ပုသိမ်       အောက်တိုဘာ       ၁၄

ဧရာဝတီတိုင်းဒေသကြီးအတွင်း လယ်ယာကဏ္ဍဖွံ့ဖြိုးတိုးတက်ရေးအတွက် တောင်သူများနှင့်နည်းပညာနှီးနှောဖလှယ်ပွဲကို ယနေ့နံနက်ပိုင်းက မြောင်းမြမြို့၊ အမှတ်(၁)အခြေခံပညာအထက်တန်းကျောင်း၊ ပညာရတနာခန်းမတွင် ပြုလုပ်ခဲ့ရာ နည်းပညာနှီးနှောဖလှယ်ပွဲသို့တိုင်းဒေသကြီး ဝန်ကြီးချုပ်ဦးတင်မောင်ဝင်း၊ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန၊ ဒုတိယဝန်ကြီးဒေါက်တာတင်ထွဋ်၊ စိုက်ပျိုးရေးသုတေသနဦးစီးဌာနနှင့် စိုက်ပျိုးရေးဦးစီးဌာနမှ သုတေသီများ၊ ဌာနဆိုင်ရာများ၊ ပုသိမ်ခရိုင်၊ မြောင်းမြခရိုင်၊ လပွတ္တာခရိုင်တို့မှ တောင်သူများ တက်ရောက်ခဲ့သည်။

တောင်သူများနှင့်နည်းပညာနှီးနှောဖလှယ်ပွဲတွင် တိုင်းဒေသကြီးဝန်ကြီးချုပ်က“  ယခုပြုလုပ်သည့် နည်းပညာနှီးနှောဖလှယ်ပွဲသည် တောင်သူများအတွက်စိုက်ပျိုးရေး အသိပညာများများစွာရရှိမည့် နှီးနှောဖလှယ်ပွဲဖြစ်ပါကြောင်း၊ ဇူလိုင်လနှင့် ဩဂုတ်လများတွင် မိုးအဆက်မပြတ် ရွာသွန်းခြင်းနှင့် မြစ်ရေကြီးမှုဖြစ်စဉ်များကြောင့် တိုင်း​ဒေဒသကြီးတွင် စိုက်ဧကများရေကြီးနစ်မြုပ်ပျက်စီးမှုများ ရှိခဲ့ပါကြောင်းနှင့် ၎င်းစိုက်ဧကများပြန်လည်ကုစားစိုက်ပျိုးနိုင်ရေးနှင့် စိုက်ဧကများပြည့်မီရေးအတွက် အရှိန်အဟုန်ဖြင့် ဆောင်ရွက်လျက်ရှိပါကြောင်း၊ ဧရာဝတီတိုင်းဒေသကြီးသည် မြန်မာနိုင်ငံ၏ စပါးကျီဖြစ်ပါကြောင်းနှင့် ဆန်ဖူလုံမှုအနေဖြင့် (၃၇၈) ရာခိုင်နှုန်းဖူလုံမှုရှိပါကြောင်း၊ တိုင်းဒေသကြီးအနေဖြင့် စိုက်ပျိုးရေးတွင် စံပြတိုင်းဒေသကြီးဖြစ်ရန် ကြိုးပမ်းဆောင်ရွက်လျက်ရှိပါကြောင်းနှင့်  မိုးစပါး၊ နွေစပါး ဧက ၅၂ သိန်းကျော်၊ ပဲမျိုးစုံ ဧက(၁၆) သိန်းကျော်နှင့် ဆီထွက်သီးနှံ မြေပဲ၊ နှမ်း၊ နေကြာများစိုက်ပျိုးလျက်ရှိပါကြောင်း၊ ဧရာဝတီ​ပေါ်ဆန်း အရည်အ​သွေးပိုမို​ကောင်းမွန်​စေ​ရေး၊ အထွက်နှုန်းများတိုးတက်​​စေ​ရေးနှင့် Eating Quality ​ကောင်းမွန်​စေ​ရေးအတွက်လည်း ကြိုးပမ်း​ဆောင်ရွက်လျက်ရှိပါ​ကြောင်း၊ မိမိတို့တိုင်းဒေသကြီးအတွင်း စိုက်ပျိုးသီးနှံများ ပန်းတိုင်အထွက်နှုန်းရောက်ရှိရေး၊ သီးနှံစိုက်စွမ်းအားတိုးတက်ရေးအတွက် ကြိုးပမ်းနေစဉ်ကာလအတွင်း ယခုကဲ့သို့စိုက်ပျိုးရေးပညာရှင်များနှင့် တွေ့ဆုံခွင့်ရသည့်အချိန်တွင် တောင်သူများအနေဖြင့် စိုက်ပျိုးရေးနည်းပညာအခက်အခဲများကို မေးမြန်းဆွေးနွေးခွင့်ရသည့်အတွက် များစွာအကျိုးရှိသဖြင့် ဂုဏ်ယူဝမ်းသာရပါကြောင်း၊ တိုင်းဒေသကြီးအတွင်း ရေကြီးနစ်မြုပ်စိုက်ဧကများအား ပြန်လည်ကုစားစိုက်ပျိုးနိုင်ရေးအတွက် နည်းလမ်းများရှာဖွေဆောင်ရွက်ခဲ့ပြီး မိုးစပါးစိုက်ရာသီအချိန်မီ ပြန်လည်စိုက်ပျိုးနိုင်ရေးအတွက် နိုင်ငံ​တော်၊ တိုင်းဒေသကြီးအစိုးအဖွဲ့နှင့် ဝယ်ယူကြိတ်ခွဲတင်ပို့သူ သွင်းအားစုအစုအဖွဲ့များကလည်း လိုအပ်သည့်မျိုးစပါးများအား တောင်သူများကိုထောက်ပံ့ပေးအပ်ခဲ့ပါကြောင်း၊ တောင်သူများအနေဖြင့် ယခုကဲ့သို့ရရှိသည့် အခွင့်ကောင်းကို အသုံးချ၍ မိမိတို့၏စိုက်ပျိုးရေးနည်းပညာအခက်အခဲများကို စိုက်ပျိုးရေးပညာရှင်များအား မေးမြန်းဆွေးနွေးကြစေလိုကြောင်းနှင့် ပညာရှင်များကလည်း လိုအပ်သည့်နည်းပညာများပံ့ပိုးပေးခြင်း၊ ဆွေးနွေးခြင်းများကိုလည်း ဆောင်ရွက်သွားကြမှာဖြစ်ကြောင်း” အမှာစကားပြောကြားသည်။

ထို့နောက် စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန၊ ဒုတိယဝန်ကြီးက “တိုင်း​ဒေသကြီးအတွင်းနည်းပညာကိုအ​ခြေခံသည့် စိုက်ပျိုး​မွေးမြူ​ရေးလုပ်ငန်းများ တိုးတက်မြင့်မား​ရေး ​ဆောင်ရွက်သွားမည်ဖြစ်ပါ​ကြောင်းနှင့် စိုက်ပျိုး​ရေး၊ ​မွေးမြူ​ရေးနှင့် လယ်ယာကဏ္ဍဖွံ့ဖြိုးတိုးတက်​ရေးအတွက် တာဝန်ယူဆောင်ရွက်​ပေးသွားမှာဖြစ်ပါ​ကြောင်း၊ ​တောင်သူကြီးများအ​နေဖြင့်လည်းစိတ်ပါဝင်စားစွာ ပူး​ပေါင်းပါဝင်​ဆောင်ရွက်​ရန်လိုအပ်ပါ​ကြောင်း၊  မျိုး၊ ​​မြေ၊ ​ရေ၊ နည်း စနစ်များအား မျှမျှတတ ​ဆောင်ရွက်၍ ထုတ်လုပ်မှုတန်ဖိုးကွင်းဆက်များ တိုးတက်မြင့်မား​အောင်​ဆောင်ရွက်ရမည်ဖြစ်ပါ​ကြောင်း၊ ပညာရှင်များနှင့် တောင်သူများချိတ်ဆက်ဆောင်ရွက်မှု ပိုမိုအားကောင်းလာစေရေးကိုရည်ရွယ်၍ နည်းပညာနှီးနှောဖလှယ်ပွဲကို