ပြည်နယ်နှင့်တိုင်းဒေသကြီး ဂျုဒိုပြိုင်ပွဲနှင့် စက်ဘီးပြိုင်ပွဲသို့ ဝင်ရောက်ယှဉ်ပြိုင်မည့် တိုင်းဒေသကြီးကိုယ်စားပြု ဂျုဒိုအသင်းနှင့် စက်ဘီးအသင်းတို့အားအောင်နိုင်ရေးအလံပေးအပ်ပွဲ အခမ်းအနားကို ယနေ့မွန်းလွဲပိုင်းက တိုင်းဒေသကြီးအစိုးရအဖွဲ့ရုံး ၊ အစည်းအဝေး ခန်းမ(၁)တွင် ပြုလုပ်ခဲ့သည်။ ရှေးဦးစွာ တိုင်းဒေသကြီးဝန်ကြီးချုပ်အား ဂျုဒိုပြိုင်ပွဲနှင့် စက်ဘီးပြိုင်ပွဲသို့ သွားရောက် ယှဉ်ပြိုင်မည့် အုပ်ချုပ် ၊ နည်းပြ ၊ အားကစားသမား များက တစ်ဦးချင်းမိတ်ဆက်ပြီးနောက် ဧရာဝတီတိုင်းဒေသကြီးကိုယ်စားပြုအသင်းများကိုယ်စား ဂျူဒိုအသင်းအုပ်ချုပ်သူက ပြိုင်ပွဲဝင်ရောက်ယှဉ်ပြိုင်မည့် အစီအစဉ်များအား ရှင်းလင်းတင်ပြသည်။ ထို့နောက် တိုင်းဒေသကြီးဝန်ကြီးချုပ်က “ အားကစားအသင်းများအနေဖြင့် ယခင်နှစ်အောင်မြင်မှုများထက် ယခုနှစ်တွင်ပိုမိုအောင်မြင်မှုရရှိအောင် ကြိုးစားဆောင်ရွက် ရမည်ဖြစ်ပါကြောင်း၊ ဂျူဒိုအားကစားနည်းသည် တိုင်းဒေသကြီးအတွက် အားထားရသော အားကစားနည်းဖြစ်ပြီး နှစ်စဉ်နှစ်တိုင်းအောင်မြင်မှုများလည်းရရှိခဲ့ပါကြောင်း၊ ယင်းအောင်မြင်မှုများကို လက်ဆင့်ကမ်းသယ်ဆောင်ပြီး ပိုမိုအောင်မြင်မှုများရရှိအောင် ကြိုးစားဆောင်ရွက်ရမည်ဖြစ်ပါကြောင်း၊ စက်ဘီးအားကစားနည်းသည်လည်း အောင်မြင်မှုများရရှိခဲ့ပါကြောင်းနှင့် မျိုးဆက်သစ်အားကစားသမားများလည်း ပါဝင်လာသည့်အတွက် ဂုဏ်ယူရပါကြောင်း၊ အားကစားကဏ္ဍကို မျိုးဆက်သစ်များအနေဖြင့် တစ်ဆင့်ထက်တစ်ဆင့် မြင့်သည်ထက်မြင့်အောင် ကြိုးစားဆောင်ရွက်ရမည်ဖြစ်ပါကြောင်း၊ ပြိုင်ပွဲဝင်အသင်းများအနေဖြင့် ယခင်နှစ်အောင်မြင်မှုများထက် ပိုမိုအောင်မြင်ရရှိအောင် စွမ်းဆောင်ရန်လိုအပ်ပြီး တိုင်းဒေသကြီးဂုဏ်ဆောင် အားကစားသမားများမှသည် နိုင်ငံ့ဂုဏ်ဆောင် အားကစားသမားများ ဖြစ်ကြပါစေကြောင်း” တိုက်တွန်းအမှာစကားပြောကြားပြီး ဧရာဝတီတိုင်းဒေသကြီး ကိုယ်စားပြုဂျုဒိုအသင်းနှင့် စက်ဘီးအသင်းတို့မှ တာဝန်ရှိသူများထံသို့ အောင်နိုင်ရေးအလံနှင့် ချီးမြှင့်ထောက်ပံ့ငွေများ ပေးအပ်ခဲ့ကြောင်းသိရသည်။

