ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ် ဦးတင်မောင်ဝင်းသည် တိုင်းဒေသကြီးအစိုးရအဖွဲ့ဝင် ဝန်ကြီးများ၊ တိုင်း၊ခရိုင်၊မြို့နယ်အဆင့်ဌာနဆိုင်ရာများနှင့်အတူ သြဂုတ်လ ၁၈ ရက်နေ့ နေ့လည်ပိုင်း၌ မအူပင်ခရိုင်၊ ပန်းတနော်မြို့နယ်၊ မြို့ကွက်သစ်ရပ်ကွက်၊ အကွက်အမှတ် (၁) ရန်ကုန်-ပုသိမ် ကားလမ်းဘေး၊ အလျား (၁၅၀)ပေအနံ (၁၂၀)ပေ၊ လူထုအခြေပြုဗဟိုဌာန(Community Centre) ဆောက်လုပ်နိုင်ရေး သဲဖြည့်ခြင်းလုပ်ငန်းဆောက်ရွက်နေမှုများကိုကြည့်ရှုစစ်ဆေးခဲ့ပြီး မြေသားအခိုင်အမာရရှိစေရေး၊ သတ်မှတ်ချက်များနှင့်အညီဆောက်ရွက်စေရေးမှာကြားခဲ့ပါသည်။  ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် ဖျာပုံခရိုင်၊ကျိုက်လတ်မြို့နယ်၊ထရော်ရွာသစ်ကျေးရွာအုပ်စုနှင့် ကျုံမငဲ့ကျေးရွာအုပ်စုရှိ ကျေးရွာများတွင် ယခု ၁၆ရက်နေ့က လေပြင်းတိုက်ခတ်ခဲ့သဖြင့် လူနေအိမ်များနှင့်စာသင်ကျောင်းအမိုးလန်ခြင်း၊ ပြိုကျပျက်စီးခြင်းများဖြစ်ပွားခဲ့သည့်လေဘေးသင့်ပြည်သူများထံသွားရောက်၍ အားပေးထောက်ပံ့ခဲ့ပါသည်။ ဦးစွာ တိုင်းဒေသကြီးဝန်ကြီးချုပ်သည် ချောင်းဖျားကျေးရွာ၌ လေပြင်းတိုက်ခတ်မှုကြောင့် ပျက်စီးခဲ့သည့် နေအိမ်များနှင့် အခြေခံပညာမူလတန်းကျောင်းအား လှည့်လည်ကြည့်ရှုစစ်ဆေးပြီး ကျောင်းအမိုးလန် ပျက်စီးမှုများအတွက်  ထောက်ပံ့ငွေများ ပေးအပ်ခဲ့သည်။ ယင်းနောက် ရတနာစလင်း ဘုန်းတော်ကြီးကျောင်းဓမ္မာရုံ၌ လေဘေးသင့်ပြည်သူများအတွက် ထောက်ပံ့ရေးပစ္စည်းများ ပေးအပ်ပွဲ အခမ်းအနားအား တက်ရောက်၍ အားပေးစကားပြောကြားရာတွင် လေပြင်းတိုက်ခတ်ခြင်း၊မိုးအဆက်မပြက်ရွာသွန်းခြင်း၊ မြစ်ရေကြီးခြင်းအပါအဝင် သဘာဝဘေးအန္တရာယ်များကျရောက်ခဲ့ပါက ထိခိုက်မှုအနည်းဆုံးဖြစ်စေရေး ကြိုတင်ကာကွယ်ရေးလုပ်ငန်းများဆောင်ရွက်ထားရန်လိုပါကြောင်း၊ မိုးလေဝသနှင့်ဇလဗဒ ညွှန်ကြားမှုဦးစီးဌာနမှ ထုတ်ပြန်သည့် မိုးလေဝသ သတင်းများကိုလည်းဂရုတစိုက် နားထောင်မှတ်သားပြီးကြိုတင်ပြင်ဆင်ခြင်းများဆောင်ရွက်ကြရမှာဖြစ်ပါကြောင်း၊ အုပ်ချုပ်ရေးအဖွဲ့များကလည်း မိုးလေဝသသတိပေးထုတ်ပြန်ချက်များနှင့်ပတ်သက်၍ အများပြည်သူများသိရှိစေရေး၊ ကြိုတင်ပြင်ဆင်ခြင်းလုပ်ငန်းများဆောင်ရွက်နိုင်စေရေးအတွက် လိုက်လံနှိုးဆော်ကြေညာပေးရန်လိုပါကြောင်းနှင့် လေပြင်းတိုက်ခတ်ပျက်စီးဆုံးရှုံးမှုများအတွက် ကူညီကယ်ဆယ်ရေး၊ ပြန်လည်တည်ဆောက်ရေးလုပ်ငန်းများကိုအုပ်ချုပ်ရေးအဖွဲ့များ၊ နယ်မြေခံတပ်ရင်းတပ်ဖွဲ့များ၊ ဌာနဆိုင်ရာများက အ မြန်ဆုံး ဝိုင်းဝန်းကူညီဆောင်ရွက်ပေးသွားမှာဖြစ်ကြောင်းပြောကြားခဲ့ပြီး ဘေးသင့် အိမ်ထောင်စု (၅၀)နှင့်စာသင်ကျောင်းအတွက် ထောက်ပံ့ငွေများ၊ စားသောက်ဖွယ်ရာများ၊ ကယ်ဆယ်ရေးပစ္စည်း ၁၇ မျိုးပါ ပုံး (၃၁)ပုံး တို့ကို ဘေးသင့်ပြည်သူများထံထောက်ပံ့ပေးအပ်ခဲ့ရာ ကျေးရွာအုပ်ချုပ်ရေးမှူးက ကျေးဇူးတင်စကားပြန်လည်ပြောကြားခဲ့ပါသည်။ ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ရတနာစလင်းဘုန်းတော်ကြီးကျောင်း၊ ကျောင်းထိုင် ဆရာတော်အား ဖူးမြော်ကြည်ညို၍ လှူဖွယ်ပစ္စည်းနှင့်ဝတ္ထုငွေများဆက်ကပ်လှူဒါန်းခဲ့ပြီး လေဘေးကယ်ဆယ်ရေးဆောင်ရွက်မှုများကိုလျှောက်ထားတင်ပြခဲ့ကြောင်းသိရှိရပါသည်။

ဧရာဝတီတိုင်းဒေသကြီး၊ပုသိမ်မြို့၌ ၂၀၂၂ခုနှစ်၊ အာဟာရဖွံ့ဖြိုးရေးရက်သတ္တပတ်များလှုပ်ရှားမှုအထိမ်းအမှတ်အခမ်းအနားအား သြဂုတ်လ် ၁၈ ရက်နေ့ နံနက်ပိုင်းက တိုင်းဒေသကြီးပြည်သူ့ကျန်းမာရေးဦးစီးဌာန အစည်းအဝေးခန်းမ၌ပြုလုပ်ရာ တိုင်းဒေသကြီးဝန်ကြီးချုပ် ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများ၊တိုင်းအဆင့်ဌာနဆိုင်ရာများနှင့်ကိုယ်ဝန်ဆောင်မိခင်များ၊ ကလေးငယ်များတက်ရောက်ခဲ့ကြသည်။ အခမ်းအနားတွင် တိုင်းဒေသကြီးဝန်ကြီးချုပ်က“ကမ္ဘာပါ်တွင်ရှိသောလူသားအားလုံးသည် မွေးဖွားလာစဉ်ကပင် အသက်ဆက်လက်ရှင်သန်ရေး၊ ကိုယ်ခန္ဓာကြီးထွားဖွံ့ဖြိုးရေး၊ ဦးနှောက်အသိဉာဏ်ဖွံ့ဖြိုးတိုးတက်ရေးနှင့် နေ့စဉ်လှုပ်ရှားမှုများအတွက် အစာအဟာရ မှီဝဲစားသုံးကြပါကြောင်း၊ နေ့စဉ်စားသုံးသော အစားအစာများသည် သန့်ရှင်းပြီး လိုအပ်သော  အဟာရဓာတ်များပြည့်ဝရန်လိုအပ်ကြောင်း၊ အာဟာရဖွံ့ဖြိုးရေးသည် နိုင်ငံတော်ဖွံ့ဖြိုးတိုးတက်ရန်အတွက် အခြေခံလိုအပ်ချက်တစ်ခု ဖြစ်သောကြောင့် ကျန်းမာရေးဝန်ကြီးဌာနသည် အာဟာရချို့တဲ့မှုများ လျော့နည်းပပျောက်ရေး၊ အာဟာရလွန်ကဲမှုပြဿနာများ ကာကွယ်ရေး၊ အာဟာရပြည့်ဝမျှတစွာ စားသုံးတတ်သောဓလေ့ ပိုမိုထွန်းကားလာရေးစတဲ့ ရည်မှန်းချက်များချမှတ်ပြီး အာဟာရဖွံ့ဖြိုးရေးလုပ်ငန်းများကို ပိုမိုအားဖြည့်ဆောင်ရွက်လျက်ရှိပါကြောင်း၊ မြန်မာနိုင်ငံလူနေမှုဘဝနှင့် ကျန်းမာရေးဆိုင်ရာ အခြေခံအချက်အလက်စစ်တမ်း၊ မြန်မာနိုင်ငံအဏုအာဟာရနှင့် အစာစားသုံးမှုအခြေအနေ လေ့လာရေးစစ်တမ်း (၂၀၁၇-၂၀၁၈)အရ ပုညှက်ခြင်း (၂၆.၇) ရာခိုင်နှုန်းနှင့် ပိန်လှီခြင်း(၆.၇)ရာခိုင်နှုန်း အသီးသီးရှိသောကြောင့် တဖြည်းဖြည်းလျော့နည်း ကျဆင်းလာသည်ကို တွေ့ရမှာဖြစ်ပါကြောင်း၊  အာဟာရဖွံ့ဖြိုးရေးလုပ်ငန်းများကို ပြည်သူလူထုအနေနဲ့ပိုမို စိတ်ဝင်စားပြီး ပူးပေါင်းပါဝင်ဆောင်ရွက်ကြစေဖို့ ရည်ရွယ်၍ အာဟာရဖွံ့ဖြိုးရေးရက်သတ္တပတ်များကို နှစ်စဉ် ဩဂုတ်လ တစ်လလုံးဆောင်ရွက်ခဲ့ပါကြောင်း၊ယခုလို အာဟာရဖွံ့ဖြိုးရေး ရက်သတ္တပတ်များ သတ်မှတ်ပြီးဆောင်ရွက်ခြင်းဟာ ပြည်သူလူထုကိုယ်တိုင် အာဟာရဖွံ့ဖြိုးရေးလုပ်ငန်းတွေမှာ ပါဝင်ဆောင်ရွက်လာပြီး ၊ အာဟာရဆိုင်ရာ အသိပညာဗဟုသုတများလည်း ပိုမို ရရှိလာကာ ကလေးငယ်များနဲ့ အမျိုးသမီးများရဲ့ ကျန်းမာရေးနဲ့ အာဟာရအခြေအနေလည်း ပိုမို ကောင်းမွန်မြင့်မားလာစေဖို့ အထောက်အကူပြုမှာ ဖြစ်ပါကြောင်း၊မိခင်နို့ရည်ဟာ ကလေးအတွက် ပထမဆုံးရရှိတဲ့ ရောဂါကာကွယ်ဆေးဖြစ်ပြီး  စနစ်တကျ တိုက်ကျွေးနိုင်ရေး၊ မွေးစမှ အသက်(၆)လအထိမိခင်နို့ တစ်မျိုးတည်း တိုက်ကျွေးနိုင်ရေးကို