ဧရာဝတီတိုင်းဒေသကြီးအတွင်းရှိ မြို့နယ် ၂၆မြို့နယ်ရှိ မြို့၊ ဘုန်းတော်ကြီးကျောင်းများ၊ ဓမ္မာရုံများ၊ ဗိမာန်တော်များ၌ ဆရာတော်သံဃာတော်များ၊ဝတ်အသင်းများမှ ​ ၂၆.၁.၂၀၂၃ ရက်​နေ့ ၀၈၀၀ နာရီအချိန်  ​ပရိတ်​တရားတော်များ ရွတ်ဖတ်ပူ​ဇော်​လျက်ရှိရာ ယနေ့နံနက်ပိုင်းတွင်  ပုသိမ်မြို့၊သာသနာ့ဗိမာန်တော်ကြီးတွင်လည်း ပရိတ်တော်များရွတ်ပွားပူဇော်ခြင်း မင်္ဂလာအခမ်းအနားကျင်းပခဲ့ပါသည်။  ဦးစွာ ပရိတ်အသင်းများက စိန်ရောင်ခြည်ဂာထာဖြင့် ဘုရားရှင်အားပင့်ဆောင်တော်မူပြီးနောက် နတ်ဗြဟ္မာများအားပင့်ဆောင်ခဲ့ကြသည်။ ထို့နောက် ဝတ်ရွတ်အသင်းမှ ပရိတ်တရားတော်များ ကိုရွတ်ဖတ်ပူဇော်ခဲ့ကြပြီး နတ်ဗြဟ္မာများအား ပြန်လည်ပို့ဆောင်ခဲ့ကြသည်။ ထို့အတူ  တိုင်းဒေသကြီးအတွင်းရှိ မြို့နယ်အသီးသီးတွင်လည်းဘုန်းတော်ကြီးကျောင်းများ၊ ဓမ္မာရုံများ၊ ဗိမာန်တော်များ၌ ဆရာတော်သံဃာတော်များ၊ဝတ်အသင်းများမှ ​   ​ပရိတ်​တရားတော်များအား ရွတ်ဖတ်ပူ​ဇော်​ခဲ့ကြကြောင်းသိရသည်။

ဧရာဝတီတိုင်းဒေသကြီး အစိုးရအဖွဲ့က မဟာမကုဋရံသီဆံတော်ရှင် မြတ်မော်တင်စွန်းစေတီတော်၏ ရင်ပြင်တော်တိုးချဲ့ခြင်းဆောင်ရွက်ပြီးစီးမှုအား ဆရာတော်ကြီးများ၏ ဩဝါဒခံယူခြင်းနှင့်စတုတ္ထအကြိမ် အလှူငွေပေးအပ်ပွဲမင်္ဂလာအခမ်းအနားအား ယနေ့မွန်းလွဲပိုင်းက ပုသိမ်မြို့၊သာသနာ့ဗိမာန်တော်ကြီး၌ ပြုလုပ်ရာ တိုင်းဒေသကြီး ဝန်ကြီးချုပ်ဦးတင်မောင်ဝင်း၊အစိုးရအဖွဲ့ဝင် ဝန်ကြီးများ၊ဌာနဆိုင်ရာများနှင့်အလှူရှင်များ တက်ရောက်ခဲ့ကြသည်။ ရှေးဦးစွာ အခမ်းအနားအား “နမောတဿ”သုံးကြိမ်ရွတ်ဆို ဘုရားကန်တော့၍ ဖွင့်လှစ်ခဲ့ပြီး နိုင်ငံတော်ဩဝါဒါစရိယ၊ ပုသိမ်မြို့၊ ညောင်ပင်သာပရိယတ္တိစာသင်တိုက် ပဓာနနာယကဆရာတော် ဘဒ္ဒန္တဝိသုတ (အဘိဓဇမဟာရဋ္ဌဂုရု၊ အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မဇောတိကဓဇ)မဟာထေရ်မြတ်ထံမှ ဝန်ကြီးချုပ်နှင့် ဧည့်ပရိသတ်များကငါးပါးသီလ ခံယူဆောက်တည်ခဲ့ကြပြီးနောက် ဆရာတော် သံဃာတော်အရှင်သူမြတ်များ ရွတ်ပွားသရဇ္ဈာယ် ချီးမြှင့်တော်မူသော