ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ်ဦးတင်မောင်ဝင်းသည် ဇူလိုင်လ ၃ ရက်နေ့ နံနက်ပိုင်းတွင် တိုင်းဒေသကြီးအစိုးရအဖွဲ့ဝင်များ၊ တိုင်းဒေသကြီး/ခရိုင်နှင့်မြို့နယ်အဆင့်ဌာနဆိုင်ရာများလိုက်ပါလျက်မအူပင်ခရိုင်၊ ညောင်တုန်းမြို့နယ်၊ ဆားမလောက်ကျေးရွာ တောင်သူဦးကျင်လှိုင်၊ ဦးကျော်ဇောလင်း၊ ဦးစန်းဝင်းတို့၏လယ်မြေတွင် ပျိုးဗန်းဖြင့် ပျိုးထောင်ထားသည့်ပျိုးပင်များကို ကောက်စိုက်စက်ဖြင့်စိုက်ပျိုးခြင်း ကွင်းသရုပ်ပြပွဲတက်ရောက်ခဲ့ပြီး ကောက်စိုက်စက်ဖြင့် စိုက်ပျိုးမှုကို ကြည့်ရှုအားပေးခဲ့ကာ ကောက်စိုက်စက်နှင့်စိုက်ပျိုးခြင်းဖြင့် ပျိုးထောင်စရိတ်သက်သာခြင်း၊ အချိန်၊ လုပ်သား၊ သွင်းအားစုများလျော့ချနိုင်ခြင်း၊ ကောက်ကွက်ပြည့်မီ၍ အထွက်နှုန်းကောင်းခြင်းစသည့် အကျိုးကျေးဇူးများရရှိသဖြင့် ကောက်စိုက်စက်ဖြင့်စိုက်ပျိုးခြင်းကို တွင်ကျယ်စွာအသုံးပြုနိုင်ရေးပြောကြားသည်။ ထို့နောက် နည်းပညာပြန့်ပွားရေးစင်တာတွင် တောင်သူများနှင့်တွေ့ဆုံ၍ တိုင်းဒေသကြီးအနေဖြင့် မိုးစပါး၊ နွေစပါးများကိုပန်းတိုင်အထွက်နှုန်းများရရှိစေရေးကြိုးပမ်းဆောင်ရွက်လျက်ရှိပါကြောင်း၊ တောင်သူများအနေဖြင့် အထွက်တိုး မျိုးကောင်းမျိုးသန့်များသုံးစွဲကြရန်၊ စနစ်တကျမြေပြင်ခြင်းလုပ်ငန်းများဆောင်ရွက်ကြရန်၊ သဘာဝမြေသြဇာနှင့် ဓာတ်မြေသြဇာများကို အချိုးကျသုံးစွဲကြရန်၊ မိရိုးဖလာစိုက်ပျိုးနည်းများအပြင် ခေတ်မီစိုက်ပျိုးနည်းစနစ်များ၊ စက်ကိရိယာများအသုံးပြုဆောင်ရွက်ကြရန်မှာကြားခဲ့ပြီး   တစ်ဧက တင်း၁၀၀ ထွက်ရှိရေး ဧက ၁၀၀ စံပြကွက် တောင်သူများသို့ ဓာတ်မြေသြဇာအိတ် ၁၀၀ ပေးအပ်ခဲ့သည်။

