ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ်ဦးတင်မောင်ဝင်းသည် ဖေဖော်ဝါရီလ ၂၂ရက်နေ့ ညနေပိုင်းက တာဝန်ရှိသူများနှင့်အတူ ပုသိမ်မြို့၊ ကန်သုံးဆင့်တွင် ပြည်သူများ ကိုယ်လက်လှုပ်ရှား လေ့ကျင့်ခန်းများပြုလုပ်နိုင်ရန်နှင့် အပန်းဖြေနိုင်ရန်အတွက် ကန်သုံးဆင့် ပန်းခြံ စိမ်းလန်းစိုပြေစေရေး အဆင့်မြှင့်တင်ခြင်းလုပ်ငန်း ဆောင်ရွက်နေမှုများအား ကြည့်ရှုစစ်ဆေးခဲ့သည်။ ဦးစွာ တိုင်းဒေသကြီးဝန်ကြီးချုပ်နှင့်အဖွဲ့သည် ဂျပန်မြက်စိုက်ပျိုးခြင်း လုပ်ငန်းဆောင်ရွက်ထားရှိမှု၊ Flower Box ပြုလုပ်ထားရှိမှု၊ လျှောက်လမ်း ဖောက်လုပ်ထားရှိမှု၊ ပန်းအလှပင်များစုဆောင်းထားရှိမှုနှင့် ဘဲစာမြက်များစိုက်ပျိုးထားရှိမှုများအား ကြည့်ရှုစစ်ဆေး ခဲ့သည်။ ထို့နောက် တာဝန်ရှိသူများ၏ ကန်သုံးဆင့်ပန်းခြံ စိမ်းလန်းစိုပြေစေရေး အဆင့်မြှင့်တင် ခြင်းလုပ်ငန်း ဆက်လက်ဆောင်ရွက်မည့်အစီအစဉ်များအား ရှင်းလင်းတင်ပြမှုအပေါ် တို်ငးဒေသကြီးဝန်ကြီးချုပ်မှ အများပြည်သူများ စိတ်အေးချမ်းစွာအနားယူနိုင်စေရေး၊ မြတ်ခင်းများစနစ်တကျစိုက်ပျိုးစေရေး၊ ပျိုးဥယျာဉ်များစနစ်တကျပျိုးထောင်စေရေး၊ ပန်းအလှပင်များစနစ်တကျ စိုက်ပျိုးစေရေး၊ အမှိုက်ပုံးများထားရှိ၍ အမှိုက်များစနစ်တကျ စွန့်ပစ်စေရေးနှင့် သတ်မှတ်ကာလအတွင်း ပြီးစီးစေရေးမှာကြားခဲ့ကြောင်းသိရသည်။

ဧရာဝတီတိုင်းဒေသကြီး ၊ ကန်ကြီးထောင့်မြို့နယ်၊ ဝါးဒူးကျေးရွာ၌ မတ်လ(၂ )ရက်နေ့တွင်ကျင်းပမည့် တောင်သူလယ်သမားနေ့အခမ်းအနားတွင် ပြသရန်အတွက် စိုက်ပျိုးရေး ဦးစီးဌာနမှ ကြိုတင်ပြင်ဆောင်ရွက်ထားသည့် သီးပင်စားပင်များ၊ သစ်ပင်ပန်းမန်များနှင့် အခမ်းအနားပြုလုပ်ရန် မဏ္ဍပ်ဆောက်လုပ်နေမှုများကို တိုင်းဒေသကြီးဝန်ကြီးချုပ် ဦးတင်မောင်ဝင်းနှင့်အဖွဲ့သည် ယနေ့နံနက်ပိုင်းကသွားရောက်ကြည့်ရှုစစ်ဆေးခဲ့သည်။ ဦးစွာ ဝန်ကြီးချုပ်နှင့်အဖွဲ့သည် ဝါးဒူးကျေးရွာသို့ သွားရောက်၍ တောင်သူလယ်သမားနေ့ အတွက် စိုက်ပျိုးရေးဦးစီးဌာနမှကြိုတင်ပြင်ဆင် ဆောင်ရွက်ထားရှိမှုအခြေအနေများနှင့် အခမ်းအနားကျင်းပရန် မဏ္ဍပ်ဆောက်လုပ်နေမှုများကို ကြည့်ရှုစစ်ဆေးခဲ့ပြီး