ပုသိမ်       ဩဂုတ်      ၂၆

ဧရာဝတီတိုင်းဒေသကြီးအစိုးရအဖွဲ့နှင့် စက်သုံးဆီအရောင်းဆိုင်လုပ်ငန်းရှင်များ တွေ့ဆုံပွဲ အခမ်းအနားကို ယနေ့နံနက်ပိုင်းက ပုသိမ်မြို့၊ ဧရာရွှေဝါခန်းမတွင်ပြုလုပ်ခဲ့ရာ တွေ့ဆုံပွဲသို့ တိုင်းဒေသကြီးဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများ၊ ဌာနဆိုင်ရာများနှင့် စက်သုံးဆီအရောင်းဆိုင်လုပ်ငန်းရှင်များ တက်ရောက်ခဲ့ကြသည်။ 

ဦးစွာ တိုင်းဒေသကြီးဝန်ကြီးချုပ်က“စက်သုံးဆီအရောင်းဆိုင်များအနေဖြင့် စနစ်တကျ သယ်ဆောင်ခြင်း၊ သိုလှောင်ခြင်း၊ ဖြန့်ဖြူးခြင်းများဆောင်ရွက်ရန်လိုအပ်ပါကြောင်း၊  လုပ်ငန်းတိုးချဲ့ လိုသဖြင့် လျှောက်ထားတင်ပြရာတွင် သတ်မှတ်စည်းကမ်းများနှင့်အညီ တင်ပြဆောင်ရွက်ရန် လိုပါကြောင်း၊ လမ်းများအလိုက် လမ်းနယ်နိမိတ်အကျယ်သတ်မှတ်ချက်အား သိရှိလိုက်နာဆောင်ရွက်ရန်လိုအပ်ပါကြောင်း၊ မိမိတို့တိုင်းဒေသကြီးသည် စိုက်ပျိုးရေးတိုင်းဒေသကြီး ဖြစ်သည်နှင့်အညီ လယ်ယာလုပ်ငန်းခွင်အတွင်း စက်ယန္တရားများဖြင့် ထွန်ယက်စိုက်ပျိုးခြင်း၊ ရိတ်သိမ်းခြွေလှေ့ခြင်း၊ သယ်ယူပို့ဆောင်ခြင်းလုပ်ကိုင်ရာတွင် လိုအပ်သည့်စက်သုံးဆီများကို ရောင်းချပေးရန်လိုအပ်မည်ဖြစ်ပါကြောင်း၊  တိုင်းဒေသကြီးအစိုးရအဖွဲ့မှ အပတ်စဉ် စိစစ်ထောက်ခံ ပေးလျက်ရှိရာ တရားမဝင်ရောင်းဝယ်ဖြန့်ဖြူးမှုများမရှိစေရေး အလေးထားဆောင်ရွက်ရန်” အမှာစကား ပြောကြားသည်။ ထို့နောက် သယံဇာတရေးရာဝန်ကြီး၊ အစိုးရအဖွဲ့အတွင်းရေးမှူး၊ တိုင်းဒေသကြီးလမ်းဦးစီးဌာန၊ ညွှန်ကြားရေးမှူး (မြို့ပြ)၊ တိုင်းဒေသကြီးရေနံထွက်ပစ္စည်း ကြီးကြပ် စစ်ဆေးရေးဦးစီးဌာန၊ တိုင်းဒေသကြီးကြီးကြပ်စစ်ဆေးရေးအရာရှိတို့က တိုင်းဒေသကြီးအတွင်းရှိ စိုက်ပျိုးရေးလုပ်ငန်းများအတွက် စက်သုံးဆီများလုံလောက်စွာ ဖြန့်ဖြူးပေးနိုင်ရေးနှင့် ရည်ညွှန်း သတ်မှတ်ဈေးနှုန်းများနှင့်အညီ ရောင်းချပေးနိုင်ရေး၊ လမ်းအဆင့်အလိုက် နယ်နိမိတ်သတ်မှတ်ချက် များနှင့် တိုင်းဒေသကြီးအတွင်းရှိ လမ်းများ၏နယ်နိမိတ်သတ်မှတ်ချက်များနှင့် စက်သုံးဆီ ရောင်းဝယ်မှု ဆိုင်ရာကိစ္စရပ်များကိုလည်းကောင်း ရှင်းလင်းတင်ပြခဲ့သည်။

ဆက်လက်၍ တိုင်းဒေသကြီးဝန်ကြီးချုပ်သည် ကိုးသိန်းစနူကာအားကစားခန်းမတွင် ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ်ဖလား၊ ခရိုင်ပေါင်းစုံ ဘိလိယက်၊ စနူကာ ပြိုင်ပွဲ ဆီမီးဖိုင်နယ်ပွဲစဉ်အဖြစ် ယှဉ်ပြိုင်ကစားသည့် ပုသိမ်ခရိုင်အသင်းနှင့် ဖျာပုံခရိုင်အသင်းတို့၏ စနူကာပြိုင်ပွဲ ယှဉ်ပြိုင်နေမှုများကို ကြည့်ရှုအားပေးခဲ့သည်။ ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ်ဖလား၊ ခရိုင်ပေါင်းစုံ ဘိလိယက်၊ စနူကာ ပြိုင်ပွဲကို ယခုလ ၂၀ ရက်နေ့မှစတင် ကျင်းပခဲ့ပြီး ၂၇.၈.၂၀၂၅ ရက်နေ့တွင် ဆုချီးမြှင့်ပွဲအခမ်းအနားကို ကျင်းပပြုလုပ်သွားမှာ ဖြစ်ကြောင်းသိရသည်။