(၇၈)နှစ်မြောက်တပ်မတော်နေ့ကိုကြိုဆိုဂုဏ်ပြုသောအားဖြင့်ပြုလုပ်သည့် ပုသိမ်တက္ကသိုလ်ရှေ့ လမ်းဖွင့်ပွဲ၊ စာကြည့်တိုက်ဖွင့်ပွဲနှင့် ဘောလုံးအားကစားကွင်းပွဲကြည့်စင်ဖွင့်ပွဲအခမ်းအနားများအား  မတ်လ ၂၅ရက်နေ့ နေ့လည်ပိုင်းက ပုသိမ်မြို့၊ ပုသိမ်တက္ကသိုလ်ရှေ့၌ ပြုလုပ်ခဲ့ရာ ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်း၊ အနောက်တောင်တိုင်းစစ်ဌာနချုပ်တိုင်းမှူး ဗိုလ်မှူးချုပ် ကြည်ခိုင်၊ အစိုးရအဖွဲ့ဝင် ဝန်ကြီးများနှင့်အတူ တက်ရောက်ဖွင့်လှစ်ပေးခဲ့သည်။ ရှေးဦးစွာ တိုင်းဒေသကြီး ဝန်ကြီးချုပ်သည် (၇၈)နှစ်မြောက် တပ်မတော်နေ့ကို ကြိုဆိုဂုဏ်ပြုသောအားဖြင့်ဖွင့်လှစ်သည့် ၂၀၂၂- ၂၀၂၃ ဘဏ္ဍာနှစ်၊ တိုင်းဒေသကြီးအစိုးရအဖွဲ့ ရန်ပုံငွေဖြင့် မြို့နယ်စည်ပင်သာယာရေးအဖွဲ့မှဆောင်ရွက်သည့် ပုသိမ်တက္ကသိုလ်ရှေ့ အလှအုတ်ပန်းကွက်စီခင်းလမ်း (အရှည် ၆၁၀ပေ၊ အကျယ် ၈ ပေ)ရှိ လမ်းသစ်ဖွင့်ပွဲ အခမ်းအနားအား တာဝန်ရှိသူများနှင့်အတူဖဲကြိုးဖြတ်ဖွင့်လှစ်ပေးပြီး လမ်းသစ်အားလှည့်လည်ကြည့်ရှုစစ်ဆေးခဲ့ကာ ရေရှည်တည်တံ့စေရေး၊ ပန်းအလှပင်များ၊ မြက်ခင်းများဖြင့် စိမ်းလန်းသာယာလှပစေရေး ထိန်းသိမ်းဆောင်ရွက်ကြရန်မှာကြားခဲ့သည်။ ဆက်လက်၍ ပုသိမ်တက္ကသိုလ်စာကြည့်တိုက် (၁၂၈ပေ × ၆၀ပေ) နှစ်ထပ် အဆောက်အဦဖွင့်ပွဲ တက်ရောက်ခဲ့ပြီး အခမ်းအနားအား တာဝန်ရှိသူများနှင့်အတူ ဖဲကြိုးဖြတ်ဖွင့်လှစ်ပေးခဲ့ကာ စာကြည့်တိုက်ဖွင့်ပွဲအထိမ်းအမှတ် အမှတ်တရသစ်ပင်များစိုက်ပျိုးပေးခဲ့ကာ ကမ္ဗည်းမော်ကွန်းအား အမွှေးနံ့သာရည်များ ပတ်ဖြန်းပေးခဲကြသည်။ ထို့နောက် တိုင်းဒေသကြီးဝန်ကြီးချုပ်မှ အဖွင့်အမှာစကားပြောကြားရာ ပုသိမ်တက္ကသိုလ်စာကြည့်တိုက်သစ်အား ယနေ့တွင် ဖွင့်လှစ်ပေးနိုင်ခဲ့ပြီဖြစ်၍ မင်္ဂလာအပေါင်းနှင့်ပြည့်စုံသည့်နေ့ဟုပြောရမှာဖြစ်ပါကြောင်း၊ ပုသိမ်တက္ကသိုလ်စာကြည့်တိုက်ကို