ကျုံပျော်မြို့နယ်၊ သောင်ကြီး-ဆိပ်ကြီးလမ်း၊ ဒါးကချောင်းကူးတံတားတည်ဆောက်ပြီးစီးမှု၊ ဟင်္သာတမြို့နယ်၊ ဧရာဝတီ-ဟင်္သာတတာနှင့် ဟင်္သာတကမ်းနားတာအတွင်း ဖြတ်တာ အသစ်တည်ဆောက်ခြင်းနှင့် ဟင်္သာတမြို့နယ်၊ ဖောင်ဆိပ်ကျေးရွာ ကမ်းထိန်းလုပ်ငန်း ဆောင်ရွက်နေမှုအခြေအနေများအား ကွင်းဆင်းကြည့်ရှုစစ်ဆေးခြင်း
၂၀၂၁ ခုနှစ်၊ မေလ၊ (၁၈)ရက်နေ့ ၊ (၀၈၃၀)အချိန်တွင် ဧရာဝတီတိုင်းဒေသကြီး စီမံအုပ်ချုပ်ရေးကောင်စီဥက္ကဋ္ဌ ဦးရဲမြင့်သည် ကောင်စီအဖွဲ့ဝင်(၁) ဗိုလ်မှူးကြီးကျော်စွာလှိုင်၊ ကောင်စီအဖွဲ့ဝင်(၂) ဦးတင်အေး၊ ကောင်စီအဖွဲ့ဝင်(၅) ရဲမှူးကြီးတင်ဇော်ထွန်း၊ ကောင်စီ အတွင်းရေးမှူး ဦးဝေဇင်ထွန်း၊ တိုင်းဒေသကြီးကျေးလက်လမ်းဖွံ့ဖြိုးရေးဦးစီးဌာန တိုင်းဦးစီးမှူး ဦးလင်းထိုက်၊ ပုသိမ်ခရိုင်အုပ်ချုပ်ရေးမှူး ဦးလင်းကိုကိုနှင့် ခရိုင်/မြို့နယ် အဆင့်တာဝန်ရှိသူများလိုက်ပါလျက် ပုသိမ်ခရိုင်၊ ကျုံပျော်မြို့နယ်၊ သောင်ကြီး-ဆိပ်ကြီးလမ်း၊ မိုင်(၁/၂-၁/၃)၊ ဒါးကချောင်းကူးတံတားတည်ဆောက် ပြီးစီးမှုအခြေအနေအား ကြည့်ရှု စစ်ဆေးခဲ့ပြီး တိုင်းဒေသကြီးကျေးလက်လမ်းဖွံ့ဖြိုးရေးဦးစီးဌာန တိုင်းဦးစီးမှူး ဦးလင်းထိုက်မှ တံတားဆိုင်ရာအချက်အလက်များအားရှင်းလင်းတင်ပြရာ ဒါးကချောင်းကူးတံတားသည် ၈.၁၂.၂၀၂၀ ရက်နေ့တွင် စတင်တည်ဆောက်ခဲ့ပြီး (၉၀%) တည်ဆောက်ပြီးဖြစ်ကြောင်း၊ ရန်ပုံငွေရရှိမှုမှာ၂၀၁၈-၂၀၁၉ ဘဏ္ဍာနှစ် ကျပ်(၅၆.၅၀)သန်း (ပြည်ထောင်စုငွေလုံးငွေရင်း)၊ ၂၀၁၉-၂၀၂၀ ဘဏ္ဍာနှစ်ကျပ် (၃၀၀.၀၀)သန်း(ပြည်ထောင်စု ငွေလုံးငွေရင်း)၊ ၂၀၁၉-၂၀၂၀ ဘဏ္ဍာနှစ် ကျပ် (၁၀၀.၀၀)သန်း(ပြည်ထောင်စုဖြည့်စွက်)၊ ၂၀၂၀-၂၀၂၁ ဘဏ္ဍာနှစ် ကျပ်(၂၆၃.၀၀)သန်း(ပြည်ထောင်စုငွေလုံးငွေရင်း)ဖြစ်ကြောင်း၊ တံတားအမျိုးအစားမှာ အပေါ်ထည်- 18.3 m RC Girder ×5 Span သံကူကွန်ကရစ် ကြမ်းခင်းနှင့်လက်ရန်း၊ ကိုယ်ထည်- သံကူကွန်ကရစ်ကမ်းကပ်ခုံ၊ အုတ်မြစ်- 1.0 m Æ Bored Pile Foundation ဖြစ်ကြောင်း၊ တံတား၏အရှည်မှာ (၉၁.၃၄)မီတာ (၃၀၀)ပေရှိပြီး ခွင့်ပြုယာဉ်အလေးချိန်မှာ (၂၀)တန်ဖြစ်ကြောင်း၊ ကျေးရွာစုစုပေါင်း(၈)ရွာ၊ အိမ်ခြေ(၇၀၁)အိမ်၊ လူဦးရေ(၃၃၃၉)ဦးတို့ အတွက် အကျိုးပြုမည်ဖြစ်ကြောင်း ရှင်းလင်းတင်ပြခဲ့ပြီး တိုင်းဒေသကြီး စီမံအုပ်ချုပ်ရေး ကောင်စီဥက္ကဋ္ဌမှ လိုအပ်သည်များကို လမ်းညွှန်မှာကြားခဲ့ပါသည်။
ဆက်လက်၍ ကောင်စီဥက္ကဋ္ဌနှင့်အဖွဲ့သည်(၁၀၃၀)အချိန်၌ ဟင်္သာတခရိုင်၊ ဟင်္သာတမြို့နယ်တွင် ဆည်မြောင်းနှင့်ရေအသုံးချမှု စီမံခန့်ခွဲရေးဦးစီးဌာနမှ ဆောင်ရွက်လျက်ရှိသည့် ဧရာဝတီ-ဟင်္သာတတာနှင့် ဟင်္သာတကမ်းနားတာအတွင်း ဖြတ်တာအသစ်တည်ဆောက်ခြင်း လုပ်ငန်းသို့ သွားရောက်ကြည့်ရှုစစ်ဆေးခဲ့ပြီး တိုင်းဒေသကြီးဆည်မြောင်းနှင့်ရေအသုံးချမှု စီမံခန့်ခွဲရေးဦးစီးဌာနတိုင်းဦးစီးမှုးဦးကြည်ဆွေမှ လုပ်ငန်းဆောင်ရွက်ပြီးစီးမှုအခြေအနေအား ရှင်းလင်း တင်ပြခဲ့ရာ ကောင်စီဥက္ကဋ္ဌမှ လိုအပ်သည်များကို လမ်းညွှန်မှာကြားခဲ့ပါသည်။
ထို့နောက် ကောင်စီဥက္ကဋ္ဌနှင့်အဖွဲ့သည် (၁၀၅၀)အချိန်တွင် ရေအရင်းအမြစ်နှင့် မြစ်ချောင်းများဖွံ့ဖြိုးတိုးတက်ရေးဦးစီးဌာနမှ ဆောင်ရွက်လျက်ရှိသည့် ဟင်္သာတမြို့နယ်၊ ဖောင်ဆိပ်ကျေးရွာ ကမ်းထိန်းလုပ်ငန်း၊ အခြေထိန်း Geo-Bag များ အလျား(၅၅၀)ပေ ချထားခြင်းလုပ်ငန်းခွင်သို့ သွားရောက်ကြည့်ရှုစစ်ဆေးခဲ့ပြီး လုပ်ငန်းဆောင်ရွက်နေမှုအခြေအနေများအား တိုင်းဒေသကြီး ရေအရင်းအမြစ်နှင့် မြစ်ချောင်းများဖွံ့ဖြိုးတိုးတက်ရေးဦးစီး ဌာနမှလက်ထောက်ညွှန်ကြားရေးမှူး ဦးမျိုးဝင်းမှ ရှင်းလင်းတင်ပြခဲ့ရာ ကမ်းထိန်းလုပ်ငန်းအား တိုင်းဒေသကြီး မူလခွင့်ပြုရန်ပုံငွေ(၁၇၃.၉)သန်းဖြင့် ဆောင်ရွက်ခြင်းဖြစ်ကြောင်း၊ ၇.၁.၂၀၂၁ ရက်နေ့တွင် လုပ်ငန်းစတင်ဆောင်ရွက်ပြီး ၃၀.၅.၂၀၂၁ရက်နေ့တွင် လုပ်ငန်း ပြီးဆုံးမည်ဖြစ်ကြောင်း ရှင်းလင်းတင်ပြခဲ့ပြီး တိုင်းဒေသကြီးစီမံအုပ်ချုပ်ရေးကောင်စီဥက္ကဋ္ဌမှ လုပ်ငန်းများအား သတ်မှတ်ကာလအတွင်း ပြီးပြတ်အောင်ဆောင်ရွက်ကြရန်နှင့် လိုအပ် သည်များကိုလမ်းညွှန်မှာကြားခဲ့ကြောင်း သတင်းရရှိပါသည်။