ပုသိမ်       ဩဂုတ်         ၂၉

၂၀၂၄ခုနှစ်၊ ပဉ္စမအကြိမ်မြောက် အမျိုးသားအားကစားပွဲတော် အောင်နိုင်ရေးအကြိုညှိနှိုင်း အစည်းအဝေးကို ယနေ့နံနက်ပိုင်းက တိုင်းဒေသကြီးအားကစားနှင့်ကာယပညာဦးစီးဌာန၊ အစည်းအဝေးခန်းမတွင်ပြုလုပ်ရာ အစည်းအဝေးသို့ တိုင်းဒေသကြီးဝန်ကြီးချုပ်ဦးတင်မောင်ဝင်းနှင့် အစိုးရအဖွဲ့ဝင်ဝန်ကြီးများ၊ အားကစားနှင့်ကာယပညာဦးစီးဌာနမှ တာဝန်ရှိသူများ၊ ဆုရအားကစား သမားများတက်ရောက်ခဲ့ကြသည်။

ရှေးဦးစွာ တိုင်းဒေသကြီးဝန်ကြီးချုပ်က“၂၀၂၄ခုနှစ်၊ ပဉ္စမအကြိမ်မြောက် အမျိုးသား အားကစားပွဲတော်ကို ဒီဇင်ဘာလတွင် ကျင်းပမည်ဖြစ်၍ ကြိုတင်ပြင်ဆင်  ဆောင်ရွက်လျက် ရှိပါကြောင်း၊ အားကစားနည်း (၂၃) မျိုးစလုံးမျိုးဝင်ရောက်ယှဉ်ပြိုင်သွားမည့်အပြင် မသန်စွမ်း အားကစားနည်း(၄)မျိုးကိုလည်း ဝင်ရောက်ယှဉ်ပြိုင်သွားမှာဖြစ်ပါကြောင်း၊ မြို့နယ်အလိုက်၊ ခရိုင်အလိုက် အားကစားပြိုင်ပွဲများမှ ရွေးချယ်ရရှိသည့် အားကစားသမားများဖြင့် စခန်းသွင်းလေ့ကျင့် သွားမည်ဖြစ်ပြီး မျိုးဆက်သစ်အားကစားသမားအသစ်များ ပေါ်ထွက်လာစေရေး အတွက်လည်း ရပ်ကွက်၊ ကျေးရွာများ၊ အခြေခံပညာကျောင်းများမှ ရွေးချယ်ဆောင်ရွက်လျက်ရှိပါကြောင်း၊ ပဉ္စမအကြိမ်မြောက် အမျိုးသားအားကစားပွဲတော်အောင်နိုင်ရေးနှင့် တိုင်းဒေသကြီးအားကစားနည်း အဆင့်အတန်းများတိုးတက်မြင့်မားရေးအတွက် ဝိုင်းဝန်းအကြံပြုဆွေးနွေးပေးကြရန်”အမှာစကား များပြောကြားသည်။

ထို့နောက်  တိုင်းဒေသကြီးဝန်ကြီးချုပ်က ၂၀၂၄-၂၀၂၅ခုနှစ်၊ ပြည်နယ်နှင့်တိုင်းဒေသကြီး အားကစား ပြိုင်ပွဲများတွင် ဆုရရှိသည့်အားကစားသမားများအား ဂုဏ်ပြုဆုငွေများချီးမြှင့်ခဲ့သည်။ ဆက်လက်၍ အစည်းအဝေးဒုတိယပိုင်းပြုလုပ်ရာ အားကစားနှင့်ကာယပညာဦးစီးဌာန လက်ထောက် ညွှန်ကြားရေးမှူးများနှင့် အားကစားမှူးများက တစ်ဦးချင်းမိတ်ဆက်ခဲ့ပြီး သက်ဆိုင်ရာအားကစား နည်းများအလိုက် ကြိုတင်ပြင်ဆင်ဆောင်ရွက်ထားရှိမှု အခြေအနေများ ရှင်းလင်းတင်ပြခဲ့ပြီးနောက် တိုင်းဒေသကြီးအားကစားနှင့်ကာယပညာဦးစီးဌာန၊ ညွှန်ကြားရေးမှူးက အမျိုးသားအားကစားပွဲတော်အတွက် ကြိုတင်ပြင်ဆင်ဆောင်ရွက်ထားမှု အခြေအနေများကို ရှင်းလင်းတင်ပြခဲ့သည်။ ထို့နောက် အစည်းအဝေးသို့ တက်ရောက်လာသူများ၏ အထွေထွေဆွေးနွေးတင်ပြချက်များအပေါ် တိုင်းဒေသကြီးဝန်ကြီးချုပ်က  လိုအပ်သည်များကို ဖြည့်စွက်ဆွေးနွေးခဲ့ပြီး ပဉ္စမအကြိမ်မြောက် အမျိုးသားအားကစားပွဲတော် အောင်နိုင်ရေးအတွက် သက်ဆိုင်ရာတာဝန်ရှိသူများနှင့် ပေါင်းစပ်ညှိနှိုင်း ဆောင်ရွက်ပေးခဲ့ကြောင်းသိရသည်။