ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ် ဦးတင်မောင်ဝင်းသည် ဇူလိုင်လ (၃)ရက်နေ့ နေ့လည်ပိုင်းတွင် တိုင်းဒေသကြီးအစိုးရအဖွဲ့ဝင်များ၊ တိုင်း၊ ခရိုင်၊ မြို့နယ်ဌာနဆိုင်ရာများ လိုက်ပါလျက် ဟင်္သာတခရိုင်အတွင်းရှိ ရာဘာစိုက်ပျိုးထုတ်လုပ်မှု၊ ပီလောပီနံစိုက်ပျိုး ထုတ်လုပ်မှု အခြေအနေများကြည့်ရှုစစ်ဆေးခဲ့သည်။  ဦးစွာ တိုင်းဒေသကြီးဝန်ကြီးချုပ်သည် လေးမျက်နှာမြို့နယ်၊ လှော်ကထားကျေးရွာအုပ်စုရှိ တိုးတက် ကုမ္ပဏီရာဘာခြံသို့သွားရောက်၍ ရာဘာစိုက်တောင်သူများနှင့်တွေ့ဆုံခဲ့ကာ ရာဘာစိုက်ခြင်း၊ အစေးခြစ်ခြင်းနှင့် ရာဘာကုန်ကြမ်း ထုတ်လုပ်မှု အဆင့်ဆင့်တို့အားမေးမြန်းခဲ့ပြီး ကုမ္ပဏီမှ တာဝန်ရှိသူများက ရာဘာစိုက်ပျိုး ထားရှိမှု၊ ရာဘာပြားများထုတ်လုပ်မှုနှင့် ရောင်းချနေမှု အခြေအနေများရှင်လင်းတင်ပြမှုအပေါ် တိုင်းဒေသကြီးဝန်ကြီးချုပ်က စိုက်ဧကများအပြည့်အဝ စိုက်ပျိုးစေနိုင်ရေး၊ ဖြစ်ထွန်းအောင်မြင် အောင်စိုက်ပျိုးရေး၊ ကုန်ကြမ်းအရည်အသွေးများပြည့်မီစေရေး၊  ကုန်ကြမ်းများမှကုန်ချော ထုတ်လုပ်နိုင်သည်အထိနည်းလမ်းများရှာဖွေ၍ ပူးပေါင်းဆောင်ရွက်ကြစေရေး၊ တန်ဖိုးမြင့် ထုတ်ကုန်များထုတ်လုပ်နိုင်ရေးဆောင်ရွက်ရန်နှင့် မိမိတို့အနေဖြင့်လည်း လိုအပ်သည်များ ပူးပေါင်းဆောင်ရွက်ပေးသွားမှာဖြစ်ကြောင်းပြောကြားခဲ့ပြီး ရာဘာစိုက်ပျိုးထားရှိမှု၊ အစေးခြစ် နိုင်ရေးကြိုတင်ပြင်ဆင်ဆောင်ရွက်ထားရှိမှုနှင့် ကုန်ကြမ်းထုတ်လုပ်မှုများအား ကြည့်ရှု စစ်ဆေးခဲ့သည်။ လေးမျက်နှာမြို့နယ်အနေဖြင့် ရာဘာ (၃၆၀၀) ဧက စိုက်ပျိုးထားရာ (BPM 24) ရာဘာမျိုးအား အဓိကထားစိုက်ပျိုးထားရှိပြီး (RSS -1) အဆင့် ရာဘာပြားများနှင့် (RSS -3) အဆင့်ရာဘာပြားများ ထုတ်လုပ်ကာရန်ကုန်ဈေးကွက် သို့ပို့ဆောင်လျက် ရှိကြောင်းသိရသည်။ ထို့နောက် ဘောတလင်းကျေးရွာ၊ တောင်သူဦးမိုးနိုင်ဦး၏ ယာမြေ (၁၅) ဧကတွင် နိုင်ငံ့စီးပွားမြှင့်တင်ရေး ရန်ပုံငွေဖြင့်ဆောင်ရွက်သည့် ပီလောပီနံ(ကိုင်းရှုတ်မျိုး) စိုက်ပျိုးထားရှိမှု အားကြည့်ရှုအားပေးခဲ့ပြီး တောင်သူများနှင့်တွေ့ဆုံ၍ ပီလောပီနံစိုက်ပျိုးထုတ်လုပ် ရောင်းချမှုနှင့် စွန့်ပစ်ပစ္စည်းများအား တိရစ္ဆာန်အစာအဖြစ်အသုံးပြုရောင်းချမှု အခြေအနေများ ရှင်းလင်းတင်ပြ မှုအပေါ် တိုင်းဒေသကြီးဝန်ကြီးချုပ်မှ အထွက်တိုးမျိုးများစိုက်ပျိုးစေရေး၊ စိုက်နည်းတကျ စိုက်ပျိုးစေရေးနှင့်ပိုမိုတိုးချဲ့စိုက်ပျိုးစေရေး၊ သမအသင်းများအနေဖြင့်တစ်ဧကအထွက်တိုးစေရေး ဆောင်ရွက်ကြရန်နှင့် ကုန်ကြမ်းထုတ်လုပ်မှုမှ တန်ဖိုးမြင့်ထုတ်ကုန်များ ထုတ်လုပ်နိုင်စေရေး မှာကြားခဲ့သည်။ ထို့အတူ ဆိတ်ချီးပင်ကျေးရွာ တောင်သူဦးသန်းမြင့်၏ ယာမြေ (၅)ဧကတွင် ပီလောပီနံ(Rayone-9)မျိုးသန့်စိုက်ခင်းအားကြည့်အားပေးခဲ့ပြီး မျိုးကောင်းမျိုးသန့်များ၊ အထွက်တိုးမျိုးများကျယ်ကျယ်ပြန့်ပြန့်အသုံးပြုစေရေးမှာကြားခဲ့သည်။ ထို့နောက် ဟင်္သာတ မြို့နယ်၊ ယုန်သလင်းကျေးရွာ၊ တောင်သူဦးမျိုးဇော်လင်း၏ ယာမြေ (၁၅)ဧကတွင် ပီလောပီနံ(ကိုင်းရှုတ်မျိုး) စိုက်ပျိုးထားရှိမှုအား ကြည့်ရှုအားပေးခဲ့ပြီး အောင်မြင်အောင်စိုက်ပျိုး စေရေးမှာကြားခဲ့သည်။ ထို့နောက် မဒေါ့တလုတ်ကုန်းကျေးရွာ၊ ဒေါ်လွင်လွင်မိုး၏ ဝက်မွေးမြူရေးခြံသို့သွားရောက်၍ နိုင်ငံ့စီပွားမြှင့်တင်ရေးရန်ပုံငွေဖြင့် အသားတိုးဝက်မွေးမြူ ထားရှိမှုအားကြည့်ရှုစစ်ဆေးခဲ့ပြီး ဈေးကွက်တင်ပို့မှုအခြေအနေများမေးမြန်းခဲ့ကာ စနစ်တကျ မွေးမြူ၍ ပိုမိုတိုးတက်မွေးမြူနိုင်စေရေးမှာကြားခဲ့သည်။ ဆက်လက်၍ တိုင်းဒေသကြီး ဝန်ကြီးချုပ်နှင့်အဖွဲ့သည် ကျောင်းကွင်းကျေးရွာရှိ တောင်သူဦးသက်နိုင်၏ လယ်မြေ (၁၀)ဧက တွင် နိုင်ငံ့စီးပွားမြှင့်တင်ရေးရန်ပုံငွေဖြင့်ဆောင်ရွက်သည့်ဆင်းသုခ(RS)မျိုးသန့် မျိုးစပါးများအား စနစ်တကျစိုက်ပျိုးနေမှုများကိုကြည့်ရှုအားပေးခဲ့ပြီး တစ်ဧက (၁၀) တင်းပိုမိုထွက်ရှိစေရေး၊ သဘာဝမြေဩဇာ၊ ဇီဝမြေဩဇာများပိုမိုသုံးစွဲစေရေးနှင့် နိုင်ငံ့စီးပွားမြှင့်တင်ရေးရန်ပုံငွေ ထောက်ပံ့ဆောင်ရွက်ပေးထားပြီးဖြစ်၍ ပိုမိုအောင်မြင်အောင်ဆောင်ရွက်နိုင်စေရေးမှာကြား ခဲ့သည်။ ထို့နောက် ဟင်္သာတမြို့၊ ပန်းပဲတမ်းရပ်ကွက်၊ နတ်မော်လမ်းရှိ ထွန်းအင်အား မွေးမြူရေးအစာတောင့်စက်ရုံသို့သွားရောက်၍ မွေးမြူရေးအစာတောင့်နှင့် အစာမှုန့်ထုတ်လုပ် နေမှုအခြေအနေများအားကြည့်ရှုစစ်ဆေးခဲ့ပြီး စက်ရုံပိုင်ရှင်မှအစာတောင့်နှင့်အစာမှုန့် ထုတ်လုပ်မှု၊ ဒေသထွက်ကုန်ကြမ်းများဝယ်ယူသုံးစွဲမှု၊ ဈေးကွက်အတွင်း ဖြန့်ဖြူးရောင်းချမှု အခြေအနေများရှင်းလင်းတင်ပြရာ တိုင်းဒေသကြီး ဝန်ကြီးချုပ်မှ ဒေသထွက်ကုန်ကြမ်းများဖြင့် တိရစ္ဆာန်အစားအစာများပိုမိုထုတ်လုပ်နိုင်ရေး၊ အရည်အသွေးကောင်းမွန်ပြီးဈေးနှုန်းချိုသာစွာဖြင့် ဖြန့်ဖြူးပေးနိုင်ရေး မှာကြားခဲ့သည်။ အဆိုပါ ထွန်းအင်အား မွေးမြူရေးအစာတောင့်စက်ရုံမှ ဒေသထွက် ကုန်ကြမ်းများဖြင့် တစ်ရက်လျှင် အစာတောင့်(၂)တန်၊ အစာမှုန့်(၅)တန်ထုတ်လုပ် လျှက်ရှိပြီး ဒေသတွင်းအစာတောင့်များထုတ်လုပ်ဖြန့်ဖြူးနိုင်ပါက မွေးမြူရေးသမားများ အနေဖြင့် အစာကုန်ကျစရိတ်များလျော့ချနိုင်ပြီး မွေးမြူရေးထွက်ကုန်များလည်းဈေးကျဆင်း လာကာ ကုန်ဈေးနှုန်းကျဆင်းလာနိုင်မည်ဖြစ်၍ အရည်အသွေးပြည့်မီသည့်အစာတောင့်များ ပိုမိုထုတ်လုပ်နိုင်ရေးနှင့် ဈေးကွက်ချဲ့ထွင်နိုင်ရေး ဆောင်ရွက်လျက်ရှိကြောင်းသိရသည်။

ပုသိမ်မြို့၊ ဧရာရွှေခန်းမ၌ ပြုလုပ်သည့် မြန်မာအမျိုးသမီးများနေ့အခမ်းအနားအား တိုင်းဒေသကြီး ဝန်ကြီးချုပ်နှင့်ဇနီး၊  အနောက်တောင်တိုင်းစစ်ဌာနချုပ် တိုင်းမှူးနှင့်ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ တိုင်းဒေသကြီး အစိုးရအဖွဲ့ဝင် ဝန်ကြီးများနှင့် ၎င်းတို့၏ဇနီးများ၊ဌာနဆိုင်ရာများ၊ အမျိုးသမီးရေးရာအဖွဲ့၊ မိခင်နှင့်ကလေးစောင့်ရှောက်မှုကြီးကြပ်ရေးအဖွဲ့၊ တိုင်းဒေသကြီးအတွင်း အမျိုးသမီးများအရေးဆောင်ရွက်ပေးနေကြသည့် အဖွဲ့များမှကိုယ်စားလှယ်များတက်ရောက်ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်က “ ယနေ့ဇူလိုင်လ (၃)ရက်နေ့သည် မြန်မာနိုင်ငံဒေသအသီးသီး၌ နေထိုင်ကြသည့် မြန်မာအမျိုးသမီးများ အားလုံးအတွက် ထူးခြားလေးနက်သည့် မြန်မာအမျိုးသမီးများနေ့ ဖြစ်ပါကြောင်း၊ ယခုလိုနေ့ထူးနေ့မြတ်ဖြစ်သည့် မြန်မာအမျိုးသမီးများနေ့၌ မြန်မာအမျိုးသမီးများအားလုံးကို လှိုက်လှိုက်လှဲလှဲ ဂုဏ်ပြုပါကြောင်း၊ မြန်မာနိုင်ငံလုံးဆိုင်ရာ အမျိုးသမီးရေးရာကော်မတီကို ၁၉၉၆ခုနှစ်၊ ဇူလိုင်လ(၃)ရက်နေ့တွင် ဖွဲ့စည်းခဲ့ပြီး အဆိုပါနေ့ကို နိုင်ငံတော်က မြန်မာအမျိုးသမီးများနေ့အဖြစ် သတ်မှတ်ခဲ့ခြင်းဖြစ်ပါကြောင်း၊ မြန်မာ့သမိုင်းစဉ်တစ်လျှောက်ကို ပြန်ကြည့်ပါက  ကိုလိုနီခေတ်လွတ်လပ်ရေးကြိုးပမ်းမှု ကာလများတွင်  အမျိုးသားများနှင့် ရင်ပေါင်တန်း တိုက်ပွဲဝင်ခဲ့ကြသည့် အမျိုးသမီးသူရဲကောင်းများစွာ ရှိခဲ့ကြသကဲ့သို့  ခေတ်အဆက်ဆက်မှာလည်း နိုင်ငံရေး၊ စီးပွားရေး၊ လူမှုရေးနယ်ပယ်များနဲ့ အသိပညာအတတ်ပညာ အနုပညာဆိုင်ရာနယ်ပယ်များမှာ ထူးချွန်ထက်မြက်တဲ့မြန်မာအမျိုးသမီးများ ပေါ်ထွက်ခဲ့ပါကြောင်း၊ မျက်မှောက်ကာလမှာလည်း မြန်မာအမျိုးသမီးများသည် အမျိုးသားများနှင့် ရင်ပေါင်တန်းကာ နယ်ပယ်အသီးသီးမှာ ပါဝင်လျက်ရှိကြပါကြောင်း၊ မြန်မာနိုင်ငံတွင်ရှိသည့် အမျိုးသမီးများသည် အိမ်ထောင်စုတစ်ခု၏ ပဲ့ကိုင်ရှင်များဖြစ်သလို နိုင်ငံတော်ရဲ့ အင်အားစုတစ်ရပ်လည်း ဖြစ်ပါကြောင်း၊ ယခုလို ကဏ္ဍစုံမှာ အမျိုးသမီးများအနေဖြင့် အမျိုးသားများနှင့်တန်းတူ ရင်ပေါင်တန်း ပါဝင်ဆောင်ရွက်လာနိုင်စေဖို့ အမျိုးသမီးများ ဖွံ့ဖြိုးတိုးတက်ရေးနှင့် စွမ်းဆောင်ရည်မြှင့်တင်ရေးဆိုင်ရာ လုပ်ငန်းများကို အကောင်အထည်ဖော် ဆောင်ရွက်လျက်ရှိသလို အမျိုးသမီးများအနေဖြင့် အရည်အချင်း၊ အရည်အသွေးပြည့်ဝရေး၊ အသိပညာဖွံ့ဖြိုးရေး၊ ဗဟုသုတလေ့လာပြည့်စုံရေးကို ကြိုးစားအားထုတ်ရမှာ ဖြစ်ပါကြောင်း၊ ကျား၊ မ  တန်းတူညီမျှမှုရှိရန်နှင့် မြန်မာအမျိုးသမီးများ၏ အခွင့်အရေးများကိုပိုမိုမြှင့်တင်ကာကွယ်စောင့်ရှောက်နိုင်ရန်အတွက် နိုင်ငံတော်အနေဖြင့် ဘက်ပေါင်းစုံက တတ်နိုင်သရွေ့ ကြိုးပမ်းဆောင်ရွက်လျက်ရှိသကဲ့သို့ အမျိုးသမီးထုကြီးနှင့် အဖွဲ့အစည်းများကလည်း သက်ဆိုင်ရာ ကဏ္ဍအသီးသီးကနေ ဝိုင်းဝန်းပူးပေါင်းဆောင်ရွက်ပေးကြရန်  တိုက်တွန်းလိုပါကြောင်း”အဖွင့်အမှာစကားပြောကြားသည်။ ယင်းနောက် တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် မြန်မာအမျိုးသမီးများနေ့ အထိမ်းအမှတ် Video Clip ပြသမှုအား ကြည့်ရှုအားပေးသည်။ ဆက်လက်၍  အရှေ့တောင်အာရှအားကစားပြိုင်ပွဲ ရိုးရာခြင်းပြိုင်ပွဲ ရွှေတံဆိပ်ဆု၊ ငွေတံဆိပ်ဆု၊ ၂၀၂၃ ပညာသင်နှစ်၊ တက္ကသိုလ်ဝင်စာမေးပွဲတွင် ဝိဇ္ဇာတွဲဘာသာဖြင့် တစ်နိုင်ငံလုံးအဆင့်(၁)၊ အပြည်ပြည်ဆိုင်ရာဆန်စပါးသုတေသနထူးချွန်ဆု၊  ကျောင်းအုပ်စီမံခန့်ခွဲမှုထူးချွန်ဆု၊ မြန်မာအမျိုးသမီးများ နေ့အထိမ်းအမှတ် စာစီစာကုံး ဒုတိယဆု(နေပြည်တော်) အစရှိသည့် နယ်ပယ်အသီးသီးမှ  ထူးချွန်ဆုရ အမျိုးသမီးငယ်များနှင့် အမျိုးသမီးများအား တိုင်းဒေသကြီး ဝန်ကြီးချုပ်ကလည်းကောင်း၊ ဗဟိုအဆင့်အဆို၊အက၊အရေး၊အတီး ပြိုင်ပွဲရွှေတံဆိပ်ဆု၊ ငွေတံဆိပ်ဆု၊ အရှေ့တောင်အာရှအားကစားပြိုင်ပွဲ ရိုးရာခြင်းပြိုင်ပွဲ ရွှေတံဆိပ်ဆု၊ လူမှုထူးချွန်ဆု (ဒုတိယအဆင့်၊အားကစား)၊ ၂၀၂၂-၂၀၂၃ ပညာသင်နှစ် လူရည်ချွန်ဆု၊ ကမ္ဘာ့ဆရာများနေ့ ဆောင်းပါးပြိုင်ပွဲ ဗဟိုအဆင့် ပထမဆု၊ အပြည်ပြည်ဆိုင်ရာမူးယစ်ဆေးဝါးအလွဲသုံးမှုနှင့် တရားမဝင်ရောင်းဝယ်မှု တိုက်ဖျက်ရေးနေ့ ဝတ္ထုတိုပြိုင်ပွဲ နိုင်ငံ တော်အဆင့်အထူးဆုရရှိသူများအား တိုင်းဒေသကြီး ဝန်ကြီးချုပ်၏ ဇနီးကလည်းကောင်း၊ အရှေ့တောင်အာရှအားကစားပြိုင်ပွဲ အလေးမပြိုင်ပွဲ ရွှေတံဆိပ်ဆု၊ ပညာရည်ချွန်ဆု( Japan Science Technology)၊ အဆို၊အက၊‌အရေး၊အတီး(ဒုတိယ)ဆု၊ အရှေ့တောင်အာရှအားကစားပြိုင်ပွဲ  ဘောလုံးပြိုင်ပွဲ ငွေတံဆိပ်ဆု၊ ဗဟိုအဆင့်အဆို၊အက၊‌အရေး၊အတီး(တတိယ)ဆု ရရှိသူများအား အနောက်တောင်တိုင်းစစ်ဌာနချုပ် တိုင်းမှူးကလည်းကောင်း၊ အရှေ့တောင်အာရှအားကစားပြိုင်ပွဲ ပိုက်ကျော်ခြင်းပြိုင်ပွဲ ရွှေတံဆိပ်ဆု၊ နိုင်ငံတော်အဆင့် လူရည်ချွန်၊ အရှေ့တောင်အာရှအားကစားပြိုင်ပွဲ လှေလှော်ပြိုင်ပွဲ ငွေတံဆိပ်ဆုရရှိသူများအား တိုင်းမှူး၏ ဇနီးကလည်းကောင်း၊ အရှေ့တောင်အာရှအားကစားပြိုင်ပွဲ ဗိုဗီနမ်ပြိုင်ပွဲတွင် တတိယဆုရရှိသူများအား ပုသိမ်လေတပ်စခန်းဌာနချုပ်မှူးကလည်းကောင်း၊ အရှေ့တောင်အာရှအားကစားပြိုင်ပွဲ လှေလှော်ပြိုင်ပွဲနှင့် ပြေးခုန်ပစ်ပြိုင်ပွဲတွင် ငွေတံဆိပ်ဆုရရှိသူများအား  ပုသိမ်လေတပ်စခန်းဌာနချုပ်မှူး၏ ဇနီးကလည်းကောင်း ဧရာဝတီတိုင်းဒေသကြီးအတွင်းရှိ နယ်ပယ်ကဏ္ဍပေါင်းစုံတွင် ထူးချွန်စွာ စွမ်းဆောင်နိုင်ခဲ့သည့် အမျိုးသမီးများအား အသီးသီးဆုများချီးမြှင့်ခဲ့ကြပြီး ထူးချွန်ဆုရရှိသူများနှင့်အတူ စုပေါင်းမှတ်တမ်းတင် ဓာတ်ပုံများရိုက်ကူးခဲ့ပြီး တိုင်းဒေသကြီး ဝန်ကြီးချုပ်နှင့် ဧည့်သည်တော်များသည် အမျိုးသမီးများ၏ စွမ်းဆောက်မှုလက်မှုပညာပစ္စည်းများ ပြသရောင်းချသည့် ပြခန်းများအား လှည့်လည်ကြည့်ရှုအားပေးခဲ့ကြောင်း သိရသည်။

မြန်မာအမျိုးသမီးများနေ့အထိမ်းအမှတ် ၂၀၂၃ခုနှစ်၊ မိုးရာသီသစ်ပင်စိုက်ပျိုးပွဲအခမ်းအနားအား ယနေ့နက်ပိုင်းက ပုသိမ်မြို့၊ကွန်ပျူတာတက္ကသိုလ်ဝန်းအတွင်း၌ ပြုလုပ်ခဲ့ရာ သစ်ပင်စိုက်ပျိုးပွဲသို့ တိုင်းဒေသကြီး ဝန်ကြီးချုပ်ဦးတင်မောင်ဝင်းနှင့်ဇနီး၊ အနောက်တောင်တိုင်းစစ်ဌာနချုပ် တိုင်းမှူးနှင့်ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ တိုင်းဒေသကြီး အစိုးရအဖွဲ့ဝင် ဝန်ကြီးများနှင့် ၎င်းတို့၏ဇနီးများ၊ဌာနဆိုင်ရာများ၊ အမျိုးသမီးရေးရာအဖွဲ့၊ မိခင်နှင့်ကလေးစောင့်ရှောက်ရေးအသင်းနှင့် ဒေသခံပြည်သူများ တက်ရောက်ခဲ့ကြသည်။ ၂၀၂၃ခုနှစ်၊မိုးရာသီသစ်ပင်စိုက်ပျိုးပွဲတွင် တိုင်းဒေသကြီး ဝန်ကြီးချုပ်က“ယ‌ခုအခမ်းအခမ်းအနားသည်  ဇူလိုင်(၃)ရက်နေ့ ယနေ့တွင်ကျရောက်သည့် ၂၀၂၃ခုနှစ်၊ မြန်မာအမျိုးသမီးများနေ့ အထိမ်းအမှတ် ကျင်းပပြုလုပ်သည့် သစ်ပင်စိုက်ပျိုးပွဲ အခမ်းအနားဖြစ်ပြီး သစ်တောပြုစုထိန်းသိမ်းရေး လုပ်ငန်းများတွင် အမျိုးသမီးများသည် ပြည်သူတစ်ရပ်လုံးနှင့်အတူ တက်ကြွစွာ ပူးပေါင်းပါဝင်ဆောင်ရွက်လျက်ရှိပါကြောင်း၊  ယနေ့မျက်မှောက်ခေတ်မှာ ရာသီဥတုဖောက်ပြန်ခြင်း၊ မိုးခေါင်ခြင်း၊ ရေကြီးခြင်း၊ မုန်တိုင်းများကျရောက်ခြင်း၊ တောမီးလောင်ကျွမ်းခြင်း၊ မြေပြိုခြင်းစသည့် မမျှော်မှန်းနိုင်သည့်  သဘာဝဘေးအန္တရာယ်များ ရင်ဆိုင်နေကြရပါကြောင်း၊ထို့ကြောင့် သစ်တောများအပါအဝင် သဘာဝသယံဇာတများကိုထိန်းသိမ်းစောင့်ရှောက်ကာ ရေရှည်တည်တံ့စေခြင်းအားဖြင့် အန္တရာယ်တွေကို ကာကွယ်နိုင်ရုံသာမက နောင်အနာဂတ် နောင်လာနောက်သားများအတွက် အမွေအနှစ်ကောင်းများ ချန်ရစ်ထားပေးနိုင်မှာဖြစ်ပါကြောင်း၊ ဒီရေတောများ၊ လေကာပင်များစိုက်ပျိုးထားရှိခြင်းဖြင့် မုန်တိုင်းအန္တရာယ် ကာကွယ်နိုင်မှာဖြစ်ပါကြောင်း၊ မိမိတို့တိုင်းဒေသကြီးတွင်လည်း သစ်တောပြုန်းတီးမှုနည်းပါးစေရေနှင့် သစ်တောဖုံးလွှမ်းမှုဧရိယာများပြားစေရေးအတွက် နှစ်စဉ်သစ်တောစိုက်ပျိုးခြင်းများကို အရှိန်အဟုန်ဖြင့်ဆောင်ရွက်လျှက်ရှိပါကြောင်း၊ ဒေသခံပြည်သူများအနေဖြင့် တစ်ဦးချင်း၊ ကျေးရွာတစ်ရွာချင်း၊ တိုင်းဒေသကြီးတစ်ခုလုံးအနေဖြင့်ပါ သဘာဝပတ်ဝန်းကျင်ထိန်းသိမ်းကာကွယ် စောင့်ရှောက်ရေးအတွက် တက်ညီလက်ညီနှင့် စိတ်ပါ ဝင်စားစွာဖြင့် ပူးပေါင်းပါဝင်ဆောင်ရွက်ကြဖို့ ပြောကြားလိုပါကြောင်း၊ ထို့အပြင် စိုက်ပျိုးပြီးစီးရုံနှင့် မလုံလောက်ဘဲ ရှင်သန်ကြီးထွားအောင်၊ တစ်ပင်စိုက် တစ်ပင်ရှင်အောင် ပြည်သူအားလုံးက ပူးပေါင်းပါဝင်ဆောင်ရွက်ကြဖို့ မှာကြားလိုပါကြောင်း၊ “သစ်တောနှင့်သစ်ပင် ချစ်ခင်သည့်လူမျိုး သစ်ပင်ကိုနှစ်စဉ်စိုက် ရွှေတိုက်ကိုစိုး"ဆိုသကဲ့သို့ သစ်ပင်စိုက်ပျိုးခြင်း၊ ထင်းအစားထိုးလောင်စာတောင့်များသုံးစွဲခြင်းဖြင့် သစ်တောပြုန်းတီးမှုကာကွယ်ပေးနိုင်ခြင်း၊ ငွေကြေးအားဖြင့် တန်ဖိုးဖြတ် မရနိုင်ခြင်း၊ "ကုသိုလ်လည်းရ ပြည်လည်းလှ ၊ သစ်ပင်စိုက်ပျိုးထိန်းသိမ်းကြ"၊ "ဥတုရာသီ တောကိုမှီ၏”၊  “သက်ရှိလောကတည်မြဲဖို့ သစ်ပင်စိုက်ပျိုး ထိန်းသိမ်းစို့" ဆိုသည့် သစ်တောသစ်ပင်များ၏ အကျိုးကျေးဇူးကို ဖော်ညွှန်းထားသည့်ဆောင်ပုဒ်များအတိုင်း သစ်တောသစ်ပင်များ၊ သစ်တောဂေဟစနစ်များ စဉ်ဆက်မပြတ်တည်တံ့စေရေးကို အမျိုးသားရေး တာဝန်တစ်ရပ်အဖြစ်  ပြည်သူတစ်ရပ်လုံး တက်ကြွစွာ ဝိုင်းဝန်းပူးပေါင်း ဆောင်ရွက်ကြပါစို့လို့ တိုက်တွန်းလိုပါကြောင်း"အမှာစကားကြေားသည်။ ဆက်လက်၍ တိုင်းဒေသကြီး ဝန်ကြီးချုပ် ဦးဆောင်၍  တာဝန်ရှိသူများသည် မြန်မာအမျိုးသမီးများနေ့ အထိမ်းအမှတ် နွယ်သာဂီ၊ကျွန်း၊ ပျဉ်းကတိုး၊ ခရေ၊ မဟော်ဂနီ၊ ပိတောက်၊ ကဗွီး၊ ကံ့ကော်အစရှိသည့် သစ်ပင်(၁၁)မျိုးမှ ပျိုးပင်ပေါင်း (၈၁၀)အား စုပေါင်းစိုက်ပျိုးခဲ့ကြပြီးနောက် ဌာနဆိုင်ရာများနှင့် လူမှုရေးအသင်းအဖွဲ့များက စုပေါင်းသစ်ပင်စိုက်ပျိုးနေမှုများအား လှည့်လည်ကြည့်ရှုအားပေးခဲ့ကြောင်းသိရသည်။

၂၀၂၃ခုနှစ်၊တက္ကသိုလ်ဝင်စာမေးပွဲတွင် အောင်ချက်အကောင်းဆုံး ခရိုင်၊မြို့နယ်ကျောင်းများနှင့် ထူးချွန်စွာအောင်မြင်ခဲ့သော ကျောင်းသား၊ကျောင်းသူများအားဂုဏ်ပြုချီးမြှင့်ပွဲ အခမ်းအနားအား ယနေ့မွန်းလွဲပိုင်းက ပုသိမ်မြို့၊မြို့တော်ခန်းမ၌ ပြုလုပ်ခဲ့ရာ အခမ်းအနားသို့ တိုင်းဒေသကြီးဝန်ကြီးချုပ် ဦးတင်မောင်ဝင်းနှင့်ဇနီး၊အနောက်တောင်တိုင်းစစ်ဌာနချုပ် တိုင်းမှူးနှင့်ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ အစိုးရအဖွဲ့ဝင် ဝန်ကြီးများနှင့်၎င်းတို့၏ ဇနီးများ၊ ဌာနဆိုင်ရာများနှင့် ဆရာ၊ဆရာမများ၊ ကျောင်းသား၊ကျောင်းသူများ တက်ရောက်ခဲ့ကြသည်။ ရှေးဦးစွာ အခမ်းအနားအား ပုသိမ်မြို့၊ အမှတ်(၇) အခြေခံပညာအထက်တန်းကျောင်းမှ ကျောင်းသား၊ကျောင်းသူများက “မြန်မာ့ကျောင်း” သီချင်းဖြင့် သီဆိုဖွင့်လှစ်ခဲ့ပြီးနောက် တိုင်းဒေသကြီးဝန်ကြီးချုပ်က“ယနေ့အခမ်းအနားသည် ဧရာဝတီတိုင်းဒေသကြီးအတွင်းရှိ တက္ကသိုလ်ဝင်တန်းစာမေးပွဲတွင် ထူးချွန်စွာ အောင်မြင်ကြသူများအား ချီးမြှင့်ဂုဏ်ပြုသည့်ပွဲ ဖြစ်ပါကြောင်းနှင့် ချီးမြှင့်ထိုက်သူကို ချီးမြှင့်ခြင်း၊ ဂုဏ်ပြုထိုက်သူကို ဂုဏ်ပြုခြင်းသည် ထူးမြတ်သည့် မင်္ဂလာတစ်ပါး‌ဖြစ်ပါကြောင်း၊ ဧရာဝတီတိုင်းဒေသကြီး၏ တက္ကသိုလ်ဝင်စာမေးပွဲတွင် ဖြေဆိုသူ(၂၀၀၅၉)ဦး ဖြေဆိုဆို၍ အောင်မြင်သူ(၁၃၆၃၀)ဦးဖြင့် အောင်ချက်(၆၇.