ပုသိမ်       စက်တင်ဘာ         ၁၆

ဧရာဝတီတိုင်းဒေသကြီး၊ ပုသိမ်မြို့၊ မြို့တော်ခန်းမတွင်  ၂၀၂၄ခုနှစ်၊ ကမ္ဘာ့အိုဇုန်းလွှာ ထိန်းသိမ်းရေးနေ့ အထိမ်းအမှတ်အခမ်းအနားကို ယနေ့နံနက်ပိုင်းကကျင်းပရာအခမ်းအနားသို့ တိုင်းဒေသကြီးဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများ၊ ဌာနဆိုင်ရာများနှင့် ကျောင်းသား၊ ကျောင်းသူ များတက်ရောက်ခဲ့ကြသည်။

ဦးစွာ တိုင်းဒေသကြီးဝန်ကြီးချုပ်က “ ယနေ့ကျင်းပသည့်  ကမ္ဘာ့အိုဇုန်းလွှာထိန်းသိမ်းရေး အထိမ်းအမှတ်အခမ်းအနားသည်  အိုဇုန်းလွှာထိန်းသိမ်းကာကွယ်ခြင်း  လုပ်ငန်းစဉ်များကို ဆက်စပ် ဌာန၊ အဖွဲ့အစည်းများနှင့် ပြည်သူလူထုအနေဖြင့် လက်ရှိနှင့်နောင်အနာဂတ် မျိုးဆက်များအတွက် အရေးပါသည့် အိုဇုန်းလွှာထိန်းသိမ်းရေးဆိုင်ရာ အသိပညာများ ဖြန့်ဝေပေးရန်နှင့် သက်ရှိများ အတွက်ပါမက နောင်အနာဂတ်မျိုးဆက်များအတွက်ပါ အရေးပါသည့် အိုဇုန်းလွှာထိန်းသိမ်းရေးဆိုင်ရာ လုပ်ငန်းတွေမှာ ပြည်သူလူထု ပူးပေါင်းပါဝင်မှုမြှင့်တင်ရန်၊ မွန်ထရီရယ်နောက်ဆက်တွဲစာချူပ်သည် အိုဇုန်းလွှာထိန်းသိမ်းကာကွယ်ရေးအပြင် ရာသီဥတုပြောင်းလဲမှုတိုက်ဖျက်ရေးဆိုင်ရာ လုပ်ငန်းများ အတွက်ပါ ထိရောက်မှုရှိပြီး အောင်မြင်မှု အများဆုံးရရှိသည့် ကမ္ဘာလုံးဆိုင်ရာ ပူးပေါင်းဆောင်ရွက်မှု တစ်ခုဖြစ်သည်ကို အသိပညာပေးရန်နှင့် ရာသီဥတုပြောင်းလဲမှုတိုက်ဖျက်ရေးဆိုင်ရာ လုပ်ငန်းများကို အရှိန်အဟုန်မြှင့်တင်ဆောင်ရွက်နိုင်ရေး နှိုးဆော်ပေးနိုင်ရန် ရည်ရွယ်၍ ပြုလုပ်သည့် အခမ်းအနား ဖြစ်ပါကြောင်း၊ ယနေ့ကမ္ဘာပေါ်ရှိ လူသားများအပါအဝင် သက်ရှိများအားလုံးကျန်းမာပျော်ရွှင်စွာ အသက်ရှင်နေထိုင်နိုင်ရေးအတွက် အိုဇုန်းလွှာဟာများစွာ အထောက်အပံ့ပေးလျက်ရှိပါကြောင်း၊ အိုဇုန်းလွှာသည် နေရောင်ခြည်မှလာသည့်  ခရမ်းလွန်ရောင်ခြည်လှိုင်းများ ကမ္ဘာ့မြေပြင်ပေါ်သို့ မကျရောက်စေရန်အတွက် ကာကွယ်ပေးလျက်ရှိပြီး သဘာဝအကာအရံ တစ်ခုအဖြစ်တည်ရှိနေသည့် အတွက် ကမ္ဘာပေါ်ရှိ လူသားများအပါအဝင် သက်ရှိများအားလုံးအတွက် မရှိမဖြစ်လိုအပ်ပါကြောင်း၊ ယခု ၂၀၂၄ ခုနှစ်၊ ကမ္ဘာ့အိုဇုန်းလွှာထိန်းသိမ်းရေးနေ့၏ ဆောင်ပုဒ်မှာ“Montreal Protocol: Advancing Climate Action” “မွန်ထရီရယ်နောက်ဆက်တွဲစာချုပ် ရည်မှန်းချက်အောင်မြင်ဖို့ ရာသီဥတုပြောင်းလဲမှုတိုက်ဖျက်ရေး တိုးမြှင့်ဆောင်ရွက်စို့” ဖြစ်ပါကြောင်း၊ ယခုနှစ်ဆောင်ပုဒ်၏ အဓိပ္ပာယ်သည် လက်ရှိကြုံတွေ့နေရသည့် ရာသီဥတုပြောင်းလဲမှုဆိုင်ရာစိန်ခေါ်မှုများကို ဖြေရှင်းရန်နှင့် အနာဂတ်မျိုးဆက်များအတွက် ကမ္ဘာမြေပေါ်ရှိ သက်ရှိများကို ကာကွယ်ရန် ကမ္ဘာလုံးဆိုင်ရာ ပူးပေါင်းဆောင်ရွက်မှုများ ဖွံ့ဖြိုးစေရန် ဖြစ်ပါကြောင်းနှင့် လူသားများနှင့် ကမ္ဘာပေါ်ရှိ သက်ရှိများကို ကောင်းမွန်သည့် အိုဇုန်းလွှာဖြင့်ကာကွယ်ပေးပြီး ပစ္စုပ္ပန်နှင့် အနာဂတ်မျိုးဆက်သစ်များအား လက်ဆင့် ကမ်းပေးနိုင်စေရန်အတွက် ယနေ့အခမ်းအနားကို  တက်ရောက်လာသူများအနေဖြင့် တစ်ဦးတစ်ယောက်သော် လည်းကောင်း၊ အဖွဲ့အစည်းများဖြင့်သော်လည်းကောင်း အရေးပါသည့် အိုဇုန်းလွှာ ထိန်းသိမ်းကာကွယ်ခြင်း လုပ်ငန်းစဉ်များကို အားလုံးဝိုင်းဝန်းပူးပေါင်း ဆောင်ရွက်ပေးကြစေလို ကြောင်း”တိုက်တွန်းအမှာစကားပြောကြားသည်။

