ပုသိမ်       အောက်တိုဘာ       ၁၉

ဧရာဝတီတိုင်းဒေသကြီး၊ ဟင်္သာတခရိုင်၊ ဇလွန်မြို့နယ်၊ ဟင်္သာတမြို့နယ်အတွင်း၌ ၂၀၂၄-၂၀၂၅ခုနှစ်၊ မိုးစပါးစံကွက်ရိတ်သိမ်းခြင်းများကို ဆောင်ရွက်လျက်ရှိရာ ယနေ့နံနက်ပိုင်းက တိုင်းဒေသကြီး ဝန်ကြီးချုပ်ဦးတင်မောင်ဝင်းသည်  တာဝန်ရှိသူများနှင့်အတူ မိုးစပါးစံကွက်ရိတ်သိမ်းနေမှုများကို သွားရောက်ကြည့်ရှုအားပေးခဲ့သည်။

ဦးစွာတိုင်းဒေသကြီးဝန်ကြီးချုပ်နှင့် အဖွဲ့သည် ဟင်္သာတခရိုင်၊ ဇလွန်မြို့နယ်၊ အုပ်ရှစ်ကွင်းကျေးရွာအုပ်စု၊ သရက်ကုန်းကျေးရွာရှိ တောင်သူဦးသန့်ဇော်ဦး၏ စိုက်ဧက(၆)ကတွင် မျိုးစေ့ချကိရိယာအသုံးပြု၍ အတန်းလိုက်အစေ့ချစနစ်ဖြင့် စိုက်ပျိုးသည့် YSR-1စပါးမျိုးအားရိတ်သိမ်းနေမှုများကို ကြည့်ရှုအားပေးခဲ့ပြီး ရိတ်သိမ်းခြွေလှေ့စက်အသုံးပြု၍ စပါးရိတ်သိမ်းရာတွင် စပါးလေလွင့်ဆုံးရှုံးမှု နည်းပါးအောင် ရိတ်သိမ်းရန်နှင့် သီးထပ်စွမ်းအားတိုးတက်စိုက်ပျိုးနိုင်ရေးဆောင်ရွက်ရန် တာဝန်ရှိသူများကိုမှာကြားခဲ့သည်။ တိုင်းဒေသကြီးအတွင်း ကြဲခင်းစနစ်များလျော့နည်းစေရေးနှင့် တစ်ဧက(၁၀)တင်းနှုန်းပိုမိုတိုးတက်ထွက်ရှိရေး ရည်မှန်းချက်ထားကာ မျိုးစေ့ချကိရိယာများ၊ လက်ဆွဲကောက်စိုက်စက်များအသုံးပြု၍ စိုက်ပျိုးခြင်းများကို ယခုနှစ်မိုးစပါးစိုက်ရာသီတွင် ဆောင်ရွက်စိုက်ပျိုးခဲ့ရာ သမားရိုးကျကြဲခင်းစနစ်စိုက်ပျိုးခြင်းထက် အထွက်နှုန်းများသည်လည်း သိသာစွာတိုးတက်ထွက်ရှိခဲ့သည်။

ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ဇလွန်မြို့နယ်၊ မင်းဒရယ်ကျေးရွာအုပ်စု၊ မင်းဒရယ်ကျေးရွာရှိ တောင်သူဦးကျော်ဆန်းအေး၏ မိုးစပါးစိုက်ဧက(၇)ဧကတွင် စိုက်ခင်းရေကြီးနစ်မြုပ်မှုကြောင့်ထိခိုက်မှုအပေါ် သွင်းအားစုထည့်သွင်းကြဲပက်နေမှုများကို ကြည့်ရှုအားပေးခဲ့ပြီး သီးနှံဖျက်ပိုးမွှားအန္တရာယ်ကျရောက်မှုမရှိစေရေးနှင့် ရိတ်သိမ်းချိန်လေလွင့်မှုမရှိစေရေး အလေးထားဆောင်ရွက်ရန်မှာကြားခဲ့ပြီး ​​ကျေးရွာအုပ်စုအုပ်ချုပ်​ရေးမှုးများနှင့်​တွေ့ဆုံ၍ ရပ်ရွာ​​အေးချမ်းသာယာ​ရေး၊ ​ဒေသဖွံ့ဖြိုး​ရေးအတွက် အ​လေးထား​ဆောင်ရွက်ကြရန်မှာကြားခဲ့ သည်။ 

ယင်းနောက် တိုင်းဒေသကြီးဝန်ကြီးချုပ်နှင့်အဖွဲ့သည် ဟင်္သာတမြို့နယ်၊ တောင်ကလုံကျေးရွာအုပ်စု၊ လက်ပံကုန်းကျေးရွာရှိ တောင်သူဒေါ်ညိုညိုဆန်း၏ စိုက်ဧက(၄)ဧကတွင် ပျိုး​ထောင်စနစ်ဖြင့် စိုက်ပျိုးသည့် ရွှေဧရာစပါးမျိုး စံကွက်ရိတ်သိမ်းနေမှုများကို ကြည့်ရှုအားပေးခဲ့ပြီး သီးထပ်စွမ်းအား တိုးတက်မြင့်မား​ရေး၊ ဆီထွက်သီးနှံ ​မြေပဲ၊ နှမ်း၊ ​နေကြာများကို တိုးချဲ့စိုက်ပျိုးကြရန် မှာကြားခဲ့သည်။ တိုင်း​ဒေသကြီးအတွင်း စပါးများရိတ်သိမ်းရာတွင် ​လေလွင့်ဆုံးရှုံးမှုများ နည်းပါး​စေ​ရေးအတွက် စပါးရိတ်သိမ်း​ခြွေ​လှေ့စက်​မောင်းနှင်နည်းသင်တန်းများဖွင့်လှစ်ပို့ချခဲ့သဖြင့် ရိတ်သိမ်း​ခြွေ​လှေ့စက်​မောင်းနှင်သူများမှာ စနစ်တကျ​မောင်းနှင်တက်ခြင်း၊ စက်ပိုင်းဆိုင်ရာများကို ​ကောင်းမွန်စွာ နားလည် သိရှိခြင်းများ​ကြောင့် ​​လေလွင့်ဆုံးရှုံးမှုများ နည်းပါးခဲ့​ပြီး လယ်ယာသုံး စက်ကိရိယာမောင်းနှင်နည်း သင်တန်းများကိုလည်း ဆက်လက် သင်ကြားပို့ချ​ပေးသွားမည်ဖြစ်​ကြောင်းသိရှိရသည်။