ဧရာဝတီတိုင်းဒေသကြီး၊ ပုသိမ်ခရိုင်၊ ငပုတောမြို့နယ်၊ ဟိုင်းကြီးကျွန်းမြို့၊ ဇီးချိုင်ကျေးရွာအုပ်စုတွင် တည်ထားကိုးကွယ်တော်မူသော သမိုင်းဝင်မဟာမကုဋရံသီဆံတော်ရှင်မြတ်မော်တင် စေတီတော်မြတ်ကြီး၏ ရင်ပြင်တော်တိုးချဲ့ခြင်းလုပ်ငန်းအား စေတနာရှင်အများပြည်သူများ၏ စုပေါင်းထည့်ဝင်လှူဒါန်းမှုဖြင့် ဆောင်ရွက်လျက်ရှိပြီး ပါဝင်ကုသိုလ်ယူလှူဒါန်းလိုသူများအနေဖြင့် အောက်ပါဖုန်းနံပါတ်များသို့ ဆက်သွယ်လှူဒါန်းနိုင်ပါရန် နိဗ္ဗာန်အကျိုးမျှော်၍ နှိုးဆော်တိုက်တွန်းအပ်ပါသည်။ ဦးတင်အေး (စီးပွားရေးရာဝန်ကြီး) ၀၉-၈၈၂၃၂၃၇၃၇ ဦးသန်းဇော်ဟန် (ဒုတိယညွှန်ကြားရေးမှူး) ၀၉-၅၂၇၅၄၇၉

ဟိုတယ်ဝန်ဆောင်မှုဆိုင်ရာသင်တန်းအမှတ်စဉ်(၆)သင်တန်းဆင်းပွဲ၊ အဆင့်မြင့်အိမ်တွင်းမှု စက်ချုပ်သင်တန်းအမှတ်စဉ်(၇)နှင့် ဟိုတယ်ဝန်ဆောင်မှုဆိုင်ရာသင်တန်းအမှတ်စဉ်(၇) သင်တန်းဖွင့်ပွဲအခမ်းအနားများကို ယနေ့နံနက်ပိုင်းက ပညာရေးနှင့်လေ့ကျင့်ရေးဦးစီးဌာန၊ အမျိုးသမီးအိမ်တွင်းမှုသက်မွေးလုပ်ငန်းပညာသင်တန်းကျောင်း(ပုသိမ်)၌ ပြုလုပ်ခဲ့ရာ အခမ်းအနားသို့ တိုင်းဒေသကြီးဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများ၊ ဌာန ဆိုင်ရာများနှင့် သင်တန်းသူများ တက်ရောက်ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်က“ နယ်စပ်ရေးရာဝန်ကြီးဌာန၊ ပညာရေးနှင့်  လေ့ကျင့်ရေးဦးစီးဌာန၊ အမျိုးသမီးအိမ်တွင်းမှုသက်မွေးလုပ်ငန်းပညာသင်တန်းကျောင်းအနေဖြင့် သင်တန်းများဖွင့်လှစ်ပေးလျက်ရှိရာ ဒေသခံများ၏လူမှုစီးပွားဘဝဖွံ့ဖြိုးတိုးတက်ရေး အတွက် အလုပ်အကိုင်အခွင့်အလမ်းအလမ်းများပိုမိုရရှိလာမည်ဖြစ်ပါကြောင်း၊ တိုင်းဒေသကြီးတွင် ကမ်းခြေခရီးသွားလုပ်ငန်းဖွံ့ဖြိုးပြီး မြို့ကြီးများတွင်လည်းဟိုတယ် လုပ်ငန်းများဖွံ့ဖြိုး တိုးတက်လျက်ရှိပါကြောင်း၊ ခရီးသွားလုပ်ငန်းဖွံ့ဖြိုးတိုးတက်ရေးအတွက် ဟိုတယ်ဝန်ဆောင်မှုဆိုင်ရာသင်တန်းသည် လက်တွေ့အသုံးဝင်သကဲ့သို့ အဆင့်မြင့်အိမ်တွင်းမှု စက်ချုပ်သင်တန်းသည်လည်း အမျိုးသမီးငယ်များအတွက် အလုပ်အကိုင်အခွင့်အလမ်း ကောင်းများရှာဖွေပေးနိုင်မည်ဖြစ်ပါကြောင်း၊ ယခုကဲ့သို့သင်တန်းများကိုလည်း ပိုမိုဖွင့်လှစ် ပေးရန်လိုပါကြောင်းနှင့်  သင်တန်းသူများအနေဖြင့်လည်း မိမိတို့လေ့လာတတ်မြောက်သည့် ဘာသာရပ်အလိုက်ဖန်တီးမှုအသစ်များကို တီထွင်ကြံဆမှုများဖြင့် အောင်မြင်အောင်ကြိုးစား ဆောင်ရွက်သွားကြစေလိုကြောင်း” အမှာစကားများ ပြောကြားခဲ့ပြီး သင်တန်းတွင် ဆုရရှိသည့် သင်တန်းသူများအား ထူးချွန်ဆုများအားလည်းကောင်း၊ သင်တန်းသူများကိုယ်စား သင်တန်းသူ တစ်ဦးအား သင်တန်းဆင်းအောင်လက်မှတ်များနှင့်  အဆင့်မြင့်အိမ်တွင်းမှုစက်ချုပ်သင်တန်း ကျောင်းအုပ်ထံသို့ ထောက်ပံ့ငွေများပေးအပ်ခဲ့ကာ ခင်းကျင်းပြသထားသော သင်တန်းသုံး သင်ထောက်ကူထောက်ပံ့ပစ္စည်းများအား လှည့်လည်ကြည့်ရှုအားပေးခဲ့သည်။ အဆိုပါ ဟိုတယ်ဝန်ဆောင်မှုဆိုင်ရာသင်တန်းအမှတ်စဉ်(၆)တွင်ဧည့်ကြိုသင်တန်း(၇)ဦး၊ အိပ်ခန်းဆောင်သင်တန်း (၇)ဦး၊ အစားအစာနှင့်အဖျော်ယမကာသင်တန်း(၇)ဦးဖြင့် စုစုပေါင်းသင်တန်းသူ(၂၁)ဦးအား သင်တန်းဆင်းပေးနိုင်ခဲ့ကာ အဆင့်မြင့်အိမ်တွင်းမှုစက်ချုပ်သင်တန်း အမှတ်စဉ်(၇)တွင် သင်တန်းသူ(၂၅)ဦး၊ ဟိုတယ်ဝန်ဆောင်မှုဆိုင်ရာသင်တန်း အမှတ်စဉ်(၇)တွင် သင်တန်းသူ (၇)ဦး တက်ရောက်လျက်ရှိကြောင်းသိရသည်။

ဧရာဝတီတိုင်းဒေသကြီးဝန်ကြီးချုပ်ဦးတင်မောင်ဝင်းသည် စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီး ဌာန၊ ဒုတိယဝန်ကြီး၊ အစိုးရအဖွဲ့ဝင် ဝန်ကြီးများနှင့်အတူ ယနေ့နံနက်ပိုင်းက မအူပင်ခရိုင်၊ ဓနုဖြူမြို့နယ်၊ ထီကွေ့ကျေးရွာရှိ တောင်သူဦးကျော်ဝင်းစိန်၏ နိုင်ငံ့စီးပွားမြှင့်တင်ရေးရန်ပုံငွေဖြင့်သွင်းအားစုများရယူဆောင်ရွက်ပြီး