ပုသိမ်ဥပစာကောလိပ်ကာလ ၁၉၅၈ ခုနှစ်မှာစတင်တည်ထောင်ခဲ့ပြီး ယခုတွင် စာအုပ်ပေါင်း ၆၀၀၀၀ကျော်ဖြင့် စာအုပ်စာပေများဖြည့်ဆည်းထားရှိပေးထားပြီး စာအုပ်စာပေနဲ့ သတင်းအချက်အလက်များကို တစ်နေရာတည်းမှာ ရှာဖွေလေ့လာဖတ်ရှုနိုင်မှာဖြစ်ပါကြောင်း၊ ပုသိမ်တက္ကသိုလ်စာကြည့်တိုက်အားတက္ကသိုလ်များဗဟိုစာကြည့်တိုက်၊ နိုင်ငံတကာစာကြည့်တိုက်များနှင့် ချိတ်ဆက်၍ ကမ္ဘာ့အဆင့်မီ စာကြည့်တိုက်တစ်ခုဖြစ်လာစေရေး ဆောင်ရွက်ကြရမှာဖြစ်ပါကြောင်း၊ စာကြည့်တိုက်သို့ လာရောက်၍ စာပေလေ့လာဖတ်ရှုသူများ စိတ်အေးချမ်းသာစွာ လေ့လာမှတ်သားနိုင်ရေး ပြင်ဆင်ဆောင်ရွက်ထားရှိပါကြောင်း၊ ကျောင်းသားကျောင်းသူများ၊ ဆရာမများအနေဖြင့်လည်း မိမိတို့သိရှိလိုသည့်ဘာသာရပ်ဆိုင်ရာများ၊ စာပေဗဟုသုတများကို ကောင်းမွန်စွာ ရှာဖွေလေ့လာနိုင်မှာဖြစ်ပါကြောင်းနှင့် စာကြည့်တိုက်ကြီး၏ အားသာချက်များကို အကျိုးရှိအောင် အသုံးချ၍ မိမိတို့တိုင်းဒေသကြီးနှင့် နိုင်ငံတော် ဖွံ့ဖြိုးတိုးတက်စေရေး ဝိုင်းဝန်းကြိုးစားဆောင်ရွက်ကြရန်ပြောကြားခဲ့သည်။ ထို့နောက် ပုသိမ်တက္ကသိုလ်ပါမောက္ခချုပ်မှ ကျေးဇူးတင်စကားပြန်လည်ပြောကြားခဲ့ပြီး စာကြည့်တိုက်ဖွင့်ပွဲအထိမ်းအမှတ်ပစ္စည်းများအား တာဝန်ရှိသူများမှပေးအပ်ခဲ့ကြသည်။ ဆက်လက်၍ စာကြည့်တိုက်အတွင်း စာဖတ်ခန်း၊ စာအုပ်စင်များ ပြင်ဆင်ထားရှိမှုများလှည့်လည်ကြည့်ရှုစစ်ဆေးခဲ့ပြီး စနစ်တကျ မှတ်တမ်းမှတ်ရာများထားရှိစေရေး၊ စာအုပ်စာတမ်းများရိုသေစွာကိုင်တွယ်အသုံးပြုစေရေးမှာကြားခဲ့သည်။ ထို့နောက် ပုသိမ်တက္ကသိုလ် ဘောလုံးကွင်း ပွဲကြည့်စင် ( ၁၅၀ပေ×၃၄ပေ)နှစ်ထပ် အဆောက်အဦသစ်ဖွင့်ပွဲတက်ရောက်၍ အခမ်းအနားအားဖဲကြိုးဖြတ်ဖွင့်လှစ်ပေးပြီး ကမ္ဗည်းမော်ကွန်းအား အမွှေးနံ့သာရည်များ ပတ်ဖြန်းပေးခဲ့ကြကာ ပွဲကြည့်စင်သစ်အားလှည့်လည်ကြည့်ရှုစစ်ဆေးခဲ့ကာ ရေရှည်ခိုင်ခံ့စေရေးနှင့် စနစ်တကျအသုံးပြုစေရေးမှာကြားခဲ့ကြောင်းသိရသည်။ ထို့နောက်တိုင်းဒေသကြီးဝန်ကြီးချုပ်နှင့်အဖွဲ့သည် ပုသိမ်မြို့၊ အမှတ်(၂)ရပ်ကွက်၊ ကမ်းနားလမ်းရှိ ပုသိမ်မြို့နယ်သမဝါယမအသင်းစုလီမိတက်မှ ဆင်းရွှေကြာ(၂)စပ်မျိုး နေကြာဆီ ကြိတ်ခွဲနေမှုများအား ကြည့်ရှုစစ်ဆေးခဲ့ပြီး နေကြာဆီကြိတ်ခွဲထုတ်လုပ်မှု၊ ကုန်ကြမ်းဝယ်ယူရရှိမှုနှင့် နေကြာဆီ၊နေကြာဖတ်များရောင်းဝယ်ဖြန့်ဖြူးမှုအခြေအနေများရှင်းလင်းတင်ပြမှုအပေါ် တိုင်းဒေသကြီးဝန်ကြီးချုပ်မှ တိုင်းဒေသကြီးအတွင်း ဆီဖူလုံမှုရှိစေရေးအတွက် နေကြာသီးနှံအားတိုးချဲ့စိုက်ပျိုးထားရှိကြောင်း၊ နေကြာရိတ်သိမ်းနေချိန်ဖြစ်၍ ကုန်ကြမ်းများပိုမိုထွက်ရှိလာမှာဖြစ်ကြောင်း၊ အဆင့်မီဆီကြိတ်စက်များနှင့် သန့်ရှင်းလတ်ဆက်ပြီးကျန်းမာရေးနှင့်ညီညွတ်သည့် နေကြာဆီများပိုမိုထုတ်လုပ်နိုင်ရေးမှာကြားခဲ့သည်။

ကျင်းပပြုလုပ်ရာ ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် အစိုးရအဖွဲ့ဝင် ဝန်ကြီးများ၊ တိုင်း၊ ခရိုင်၊ မြို့နယ်ဌာနဆိုင်ရာများနှင့်အတူ ဖဲကြိုးဖြတ်ဖွင့်လှစ်ပေးခဲ့သည်။  ထို့နောက် ကျောင်းဆောင်သစ်ဆိုင်းဘုတ်အား စက်ခလုတ်နှိပ်ဖွင့်လှစ်ပေးပြီး ကမ္ဗည်းမော်ကွန်းအား အမွှေးနံ့သာရည်များပတ်ဖြန်းပေးခဲ့ကာ ကျောင်းဆောင်သစ်အားလှည့်လည်ကြည့်ရှုစစ်ဆေးခဲ့သည်။ ထို့နောက် ခရိုင်၊ မြို့နယ်ဌာနဆိုင်ရာများ၊ မိခင်နှင့်ကလေးစောင့်ရှောက်ရေးအသင်းဝင်များ၊ အမျိုးသမီးရေးရာအဖွဲ့ဝင်များနှင့်တွေ့ဆုံ၍ မူကြိုကျောင်းဆောင်သစ်ကြီးအားဆောက်လုပ်ပြီးစီးပြီး ယနေ့တွင် ဖွင့်လှစ်ပေးနိုင်ခဲ့ပြီဖြစ်၍ ကလေးငယ်များအတွက် များစွာအကျိုးရှိစေမှာဖြစ်ပါကြောင်း၊ မူကြိုကလေးငယ်များသည်သိချင်တတ်ချင်စိတ်၊ စူးစမ်းလေ့လာချင်စိတ်များတဲ့အရွယ်ဖြစ်၍ ရုပ်ပိုင်းဆိုင်ရာများ၊ သင်ကြားပြသရေးဆိုင်ရာပတ်ဝန်းကျင်ကောင်းများဖန်တီးပေးရန်လိုပါကြောင်းနှင့် ကျောင်းဆောင်သစ်ရေရှည်တည်တံ့စေရေးထိန်းသိမ်းစောင့်ရှောက်ပေးကြရန် မှာကြားခဲ့ပြီးနောက် ဆောက်လုပ်ရေးကုမ္ပဏီ မန်နေးဂျင်းဒါရိုက်တာမှ လူမှုဝန်ထမ်းဦးစီးဌာနသို့ ကျောင်းဆောက်သစ်နှင့်ပက်သတ်သည့်စာရွက်သာတမ်းများအား ပေးအပ်ခဲ့သည်။ ထို့နောက် တိုင်းဒေသကြီးဝန်ကြီးချုပ်သည် မူကြိုကလေးငယ်များပျော်ရွှင်စွာဆော့ကစားနေမှုများကို ကြည့်ရှုအားပေးခဲ့ပြီး ကလေးငယ်များနှင့်ဆရာမများအတွက် အားကစားပစ္စည်းများနှင့် ထောက်ပံ့ငွေများပေးအပ်ခဲ့သည်။ အဆိုပါ မူကြိုကျောင်းအား ၂၀၂၂ -၂၀၂၃ ဘဏ္ဍာနှစ် ပြည်ထောင်စု ဘဏ္ဍာရန်ပုံငွေဖြင့်ဆောင်ရွက်ခြင်းဖြစ်ပြီး (၉၀×၃၀×၁၂)ပေ၊ (၆၀×၃၀×၂၄)ပေ L ပုံစံ RC နှစ်ထပ် အဆောက်အဦဖြစ်ကြောင်းသိရသည်။

(၇၈)နှစ်မြောက်တပ်မတော်နေ့ကိုကြိုဆိုဂုဏ်ပြုသောအားဖြင့်ပြုလုပ်သည့် လပွတ္တာမြို့နယ်အတွင်းရှိ ကွန်ကရစ်လမ်းသစ်ဖွင့်ပွဲအား ယနေ့နေ့လည်ပိုင်းက ကျင်းပပြုလုပ်ရာ ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် အစိုးရအဖွဲ့ဝင် ဝန်ကြီးများ၊ တိုင်း၊ ခရိုင်၊ မြို့နယ်ဌာနဆိုင်ရာများနှင့်အတူ တက်ရောက်ဖွင့်လှစ်ပေးခဲ့သည်။  ဦးစွာ တိုင်းဒေသကြီးဝန်ကြီးချုပ်နှင့်အဖွဲ့သည် လပွတ္တာမြို့နယ်၊ ပိန္နဲတောင်ကျေးရွာ၊ လပွတ္တာ-မြောင်းမြ ကားလမ်းမကြီးမှ ပိန္နဲတောင်ကျေးရွာသို့ဆက်သွယ်သည့် ကွန်ကရစ်လမ်းသစ်ဖွင့်ပွဲတက်ရောက်၍ အခမ်းအနားအား တာဝန်ရှိသူများနှင့်အတူဖဲကြိုးဖြတ်ဖွင့်လှစ်ပေးခဲ့သည်။ ထို့နောက် လမ်းဖွင့်ပွဲအထိမ်းအမှတ် အမှတ်တရပစ္စည်းများပေးအပ်ခဲ့ပြီး စုပေါင်းမှတ်တမ်းတင်ဓာတ်ပုံများရိုက်ကူးခဲ့ကြကာ ကွန်ကရစ်လမ်းသစ်အားဖြတ်သန်းကြည့်ရှုစစ်ဆေးခဲ့သည်။ အဆိုပါလမ်းအား ကျေးလက်လမ်းဖွံ့ဖြိုးရေးဦးစီးဌာနမှ ၂၀၂၂- ၂၂၃ ဘဏ္ဍာနှစ်၊ တိုင်းဒေသကြီးဘဏ္ဍာရန်ပုံငွေဖြင့် လမ်းအရှည် (၁/၂.