ပရိတ်တရားတော်များကိုဆက်လက် နာယူကြည်ညိုကြသည်။ယင်းနောက် ရင်ပြင်တော်တိုးချဲ့ပြုပြင် တည်ဆောက်ရေးကော်မတီဥက္ကဌ တိုင်းဒေသကြီးအစိုးရအဖွဲ့ သယံဇာတရေးရာဝန်ကြီးက ဦးစီးကော်မတီ၊လုပ်ငန်းကော်မတီများ ဖွဲ့စည်းဆောင်ရွက်မှု အခြေအနေများအားလည်းကောင်း၊ရင်ပြင်တော်တိုးချဲ့ပြုပြင် တည်ဆောက်ရေးနှင့်ပတ်သက်၍ လမ်းပန်းဆက်သွယ်ရေး ဝန်ကြီးက ရင်ပြင်တော်တိုးချဲ့ပြုပြင်တည်ဆောက်ရေး ပြီးစီးမှုအခြေအနေများကိုလည်းကောင်း၊အလှူငွေရရှိမှု အခြေအနေများနှင့် သုံးစွဲမှုအခြေအနေများကို ဘဏ္ဍာငွေရှာဖွေရေးကော်မတီ ဥက္ကဌ စီးပွားရေးရာဝန်ကြီးကလည်းကောင်း  ဆရာတော်ကြီးများအား အသီးသီး ရှင်းလင်းတင်ပြလျှောက်ထားမှုများအပေါ် တိုင်းဒေသကြီး ဝန်ကြီးချုပ်က“‌မြတ်မော်တင် စေတီတော်မြတ်ကြီးသည် ရှေးဟောင်းသမိုင်းဝင်စေတီတော်မြတ်ကြီးဖြစ်ပါကြောင်း၊ ယခင်ကသွားလာရေးခက်ခဲသော်လည်း ယခုအခါတွင် နွေ၊မိုး၊ဆောင်း ရာသီမရွေး သွားလာနိုင်ပြီဖြစ်ပါကြောင်း၊ စေတီမြတ်ကြီးအား ဘုရားဖူးပြည်သူများ စိတ်အေးချမ်းသာစွာဖူးမြော်ကြည်ညိုနိုင်စေရေးနှင့်ပိုမိုကြည်ညိုဖွယ်ရာဖြစ်စေရေးတို့အတွက် ရင်ပြင်တော်အား တိုးချဲ့တည်ဆောက်လျက်ရှိပါကြောင်း၊ စေတီတော်မြတ်ကြီး၏  ရင်ပြင်တော်အား တိုးချဲ့ဆောင်ရွက်ရာတွင် လုပ်ငန်းပမာဏ ကြီးမားသဖြင့် အပိုင်း ၃ ပိုင်း ခွဲ၍ ဆောင်ရွက် လျက်ရှိပါကြောင်း၊ ပထမအဆင့်အနေဖြင့် ရင်ပြင်တော် အနောက်၊ မြောက်၊ အရှေ့ဘက်တို့ အား၇၀ရာခိုင်နှုန်းအထိတည်ဆောက်ပြီးစီးလျှက်ရှိပြီး ဘုရားပွဲတော်အမီ ပြီးစီးအောင်တည်ဆောက်သွားမည်ဖြစ်ပါကြောင်း၊ကျန်ရှိသည့်အပိုင်းများအားလည်း အလှူရှင် များ၏လှူဒါန်းမှုအစုစုမှရရှိသည့် ဘဏ္ဍာငွေအပေါ်မူတည်၍ ဆက်လက်ဆောင်ရွက်လျက်ရှိပါကြောင်း”ဖြည့်စွက်ရှင်းလင်းတင်ပြလျှောက်ထားခဲ့သည်။ ဆက်လက်၍  အလှူရှင်များနှင့် ဌာနဆိုင်ရာများက အလှူငွေများအား ပေးအပ်လှူဒါန်းရာ တိုင်းဒေသကြီးဝန်ကြီးချုပ်နှင့် အစိုးရအဖွဲ့ဝင် ဝန်ကြီးများက လက်ခံရယူခဲ့ပြီး အလှူရှင်များအား ဂုဏ်ပြုမှတ်တမ်းလွှာများပြန်လည်ပေးအပ်ခဲ့သည်။ယင်းနောက် ဝန်ကြီးချုပ်နှင့် အစိုးရအဖွဲ့ဝင် ဝန်ကြီးများက