၂၀၂၁ ခုနှစ်၊ မေလ (၂၄)ရက်နေ့ ၊ (၁၄၀၀)နာရီအချိန်တွင် ဧရာဝတီတိုင်းဒေသကြီး ၊ ပုသိမ်မြို့ ၊ ခုတင်(၅၀၀)ဆံ့ အထွေထွေရောဂါကု ဆေးရုံကြီးအစည်းအဝေးခန်းမ၌ လက်ထောက်ဆရာဝန်များ အလုပ်တာဝန်ပြန်လည်ဝင်ရောက်ထမ်းဆောင်ခြင်းတွေ့ဆုံပွဲသို့ ဧရာဝတီတိုင်းဒေသကြီးစီမံအုပ်ချုပ်ရေးကောင်စီဥက္ကဋ္ဌ ဦးရဲမြင့်သည် ကောင်စီအဖွဲ့ဝင်(၁) ဗိုလ်မှူးကြီး ကျော်စွာလှိုင်၊ ကောင်စီအဖွဲ့ဝင်များ၊ ကောင်စီအတွင်းရေးမှူး ဦးဝေဇင်ထွန်း၊ တိုင်းဒေသကြီး ကုသရေးဦးစီးဌာနမှူး ဒေါက်တာ ဇော်မင်းထွန်း၊ ပုသိမ်မြို့ ခုတင်(၅၀၀)ဆံ့အထွေထွေ ရောဂါကုဆေးရုံကြီးမှ ဆေးရုံအုပ် ဒေါက်တာကောင်းမြတ်စိုးတို့နှင့်အတူ တက်ရောက်ခဲ့ကြပါသည်။ ရှေးဦးစွာ တိုင်းဒေသကြီးစီမံအုပ်ချုပ်ရေးကောင်စီဥက္ကဋ္ဌမှ အဖွင့်အမှာစကား ပြောကြားရာတွင် ဆရာဝန်များသည် နိုင်ငံဝန်ထမ်းများဖြစ်ကြောင်း၊ နိုင်ငံတော်၏ ကျေးဇူးသစ္စာကိုစောင့်သိရန် လိုအပ်ကြောင်း၊ နိုင်ငံ့ဝန်ထမ်းများသည် ပါတီနိုင်ငံရေးကင်းရှင်းရန် လိုအပ်ကြောင်း၊ တိုင်းဒေသကြီးစီမံအုပ်ချုပ်ရေးကောင်စီအနေဖြင့် ဝန်ထမ်းများအပေါ် သက်ညှာစွာဆောင်ရွက်ပေးလျက်ရှိပါကြောင်း၊ CDM ဆောင်ရွက်ခဲ့ပြီး လုပ်ငန်းခွင်သို့ ပြန်လည်ဝင်ရောက်၍တာဝန်ထမ်းဆောင်သဖြင့် အထူးပင်ဝမ်းသာပီတိ ဖြစ်မိပါကြောင်း၊ မိမိဆန္ဒ မပါဘဲ သွေးထိုးလှုံ့ဆော်မှုကြောင့် CDM ပြုလုပ်နေကြရသူများလည်းရှိကြောင်း၊ CDM ပြုလုပ်သည့်ဝန်ထမ်းများမှ CDM မပြုလုပ်သည့်ဝန်ထမ်းများ အပေါ် ဖိနှိပ်ခြင်း၊ အကြပ်ကိုင်ခြင်းများပြုလုပ်ပါက သက်ဆိုင်ရာသို့တင်ပြသွားရန်နှင့် အရေးယူ ဆောင်ရွက် သွားမည်ဖြစ်ကြောင်း၊ မိမိတို့အနေဖြင့် စီမံခန့်ခွဲရေးဝန်ထမ်းများ ဖြစ်သည့်အားလျော်စွာ ကျန်းမာရေးဆိုင်ရာလိုအပ်ချက်များကို သက်ဆိုင်ရာဌာနများနှင့် ညှိနှိုင်းဆောင်ရွက် ပေးလျှက်ရှိပါကြောင်း ၊ ပြည်သူ့အကျိုးတိုင်းပြည်အကျိုးများကိုရှေးရှု၍ လုပ်ကိုင်ဆောင်ရွက်ပေးသွားရန် လိုအပ်ပါကြောင်းနှင့် တိုင်းကောင်စီအနေဖြင့်လည်း လိုအပ်သည် များကိုကူညီဆောင်ရွက်ပေးမည်ဖြစ်ကြောင်း ပြောကြားခဲ့ပါသည်။ ဆက်လက်၍ တိုင်းဒေသကြီးစီမံအုပ်ချုပ်ရေးကောင်စီအဖွဲ့ဝင်(၁) ဗိုလ်မှူးကြီး ကျော်စွာလှိုင်မှ ရှင်းလင်းဆွေးနွေးရာတွင် မိမိတို့သည် နိုင်ငံ့ဝန်ထမ်းများဖြစ်သဖြင့် ဝန်ထမ်းအချင်းချင်း ပွင့်လင်းစွာဆွေးနွေးခြင်းဖြစ်ကြောင်း၊ လုံခြုံရေးနှင့်ပတ်သက်၍ မိမိတို့အနေဖြင့် ဝန်ထမ်းနှင့်ပြည်သူများ လုံခြုံစိတ်ချစွာနေထိုင်လုပ်ကိုင်ဆောင်ရွက်နိုင်ရန်အတွက် တတ်အားသမျှဆောင်ရွက်လျှက်ရှိပါကြောင်း ၊ ဆရာဝန်များအနေဖြင့် နိုင်ငံဝန်ထမ်းများဖြစ်သည့်အားလျော်စွာ နိုင်ငံဝန်ထမ်းဥပဒေ ၊ နည်းဥပဒေများနှင့်အညီ လိုက်နာဆောင်ရွက်ကြရန် လိုအပ်ပါကြောင်း ၊ CDM ပြုလုပ်ပြီး တာဝန်ထမ်းဆောင်ခြင်းမရှိသော ဝန်ထမ်းများအား နိုင်ငံ့ဝန်ထမ်းဥပဒေနှင့်အညီ အရေးယူရုံသာမက ပြစ်မှုဆိုင်ရာ ဥပဒေများဖြင့် အရေးယူဆောင်ရွက်သွားမှာဖြစ်ကြောင်း ၊ နိုင်ငံ့ဝန်ထမ်းများဖြစ်သည့်အတွက် ဝန်ထမ်းကောင်းစိတ်ဓါတ်ဖြင့် လုပ်ကိုင်ဆောင်ရွက်သွားရန် လိုအပ်ပါကြောင်း ပြောကြားခဲ့ပြီးအခမ်းအနားကို ရုပ်သိမ်းခဲ့ကြောင်း သတင်းရရှိပါသည်။

ဧရာဝတီတိုင်းဒေသကြီးအတွင်း အခြေခံပညာကျောင်းများ ကျောင်းအပ်နှံရေးနေ့ (၂၄.၅.၂၀၂၁)ရက်နေ့မှ (၃၁.၅.၂၀၂၁)ရက်နေ့ထိ ဆောင်ရွက်လျှက်ရှိရာ ၂၀၂၁ ခုနှစ်၊ မေလ၊ (၂၄)ရက်နေ့၊ (၁၁၃၅)နာရီအချိန်၌ ဧရာဝတီတိုင်းဒေသကြီးစီမံအုပ်ချုပ်ရေးကောင်စီဥက္ကဋ္ဌ ဦးရဲမြင့်သည် အနောက်တောင်တိုင်းစစ်ဌာနချုပ်တိုင်းမှူး ဗိုလ်ချုပ်အောင်အောင်၊ ကောင်စီအဖွဲ့ဝင်(၁)ဗိုလ်မှူးကြီးကျော်စွာလှိုင်၊ ကောင်စီအဖွဲ့ဝင်များ၊ ကောင်စီအတွင်းရေးမှူး၊ တိုင်းဒေသကြီးပညာရေးမှူးနှင့် ခရိုင်/မြို့နယ်အဆင့် ဌာနဆိုင်ရာတာဝန်ရှိ သူများနှင့်အတူ ပုသိမ်မြို့၊ အမှတ်(၃)အခြေခံပညာအထက်တန်းကျောင်း ၊ အမှတ်(၂၄) အခြေခံပညာမူလတန်းကျောင်းနှင့် အနောက်တောင်တိုင်း စစ်ဌာနချုပ် အမှတ်(၇) အခြေခံပညာအထက်တန်းကျောင်းများတွင် ကျောင်းအပ်နှံနေမှုအခြေအနေများအား လှည့်လည် ကြည့်ရှုအားပေးခဲ့ကြောင်း သတင်းရရှိပါသည်။

