အိမ်မဲမြို့နယ်တွင် သစ်စိမ်းမြေသြဇာ (ပိုက်ဆံလျှော်) မျိုးစေ့ထုတ်စိုက်ခင်းရိတ်သိမ်းပွဲနှင့် မျိုးစေ့ပေးအပ်ပွဲကျင်းပ
ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ်နှင့်အဖွဲ့သည် ဧပြီလ ၁၉ရက်နေ့က မြောင်းမြခရိုင်၊ အိမ်မဲမြို့နယ်၊ ကွင်းယားတံခွန်တိုင်ကျေးရွာ၊ ကွင်းအမှတ်၊ (၉၀-က) ကွင်းယားမြောက်၊ တောင်သူဦးထိန်ဝင်း၏ လယ်မြေ (၁) ဧကရှိ ပိုက်ဆံလျှော် (သစ်စိမ်းမြေသြဇာ) မျိုးစေ့ထုတ်စိုက်ခင်းတွင် ပိုက်ဆံလျှော်ရိတ်သိမ်း၍ မျိုးစေ့ထုတ်နေမှုအား ကြည့်ရှုအားပေးခဲ့ပါသည်။
ထို့နောက် တိုင်းဒေကြီးဝန်ကြီးချုပ်မှ တောင်သူများနှင့်တွေ့ဆုံ၍ မြေဆီလွှာအာဟာရဓါတ်များ ပြန်လည်ကောင်းမွန်လာစေရေးအတွက် သစ်စိမ်းမြေသြဇာ(ပိုက်ဆံလျှော်)ထည့်သွင်း စိုက်ပျိုး၍ မြေပြင်ခြင်းလုပ်ငန်းများ ဆောင်ရွက်ကြရန်လိုပါကြောင်း၊ သစ်စိမ်းမြေသြဇာ(ပိုက်ဆံလျှော်)စိုက်ပျိုးခြင်းဖြင့် ရရှိနိုင်သည့် အကျိုးကျေးဇူးများအားတောင်သူများ ကျယ်ကျယ်ပြန်ပြန့် သိရှိအောင် ဆောင်ရွက်ရန် လမ်းညွှန်မှာကြားခဲ့ပြီး ဒေသခံတောင်သူများအား သစ်စိမ်းမြေသြဇာ(ပိုက်ဆံလျှော်)မျိုးစေ့များ ထောက်ပံ့ပေးအပ်ခဲ့ပါသည်။