တိုင်း​ဒေသကြီးအစိုးရအဖွဲ့နှင့်ပူး​ပေါင်း၍ ဆောင်ရွက်ရခြင်းဖြစ်ပါ​ကြောင်းနှင့် တောင်သူကြီးများ၏ တီထွင်ဆန်းစစ်မှုများကိုလည်း အထင်ကြီး​လေးစားပါ​ကြောင်း၊ တိုင်း​ဒေသကြီးအစိုးရအဖွဲ့နှင့်ပူး​ပေါင်း၍ ပေါ်ဆန်းဖိုရမ် ကျင်းပပြုလုပ်နိုင်​ရေး တင်ပြ​ဆောင်ရွက်သွားမည်ဖြစ်ပါ​ကြောင်း၊ လက်လှမ်းမီသု​တေသနလုပ်ငန်းများကိုလည်း ​တောင်သူများသိရှိ​အောင် အသိပညာ​ပေး​ဆောင်ရွက်မည်ဖြစ်ပါ​ကြောင်း"  ရှင်းလင်း​ပြောကြားပြီးနောက် တိုင်းဒေသကြီးဝန်ကြီးချုပ်၊ ဒုတိယဝန်ကြီးနှင့် တာဝန်ရှိသူများက မြို့နယ်များအလိုက် တက်ရောက်လာသောတောင်သူများအား ရွက်ဖျန်းအားဆေးနှင့် ပိုးသတ်ဆေးများထောက်ပံ့ပေးအပ်ကာ စုပေါင်းမှတ်တမ်းတင် ဓာတ်ပုံများရိုက်ကူးခဲ့ကြသည်။

ဆက်လက်၍ ဒုတိယဝန်ကြီးနှင့် စိုက်ပျိုး​ရေးသု​တေသနဦးစီးဌာန၊ စပါးသီးနှံဌာနခွဲ၊ ပဲမျိုးစုံသု​တေသနဌာနစု၊ ဆီထွက်သီးနှံသု​တေသနဌာနစု၊ ​စိုက်ပျိုး​ရေးဦးစီးဌာန၊ မြေယာအသုံးချ​ရေးဌာနခွဲ၊ သီးနှံကာကွယ်​ရေးဌာနခွဲ၊ အပင်​ရောဂါဌာနစုများမှ သီးနှံမျိုးပညာရှင်များ၊ မြေဆီလွှာပညာရှင်များ၊ သီးနှံကာကွယ်ရေး ပညာရှင်များက စပါး၊ ဆီထွက်သီးနှံ၊ ပဲမျိုးစုံစသည့် အထွက်တိုးသီးနှံမျိုး​ကောင်းမျိုးသန့်များနှင့် စပ်လျဉ်း၍ လည်းကောင်း၊ ဆီထွက်ပဲပုပ်သီးနှံတိုးမြှင့်စိုက်ပျိုးထုတ်လုပ်​ရေးကိစ္စရပ်များ၊ ​နေကြာသီးနှံအထူးအထွက်တိုး​စေရန် ​ဆောင်ရွက်ရမည့်အချက်များ၊ ဘက်စုံသီးနှံအာဟာရဓါတ်စီမံခန့်ခွဲမှုနည်းလမ်းများ၊ မြေဆီလွှာယိုယွင်းမှုအပေါ် ကာကွယ်ထိန်းသိမ်းနည်းများ၊ ဂေဟစနစ် ပြန်လည်ကောင်းမွန်လာစေရေးအတွက် ဘက်စုံပိုးမွှားကာကွယ်နှိမ်နင်းနည်းများ၊ ပေါင်းမြက်ကာကွယ်နည်းလမ်းများ၊ ​ရွှေခရုအမိုင်နိုပြုလုပ်ပုံနည်းလမ်းများကိုလည်းကောင်း ဆွေးနွေးခဲ့ကြရာ ​တောင်သူကြီးများက စိတ်ပါဝင်စားစွာ နား​ထောင်ခဲ့ကြသည်။ ယင်းနောက် တောင်သူများက သိရှိလိုသည်များကို ​မေး​မြန်းခဲ့ကြရာ ဒုတိယဝန်ကြီးနှင့် သုတေသီများက ပြန်လည်ရှင်းလင်း​​ဖြေကြားခဲ့ကြပြီး တိုင်း​ဒေသကြီးဝန်ကြီးချုပ်က နိဂုံးချုပ်စကား​ပြောကြားခဲ့ပါသည်။