ပိုမိုမြှင့်တင်ဆောင်ရွက်ကြရမှာ ဖြစ်ပါကြောင်းပြောကြားခဲ့ပြီး တိုင်းဒေသကြီးပြည်သူ့ကျန်းမာရေးဦးစီးဌာန၊ညွှန်ကြားရေးမှူးက အာဟာရဖွံ့ဖြိုးရေးလုပ်ငန်းများနှင့် ပတ်သက်၍ရှင်းလင်းတင်ပြသည်။ ယင်းနောက် တိုင်းဒေသကြီး ဝန်ကြီးချုပ်သည်  ငါးနှစ်အောက်ကလေးများအား ဗီတာမင်အေဆေးဝါးများအား တိုက်ကျွေးခဲ့ပြီး ကိုယ်ဝန်ဆောင်မိခင်များအတွက် အဏုဇီဝအာဟာရဆေးဝါးများထောက်ပံ့ပေးအပ်ခဲ့ပြီး ၂၀၂၂ခုနှစ်၊အာဟာရဖွံ့ဖြိုးရေးရက်သတ္တပတ်များလှုပ်ရှားမှုအထိမ်းများအဖြစ် ပြသထားသော ပြခန်းများအားလှည့်လည်ကြည့်ရှုခဲ့သည်။ အဆိုပါ အာဟာရဖွံ့ဖြိုးရေးရက်သတ္တပတ်များလှုပ်ရှားမှုအဖြစ် ဩဂုတ်လ (ပထမ) ရက်သတ္တပတ်ကို မိခင်နို့ စနစ်တကျတိုက်ကျွေးရေး ရက်သတ္တပတ်၊ (ဒုတိယ)ရက် သတ္တပတ်ကို ငါးနှစ်အောက်ကလေးများနှင့်ကျောင်းသားလူငယ်များ အာဟာရ ဖွံ့ဖြိုးရေးရက်သတ္တပတ်၊ (တတိယ) ရက်သတ္တပတ်ကို ကိုယ်ဝန်ဆောင်နှင့်နို့တိုက်မိခင်များ အာဟာရဖွံ့ဖြိုးရေး ရက်သတ္တပတ်၊ (စတုတ္ထ) ရက်သတ္တပတ်ကို အိုင်အိုဒင်းချို့တဲ့ ရောဂါများပပျောက်ရေးရက်သတ္တပတ်များအနေဖြင့်သတ်မှတ် ဆောင်ရွက်သွားမည်ဖြစ်သည်။ ဆက်လက်၍ တိုင်းဒေသကြီး ဝန်ကြီးချုပ်သည် ပန်းတနော်မြို့နယ် အထွေထွေအုပ်ချုပ်ရေးဦးစီးဌာနအစည်းအဝေးခန်းမ၌ e-IDစနစ်ဖြင့် လူဦးရေစာရင်းဖြည့်သွင်းနေမှုများနှင့် မြို့နယ်ရွေးကောက်ပွဲကော်မရှင်အဖွဲ့ခွဲရုံး၌ လူဦးရေစာရင်း ပြင်ဆင်၊ဖြည့်စွက်၊ပယ်ဖျက်ခြင်းလုပ်ငန်းများဆောင်ရွက်နေမှုအား ကြည့်ရှုစစ်ဆေးပြီးအချက်အလက်များ မှန်ကန်စွာဖြည့်သွင်းရေးနှင့် သတ်မှတ်ကာလအတွင်း အချိန်မီပြီးစီးရေးနှင့် မြေပြင်ရှိ လူဦးရေစာရင်းနှင့် တိုက်ဆိုင်စစ်ဆေးပြီးအချက်အလက်များမြန်ဆန် မှန်ကန်စွာ စနစ်တကျစိစစ်ဆောင်ရွက်ဖြည့်သွင်းစေရေးတို့အား မှာကြားခဲ့သည်။  ထို့နောက် ယခုလ ၁၅၊၁၆ ရက်နေ့များတွင် မိုးသည်းထန်စွာရွာသွန်းခြင်း၊ မြစ်ရေတိုက်စားခြင်းတို့ကြောင့် တိုင်းဒေသကြီးအတွင်းရှိ မြို့နယ်အချို့နှင့်ကျေးရွာအချို့တွင် နေအိမ်များပြိုလဲခြင်း၊ ကြိုတင်ပြောင်းရွှေ့ခြင်းများစသည့် သဘာဝဘေးကူညီကယ်ဆယ်ရေးလုပ်ငန်းများကို ဌာနဆိုင်ရာများ၊ ဒေသခံတပ်ရင်းတပ်ဖွဲ့များက ဝိုင်းဝန်းကူညီဆောင်ရွက်ပေးလျက်ရှိရာ တိုင်းဒေသကြီးဝန်ကြီးချုပ်သည် ပန်းတနော်မြို့နယ်၊တောကျောင်းအုပ်စု၊နံဂတ်ကျေးရွာ သို့သွားရောက်ခဲ့ပြီး အောင်မင်္ဂလာကျောင်းတိုက်ဆရာတော်အားဖူးမြော်ကြည်ညို၍ လှူဖွယ်ဝတ္ထုငွေများဆက်ကပ်ပူဇော်ခဲ့ကာ  ဧရာဝတီ မြစ်ရေတိုက်စားပြီး ကမ်းပါးပြိုကျမှုကြောင့် နေအိမ်(၁၅)လုံးကြိုတင်‌ရွှေ့ပြောင်းခဲ့ရသည့် ပြည်သူများအား စားသောက်ဖွယ်ရာများနှင့် ထောက်ပံ့ငွေများပေးအပ်ခဲ့ပြီးဒေသခံပြည်သူများနှင့်  ရင်းရင်းနှီးနှီးတွေ့ဆုံ၍ မြစ်ရေကြီးချိန်ကမ်းပြိုကမ်းစားခြင်းလုပ်ငန်းများကာကွယ်နိုင်ရေးအတွက် အရေးပေါ် ကမ်းထိန်းလုပ်ငန်းများဆောင်ရွက်ပေးသွာဖြစ်ကြောင်း၊ ကမ်းပြိုကမ်းစားခြင်းကိုရေရှည်ကာကွယ်နိုင်ရေးအတွက်လည်း သက်ဆိုင်ရာဌာနများနှင့် ပေါင်းစပ်၍ စီမံချက်များချမှတ်ဆောင်ရွက်လျက်ရှိပါကြောင်း အားပေးစကားများ ပြောကြားခဲ့သည်။  ထို့အတူ ပုသိမ်ခရိုင်၊ ပုသိမ်မြို့၊   မဏ္ဍပ်ကျေးရွာ ၊ အမှတ်(၂၄၉)မူလွန်ကျောင်းတွင် ခရိုင်စီမံအုပ်ချုပ်ရေးအဖွဲ့ဥက္ကဋ္ဌ နှင့် အဖွဲ့ဝင်များ၊ ခရိုင်မီးသတ်ဦးစီးမှူး၊ ခရိုင်ဘေးစီဦးစီးမှူး၊ မြို့နယ်စီမံအုပ်ချုပ်ရေးအဖွဲ့များ၊ မြို့နယ် လမ်းဦးစီးဌာနတို့နှင့်အတူ သဘာ၀ဘေးကြောင့်ပျက်စီးသွားသော ကျေးရွာနေပြည်သူများအားထောက်ပံ့ပစ္စည်းများပေးအပ်ခဲ့ပြီး ၊ ခရိုင်မီးသတ်တပ်ဖွဲ့၀င်များက ပျက်စီးသွားသောနေအိမ်များအား ရှင်းလင်းပေးခြင်း၊ပြုပြင်ပေးခြင်းလုပ်ငန်းများကူညီဆောင်ရွက်ပေးခဲ့ကြကြောင်းသိရှိရပါသည်။

ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် ယနေ့နေ့လည်ပိုင်းတွင် ပုသိမ်မြို့၊ ဧရာရွှေဝါခန်းမ၌ ကျင်းပပြုလုပ်သည့် သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ ကျေးလက်ဒေသဖွံ့ဖြိုးတိုးတက်ရေးဦးစီးမှ ၂၀၂၂- ၂၀၂၃ ဘဏ္ဍာနှစ်တွင် အကောင်အထည်ဖော်ဆောင်ရွက်သည့် မြစိမ်းရောင်ကျေးရွာစီမံကိန်း၊ ကျေးရွာဖွံ့ ဖြိုးတိုးတက်ရေးလုပ်ငန်းစီမံကိန်း (VDP)နှင့် Cash for work ကျေးရွာတို့အတွက် စီမံကိန်းရန်ပုံငွေပေးအပ်ပွဲအခမ်းအနားတက်ရောက်၍ အမှာစကားပြောကြားခဲ့ရာ တိုင်းဒေသကြီး၏ ဒေသဖွံ့ဖြိုးရေးလုပ်ငန်းများကို   ဘဏ္ဍာစိုက်ပျိုးမွေးမြူရေးလုပ်ငန်းများပိုမိုဖြစ်ထွန်းအောင်မြင်နိုင်မည့်အလားအလင့်နှစ်စဉ်ချထားဆောင်ရွက်ပေးလျက်ရှိပါကြောင်း၊ မိမိတို့တိုင်းဒေသကြီးသည် ရေခံမြေခံကောင်းမွန်ပြီး စိုက်ပျိုးမွေးမြူရေးလုပ်ငန်းများပိုမိုဖြစ်ထွန်းအောင်မြင်နိုင်မည့်အလားအလာကောင်းများရှိနေပါကြောင်း၊ ဒေသခံပြည်သူများ၏ လူမှုစီးပွားဘဝဖွံ့ဖြိုးတိုးတက်စေရေးရည်ရွယ်၍  လမ်းပန်းဆက်သွယ်မှုကောင်းမွန်စေရေး၊ လျှပ်စစ်မီးရရှိစေရေး၊ ရေပေးဝေရေး၊ ကုန်ထုတ်လမ်းဖောက်လုပ်သွားလာအသုံးပြုနိုင်စေရေးစသည့် ဒေသဖွံ့ဖြိုးရေးလုပ်ငန်းများတွင် ဒေသခံပြည်သူများကိုယ်တိုင်အကောင်အထည်ဖော် ဆောင်ရွက်နိုင်ရေးထောက်ပံ့ပေးခြင်းဖြစ်ပါကြောင်း၊ ဒေသဖွံ့ဖြိုးရေးလုပ်ငန်းများဆောင်ရွက်မည့်ကော်မတီများအနေဖြင့် မိမိတို့ဒေသဖွံ့ဖြိုးတိုးတက်စေရေးစိတ်ရင်းစေတနာကောင်းများဖြင့်ဆောင်ရွက်ကြရန်၊ သက်ဆိုင်ရာလုပ်ငန်းများအလိုက် စာရင်းဇယားများစနစ်တကျထားရှိဆောင်ရွက်ကြရန်နှင့် သက်ဆိုင်ရာဌာနများမှ  စီမံကိန်းများအောင်မြင်စေရေး စစ်ဆေးကြပ်မက်ဆောင်ရွက်ရန်လိုပါကြောင်း ပြောကြားခဲ့ပါသည်။ ထို့နောက် တိုင်းဒေသကြီးဝန်ကြီးချုပ်မှ ပုသိမ်ခရိုင် မြစိမ်းရောင်၊ VDP၊  Cash For Work စီမံကိန်းလုပ်ငန်းများဆောင်ရွက်မည့် ကျေးရွာ ၉၀ အတွက် ကျပ်သန်း ၉၂၀၊ ကျုံပျော်ခရိုင် မြစိမ်းရောင်၊ VDP၊  Cash For Work စီမံကိန်းလုပ်ငန်း များဆောင်ရွက်မည့် ကျေးရွာ ၅၃ ရွာအတွက် ကျပ်သန်း ၅၆၀၊ ဟင်္သာတခရိုင် မြစိမ်းရောင်၊ VDP၊  Cash For Work စီမံကိန်းလုပ်ငန်းများဆောင်ရွက်မည့် ကျေးရွာ ၆၀ အတွက် ကျပ်သန်း ၆၄၀၊ မြန်အောင်ခရိုင် မြစိမ်းရောင်၊ VDP၊  Cash For Work စီမံကိန်းလုပ်ငန်းများဆောင်ရွက်မည့် ကျေးရွာ ၇၃ ရွာ အတွက် ကျပ်သန်း ၇၅၀ တို့ကိုသက်ဆိုင်ရာခရိုင်အုပ်ချုပ်ရေးမှူးများထံလည်းကောင်း၊ လုံခြုံရေးနှင့်နယ်စပ်ရေးရာဝန်ကြီးမှ မြောင်းမြခရိုင် မြစိမ်းရောင်၊ VDP၊  Cash For Work စီမံကိန်းလုပ်ငန်း များဆောင်ရွက်မည့် ကျေးရွာ ၅၁ ရွာအတွက် ကျပ်သန်း ၅၁၀၊ မအူပင်ခရိုင် မြစိမ်းရောင်၊ VDP၊  Cash For Work စီမံကိန်းလုပ်ငန်းများဆောင်ရွက်မည့် ကျေးရွာ ၇၄ ရွာ အတွက် ကျပ်သန်း ၇၄၀ကို သက်ဆိုင်ရာခရိုင်အုပ်ချုပ်ရေးမှူးများထံလည်းကောင်း၊ လမ်းပန်းဆက်သွယ်ရေးဝန်ကြီးမှ ဖျာပုံခရိုင်မြစိမ်းရောင်၊ VDP၊  Cash For Work စီမံကိန်းလုပ်ငန်း များဆောင်ရွက်မည့် ကျေးရွာ ၆၉ ရွာအတွက် ကျပ်သန်း ၇၅၀နှင့် လပွတ္တာခရိုင် မြစိမ်းရောင်၊ VDP၊  Cash For Work စီမံကိန်းလုပ်ငန်း များဆောင်ရွက်မည့် ကျေးရွာ ၃၅ရွာ အတွက် ကျပ်သန်း ၃၅၀ ကို သက်ဆိုင်ရာခရိုင်အုပ်ချုပ်ရေးမှူးများထံ အသီးသီးပေးအပ်ခဲ့ကြပါသည်။ ကျေးလက်ဒေသဖွံ့ဖြိုးတိုးတက်ရေးဦးစီးမှ ၂၀၂၂- ၂၀၂၃ ဘဏ္ဍာနှစ်တွင် မြစိမ်းရောင်ကျေးရွာစီမံကိန်း၊ကျေးရွာဖွံ့ ဖြိုးတိုးတက်ရေးလုပ်ငန်းစီမံကိန်း (VDP)နှင့် Cash for work စီမံကိန်းကျေးရွာများအတွက် ကျေးရွာစုစုပေါင်း ၅၀၅ရွာကို စီမံကိန်းရန်ပုံငွေ စုစုပေါင်းကျပ်သန်း ၅၂၂၀ အား လွှဲပြောင်းပေးအပ်ခဲ့ကြောင်းသိရှိရပါသည်။

ဧရာဝတီတိုင်းဒေသကြီး၊ ပုသိမ်မြို့၊ ဧရာရွှေဝါခန်းမ၌ ၂၀၂၂ခုနှစ်၊ ဖေဖော်ဝါရီလမှ ဇူလိုင်လအထိ (၆)လတာ လုပ်ငန်းဆောင်ရွက်မှုများအပေါ် ညှိနှိုင်းအစည်းအဝေး ဒုတိယနေ့အား ယနေ့နံနက်ပိုင်းက ဆက်လက်ပြုလုပ်ရာ တိုင်းဒေသကြီး ဝန်ကြီးချုပ်ဦးတင်မောင်ဝင်း၊အစိုးရအဖွဲ့ဝင် ဝန်ကြီးများ၊တိုင်းအဆင့်ဌာနဆိုင်ရာများနှင့် ခရိုင်စီမံအုပ်ချုပ်ရေးအဖွဲ့ ဥက္ကဌများ တက်ရောက်ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်က“ နိုင်ငံတော်မှ ချမှတ်ထားသည့် ဦးတည်ချက်များနှင့် ရှေ့လုပ်ငန်းစဉ်များအား မိမိတို့တိုင်းဒေသကြီး အစိုးရအဖွဲ့အနေဖြင့်အကောင်အထည်ဖော်ဆောင်ရွက်လျှက်ရှိပါကြောင်း၊ ဌာနဆိုင်ရာများအနေဖြင့်ကိန်းဂဏန်းစာရင်းဇယားအချက်အလက်များ မှန်ကန်တိကျမှုရှိစေရေး အလေးထားဆောင်ရွက်ရန်နှင့် ကိန်းဂဏန်းအချက်အလက်များ မှန်ကန်မှသာ တွက်ချက်သည့်အချက်အလက်များသည်လည်း မှန်နိုင်မည်ဖြစ်ပါကြောင်း၊ ပြည်သူများအလုပ်အကိုင်အခွင့်အလမ်းများ ရရှိစေနိုင်ရန်အတွက် စက်ရုံ၊အလုပ်ရုံများ ပြန်လည်လည်ပတ်နိုင်ရေး၊ စက်မှုဇုန်များထူထောင်ဆောင်ရွက်နိုင်ရေး အားလုံးဝိုင်းဝန်း ဆောင်ရွက်ကြရမှာဖြစ်ပါကြောင်း၊ တိုင်းဒေသကြီး  စီးပွားရေးတိုးတက်စေရန်နှင့်အလုပ်အကိုင်အခွင့်အလမ်းများ ရရှိစေရန်အတွက် လျှပ်စစ်ထုတ်လုပ်နိုင်ရေးဝိုင်းဝန်းပူးပေါင်း ဆွေးနွေးစေလိုပါကြောင်း၊ တိုင်းဒေသကြီး၏ စိုက်ပျိုးမွေးမြူရေးထုတ်ကုန်များမှပြည်ပဝင်ငွေရရှိစေရေးကြိုးစားဆောင်ရွက်ရမှာ ဖြစ်ပါကြောင်းနှင့်   Contract  Farming စနစ် အကောင်အထည်ဖော်ဆောင်ရွက်နိုင်ရေး”ပြောကြားသည်။ ဆက်လက်၍  စီးပွားရေးရာဝန်ကြီးဌာနအောက်ရှိ စက်မှုကြီးကြပ်ရေးနှင့်စစ်ဆေးရေးဦးစီးဌာန၊ အဆင့်မြင့်စက္ကူ(သာပေါင်း)၊ သတင်းစာစက္ကူ(သာပေါင်း)၊ မှန်စက်ရုံ(ပုသိမ်)၊ အမှတ်(၃၂)အကြီးစားစက်ရုံ(ကြံခင်း)၊ စားသုံးသူရေးရာဦးစီးဌာန၊ ဟိုတယ်နှင့်ခရီးသွားညွှန်ကြားမှု ဦးစီးဌာနနှင့် သယံဇာတရေးရာဝန်ကြီးဌာနအောက်ရှိ ဌာနများမှ ၂၀၂၂-ခုနှစ်ဖေဖော်ဝါရီလမှ ဇူလိုင်လအထိ  (၆)လတာ လုပ်ငန်းဆောင်ရွက်မှုအခြေအနေများအား ရှင်းလင်းတင်ပြချက်များအပေါ်  တိုင်းဒေသကြီးဝန်ကြီးချုပ်က လုပ်ငန်းများဆောင်ရွက်ရာတွင် ယခုထက်ပိုမိုတိုးတက်အောင် ဆောင်ရွက်ကြရန်၊ နယ်မြေအေးချမ်းတည်ငြိမ်ရေးနှင့် တရားဥပဒေစိုးမိုးရေးလုပ်ငန်းများကိုလည်း အလေးထားဆောင် ရွက်ကြရန်နှင့်  လိုအပ်သည်များကို ဖြည့်စွက်ဆွေးနွေးမှာကြားခဲ့ပြီး အစည်းအဝေးဒုတိယနေ့ကိုရုပ်သိမ်းခဲ့ပါသည်။

ဧရာဝတီတိုင်းဒေသကြီး၊ပုသိမ်မြို့၊ ဧရာရွှေဝါခန်းမ၌ (၁.၂.၂၀၂၂)ရက်နေ့မှ (၃၁.၇.၂၀၂၂)ရက်နေ့အထိ (၆)လတာ လုပ်ငန်းဆောင်ရွက်မှုများအပေါ် ညှိနှိုင်းအစည်းအဝေးအား သြဂုတ်လ ၁၅ ရက်နေ့နံနက်ပိုင်းက ပြုလုပ်ရာ တိုင်းဒေသကြီး ဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများ၊ တိုင်းအဆင့်ဌာနဆိုင်ရာများနှင့် ခရိုင်စီမံအုပ်ချုပ်ရေးအဖွဲ့ ဥက္ကဌများ တက်ရောက်ခဲ့ကြသည်။ လုပ်ငန်းညှိနှိုင်းအစည်းအဝေးတွင် တိုင်းဒေသကြီး ဝန်ကြီးချုပ်က“ ဌာနဆိုင်ရာများအနေဖြင့် နိုင်ငံတော်မှ ချမှတ်ထားသည့် ဦးတည်ချက်များနှင့် ရှေ့လုပ်ငန်းစဉ်များကိုအောင်မြင်အောင်အကောင်အထည်ဖော် ဆောင်ရွက် ကြရမှာဖြစ်ကြောင်း၊တိုင်းအဆင့်ဌာနဆိုင်ရာများနှင့် ခရိုင်အုပ်ချုပ်ရေးအဖွဲ့များက(၆)လတာကာလအတွင်း လုပ်ဆောင်ခဲ့မှုများအပြင် ရှေ့ဆက်ဆောင်ရွက်ရမည့် လုပ်ငန်းများနှင့်ပတ်သက်၍ ဆက်လက်ဆောင် ရွက်မည့်အစီအစဉ်များကိုပါ ဆွေးနွေးတင်ပြရန်လိုပါကြောင်း၊  မိမိတို့တိုင်းဒေသကြီးသည်ကျောင်းအပ်နှံမှု၊ ကျောင်းတက်ရောက်မှုအများဆုံးနှင့် တက္ကသိုလ်စာမေးပွဲတွင် တစ်နိုင်ငံလုံးအောင်ချက်အကောင်းဆုံးဒုတိယနှင့် ဂုဏ်ထူးရရှိသူများများစွာ ပေါ်ထွက်ခဲ့ပါကြောင်း၊ စိုက်ပျိုးရေး၊မွေးမြူရေးနှင့် စက်မှုအထက်တန်းကျောင်းများကို ၂၀၂၃ ပညာသင်နှစ်မှစ၍ ဖွင့်လှစ်နိုင်ရေး ပြင်ဆင်ဆောင်ရွက်၍  လူ့စွမ်းအားအရင်းအမြစ်များအား မွေးထုတ်ပေးနိုင်ရေးဆောက်ရွက်နေပါကြောင်း၊ ကျောင်းသားများအားလုံး ကျောင်းတက်ပျက်ကွက်မှုမရှိစေရန်နှင့် အမှန်တကယ် ပညာတတ်မြောက်စေရေး ဆရာ၊ဆရာမများ၊အုပ်ချုပ်ရေးအဖွဲ့များ ပူးပေါင်းဆောင်ရွက်ကြရန်လိုပါကြောင်း၊e-IDစနစ်ဖြင့် လူဦးရေစာရင်းများဖြည့်သွင်းခြင်း၊အခြေခံလူဦးရေစာရင်းများကောက်ယူခြင်း၊တိုက်ဆိုင်စစ်ဆေးခြင်း၊ပြင်ဆင်ခြင်း၊ဖြည့်စွက်ခြင်းလုပ်ငန်းများအား မှန်မှန်ကန်ကန်နှင့် မြန်မြန်ဆန်ဆန် ဆောင်ရွက်ကြရန်လိုပါကြောင်းနှင့် နိုင်ငံသားမဟုတ်သူများကို နိုင်ငံသားစိစစ်ရေးကတ်များ မထုတ်ပေးမိစေရေး တာဝန်ရှိသူများက အလေးထားကြပ်မတ်ဆောင်ရွက်သွားကြရန်လိုပါကြောင်း၊ကိုဗစ်-၁၉ ကပ်ရောဂါကူးစက်မှုများ တွေ့ရှိမှု နည်းပါးသော်လည်း ကာကွယ်ဆေးထိုးနှံခြင်းလုပ်ငန်းများကိုအရှိန်အဟုန်မပျက် ဆက်လက်ဆောင်ရွက်ကြရန်လိုပါကြောင်း၊တိုင်းဒေသကြီးအတွင်း စားရေ ရိက္ခာဖူလုံစေရေးနှင့် စားသုံးဆီဖူလုံရေးအတွက် စပါးသီးနှံ၊ဆီထွက်သီးနှံများပန်းတိုင်အထွက်နှုန်းများထွက်ရှိစေရေး၊မျိုးကောင်းမျိုးသန့်များအသုံးပြုစေရေး၊စိုက်ပျိုးမွေးမြူရေးထုတ်ကုန်များ တိုးတက်ထုတ်လုပ်နိုင်ရေး အလေးထားဆောင်ရွက်ရန်လိုပါကြောင်း၊ ရိုးပြတ်ကျန်ဧကများတွင် ဒေသနှင့်ကိုက်ညီသည့်သီးနှံများ စိုက်ပျိုးထုတ်လုပ်နိုင်ရေးကြပ်မတ်ဆောင်ရွက်ရန်နှင့်ရိုးပြတ်ကျန် ဧကများလျော့နည်းစေရေး ကြိုးပမ်းဆောင်ရွက်ရန်နှင့် စိုက်ပျိုးထုတ်ကုန်ပိုမိုထုတ်လုပ်နိုင်ရေး ကြပ်မတ်ဆောင်ရွက်ရန်လိုပါကြောင်း၊ အသားစား ကြက်နှင့်ဝက်မွေးမြူရေးလုပ်ငန်းများသည် အချိန်တိုအတွင်းအကျိုးအမြတ် ရရှိနိုင်သည့်လုပ်ငန်းများဖြစ်သည့်အတွက် ပိုမိုမွေးမြူဆောင်ရွက်သွားကြရန်နှင့် ငါးသယံဇာတများ ပျက်စီးဆုံးရှုံးမှုမရှိစေရေး စည်းကမ်းသတ်မှတ်ချက်များနှင့်အညီ စနစ်တကျ ဖမ်းဆီးစေရေးကြပ်မတ်ဆောင်ရွက်သွားရန်လိုပါကြောင်း၊လျှပ်စစ်ထုတ်လုပ်သုံးစွဲနိုင်‌ရေးနှင့်ပတ်သက်၍ ဆိုလာစနစ်၊ ရေအားလျှပ်စစ်စနစ်၊ စပါးခွံလောင်စာသုံး စနစ်များဖြင့် နည်းလမ်းများရှာဖွေ၍ လျှပ်စစ်ထုတ်လုပ်နိုင်ရေးအတွက် သက်ဆိုင်ရာဌာနများ၊လုပ်ငန်းရှင်များ ပူးပေါင်းဆောင်ရွက်သွားကြရန်နှင့်လျှပ်စစ်သုံးစွဲမှုကိုလည်း စနစ်တကျချွေတာသုံးစွဲကြရန်လိုပါ‌ကြောင်း၊ အားကစားကဏ္ဍနှင့်ပတ်သက်၍ ပြည်နယ်၊တိုင်းဒေသကြီးအဆင့်ပြိုင်ပွဲများတွင် အောင်မြင်မှုများရရှိနိုင်ရေး အခြေခံပညာ၊အဆင့်မြင့်ပညာနှင့် မြို့နယ်များရှိ မျိုးဆက်သစ်အားကစားသမားများ ပေါ်ထွက်လာစေရန်နှင့် စနစ်တကျ လေ့ကျင့်ပျိုးထောင်ပေးပြီး  အားကစားနည်းအလိုက် အောင်မြင်မှုများရရှိစေရေး သက်ဆိုင်ရာဌာနများနှင့် ပူးပေါင်းဆောင်ရွက်ကြရန် လိုပါကြောင်း၊ပြည်ပဝင်ငွေရရှိရန်နှင့် ပြည်ပပို့ကုန်များ ပိုမိုထုတ်လုပ်နိုင်ရန် သက်ဆိုင်ရာကဏ္ဍအလိုက် တိုးမြှင့်ထုတ်လုပ်ကြရန် မှာကြားသည်။ ဆက်လက်၍  ဌာနဆိုင်ရာအသီးသီးမှ (၁.၂.၂၀၂၂)ရက်နေ့မှ (၃၁.၇.