သံဃာတော်အရှင်သူမြတ်များအား လှူဖွယ်ဝတ္ထုပစ္စည်းများ အသီးသီးဆက်ကပ်လှူဒါန်းခဲ့ပြီးနောက် တိုင်းဒေသကြီးသံဃနာယကအဖွဲ့ ဥက္ကဋ္ဌ၊ ပုသိမ်မြို့၊ မရမ်းချိုကျောင်းတိုက်ပဓာန နာယကဆရာတော် ဘဒ္ဒန္တသောဘိတ (အဂ္ဂမဟာဂန္ထဝါစကပဏ္ဍိတ၊ အဂ္ဂမဟာသဒ္ဓမ္မဇောတိကဓဇ) အရှင်သူမြတ်ထံမှ အနုမောဒနာတရား နာကြား၍ လှူဒါန်းမှုအစုစုတို့အတွက်  ရေစက်သွန်းချ အမျှပေးဝေခဲ့ကာ "ဗုဒ္ဓသာသနံ စိရံ တိဋ္ဌတု" သုံးကြိမ်ရွတ်ဆိုဆုတောင်း၍ အခမ်းအနားကိုရုပ်သိမ်းခဲ့ကြောင်းသိရသည်။ ဆက်လက်၍ ဧရာဝတီတိုင်းဒေသကြီး၊ မြို့၊ ရွာများအတွင်းရှိ ဘုရားကျောင်းကန်များအား သန့်ရှင်းရေးဆောင်ရွက်ခြင်းနှင့် စေတီပုထိုးများအား ထုံးသင်္ကန်းကပ်ခြင်းများဆောင်ရွက်ခြင်းများအား ယနေ့တွင် ခရိုင်၊ မြို့နယ်စီမံအုပ်ချုပ်ရေးအဖွဲ့များမှ ဦးဆောင်ကာ ရဲတပ်ဖွဲ့ဝင်များ၊ မီးသတ်တပ်ဖွဲ့ ဝင်များ၊ ဌာနဆိုင်ရာဝန်ထမ်းများနှင့် ဒေသခံပြည်သူများမှ မိမိတို့ခရိုင်၊ မြို့နယ်များအလိုက်ဆောင်ရွက်လျက်ရှိရာ တိုင်းဒေသကြီးဝန်ကြီးချုပ်နှင့်အဖွဲ့သည် ပုသိမ်ခရိုင်၊ ပုသိမ်မြို့ရှိ သမိုင်းဝင် ရွှေမုဌောမဟာစေတီတော်မြတ်၊ ရွှေစည်းခုံစေတီတော်မြတ်၊ စက်တော်ရာစေတီတော်မြတ်နှင့် ပုသိမ်မြို့ပေါ်ရှိ ဘုရားစေတီများအား ရေသပ္ပာယ်ခြင်း၊ ထုံးသင်္ကန်းကပ်ခြင်း၊  ရောင်တော်ဖွင့်ခြင်း၊ စေတီတော်ရင်ပြင်တော်များအား တံမြက်လှည်းသန့်ရှင်းရေး ကုသိုလ်ယူခြင်းများ ဆောင်ရွက်နေမှုများကို သွားရောက်ကြည့်ရှုအားပေးခဲ့ကြောင်းသိရသည်။

ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ် ဦးတင်မောင်ဝင်းသည် တိုင်းဒေသကြီးအစိုးရအဖွဲ့ဝင် ဝန်ကြီးများ၊ တိုင်း၊ခရိုင်၊မြို့နယ်အဆင့်ဌာနဆိုင်ရာများနှင့်အတူ ဇန်နဝါရီလ ၂၄ ရက်နေ့ ညနေပိုင်းက ကန်ကြီးထောင့်မြို့နယ်၊ ကွင်းယားအရှေ့ကျေးရွာတောင်သူဦးဆန်းဦး၏ လယ်မြေ(၁) ဧက၌ ပြုလုပ်သည့်  နေကြာမျိုးစေ့စိုက်ပျိုးပွဲတက် ရောက်ခဲ့သည်။ ဦးစွာ တိုင်းဒေသကြီးဝန်ကြီးချုပ်သည် တိုင်းဒေသကြီးအစိုးရအဖွဲ့ဝင် ဝန်ကြီးများ၊ တိုင်း၊ခရိုင်၊မြို့နယ်အဆင့်ဌာနဆိုင်ရာများ၊ ဒေသခံတောင်သူများနှင့်အတူ (Super Sun 41) နေကြာမျိုးစေ့များအား စုပေါင်းစိုက်ပျိုးပေးခဲ့ပြီး ရေပေးခြင်း၊ အစာကျွေးခြင်းလုပ်ငန်းများ စနစ်တကျဆောင်ရွက်ရန်နှင့် ဖြစ်ထွန်းအောင်မြင်အောင် စိုက်ပျိုးကြရန်မှာကြားခဲ့သည်။

