ဧရာဝတီတိုင်းဒေသကြီးဝန်ကြီးချုပ် ဦးအေးကျော်သည် တာဝန်ရှိသူများနှင့်အတူ ယနေ့ ညနေပိုင်းတွင် ပုသိမ်မြို့၊ ကမ်းနားလမ်း၊ မြို့တော်ခန်းမ၊ ရှုခင်းသာရင်ပြင်ရှေ့၌ ပြုလုပ်သည့် ၂၀၂၆ခုနှစ်၊ သီတင်းကျွတ် ပျော်ပွဲရွှင်ပွဲအထိမ်းအမှတ် ဈေးရောင်းပွဲတော်နှင့် တေးဂီတဖျော်ဖြေပွဲ ဖွင့်ပွဲအခမ်းအနားသို့ တက်ရောက်၍ တိုင်းဒေသကြီးဝန်ကြီးချုပ်သည် တိုင်းဒေသကြီး လွှတ်တော်ဥက္ကဋ္ဌ၊ အနောက် တောင်တိုင်းစစ်ဌာနချုပ်တိုင်းမှူး၊ ပုသိမ်လေတပ်စခန်းဌာနချုပ်မှူး၊ တိုင်းဒေသကြီးအစိုးရအဖွဲ့ စည်ပင်သာယာရေးဝန်ကြီးတို့နှင့်အတူ ဖဲကြိုးဖြတ်ဖွင့်လှစ်ပေးခဲ့ပြီး ဖျော်ဖြေရေးအဖွဲ့များအား ဆုချီးမြှင့်ငွေများပေးအပ်ခဲ့ပါသည်။ ဆက်လက်၍ တိုင်းဒေသကြီးဝန်ကြီးချုပ်နှင့် ဧည့်သည်တော်များသည် သီတင်းကျွတ်ပျော်ပွဲရွှင်ပွဲနှင့် ဈေးရောင်းပွဲတော်အား လှည့်လည်ကြည့်ရှုအားပေးခဲ့သည်။

ဧရာဝတီတိုင်းဒေသကြီး၊ မြောင်းမြမြို့နယ်၊ တစ်ပင်ချောင်းကျေးရွာရှိ မြစိမ်းရောင်တောင်တော် ရှေးဟောင်းယဉ်ကျေးမှုသာသနာ့နယ်မြေ၊ နန်းတော်ဦးကျောင်းတိုက်အတွင်း တည်ထားကိုးကွယ်သော ဉာဏ်တော်အမြင့် ပေ ၃၀ ခန့်ရှိ နန်းတော်ဦးရွှေစေတီတော်၏ စိန်ဖူးတော် ခိုးယူမှုနှင့် ဆက်စပ်သည့် အမျိုးသားနှစ်ဦးကို ဖော်ထုတ်ဖမ်းဆီးရမိခဲ့ကြောင်း သိရသည်။

ဧရာဝတီတိုင်းဒေသကြီးအစိုးရအဖွဲ့ စိုက်ပျိုးရေး မွေးမြူရေးနှင့် ဆည်မြောင်းဝန်ကြီး ဦးကျော်မျိုးတင် သည် ၂၃.၁၀.၂၀၂၆ နေ့တွင် တိုင်းဒေသကြီးကျေးလက်ဒေသဖွံ့ဖြိုးတိုးတက်ရေးဦးစီးဌာနရုံး၌ ကျေးလက်ဒေသဖွံ့ဖြိုးတိုးတက်ရေးကြီးကြပ်မှုကော်မတီအစည်းအဝေးသို့တက်ရောက်ပြီး ကျေးလက်ရေရရှိရေး၊ ကျေးလက်မီးလင်းရေး၊ အသေးစားဆိုလာစိုက်ပျိုးရေရရှိရေး၊ ကျေးလက်ကုန်ထုတ်လမ်း၊ တံတား၊ ကျေးရွာတွင်းလမ်း၊ ခေတ်မှီစံပြကျေးရွာထူထောင်ခြင်းစီမံကိန်း၊ မြစိမ်းရောင်ကျေးရွာစီမံကိန်း၊ ကျေးလက်စီးပွားမြင့်မားရေးရန်ပုံငွေထူထောင်ခြင်းလုပ်ငန်း၊ ကျေးရွာဖွံ့ဖြိုးရေးလုပ်ငန်းစီမံကိန်းဆိုင်ရာကျေးလက်ဒေသဖွံ့ဖြိုးရေးလုပ်ငန်းများကို ဆွေးနွေးညှိနှိုင်းခဲ့ပြီး လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့ပါသည်။