၂၀၂၂)ရက်နေ့အထိ (၆)လတာ လုပ်ငန်းဆောင်ရွက်မှု အခြေအနေများအား ရှင်းလင်းတင်ပြချက်များအပေါ်  တိုင်းဒေသကြီး ဝန်ကြီးချုပ်က လုပ်ငန်းများဆောင်ရွက်ရာတွင် ယခုထက်ပိုမိုတိုးတက်အောင် ဆောင်ရွက်ကြရန်နှင့် လုပ်ငန်းလိုအပ်ချက်များဖြစ်ပေါ်ပါကလည်း အချိန်နှင့်တပြေးညီ တင်ပြဆောင်ရွက်ကြစေရေးနှင့် လိုအပ်သည်များကို ဖြည့်စွက်ဆွေးနွေးမှာကြားခဲ့ပြီး အစည်းအဝေးပထမနေ့ကို ရုပ်သိမ်းခဲ့ပါသည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည်  နေ့လည်ပိုင်းတွင်   တိုင်းဒေသကြီးပညာရေးမှူးရုံး အစည်းအဝေးခန်းမတွင် ခရိုင်၊ မြို့နယ် ပညာရေးမှူးများနှင့် တွေ့ဆုံပွဲသို့ တက်ရောက်ခဲ့ပြီး မိမိတို့တိုင်းဒေသကြီး  ကျောင်းအပ်နှံမှုနှင့် ကျောင်းတက်ရောက်မှု အများဆုံးနှင့် တက္ကသိုလ်ဝင်စာမေးပွဲတွင် တစ်နိုင်ငံလုံးအောင်ချက်အကောင်းဆုံးဒုတိယနှင့် ဂုဏ်ထူးရရှိသူများများစွာထွက်ပေါ်ခဲ့သဖြင့်ပညာရေးနှင့်ပတ်သက်၍ အလေးထားဆောင်ရွက်နေသည့် တိုင်းဒေသကြီး ဖြစ်ပါကြောင်း၊ ကျောင်းတက်ရောက်မှုများပြားလာသဖြင့် ပညာတတ်များပေါ်ထွက်လာစေရန်အတွက် အခွင့်အလမ်းကောင်းများ ရရှိစေနိုင်မည်ဖြစ်ပြီး လူ့စွမ်းအားအရင်းအမြစ်များအားမွေးထုတ်ပေးနိုင်မည်ဖြစ်ပါကြောင်း၊ KG+9 ပညာရေးစနစ်အား အခမဲ့သင်ကြားနိုင်ရေးဆောင်ရွက်ပေးလျှက်ရှိရာ ခရိုင်၊မြို့နယ်ပညာရေးမှူးများအနေဖြင့်   အခကြေးငွေများကောက်ခံမှုမရှိစေရေး ကြပ်မတ်ဆောက်ရွက်သွားရန်လိုပါကြောင်း၊ ယခုပညာသင်နှစ်တွင်ကျောင်းသားများအားလုံး ကျောင်းတက်ပျက်ကွက်မှုမရှိစေရန်နှင့် အမှန်တကယ်ပညာတတ်မြောက်စေရေး ဆရာ၊ဆရာမများ၊အုပ်ချုပ်ရေးအဖွဲ့များ ဝိုင်းဝန်းပူးပေါင်းဆောင်ရွက်ကြရန်လိုပါကြောင်း၊ကျောင်းသားကျောင်းသူများ ကျောင်းတက်မှန်ကန်စေရေး၊ အတန်းစဉ်ကူးပြောင်းရေး၊ ကျောင်းနေမြဲရေးနှင့် သင်ယူတတ်မြောက်မှု အရည်အသွေးမြင့်မားစေရေး ၊အခြေခံပညာမှတစ်ဆင့် အသက်မွေးဝမ်းကြောင်းပညာ၊ အဆင့်မြင့်ပညာများကို ဆက်လက် သင်ယူနိုင်ရေးဆရာ၊ဆရာမများ အနေဖြင့် ဝိုင်းဝန်းကြိုးစားပေးကြရမှာ ဖြစ်ပါကြောင်း၊ အကြောင်းအမျိုးမျိုးကြောင့်ကျောင်းတက်ပျက်ကွက်နေသည့် ကျောင်းသားကျောင်းသူများ၏ အခက်အခဲများကိုစိစစ်၍ ကျောင်းတက်ရောက်စေရေး စုစည်းဆောင်ရွက်ပေးရန်လိုပါကြောင်း၊ တက္ကသိုလ်ဝင်စာမေးပွဲကျရှုံးကျောင်းသားကျောင်းသူများကိုလည်း ကျောင်းပြန်လည်တက်ရောက်စေရေးနှင့် စာမေးပွဲဖြေဆို အောင်မြင်နိုင်စေရေး စည်းရုံးဆောင်ရွက်ပေးကြရမှာဖြစ်ပါကြောင်း၊  ပညာရေးမှူးများအနေဖြင့် မိမိခရိုင်၊မြို့နယ်များရှိ အခြေခံပညာကျောင်းများသို့ ကွင်းဆင်း၍ ပညာရေးဆိုင်ရာ လိုအပ်ချက်များအား ဖြည့်ဆည်းဆောင်ရွက်ပေးကြရမှာဖြစ်ပါကြောင်း၊ ကျောင်းဥပဓိရုပ်ကောင်းမွန်စေရေး၊ သန့်ရှင်းသာယာမှုရှိစေရေးနှင့် ကျောင်းသား၊ ကျောင်းသူများ အေးချမ်းပျော်ရွှင်စွာ ပညာသင်ကြားနိုင်ရေး ဆရာ၊ဆရာမများ၊ ကျောင်းသားမိဘများ၊ အုပ်ချုပ်ရေးအဖွဲ့များမှ ဝိုင်းဝန်းကြိုးစား ဆောင်ရွက်ပေးကြရန်”ပြောကြားခဲ့ပြီး တိုင်းဒေသကြီးပညာရေးမှူးနှင့် ခရိုင်၊ မြို့နယ်ပညာရေးမှူးများ၏ တင်ပြချက်များအပေါ်  တိုင်းဒေသကြီးဝန်ကြီးချုပ်က လိုအပ်သည်များဖြည့်စွက်မှာကြားခဲ့ကြောင်းသိရသည်။