှင့် မွေးမြူ​ရေးလုပ်ငန်းများ တရားဝင်လုပ်ကိုင်ခွင့်ရရှိ​ရေးအတွက်တင်ပြဆောင်ရွက်ရမည်ဖြစ်ပါကြောင်း၊  ပြည်သူလူထု၏ လူမှုစီးပွားဘဝဖွံ့ဖြိုးတိုးတက်ရေးအတွက် အလုပ်အကိုင်အခွင့်အလမ်းများရရှိ၍ ဝင်ငွေများပိုမိုရရှိပါက အကျိုးရှိမည်ဖြစ်ပါကြောင်း၊ သဘာဝမွေးမြူရေးစနစ်မှ စနစ်တကျစီးပွားဖြစ်မွေးမြူရန်လည်း လိုအပ်မည်ဖြစ်ပါကြောင်း၊ မွေးမြူဆောင်ရွက်ရာတွင် အရင်းအနှီး၊ မျိုးရရှိမှုနှင့် နည်းပညာများရရှိ​ရေး ဝိုင်းဝန်းဆွေးနွေးပေးကြစေလိုကြောင်း” အမှာစကားပြောကြားသည်။ ဆက်လက်၍ လပွတ္တာခရိုင်အုပ်ချုပ်ရေးမှူးက ငါး၊ ပုစွန်၊ ကဏန်း မွေးမြူရေးကဏ္ဍနှင့်ပတ်သက်၍လည်းကောင်း၊ ငါးလုပ်ငန်းဦးစီးဌာန၊ တိုင်းဦးစီးမှူးက ရေငန်ထိုးဒေသများတွင် ရေငန်ပုစွန်မွေးမြူဆောင်ရွက်မှု အခြေအနေများနှင့် ပတ်သက်၍လည်းကောင်း၊ လယ်ယာမြေစီမံခန့်ခွဲမှုနှင့်စာရင်းအင်းဦးစီးဌာန တိုင်းဦးစီးမှူးက စိုက်ပျိုး​မွေးမြူ​ရေးကဏ္ဍတိုးတက်မြင့်မား​ရေးနှင့် လယ်ယာမြေအခြားနည်းသုံးစွဲခြင်းကိစ္စရပ်များအားလည်းကောင်း ရှင်းလင်း​ဆွေးခဲ့ကြပါသည်။ ထို့​နောက် ဒေသခံစိုက်ပျိုး​မွေးမြူ​ရေး ​တောင်သူများက ရေငန်ပုစွန်မွေးမြူဆောင်ရွက်မှုအခြေအနေများနှင့် သိရှိလိုသည်များအား ​ဆွေး​နွေးတင်ပြကြရာ တိုင်း​ဒေသကြီးဝန်ကြီးချုပ်နှင့် ဌာနဆိုင်ရာများက ပြန်လည်​ဆွေး​​နွေးဖြေကြားခဲ့ပါသည်။ ထို့​နောက် ​ဒေသခံများ၏ လိုအပ်ချက်များတင်ပြမှုများအ​ပေါ် တိုင်း​ဒေသကြီးဝန်ကြီးချုပ်က ​ပေါင်းစပ်ညှိနှိုင်း​ဆောင်ရွက်​ပေးခဲ့ပြီး နိဂုံးချုပ်အမှာစကား​ပြောကြားခဲ့ပါသည်။  ဆက်လက်၍ တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် လပွတ္တာမြို့နယ်၊ ကျောက်ဖြူကျေးရွာရှိ ဦးကျော်ထွန်းမြင့်၏  အားမာန်သစ် ရေချို၊ ရေငန်ပုစွန်မွေးမြူရေးလုပ်ငန်းသို့သွားရောက်၍ ပုဇွန်ကန်(၈)ဧကတွင် ​ရေချိုပုစွန် အ​ကောင်​ရေ (၃)သိန်း ​မွေးမြူထားရှိမှုနှင့် ပုဇွန်ကန် (၆)ဧကတွင် ​ရေချိုပုစွန်သား​ပေါက် အ​ကောင်​ရေ (၁)သိန်း (၆)​သောင်း မွေးမြူထားရှိမှုများကို တာဝန်ရှိသူများက ရှင်းလင်းတင်ပြခဲ့ပြီး တိုင်း​​ဒေသကြီးဝန်ကြီးချုပ်က ရှင်သန်ကြီးထွားမှုနှုန်း၊ ဈေးကွက်အတွင်းတင်ပို့ရောင်းနိုင်မှုအခြေအနေများကို မေးမြန်းခဲ့ရာ တာဝန်ရှိသူများက ရှင်းလင်းဖြေကြားခဲ့သည်။  ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် လပွတ္တာမြို့နယ်၊ မြွေဟောက်ကျေးရွာသို့ သွားရောက်၍ တောင်သူဦးမန်းဖြူ၏ လယ်​မြေ (၁၀)ဧကတွင် Super sun-41နေကြာသီးနှံမျိုး​စေ့ချစိုက်ပျိုးပွဲနှင့် လယ်​မြေ(၂၇)ဧကတွင် ပိုက်ဆံလျှော်မျိုးစေ့ချစိုက်ပျိုးပွဲသို့ တက်ရောက်ကြည့်ရှုအားပေးခဲ့ပြီး အောင်မြင်ဖြစ်ထွန်းအောင် စိုက်ပျိုးကြရန်လမ်းညွှန်မှာကြားခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် မြောင်းမြမြို့နယ်၊ သိလ္လာကျေးရွာရှိ ပိုင်ရှင်ဦးသုခအောင်က ငရုတ်ကောင်းစိုက်ဧ(၁၇)ဧကစိုက်ပျိုး၍ နိုင်ငံ့စီးပွားမြှင့်တင်ရေးရန်ပုံငွေမှ ကုန်ထုတ်လုပ်ငန်းများဖွံ့ဖြိုးရေးအတွက် ချေးငွေရယူထားသော “စစ်မှစစ်” ငရုတ်ကောင်းမှုန့်လုပ်ငန်းနှင့် ငရုတ်ကောင်းပင်များ စိုက်ပျိုးထားရှိမှုကို ကြည့်ရှုအားပေးပြီး အပင်များစိုက်ပျိုးဖြစ်ထွန်း​အောင်မြင်မှု၊ တစ်ဧကအထွက်နှုန်း၊ ဈေးကွက်အတွင်းတင်ပို့ရောင်းချမှုများကို မေးမြန်းခဲ့ရာ ခြံပိုင်ရှင်နှင့် တာဝန်ရှိသူများက သိလိုသည်များကို ပြန်လည်ဖြေကြားခဲ့သည်။

၂၀၂၃-၂၀၂၄ ပညာသင်နှစ်၊ ဧရာဝတီတိုင်းဒေသကြီး အခြေခံပညာကျောင်းသား အားကစားပွဲတော်ပြိုင်ပွဲအား (၂၀.၁၁.၂၀၂၃)ရက်နေ့မှစတင်၍ စည်ကားသိုက်မြိုက်စွာ ကျင်းပလျှက်ရှိရာ တိုင်းဒေသကြီးဝန်ကြီးချုပ် ဦးတင်မောင်းသည် အစိုးရအဖွဲ့ဝင်ဝန်ကြီးများ၊ ဌာနဆိုင်ရာ တာဝန်ရှိသူများနှင့်အတူ ယနေ့နံနက်ပိုင်းတွင် ပုသိမ်မြို့ပေါ် အခြေခံပညာကျောင်းများရှိ အားကစားခန်းမများတွင် ကျောင်းသား၊ ကျောင်းသူများ ပါဝင်ယှဉ်ပြိုင်နေမှုများကို လှည့်လည် ကြည့်ရှုအားပေးခဲ့သည်။ ဦးစွာ တိုင်းဒေသကြီးဝန်ကြီးချုပ်နှင့်အဖွဲ့သည် ပုသိမ်မြို့၊ ကိုးသိန်းအားကစားခန်းမ၌ ခရိုင်အုပ်စု(၅)နှင့် ခရိုင်အုပ်စု(၆)တို့၏ အမျိုးသားဘော်လီဘောပြိုင်ပွဲအားလည်းကောင်း၊ အမှတ်(၁)အခြေခံပညာ အထက်တန်းကျောင်း၊ ရတနာ့အားမာန်အားကစားရုံ၌ ခရိုင်အုပ်စု(၂)နှင့် ခရိုင်အုပ်စု(၆)တို့၏ အမျိုးသားဘက်စကတ်ဘောပြိုင်ပွဲအားလည်းကောင်း၊ အားကစားနှင့်ကာယ ပညာဦးစီးဌာန၊ အားကစားပြိုင်ပွဲရုံ(၂)၌ အမျိုးသား၊ အမျိုးသမီးကြက်တောင်ပြိုင်ပွဲအား လည်းကောင်း၊ အမှတ်(၁၁)အခြေခံပညာ အထက်တန်းကျောင်း(မြို့မ) ပညာမဉ္ဇူခန်းမ၌ ပြုလုပ်သည့် ခရိုင်အုပ်စု(၁)နှင့် ခရိုင်အုပ်စု(၂)တို့၏ အမျိုးသမီးပိုက်ကျော်ခြင်း ပြိုင်ပွဲအား လည်းကောင်း လှည့်လည်ကြည့်ရှုအားပေးခဲ့သည်။ ၂၀၂၃-၂၀၂၄ ပညာသင်နှစ်၊ ဧရာဝတီတိုင်းဒေသကြီး အခြေခံပညာကျောင်းသား အားကစားပွဲတော်ကို ယခုလ(၂၀)ရက်နေ့မှ (၂၅)ရက်နေ့အထိ ကျင်းပသွားမည်ဖြစ်ပြီး အားကစားနည်း(၇)မျိုးအား ခရိုင်အုပ်စုအလိုက် ပြိုင်ပွဲဝင်ကစားသမားပေါင်း(၆၇၂)ဦးက ပါဝင် ယှဉ်ပြိုင်ကစားလျက်ရှိကြောင်းသိရသည်။

၂၀၂၃-၂၀၂၄ပညာသင်နှစ်၊ ဧရာဝတီတိုင်းဒေသကြီး အခြေခံပညာကျောင်းသားအားကစားပွဲတော်ဖွင့်ပွဲအခမ်းအနားကို ယနေ့ညနေပိုင်းက ပုသိမ်မြို့၊ ကိုးသိန်းအားကစားကွင်း၌ ပြုလုပ်ခဲ့ရာ တိုင်းဒေသကြီးဝန်ကြီးချုပ် ဦးတင်​မောင်ဝင်း၊ အနောက်တောင်တိုင်းစစ်ဌာနချုပ်တိုင်းမှူး၊ ပုသိမ်လေတပ်စခန်းဌာနချုပ်မှူး၊ အစိုးရအဖွဲ့ဝင် ဝန်ကြီးများ၊ ဌာနဆိုင်ရာများ၊ ဆရာ၊ ဆရာမများနှင့် တိုင်းဒေသကြီးအတွင်းရှိ အခြေခံပညာကျောင်းများမှ ပြိုင်ပွဲဝင် ကျောင်းသား၊ ကျောင်းသူများတက်ရောက်ခဲ့ကြသည်။ ဦးစွာ တိုင်းဒေသကြီး ဝန်ကြီးချုပ်က“ ယနေ့ကျင်းပပြုလုပ်သည့် ၂၀၂၃-၂၀၂၄ ပညာသင်နှစ် ဧရာဝတီတိုင်းဒေသကြီး အခြေခံပညာကျောင်းသား အားကစားပွဲတော်ကို နိုင်ငံတော်စီမံအုပ်ချုပ်ရေးကောင်စီ၏လူမှုရေးဦးတည်ချက် (၁)ရပ်ဖြစ်သည့် တစ်မျိုးသားလုံးသက်ရှည်ကျန်းမာကြံ့ခိုင်ရေးအတွက် ပြည်သူအားလုံး အကျုံးဝင်မည့်ကျန်းမာရေးကဏ္ဍနှင့် အားကစားကဏ္ဍမြှင့်တင်ဆောင်ရွက်ရေးကို