‎ပုသိမ် ဖေဖော်ဝါရီ ၂၅

‎ဧရာဝတီတိုင်းဒေသကြီးဝန်ကြီးချုပ် ဦးတင်​​မောင်ဝင်းသည် (၆၄)နှစ်မြောက်တောင်သူလယ်သမားနေ့ကို ကြိုဆိုဂုဏ်ပြုသောအားဖြင့် ဖွင့်လှစ်သည့် ကျုံပျော်ခရိုင်၊ ကျုံပျော်မြို့နယ်၊ ရှားခဲပလ္လင်ကွန်ကရစ်တံတား အရှည်၁၂၀ပေ၊ အကျယ်၂၀ပေ ဖွင့်ပွဲအခမ်းအနားသို့ တက်ရောက်၍ တာဝန်ရှိသူများနှင့်အတူ ဖဲကြိုးဖြတ်ဖွင့်လှစ်ပေးပြီး စုပေါင်းမှတ်တမ်းတင် ဓာတ်ပုံရိုက်ကူး၍ ကွန်ကရစ်တံတားသစ်အား လှည့်လည်ကြည့်ရှုစစ်ဆေးကာ ဖျော်ဖြေရေး အဖွဲ့များကို ချီးမြှင့်ငွေများ ပေးအပ်ခဲ့သည်။

‎ဆက်လက်၍ ကျုံပျော်မြို့နယ်၊ ကွင်းကြီးကျေးရွာအုပ်စု၊ တောင်သူဦးသိန်းစိုး၏ စိုက်ဧက(၃)ဧကတွင် စိုက်ပျိုးထားသည့်ရေဆင်းစပ်မျိုး-၁ နေကြာမျိုးစိုက်ခင်းအား ကြည့်ရှုအားပေးပြီး ပိုးမွှားများမကျရောက်စေရေး ကြိုတင်ကာကွယ်ဆောင်ရွက်ကြရန်နှင့် ရေပေးခြင်း၊ မြေသြဇာကျွေးခြင်းလုပ်ငန်းများအပြင် အောင်မြင်ဖြစ်ထွန်းအောင် စိုက်ပျိုးဆောင်ရွက်စေရေးတို့ မှာကြားခဲ့သည်။ ‎ယင်းနောက် ကျုံပျော်မြို့နယ်၊ ဇရပ်ဆိပ်ကျေးရွာအုပ်စု ဦးဝင်းသန်း၏ ပီလောပီနံကြိတ််ခွဲစက်သို့သွားရောက်၍ ပီလောပီနံ ကြိတ်ခွဲထုတ်လုပ်နေမှုများအား ကြည့်ရှုအားပေးခဲ့ပြီး တာဝန်ရှိသူများမှ ပီလောပီနံကုန်ကြမ်းရရှိမှု၊ ကြိတ်ခွဲထုတ်လုပ်မှု၊ တင်ပို့ရောင်းချမှုအခြေအနေများကိုရှင်းလင်းတင်ပြခဲ့ရာ အရည်အသွေးကောင်းမွန်သည့် ကော်မှုန့်များထုတ်လုပ်နိုင်ရေး၊ စွန့်ပစ်ပစ္စည်းများအားအကျိုးရှိစွာပြန်လည်အသုံးပြုနိုင်ရေး၊ အောင်မြင်အောင်ဆောင်ရွက်စေရေးမှာကြားခဲ့သည်။

‎ဆက်လက်၍ ကျုံပျော်မြို့နယ်၊ ကျီးအိုင်ကျေးရွာအုပ်စု တောင်သူဦးဝင်းသန်း၏ စိုက်ဧက(၁)ဧကတွင် စိုက်ပျိုးထားသည့် Rayong-72 မျိုး ပီလောပီနံတူးဖော်နေမှုများ ကို ကြည့်ရှုအားပေးခဲ့သည်။ ဧရာဝတီတိုင်းဒေသကြီးအနေဖြင့် ပီလောပီနံစိုက်ပျိုးမှု ဧက ၃ သောင်း ၅ထောင်ကျော် စိုက်ပျိုးထားပြီး ၎င်းစိုက်ခင်းအား တူးဖော်ရာတွင် (၁)ဧက အထွက်နှုန်းအနေဖြင့် ပိဿာချိန် ၇ ထောင့် ၅ ရာကျော် ထွက်ရှိကြောင်း သိရသည်။ ‎ယင်းနောက် ၂၀၂၅- ၂၀၂၆ခုနှစ်၊ ပီလောပီနံသီးနှံ(၂)နှစ်(၃)သီး သီးနှံပုံစံလေ့လာခြင်း တောင်သူမန်းစိုးသိန်း၏ စမ်းသပ်ကွက် စိုက်ဧက(၁)ဧကတွင် Rayong-72 မျိုး ပီလောပီနံ စိုက်ပျိုးထားရှိမှုအားလည်းကောင်း ကြည့်ရှုအားပေးခဲ့ပြီး အထွက်တိုးမျိုးကောင်းများနှင့် ဈေးကွက်ဝင်မျိုးများ ပိုမိုတိုးချဲ့စိုက်ပျိုးနိုင်ရေး၊ ကုန်ချောများထုတ်လုပ်နိုင်ရေးဆောင်ရွက်ရန်နှင့် တောင်သူများကျယ်ကျယ်ပြန့်ပြန့် စိုက်ပျိုးနိုင်ရေးဆောင်ရွက်ရန်မှာကြားခဲ့ကြောင်းသိရသည်။