ပုသိမ် စက်တင်ဘာ ၂၄

ပဉ္စမအကြိမ်မြောက် အမျိုးသားအားကစားပွဲတော်အောင်နိုင်ရေးညှိနှိုင်းအစည်းအဝေးကို ယနေ့နံနက်ပိုင်းက တိုင်းဒေသကြီးအားကစားနှင့်ကာယပညာဦးစီးဌာန၊ အစည်းအဝေးခန်းမတွင်ပြုလုပ်ရာ အစည်းအဝေးသို့ တိုင်းဒေသကြီးဝန်ကြီးချုပ်ဦးတင်မောင်ဝင်း၊ လူမှုရေးရာဝန်ကြီး၊ အားကစားနှင့်ကာယပညာဦးစီးဌာနမှ တာဝန်ရှိသူများတက်ရောက်ခဲ့ကြသည်။

ရှေးဦးစွာ တိုင်းဒေသကြီးဝန်ကြီးချုပ်က“၂၀၂၄ခုနှစ်၊ ပဉ္စမအကြိမ်မြောက် အမျိုးသား အားကစားပွဲတော်ကို ဒီဇင်ဘာလတွင် ကျင်းပမည်ဖြစ်၍ ကြိုတင်ပြင်ဆင် ဆောင်ရွက်လျက်ရှိပါကြောင်း၊ အားကစားနည်း (၂၃) မျိုးစလုံးမျိုးဝင်ရောက်ယှဉ်ပြိုင်သွားမည့်အပြင် မသန်စွမ်း အားကစားနည်းကိုလည်းဝင်ရောက်ယှဉ်ပြိုင်သွားမည်ဖြစ်၍ စခန်းသွင်းလေ့ကျင့်လျက်ရှိပါကြောင်း၊ ပဉ္စမအကြိမ်မြောက် အမျိုးသား အားကစားပွဲတော်သို့ဝင်ရောက်ယှဉ်ပြိုင်ရန် အားကစားနည်းများအလိုက်အားကစားမှူးများအားတာဝန်ပေးအပ်ထားပါကြောင်းနှင့် အားကစားနည်းများအလိုက် ပြိုင်ပွဲများပြုလုပ်၍ လူရွေးချယ်ခဲ့ပြီး အမျိုးသားအားကစားပွဲတော်တွင် အောင်မြင်မှုများရရှိစေရေး ကြိုတင်ပြင်ဆင် လေ့ကျင့်ခြင်းများ ဆောင်ရွက်လျက်ရှိပါကြောင်း၊ ရွေးချယ်ထားသည့် အားကစားသမားများကို စနစ်တကျဖိဖိစီးစီးလေ့ကျင့်သင်ကြားပေးနိုင်ပါက အောင်မြင်မှုများပိုမိုရရှိစေမည်ဖြစ်ပါကြောင်း၊ တစ်ဦးချင်းနှင့် အဖွဲ့လိုက်ကစားသည့် အားကစားနည်းများတွင်လည်း အောင်မြင်မှုများရရှိရေးအတွက် စုစည်းမှုအားကောင်းကောင်းဖြင့် ယှဉ်ပြိုင်ကြရမှာဖြစ်ပါကြောင်း၊ မကြာခင်ကာလ၌ ရေကူးပြိုင်ပွဲများကိုလည်း ကျင်းပမည်ဖြစ်၍ ကြိုတင်ပြင်ဆင်ခြင်းများကို ဆောင်ရွက်ရမည်ဖြစ်၍ အလားအလာကောင်းသည့် အားကစားသမားများပါဝင်ယှဉ်ပြိုင်နိုင် စေရေးဆောင်ရွက်ရန်လိုပါကြောင်း၊ ပြေးခုန်ပစ်ပြိုင်ပွဲတွင် အားကစားသမားများအား၎င်းတို့ကျွမ်းကျင်ပိုင်နိုင်သည့် အားကစားနည်းများကိုသာ ဝင်ရောက်ယှဉ်ပြိုင်နိုင်ရန်နှင့် လိုအပ်သည့်နည်းပြတစ်ဦးချင်းစီကိုလည်း ထားရှိပေးရမည်ဖြစ်ပါကြောင်း၊ ကြက်တောင်အားကစားနည်းသည် တိုင်းဒေသကြီးအနေဖြင့် နိုင်ငံတကာပြိုင်ပွဲများအထိ အောင်မြင်မှုများရရှိခဲ့သကဲ့သို့ အခြားသောအားကစားနည်းလည်း အောင်မြင်မှုများရရှိသည်ကိုတွေ့ရပါကြောင်း၊ အချိန်ကာလအားဖြင့် အမျိုးသားအားကစားပွဲတော်ကျင်းပရန် နီးကပ်လာပြီဖြစ်ပြီး ယခုအချိန်ကတည်း ကြိုတင်၍စုဖွဲ့မှုကောင်းကောင်းဖြင့် ဆောင်ရွက်ရမည်ဖြစ်ပါကြောင်းနှင့် ပဉ္စမအကြိမ်မြောက် အမျိုးသားအားကစားပွဲတော်အောင်နိုင်ရေးနှင့် တိုင်းဒေသကြီးအားကစား အဆင့်အတန်းများတိုးတက်မြင့်မားရေးအတွက် ဝိုင်းဝန်းအကြံပြုဆွေးနွေးပေးကြရန်လိုပါ‌ကြောင်း”အမှာစကား များပြောကြားသည်။

ထို့နောက် အမျိုးသားအားကစားပွဲတော်သို့ ဝင်ရောက်ယှဉ်ပြိုင်မည့်အားကစားနည်းအလိုက် တာဝန်ခံများက မိမိတို့၏အားကစားနည်းအလိုက် ဆောင်ရွက်ထားရှိမှုအခြေအနေများအားလည်းကောင်း၊ တိုင်းဒေသကြီးအားကစားနှင့်ကာယပညာဦးစီးဌာန၊ ညွှန်ကြားရေးမှူးက အမျိုးသားအားကစား ပွဲတော်အတွက် ကြိုတင်ပြင်ဆင်ဆောင်ရွက်ထားမှု အခြေအနေများကိုလည်းကောင်း၊ အစည်းအဝေးသို့ တက်ရောက်လာသူများ၏ အထွေထွေဆွေးနွေးတင်ပြချက်များအပေါ်လည်းကောင်း တိုင်းဒေသကြီးဝန်ကြီးချုပ်က လိုအပ်သည်များကို ဖြည့်စွက်ဆွေးနွေးခဲ့ပြီး ပဉ္စမအကြိမ်မြောက် အမျိုးသားအားကစားပွဲတော် အောင်နိုင်ရေးအတွက် သက်ဆိုင်ရာတာဝန်ရှိသူများနှင့် ပေါင်းစပ်ညှိနှိုင်း ဆောင်ရွက်ပေးခဲ့ကြောင်းသိရသည်။