၅)မိုင်အား ကွန်ကရစ်လမ်းသစ်ဆောင်ရွက်ပေးခြင်းဖြစ်ပြီး ကျေးရွာ ရွာရှိ အိမ်ခြေ ၅၅၃ အိမ်၊ လူဦးရေး ၂၁၈၇ဦးတို့၏ လူမှုစီးပွားဘဝဖွံ့ဖြိုးတိုးတက်စေရေးများစွာ အထောက်အကူပြုမှာဖြစ်ကြောင်းသိရသည်။ အလားတူ လပွတ္တာ-မြောင်းမြ ကားလမ်းမကြီးမှ ကျောက်ဖြူကျေးရွာသို့ဆက်သွယ်သည့် ကွန်ကရစ်လမ်းသစ်ဖွင့်ပွဲတက်ရောက်၍ အခမ်းအနားအား တာဝန်ရှိသူများနှင့်အတူဖဲကြိုးဖြတ်ဖွင့်လှစ်ပေးခဲ့သည်။ ထို့နောက် လမ်းဖွင့်ပွဲအထိမ်းအမှတ် အမှတ်တရပစ္စည်းများပေးအပ်ခဲ့ပြီး စုပေါင်းမှတ်တမ်းတင်ဓာတ်ပုံများရိုက်ကူးခဲ့ကြကာ ကွန်ကရစ်လမ်းသစ်အားဖြတ်သန်းကြည့်ရှုစစ်ဆေးခဲ့သည်။ အဆိုပါလမ်းအား ကျေးလက်လမ်းဖွံ့ဖြိုးရေးဦးစီးဌာနမှ ၂၀၂၂- ၂၂၃ ဘဏ္ဍာနှစ်၊ တိုင်းဒေသကြီးဘဏ္ဍာရန်ပုံငွေဖြင့် လမ်းအရှည် (၀/၃.၈၄)မိုင်အား ကွန်ကရစ်လမ်းသစ်ဆောင်ရွက်ပေးခြင်းဖြစ်ပြီး အဆိုပါကျေးရွာ  ရွာရှိ အိမ်ခြေ ၄၂၅အိမ်၊  လူဦးရေး ၁၇၄၂ဦးတို့၏ လူမှုစီးပွားဘဝဖွံ့ဖြိုးတိုးတက်စေရေးများစွာ အထောက်အကူပြုမှာဖြစ်ကြောင်းသိရသည်။

ဧရာဝတီတိုင်းဒေသကြီး ဝန်ကြီးချုပ်နှင့်အဖွဲ့သည် (၇၈)နှစ်မြောက် တပ်မတော်နေ့ကို ကြိုဆိုဂုဏ်ပြုသောအားဖြင့်ဖွင့်လှစ်သည့်  ပုသိမ်မြို့၊ အမှတ်(၄)ရပ်ကွက်တွင် ၂၀၂၂-၂၀၂၃ ဘဏ္ဍာရေးနှစ်၊ ပုသိမ်မြို့နယ်စည်ပင်သာယာရေးအဖွဲ့ မှ တိုင်းဒေသကြီးအထွေထွေပိုလျှံရန်ပုံငွေဖြင့် ပန်းခြံလမ်း (အရှည် ၁၀၀၀ပေ၊အကျယ်၂၀ ပေနှင့် ထု ၈လက်မ)ရှိ ကွန်ကရစ်လမ်းသစ်  ဖွင့်ပွဲအား တက်ရောက်ဖွင့်လှစ်ပေးပြီး စုပေါင်းမှတ်တမ်းတင်ဓာတ်ပုံများ ရိုက်ကူးခဲ့ကာ ကွန်ကရစ်လမ်းသစ်အား တာဝန်ရှိသူများနှင့်အတူ လှည့်လည်ကြည့်ရှုစစ်ဆေးခဲ့ပြီး ရေရှည်တည်တံ့စေရေး၊ သန့်ရှင်းသပ်ရပ်မှုရှိစေရေးနှင့် ရေစီးရေလာကောင်းမွန်စေရေး ဝိုင်းဝန်းထိန်းသိမ်းစောင့်ရှောက်ကြရန်မှာကြားခဲ့သည်။

ဧရာဝတီတိုင်းဒေသကြီး ဝန်ကြီးချုပ် ဦးတင်မောင်ဝင်းသည် အစိုးရအဖွဲ့ဝင်ဝန်ကြီးများ၊ တိုင်း၊ ခရိုင်၊ မြို့နယ်ဌာနဆိုင်ရာများလိုက်ပါလျက် ယနေ့နံနက်ပိုင်းတွင် မအူပင်ခရိုင်၊ ညောင်တုန်းမြို့နယ်၊ အရွှဲကျေးရွာအုပ်စု၊ အရွှဲကျေးရွာရှိ ရွှေဝါနဒီ စိုက်ပျိုးထုတ်လုပ်မှုကုမ္ပဏီ၊ ရွှေဝါနဒီဆန်ကြိတ်ခွဲသန့်စင်စက်လုပ်ငန်းသို့သွားရောက်၍ ဆန်ကြိတ်ခွဲတင်ပို့နိုင်ရေး ဆန်စက်လည်ပတ်နေမှုအခြေအနေများကြည့်ရှုစစ်ဆေးခဲ့ရာ ဆန်စက်တာဝန်ခံမှ ဆန်ကြိတ်ခွဲမှု၊ သိုလှောင်မှု၊ (A -1, 2) ဇကွဲ တန်၂၅၀ ကြိတ်ခွဲမှု၊ ထွန်းပုဆန် တန် ၅၀၀ ဆန်သန့်စင်ကြိတ်ခွဲမှုနှင့် ရန်ကုန်ရုံးချုပ်မှတစ်ဆင့် ပြည်ပတင်ပို့မှုအခြေအနေများရှင်းလင်းတင်ပြခဲ့မှုအပေါ် တိုင်းဒေသကြီးဝန်ကြီးချုပ်မှ ဆန်အရည်အသွေးကောင်းမွန်စေရေး၊ ထုတ်ပိုးမှုစနစ်များသေသပ်ကောင်းမွန်စေရေး၊ ပြည်ပစျေးကွက်ပိုမိုထိုးဖောက်နိုင်ရေးနှင့် ဘေးထွက်ပစ္စည်းများအား အကျိုးရှိစွာပြန်လည်အသုံးချစေရေးကြိုးပမ်းဆောင်ရွက်ရန်မှာကြားခဲ့သည်။  ဆက်လက်၍  (၇၈)နှစ်မြောက် တပ်မတော် နေ့ကို ကြိုဆိုဂုဏ်ပြုသောအားဖြင့်ဖွင့်လှစ်သည့် ကျေးရွာလျှပ်စစ်မီးဖွင့်ပွဲ အခမ်းအနားများအား ယနေ့နံနက်ပိုင်းက ပန်းတနော်မြို့နယ်၊ ရွှေလှေကျေးရွာနှင့် မင်းဂရုကျေးရွာတို့၌ ပြုလုပ်ခဲ့ရာ ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် အစိုးရအဖွဲ့ဝင် ဝန်ကြီးများ၊ တိုင်း၊ ခရိုင်၊ မြို့နယ်ဌာနဆိုင်ရာများနှင့်အတူ တက်ရောက်ဖွင့်လှစ်ပေးခဲ့သည်။ ရှေးဦးစွာ တိုင်းဒေသကြီး ဝန်ကြီးချုပ်သည် (၇၈)နှစ်မြောက် တပ်မတော်နေ့ကို ကြိုဆိုဂုဏ်ပြုသောအားဖြင့် ၂၀၂၂- ၂၀၂၃ တိုင်းဒေသကြီးဘဏ္ဍာရန်ပုံငွေဖြင့်ဆောင်ရွက်သည့် ၁၁/၀.၄ ကေဗွီလိုင်းနှင့် ၁၀၀ကေဗွီအေ ထရန်စဖော်မာ ၂လုံးတည်ဆောက်ပေးပြီး ကျေးရွာမှကိုယ်ထူကိုယ်ထဖြင့် ၄၀၀ ဗို့ ဓာတ်အားလိုင်းသွယ်တန်းဆောင်ရွက်သည့်  ရွှေလှေကျေးရွာ လျှပ်စစ်မီးဖွင့်ပွဲ အခမ်းအနားအား တာဝန်ရှိသူများနှင့်အတူဖဲကြိုးဖြတ်ဖွင့်လှစ်ပေး၍ လျှပ်စစ်မီးအား မီးခလုပ်နှိပ်ဖွင့်လှစ်ကာ ကမ္ဗည်းမော်ကွန်းကို အစိုးရအဖွဲ့ဝင် ဝန်ကြီးများနှင့်အတူ အမွှေးနံ့သာရည်များပက်ဖျန်းပေးခဲ့ ပြီးအခမ်းအနားသို့ တက်ရောက်လာသူများနှင့်အတူ စုပေါင်းမှတ်တမ်းဓာတ်ပုံများရိုက်ကူးခဲ့ကြသည်။ ထို့နောက် ရွှေလှေကျေးရွာရှိ တပ်မတော် ကျောင်းတိုက်ဆရာတော်အားဖူးမြှော်ကြည်ညို၍ သာသနာရေးဆိုင်ရာများ၊ ဒေသဖွံ့ဖြိုးရေးဆိုင်ရားများလျှောက်ထားတင်ပြခဲ့ကာ လှူဖွယ်ဝတ္ထုများဆပ်ကပ်လှူဒါန်းခဲ့ပြီး ကျောင်းတိုက်အတွင်းရှိသံဃာတော်များအားနေ့ဆွမ်းဆပ်ကပ်ခဲ့ ပြီးနောက် ကျောင်းတိုက်အတွင်းတည်ထားကိုးကွယ်တော်မူသော ပြည်လုံးကပ်ကျော်ကိုးနဝင်းစေတီတော်မြတ်အား ရွှေသင်္ကန်း၊ ပန်း၊ ရေချမ်းကပ်လှူပူဇော်ခဲ့သည်။  ဆက်လက်၍ ‌တိုင်းဒေသကြီး ဝန်ကြီးချုပ်သည် မင်းဂရုကျေးရွာတွင် အမျိုးသားလျှပ်စစ်ဓာတ်အားရရှိရေးစီမံကိန်း(NEP Phase II)ဖြင့်ဆောင်ရွက်သည့် လျှပ်စစ်မီးဖွင့်ပွဲအခမ်းအနားအား တာဝန်ရှိသူများနှင့်အတူ ဖဲကြိုးဖြတ်ဆက်လက်ဖွင့်လှစ်ပေး၍ လျှပ်စစ်မီးအား မီးခလုပ်နှိပ်ဖွင့်လှစ်ကာ ကမ္ဗည်းမော်ကွန်းကို အစိုးရအဖွဲ့ဝင် ဝန်ကြီးများနှင့်အတူ အမွှေးနံ့သာရည်များပက်ဖျန်းပေးခဲ့ပြီး ဒေသခံပြည်သူများနှင့်တွေ့ဆုံ၍ ဒေသဖွံ့ဖြိုးရေးလိုအပ်ချက်များတင်ပြမှုအပေါ် သက်ဆိုင်ရာဌာနများနှင့်ပေါင်းစပ်ဆောင်ရွက်ပေးခဲ့ကြောင်းသိရသည်။ အဆိုပါကျေးရွာများတွင် ‌လျှပ်စစ်မီး ဖွင့်လှစ်ပေးနိုင်ခဲ့ခြင်းကြောင့် ရွှေလှေကျေးရွာတွင် အိမ်ခြေ (၇၀) လုံး၊ မင်းဂရုကျေးရွာတွင် အိမ်ခြေ (၂၃၀) လုံးတို့ရှိ ဒေသခံပြည်သူများမှ  လျှပ်စစ်မီးများ စတင်သုံးစွဲနိုင်မည်ဖြစ်ပြီး ကျေးရွာနေပြည်သူများ၏ လူမှုစီးပွားဘဝဖွံ့ဖြိုး တိုးတက်မှုကိုလည်း များစွာအထောက်အကူ ပြုစေမည်ဖြစ်ကြောင်းသိရသည်။