၉၅)ရရှိခဲ့ပါကြောင်း၊ (၆)ဘာသာဂုဏ်ထူး (၂၂)ဦး၊ (၅)ဘာသာဂုဏ်ထူး (၅၃)ဦး၊ (၄) ဘာသာ ဂုဏ်ထူး (၁၇၉)ဦး၊ (၃)ဘာသာဂုဏ်ထူး (၁၃၆၅)ဦး၊ (၂) ဘာသာဂုဏ်ထူး (၁၆၅၃)ဦး၊ (၁)ဘာသာဂုဏ်ထူး (၃၀၈၆)ဦး၊ စုစုပေါင်းဂုဏ်ထူးရရှိသူ (၆၃၅၈)ဦးပေါ်ထွက်ခဲ့ပါကြောင်း၊ ဝိဇ္ဇာဘာသာတွဲ တစ်နိုင်ငံလုံးအဆင့် (၁)၊ အဆင့်(၄)နှင့် အဆင့်(၉)၊ ဝိပ္ပံဘာသာတွဲတွင် တစ်နိုင်ငံလုံးအဆင့် (၂)၊ အဆင့်(၃)နှင့် အဆင့်(၁၀) ရရှိပြီး၊  စုစုပေါင်း(၆)ဦးရရှိခဲ့ ပါကြောင်း၊ ယခုကဲ့သို့ ဆုများများရရှိခဲ့ပြီး အောင်ချက်များ တိုးတက်မြင့်မားလာခြင်းသည် တိုင်းဒေသကြီးအစိုးရအဖွဲ့၏ ဦးဆောင်လမ်းညွှန်မှု၊ တိုင်း၊ခရိုင်၊မြို့နယ်ပညာရေးမှူးများ၏ အနီးကပ်ကြီးကြပ်မှုနှင့် ကျောင်းအုပ်ကြီးများအပါအဝင် ဆရာ၊ဆရာများ၊ ကျောင်းသား/ကျောင်းသူများများအားလုံး တက်ညီလက်ညီ ကြိုးပမ်းအားထုတ်မှုတို့ကြောင့် အောင်မြင်မှုများစွာ ရရှိခဲ့ခြင်းဖြစ်ပါကြောင်း၊လာမည့် ၂၀၂၄ခုနှစ်၊တက္ကသိုလ်ဝင် စာမေးပွဲ Grade-12စာမေးပွဲ၌ အောင်ချက်အကောင်းဆုံးဖြစ်အောင် ကြိုးစားအားထုတ် ပေးကြစေလိုကြောင်း၊ နိုင်ငံတာဝန်ကို ပခုံးပြောင်းထမ်းဆောင်မည့် မျိုးဆက်သစ် ကျောင်းသားလူငယ် လူရွယ်ကလေးများအား ငယ်စဉ်ကပင် ဉာဏ်ပညာထူးချွန်ထက်မြက်၍ ဗလငါးတန်ဖွံ့ဖြိုးပြီး စဉ်းစားတွေးခေါ် မျှော်မြင်နိုင်စွမ်းရှိသော ၊ ပညာပြည့်၀ နှလုံးလှသောသူများ များစွာပေါ်ထွန်းလာရေးအတွက် ပြုစုပျိုးထောင်ပေးရမှာ ဖြစ်ပါကြောင်း၊ “ပညာမြင့်မှ လူမျိုးတင့်မည်” ဆိုသည့်ဆောင်ပုဒ်အတိုင်း ပညာရေးသည် လူသားအရင်းအမြစ် ဖွံ့ဖြိုးတိုးတက်မှု၏ အခြေခံ အုတ်မြစ်ဖြစ်သလိုအကောင်းဆုံးသော ရင်းနှီးမြှုပ်နှံမှုလည်းဖြစ်ပါကြောင်း၊ နိုင်ငံတော်ကြီး ခေတ်မီဖွံ့ဖြိုးတိုးတက်ပြီး လူစွမ်းအားအရင်းအမြစ်များ ထူးချွန်ထက်မြက်ရန်အတွက် ပညာရေးသည် အရေးကြီးသောအခန်း ကဏ္ဍမှာပါဝင်နေပါကြောင်း၊ ဆရာ၊ဆရာမများကလည်း ခေတ်စနစ်နှင့်အညီ  ပြုပြင်ပြောင်းလဲနေသော ပညာရေးစနစ်ကို မျက်ချည်ပြတ်မခံဘဲ အစဉ်လေ့လာသင်ယူပြီး အမြဲကြိုးစားနေရမည့် ထာဝရကျောင်းသားကြီးများ ဖြစ်ပါကြောင်း၊ သို့မှသာ မိမိတို့ရရှိထားသည့် အတတ်ပညာ၊အသိပညာ၊ ဗဟုသုတများကို အနာဂတ်သားကောင်း သမီးမွန်တို့အား လက်ဆင့်ကမ်း ဖြန့်ဝေပေးနိုင်မည်ဖြစ်ပါကြောင်း၊ ထို့အပြင် ကျောင်းသား ကျောင်းသူများ ကျောင်းနေနှုန်း မြင့်မားရေး၊ ကျောင်းနေမြဲရေး၊ ကျောင်းထွက်နှုန်း လျော့နည်းရေးတို့ကိုပါ ဆရာကြီး၊ ဆရာမကြီးများ ဆရာ၊ ဆရာမများ၊ မိဘပြည်သူများ၊ အာဏာပိုင်အဖွဲ့အစည်းများ၊ ပြည်တွင်းလူမှုရေး အသင်းအဖွဲ့များ၊ မိတ်ဖက်အဖွဲ့အစည်းများနှင့်ပူပေါင်းဆောင်ရွက် သွားရမှာ ဖြစ်ပါကြောင်း၊ ၂၀၂၃ ခုနှစ် တက္ကသိုလ်ဝင်စာမေးပွဲ အောင်မြင်ရေး ကြိုးစားပေးခဲ့ကြသော ဧရာဝတီတိုင်းဒေသကြီး ပညာရေးမှူးနှင့်တကွ ခရိုင်/မြို့နယ်များမှ ပညာရေးမှူးများ၊ ဆရာကြီး၊ ဆရာမကြီးများ၊ ဆရာ၊ ဆရာမများ၊ ကျောင်းသား၊ ကျောင်းသူများ၊ ပညာရေးနှင့် ဆက်နွယ်နေသော ဌာနများပါ အထူးကျေးဇူးတင်ရှိသည်ကို ပြောကြား လိုပါကြောင်း၊ လာမည့်၂၀၂၄၊ ခုနှစ် Grade-12တက္ကသိုလ်ဝင် စာမေးပွဲကိုလည်း ယခုနှစ် အောင်ချက်ရာနှုန်းထက် ပိုမိုတိုးတက်လာအောင် ဝိုင်းဝန်းကြိုးစားပေးကြရန် တိုက်တွန်းလိုပါကြောင်း”ဂုဏ်ပြုအမှာစကားများ ပြောကြားသည်။ ဆက်လက်၍ ၂၀၂၃ခုနှစ်၊ တက္ကသိုလ်ဝင်စာမေးပွဲတွင် အောင်ချက်အကောင်းဆုံး ခရိုင်၊မြို့နယ်၊ အထက်တန်းကျောင်း၊ အထက်တန်းကျောင်း(ခွဲ)၊ ကိုယ်ပိုင်အထက်တန်းကျောင်း၊ အထက်တန်းကျောင်း (တောက်တဲ့ရိုး)နှင့် ဘာသာရပ်သင်ဆရာ၊ဆရာမများနှင့် ၂၀၂၃ခုနှစ်တက္ကသိုလ်ဝင်စာမေးပွဲတွင် ဖြေဆိုသူကျောင်းသားကျောင်းသူဦးရေ ၁၀ဦးမှ ၂၉ဦးအတွင်း ၁၀၀ ရာခိုင်နှုန်းပြည့်ဖြေဆို အောင်မြင်သောကျောင်းများအားလည်းကောင်း၊ ဝိဇ္ဇာဘာသာတွဲတွင် တစ်နိုင်ငံလုံးအဆင့်(၁)နှင့် တိုင်းဒေသကြီးအဆင့်(၁)၊ (၆)ဘာသာဂုဏ်ထူးရှင်၊ ဝိပ္ပံဘာသာတွဲ၌ တစ်နိုင်ငံလုံးအဆင့်(၂)နှင့် တိုင်းဒေသကြီး အဆင့်(၁)၊ ( ၅ )ဘာသာဂုဏ်ထူးရှင်၊ ဝိပ္ပံဘာသာတွဲ၌ တစ်နိုင်ငံလုံးအဆင့်(၃)နှင့် တိုင်းဒေသကြီးအဆင့်(၂ )၊(၄)ဘာသာဂုဏ်ထူးရှင်၊ သိပ္ပံဘာသာတွဲတွင်  တိုင်းဒေသကြီး အဆင့်(၁ )၊ ( ၆ )ဘာသာ ဂုဏ်ထူးရှင်၊သိပ္ပံဘာသာတွဲတွင်  တိုင်းဒေသကြီး အဆင့်(၂ )၊(၆)ဘာသာဂုဏ်ထူးရှင်၊သိပ္ပံဘာသာတွဲတွင်  တိုင်းဒေသကြီး အဆင့်(၃)၊(၅)ဘာသာ ဂုဏ်ထူးရှင်များအား တိုင်းဒေသကြီး ဝန်ကြီးချုပ်ကလည်းကောင်း၊ ဝိဇ္ဇာဘာသာတွဲတွင် တစ်နိုင်ငံလုံးအဆင့်(၄)နှင့် တိုင်းဒေသကြီးအဆင့်(၂)၊(၅)ဘာသာဂုဏ်ထူးရှင်၊ ဝိဇ္ဇာဘာသာတွဲတွင် တစ်နိုင်ငံလုံးအဆင့်(၉)နှင့် တိုင်းဒေသကြီးအဆင့်(၃)၊(၅)ဘာသာဂုဏ်ထူးရှင်၊ ဝိပ္ပံဘာသာတွဲတွင် တစ်နိုင်ငံလုံးအဆင့်(၁၀)နှင့် တိုင်းဒေသကြီးအဆင့်(၃)၊(၅)ဘာသာ ဂုဏ်ထူးရှင်၊ သိပ္ပံဘာသာတွဲတွင် တိုင်းဒေသကြီး အဆင့်(၄)၊(၆)ဘာသာဂုဏ်ထူးရှင်၊ သိပ္ပံဘာသာတွဲတွင် တိုင်းဒေသကြီးအဆင့်(၅)၊(၆)ဘာသာ ဂုဏ်ထူးရှင်များအား တိုင်းဒေသကြီး ဝန်ကြီးချုပ်၏ ဇနီးကလည်းကောင်း၊ အနောက်တောင်တိုင်း စစ်ဌာနချုပ် တိုင်းမှူးက သိပ္ပံဘာသာတွဲတွင် တိုင်းဒေသကြီးအဆင့် (၆)၊(၇)၊(၈)၊(၉)၊(၁၀)နှင့် (၆)ဘာသာ၊(၅)ဘာသာဂုဏ်ထူးရှင်များအားလည်းကောင်း၊ တိုင်းမှူး၏ ဇနီးက ဝိပ္ပံဘာသာတွဲတွင် တိုင်းဒေသကြီးအဆင့်(၄)၊(၅)၊(၆)၊(၇)၊(၈)၊(၉)၊(၁၀)နှင့်  (၅)ဘာသာ၊(၄)ဘာသာဂုဏ်ထူးရှင်များအားလည်းကောင်း၊ ပုသိမ်လေတပ်စခန်းဌာနချုပ်မှူးကဝိဇ္ဇာဘာသာတွဲတွင် တိုင်းဒေသကြီးအဆင့်(၄)၊(၅)၊(၆)၊(၇)၊(၈)၊(၉)၊(၁၀)နှင့် (၅)ဘာသာ၊(၄)ဘာသာဂုဏ်ထူးရှင်များအားလည်းကောင်း၊(၆)ဘာသာဂုဏ်ထူးရှင်များအား ပုသိမ်လေတပ်စခန်း ဌာနချုပ်မှူး၏ ဇနီးကလည်းကောင်း၊  အစိုးရအဖွဲ့ဝင် ဝန်ကြီးများနှင့် ဌာနဆိုင်ရာများက သိပ္ပံနှင့် ဝိဇ္ဇာ ဘာသာတွဲများတွင် (၆)ဘာသာ၊(၅)ဘာသာ၊(၄)ဘာသာ ဂုဏ်ထူးရှင်များအားလည်းကောင်း ဆုများအသီးသီးချီးမြှင့်ခဲ့ကြသည်။ ယင်းနောက် ထူးချွန်စွာအောင်မြင်ခဲ့ကြသော ကျောင်းသား၊ကျောင်းသူများကိုယ်စား ဝိဇ္ဇာဘာသာတွဲတွင် တစ်နိုင်ငံလုံးအဆင့်(၁)နှင့် တိုင်းဒေသကြီးအဆင့်(၁) (၆)ဘာသာဂုဏ်ထူးရှင် မထိုက်သူသူလင်းက ကျေးဇူးတင်စကားများ ပြန်လည်ပြောကြားခဲ့ပြီး