ဧရာဝတီတိုင်းဒေသကြီး၊ ပုသိမ်မြို့၊ ဧရာရွေဝါခန်းမ၌ မြန်မာအမျိုးသမီးများနေ့ အကြိုလှုပ်ရှားမှု အထိမ်းအမှတ်အခမ်းအနားအား ဇူလိုင်လ ၂ ရက်နေ့ နံနက်ပိုင်းက ကျင်းပပြုလုပ်ရာ တိုင်းဒေသကြီးဝန်ကြီးချုပ် ဦးတင်မောင်ဝင်းနှင့်ဇနီးဒေါ်ကြည်ကြည်ထွန်း၊  အစိုးရအဖွဲ့ဝင် ဝန်ကြီးများနှင့် ဇနီးများ၊ တိုင်း၊ ခရိုင်၊ မြို့နယ်အဆင့် ဌာနဆိုင်ရာများ၊ မိခင်နှင့်ကလေးစောင့်ရှောက်ရေးအသင်း၊ အမျိုးသမီးရေးရာအဖွဲ့၊ အမျိုးသမီးစီးပွားရေးစွမ်းဆောင်ရှင်များအသင်း၊ အမျိုးသမီးများနှင့် ကလေးသူငယ်များဘဝမြှင့်တင်ရေးအသင်းတို့မှ တာဝန်ရှိသူများနှင့် ဖိတ်ကြားသော ဧည့်သည်တော်များ တက်ရောက်ခဲ့ကြသည်။ ဦးစွာ တိုင်းဒေသကြီး ဝန်ကြီးချုပ်က “ယနေ့ကျင်းပပြုလုပ်သော အခမ်းအနားသည်  မြန်မာအမျိုးသမီးများနေ့ အကြိုလှုပ်ရှားဆောင်ရွက်သည့် အခမ်းအနားဖြစ်ပါကြောင်း၊  ၁၉၉၅ခုနှစ်၊ တရုတ်ပြည်သူ့သမ္မတနိုင်ငံ၊ ဘေဂျင်းမြို့၌ ကျင်းပပြုလုပ်ခဲ့သည့် စတုတ္ထအကြိမ်မြောက် ကမ္ဘာ့အမျိုးသမီးညီလာခံမှ ချမှတ်ခဲ့သည့် ဆုံးဖြတ်ချက်များအရ အမျိုးသမီး များဖွံ့ ဖြိုးတိုးတက်ရေးကိုတက် ကြွစွာဆောင်ရွက်နိုင်ရန်  မြန်မာနိုင်ငံလုံးဆိုင်ရာအမျိုးသမီးရေးရာကော်မတီကို ၁၉၉၆ခုနှစ်၊ ဇူလိုင် ၃ ရက်နေ့တွင် အဖွဲ့ဝင်၂၃ ဦးဖြင့် စတင်ဖွဲ့စည်းခဲ့ပြီး ထိုနေ့ကို မြန်မာနိုင်ငံလုံးဆိုင်ရာ အမျိုးသမီးများနေ့အဖြစ် သတ်မှတ်ခဲ့ပါကြောင်း၊ ယင်းနောက် မြန်မာနိုင်ငံလုံးဆိုင်ရာအမျိုးသမီးရေးရာကော်မတီအမည်ကို မြန်မာနိုင်ငံလုံးဆိုင်ရာအမျိုးသမီးကော်မတီအဖြစ် အမည်ပြောင်းလဲ၍ အစိုးရဌာနများအပြင် အမျိုးသမီးအရေးကို တက်ကြွစွာ လှုပ်ရှားဆောင်ရွက်နေသော အရပ်ဘက်အဖွဲ့အစည်းများထည့်သွင်းပြင်ဆင်ဖွဲ့စည်းခဲ့ပါကြောင်း၊  မြန်မာအမျိုးသမီးတို့သည် မြန်မာနိုင်ငံသမိုင်းဦးအစမှ ယနေ့အထိ ဘာသာ၊သာသနာ၊ ပညာရေး၊ စာပေ၊ အနုပညာ၊ စီးပွားရေးစတဲ့ နိုင်ငံ့အရေးအတွက်အရေးပါတဲ့အခန်းကဏ္ဍများတွင် တစ်တပ်တစ်အားပါဝင်ဆောင်ရွက်ခဲ့ကြပြီး ယနေ့မျက်မှောက်ကာလတွင်  အသိပညာရှင်၊ အတတ်ပညာရှင်များအဖြစ် သက်ဆိုင်ရာကဏ္ဍ အသီးသီးမှာ ပေါ်ထွန်းနေပြီဖြစ်ပါကြောင်း၊ အစဉ်အလာကောင်းများအား ဂုဏ်ယူလက်ဆင့်ကမ်းလျှက် မြန်မာ့လူ့ဘောင်အဖွဲ့အစည်း