ပုသိမ် ဇွန် ၁

ဧရာဝတီတိုင်းဒေသကြီးဝန်ကြီးချုပ်နှင့်အဖွဲ့သည် ဟင်္သာတခရိုင်၊ လေးမျက်နှာမြို့နယ် အခြေခံပညာအထက်တန်းကျောင်းသို့ သွားရောက်ရှိ၍ ၂၀၂၆- ၂၀၂၇ ပညာသင်နှစ်အတွက် ကျောင်းသား၊ ကျောင်းသူများ စတင်ကျောင်းတက်ရောက် ပညာသင်ကြားနေမှုများကို လိုက်လံ ကြည့်ရှုအားပေးခဲ့ပြီး‌ ကျောင်းနေအရွယ်ကလေးအားလုံးရာနှုန်းပြည့်ကျောင်းတက်ရောက်စေရေး၊ အတန်းစဉ်ကူးပြောင်းမှုများမကျန်ရှိစေရေး တာဝန်ရှိသူများအား မှာကြားခဲ့ကာ ကျောင်းသား၊ ကျောင်းသူများအား ရင်းရင်းနှီးနှီးနှုတ်ဆက်ခဲ့သည်။ ထို့နောက် တိုင်းဒေသကြီးဝန်ကြီးချုပ်သည် ကျောင်းခန်းမအား ဆက်လက်ကြည့်ရှုစစ်ဆေးခဲ့ကာ ခန်းမပြင်ဆင်ဆောင်ရွက်နိုင်ရေးအတွက် တာဝန်ရှိသူများအား မှာကြားခဲ့ပြီး လိုအပ်သည်များကို ပေါင်းစပ်ဖြည့်ဆည်းဆောင်ရွက်ပေးခဲ့ပါသည်။

ယင်းနောက် ဌာနဆိုင်ရာများ၊ ဆရာ၊ ဆရာမများနှင့် ဆက်လက်တွေ့ဆုံ၍ တိုင်းဒေသကြီးဝန်ကြီးချုပ်က“ လေးမျက်နှာမြို့နယ်အနေဖြင့် ပိုမိုဖွံ့ဖြိုးတိုးတက်စေရေးအတွက် ဌာနဆိုင်ရာများ၊ တာဝန်ရှိသူများအားလုံး ပူးပေါင်းဆောင်ရွက်ကြရမည်ဖြစ်ပါကြောင်း၊ မြို့နယ်အတွက်လိုအပ်သည့် စက်သုံးဆီအရောင်းဆိုင်နှင့် ဓာတ်အားခွဲရုံဖြစ်တည်ရေးအတွက်လည်း ဆောင်ရွက်ပေးသွားမည်ဖြစ်ပါကြောင်း၊ အကြမ်းဖက်ဖြစ်စဉ်များကြောင့် ယာယီနေရပ်စွန့်ခွာဒေသများမှ ကျောင်းတက်ရောက်သည့် ကျောင်းသား၊ ကျောင်းသူများကိုလည်း ဆရာ၊ ဆရာမများက နွေးထွေးစွာဖြင့် ဂရုစိုက်ပေးရန်လိုပါကြောင်း၊ အုပ်ချုပ်ရေးအဖွဲ့များ၊ ဌာနဆိုင်ရာများကလည်း လိုအပ်သည်များကို ဝိုင်းဝန်းပံ့ပိုးပေးကြရမည်ဖြစ်ပါကြောင်း၊ ကျောင်းသား၊ ကျောင်းသူများအတွက် အားကစားကွင်းများ ဆောင်ရွက်ပေးရန်လည်းလိုပါကြောင်း၊ ဆရာ၊ ဆရာမများအနေဖြင့် ကျောင်းသား၊ ကျောင်းသူများ အချင်းချင်း ခိုက်ရန်ဖြစ်ပွားမှုမရှိစေရေး ကြပ်မတ်ဆောင်ရွက်သွားကြရန်နှင့် ဝတ်စားဆင်ယင်မှုများကိုလည်း ဂရုပြုဝတ်စားဆင်ယင်ကြရန်မှာကြားခဲ့သည်။