ဟင်္သာတခရိုင်၊ လေးမျက်နှာမြို့နယ်ရေဘေးကယ်ဆယ်ရေးလုပ်ငန်းများအတွက် အလှူရှင်များမှ အလှူငွေများ၊ ဆေးဝါး၊ အဝတ်အထည်နှင့် စားသုံးကုန်ပစ္စည်းများလှူဒါန်း
ပုသိမ် စက်တင်ဘာ ၃၀
ဧရာဝတီတိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ(၁)တွင် ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့နယ်ရေဘေးကယ်ဆယ်ရေးလုပ်ငန်းအတွက် မြန်မာနိုင်ငံဂီတအစည်းအရုံး (ဗဟို)၊ တိုင်း/ ပြည်နယ်/ မြို့နယ် ဂီတအစည်းအရုံးများမှ ဒုတိယ အကြိမ် ကျပ်သိန်းတစ်ထောင့်နှစ်ရာနှင့် ကျပ်သိန်းတစ်ထောင်ခန့်တန်ဖိုးရှိသော ဆေးဝါး၊ အဝတ် အထည်နှင့် စားသုံးကုန်ပစ္စည်းများနှင့် မြန်မာနိုင်ငံအဝေးပြေးကုန်စည်ပို့ဆောင်ရေး ဝန်ဆောင်မှုလုပ်ငန်းရှင်များအသင်း (MHFTSA) တို့က ကျပ်သိန်း(၁၅ဝ)အား လာရောက်လှူဒါန်းရာ တိုင်းဒေသကြီးဝန်ကြီးချုပ်က လက်ခံရယူခဲ့ပြီး ဂုဏ်ပြုမှတ်တမ်းလွှာများ ပြန်လည်ပေးအပ်၍ ကျေးဇူးတင်စကားများ ပြောကြားခဲ့ပြီးနောက် တိုင်းဒေသကြီးအစိုးရအဖွဲ့ရုံး၊ ညွှန်ကြားရေးမှူးမှ ငဝန်တာ၏ အောက်ခံမြစ်ကျိုးအင်းသဲကြောမှ ထူးပေါက်၍ ရေဖြတ်သန်းစီးဆင်းပြီး တာတမံနိမ့်ကျမှုဖြစ်ပွားကာ ရေကျော်စီးဝင်မှုအခြေအနေများ၊ အရေးပေါ်တုန့်ပြန်ဆောင်ရွက်မှု အခြေအနေများ၊ ကူညီကယ်ဆယ်ရေးလုပ်ငန်းဆောင်ရွက်မှုများနှင့် ပြန်လည်ထူထောင်ရေး လုပ်ငန်းများဆောင်ရွက်နေမှုများကို ရှင်းလင်းတင်ပြခဲ့သည်။