တည်တံ့ဖွံ့ဖြိုးရေး ကဏ္ဍများတွင် ဆထက်ထမ်းပိုး ပူးပေါင်းပါဝင် ဆောင်ရွက်ကြစေနိုင်ရန်အတွက် ဇူလိုင်လ ၃ရက်နေ့တွင် ကျရောက်မည့် မြန်မာအမျိုးသမီးများအား ကြိုဆိုဂုဏ်ပြုပါကြောင်း”ပြောကြားသည်။ ထို့နောက် ၂၀၂၂ခုနှစ်၊ မြန်မာအမျိုးသမီးများနေ့ အထိမ်းအမှတ် အကြိုလှုပ်ရှားမှုအနေဖြင့် မြန်မာနိုင်ငံတစ်ဝှမ်းလုံးရှိ အိမ်တွင်းမှုသက်မွေးလုပ်ငန်း ပညာသင်ကျောင်းများမှ ဝန်ထမ်း‌စွမ်းဆောင်ရည်မြှင့် ရိုးရာပွဲတက် ဝတ်စုံချုပ်ပြိုင်ပွဲတွင် နှစ်သိမ့်ဆု ရရှိသည့် ဝန်ထမ်း၂ဦးအား တိုင်းဒေသကြီး ဝန်ကြီးချုပ်က ဆုများချီးမြှင့်ပြီး အခမ်းအနားသို့တက်ရောက်လာသော ဧည့်သည်တော်များနှင့်အတူ စုပေါင်းမှတ်တမ်းတင် ဓာတ်ပုံများရိုက်ကူးခဲ့သည်။ ထို့နောက် တိုင်းဒေသကြီးဝန်ကြီးချုပ်နှင့် တာဝန်ရှိသူများသည် အသေးစားစက်မှုလက်မှုဦးစီးဌာနမှ ဆောင်ရွက်သည့် ငှက်ပျောလျှော်၊ ငှက်ပျောချည်ဖြင့်ရက်လုပ်သည့် လူသုံးကုန်ပစ္စည်းများ၊ လူမှုဝန်ထမ်းဦးစီးဌာနမှ ဆောင်ရွက်သည့် ချည်သားဖြင့်ရက်လုပ်သည့် လူသုံးကုန်ပစ္စည်းများနှင့် အမျိုးသမီးရေးရာအဖွဲ့၊ မိခင်နှင့်ကလေးစောင့်ရှောက်ရေးအသင်းတို့မှ ဆောင်ရွက်သည့်စားသောက်ကုန်ပစ္စည်းများ၊ ဗေဒါဖြင့်ရက်လုပ်သည့် လူသုံးကုန်ပစ္စည်းများခင်းကျင်းပြသထားမှုအား လှည့်လည်ကြည့်ရှုအားပေးခဲ့ပြီး ဒေသထွက်ကုန်ကြမ်းများကိုအသုံးပြုပြီးအရည်အသွေးကောင်းမွန်သည့်ကုန်ထုတ်ပစ္စည်းများပိုမိုထုတ်လုပ်နိုင်ရေးနှင့် စျေးကွက်ပိုမိုရရှိစေရေးဆောင်ရွက်ရန်မှာကြားခဲ့ကြောင်းသိရသည်။ ဆက်လက်၍ တိုင်းဒေသကြီးဝန်ကြီးချုပ်သည် တာဝန်ရှိသူများနှင့်အတူ ကမ်းနားလမ်း၊ ပုသိမ်-ငပုတောကားလမ်း၊မြို့ပတ်လမ်းနှင့်တောင်ပေါ်လမ်းများတစ် လျှောက်သို့ သွားရောက်၍ ဧရာဝတီတိုင်းဒေသကြီး၏ မြို့တော် ပုသိမ်မြို့အား “CLEAN CITY” ဖြစ်စေရေးအတွက် စည်ပင်သာရေးအဖွဲ့နှင့် ဌာနဆိုင်ရာ ဝန်ထမ်းများ၊ ပြည်သူများစုပေါင်း၍ အပတ်စဉ် စနေ့နေ့တိုင်း စုပေါင်းသန့်ရှင်းရေး