ဧရာဝတီတိုင်းဒေသကြီး၊ ငွေဆောင်မြို့၊ ကြက်တူရွေးကျေးရွာ၌ (၇၆)နှစ်မြောက် ပြည်ထောင်စုနေ့ကိုကြိုဆိုဂုဏ်ပြုသောအားဖြင့်ကျေးရွာလျှပ်စစ်မီး ဖွင့်ပွဲအခမ်းအနားအား ယနေ့နံနက်ပိုင်းက  ပြုလုပ်ခဲ့ရာ တိုင်းဒေသကြီး ဝန်ကြီးချုပ်ဦးတင်မောင်ဝင်း တက်ရောက်ဖွင့်လှစ်ပေးခဲ့သည်။ ဦးစွာ တိုင်းဒေသကြီး ဝန်ကြီးချုပ်နှင့်တာဝန်ရှိသူများက ငွေဆောင်မြို့၊ ကြက်တူရွေးကျေးရွာ၌ (  ၂၀၂၀- ၂၀၂၁ )တိုင်းဒေသကြီးဘဏ္ဍာရန်ပုံငွေဖြင့်(၁၁/၀.၄ကေဗွီ၊ ၂၀၀ ကေဗွီအေ ထရန်စဖော်မာ တည်ဆောက်ပေးပြီး ကျေးရွာမှကိုယ်ထူကိုယ်ဖြင့် ၄၀၀ ဗို့ဓာတ်အားလိုင်းသွယ်တန်းဆောင်ရွက်သည့် ကျေးရွာလျှပ်စစ်မီး ဖွင့်ပွဲအခမ်းအနားအား ဖဲကြိုးဖြတ်ဖွင့်လှစ်ပေးပြီး လျှပ်စစ်မီးအား မီးခလုပ်နှိပ်ဖွင့်လှစ်ကာ ကမ္ဗည်းမော်ကွန်းအား အစိုးရအဖွဲ့ဝင် ဝန်ကြီးများနှင့်အတူ အမွှေးနံ့သာရည်များပက်ဖျန်းပေးခဲ့သည်။ယင်းနောက်  လျှပ်စစ်မီးဖွင့်ပွဲ အခမ်းအနားသို့ တက်ရောက်လာသူများနှင့်အတူ စုပေါင်းမှတ်တမ်းဓာတ်ပုံများရိုက်ကူးခဲ့ကြပြီး ကျေးရွာအတွင်း မီတာတပ်ဆင် ထားမှုများနှင့် လျှပ်စစ်မီးသုံးစွဲမှုများအား လှည့်လည်ကြည့်ရှုစစ်ဆေးခဲ့သည်။ အဆိုပါ ကျေးရွာ၌ လျှပ်စစ်မီး ဖွင့်လှစ်ပေးခြင်းကြောင့် အိမ်ခြေ( ၆၉ ) အိမ်ထောင်စု( ၆၉ )စုတို့လျှပ်စစ်မီးများစတင်သုံးစွဲနိုင်မည်ဖြစ်ကြောင်းသိရသည်။ ဆက်လက်၍ တိုင်းဒေသကြီး ဝန်ကြီးချုပ်သည် Oriental High Way ကုမ္ပဏီမှ B.O.T စနစ်ဖြင့်ဆောင်ရွက်နေသော ပုသိမ်-ငွေဆောင်ကားလမ်း မိုင်( ၁၆/၀- ၁၆/၂ ) မိုင်အား လမ်းအနိမ့်အမြင့်ညှိခြင်းလုပ်ငန်းဆောင်ရွက်နေမှုကို ကြည့်ရှုစစ်ဆေးခဲ့ပြီး တိုင်းဒေသကြီး ဝန်ကြီးချုပ်က သတ်မှတ်ထားသောကာလများအတွင်း အချိန်မီပြီးစီးစေရေးအတွက် အလေးထားဆောင်ရွက်ရန်နှင့်  စံချိန်စံညွှန်းများပြည့်မီရေးနှင့်ရေရှည် တည်တံ့အောင် စနစ်တကျပြုပြင်ထိန်းသိမ်းရေး လုပ်ငန်းများအားစဉ်ဆက်မပြတ်ဆောင်ရွက်ရေးအားလမ်းညွှန်မှာကြားခဲ့ပြီး ပုသိမ်- ရှောပြာ- ချောင်းသာလမ်း(၂၅/၀ - ၃၄/၀) မိုင် အတွင်း မျက်ကွယ်ကွေ့များအား လမ်းတာတိုးချဲ့ခြင်းလုပ်ငန်းဆောင်ရွက်နေမှုများကိုလှည့်လည်ကြည့်ရှုစစ်ဆေးခဲ့ကြောင်းသိရသည်။

ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် အစိုးရအဖွဲ့ဝင် ဝန်ကြီးများ၊ တိုင်း၊ခရိုင်၊ မြို့နယ်အဆင့်ဌာနဆိုင်များလိုက်ပါလျက် ယနေ့နံနက်ပိုင်းက မအူပင်ခရိုင်၊ မအူပင်မြို့နယ်၊ မင်းဘောကျေးရွာ၌ ဆည်မြောင်းနှင့်ရေအသုံးချမှု စီမံခန့်ခွဲရေးဦးစီးဌာနမှ ဆောင်ရွက်လျက်ရှိသည့် 66KW Solar Pumping System ပြောင်းလဲတပ်ဆင်ခြင်း(မင်းဘောဒီဇယ်ရေတင်)လုပ်ငန်းဆောင်ရွက်နေမှုအား ကြည့်ရှုစစ်ဆေးခဲ့ပြီးအရည်အသွေး ပြည့်မီစေရေး၊ အချိန်မီပြီးစီးစေရေး၊ စိုက်ပျိုးရေအား တောင်သူများ အကျိုးရှိရှိ အသုံးချစေရေး အလေးထားဆောင်ရွက်စေရေးမှာကြားခဲ့သည်။  ဆက်လက်၍ ကွန်ပျူတာတက္ကသိုလ်(မအူပင်) RCသုံးထပ်ပင်မကျောင်းဆောင် (၂၆၀ပေ၊၁၆၀ပေ) အဆောက်အဦတည်ဆောက်ခြင်းလုပ်ငန်းအားလည်းကောင်း၊၂၀၂၂-၂၀၂၃ ဘဏ္ဍာရေးနှစ်၊အစိုးရနည်းပညာအထက်တန်းကျောင်း(မအူပင်)(၁၉၂ပေ၊၃၈ပေ)Three Storeyed R.C.C Lecture Building ဆောက်လုပ်ခြင်းနှင့် ကျောင်းဝင်းအတွင်းလှည့်လည်ကြည့်ရှုစစ်ဆေးခဲ့ပြီး  တာဝန်ရှိသူများ၏ ရှင်းလင်းတင်ပြချက်များအပေါ် တိုင်းဒေသကြီး ဝန်ကြီးချုပ်က လုပ်ငန်းဆောင်ရွက်ရာတွင် သတ်မှတ်အရည်အသွေး ပြည့်မီစေရေး၊ အချိန်မီပြီးစီးစေရေး၊ ကျောင်းဝန်းအတွင်းသန့်ရှင်းသာယာစေရေးတို့အား အလေးထားဆောင်ရွက်စေရေးမှာကြားခဲ့သည်။  ဆက်လက်၍ တိုင်းဒေသကြီး ဝန်ကြီးချုပ်သည် ၂၀၂၂-၂၀၂၃ ဘဏ္ဍာရေးနှစ်၊ မအူပင်မြို့နယ် စည်ပင်သာယာရေးရန်ပုံငွေဖြင့် ဆောင်ရွက်သည့် အမှတ်(၃)ရပ်ကွက်၊ကမ်းနားလမ်း(စည်ပင်လမ်းနှင့် ၃လမ်းကြား)ကွန်ကရစ်လမ်း၊အရှည်(၁၁၇၀)ပေ၊အကျယ်(၃၀)ပေ၊ထု(၈)လက်မရှိပြီး (၇၆)နှစ်မြောက်ပြည်ထောင်စုနေ့ကို