ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ်ဖလား ၆ ခရိုင်အသက်၁၆နှစ်အောက် အမျိုးသား‌ဘောလုံးပြိုင်ပွဲ ဗိုလ်လုပွဲနှင့်ဆုချီးမြှင့်ပွဲအခမ်းအနားအား ယနေ့ ညနေပိုင်းတွင် ကိုးသိန်းဘောလုံးအားကစားကွင်း၌ ပြုလုပ်ရာ တိုင်းဒေသကြီး ဝန်ကြီးချုပ်ဦးတင်မောင်ဝင်းနှင့် တာဝန်ရှိသူများ၊ဘောလုံးဝါသနာရှင် ပြည်သူများတက်ရောက်ကြည့်ရှုအားပေးသည်။ ဗိုလ်လုပွဲတွင် ဘောလုံးအကယ်ဒမီအသင်းနှင့် ပုသိမ်ခရိုင်အသင်းတို့ အကြိတ်အနယ်ယှဉ်ပြိုင်ကစားခဲ့ကြရာ ပုသိမ်ခရိုင်အသင်းက‌ ဘောလုံးအကယ်ဒမီအသင်းအား နှစ်ဂိုး-တစ်ဂိုးဖြင့်အနိုင်ရရှိခဲ့သည်။ဆက်လက်၍ ဆုချီးမြှင့်ပွဲအခမ်းအနားအားပြုလုပ်ရာ ဆုရရှိသည့်ခရိုင်များမှ အားကစားသမားများက နေရာယူကြပြီး ဒုတိယဆုရရှိသည့် ဘောလုံးအကယ်ဒမီအသင်းမှ အားကစားသမားများအားတစ်ဦးချင်းဆုတံဆိပ်နှင့်ငွေသားဆုများကို သယံဇာတရေးရာဝန်ကြီးကလည်းကောင်း၊ပထမဆုရရှိသည့် ပုသိမ်ခရိုင်အသင်းမှအားကစားသမားများအားတစ်ဦးချင်းဆုတံဆိပ်နှင့်ငွေသားဆုများကို စီးပွားရေးရာဝန်ကြီးကလည်းကောင်း၊နေရာအလိုက်အကောင်းဆုံး အားကစားသမားဆုရရှိသူများအား လုံခြုံရေးနှင့်နယ်စပ်ရေးရာဝန်ကြီးက လည်းကောင်းအသီးသီးဆုများချီးမြှင့်ခဲ့ကြပြီး တိုင်းဒေသကြီးဝန်ကြီးချုပ် ဦးတင်မောင်ဝင်းက ပထမဆုရရှိသည့် ပုသိမ်ခရိုင်အသင်းအား ဂုဏ်ပြုဆုဖလားချီးမြှင့်ပေးခဲ့သည်။အဆိုပါဘောလုံးပွဲအားယခုလ ၁၅ ရက်နေ့မှ ၂၄ ရက်နေ့အထိကျင်းပခဲ့ကြောင်းသိရသည်။

ဧရာဝတီတိုင်းဒေသကြီး အတွင်းရှိမြို့နယ်၊ မြို့၊ ရပ်ကွက်၊ကျေးရွာများတွင် အပတ်စဉ်စနေနေ့တိုင်း ဌာနဆိုင်ရာများ၊တပ်ရင်းတပ်ဖွဲ့များ၊ စည်ပင်သာယာရေးအဖွဲ့များ၊ လူမှုရေးအသင်းအဖွဲ့များနှင့် ရပ်ကွက်နေပြည်သူများစုပေါင်း၍ သန့်ရှင်းရေးဆောင်ရွက်လျက်ရှိရာ တိုင်းဒေသကြီးအစိုးရအဖွဲ့ ဝန်ကြီးချုပ်ဦးတင်မောင်ဝင်းနှင့် တာဝန်ရှိသူများသည် ယနေ့နံနက်ပိုင်းက ပုသိမ်မြို့တွင်းစုပေါင်းသန့်ရှင်းရေးဆောင်ရွက်နေမှုနှင့် အသေးစား၊ အငယ်စားနှင့် အလတ်စားစီးပွားရေးလုပ်ငန်းများ(MSMEs) လုပ်ကိုင်လည်ပတ်မှုအခြေအနေများအား ကြည့်ရှုစစ်ဆေးခဲ့သည်။ ရှေးဦးစွာ တိုင်းဒေသကြီး ဝန်ကြီးချုပ်သည် ရေကြည်ဦးရပ်ကွက်ရှိ လေးကျွန်းရန်အောင်ဖောင်တော်ဦးစေတီမြတ်ကြီး ပရဝဏ်အတွင်း၌စုပေါင်းသန့်ရှင်းရေးဆောင်ရွက်နေမှုများအားကြည့်ရှု စစ်ဆေးပြီး အမှိုက်နှင့်ခြုံနွယ်များနေ့စဉ်ရှင်းလင်းဆောင်ရွက်ရေးနှင့် ရေမြောင်းများ ရေစီးရေလာကောင်းမွန်ရေးတို့အားမှာကြားသည်။ယင်းနောက်တိုင်းဒေသကြီး ဝန်ကြီးချုပ်သည် ဂင့်ချွန်မုန့်လုပ်ငန်း၊ ဂွတ်ရှယ် ကြက်အူချောင်း၊ ဝက်အူချောင်းလုပ်ငန်း၊ ရွှေကညင်ပုသိမ်ထီးလုပ်ငန်း၊ ATW ကြက်စာ၊ဝက်စာလုပ်ငန်း၊ ပုသိမ် ကွန်ပျူတာပန်းထိုးစက်ရုံနှင့် ရွှေမြင်းပျံ ပုသိမ်ဟာလဝါလုပ်ငန်းများသို့သွားရောက်၍ လုပ်ငန်းဆောင်ရွက်လည်ပတ်မှုအခြေအနေများအား မေးမြန်းရာ တာဝန်ရှိသူများ၏ ဖြေကြားတင်ပြချက်များအပေါ် ဝန်ကြီးချုပ်က စားသုံးကုန်များထုတ်လုပ်ရာတွင် အရည်အသွေးကောင်းမွန်ရေး၊ဓာတုဆိုးဆေးများအသုံးမပြုရေး၊ပြည်သူများ သန့်ရှင်းလတ်ဆတ်စွာ စားသုံးနိုင်ရေးအတွက်အလေးထားဆောင်ရွက်ရေး၊ပုသိမ်ထီးများကို ပြည်တွင်း ပြည်ပခရီးသွားများအတွက်ခိုင်ခံ့မှုနှင့်အရည်အသွေးကောင်းမွန်ရေးအလေးထားဆောင်ရွက်ရေး၊ဝက်စာ၊ကြက်စာများ ထုတ်လုပ်မှု လုပ်ငန်းများတိုးချဲ့ဆောင်ရွက်ရေး၊ပြည်တွင်းထုတ်ကုန်များအား ပြည်ပထုတ်ကုန်များနှင့်ယှဉ်ပြိုင်နိုင်သည်အထိ အရည်အသွေးကိုအဓိကထားဆောင်ရွက်ရေး၊တစ်လအတွင်းထုတ်လုပ်မှုအား စနစ်တကျမှတ်တမ်းထားရှိရေး၊စက်ရုံများတွင်လုပ်ကိုင်နေသည့် ဝန်ထမ်းများအနေဖြင့် လုပ်ငန်းခွင်အတွင်း အန္တရာယ်ကင်းရှင်းစွာလုပ်ငန်းများဆောင်ရွက်နိုင်ရေး၊ ကိုဗစ်-၁၉ရောဂါဆိုင်ရာညွှန်ကြားချက်များနှင့်အညီ လုပ်ကိုင်ဆောင်ရွက်ရေးတို့အားမှာကြားသည်။ ဆက်လက်၍  ဝန်ကြီးချုပ်သည် တိုင်းဒေသကြီးစည်ပင်သာယာရေးအဖွဲ့ရုံးအစည်းအဝေးခန်းမ၌ ခရိုင်၊မြို့နယ်အုပ်ချုပ်ရေးမှူးများ၊ ရပ်ကွက်အုပ်ချုပ်ရေးမှူးများနှင့်တွေ့ဆုံ၍ “မြို့အင်္ဂါရပ်နှင့်အညီ လမ်းတိုင်း၊ရပ်ကွက်တိုင်းသန့်ရှင်းသာယာလှပရေးအား အလေးထားဆောင်ရွက်ရန်၊ ရပ်ကွက်အုပ်ချုပ်ရေးမှူးအနေဖြင့် ပြည်သူများသန့်ရှင်းရေးလုပ်ငန်းများတွင် ပူးပေါင်းပါဝင်ဆောင်ရွက်စေရေး