ဧရာဝတီတိုင်းဒေသကြီးဝန်ကြီးချုပ် ဦးအေးကျော်သည် အင်္ဂပူမြို့နယ်၊ ထန်းပင်ကန်-ကွင်းကောက်လမ်း မူလ ၁၂ ပေ မှ ၁၈ ပေ အကျယ် ၂ ဖာလုံ လမ်းချဲ့ခြင်းလုပ်ငန်းအား ကြည့်ရှုစစ်ဆေးပြီး လမ်းလုပ်ငန်းများ သတ်မှတ်စံချိန်စံညွှန်းများနှင့်အညီ အရည်အသွေးပြည့်မီစေရေး၊ လမ်းပိုင်းအလိုက် လုပ်ငန်းများ ဆောင်ရွက်နေစဉ်အတွင်း ယာဉ်ကြောကြပ်တည်းမှုမဖြစ်စေရေးနှင့် ယာဉ်/လမ်း အန္တရာယ် ကင်းရှင်း စေရေး စနစ်တကျဆောင်ရွက်ရန် မှာကြားခဲ့သည်။

ဧရာဝတီတိုင်းဒေသကြီးဝန်ကြီးချုပ် ဦးအေးကျော်သည်တာဝန်ရှိသူများနှင်အတူ လေးမျက်နှာမြို့သို့ ရောက်ရှိ၍ ငဝန်တာရေကျော်စီးဝင်မှုကြောင့် ရေကြီးနစ်မြုပ်ခဲ့သဖြင့် ပျက်စီးခဲ့သောလမ်းများအား ပြန်လည်ပြုပြင်ဆောင်ရွက်‌နေမှုများကို လိုက်လံကြည့်ရှုစစ်ဆေးရာ အမှတ် (၂)ရပ်ကွက်ရှိ ဇီဝကလမ်းအား ကွန်ကရစ်ခင်းခြင်းလုပ်ငန်း ဆောင်ရွက်နေမှု၊ အမှတ်(၃)ရပ်ကွက်ရှိ ဗန္ဓုလလမ်းပျက်စီးမှု၊ အမှတ်(၄)ရပ်ကွက်ရှိ ရန်ကြီးအောင်လမ်းပျက်စီးမှုအခြေအနေများအား လိုက်လံကြည့်ရှုစစ်ဆေးခဲ့ပြီး လမ်းပိုင်းပျက်စီးမှုအများဆုံးဖြစ်ပွားသည့် နေရာများ၌ ပြည်သူများ သွားလာမှုအဆင်ပြေစေရန်အတွက် ဦးစားပေးအနေဖြင့် ဆောင်ရွက်ရန်၊ လမ်းများပြုပြင်ရာတွင် လမ်းဘေးဝဲယာ ရေစီးရေလာ ကောင်းမွန်ရေးကိုပါ ထည့်သွင်းစဉ်းစားဆောင်ရွက်ရန်၊ လုပ်ငန်းများ၏ တိုးတက်မှု အခြေအနေကို အဆင့်ဆင့်ကြီးကြပ်စစ်ဆေး၍ သတ်မှတ်ကာလအတွင်း အချိန်မီပြီးစီးရေးနှင့် ပြည်သူများ သွားလာရေးအဆင်ပြေချောမွေ့စေရေးတို့ကို အလေးထားဆောင်ရွက်ရန် မှာကြားသည်။