ပုသိမ်မြို့၊အမှတ်(၇) အခြေခံပညာအထက်တန်းကျောင်းမှ ကျောင်းသား၊ကျောင်းသူများက“ဇာတိမာန်”သီချင်းဖြင့် သီဆိုဖျော်ဖြေ၍ အခမ်းအနားအား ရုပ်သိမ်းခဲ့ပြီး တိုင်းဒေသကြီး ဝန်ကြီးချုပ်နှင့် ဧည့်သည်တော်များသည် စုပေါင်းမှတ်တမ်းတင် ဓာတ်ပုံများရိုက်ကူးခဲ့ကြကြောင်း သိရသည်။ ၂၀၂၃ခုနှစ်၊တက္ကသိုလ်ဝင်စာမေးပွဲတွင် အောင်ချက်အကောင်းဆုံး ခရိုင်၊မြို့နယ်ကျောင်းများနှင့် ထူးချွန်စွာအောင်မြင်ခဲ့သော ကျောင်းသား၊ကျောင်းသူများအားဂုဏ်ပြုချီးမြှင့်ခြင်းအခမ်းအနားတွင် တိုင်းဒေသကြီးအစိုးရအစိုးရအဖွဲ့မှ ချီးမြှင့်ဂုဏ်ပြုငွေ (၁၃၃၅)သိန်းချီးမြှင့်ခဲ့ကြောင်းသိရသည်။

ဒေသတွင်းဖွံ့ဖြိုးတိုးတက်စေရေးနှင့် လမ်းပန်းဆက်သွယ်မှု လုံခြုံချောမွေ့စေရန် ရည်ရွယ်၍ ဆောင်ရွက်ခဲ့သော မြောင်းမြမြို့၊အမှတ်(၆)ရပ်ကွက်၊ ဦးဘချိုလမ်းရှိ ကျွန်းတောတံတားဖွင့်ပွဲအခမ်းအနားအား ယနေ့နံနက်ပိုင်းက အဆိုပါတံတား၌ ပြုလုပ်ခဲ့ရာ ဧရာဝတီတိုင်း ဒေသကြီးဝန်ကြီးချုပ် ဦးတင်မောင်ဝင်း၊ တိုင်းဒေသကြီးအစိုးရအဖွဲ့ဝင်များ၊ ဌာနဆိုင်ရာများတက်ရောက်ဖွင့်လှစ်ပေးခဲ့ကြသည်။ ရှေးဦးစွာ ကျွန်းတောတံတားအား တိုင်းဒေသကြီး ဝန်ကြီးချုပ်သည် တာဝန်ရှိများနှင့်အတူ ဖဲကြိုးဖြတ်ဖွင့်လှစ်ပေးပြီး ကမ္ဗည်းမော်ကွန်းအား အမွှေးနံ့သာရည်များ ပက်ဖျန်းပေးခဲ့သည်။ယင်းနောက် တိုင်းဒေသကြီး ဝန်ကြီးချုပ်ထံသို့ မြောင်းမြမြို့နယ်စည်ပင်သာယာရေးကော်မတီ ဥက္ကဋ္ဌက တံတားဖွင့်ပွဲ အထိမ်းအမှတ်လက်ဆောင်ကို ပေးအပ်ခဲ့ပြီး စုပေါင်းမှတ်တမ်း ဓာတ်ပုံများရိုက်ကူးခဲ့ကာ ဝန်ကြီးချုပ်နှင့် တာဝန်ရှိသူများသည် ကျွန်းတောတံတားအား လှည့်လည် ကြည့်ရှုစစ်ဆေးခဲ့သည်။ အဆိုပါတံတားသည် မြောင်းမြမြို့နယ်စည်ပင်သာယာရေးအဖွဲ့၏ဘဏ္ဍာရန်ပုံငွေ၊ ပြည်သူထည့်၀င်ငွေတို့ဖြင့် မူလသစ်သားတံတားအား အရှည် ၈၁ပေ၊ အကျယ်၂၄ပေ၊ ကြမ်းခင်းထု ၈ လက်မကွန်ကရစ်တံတားအဖြစ် အကြီးစား ပြင်ဆင်မွမ်းမံလုပ်ငန်းများ ဆောင်ရွက်ခဲ့ပြီး ယနေ့တွင်ဖွင့်လှစ်ပေးနိုင်ခဲ့သဖြင့် ဒေသတွင်းဖွံ့ဖြိုးတိုးတက်စေရေးနှင့် လမ်းပန်းဆက်သွယ်မှုကို များစွာ အထောက်အကူပြုနိုင်မှာဖြစ် ကြောင်းသိရသည်။ ဆက်လက်၍ တိုင်းဒေသကြီး ဝန်ကြီးချုပ်သည် အိမ်မဲမြို့နယ် သဖန်းပင်ဆိပ်ကျေးရွာရှိ တောင်သူများနှင့်တွေ့ဆုံ၍ မိုးစပါး တစ်ဧက (၁၀)တင်းပိုမိုအထွက်တိုးစေရေး၊ အထွက်တိုးမျိုးစပါးများစိုက်ပျိုးစေရေး၊ ခေတ်မီစိုက်နည်းစနစ်များအသုံးပြုစိုက်ပျိုးစေရေး၊ သဘာဝမြေဩဇာ၊ဇီဝမြေဩဇာများပိုမိုသုံးစွဲစေရေးမှာကြားခဲ့ပြီး ဆင်းသုခမျိုးစပါးများ စနစ်တကျစိုက်ပျိုးထားရှိမှုများကိုကြည့်ရှုအားပေးခဲ့သည်။ ထို့နောက် ကျောင်းကုန်းမြို့နယ်၊ ငမန်ချောင်ကျေးရွာရှိတောင်သူ ဦးကုလား၏ လယ်မြေ (၁၂)ဧကတွင် မနောသုခမျိုးစပါးများ စနစ်တကျပျိုးထောင်ထားရှိမှု၊ စိုက်ပျိုးနေမှုနှင့် ကန်ကြီးထောင့်မြို့နယ်၊ အညာတန်းကျေးရွာရှိတောင်သူ ဦးသက်ဦး၏ လယ်မြေ (၁၇) ဧကတွင် ဧရာမင်းမျိုးစပါးများ စနစ်တကျပျိုးထောင်ထားရှိမှု၊ စိုက်ပျိုးနေမှုများကိုကြည့်ရှုအားပေးခဲ့ပြီး တစ်ဧကအထွက်တိုးစေရေး၊ စိုက်ပျိုးရေလုံလောက်စွာသုံးစွဲစေရေး၊ သဘာဝမြေဩဇာ၊ ဇီဝမြေသြဇာများပိုမိုသုံးစွဲစေရေးနှင့်အောင်မြင်အောင်ဆောင်ရွက်စေ​ရေးမှာကြားခဲ့ကြောင်းသိရသည်။