ဧရာဝတီတိုင်းဒေသကြီးအတွင်းအခြေခံပညာကျောင်းများ ပြန်လည်ဖွင့်လှစ်ရာတွင် သန့်ရှင်းသာယာလှပရေး၊ ကျောင်းသား/ကျောင်းသူများ ပျော်ရွှင်စွာ ကျောင်းတက်ရောက် နိုင်ရေးအတွက် ပြင်ဆင်ဆောင်ရွက်လျက်ရှိရာ ၂၀၂၁ ခုနှစ်၊ မေလ၊ (၂၂)ရက်နေ့၊ နံနက် (၀၈၀၀)နာရီအချိန်၌ ဧရာဝတီတိုင်းဒေသကြီး၊ ပုသိမ်မြို့၊ အမှတ်(၄)အခြေခံပညာအထက်တန်းကျောင်းနှင့် အခြေခံပညာအထက်တန်းကျောင်းခွဲ(လ-၂) ကျောင်းဝန်း အတွင်း စုပေါင်းသန့်ရှင်းရေး ဆောင်ရွက်ခဲ့ကြပါသည်။ စုပေါင်းသန့်ရှင်းရေး ဆောင်ရွက်ရာတွင် တပ်မတော်မှ အရာရှိအရာခံစစ်သည်များ၊ မြန်မာနိုင်ငံရဲတပ်ဖွဲ့၊ ယာဉ်ထိန်းရဲတပ်ဖွဲ့နှင့် မြန်မာနိုင်ငံမီးသတ် တပ်ဖွဲ့မှ တပ်ဖွဲ့ဝင်စုစုပေါင်း အင်အား(၁၉၂)ဦးတို့ဖြင့် ကျောင်းဝန်းအတွင်းရှိ ခြုံနွယ်ပိတ်ပေါင်းများအား ခုတ်ထွင်ရှင်းလင်းခြင်း၊ ကျောင်းခန်းများအတွင်း သန့်ရှင်းရေးဆောင်ရွက်ခြင်းတို့ ပြုလုပ်ခဲ့ရာ တိုင်းဒေသကြီး စီမံအုပ်ချုပ်ရေးကောင်စီဥက္ကဌ ဦးရဲမြင့်၊ အနောက်တောင်တိုင်း စစ်ဌာနချုပ်ဒုတိယတိုင်းမှူး ဗိုလ်မှူးချုပ် အောင်ခင်ဇော်၊ တိုင်းဒေသကြီးစီမံအုပ်ချုပ်ရေး ကောင်စီအဖွဲ့ဝင်(၁) ဗိုလ်မှူးကြီးကျော်စွာလှိုင်၊ ပုသိမ်လေတပ်စခန်းဌာနချုပ်မှ ဗိုလ်မှူးကြီး သူရအောင်အောင်၊ တိုင်းဒေသကြီးစီမံအုပ်ချုပ်ရေးကောင်စီဝင်များ၊ ကောင်စီအတွင်းရေးမှူး ဦးဝေဇင်ထွန်းနှင့် တိုင်း/ခရိုင်/မြို့နယ်အဆင့် ဌာနဆိုင်ရာတာဝန်ရှိသူများမှ လိုက်လံကြည့်ရှု အားပေးခဲ့ပါကြောင်း သတင်းရရှိပါသည်။

၂၀၂၁ ခုနှစ်၊ မေလ၊ (၂၁)ရက်နေ့ ၊ (၁၃၀၀)အချိန်တွင် ဧရာဝတီတိုင်းဒေသကြီး၊ ပုသိမ်မြို့၊ မြို့တော်ခန်းမတွင်ကျင်းပပြုလုပ်သည့် တိုင်းဒေသကြီးစီမံအုပ်ချုပ်ရေးကောင်စီနှင့် ဧရာဝတီတိုင်းဒေသကြီးအတွင်းရှိ တက္ကသိုလ်၊ ကောလိပ်၊ သိပ္ပံ၊ နည်းပညာအထက်တန်း ကျောင်းမှ ပါမောက္ခချုပ်များ၊ ကျောင်းအုပ်ကြီးများ၊ တိုင်း/ ခရိုင်/ မြို့နယ်ပညာရေးမှူးများ တွေ့ဆုံပွဲသို့ တိုင်းဒေသကြီးစီမံအုပ်ချုပ်ရေးကောင်စီဥက္ကဋ္ဌ ဦးရဲမြင့်၊ ကောင်စီအဖွဲ့ဝင်(၁) ဗိုလ်မှူးကြီးကျော်စွာလှိုင်၊ ကောင်စီအဖွဲ့ဝင်များ၊ ကောင်စီအတွင်းရေးမှူးနှင့် တာဝန်ရှိသူများ တက်ရောက်ခဲ့ကြပါသည်။ ရှေးဦးစွာ တိုင်းဒေသကြီးစီမံအုပ်ချုပ်ရေးကောင်စီဥက္ကဋ္ဌမှ အဖွင့်အမှာစကား ပြောကြား ရာတွင် ကျောင်းဆရာ/ဆရာမများသည် နိုင်ငံဝန်ထမ်းများဖြစ်ကြောင်း၊ နိုင်ငံတော်၏ ကျေးဇူးသစ္စာကိုစောင့်သိရန် လိုအပ်ကြောင်း၊ နိုင်ငံ့ဝန်ထမ်းများသည် ပါတီနိုင်ငံရေး ကင်းရှင်းရန်လိုအပ်ကြောင်း၊ တိုင်းဒေသကြီးစီမံအုပ်ချုပ်ရေးကောင်စီအနေဖြင့် ဝန်ထမ်းများအပေါ် သက်ညှာစွာဆောင်ရွက်ပေးလျက်ရှိပါကြောင်း၊ CDM ဆောင်ရွက်လျက်ရှိသော ဆရာ/ဆရာမများအနေဖြင့် လုပ်ငန်းခွင်ပြန်လည်ဝင်ရောက်ရန်လိုအပ်ကြောင်း၊ မိမိဆန္ဒ မပါဘဲ သွေးထိုးလှုံ့ဆော်မှုကြောင့် CDM ပြုလုပ်နေကြရသူများလည်းရှိကြောင်း၊ CDM ပြုလုပ်သည့်ဝန်ထမ်းများမှ CDM မပြုလုပ်သည့်ဝန်ထမ်းများအပေါ် ဖိနှိပ်ခြင်း၊ အကြပ်ကိုင် ခြင်းများပြုလုပ်ပါက သက်ဆိုင်ရာသို့ တင်ပြသွားရန်နှင့် အရေးယူဆောင်ရွက်သွားမည် ဖြစ်ကြောင်း၊ ဆရာကြီး/ဆရာမကြီးများအနေဖြင့် မိမိတို့၏ လက်အောက်ငယ်သား၊ တပည့် များအား ဆုံးမလမ်းညွှန်ပေးရန်လိုကြောင်း၊ ဆရာ/ဆရာမများအနေဖြင့် မိမိတို့၏လုပ်ငန်း တာဝန်များကို ကျေပွန်အောင်ဆောင်ရွက်ရန်လိုအပ်ကြောင်း၊ တိုင်းကောင်စီအနေဖြင့်လည်း လိုအပ်သည်များကိုကူညီဆောင်ရွက်ပေးမည်ဖြစ်ကြောင်း ပြောကြားခဲ့ပါသည်။ ဆက်လက်၍ တိုင်းဒေသကြီးစီမံအုပ်ချုပ်ရေးကောင်စီအဖွဲ့ဝင်(၁) ဗိုလ်မှူးကြီးကျော်စွာလှိုင်မှ ရှင်းလင်းဆွေးနွေးရာတွင် မိမိတို့သည် နိုင်ငံ့ဝန်ထမ်းများဖြစ်သဖြင့် ဝန်ထမ်းအချင်းချင်း ပွင့်လင်းစွာ ဆွေးနွေးခြင်းဖြစ်ကြောင်း၊ ယခင်အစိုးရလက်ထက်တွင် ဆောင်ရွက်ခဲ့သည့် တည်ဆောက်ရေးလုပ်ငန်းများနှင့်ပတ်သက်၍ ပြီးပြတ်အောင် ဆောင်ရွက်လျက်ရှိပြီး အခက်အခဲများရှိပါကလည်းတင်ပြနိုင်ပါကြောင်း၊ စာသင်ကျောင်းများ ပြန်လည် ဖွင့်လှစ်ရာတွင် လုံခြုံရေးဆောင်ရွက်ပေးမည့် အစီအစဉ်များအား သက်ဆိုင်ရာအဖွဲ့အစည်းများဖြင့် ပေါင်းစပ်ဆောင်ရွက်ပေးမည်ဖြစ်ပါကြောင်း၊ စာသင်ကျောင်းများအား COVID-19 စည်းကမ်းချက်များနှင့်အညီ ပြန်လည်ဖွင့်လှစ်မည်ဖြစ်ကြောင်း၊ ကျောင်းအုပ်ကြီးများ၊ ဆရာ/ဆရာမများအနေဖြင့်ပူးပေါင်းဆောင်ရွက်ပေးရန်လိုကြောင်း၊ ဝန်ထမ်းများအား CDM ပြုလုပ်ရန် လှုံ့ဆော်သူများအား အရေးယူဆောင်ရွက်သွားမည်ဖြစ်ကြောင်း၊ ယခင်က