စည်းရုံးရန်၊ တက္ကသိုလ်ဝင်စာမေးပွဲစနစ်ဟောင်းတွင် ဝင်ရောက်ဖြေဆိုသူများအနေဖြင့် စာသင်ဝိုင်း၊ စာဖတ်ဝိုင်းများသို့ ရောက်ရှိလာစေရေးဆောင်ရွက်ပေးရန်၊ ကိုဗစ်-၁၉ ရောဂါကာကွယ်ဆေးများ အကြိမ်ပြည့်နှင့်ထပ်ဆောင်း ကာကွယ်ဆေးထိုးနှံနိုင်ရေးကြပ်မတ်ရွက်ရန်၊ ယာဉ်စည်းကမ်း၊ လမ်းစည်းကမ်းများအတိုင်း စနစ်တကျမောင်းနှင်သွားလာနိုင်ရေးအတွက် နေ့စဉ်စစ်ဆေးကြပ်မတ်ရန်လိုပါကြောင်း”မှာကြားခဲ့ပြီး တာဝန်ရှိသူများ၏တင်ပြချက်များအပေါ် လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့သည်။

ဧရာဝတီတိုင်းဒေသကြီးဝန်ကြီးချုပ်နှင့်အဖွဲ့သည် (၂၃)ကြိမ်မြောက်မြန်မာ့ရိုးရာယဉ်ကျေးမှုအဆို၊အက၊အရေး၊အတီးပြိုင်ပွဲဗဟိုအဆင့်တွင်ပါဝင်ယှဉ်ပြိုင်နိုင်ရေး တိုင်းဒေသကြီးကိုယ်စားပြု အဆို၊ အက၊ အရေး၊ အတီးပြိုင်ပွဲဝင်များ၏စခန်းသွင်းလေ့ကျင့်နေမှုများကို ကြည့်ရှုအားပေးပါသည်။ ဦးစွာ မြို့တော်ခန်းမတွင်လေ့ကျင့်နေကြသည့် အကအဖွဲ့များ၏ လေ့ကျင့်ကပြမှု၊ ပုသိမ်တက္ကသိုလ် ဝင်းအတွင်းတွင် ရာမာယဏဇာတ်တော်ကြီးအကအဖွဲ့နှင့် အဆို၊ အက၊ အရေး၊အတီးအဖွဲ့များ၏ သီဆို၊တီးမှုတ်၊ အကလေ့ကျင့်မှုများကိုကြည့်ရှုအားပေးခဲ့ပြီး ပြိုင်ပွဲဝင်များနှင့်ရင်းရင်းနှီးနှီးတွေ့ဆုံ၍ အောင်မြင်မှုများရရှိစေရေးကြိုးစားကြရန်၊ ကျန်းမာရေးဂရုပြုကြရန်မှာကြား၍ ထောက်ပံ့ငွေများပေးအပ်ခဲ့ကာ ထမင်းစားဆောင်များကိုလှည့်လည်ကြည့်ရှုစစ်ဆေးခဲ့ပြီး အစားအစာများသန့်ရှင်းလက်ဆက်မှုရှိစေရေး၊ အာဟာရညီညွှတ်မျှတမှုစေရေးအလေးထားဆောင်ရွက်ရန်မှာကြားခဲ့ပါသည်။

ပုသိမ်မြို့ ၊အမှတ်(၁၁)အခြေခံပညာအထက်တန်းကျောင်း၊ ပညာ့မဉ္ဇူခန်းမတွင် တိုင်းဒေသကြီးမွေးမြူရေးနှင့်ကုသရေးဦးစီးဌာနနှင့် Top Dairy Farm တို့ပူးပေါင်းဆောင်ရွက်သည့် ကျောင်းနေအရွယ်ကလေးများ နွားနို့တိုက်ကျွေးခြင်းအစီအစဉ် (School Milk Programme)အခမ်းအနား ပြုလုပ်ခဲ့ရာ ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ် ဦးတင်မောင်ဝင်း၊ အနောက်တောင်တိုင်းစစ်ဌာနချုပ်ဒုတိယတိုင်းမှူး၊ အစိုးရအဖွဲ့ဝင်များ၊ တိုင်း၊ခရိုင်၊မြို့နယ်ဌာနဆိုင်ရာများ၊ အလှူရှင်၊စေတနာရှင်များ၊ ဆရာ၊ဆရာမများနှင့် ကျောင်းသားကျောင်းသူများတက်ရောက်ခဲ့ပါသည်။ ဦးစွာ တိုင်းဒေသကြီးဝန်ကြီးချုပ်မှ အဖွင့်အမှာစကားပြောကြားခဲ့ရာ ကျောင်းနေအရွယ်ကလေးငယ်များအာဟာရပြည့်ဝသည့်အစားအစာများစားသုံးခြင်းဖြင့် ဉာဏ်ရည်ဖွံံ့ဖြိုးခြင်း၊ကိုယ်ခန္ဓာကြံ့ခိုင်သန်စွမ်းကျန်းမာခြင်းများရရှိစေရန် အာဟာရပြည့်ဝသည့် နွားနို့သောက်သုံးခြင်းအလေ့အကျင့်ကောင်းများ ရရှိစေရန်အတွက် နမူနာပြဆောင်ရွက်သည့်အခမ်းအနားဖြစ်ပါကြောင်း၊ ကလေးငယ်များသည် ငယ်စဉ်ကပင် အာဟာရပြည့်ဝသည့် အစားအစာများစားသုံးခြင်းဖြင့် ကျန်းမာကြံံ့ခိုင်ပြီးဉာဏ်ရည်ဖွံ့ဖြိုးတဲ့ မျိုးဆက်သစ်လူငယ်များကိုမွေးထုတ်ပေးနိုင်မှာဖြစ်ပါကြောင်း၊ နွားနို့တွင် ခန္ဓာကိုယ်အတွက်မရှိမဖြစ်လိုအပ်သည့် ဗီတာမင်၊ ကယ်(လ်)စီယမ်၊ အသားဓာတ်၊ သကြားဓာတ်၊ အဆီဓာတ်၊ သတ္ထုဓာတ်များစွာပါဝင်ပြီး အရိုးအဆစ်နှင့်သွားများခိုင်မာခြင်း၊ ကိုယ်ခန္ဓာကြီးမားဖွံ့ဖြိုးခြင်း၊ ခွန်အားရရှိစေခြင်း၊ ဉာဏ်ရည်ဉာဏ်သွေးပိုမိုထက်မြတ်စေခြင်းစသည့် အကျိုးကျေးဇူးများရရှိနိုင်မှာဖြစ်ပါကြောင်း၊ ခေတ်မီဖွံ့ဖြိုးတိုးတက်သည့်နိုင်ငံတော်တည်ဆောက်ရန်အတွက် ပညာရေးဖြင့်ရင်းနှီးမြှုပ်နှံရမှာဖြစ်၍ အခြေခံပညာကျောင်းများရှိ ကျောင်းနေအရွယ်ကလေးများ နွားနို့တိုက်ကျွေးခြင်းအစီအစဉ် (School Milk Programme)သည် များစွာအကျိုးရှိပါကြောင်းနှင့် ယခုထက်ပိုမိုဆောင်ရွက်နိုင်ရေးသက်ဆိုင်ရာဌာနဆိုင်ရာများမှကြိုးစားပေးစေလိုပါကြောင်းနှင့် ကလေးငယ်များအာဟာရပြည့်ဝပြီးဉာဏ်ရည်ဖွံ့ဖြိုးကြီးထွား စေရန်အတွက် ကြက်ဥနှင့်နွားနို့များတိုက်ကျွေးနိုင်ရေးပူးပေါင်းဆောင်ရွက်ပေးကြပါသော မွေးမြူရေးလုပ်ငန်းရှင်များ၊ စီးပွားရေးလုပ်ငန်းရှင်များ၊ အလှူရှင်များနှင့်ဌာနဆိုင်ရာများအားကျေးဇူးတင်ရှိကြောင်းပြောကြားခဲ့ပါသည်။ ထို့နောက်တိုင်းဒေသကြီးဝန်ကြီးချုပ်နှင့်အခမ်းအနားတက်ရောက်လာကြသူများမှ အမှတ်(၁၁)အ ခြေခံပညာအထက်တန်းကျောင်းရှိ မူလတန်းကျောင်းသားကျောင်းသူ (၄၆၀)ဦးအား နွားနို့နှင့်ကြက်ဥများတိုက်ကျွေးခဲ့ကြပါသည်။