ဧရာဝတီတိုင်းဒေသကြီးအတွင်း ၂၀၂၃-၂၀၂၄ခုနှစ်၊ ဆောင်းနေကြာဧကပြည့်မီရေးနှင့် ပန်းတိုင်အထွက်နှုန်းရရှိစေရေးအတွက် စိုက်ပျိုးရေးဦးစီးဌာန(ရုံးချုပ်)မှ နေကြာစိုက်ပျိုးရေး ပညာရှင်များက ပုသိမ်ခရိုင်၊ ကျုံပျော်ခရိုင်ရှိဝန်ထမ်းများနှင့်တောင်သူများသို့ နည်းပညာ ဆွေးနွေးပွဲကို ယနေ့မွန်းလွဲပိုင်းက တိုင်းဒေသကြီးစိုက်ပျိုးရေးဦးစီးဌာန၊ အစည်းအဝေးခန်းမတွင် ပြုလုပ်လျက်ရှိရာ ဆွေးနွေးပွဲသို့ တိုင်းဒေသကြီးဝန်ကြီးချုပ်ဦးတင်မောင်ဝင်းသည် သွားရောက် တွေ့ဆုံအားပေးခဲ့သည်။ စိုက်ပျိုးရေးဦးစီးဌာန(ရုံးချုပ်)မှ နေကြာစိုက်ပျိုးရေးပညာရှင်များဖြစ်သည့် ဒေါက်တာ ခင်မာလာမြင့်၊ ဒုတိယညွှန်ကြားရေးမှူး (သီးနှံကာကွယ်ရေးဌာနခွဲ)၊ ဒေါက်တာခင်ခင်မူ၊ ဦးစီးအရာရှိ(မြေအသုံးချရေးဌာနခွဲ)၊ဒေါက်တာလဲလဲ့၊ဦးစီးအရာရှိ(မျိုးစေ့ဌာနခွဲ)၊ဦးအေးမင်းထွန်း၊ ဦးစီးအရာရှိ(စိုက်ပညာဌာနခွဲ)၊ ဦးစိုးလင်း၊ လက်ထောက်သုတေသနအရာရှိ ( စိုက်ပျိုးရေး သုတေသနစီပင်ခြံ)တို့က နေကြာအထွက်နှုန်းများ တိုးတက်စေရေးကိစ္စရပ်များကို ရှင်းလင်း ဆွေးနွေးခဲ့ကြပြီး တောင်သူများ၏ ဆွေးနွေးမေးမြန်းမှုများအပေါ် ပညာရှင်များက ပြန်လည် ဖြေကြားခဲ့သည်။ ဆက်လက်၍ တိုင်းဒေသကြီးဝန်ကြီးချုပ်က“ ဧရာဝတီတိုင်းဒေသကြီးသည် စိုက်ပျိုးရေး တိုင်းဒေသကြီးဖြစ်ပြီး စိုက်ပျိုးရေးစံပြတိုင်းဒေသကြီးဖြစ်စေရေးနှင့် ပန်းတိုင်အထွက်နှုန်း ရောက်ရှိစေရေးအတွက် ဆောင်ရွက်လျက်ရှိပါကြောင်း၊ ၂၀၂၅ခုနှစ်တွင် တိုင်းဒေသကြီးအတွင်း ဆီဖူလုံမှုရှိစေရေးအတွက် ဆီထွက်သီးနှံများ တိုးချဲ့စိုက်ပျိုးလျက်ရှိရာ နေကြာ၊ မြေပဲ၊ နှမ်းစသည့် ဆီထွက် သီးနှံများဖြစ်ထွန်းအောင်မြင်ရေးဝိုင်းဝန်းဆောင်ရွက်ရမည်ဖြစ်ပါကြောင်း၊ နည်းပညာ ဆွေးနွေးပွဲသို့တက်ရောက်လာသည့် တောင်သူများအနေဖြင့်လည်း စိုက်ပျိုးရေးပညာရှင် များအား သိရှိလိုသည်များကို မေးမြန်းဆွေးနွေးပေးကြစေလိုကြောင်းနှင့် ဆွေးနွေးမှုများအား စနစ်တကျမှတ်သား၍ နေကြာစိုက်ပျိုးရေးလုပ်ငန်းများ တိုးတက်အောင်မြင်စေရေး လိုက်နာဆောင်ရွက်ကြရန်”အမှာစကားများပြောကြားခဲ့ပြီး ဆွေးနွေးပွဲတက်ရောက် လာကြသူများနှင့် ရင်းရင်းနှီးနှီး တွေ့ဆုံအားပေးခဲ့သည်။