ပိုက်ဆံလျှော်(သစ်စိမ်းမြေဩဇာ)၊ နွားချေးနှင့်အခြားမြေဩဇာများ ထည့်သွင်းထားသည့် စိုက်ဧက(၄) ဧကတွင် ပြုလုပ်သည့်  မိုးစပါးမှော်ဘီ(၃)မျိုးစေ့ထုတ်စိုက်ခင်းစံကွက်ရိတ်သိမ်းနေမှုအားကြည့်ရှုအားပေးခဲ့သည်။ ဦးစွာ တိုင်းဒေသကြီးဝန်ကြီးချုပ်နှင့်အဖွဲ့သည် တောင်သူများနှင့်တွေ့ဆုံ၍ တစ်ဧက ၁၀တင်းပိုမိုတိုးတက်ထွက်ရှိစေရေးအတွက် အထွက်တိုးမျိုးစပါးများပြောင်းလဲအသုံးခြင်း၊ စိုက်နည်းစနစ်များပြောင်းလဲစိုက်ပျိုးခြင်း၊ သဘာဝမြေဩဇာများအချိုးကျသုံးစွဲခြင်း၊ ပိုက်ဆံလျှော်သစ်စိမ်းမြေဩဇာများ မြေခံထည့်သွင်းစိုက်ပျိုးခြင်းများဆောင်ရွက်ခဲ့ရာ တစ်ဧကအထွက်နှုန်းများတိုးတက်လာသည်ကိုတွေ့ရှိနေပြီဖြစ်ပါကြောင်း၊ တောင်သူများအနေဖြင့် ပိုက်ဆံလျှော်မျိုးစေ့ ထုတ်လုပ်ငန်းများတွင် ပူးပေါင်းပါဝင်ဆောင်ရွက်ပေးကြရမှာဖြစ်ပါကြောင်း၊ သီးထပ်စွမ်းအားများတိုးမြှင့်ဆောင်ရွက်ရန်နှင့် ပန်းတိုင်အထွက်နှုန်းများရရှိစေရေးဆက်လက်ဆောင်ရွက်သွားကြရန်ဆွေးနွေးပြောကြားခဲ့ပြီးနောက် တိုင်းဒေသကြီးလယ်ယာမြေစီမံခန့်ခွဲမှုနှင့်စာရင်းအင်းဦးစီးဌာနတိုင်းဦးစီးမှူးမှ ဓနုဖြူမြို့နယ်၏ ရေမြေသဘာဝအလိုက် မိုးစပါးစိုက်ပျိုးထားရှိမှုအခြေအနေများရှင်းလင်းတင်ပြမှုအပေါ် တိုင်းဒေသကြီးဝန်ကြီးချုပ်က စိုက်ဧကများပြည့်မီစေရေးနှင့် မြေပြုပြင်ခြင်းများဆောင်ရွက်ထားရှိပြီဖြစ်၍  မြေအမျိုးအစားအလိုက် ကောင်း၊ သင့်၊ ညံ့ တွက်ချက်မှုများ ပြန်လည်တွက်ချက်ထားရှိရန်မှာကြားခဲ့ပြီး တောင်သူများ၏တင်ပြချက်များအပေါ် သက်ဆိုင်ရာဌာနများနှင့်ပေါင်းစပ်ဆောင်ရွက်ပေးခဲ့ကာ တိုင်းဒေသကြီးဝန်ကြီးချုပ်နှင့်တာဝန်ရှိသူများသည် ပိုက်ဆံလျှော်မျိုးစေ့ထုတ် တောင်သူများအား မျိုးစေ့များထောက်ပံ့ပေးအပ်ခဲ့ပြီးစံကွက်ရိတ်သိမ်းနေမှုအားကြည့်ရှုအားပေးခဲ့သည်။ အဆိုပါတောင်သူ ဦးကျော်ဝင်းစိန်၏ မှော်ဘီ(၃)မျိုးစပါး မိုးစပါးစံကွက်ရိတ်သိမ်းခဲ့ရာတွင် တစ်ဧကလျှင် ပျမ်းမျှ အထွက်နှုန်း( ၁၆၄.