CDM ပြုလုပ်ပြီး ယခုလုပ်ငန်းခွင် ပြန်လည်ဝင်ရောက်သူများလည်းရှိကြောင်း၊ စာသင်ကျောင်းများ ပြန်လည်ဖွင့်လှစ်လျ​င် ဆရာ/ဆရာမများ စာသင်ကြားနေကြသည်ကို မြင်တွေ့ချင်ကြောင်း၊ စာသင်ကျောင်းများတွင် နိုင်ငံရေးဆန့်ကျင်သည့် လုပ်ရပ်များမပြုလုပ်ရန်လိုအပ်ကြောင်း၊ ဆရာ/ဆရာမများအနေဖြင့် ကြပ်မတ်ဆောင်ရွက်ကြရန်လိုကြောင်း၊ နိုင်ငံ့ဝန်ထမ်းပီသစွာ ဆောင်ရွက်ပေးကြရန်လိုကြောင်း၊ ဆရာ/ဆရာမများအနေဖြင့် တိုင်းဒေသကြီးအတွင်း ဖွံဖြိုးရေးလုပ်ငန်းများအား ပူးပေါင်းဆောင်ရွက်ပေးရန်လိုအပ်ကြောင်း ပြောကြားခဲ့ပါသည်။ ထို့နောက် တိုင်းဒေသကြီးစီမံအုပ်ချုပ်ရေးကောင်စီဥက္ကဋ္ဌမှ နိဂုံးချုပ်အမှာစကား ပြောကြားရာတွင် မိမိတို့၏ပတ်ဝန်းကျင်တွင် အဖျက်အမှောက်လုပ်ငန်းများ ဆောင်ရွက်နေသည်ဟုကြားလျင် သက်ဆိုင်ရာအဖွဲ့အစည်းများထံသို့ သတင်းပေးပို့ရန်လိုကြောင်း၊ ကျောင်းတက်ရောက်မည့် ကျောင်းသား/ကျောင်းသူများ၏ လုံခြုံရေးအတွက် ဆောင်ရွက်ရန် လိုကြောင်း၊ နိုင်ငံ့ဝန်ထမ်းများအား ခြိမ်းခြောက်ခြင်း၊ အကြပ်ကိုင်ခြင်း၊ လူမှုကွန်ယက် စာမျက်နှာပေါ်တွင် အသရေဖျက်ခြင်းများရှိပါက သက်ဆိုင်ရာအဖွဲ့အစည်းများထံသို့ တင်ပြရန်နှင့် ထိုသို့ပြုလုပ်သူအား ဥပဒေအရအရေးယူဆောင်ရွက်မည်ဖြစ်ကြောင်း၊ လုံခြုံရေးအသိ၊ သတိရှိရန်နှင့် ပူးပေါင်းဆောင်ရွက်ပေးရန်လိုကြောင်း၊ လူငယ်များ၏ ပညာရေးစနစ်အတွက် အလေးထားဆောင်ရွက်ဖို့လိုကြောင်း ပြောကြားခဲ့ပြီးအခမ်းအနားကို ရုပ်သိမ်းခဲ့ကြောင်း သတင်းရရှိပါသည်။

၂၀၂၁ ခုနှစ်၊ မေလ၊ (၂၁)ရက်နေ့ ၊ (၀၉၃၀)အချိန်တွင် ဧရာဝတီတိုင်းဒေသကြီး စီမံအုပ်ချုပ်ရေးကောင်စီရုံး၊ အစည်းအဝေးခန်းမ(၁)တွင် တိုင်းဒေသကြီးလယ်ယာမြေစီမံ ခန့်ခွဲမှုကော်မတီအစည်းအဝေး(၂/၂၀၂၁)ကျင်းပပြုလုပ်ခဲ့ရာ စီမံအုပ်ချုပ်ရေးကောင်စီဥက္ကဋ္ဌ ဦးရဲမြင့်၊ ကောင်စီအဖွဲ့ဝင်(၁) ဗိုလ်မှူးကြီးကျော်စွာလှိုင်၊ ကောင်စီအဖွဲ့ဝင်များ၊ ကောင်စီအတွင်းရေးမှူး၊ တိုင်းဒေသကြီးလယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန တိုင်းဦးစီးမှူးနှင့် ကော်မတီဝင်များ တက်ရောက်ခဲ့ကြပါကြောင်း သတင်းရရှိပါသည်။