တိုင်းဒေသကြီးသန်းခေါင်စာရင်းကြီးကြပ်မှုကော်မတီနှင့် တိုင်းဒေသကြီးမြေပြင် ကွင်းဆင်းစာရင်းကောက်ယူရေးကြီးကြပ်မှုကော်မတီ လုပ်ငန်းညှိနှိုင်းအစည်းအဝေးကို ဇန်နဝါရီလ ၂ ရက်နေ့ မွန်းလွဲပိုင်းက တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ(၁)တွင်ပြုလုပ်ရာ လုပ်ငန်းညှိနှိုင်းအစည်းအဝေးသို့ ဧရာဝတီတိုင်းဒေသကြီး သန်းခေါင်စာရင်းကြီးကြပ်မှု ကော်မတီနှင့် တိုင်းဒေသကြီးမြေပြင်ကွင်းဆင်းစာရင်းကောက်ယူရေး ကြီးကြပ်မှုကော်မတီဥက္ကဋ္ဌ တိုင်းဒေသကြီး ဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများ၊ လူဝင်မှုကြီးကြပ် ရေးနှင့် ပြည်သူ့အင်အားဦးစီးဌာန၊ ခရိုင်၊ မြို့နယ်ဦးစီးမှူးများ တက်ရောက်ခဲ့ကြပြီး ခရိုင် စီမံအုပ်ချုပ်ရေးအဖွဲ့ ဥက္ကဋ္ဌများက Video Conferencing စနစ်ဖြင့် တက်ရောက်ခဲ့ကြသည်။ ဦးစွာ ဧရာဝတီတိုင်းဒေသကြီး သန်းခေါင်စာရင်းကြီးကြပ်မှုကော်မတီနှင့် တိုင်းဒေသကြီး မြေပြင်ကွင်းဆင်းစာရင်းကောက်ယူရေး ကြီးကြပ်မှုကော်မတီဥက္ကဋ္ဌ တိုင်းဒေသကြီး ဝန်ကြီးချုပ်က“ လွတ်လပ်ပြီးတရားမျှတသည့် ပါတီစုံဒီမိုကရေစီ အထွေထွေရွေးကောက်ပွဲ ကျင်းပနိုင်ရေးအတွက် အဓိကကျသည့် မဲစာရင်းမှန်ကန်ရေးနှင့် မဲပေးပိုင်ခွင့်ရှိသူနိုင်ငံသားတိုင်း နိုင်ငံသားကတ်ပြားကိုင်ဆောင်မဲပေးခွင့်ရရှိရေးအတွက် လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာနက ဆောင်ရွက်လျက်ရှိပါကြောင်း၊ ယင်းလုပ်ငန်းစဉ်များ မှန်ကန်မြန်ဆန်စွာ ဆောင်ရွက်နိုင်ရေးအတွက် အဆင့်(၃)ဆင့်ဖြင့်ဆောင်ရွက်ခဲ့ရာ ယခု တတိယအဆင့်အနေဖြင့် ထည့်သွင်းထားသည့် အချက်အလက်များမှန်ကန်မှု ရှိ/မရှိ မြေပြင်ကွင်းဆင်းစာရင်း ကောက်ယူခြင်းလုပ်ငန်း ဆောင်ရွက်ခဲ့ကာ အချက်အလက်များ ပြင်ဆင်ဖြည့်စွက်ထည့်သွင်း လုပ်ငန်းများ ဆောင်ရွက်လျက်ရှိပါကြောင်း၊ အသက် (၁၈)နှစ်အထက် လူဦရေစာရင်းအား ပုံစံ(၁) အတည်ပြုစာရင်း ပြုစုခြင်းလုပ်ငန်း ဆောင်ရွက်ခဲ့ပြီး ၎င်းပုံစံ(၁) အတည်ပြုစာရင်းသည် ရွေးကောက်ပွဲအတွက် အခြေခံမဲစာရင်းများ ပြည့်စုံမှန်ကန် ရေးအတွက် အသုံးပြုနိုင်မည် ဖြစ်ပါကြောင်း၊ ပုံစံ (၁) အတည်ပြုစာရင်းများအား မြေပြင် ကွင်းဆင်း စာရင်းကောက်ယူရေး ကြီးကြပ်မှုကော်မတီအဆင့်ဆင့်မှစိစစ်ပြီး ကြီးကြပ်မှုဗဟိုကော်မတီသို့ စာရင်းများပေးပို့ သွားရမည်ဖြစ်ပါကြောင်း၊ ပုံစံ (၁) အတည်ပြုစာရင်းတွင် မပါသင့်သူများမပါရှိရေး အလေးထား ဆောင်ရွက်ဖို့ မှာကြားလိုပါကြောင်း၊ မြန်မာနိုင်ငံအတွင်း ၂၀၂၄ခုနှစ်၊ ပြည်လုံးကျွတ်လူဦးရေနှင့် အိမ်အကြောင်းအရာသန်းခေါင်စာရင်းကို အောက်တိုဘာလ (၁) ရက်နေ့မှ (၁၅) ရက်နေ့အထိ နိုင်ငံတဝှမ်းလုံးတွင် ကောက်ယူသွားမည် ဖြစ်ပါကြောင်း၊ သန်းခေါင်စာရင်းမှရရှိသည့် လူဦးရေဆိုင်ရာ ကိန်းဂဏန်း အချက်အလက်များက နိုင်ငံရဲ့ လူမှုရေး၊ စီးပွားရေး၊ စီမံခန့်ခွဲရေးကိစ္စရပ်များတွင် အကျိုးရှိရှိလုပ်ဆောင်နိုင်မှာဖြစ်ပါကြောင်း၊ ထို့အပြင် နိုင်ငံတော်စီမံအုပ်ချုပ်ရေးကောင်စီ၏ အန္တိမရည်မှန်းချက်ဖြစ်သည့် လွတ်လပ်ပြီးတရားမျှတသော ပါတီစုံဒီမိုကရေစီ အထွေထွေရွေးကောက်ပွဲကြီး ဖြစ်ပေါ်စေရေးအတွက် အခြေခံအချက်ဖြစ်သည့် မဲစာရင်းများ မှန်ကန်ပြည့်စုံရေးအတွက် အသုံးပြုနိုင်မည်ဖြစ်ပါကြောင်း၊ (၂ဝ၂၄) ခုနှစ် လူဦးရေနှင့်အိမ်အကြောင်းအရာသန်းခေါင်စာရင်း ကောက်ယူနိုင်ရေးအတွက် ကြိုတင်ပြင်ဆင် ခြင်းလုပ်ငန်းများတွင် ဆက်လက်ဆောင်ရွက်မည့် လုပ်ငန်းများအနေဖြင့် အဆောက်အအုံ စာရင်းတင်ခြင်း၊ လူထုအသိပညာပေး Bill Board စိုက်ထူခြင်း၊ စာရင်းစစ်/ စာရင်းကောက်များ ခန့်အပ်ခြင်း၊ သန်းခေါင်စာရင်းသင်တန်းများ ဖွင့်လှစ်ခြင်းလုပ်ငန်းများ ဆက်လက်ဆောင်ရွက် သွားရမည် ဖြစ်ပါကြောင်း၊ ယခုကောက်ယူမည့် ပြည်လုံးကျွတ် သန်းခေါင်စာရင်းမှရရှိလာမည့် သန်းခေါင်စာရင်း အချက်အလက်များကို မြေပြင်ကွင်းဆင်းခဲ့သည့် လူဦးရေစာရင်းများဖြင့် နှိုင်းယှဉ် တိုက်ဆိုင်ကာ ရွေးကောက်ပွဲအတွက် မဲစာရင်းပြုစုရာတွင် အထောက်အကူဖြစ်စေရေး ဆက်လက်ဆောင်ရွက်သွားမည်ဖြစ်သောကြောင့် ဌာနဆိုင်ရာများမှ ဝိုင်းဝန်းပူးပေါင်း ဆောင်ရွက်သွားကြရန် မှာကြားလိုပါကြောင်း” အဖွင့်အမှာစကားပြောကြားသည်။ ဆက်လက်၍ ဧရာဝတီတိုင်းဒေသကြီး လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာန၊ တိုင်းဒေသကြီးအစိုးရအဖွဲ့ လူမှုရေးရာဝန်ကြီးက လုပ်ငန်းဆောင်ရွက်ထားရှိမှု အခြေအနေများအား ရှင်းလင်းတင်ပြခဲ့သည်။ ထို့နောက် ပုသိမ်၊ ကျုံပျော်၊ ဟင်္သာတ၊ မြန်အောင်၊ မြောင်းမြ၊ မအူပင်၊ ဖျာပုံ၊ လပွတ္တာခရိုင်တို့မှ ခရိုင်အုပ်ချုပ်ရေးမှူးများနှင့် အစည်းအဝေးသို့ တက်ရောက်လာသူများ၏ အထွေထွေဆွေးနွေးတင်ပြချက်များအပေါ် ဧရာဝတီတိုင်းဒေသကြီး သန်းခေါင်စာရင်းကြီးကြပ်မှုကော်မတီနှင့် တိုင်းဒေသကြီးမြေပြင်ကွင်းဆင်းစာရင်းကောက်ယူရေး ကြီးကြပ်မှုကော်မတီဥက္ကဋ္ဌ တိုင်းဒေသကြီး ဝန်ကြီးချုပ်က လိုအပ်သည်များကို ဖြည့်စွက်ဆွေးနွေး ခဲ့ပြီး လုပ်ငန်းများအောင်မြင်စွာ ဆောင်ရွက်နိုင်ရေးအတွက် ပေါင်းစပ်ညှိနှိုင်းဆောင်ရွက် ပေးခဲ့ကြောင်းသိရသည်။

၂၀၂၄ခုနှစ်၊ (၇၆)နှစ်မြောက် လွတ်လပ်ရေးနေ့အခမ်းအနားကျင်းပရေး လုပ်ငန်းညှိနှိုင်းအစည်းအဝေးကို ယနေ့နံနက်ပိုင်းက တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ(၁)တွင်ပြုလုပ်ခဲ့ရာ လုပ်ငန်းညှိနှိုင်းအစည်းအဝေးသို့ တိုင်းဒေသကြီးဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင် ဝန်ကြီးများ၊ ဌာနဆိုင်ရာဦးစီးကော်မတီ၊ လုပ်ငန်းကော်မတီဝင်များ တက်ရောက် ခဲ့ကြသည်။ လုပ်ငန်းညှိနှိုင်းအစည်းအဝေးတွင် တိုင်းဒေသကြီးဝန်ကြီးချုပ်က“ (၇၆)နှစ်မြောက် လွတ်လပ်ရေးနေ့အခမ်းအနား အောင်မြင်စွာကျင်းပနိုင်ရေးအတွက် ဦးစီးကော်မတီ၊ လုပ်ငန်း ကော်မတီများ၏ ဆောင်ရွက်ပြီးစီးမှု အခြေအနေများအားတင်ပြရန်ဖြစ်ပါကြောင်း၊ လွတ်လပ်ရေး နေ့အခမ်းအနားတွင် ခရိုင်အလိုက် သစ်သီးဝလံ၊ ပန်းမန်နှင့် MSMEs ကုန်ထုတ်ပြခန်းများ၊ ဌာနဆိုင်ရာပြခန်းများကိုလည်း ထည့်သွင်းပြသသွားမည်ဖြစ်ပါကြောင်း၊ အားကစားပြိုင်ပွဲများ ကိုလည်း ကြိုတင်ပြုလုပ်လျှက်ရှိပြီး လွတ်လပ်ရေးနေ့တွင် ဗိုလ်လုပွဲနှင့် ပျော်ပွဲရွှင်ပွဲများ ကိုလည်းပြုလုပ်သွားမှာဖြစ်ပါကြောင်း၊ ခရိုင်အလိုက်ပြခန်းများနှင့် ဌာနဆိုင်ရာ ပြခန်းများ အနေဖြင့်လည်း တစ်ကြိမ်နှင့်တစ်ကြိမ်ပိုမိုတိုးတက်မှုရှိရန်လိုအပ်ပြီး ပြည်သူလူထုအား ပိုမိုအသိပညာများပေးရန် လိုအပ်မည်ဖြစ်ပါကြောင်းနှင့် အားလုံးကစုစုစည်းစည်း ပူးပေါင်း ဆောင်ရွက်မှုကောင်းကောင်းဖြင့် ဆောင်ရွက်သွားရမည်ဖြစ်ပါကြောင်း၊ (၇၆)နှစ်မြောက် လွတ်လပ်ရေးနေ့ အခမ်းအနား အောင်မြင်စွာကျင်းပနိုင်ရေးအတွက် အစည်းအဝေးသို့ တက်ရောက်လာသည့် ကော်မတီများကလည်း ဝိုင်းဝန်းဆွေးနွေးပေးကြစေလိုကြောင်း” အမှာစကား ပြောကြားသည်။ ဆက်လက်၍ (၇၆)နှစ်မြောက် လွတ်လပ်ရေးနေ့အခမ်းအနားကျင်းပရေးလုပ်ငန်းကော်မတီ အတွင်းရေးမှူးများက ကော်မတီများအလိုက် ဆောင်ရွက်သွားမည့် လုပ်ငန်းများအား ရှင်းလင်းဆွေးနွေး တင်ပြမှုအပေါ် တိုင်းဒေသကြီးဝန်ကြီးချုပ်က လိုအပ်သည်များကို ဖြည့်စွက်ဆွေးနွေးခဲ့ပြီး (၇၆)နှစ်မြောက် လွတ်လပ်ရေးနေ့အခမ်းအနား အောင်မြင်စွာကျင်းပ နိုင်ရေးအတွက် ကော်မတီများအလိုက် ပေါင်းစပ်ညှိနှိုင်းဆောင်ရွက်ပေးခဲ့ကြောင်းသိရသည်။

တိုင်းဒေသကြီးဝန်ကြီးချုပ်နှင့်အဖွဲ့သည် (၇၆)နှစ်မြောက် လွတ်လပ်ရေးနေ့ကို ကြိုဆိုဂုဏ်ပြုသောအားဖြင့် ပုသိမ်မြို့နယ်စည်ပင်သာယာရေးအဖွဲ့နှင့် ပြည်သူလူထုပူးပေါင်းဆောင်ရွက်သော ပုသိမ်မြို့၊ အမှတ်(၁) ရပ်ကွက်၊ ငဝန်ကျွန်းသာ(၁၁)လမ်း ကွန်ကရစ်လမ်းသစ် ဖွင့်ပွဲအခမ်းအနားကို တက်ရောက်ခဲ့သည်။ ဦးစွာ ငဝန်ကျွန်းသာ(၁၁)လမ်း ကွန်ကရစ်လမ်းသစ်ဖွင့်ပွဲ အထိမ်းအမှတ်လက်ဆောင်ပစ္စည်းအား တိုင်းဒေသကြီးဝန်ကြီးချုပ်နှင့် လမ်းပန်းဆက်သွယ်ရေးဝန်ကြီးထံသို့ တိုင်းဒေသကြီး စည်ပင်သာယာရေးအဖွဲ့၊ ဒုတိယအင်ဂျင်နီယာမှူးကြီးနှင့် ပုသိမ်မြို့နယ်စည်ပင်သာယာရေး ကော်မတီဥက္ကဋ္ဌတို့က ပေးအပ်ခဲ့ပြီးနောက် တိုင်းဒေသကြီး ဝန်ကြီးချုပ်သည် တာဝန်ရှိသူများနှင့် အတူ ကွန်ကရစ်လမ်းသစ်အား ဖဲကြိုးဖြတ်ဖွင့်လှစ်ပေးပြီး လမ်းသစ်အားလှည့်လည်ကြည့်ရှု စစ်ဆေးခဲ့သည်။ အဆိုပါလမ်းသည် ပုသိမ်မြို့နယ်စည်ပင်သာယာရေးအဖွဲ့နှင့် ပြည်သူလူထု ပူးပေါင်းဆောင်ရွက်သောလမ်းဖြစ်ပြီး လမ်းအရှည်(၈၁၀)ပေ၊ အကျယ်(၁၀)ပေ၊ ထု(၈)လက်မ ရှိကြောင်းသိရသည်။