တောင်သူလယ်သမားနေ့အတွက် ကြိုတင်ပြင်ဆောင်ရွက်နေမှုအခြေအနေများအား တာဝန်ရှိသူများ၏ ရှင်းလင်းတင်ပြချက်များအပေါ် သီးပင်စားပင်များ အချန်မီသီးပွင့်စေရေး ၊ သစ်ပင်ပန်းမန်များ စိမ်းလမ်းစိုပြေနေစေရေးနှင့်အချိန်မီဖူးပွင့်စေရေး၊ မဏ္ဍပ်ဆောက်လုပ်ရာတွင် အချိုးအစား ကျနစွာဖြင့်အတိုင်းအတာတိကျမှန်ကန်စေရေး၊ နောက်ခံစာသားများ၊ အခမ်းအနားအစီအစဉ်များ စနစ်တကျပြင်ဆင်ဆောင်ရွက်ထားရှိစေရေးနှင့် စိုက်ပျိုးရေး၊ မွေးမြူရေးဆိုင်ရာပြခန်းများအပြင် လယ်ယာသုံးစက်ပစ္စည်းပြခန်းများစသည်ဖြင့် ပြခန်းများစုံလင်စွာဖြင့်အများပြည်သူ ဗဟုသုတ ရရှိစေရေး ပြသနိုင်ရေးနှင့် လိုအပ်သည်များကို ဖြည့်စွက်မှာကြားခဲ့သည်။

နိုင်ငံတော်ကာကွယ်ရေးနှင့် လုံခြုံရေးတာဝန်ကို စွမ်းစွမ်းတမံ ထမ်းဆောင်လျက်ရှိသော အရာရှိ၊ စစ်သည်များအတွက် စားသောက်ဖွယ်ရာများ ပေးအပ်လှူဒါန်းခြင်းကို ဖေဖော်ဝါရီလ ၂၁ ရက်နေ့ ညနေပိုင်းက ဧရာဝတီတိုင်းဒေသကြီး၊ ပုသိမ်မြို့၊ ဧရာရွှေဝါခန်းမတွင် ပြုလုပ်ခဲ့ပါသည်။ ဦးစွာ တိုင်းဒေသကြီးဝန်ကြီးချုပ် ဦးတင်မောင်ဝင်းသည် တိုင်းဒေသကြီးအစိုးရအဖွဲ့ဝင် များနှင့်အတူ ပုသိမ်မြို့၊ ဧရာရွှေဝါခန်းမတွင် နိုင်ငံတော်ကာကွယ်ရေးနှင့် လုံခြုံရေးတာဝန်ကို စွမ်းစွမ်းတမံ ထမ်းဆောင်လျက်ရှိသည့် လုံခြုံရေးတပ်ဖွဲ့ဝင်များအတွက် ဧရာဝတီတိုင်းဒေသကြီး အစိုးရအဖွဲ့မှဦးဆောင်၍ တိုင်းဒေသကြီးအတွင်းရှိ ခရိုင်၊ မြို့နယ်များမှ စုပေါင်းပေးပို့လှူဒါန်းသည့် ငါးနီတူခြောက်ကြော်၊ ငါးပိကြော်၊ ငံပြာရည်ကြော် အစရှိသည့် စားသောက်ဖွယ်ရာ စုစုပေါင်း(၁၂၄၇)ပိဿာအား တိုင်းဒေသကြီးဝန်ကြီးချုပ်က တာဝန်ရှိသူ တစ်ဦးထံသို့ ပေးအပ် လှူဒါန်းခဲ့သည်။ ထို့နောက် တိုင်းဒေသကြီးဝန်ကြီးချုပ်နှင့်အစိုးရအဖွဲ့ဝင်များသည် မြန်မာနိုင်ငံရဲတပ်ဖွဲ့ဝင်များ၊ မြန်မာနိုင်ငံမီးသတ်တပ်ဖွဲ့ဝင်များနှင့် အထွေထွေအုပ်ချုပ်ရေးဦးစီးဌာန ဝန်ထမ်းများမှ စားသောက်ဖွယ်ရာများအား သွားရောက်ပို့ဆောင်မည့် မော်တော်ယာဉ်ပေါ်သို့ တင်ဆောင်နေမှုများကို ကြည့်ရှအားပေးခဲ့ပါသည်။