ထို့နောက် တိုင်းဒေသကြီးဝန်ကြီးချုပ်နှင့်ဧည့်သည်တော်များသည်  ၂၀၂၄ခုနှစ်၊ ကမ္ဘာ့အိုဇုန်းလွှာ ထိန်းသိမ်းရေးနေ့ အထိမ်းအမှတ်ကုလသမဂ္ဂ အထွေထွေ အတွင်းရေးမှူးချုပ် Mr. Antonio Guterres၏ သဝဏ်လွှာဗီဒီယို၊ ကုလသမဂ္ဂပတ်ဝန်းကျင်အစီအစဉ် (UNEP)၊ အမှုဆောင်ညွှန်ကြားရေးမှူး Ms. Inger Anderson၏ ဗီဒီယို Messageနှင့် ၂၀၂၄ ခုနှစ်၊ ကမ္ဘာ့အိုဇုန်းလွှာထိန်းသိမ်းရေးနေ့ အထိမ်းအမှတ် အသိပညာပေးဗီဒီယိုပြသမှုတို့ကို ကြည့်ရှုအားပေးခဲ့သည်။

ယင်းနောက် တိုင်းဒေသကြီး ဝန်ကြီးချုပ်က ၂၀၂၄ခုနှစ်၊ ကမ္ဘာ့အိုဇုန်းလွှာထိန်းသိမ်းရေးနေ့ အထိမ်းအမှတ် အထက်တန်းအဆင့်စာစီစာကုံးပြိုင်ပွဲ ပထမဆုနှင့် အလယ်တန်းအဆင့် ပန်းချီပြိုင်ပွဲ ပထမဆုရရှိသူများအားလည်းကောင်း၊ တိုင်းဒေသကြီး တရားသူကြီးချုပ်က အထက်တန်းအဆင့်စာစီစာကုံးပြိုင်ပွဲ ဒုတိယနှင့် အလယ်တန်းအဆင့် ပန်းချီပြိုင်ပွဲ ဒုတိယဆုရရှိသူများအားလည်းကောင်း၊ လုံခြုံရေးနှင့်နယ်စပ်ရေးရာဝန်ကြီးက အထက်တန်းအဆင့် စာစီစာကုံးပြိုင်ပွဲ တတိယဆုနှင့် အလယ်တန်းအဆင့် ပန်းချီပြိုင်ပွဲ တတိယဆုရရှိသူများအား လည်းကောင်း၊ သယံဇာတရေးရာဝန်ကြီးက အလယ်တန်းအဆင့် ပန်းချီပြိုင်ပွဲတွင် နှစ်သိမ့်ဆုပထမ၊ ဒုတိယနှင့် တတိယဆုရရှိသူများအားလည်းကောင်း ဆုများအသီးသီးချီးမြှင့်ခဲ့ပြီး စုပေါင်းမှတ်တမ်းတင် ဓာတ်ပုံများရိုက်ကူးခဲ့ကာ ဝန်ကြီးချုပ်နှင့် ဧည့်သည်တော်များသည် ၂၀၂၄၊ခုနှစ်၊ ကမ္ဘာ့အိုဇုန်းလွှာ ထိန်းသိမ်းရေးနေ့ အထိမ်းအမှတ်အဖြစ် ပြသထားသောပြခန်းများကို လှည့်လည်ကြည့်ရှု အားပေးခဲ့ကြောင်းသိရသည်။