အကောင်အထည်ဖော် ဆောင်ရွက်နေသကဲ့သို့ ဧရာဝတီတိုင်းဒေသကြီးအတွင်းရှိ ခရိုင်အသီးသီးမှအခြေခံပညာကျောင်းသား၊ကျောင်းသူ အားကစားသမားများ အချင်းချင်းချစ်ကြည်ရင်းနှီးစွာဖြင့် ယှဉ်ပြိုင်ကစားနိုင်ရေး၊ ဧရာဝတီတိုင်းဒေသကြီး ကိုယ်စားပြု ထူးချွန်ထက်မြက်သော အားကစားသမားများ ပေါ်ထွန်း လာစေရေးတို့အတွက် ရည်ရွယ်ပြီးကျင်းပပြုလုပ်သည့် ပြိုင်ပွဲဖြစ်သည့်အတွက်ပြိုင်ပွဲဝင်ကစားအားသမားများအနေဖြင့် ကစားသမားကောင်းပီသစွာ ယှဉ်ပြိုင်ကစားကြရန်လည်း တိုက်တွန်းလိုပါကြောင်း၊ အားကစားဆိုသည်မှာ ခွန်အားနှင့် ဉာဏ်ရည်ကို စနစ်တကျမှန်ကန်စွာ လှုပ်ရှားစေခြင်းဖြင့် ကျန်းမာပျော်ရွှင်မှုကို ဖြစ်ပေါ်စေသည့် ပညာရပ်ဖြစ်ပါကြောင်း၊ ထိုနည်းတူစွာ အားကစားပြိုင်ပွဲတွင်လည်းအနိုင်အရှုံး တစ်ခုတည်းကိုမူတည်ပြီး ယှဉ်ပြိုင်ခြင်းမဟုတ်ဘဲ ဇွဲရှိမှု၊ သည်းခံမှု၊ကျွမ်းကျင်မှု၊ စိတ်ဓာတ်ကြံ့ခိုင်မှု၊ စည်းလုံးညီညွတ်မှု၊ စည်းကမ်းဥပဒေကို လေးစားလိုက်နာမှု၊ ယဉ်ကျေးမှု အစရှိသည်တို့ကိုပါ ယှဉ်ပြိုင်ကြရခြင်းဖြစ်သောကြောင့် မိမိဒေသ၏ ဂုဏ်သတင်းကို အားကစား လုပ်ဆောင်ခြင်းဖြင့် မြှင့်တင်နိုင်အောင် ကြိုးစားယှဉ်ပြိုင်သွားကြရန် အလေးအနက်ထား တိုက်တွန်းပြောကြားလိုပါကြောင်း၊ ယခုပြိုင်ပွဲမှတစ်ဆင့် မိမိတို့ခရိုင်၊ မိမိတို့တိုင်းဒေသကြီး၏ ဂုဏ်ကိုဆောင်နိုင်ပြီး နိုင်ငံ့လက်ရွေးစင် ကစားသမားများဖြစ်အောင် ကြိုးစားဆောင်ရွက်ကြစေလိုကြောင်း၊ ကျန်းမာပျော်ရွှင်မှုရှိမှသာ အောင်မြင်အောင် ကြိုးစားဆောင်ရွက်နိုင်မှာဖြစ်သည့်အတွက် အုပ်ချုပ်သူများ၊ နည်းပြ များနှင့် တာဝန်ရှိသူအားလုံးက ပြိုင်ပွဲဝင်အားကစားသမားများ၏ ကျန်းမာရေး ကောင်းမွန်ရေး၊ ဘေးကင်းလုံခြုံမှု ရှိစေရေးတို့အတွက် အထူးအလေးထား ဆောင်ရွက်ကြသွားကြစေလိုကြောင်း” တိုက်တွန်းအမှာစကားများပြေကြားပြီး ၂၀၂၃-၂၀၂၄ပညာသင်နှစ်၊ ဧရာဝတီတိုင်းဒေသကြီး အခြေခံပညာကျောင်းသားအားကစားပွဲတော်ကိုဖွင့်လှစ်ပေးသည်။ ဆက်လက်၍ စစ်ကြောင်းမှူးဦးဆောင်သည့် အားကစားအဖွဲ့များက တိုင်း​ဒေသကြီးဝန်ကြီးချုပ်အား အလေးပြုခြင်းနှင့် အားကစားသစ္စာအဓိဌာန် (၄)ချက်အား ရွတ်ဆိုခြင်းများကို ဆောင်ရွက်ခဲ့ကြပြီးနောက် ပြိုင်ပွဲဝင်အသင်းများက ကွင်းအတွင်းမှ ပြန်လည် ထွက်ခွာခဲ့ကြသည်။ ယင်းနောက် တိုင်း ဒေသကြီးဝန်ကြီးချုပ်နှင့်ဧည့်သည်တော်များသည် ကျောင်းသူလေးများ၏ ကိုယ်ကာယကြံ့ခိုင်မှုလေ့ကျင့်ခန်းနှင့် Fitness Danceများဖြင့် သရုပ်ပြဖျော်ဖြေမှုကို ကြည့်ရှုအားပေးခဲ့သည်။ ဆက်လက်၍ ဧရာဝတီတိုင်းဒေသကြီး အခြေခံပညာကျောင်းသားအားကစားပွဲတော် ကျင်းပရေးလုပ်ငန်းကော်မတီနာယက တိုင်းဒေသကြီးဝန်ကြီးချုပ်က တိုင်းဒေသကြီးပညာရေးမှူးထံသို့ အားကစားပစ္စည်းများပေးအပ်ခဲ့ပြီးနောက် အမျိုးသားဘောလုံးပြိုင်ပွဲ ပထမအုပ်စုအဖွင့်ပွဲစဉ်အဖြစ် ခရိုင်အုပ်စု( ၄ )နှင့် ခရိုင်အုပ်စု( ၂ )တို့၏ ယှဉ်ပြိုင်ကစားနေမှုများကို ကြည့်ရှုအားပေးခဲ့သည်။ ၂၀၂၃-၂၀၂၄ပညာသင်နှစ်၊ ဧရာဝတီတိုင်းဒေသကြီး အခြေခံပညာကျောင်းသားအားကစားပွဲတော်ကို ယခုလ(၂၀)ရက်နေ့မှ (၂၅)ရက်နေ့အထိ ကျင်းပသွားမည်ဖြစ်ပြီး အားကစားနည်း(၇)မျိုးအား ခရိုင်အုပ်စုအလိုက် ပြိုင်ပွဲဝင်အားကစားသမားပေါင်း(၆၇၂)ဦးက ပါဝင်ယှဉ်ပြိုင်ကစားသွားကြမည်ဖြစ်ကြောင်းသိရသည်။

ဧရာဝတီတိုင်းဒေသကြီးအစိုးရအဖွဲ့နှင့် တိုင်းဒေသကြီးကလေးသူငယ်အခွင့်အရေးများဆိုင်ရာကော်မတီတို့ပူးပေါင်း၍ (၃၄)နှစ်မြောက် ကလေးသူငယ်အခွင့်အရေးများဆိုင်ရာ ကုလသမဂ္ဂကွန်ဗင်းရှင်းအထိမ်းအမှတ် ကမ္ဘာ့ကလေးများနေ့အခမ်းအနားကို ယနေ့နံနက်ပိုင်းက ပုသိမ်မြို့၊ မြို့တော်ခန်းမတွင်ပြုလုပ်ခဲ့ရာ တိုင်းဒေသကြီးဝန်ကြီးချုပ်၊ အစိုးရအဖွဲ့ဝင် ဝန်ကြီးများနှင့်ဇနီးများ၊ ဌာနဆိုင်ရာများ၊ လူမှုရေးအသင်းအဖွဲ့များ၊ ကျောင်းသား၊ ကျောင်းသူများ၊ မူကြိုကျောင်းများမှရင်သွေးငယ်များနှင့် အုပ်ထိန်းသူမိဘများ တက်ရောက်ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်က“ မြန်မာနိုင်ငံအနေဖြင့် ကုလသမဂ္ဂအဖွဲ့ဝင်နိုင်ငံ တစ်နိုင်ငံဖြစ်သည်နှင့်လျော်ညီစွာ ကမ္ဘာ့ကလေးများနေ့ အခမ်းအနားများကို နှစ်စဉ်ကျင်းပ လျှက်ရှိပါကြောင်း၊ ကလေးများအတွက်ဆောင်ရွက်ရာတွင် အစိုးရဌာနများ၊ အစိုးရမဟုတ်သည့် စေတနာ့ ဝန်ထမ်းအဖွဲ့အစည်းများက ပူးပေါင်းဆောင်ရွက်ကြမှသာ ပြည့်စုံမည်ဖြစ်သည့်အတွက် ဝိုင်းဝန်းပူးပေါင်းဆောင်ရွက်ကြရန် တိုက်တွန်းပြောကြားလိုပါကြောင်း၊ ကုလသမဂ္ဂအဖွဲ့ကြီးက ယခုနှစ်ပေးပို့လာသည့် ဆောင်ပုဒ်ကတော့“ For every child, every right ” ဖြစ်ပြီး “ အခွင့်အရေးအားလုံး ရရှိရေးကလေးငယ်တိုင်းအတွက်ဖော်ဆောင်ပေး ” ဖြစ်သည့်အတွက် ကမ္ဘာပေါ်ရှိကလေးများအားလုံး ကလေးသူငယ်အခွင့်အရေးများအား ရရှိခံစားနိုင်ရန်၊ ခွဲခြားဆက်ဆံမှုမရှိဘဲ တန်းတူညီမျှပါဝင်ဆောင်ရွက်နိုင်ရန် နိုင်ငံတော်၊ သက်ဆိုင်ရာ အစိုးရဌာန အဖွဲ့အစည်းများမှ အားလုံးပါဝင်ဆောင်ရွက်ပေးကြပါရန် တိုက်တွန်းလှုံ့ဆော်ထားခြင်း ဖြစ်ပါကြောင်း၊ နိုင်ငံတစ်နိုင်ငံ၏အနာဂတ်သည် ကလေးသူငယ်များ၏ အပေါ်တည်မှီနေသည့် အတွက် ၄င်းတို့၏ ပညာရေး၊ ကျန်းမာရေး၊ ဘက်စုံဖွံ့ဖြိုးတိုးတက်ရေးအား ဂရုပြုအလေးထား ဆောင်ရွက်ရန်လိုအပ်သလို ကလေးများအတွက် ပိုမိုကောင်းမွန်ပြီး လုံခြုံစိတ်ချရသည့် ပတ်ဝန်းကျင်ကို ဖန်တီးပေးရန်လိုအပ်ပါကြောင်း၊ ကလေးများ၏ မွေးရာပါအခွင့်အရေးများ အပြည့်အဝရရှိစေရေးနှင့် မဆုံးရှုံးစေရေးအတွက် ကလေးသူငယ်အခွင့်အရေးများကို ဌာနဆိုင်ရာ များ၊ မိဘများနှင့် ပြည်သူတစ်ရပ်လုံးသိရှိဖြည့်ဆည်းပေးပြီး ကလေးတိုင်းအကြားအလပ်မရှိ အခွင့်အရေးများတန်းတူရရှိနိုင်ရန်အတွက် ကလေးသူငယ်အခွင့်အရေးများ ဆိုင်ရာကော်မတီ အဖွဲ့ဝင်များ၊ အစိုးရမဟုတ်သောစေတနာ့ဝန်ထမ်းအဖွဲ့အစည်းများအပါအဝင် သက်ဆိုင်ရာကဏ္ဍ အသီးသီးမှ ပုဂ္ဂိုလ်များအနေဖြင့် စဉ်ဆက်မပြတ်ဝိုင်းဝန်းပူးပေါင်း ဆောင်ရွက်ပေးကြရန်” တိုက်တွန်းအမှာစကားများပြောကြားသည်။ ဆက်လက်၍ တိုင်းဒေသကြီးဝန်ကြီးချုပ်နှင့် ဧည့်သည်တော်များသည် လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာနမှပေးပို့သည့် ကလေးသူငယ်များ အတွက်ဆောင်ရွက်မှုမှတ်တမ်း Video Clipနှင့် ပုသိမ်မူလတန်းကြိုကျောင်း၊ အနောက်တောင် တိုင်းစစ်ဌာနချုပ် ကိုယ့်အားကိုယ်ကိုးမူလတန်းကြိုကျောင်း၊ P.E.C ပုဂ္ဂလိကမူလတန်းကြို ကျောင်း၊ ပုသိမ်ကလေးပြုစုရေးဌာန၊ A.I.I.C ပုဂ္ဂလိကမူလတန်းကြိုကျောင်းနှင့် အမရာ ပုဂ္ဂလိကမူလတန်းကြိုကျောင်းတို့မှ ရင်သွေးငယ်များ၏ ကပြဖျော်ဖြေမှုများကို ကြည့်ရှုအားပေး ခဲ့သည်။ ယင်းနောက် တိုင်းဒေသကြီးဝန်ကြီးချုပ်က မူကြိုကျောင်းများမှ ရင်သွေးငယ်များအား အမှတ်တရလက်ဆောင်ပစ္စည်းများနှင့် ကမ္ဘာ့ကလေးများနေ့အကြို စာစီစာကုံးပြိုင်ပွဲတွင် အလယ်တန်းအဆင့် ဆုရရှိသည့်ကျောင်းသားကျောင်းသူများအား လည်းကောင်း၊ လုံခြုံရေးနှင့် နယ်စပ်ရေးရာဝန်ကြီးက မူကြိုကျောင်းများမှ ရင်သွေးငယ်များအားလည်းကောင်း၊ လူမှုရေးရာဝန်ကြီးက ကမ္ဘာ့ကလေးများနေ့အကြို စာစီစာကုံးပြိုင်ပွဲတွင် အထက်တန်းအဆင့်ဆုရရှိသည့် ကျောင်းသားကျောင်းသူများအားလည်းကောင်း ဆုများအသီးသီးချီးမြှင့်ခဲ့ကြပြီး ဝန်ကြီးချုပ်နှင့် ဧည့်သည်တော်များသည် မူကြိုကျောင်းများမှ ရင်သွေးငယ်များနှင့်အတူ အမှတ်တရစုပေါင်း မှတ်တမ်းတင်ဓာတ်ပုံများရိုက်ကူးခဲ့သည်။

တိုင်းဒေသကြီးအစိုးရအဖွဲ့ ဝန်ကြီးချုပ် ဦးတင်မောင်ဝင်းနှင့် တာဝန်ရှိသူများသည် နိုဝင်ဘာလ ၁၉ ရက်​နေ့ နေ့လည်ပိုင်း၌ ဖျာပုံခရိုင်၊ ဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာနရုံးရှိ ဇင်းဘောင်ရိပ်သာတွင် ခရိုင်စီမံအုပ်ချုပ်ရေးအဖွဲ့ဝင်များ၊ ခရိုင်/မြို့နယ်အဆင့် ဌာနဆိုင်ရာများ၊ ခရိုင်/မြို့နယ် စိုက်တိုးမြှင့်အဖွဲ့ဝင်များ၊ ဖျာပုံမြို့နယ် ဆန်စက်လုပ်ငန်းရှင်များအသင်း ဥက္ကဌနှင့် အဖွဲ့ဝင်များနှင့် တွေ့ဆုံ၍ ဖျာပုံမြို့နယ်၊ ကြက်ဖမွေးဇောင်းကျွန်းပတ်တာ နွေစပါး ရေရရှိရေးနှင့် ဧရာအားမာန် သမဝါယမအသင်းပိုင်လယ်မြေများအား နွေစပါးရေတိုးတက်ပေးဝေ နိုင်ရေးအတွက် ဆောင်ရွက်နေမှုအပေါ် မေးမြန်းဆွေးနွေးခဲ့ရာ ဖျာပုံခရိုင်၊ ဆည်မြောင်းနှင့်ရေအသုံးချမှု စီမံခန့်ခွဲရေးဦးစီးဌာန၊ လက်ထောက်ညွှန်ကြားရေးမှူးမှ အဆိုပါလုပ်ငန်းများနှင့်ပတ်သက်၍ လက်ရှိဆောင်ရွက်နေမှုများ၊ ဆက်လက်ဆောင်ရွက်မည့် အစီအစဉ်များနှင့် ပတ်သက်၍ ရှင်းလင်း တင်ပြခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့် အဖွဲ့သည် ကြက်ဖမွေးဇောင်းကျွန်းပတ်တာ အတွင်းရှိ ဧရာအားမာန် သမဝါယ စိုက်ကွင်းများ နွေစပါး ရေရရှိရေးဆောင်ရွက်နေသည့် MDC-7 မြောင်းတူးဖေါ်နေမှု အခြေအနေများ နှင့် ဝါးချောင်းရေတံခါး အတွင်း ရေချိုလေလွင့်ဆုံးရှုံး မှု မရှိစေရန် ဆောင်ရွက် ထားမှု အခြေအနေများအား ကွင်းဆင်းကြည့်ရှုစစ်ဆေးပြီး တောင်သူများနှင့် ရင်းရင်းနှီးနှီး တွေ့ဆုံ၍ နွေးစပါးရေချိုရရှိရေးဆောင်ရွက်ပေးနေမှုအခြေအနေများ၊ သီးထပ်စွမ်းအားတိုးတက်စိုက်နိုင်ရေးနှင့် ပန်းတိုင်အထွက်နှုန်းများရရှိစေရေးတောင်သူများ၊ သမဝါယမအသင်းများ၊ ဌာနဆိုင်ရာများ ဝိုင်းဝန်းကြိုးပမ်းဆောင်ရွက်ပေးကြရန်ဆွေးနွေးပြောကြားခဲ့သည်။ အဆိုပါ နွေစပါးဧက ၁၀၀၀ ကျော်ခန့် အကျိုးပြုမည့် MDC-7 မြောင်း/ဖလက်မြောင်းသည် လုပ်ငန်းပမာဏ အလျား ၂၁၈၄၀ ပေ / ၁၆၉၆၈ ကျင်း ရှိပြီး ယနေ့ အထိ ၃၅၀၃ ပေ/ ၂၄၁၇ ကျင်း ဆောင်ရွက်ပြီးစီးပြီဖြစ်ပြီး လုပ်ငန်းများအားလုံး နွေစပါးအောင်ရေအမီ ဇန်နဝါရီလ တတိယပတ်တွင် ပြီးစီးမည် ဖြစ်ကြောင်း သိရသည်။ ကြက်ဖမွေးဇောင်းကျွန်းပတ်တာအတွင်း နွေစပါး ရေချို ရေရှိစေရေးအတွက် အောက္ကဘာ ရေတံခါး ၊ မမိုးသူရေတံခါး စသော ရေသွင်းတံခါးများမှ သွင်းယူပေးပြီး ဝင်ရောက်လာသော ရေချိုများကို နွေစပါး စိုက်ပျိုးမည့် ဧရိယာများသို့ မြောင်းများ တူးဖေါ်ပေးလျက်ရှိရာ ဝင်ရောက်လာသော ရေချိုများဆုံးရှုံးမှု မရှိစေရန် ဝါးချောင်း ရေတံခါး မှ ထိန်းသိမ်း ဆောင်ရွက်ပေးလျက်ရှိပြီး ကြက်ဖမွေးဇောင်းကျွန်းပတ်တာ အတွင်း ယခင်နှစ် နွေစပါး ၆၈၀၀ ဧက စိုက်ပျိုးခဲ့ရာ ယခု နှစ် နွေကာလအတွင်း ပိုမိုစိုက်ပျိုးနိုင်မှာ ဖြစ်ကြောင်းသိရသည်။