ကြိုဆိုဂုဏ်ပြုသောအားဖြင့် ဖွင့်လှစ်သည့် ကွန်ကရစ်လမ်းအား တာဝန်ရှိသူများနှင့်အတူ ဖဲကြိုးဖြတ်ဖွင့်လှစ်ပေးခဲ့ကာ လမ်းဖွင့်ပွဲအထိမ်းအမှတ်ပစ္စည်းအား မြို့နယ်စည်ပင်သာယာရေးအဖွဲ့ဥက္ကဌက  ပေးအပ်ခဲ့ပြီးနောက်  စုပေါင်းမှတ်တမ်းတင် ဓာတ်ပုံများ ရိုက်ကူးခဲ့ပြီး ကွန်ကရစ်လမ်းသစ်အား ကြည့်ရှုစစ်ဆေးခဲ့သည်။ ယင်းနောက်  တိုင်းဒေသကြီး ဝန်ကြီးချုပ်သည် မအူပင်မြို့နယ်၊ မလက်တိုကျေးရွာ အခြေခံပညာအထက်တန်းကျောင်း၌ တက္ကသိုလ်ဝင်တန်း စာမေးပွဲဝင်ရောက်ဖြေဆိုမည့် ဖြေဆိုကြမည့် ကျောင်းသားကျောင်းသူများအား အချိန်ပိုသင်ကြားပို့ချနေမှုကိုကြည့်ရှုအားပေးခဲ့ပြီး ဆရာ၊ဆရာမျိား၏သင်ကြားပို့ချမှုများကို လိုက်နာမှတ်သားကျက်မှတ်စေရေး၊ အားနည်းသည့်ဘာသာရပ်များကိုပိုမိုလေ့လာကြစေရေးနှင့် ရာနှုန်းပြည့်အောင်မြင်စေရေးအားပေးစကားများပြောကြားခဲ့ပြီး ကျောင်းသုံးပစ္စည်းများနှင့် ထောက်ပံ့ငွေများပေးအပ်ခဲ့သည်။  ဆက်လက်၍ မလက်တိုကျေးရွာအုပ်စု၊ပလောင်ရွာ၌ ၂၀၂၃ခုနှစ်၊ နွေစပါးတစ်ဧကတင်း (၁၂၀) ဧက၁၀၀စံပြကွက်အား ကြည့်ရှုအားပေးခဲ့ပြီး  နိုင်ငံ့စီးပွားမြှင့်တင်ရေး ရန်ပုံငွေဖြင့် သွင်းအားစုများ ထောက်ပံ့ပေးပြီးဖြစ်၍ စိုက်ခင်းများသို့ အပြည့်အဝထည့်သွင်းအသုံးပြုစေရေး၊ အထွက်တိုးစေရေးနှင့် ဆီထွက်သီးနှံနေကြာအား  တိုးချဲ့စိုက်ပျိုးနိုင်ရေးကြိုးစားကြရန်မှာကြားခဲ့သည်။  ဆက်လက်၍ တိုင်းဒေသကြီး ဝန်ကြီးချုပ်သည် တော်တလုတ်ကျေးရွာအုပ်စု၊သုံးခွဆိုင်ကျေးရွာ တောင်သူဦးမင်းထိုက်၏ ငရုစိုက်ခင်း (၀.၅)ဧကအားလည်းကောင်း၊( Super Sun 41)နေကြာ (၄)ဧက စိုက်ခင်းများ၏ ဖြစ်ထွန်းအောင်မြင်နေမှုများကို ကြည့်ရှုအားပေးခဲ့သည်။  ယင်းနောက် တောင်သူဦးသာစိုး၏ ( Super Sun 41)နေကြာ(၃ )ဧက စိုက်ခင်းနှင့် တောင်သူဦးလှစိုး၏ ၊( Super Sun 41)နေကြာ (၃)ဧကတို့၏ ဖြစ်ထွန်းအောင်မြင်နေမှုများအား ကြည့်ရှုအားပေးခဲ့ကာ စားသုံးဆီဖူလုံရေးအတွက်ပိုမိုတိုးချဲ့စိုက်ပျိုးစေရေးမှာကြားခဲ့သည်။ ထို့အတူ တောင်သူဦးဝင်းမြင့်၏ယာမြေ (၂)ဧကနှင့် ဦးကျော်ဝင်း၏ယာမြေ (၁)ဧက၌  Super Sun 41)နေကြာ (၁)လနှင့်( ၅)ရက်သားစိုက်ပျိုးထားရှိမှုအား ကြည့်ရှုအားပေးခဲ့ပြီး ရေနှင့်အစာ အချိန်မီကျွေးစေရေး၊ ပိုးမွှားကျရောက်မှုမရှိစေရေးနှင့် အောင်မြင်ဖြစ်ထွန်းအောင်စိုက်ပျိုးကြစေရေးမှာကြားခဲ့သည်။ ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ကျိုက်လတ်မြို့နယ်၊ ဖောင်ရိုးချောင်းရွာရှိ  ဦးကြည်ခိုင်၏ လယ်မြေ(၁) ဧက၌ ရေဆင်း-၁ စပ်မျိုးနေကြာစိုက်ပျိုးထားရှိ မှုအားလည်းကောင်း၊ မော်ကျွန်းမြို့နယ်၊ ဝဲဒေါင့်ကျေးရွာ၊ တောင်သူဦးရဲမင်းဋ္ဌေး၏ လယ်မြေ (၁.၅)ဧက၌ နေကြာ(ဒေသမျိုး) သီးညှပ်စိုက်ပျိုးထားရှိမှုတို့အား ကြည့်ရှုအားပေးခဲ့ပြီး ရေပေးခြင်းနှင့်အစာကျွေးခြင်းလုပ်ငန်းများစနစ်တကျရှိစေရေးနှင့်အောင်မြင်အောင်စိုက်ပျိုးစေရေးမှာကြားခဲ့သည်။  ထို့နောက် မရဲ့အုန်းပင်စုကျေးရွာအုပ်စု၊ မရဲ့အုန်းပင်စုကျေးရွာရှိ ဘက်စုံအဆင့်မြင့်နည်းပညာသုံး စံပြကျေးရွာ ဧက ၅၀၀ စံပြကွက်သို့သွားရောက်ခဲ့ရာ တိုင်းဒေသကြီး  လယ်ယာမြေစီမံခန့်ခွဲရေးနှင့်စာရင်းအင်းဦး တိုင်းဦးစီးမှူးမှ တောင်သူ ၉၃ဦးတို့၏ နွေစပါး (သီးထပ်ရင်၊ ပုလဲသွယ်၊ နယူးဧရာ၊ ကောက်ညှင်း၊ နှံကောက်ထွန်း) ဘက်စုံအဆင့်မြင့်နည်းပညာသုံး  ဧက ၅၀၀ စံပြကွက် စိုက်ပျိုးထားရှိမှုနှင့် ဒေသခံတောင်သူများမှ နွေစပါးစိုက်ပျိုးပြီးစီးမှုအခြေအနေများရှင်းလင်းတင်ပြရာ တိုင်းဒေသကြီးဝန်ကြီးချုပ်က နိုင်ငံ့စီးပွားမြှင့်တင်ရေး ရန်ပုံငွေဖြင့် သွင်းအားစုများ ထောက်ပံ့ပေးပြီးဖြစ်၍ စိုက်ခင်းများသို့ အပြည့်အဝထည့်သွင်းအသုံးပြုစေရေး၊ အထွက်တိုးစေရေးနှင့် သဘာဝမြေသြဇာ၊ ဇီဝမြေသြဇာနှင့်ဓာတ်မြေသြဇာများအချိုးကျသုံးစွဲစေရေးမှာကြားခဲ့ပြီး ဘက်စုံအဆင့်မြင့်နည်းပညာသုံး  ဧက (၅၀၀) စံပြကွက်အား စပါးခွံ၊ ဖွဲနု၊ ထုံး၊ ယူရီးယား၊ အီးအမ်၊ တင်လဲရည်တို့ဖြင့်အချိုးကျဖော်စပ်ထားသည့်ဘိုကာရှိနှင့် ဓာတ်မြေသြဇာ အချိုးကျပေါင်းစပ်ထားသည့် စုပေါင်းမြေသြဇာကြဲပတ်နေမှုနှင့် တောင်သူ ဦးတင်အောင်သန်း၏ လယ်မြေ ဧက (၁၀၀)၌ နယူးဧရာမျိုးစပါး စိုက်ပျိုးအောင်မြင်မှုများကိုကြည့်ရှုအားပေးခဲ့ကြောင်းသိရသည်။