ဆောင်ရွက်နေမှုအား လှည့်လည်ကြည့်ရှုစစ်ဆေးခဲ့ပြီး သန့်ရှင်းရေးဆောင်ရွက်မှုအား အရှိန်အဟုန်မပျက် ဆက်လက်ဆောင်ရွက်ရေး ပလတ်စတစ် ကင်းစင်ရေးအတွက် ပလတ်စတစ်ကမ်ပိန်းများ ပြုလုပ်၍ ပြည်သူများ ပိုမိုပူးပေါင်းဆောင်ရွက်လာစေရေးတို့အား လမ်းညွှန်မှာကြားခဲ့ကြောင်းသိရသည်။

ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ်ဦးတင်မောင်ဝင်းသည် ဇူလိုင်လ ၁ ရက်နေ့ နေ့လည်ပိုင်းတွင် တိုင်းဒေသကြီး အစိုးရအဖွဲ့ဝင် ဝန်ကြီးများ၊  တိုင်း၊ ခရိုင်၊ မြို့နယ်ဌာနဆိုင်ရာများလိုက်ပါလျက် ဟင်္သာတမြို့နယ်၊ မြို့ကွင်းကျေးရွာရှိ တောင်သူ ဦးကြည်ရွှေ၏ လယ်မြေ (၂)ဧကတွင် တစ်နှစ်လျှင် (စပါး၊ ပဲ ၊ နေကြာ)သုံးသီး စိုက်ပျိုးနိုင်ရေး မိုးစပါးမစိုက်မီ ရက် (၈၀)သက်တမ်းနေကြာ (ဆင်းရွှေကြာ-၂) စိုက်ပျိုးဖြစ်ထွန်းပြီးအချိန်မီရိတ်သိမ်းနိုင်မှုအား ကြည့်ရှုအားပေးခဲ့ကာ စနစ်တကျစိုက်ပျိုးနိုင်ရေး၊ ရာသီဥတုနှင့်ကိုက်ညီစွာ စိုက်ပျိုးနိုင်ရေးနှင့် တစ်နှစ်သုံးသီးစိုက်ပျိုးခြင်းကို ပိုမိုဖြစ်ထွန်းအောင်မြင်ဆောင်ရွက်ရေး မှာကြားခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် လေးမျက်နှာမြို့နယ်၊ ငဝန်တာ၊ တာမိုင် ၂၅/၅ မိုင်တွင် ဟင်္သာတခရိုင်၊ ဆည်းမြောင်းနှင့်ရေအသုံးချမှုစီမံခန့်ခွဲရေးဦးစီးဌာနမှ ဆောင်ရွက်သည့် ရေဘေးကာကွယ်ရေးသရုပ်ပြပွဲနှင့် ဇာတ်တိုက်လေ့ကျင့်ခြင်းအခမ်းအနားတက်ရောက်၍ တိုင်းဒေသကြီးဝန်ကြီးချုပ်မှ  မိုးရာသီမြစ်ရေမြင့်တက်မှုကြောင့် ဖြစ်ပေါ်လာမည့်ရေဘေးအန္တရာယ်များကို ကြိုတင်ကာကွယ်နိုင်ရန်အတွက်ရေဘေးကာကွယ်ရေးအစီအမံများစနစ်တကျရေးဆွဲဆောင်ရွက်လျက်ရှိပါကြောင်း၊ တာတမံများကိုလည်း အကြိမ်ကြိမ်ပြုပြင်မွမ်းမံတည်ဆောက်ခဲ့ပြီး ယခုအခါ ပိုမို ကြံ့ခိုင်အောင်ဆောင်ရွက်ပေးလျက်ရှိပါကြောင်း၊ သဘာဝဘေးအန္တရာယ်ကာကွယ်ရေးလုပ်ငန်းများကို စီမံချက်များရေဆွဲဆောင်ရွက်သည့်အပြင် လက်တွေ့ ဇာတ်တိုက်လေ့ကျင့်မှုများဆောင်ရွက်ပြီး လိုအပ်မှုများဖြည့်ဆည်းဆောင်ရွက်ရန်လိုပါကြောင်း၊ မြစ်ရေမြင့်တက်လာပြီး စိုးရိမ်ရေမှတ်သို့ရောက်ရှိပါက အရေးပေါ်အခြေအနေအဆင့် ၁ ဖြစ်သတ်မှတ်၍ ရေဘေးကာကွယ်ရေးတာတမံများ၏ အရေးပေါ်အခြေအနေ ကြိုတင်စီမံခန့်ခွဲမှုအစီအစဉ်အရ လွှင့်ထူရမည့် သတိပေးအချက်ပြအလံအစိမ်းရောင်၊ စိုးရိမ်ရေမှတ်အထက်ကျော်လွန်မြင့်တက်လျက်ရှိပါက အလံအဝါရောင်နှင့် မြစ်ရေအမှတ်မှာ ဆက်လက်မြင့်တက်လာပြီး တာတမံကိုယ်ထည်ပေါ်ရေကျော်လာ၍ တာတမံကျိုးပေါက်နိုင်မည့်အခြေအနေရှိပါ အလံအနီရောင်လွှင့်ထူဆောင်ရွက်ရမည့် အခြေအနေများ သိရှိနားလည်ထားကြရန်၊ သဘာဝဘေးအန္တရာယ်များကို အချိန်မီကြိုတင်ကာကွယ်နိုင်ရန်အတွက် တာတမံများတာဝန်ချထားသည့်ရေကင်းအဖွဲ့များ၊ ဌာနဆိုင်ရာကြီးကြပ်ရေးအဖွဲ့များ၊ ဒေသခံပြည်သူများက ရေဘေးကာကွယ်ရေးနည်းလမ်းများအတိုင်း ဂရုတစိုက်စောင့်ကြည့်ကြရန်၊ ထူးခြားမှုရှိပါကသတင်းပေးပို့ခြင်းလုပ်ငန်းများကို မြန်ဆန်မှန်ကန်စွာ တက်ညီလက်ညီပူး ပေါင်းဆောင်ရွက်ကြရန်ပြောကြားခဲ့သည်။ ဆက်လက်၍ ဟင်္သာတခရိုင် ဆည်းမြောင်းနှင့်ရေအသုံးချမှုစီမံခန့်ခွဲရေးဦးစီးဌာနမှူးမှ ခရိုင်အတွင်း ရေဘေးကာကွယ်ရေးလုပ်ငန်းများဆောင်ရွက်ထားရှိမှုများနှင့် ဇာတ်တိုက်လေ့ကျင့်မှု ဆောင်ရွက်ခြင်းများကိုရှင်းလင်းတင်ပြခဲ့ပါတယ်။ ထို့နောက်တိုင်းဒေသကြီးဝန်ကြီးချုပ်မှ ရပ်ကွက်အုပ်ချုပ်ရေးမှူးများအား ရေဘေးကာကွယ်ရေးတာတမံများ၏ အရေးပေါ်အခြေအနေ ကြိုတင်စီမံခန့်ခွဲမှုအစီအစဉ်အရ လွှင့်ထူရမည့် သတိပေးအချက်ပြအလံများပေးအပ်ခဲ့သည်။ ထို့နောက် ဟင်္သာတခရိုင် ဆည်းမြောင်းနှင့်ရေအသုံးချမှုစီမံခန့်ခွဲရေးဦးစီးဌာန၊ လက်ထောက်ညွှန်ကြားရေးမှူးမှတာတမံကိုယ်ထည်ရေစိမ့်ထွက်ခြင်းနှင့် ရေပေါက်များဖြစ်ပေါ်ခြင်း၊ ကမ်းပြိုခြင်း၊ လှိုင်းပုတ်ခြင်းတို့အတွက်  ကာကွယ်ဆောင်ရွက်ရမည့်အခြေအနေများကို ရေဘေး ကာကွယ်ရေးလက်တွေ့သရုပ်ပြရှင်းလင်းတင်ပြခြင်းနှင့် ရေဘေးကာကွယ်ရေးတာတမံများ၏ အရေးပေါ်အခြေအနေကြိုတင်စီမံခန့်ခွဲမှုအစီအစဉ် ဇာတ်တိုက်လေ့ကျင့်မှုများကိုကြည့်ရှုအားပေးခဲ့ပြီးနောက် ရေဘေးကာကွယ်ရေးသရုပ်ပြပွဲနှင့် ဇာတ်တိုက်လေ့ကျင့်ရေးအဖွဲ့များနှင့် စုပေါင်းမှတ်တမ်းဓာတ်ပုံများရိုက်ကူးခဲ့ကြသည်။

ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ်ဦးတင်မောင်ဝင်းသည် ယနေ့ နေ့လည်ပိုင်းတွင် တိုင်းဒေသကြီး အစိုးရအဖွဲ့ဝင် ဝန်ကြီးများ၊  တိုင်း၊ ခရိုင်၊ မြို့နယ်ဌာနဆိုင်ရာများလိုက်ပါလျက် မြန်အောင်မြို့၊ အားကစားခန်းမတွင် ကျင်းပပြုလုပ်သည့် မိုးရာသီနေကြာ မျိုးစေ့ထုတ်စိုက်ပျိုးသည့် တောင်သူများနှင့်တွေ့ဆုံပွဲတက်ရောက်ခဲ့ပြီး တိုင်းဒေသကြီးအနေဖြင့် စားသုံးဆီဖူလုံစေရေးဆောင် ရွက်လျက်ရှိရာ၍ မိုးရာသီနေကြာ မျိုးစေ့ထုတ်ဧက ၃၀၀၀ ကို ဇွန်လ ၁ ရက်နေ့မှစတင်စိုက်ပျိုးခဲ့ပြီး ၂၅ ရက်နေ့တွင် ထွန်တုံးပိတ်စိုက်ပျိုးခဲ့ပြီးဖြစ်ပါကြောင်း၊ နေကြာစိုက်ပျိုးခြင်းလုပ်ငန်းများအောင်မြင်စေရေး စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနနှင့် မိမိတို့အစိုးရအဖွဲ့အနေဖြင့် တောင်သူများအတွက် လိုအပ်သည့်ထောက်ပံ့မှုများဆောင်ရွက်ပေးလျက်ရှိပါကြောင်း၊ မိုးနေကြာများတွင် ပေါင်းရှင်းခြင်း၊ ပင်ပွားဖယ်ခြင်း၊ ပိုးမွှားကျရောက်မှုများမှကာကွယ်ခြင်းလုပ်ငန်းများကိုစနစ်တကျလုပ်ကိုင်ဆောင်ရွက်ကြရန်လိုပါကြောင်း၊ မိုးနေကြာဖြစ်ထွန်းအောင်မြင်စေရေး  တောင်သူများ၊ ဌာနဆိုင်ရာများ၊ စိုက်ပျိုးရေးထုတ်လုပ်မှုတိုးတက်မြင့်မားရေးကြီးကြပ်မှုကော်မတီမှ ပူးပေါင်းဆောင်ရွက်ကြရန်ပြောကြားခဲ့ပါတယ်။  ဆက်လက်၍ ခရိုင်စိုက်ပျိုးရေးဦးစီးဌာနမှူးမှ မိုးရာသီနေကြာ မျိုးစေ့ထုတ်စိုက်ပျိုးဆောက်ရွက်နေမှုများအားရှင်းလင်းတင်ပြခဲ့ပြီးနောက် တိုင်းဒေသကြီးဝန်ကြီးချုပ်မှ မြန်အောင်မြို့နယ်ရှိ မိုးရာသီနေကြာ မျိုးစေ့ထုတ်စိုက်ပျိုးသည့်တောင်သူများအတွက် ဓာတ်မြေသြဇာ အိတ် ၁၃၀၀ ကို