၄၈)တင်းထွက်ရှိခဲ့ပြီး အထွက်တိုးမျိုးစပါးများပြောင်းလဲအသုံးခြင်း၊ စိုက်နည်းစနစ်များပြောင်းလဲစိုက်ပျိုးခြင်း၊ သဘာဝမြေဩဇာများအချိုးကျသုံးစွဲခြင်း၊ ပိုက်ဆံလျှော်သစ်စိမ်းမြေဩဇာများမြေခံထည့်သွင်းစိုက်ပျိုးခြင်းများအပြင် ရိတ်သိမ်းခြွေလှေ့စက်မောင်းသင်တန်းဆင်းများမှ စနစ်တကျဖြင့်ရိတ်သိမ်းခြင်းတို့ကြောင့် လေလွင့်မှုများနည်းပါးကာ အထွက်နှုန်းတိုးခြင်းဖြစ်ကြောင်းသိရသည်။

(၂၄)ကြိမ်မြောက်မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီး(ဗဟိုအဆင့်) ပြိုင်ပွဲ သို့ သွားရောက်ယှဉ်ပြိုင်မည့် ဧရာဝတီတိုင်းဒေသကြီးကိုယ်စားပြု ပြိုင်ပွဲဝင်များအား အောင်နိုင်ရေးအလံနှင့် ဂုဏ်ပြုပံ့ပိုးငွေများပေးအပ်ပွဲအခမ်းအနားကို ယနေ့ မွန်းလွဲပိုင်းက ပုသိမ်မြို့၊ မြို့တော်ခန်းမတွင် ပြုလုပ်ခဲ့ရာ တိုင်းဒေသကြီး ဝန်ကြီးချုပ်ဦးတင်မောင်ဝင်းနှင့်ဇနီး၊ အနောက်တောင်တိုင်းစစ်ဌာနချုပ် တိုင်းဦးစီးချုပ်၊ ပုသိမ်လေတပ်စခန်းဌာနချုပ်မှူးနှင့်ဇနီး၊ အစိုးရအဖွဲ့ဝင်ဝန်ကြီးများနှင့် ဇနီးများ၊ ဌာနဆိုင်ရာများနှင့် ဧရာဝတီတိုင်းဒေသကြီးကိုယ်စားပြုပြိုင်ပွဲဝင်များ တက်ရောက် ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်က “ (၂၄)ကြိမ်မြောက်မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီး (ဗဟိုအဆင့်)ပြိုင်ပွဲသို့ သွားရောက်ယှဉ်ပြိုင်မည့် ဧရာဝတီတိုင်းဒေသကြီး ကိုယ်စားပြုပြိုင်ပွဲဝင်များအား အောင်နိုင်ရေးအလံ ပေးအပ်ခြင်း ဖြစ်ပါကြောင်း၊ (၂၄)ကြိမ် မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီး(ဗဟိုအဆင့်)ပြိုင်ပွဲသို့ ဝင်ရောက်ယှဉ်ပြိုင်နိုင်ရန်အတွက်  မြို့နယ်အဆင့်၊ ခရိုင်အဆင့်ပြိုင်ပွဲများပြုလုပ်၍ စိစစ်ရွေးချယ်ပြီး