ဧရာဝတီတိုင်းဒေသကြီး၊ ပုသိမ်ခရိုင်၊ ငပုတောမြို့နယ်၊ ဟိုင်းကြီးကျွန်းမြို့၊ ဇီးချိုင်ကျေးရွာအုပ်စုတွင် တည်ထားကိုးကွယ်တော်မူသည့် မဟာမကုဋရံသီဆံတော်ရှင် မြတ်မော်တင်စွန်း စေတီတော်၏ ရင်ပြင်တော်တိုးချဲ့တည်ဆောက်ခြင်းအတွက် (ဧကာဒသမအကြိမ်) အလှူငွေ ပေးအပ်လှူဒါန်းပွဲအခမ်းအနားကို ယနေ့မွန်းလွဲပိုင်းက ပုသိမ်မြို့၊ ဧရာရွှေဝါခန်းမ၌ ပြုလုပ်ခဲ့သည်။ အလှူငွေပေးအပ်ပွဲတွင် တိုင်းဒေသကြီးဝန်ကြီးချုပ်က “ယနေ့ပြုလုပ်သည့် အခမ်းအနားသည် ဆံတော်ရှင်မြတ်မော်တင်စွန်းစေတီတော် ရင်ပြင်တော်တိုးချဲ့ခြင်း နှင့် ဘက်စုံမွမ်းမံပြင်ဆင် တည်ဆောက်ခြင်းအတွက် ဧကာဒသမအကြိမ်မြောက် အလှူငွေပေးအပ်ပွဲသို့တက်ရောက်လာသည့် စေတနာရှင်၊ အလှူရှင်များအား ကျေးဇူးတင်ဝမ်းမြောက်ပါကြောင်း၊ မြတ်မော်တင်စွန်းစေတီတော် မြတ်ကြီးအား နိုင်ငံတဝှမ်းမှ လာရောက်ဖူးမြော်လျက်ရှိရာ ဘုရားဖူးပြည်သူများ စိတ်ချမ်းမြေ့စွာ ဖူးမြှော်နိုင်ရေးအတွက် ယခုနှစ် တပေါင်းလ ဘုရားပွဲတော်အမီ အချောသတ်လုပ်ငန်းများ ပြီးစီး စေရေးဆောင်ရွက်လျက်ရှိပါကြောင်း၊ တည်ဆောက်ရေးလုပ်ငန်းသုံးပစ္စည်းများ အရည်အသွေး ပြည့်မီစေရေးအတွက်လည်း အလေးထားဆောင်ရွက်လျက်ရှိပါကြောင်း၊ ရင်ပြင်တော်တိုးချဲ့ ခြင်းနှင့် ဘက်စုံမွမ်းမံပြင်ဆင်တည်ဆောက်ရာတွင် အနယ်နယ်အရပ်ရပ်မှ ပါဝင်လှူဒါန်းခဲ့ကြသော အလှူရှင်များ၏ လှူဒါန်းမှုအစုစုတို့အတွက်လည်း ဝမ်းမြောက်ဂုဏ်ယူပါကြောင်း” ပြောကြား ခဲ့ပြီး တိုင်းဒေသကြီးဝန်ကြီးချုပ်က အလှူရှင်များ ကြည်ညိုသဒ္ဒါပွားများနိုင်ရန် မဟာမကုဋရံသီ ဆံတော်ရှင် မြတ်မော်တင်စွန်းစေတီ ရင်ပြင်တော်တိုးချဲ့တည်ဆောက်ခြင်းလုပ်ငန်း ဆောင်ရွက် နေမှုအခြေအနေများ၊ တည်ဆောက်ရေးလုပ်ငန်း ဆက်လက်ဆောင်ရွက်မည့် အခြေအနေ မှတ်တမ်းဗီဒီယိုအား ရှင်းလင်းပြသခဲ့သည်။ ထို့နောက် တိုင်းဒေသကြီးဝန်ကြီးချုပ်နှင့်ဇနီး မိသားစုကလှူဒါန်းသည့် အလှူငွေများကို ပေးအပ်ရာ တိုင်းဒေသကြီးစီးပွားရေးရာဝန်ကြီးက လက်ခံရယူခဲ့ပြီး ဂုဏ်ပြုမှတ်တမ်းလွှာများ ပြန်လည်ပေးအပ်ခဲ့သည်။ ထို့နောက် တိုင်းဒေသကြီးလုံခြုံရေးနှင့်နယ်စပ်ရေးရာဝန်ကြီး၊ စီးပွား ရေးရာဝန်ကြီး၊ သယံဇာတရေးရာဝန်ကြီး၊ လူမှုရေးရာဝန်ကြီး၊ လမ်းပန်းဆက်သွယ်ရေးဝန်ကြီးနှင့် တိုင်းရင်းသားရေးရာဝန်ကြီးဌာနလက်အောက်ရှိ ဌာနဆိုင်ရာများ၊ တိုင်း၊ ခရိုင်၊ မြို့နယ် စီမံအုပ်ချုပ်ရေးအဖွဲ့များနှင့်အလှူရှင်များ၊ ကုမ္ပဏီအဖွဲ့အစည်း၊ လုပ်ငန်းရှင်များနှင့် ပြင်ပ အလှူရှင်များက အလှူငွေများ ပေးအပ်လှူဒါန်းရာ တိုင်းဒေသကြီးဝန်ကြီးချုပ်၊ စီးပွားရေးရာ ဝန်ကြီး၊ သယံဇာတရေးရာဝန်ကြီး၊ လူမှုရေးရာဝန်ကြီးတို့က လက်ခံရယူခဲ့ပြီး ဂုဏ်ပြုမှတ်တမ်း လွှာများ ပြန်လည်ပေးအပ်ခဲ့ပြီး တိုင်းဒေသကြီးဝန်ကြီးချုပ်က အလှူရှင်များအား ရင်းရင်းနှီးနှီး နှုတ်ဆက်ခဲ့ပါသည်။

ပညာရေးဝန်ကြီးဌာနနှင့် ဧရာဝတီတိုင်းဒေသကြီးအစိုးရအဖွဲ့ ပူးပေါင်းကျင်းပသည့် ဧရာဝတီတိုင်းဒေသကြီး ပုသိမ်မြို့နယ်၊ ဟင်္သာတမြို့နယ်၊ မအူပင်မြို့နယ်၊ မြောင်းမြမြို့နယ်နှင့် ဘိုကလေးမြို့နယ် အခြေခံစာတတ်မြောက်ရေးလုပ်ငန်း ဂုဏ်ပြုပွဲအခမ်းအနားကို ယနေ့ မွန်းလွဲပိုင်းက ပုသိမ်မြို့၊ မြို့တော်ခန်းမ၌ ကျင်းပခဲ့ရာ အခမ်းအနားသို့ အခြေခံစာတတ်မြောက်ရေးလုပ်ငန်း တိုင်းဒေသကြီးကြီးကြပ်မှုကော်မတီနာယက တိုင်းဒေသကြီးဝန်ကြီချုပ် ဦးတင်မောင်ဝင်း၊ အခြေခံစာတတ်မြောက်ရေးကြီးကြပ်မှုဗဟိုကော်မတီ ဒုတိယဥက္ကဌ ပညာရေးဝန်ကြီးဌာန ဒုတိယဝန်ကြီး ဒေါက်တာဇော်မြင့်၊ တိုင်းဒေသကြီးအစိုးရအဖွဲ့ဝင် ဝန်ကြီးများ၊ ပညာရေးဝန်ကြီးဌာနမှတာဝန်ရှိသူများ၊ နည်းပြဆရာ၊ ဆရာမများ၊ စာသင်သားများ တက်ရောက်ကြသည်။ ဦးစွာ အခြေခံစာတတ်မြောက်ရေးလုပ်ငန်း တိုင်းဒေသကြီးကြီးကြပ်မှုကော်မတီနာယက၊ တိုင်းဒေသကြီးဝန်ကြီးချုပ်က“ အကြောင်းအမျိုးမျိုးကြောင့် ကျောင်းသင်ပညာရေးနည်းလမ်း ဖြင့် သင်ကြားခွင့်မရရှိခဲ့သူများ၊ ကျောင်းမနေခဲ့ရသူများကို ကျောင်းပြင်ပ ပညာရေးနည်းလမ်းဖြင့် သင်ကြားပေးနိုင်ရေးအတွက် တိုင်းဒေသကြီးအစိုးရအဖွဲ့အနေဖြင့် စာတတ်မြောက်ရေးလုပ်ငန်း ကြီးကြပ်မှုကော်မတီအဆင့်ဆင့်ဖွဲ့စည်းပြီး (စာမတတ်သူ) စာသင်သားများစာရင်း ကောက်ယူခြင်း၊ စာသင်ဝိုင်းစာရင်းများစုဖွဲ့ခြင်းနှင့် စေတနာလုပ်အားပေး နည်းပြ၊ ကြီးကြပ် စာရင်းတို့ကိုလည်း ကောက်ယူဆောင်ရွက်ခဲ့ပြီး မြို့နယ်(၅)မြို့နယ်မှ စာသင်သားများအား ၂၀၂၃ ခုနှစ် ဒီဇင်ဘာလ (၂၄)ရက်နေ့မှစ၍ ၂၀၂၄ ခုနှစ် ဖေဖော်ဝါရီလ (၁)ရက်နေ့အထိ အခြေခံမြန်မာစာဘာသာရပ်နှင့် အခြေခံသင်္ချာဘာသာရပ်များကို (၁)ရက်လျှင် ပျမ်းမျှ(၃)နာရီ၊ ရက်အားဖြင့် (၄၀)ရက်၊ နာရီပေါင်း (၁၂၀)ပြည့်မီအောင် သင်ကြားပေးခဲ့ ပါကြောင်း၊ သင်ကြားပြသပေးခဲ့ကြသည့် နည်းပြများ၊ ကြီးကြပ်များနှင့် စာသင်ဝိုင်းများအား အဖက်ဖက်မှကူညီပံ့ပိုးပေးခဲ့ကြသည့် တာဝန်ရှိသူများအားလုံးအား တိုင်းဒေသကြီးအစိုးရအဖွဲ့ အနေဖြင့် မှတ်တမ်းတင် ဂုဏ်ပြုပါကြောင်း၊ ၂၀၁၅ ခုနှစ်၊ ကိုရီးယားသမ္မတနိုင်ငံ အင်ချွန်းမြို့တွင် ကျင်းပပြုလုပ်ခဲ့သည့် ကမ္ဘာ့ပညာရေးဝန်ကြီးများညီလာခံတွင် ထုတ်ပြန်ထားသည့် အင်ချွန်း ကြေညာစာတမ်းပါ လုပ်ငန်းစဉ်မူဘောင်တွင်ပါရှိသော “သက္ကရာဇ် ၂၀၃၀ ပြည့်နှစ် အရောက်တွင် ကမ္ဘာ့နိုင်ငံအသီးသီးရှိ လူငယ်များနှင့် အရွယ်ရောက်ပြီးသူ အမျိုးသားများ၊ အမျိုးသမီးများ အားလုံး အရေး၊ အဖတ်နှင့်အတွက်အချက်တက်မြောက်စေရေး”ဆိုသည့် ဘုံရည်မှန်းချက် ပန်းတိုင်ကို ပြည့်မီနိုင်အောင် မြန်မာနိုင်ငံတွင် အမျိုးသားပညာရေး မဟာဗျူဟာစီမံကိန်းများရေးဆွဲပြီး နှစ်အလိုက်အကောင်အထည်ဖော် ဆောင်ရွက်လျက်ရှိနေပါကြောင်း၊ ကျေးလက်ဒေသ ပြည်သူများနှင့် တိုင်းရင်းသားပြည်သူများအားလုံး အသိပညာမြင့်မားပြီး စိတ်ဓာတ်နှင့် တွေးခေါ်မှုစွမ်းရည်မြင့်မားလာစေရန် "လူတိုင်းအတွက် ပညာရေး" (Education For All - EFA) စာတတ်မြောက်ရေးလုပ်ငန်းနှင့် နောက်ဆက်တွဲလုပ်ငန်းဖြစ်သည့် စဉ်ဆက်ပညာရေးလုပ်ငန်း ဖော်ဆောင်ရေးတို့အတွက် အားလုံးပူးပေါင်းဆောင်ရွက်ရမှာဖြစ်ကြောင်း၊ ယခုနှစ် ဧပြီလတွင် ဆက်လက်ဆောင်ရွက်သွားမည့် စဉ်ဆက်ပညာရေးလုပ်ငန်းနှင့် မြို့နယ်အားလုံးတွင် ဆောင်ရွက် ရမည့် နိုင်ငံတော်၏ စာတတ်မြောက်ရေးလုပ်ငန်းအတွက် တိုင်းဒေသကြီးအစိုးရအဖွဲ့အနေဖြင့် ဦးစီးကော်မတီနှင့် လုပ်ငန်းကော်မတီများကိုဖွဲ့စည်းပြီး ယခုလကုန်ပိုင်းမှစ၍ စာသင်သား စာရင်းများကောက်ယူခြင်း၊ စာသင်ဝိုင်းများ စုဖွဲ့ခြင်းနှင့် နည်းပြများနှင့် ကြီးကြပ်များကို သက်ဆိုင်ရာတက္ကသိုလ်၊ ကောလိပ်များနှင့် ဌာနဆိုင်ရာများ၏ စေတနာလုပ်အားများကိုရယူ၍ စာတတ်မြောက်ရေးလုပ်ငန်းအတွက် လုပ်ငန်းအစီအစဉ်များ ရေးဆွဲဆောင်ရွက်ကြရမည် ဖြစ်ကြောင်း၊ အခြေခံ စာတတ်မြောက်ရေးလုပ်ငန်းကြီးကြပ်မှု ကော်မတီအဆင့်ဆင့်မှ တာဝန် ရှိသူများအား တိုင်းဒေသကြီးအစိုးရအဖွဲ့မှ အထူးပင်ကျေးဇူးတင်ရှိပါကြောင်း”အဖွင့်အမှာ စကား ပြောကြားခဲ့သည်။ ဆက်လက်၍ အခြေခံစာတတ်မြောက်ရေးလုပ်ငန်း ကြီးကြပ်မှုဗဟိုကော်မတီ ဒုတိယ ဥက္ကဋ္ဌ၊ ပညာရေးဝန်ကြီးဌာန၊ ဒုတိယဝန်ကြီးက ဂုဏ်ပြုစကားများ ပြောကြားခဲ့ပြီးနောက် တိုင်းဒေသကြီးဝန်ကြီးချုပ်နှင့် ဧည့်သည်တော်များသည် ကျောင်းပြင်ပပညာရေးကဏ္ဍ၏ စာတတ်မြောက်ရေးလုပ်ငန်း ပညာပေး “မနီပြုံးနိုင်ပြီ” ဇာတ်လမ်းတိုအား ကြည့်ရှုအားပေးခဲ့သည်။ ထို့နောက် ဧရာဝတီတိုင်းဒေသကြီး မြို့နယ်ငါးမြို့နယ်မှ အခြေခံစာတတ်မြောက်ရေး လုပ်ငန်းတွင် ကြီးကြပ်ပါဝင်ဆောက်ရွက်ခဲ့သည့် မြို့နယ်စာတတ်မြောက်ရေးလုပ်ငန်း ကြီးကြပ်မှု ကော်မတီ ဥက္ကဋ္ဌများအား ဂုဏ်ပြုလက်မှတ်များကို တိုင်းဒေသကြီး ဝန်ကြီးချုပ်ကလည်းကောင်း၊ ဧရာဝတီတိုင်းဒေသကြီးအစိုးရအဖွဲ့နှင့် မြို့နယ်(၅)မြို့နယ်မှ အခြေခံစာတတ်မြောက်ရေး လုပ်ငန်းတွင် သင်ကြားပေးခဲ့သည့် စေတနာလုပ်အားပေး နည်းပြကြီးကြပ် ကိုယ်စားလှယ် များအား ဂုဏ်ပြုလက်မှတ်များကို ပညာရေးဝန်ကြီးဌာန၊ ဒုတိယဝန်ကြီးကလည်းကောင်း၊ ဧရာဝတီတိုင်းဒေသကြီး ပညာရေးမှူးရုံးနှင့် မြို့နယ်(၅)မြို့နယ်မှ အခြေခံစာတတ်မြောက်ရေး လုပ်ငန်းတွင် တက်ရောက်သင်ယူခဲ့ကြသည့် စာသင်သားကိုယ်စားလှယ်များအား သင်ယူ ပြီးမြောက်ကြောင်း လက်မှတ်များကို ကျောင်းပြင်ပနှင့် တစ်သက်တာပညာရေးဦးစီးဌာန ညွှန်ကြားရေးမှူးချုပ်ကလည်းကောင်း ပေးအပ်ခဲ့ပြီး အခြေခံစာတတ်မြောက်ရေးလုပ်ငန်းတွင် သင်ယူတတ်မြောက်ခဲ့သည့် စာသင်သားများကိုယ်စား စာသင်သားကိုယ်စားလှယ်တစ်ဦးက ဝမ်းမြောက်စကားများပြောကြားခဲ့ပြီးနောက် ဝန်ကြီးချုပ်နှင့်ဧည့်သည်တော်များသည် မြို့နယ် (၅)မြို့နယ်မှ အခြေခံစာတတ်မြောက်ရေးလုပ်ငန်းတွင် သင်ကြားပေးခဲ့သည့် မြို့နယ်အလိုက် စေတနာလုပ်အားပေး နည်းပြ၊ ကြီးကြပ်၊ စာသင်သားများနှင့် စုပေါင်းမှတ်တမ်းတင် ဓာတ်ပုံများရိုက်ကူးခဲ့ကြသည်။