ထောက်ပံ့ပေးအပ်ခဲ့ပြီး ဒေသခံတောင်သူတစ်ဦးမှ ကျေးဇူးတင်စကားပြန်လည်ပြောကြားခဲ့သည်။ ထို့နောက် မြန်အောင်မြို့နယ်၊ ကဇွန်းခုံကျေးရွာ၊ မိုးရာသီနေကြာ မျိုးစေ့ထုတ်စံပြ(၅)ဧက စိုက်ခင်းရှိ တောင်သူဦးစိန်ကြည်ပါ (၂)ဦး၏ မိုးရာသီနေကြာ မျိုးစေ့ထုတ်စိုက်ခင်းနှင့် ဘုရားငုတ္တိုကျေးရွာ၊ တောင်သူဦးအောင်မြင့်စိန်၏ မိုးရာသီနေကြာ မျိုးစေ့ထုတ်စိုက်ခင်းများ ဖြစ်ထွန်းအောင်မြင်မှုများကို ကြည့်ရှုအားပေးခဲ့သည်။

ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ် ဦးတင်မောင်ဝင်းသည် ဇူလိုင်လ ၁ ရက်နေ့ နံနက်ပိုင်းတွင် တိုင်းဒေသကြီးအစိုးရအဖွဲ့ဝင် ဝန်ကြီးများ၊  တိုင်း၊ ခရိုင်၊ မြို့နယ်ဌာနဆိုင်ရာများလိုက်ပါလျက် ကျုံပျော်ခရိုင်အထွေထွေအုပ်ချုပ်ရေးဦးစီးဌာနရုံးဖွင့်ပွဲတက်ရောက်၍  တိုင်းဒေသကြီးဝန်ကြီးချုပ်၊ လုံခြုံရေးနှင့်နယ်စပ်ရေးရာဝန်ကြီး၊ အစိုးရအဖွဲ့အတွင်းရေးမှူးတို့မှ အခမ်းအနားကို ဖဲကြိုးဖြတ်ဖွင့်လှစ်ပေးခဲ့ကြပြီး ခရိုင်အထွေထွေအုပ်ချုပ်ရေးဦစီးဌာနဆိုင်းဘုတ်ကို စက်ခလုပ်နှိပ်ဖွင့်လှစ်ပေးခဲ့ကာ အမွှေးနံ့သာရည်များပတ်ဖြန်းပေးခဲ့ကြသည်။ ထို့နောက် ခရိုင်အထွေထွေအုပ်ချုပ်ရေးဦးစီးဌာနရုံးအားလှည့်လည်ကြည့်ရှုစစ်ဆေးခဲ့သည်။ ထို့အတူ တိုင်းဒေသကြီးဝန်ကြီးချုပ်နှင့်အဖွဲ့သည် မြန်အောင်ခရိုင်အထွေထွေအုပ်ချုပ်ရေးဦးစီးဌာနရုံးဖွင့်ပွဲတက်ရောက်၍ အခမ်းအနားကို ဖဲကြိုးဖြတ် ဖွင့်လှစ်ပေးခဲ့ကြပြီး ခရိုင်အထွေထွေအုပ်ချုပ်ရေးဦးစီးဌာနဆိုင်းဘုတ်ကို စက်ခလုပ်နှိပ်ဖွင့်လှစ်၍ အမွှေးနံ့သာရည်များပတ်ဖြန်းပေးခဲ့ကာ ခရိုင်အထွေထွေအုပ်ချုပ်ရေးဦးစီးဌာနရုံးအား လှည့်လည်ကြည့်ရှုစစ်ဆေးခဲ့သည်။အဆိုပါ ရုံးဖွင့်ပွဲများတွင် တိုင်းဒေသကြီးဝန်ကြီးချုပ်မှ ရုံးပတ်ဝန်းကျင်သန့်ရှင်းသာယာလှပစေရေး၊ ရုံးလုပ်ငန်းများစနစ်တကျဆောင်ရွက်စေရေး၊ ရုံးသုံးပစ္စည်းများ၊ ပရိဘောပများ စည်းကမ်းတကျကိုင်တွယ်အသုံးပြုစေရေး မှာကြားခဲ့သည်။