တိုင်းအဆင့်ပြိုင်ပွဲပြုလုပ်၍ အရည်အချင်းပြည့်ဝသည့် ပြိုင်ပွဲဝင်များအား စိစစ်ရွေးချယ်ခဲ့ ပါကြောင်း၊ ယခင်နှစ်က အတွေ့အကြုံများကိုအခြေခံ၍ ယခုနှစ် တိုင်းဒေသကြီးအဆင့်ပြိုင်ပွဲတွင် အဆို၊ အက၊ အရေး၊ အတီး အကဲဖြတ်ပညာရှင်များ၊ ခရိုင်အဆင့်အကဲဖြတ်ပညာရှင်များအား ဖိတ်ခေါ်၍ ပြိုင်ပွဲဝင်များအား အကဲဖြတ်ရွေးချယ်ကာ စခန်းသွင်းလေ့ကျင်မှုများ ပြုလုပ်ခဲ့ပြီး အရည်အချင်းဆန်းစစ်ခြင်းများကိုလည်း ဆောင်ရွက်နိုင်ခဲ့ပါကြောင်း၊ ယခုနှစ်တွင် ယခင်နှစ်က ဝင်ရောက်ယှဉ်ပြိုင်နိုင်ခဲ့ခြင်း မရှိခဲ့သည့် နေရာများတွင်လည်း ဖြည့်သွင်းပါဝင်ယှဉ်ပြိုင် သွားမည်ဖြစ်ပါကြောင်းနှင့် ဆုတံဆိပ်များပိုမိုရရှိမည်ဟု ယုံကြည်ပါကြောင်း၊ ပြိုင်ပွဲဝင်များအနေဖြင့် ကျန်းမာရေးကိုလည်း အထူးဂရုစိုက် နေထိုင်ကြရန်လည်း လိုအပ်ပါကြောင်း၊ ပြိုင်ပွဲဝင်များအနေဖြင့် နည်းပြများ၏ အကြံပြုချက်များ၊ သုံးသပ်ချက်များကိုလိုက်နာ ဆောင်ရွက်သွားရန်လိုပါကြောင်း၊ မိမိတို့တိုင်းဒေသကြီးအောင်နိုင်ရေးအတွက် ပြိုင်ပွဲဝင်များ၊ နည်းပြများအနေဖြင့် မိမိတို့တတ်ကျွမ်းသည့် ပညာရပ်များဖြင့် အားသွန်ခွန်စိုက် တက်ညီလက်ညီ ပူးပေါင်းဆောင်ရွက်ကြစေလိုကြောင်း” အမှာစကားပြောကြားသည်။ ဆက်လက်၍ မဟာဂီတအဆင့်မြင့်ပညာအဆင့် အဆိုပြိုင်ပွဲဝင်၊ ဝါသနာရှင် (ပထမတန်းအဆင့်)အကပြိုင်ပွဲဝင်၊ အခြေခံပညာအဆင့် (၁၅-၂၀) စောင်းပြိုင်ပွဲဝင် ၊ ဝါသနာရှင် (ဒုတိယတန်းအဆင့်) အမျိုးဂုဏ်/ဇာတိဂုဏ် အဆိုပြိုင်ပွဲဝင်၊ အခြေခံပညာ အဆင့်(၁၅-၂၀) အကပြိုင်ပွဲဝင် ၊ ဝါသနာရှင်(ပထမတန်း)အဆင့် ဒုံမင်းပြိုင်ပွဲဝင်၊ အဆင့်မြင့်ပညာအဆင့် စန္ဒရား ပြိုင်ပွဲဝင်၊ အခြေခံပညာအဆင့် (၁၀-၁၅) ဆိုင်းအဖွဲ့လိုက် ပြိုင်ပွဲဝင်၊ ရှမ်းတိုင်းရင်းသားရိုးရာအက အဖွဲ့၊ အခြေခံပညာအဆင့်(၁၀-၁၅) ကဗျာလွတ် အကပြိုင်ပွဲဝင်အဖွဲ့တို့က သီဆို၊ ကပြ၊ တီးခတ် ဖျော်ဖြေခဲ့ကြပြီးနောက် တိုင်းဒေသကြီးဝန်ကြီးချုပ်က  အောင်နိုင်ရေးအလံနှင့် ဂုဏ်ပြုပံ့ပိုး ငွေများအားပေးအပ်ရာ တိုင်းရင်းသား ရေးရာဝန်ကြီးနှင့် တိုင်းဒေသကြီးရှေးဟောင်းသုတေသန နှင့်အမျိုးသားပြတိုက် ဦးစီးဌာနတိုင်းဦးစီးမှူးတို့က လက်ခံရယူခဲ့သည်။ ထို့နောက် တိုင်းဒေသကြီးဝန်ကြီးချုပ်နှင့် ဧည့်သည်တော်များသည် တိုင်းဒေသကြီးကိုယ်စားပြုပြိုင်ပွဲဝင်များနှင့် ရင်းရင်းနှီးနှီး တွေ့ဆုံအားပေးခဲ့သည်။ (၂၄)ကြိမ်မြောက်မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီး(ဗဟိုအဆင့်) ပြိုင်ပွဲတွင် ဧရာဝတီတိုင်းဒေသကြီး ကိုယ်စားပြုအနေဖြင့် အဆိုပြိုင်ပွဲဝင်(၂၃)ဦး၊ အက ပြိုင်ပွဲဝင်(၁၁၆)ဦး၊ အရေးပြိုင်ပွဲဝင်(၄)ဦး၊ အတီးပြိုင်ပွဲဝင်(၁၀၆)ဦး၊ စုစုပေါင်း ပြိုင်ပွဲဝင်(၂၄၈)ဦး ပါဝင်ယှဉ်ပြိုင်သွားမည်ဖြစ်ပြီး ပြိုင်ပွဲဝင်အမျိုးသား၊ အမျိုးသမီး၊ အုပ်ချုပ်နည်းပြများ၊ အုပ်ထိန်းသူများ၊ ပံ့ပိုးသူများ စုစုပေါင်း(၄၀၁)ဦးဖြင့် ပါဝင်ယှဉ်ပြိုင် သွားမည်ဖြစ်ကြောင်း သိရသည်။

အပြည်ပြည်ဆိုင်ရာသဘာဝဘေးအန္တရာယ် ထိခိုက်ဆုံးရှုံးနိုင်ခြေလျှော့ချရေးနေ့ အထိမ်းအမှတ်အခမ်းအနားကို ယနေ့နံနက်ပိုင်းက ပုသိမ်မြို့၊ ဧရာရွှေဝါခန်းမ၌ ပြုလုပ်ခဲ့ရာ တိုင်းဒေသကြီးဝန်ကြီးချုပ် ဦးတင်မောင်ဝင်း၊ အနောက်တောင်တိုင်း စစ်ဌာနချုပ် တိုင်းမှူး၊ ပုသိမ်လေတပ်စခန်းဌာနချုပ်မှူး၊ အစိုးရအဖွဲ့ဝင်ဝန်ကြီးများနှင့် ဌာနဆိုင်ရာများ တက်ရောက်ခဲ့ကြသည်။ ဦးစွာတိုင်းဒေသကြီးဝန်ကြီးချုပ်က“ အပြည်ပြည်ဆိုင်ရာသဘာဝဘေးအန္တရာယ် ထိခိုက် ဆုံးရှုံးနိုင်ခြေလျှော့ချရေးနေ့ကို ၂၀၀၉ ခုနှစ်၊ ဒီဇင်ဘာလ(၂၁)ရက်နေ့တွင် ပြုလုပ်ခဲ့သည့် ကမ္ဘာ့ကုလသမဂ္ဂအထွေထွေညီလာခံ၏ ဆုံးဖြတ်ချက်အမှတ် (၆၄/၂၀၀)အရ နှစ်စဉ် အောက်တိုဘာလ (၁၃)ရက်နေ့တွင် ပြုလုပ်ရန် အတည်ပြုသတ်မှတ်ခဲ့ပါကြောင်း၊ မြန်မာနိုင်ငံ တွင်လည်း ၂၀၁၀ ခုနှစ်မှစတင်၍ နိုင်ငံတော်အဆင့်အခမ်းအနားများ စတင်ကျင်းပပြုလုပ်ခဲ့ပြီး ဧရာဝတီတိုင်းဒေသကြီးတွင် ၂၀၁၃ ခုနှစ်က စတင်ကျင်းပပြုလုပ်ခဲ့ရာ ယခုနှစ်သည် နဝမအကြိမ် မြောက်အဖြစ် ဆောင်ရွက်ခြင်းဖြစ်ပါကြောင်း၊ ယခုနှစ် ၂၀၂၃ခုနှစ်အတွက် အပြည်ပြည်ဆိုင်ရာ သဘာဝဘေးလျော့ပါးရေးနေ့ အထိမ်းအမှတ်အခမ်းအနားအဖြစ် ကမ္ဘာ့ကုလသမဂ္ဂအဖွဲ့ကြီးက “ Fighting Inequality for A Resilient Future” “ ဘေးဒဏ်ကြံ့ကြံ့ခံနိုင်ဖို့၊ မညီမျှမှုတွေ တိုက်ဖျက်စို့ ”ဟူသော ဆောင်ပုဒ်ဖြစ်ပါကြာင်း၊ ၂၀၂၃ခုနှစ်၊ ဇန်နဝါရီလမှ စက်တင်ဘာလအတွင်း ဧရာဝတီတိုင်းဒေသကြီးတွင် မီးဘေး၊ လေဘေး၊ ရေဘေး၊ ကမ်းပြိုဘေး၊ မိုးကြိုးဘေး၊ ငလျင်ဘေး၊ ထူးခြားဘေး (တောဆင်ရိုင်းဘေးနဲ့ မိချောင်းဘေး) စုစုပေါင်းဘေးဖြစ်ပွားမှု (၃၂၂) ကြိမ် ရှိခဲ့ပါကြောင်း၊ ၎င်းဖြစ်စဉ်များကို ကြည့်ခြင်းအားဖြင့် ရာသီဥတုပြောင်းလဲမှုကြောင့်သော် လည်းကောင်း ဘက်ညီမျှမှုမရှိသောဖွံ့ဖြိုးတိုးတက်မှုကြောင့်သော်လည်းကောင်း လက်ရှိကြုံတွေ့ နေရသောအန္တရာယ်ကျရောက်နိုင်ခြေများဟာ အဆများစွာတိုးပွားလာနိုင်သည်ကိုစိစစ်တွေ့ရှိ ရပါကြောင်း၊ ဧရာဝတီတိုင်းဒေသကြီးအတွင်းဖြစ်ပွားသည့် ဘေးအန္တရာယ်များအနက် (၅၀%) ကျော်သည် လေပြင်းဘေးဖြစ်ကြောင်း စိစစ်တွေ့ရှိရသည့်အတွက် လေပြင်းဘေးဒဏ်ကြံ့ကြံ့ ခံနိုင်ရန် ရည်ရွယ်ပြီးရပ်ရွာအတွင်းရှိ ကြံ့ခိုင်မှုအားနည်းသောအိုးအိမ်များကို အားဖြည့်မွမ်းမံ ပြုပြင်ပေးခြင်းများကိုလည်း ဆောင်ရွက်ပေးလျက်ရှိပါကြောင်း၊ မိမိတို့တိုင်းဒေသကြီးအနေဖြင့် မေလ (၁၃) ရက်နေ့က ဝင်ရောက်တိုက်ခတ်ခဲ့သည့် အလွန့်အလွန်အားကောင်းသည့် မိုခါ ဆိုင်ကလုန်းမုန်တိုင်းဘေးအတွက် ကြိုတင်သတိပေးချက်များရရှိချိန်မှစတင်၍ တိုင်းဒေသကြီး သဘာဝဘေးအန္တရာယ်ဆိုင်ရာ စီမံခန့်ခွဲမှုအဖွဲ့အစည်းအဝေးခေါ်ယူပြီး  ကြိုတင်ပြင်ဆင်ခြင်း၊ အရေးပေါ်တုံ့ပြန်ခြင်းနှင့် ပြန်လည်ထူထောင်ရေး လုပ်ငန်းစဉ်အဆင့်ဆင့်အားဆွေးနွေး၍ ခရိုင်၊ မြို့နယ်၊ ရပ်ကျေး များအထိ လိုက်ပါဆောင်ရွက်နိုင်ရန်နှင့် ဆုံးရှုံးမှုများနည်းနိုင်သမျှနည်းအောင် ကြိုတင်စီမံဆောင်ရွက်ခဲ့ပါကြောင်း၊ ဘေးအန္တရာယ်ကိုတုံ့ပြန်ဆောင်ရွက်တဲ့အခါ ပထမဦးစွာ ထိခိုက်ဆုံးရှုံးမှု နည်းအောင်ဆောင်ရွက်ရတာဖြစ်သည့်အတွက် ကြိုတင်ပြင်ဆင်သည့်အပိုင်းက ပိုအရေးကြီးပါကြာင်း၊ ကြိုတင်ပြင်ဆင်မှုအပိုင်းမှာလည်း ကြိုတင်သတိပေးစနစ်နှင့် ကြိုတင် ပြင်ဆင်ခြင်း စနစ်ကလွန်စွာကောင်းမွန်ရမှာဖြစ်ပြီး အချိန်မီသိ၊ အချိန်မီဆောင်ရွက် တုံ့ပြန်နိုင်မှသာ ကျရောက်လာတဲ့ဘေးအန္တရာယ်များကို ရင်ဆိုင်နိုင်မှာဖြစ်ပါကြောင်းနှင့် ယခုနှစ် အပြည်ပြည်ဆိုင်ရာသဘာဝဘေးအန္တရာယ် ထိခိုက်ဆုံးရှုံးနိုင်ခြေလျှော့ချရေးနေ့ အထိမ်းအမှတ် ဆောင်ပုဒ်ဖြစ်သည့် “ Fighting Inequality for A Resilient Future” “ ဘေးဒဏ်ကြံ့ကြံ့ခံနိုင်ဖို့၊ မညီမျှမှုတွေတိုက်ဖျက်စို့ ” ဟူသော ဆောင်ပုဒ်အတိုင်း မိမိနိုင်ငံ၊ မိမိတိုင်းဒေသကြီးကို ဘေးအန္တရာယ်များမှလျော့နည်းသက်သာစေရန်အားလုံးပူးပေါင်းဆောင်ရွက်ကြစို့ဟု” တိုက်တွန်း အမှာစကားများ ပြောကြားသည်။ ဆက်လက်၍  တိုင်းဒေသကြီးဝန်ကြီးချုပ်နှင့်ဧည့်သည်တော်များသည် အပြည်ပြည်ဆိုင်ရာ သဘာဝဘေးအန္တရာယ် ထိခိုက်ဆုံးရှုံးနိုင်ခြေလျှော့ချရေးနေ့ အထိမ်းအမှတ်သို့ ကုလသမဂ္ဂအထွေထွေ အတွင်းရေးမှူးချုပ်က ပေးပို့သော သဝဏ်လွှာသတင်းစကားရုပ်သံနှင့် မိုခါမုန်တိုင်း တုံ့ပြန်ဆောင်ရွက်မှုဆိုင်ရာ မှတ်တမ်းဗီဒီယိုပြသမှုအား ကြည့်ရှုအားပေးပြီးနောက် စုပေါင်းမှတ်တမ်းတင်ဓာတ်ပုံများရိုက်ကူးခဲ့ကာ အပြည်ပြည်ဆိုင်ရာသဘာဝဘေးအန္တရာယ် ထိခိုက်ဆုံးရှုံးနိုင်ခြေလျှော့ချရေးနေ့ အထိမ်းအမှတ်အဖြစ်ပြသထားသောပြခန်းများအား လှည့်လည် ကြည့်ရှုခဲ့ကြကြောင်းသိရသည်။