(၂၃)ကြိမ်မြောက်မြန်မာ့ရိုးရာယဉ်ကျေးမှု အဆို၊အက၊အရေး၊အတီး ပြိုင်ပွဲ ဗဟိုအဆင့်တွင် ပါဝင်ယှဉ်ပြိုင်နိုင်ရေး လုပ်ငန်းညှိနှိုင်းအစည်းအဝေးအား တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ(၁)၌ ယနေ့ည‌နေပိုင်းက ပြုလုပ်ရာ မြန်မာ့ရိုးရာယဉ်ကျေးမှု အဆို၊အက၊အရေး၊အတီး ပြိုင်ပွဲ ဗဟိုအဆင့်သို့သွားရောက်ယှဉ်ပြိုင်နိုင်ရေးအတွက် စခန်းသွင်းလေ့ကျင့်ရေးနာယက၊ တိုင်းဒေသကြီးအစိုးရအဖွဲ့ ဝန်ကြီးချုပ် ဦးတင်မောင်ဝင်း၊ အစိုးရအဖွဲ့ဝင် ဝန်ကြီးများ၊ဗဟိုအဆင့်သို့သွားရောက်ယှဉ်ပြိုင်နိုင်ရေး လုပ်ငန်းကော်မတီများမှ တာဝန်ရှိသူများတက်ရောက်ခဲ့ကြသည်။ လုပ်ငန်းညှိနှိုင်းအစည်းအဝေးတွင် (၂၃)ကြိမ်မြောက် မြန်မာ့ရိုးရာယဉ်ကျေးမှု အဆို၊အက၊အရေး၊အတီးပြိုင်ပွဲ ဗဟိုအဆင့်သို့သွားရောက်ယှဉ်ပြိုင်နိုင်ရေးအတွက် စခန်းသွင်းလေ့ကျင့်ရေးနာယက၊ တိုင်းဒေသကြီး ဝန်ကြီးချုပ် ဦးတင်မောင်ဝင်းက“ ဗဟိုပြိုင်ပွဲတွင်ဝင်ရောက်ယှဉ်ပြိုင်နိုင်ရေးနှင့်အောင်မြင်မှုများရရှိနိုင်ရေးတို့အတွက်ခရိုင်အဆင့်ပြိုင်ပွဲများကျင်းပပြုလုပ်၍ ဆုရရှိသူများရွေးချယ်ကာ စခန်းသွင်းလေ့ကျင့်မှုများဆောင်ရွက်ခြင်းဖြစ်ပါကြောင်း၊ ပြိုင်ပွဲတွင်အောင်မြင်မှုရရှိနိုင်ရန်အတွက် လေ့ကျင့်ချိန်များများရရှိစေရေး၊ လေ့ကျင့်သားပြည့်ဝစေရေး စနစ်တကျပြင်ဆင် ဆောင်ရွက်ကြရမှာဖြစ်ပါကြောင်း၊ စခန်းသွင်းလေ့ကျင့်နေစဉ်ကာလအတွင်း ကျန်းမာရေး အထူးဂရုပြု နေထိုင်ရန်နှင့် စခန်းသွင်းလေ့ကျင့်ချိန်တွင် စနစ်တကျလေ့ကျင့်သင်ကြားပေး၍ အကောင်းဆုံးယှဉ်ပြိုင်အောင်မြင်နိုင်ရေး ကြပ်မတ်ဆောင်ရွက်ပေးရန်လိုပါကြောင်း၊လုပ်ငန်းကော်မတီများကလည်း မိမိတို့နှင့်သက်ဆိုင်သည့် လုပ်ငန်းများအလိုက် ပူးပေါင်းဆောင်ရွက်ပေးကြစေလိုကြောင်း ”ပြောကြားသည်။ ဆက်လက်၍(၂၃)ကြိမ်မြောက်မြန်မာ့ရိုးရာ ယဉ်ကျေးမှု အဆို၊အက၊အရေး၊အတီး ပြိုင်ပွဲ ဗဟိုအဆင့်သို့သွားရောက် ယှဉ်ပြိုင်နိုင်ရေးလုပ်ငန်းကော်မတီ များအလိုက်အထွေထွေ ဆွေးနွေးတင်ပြချက်များအပေါ် တိုင်းဒေသကြီးဝန်ကြီးချုပ်က ဖြည့်စွက်ဆွေးနွေးခဲ့ပြီး လိုအပ်သည်များပေါင်းစပ်ညှိနှိုင်းဆောင်ရွက်ပေးခဲ့ကြောင်းသိရသည်။