ဧရာဝတီတိုင်းဒေသကြီး၊ ပုသိမ်မြို့တွင် နယ်မြေခံတပ်ရင်းတပ်ဖွဲ့များ၊ ဌာနဆိုင်ရာများနှင့် ပြည်သူများ စုပေါင်းသန့်ရှင်းရေး ဆောင်ရွက်နေမှုများနှင့် ရေစီးရေလာကောင်းမွန်ရေး ဆောင်ရွက်နေမှုများကို တိုင်းဒေသကြီးဝန်ကြီးချုပ် ဦးတင်မောင်ဝင်းသည် တာဝန်ရှိသူများနှင့် အတူ ယနေ့နံနက်ပိုင်းက လှည့်လည်ကြည့်ရှုစစ်ဆေးခဲ့သည်။

ဦးစွာ တိုင်းဒေသကြီးဝန်ကြီးချုပ်သည် ပုသိမ်မြို့၊ စက်တော်ရာဘုရားနှင့် ဘိုးဘွားရိပ်သာ အတွင်း နယ်မြေခံတပ်ရင်းတပ်ဖွဲ့များ၊ ဌာနဆိုင်ရာများနှင့်ပြည်သူများက စုပေါင်းသန့်ရှင်းရေး ဆောင်ရွက်နေမှုများကို လှည့်လည်ကြည့်ရှုအားပေးခဲ့ပြီး  စုပေါင်းသန့်ရှင်းရေး ဆောင်ရွက်ခြင်း တို့ကို အပတ်စဉ်ဆောင်ရွက်ခြင်းများအပြင် နေ့စဉ်သန့်ရှင်းသပ်ရပ်မှုရှိစေရေးကိုလည်း အလေးထားလိုက်နာ ဆောင်ရွက်သွားရန်နှင့် မြို့သန့်ရှင်းသာယာလှပစေရေး အစဉ်တစိုက် ဆောင်ရွက်ကြရန် မှာကြားခဲ့သည်။

ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် ငဝန်ကျွန်းသာရပ်ကွက်တွင် ရေစီးရေလာကောင်းမွန်ရေး မြို့နယ်စည်ပင်သာယာရေးအဖွဲ့မှ ခွင့်ပြုရန်ပုံငွေ (၄၅.၇၆) ကျပ်သန်းဖြင့် ဆောင်ရွက်လျက်ရှိသည့် နိဂြောဓါလမ်းအုတ်ရေမြောင်း ၅၂၀´×၄´×၆´တည်ဆောက်ခြင်းနှင့် ခွင့်ပြုရန်ပုံငွေ (၁၃.၀၀)ကျပ်သန်းဖြင့် ကမ်းနားလမ်းဖြတ် Box Culvert ၃၅´×၄´×၆´(၁)စင်းတည်ဆောက်ခြင်းလုပ်ငန်း ဆောင်ရွက်နေမှုအခြေအနေများအား လည်းကောင်း၊ ပုသိမ်မြို့၊ အမှတ်(၁)ရပ်ကွက် ရွှေဝါထွန်းလမ်းတွင် မြို့နယ်စည်ပင်သာယာရေး ရန်ပုံငွေ(၆၇.၅)သန်းဖြင့် ဆောင်ရွက်လျက်ရှိသော အရှည် (၁၀၀၀) ပေ၊ အကျယ် (၁၈) ပေ၊ ထု (၆) လက်မရှိ ရပ်ကွက်တွင်းဖွံ့ဖြိုးရေးလမ်း ဆောင်ရွက်နေမှုအခြေအနေများကိုလည်းကောင်း၊ ပုသိမ်မြို့၊ အမှတ်(၁၃)ရပ်ကွက် ကင်မလင်းကျွန်းစက်မှုဇုံ ငကျီးထူဖောက်ချောင်း ရေစီးရေလာ ကောင်းမွန်ရေး Amphibious ဖြင့် တူးဖော်ခြင်းလုပ်ငန်းဆောင်ရွက်နေမှုအား ကြည့်ရှုစစ်ဆေး ခဲ့ပြီး လိုအပ်သည်များကိုမှာကြားခဲ့ပါသည်။

ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် မြောင်းမြမြို့နယ် မဒေါ့ပင် ကျေးရွာ၊ တောင်သူဦးနိုင်ဝင်း၏ စိုက်ဧက(၃)ဧကတွင် ဗျော့ထွန်းစပါးမျိုးအား စပါးမျိုးစေ့ချ ကိရိယာ(Drum Seeder)ဖြင့် မိုးစပါးစိုက်ပျိုးနေမှုအားလည်းကောင်း၊ အိမ်မဲမြို့နယ် ကျားနဖူးကျေးရွာ၊ တောင်သူဦးထွန်းအေး၏ စိုက်ဧက(၃)ဧကတွင် ပဲခူးစိန်စပါးမျိုး မိုးစပါး အတန်းလိုက် စိုက်ပျိုးနေမှုတို့အားကြည့်ရှုအားပေးခဲ့ပါသည်။ ထို့နောက် တိုင်းဒေသကြီး ဝန်ကြီးချုပ်နှင့်အဖွဲ့သည် အိမ်မဲမြို့နယ်၊ ရွာသစ်ကျေးရွာ ဝေဇယန္တာဘုန်းတော်ကြီးကျောင်းတွင် နိုင်ငံ့စီးပွားမြှင့်တင်ရေးရန်ပုံငွေ(၈၆)ဘီလီယံဖြင့်  မိုးစပါးစိုက်တောင်သူများအား သွင်းအားစုများ ထောက်ပံ့ပေးနိုင်ရေးအတွက် တောင်သူများနှင့်တွေ့ဆုံပွဲသို့ တက်ရောက်ခဲ့ပြီး တောင်သူများအား ဓာတ်မြေဩဇာများထောက်ပံ့ပေးအပ်ခဲ့ကာ တိုင်းဒေသကြီးဝန်ကြီးချုပ်က "တိုင်းဒေသကြီးအတွင်း မိုးစပါးပန်းတိုင်အထွက်နှုန်းရောက်ရှိရေးအတွက် ကြဲခင်းစနစ်များ လျော့နည်းပပျောက်အောင် စပါးမျိုးစေ့ချကိရိယာများ၊ ကောက်စိုက်စက်များဖြင့် စိုက်ပျိုးနည်း စနစ်များ ပြောင်းလဲစိုက်ပျိုးဆောင်ရွက်လျက်ရှိပါကြောင်း၊ အထွက်နှုန်းများပိုမိုတိုးတက်စေရေး အတွက် နိုင်ငံ့စီးပွားမြှင့်တင်ရေးရန်ပုံငွေဖြင့် တောင်သူများလက်ဝယ်အရောက် သွင်းအားစုများ ထောက်ပံ့ဆောင်ရွက်ပေးလျက်ရှိပါကြောင်း၊ တောင်သူများကလည်း သဘာဝမြေဩဇာနှင့် ဓာတ်မြေဩဇာများကို အချိန်ကိုက်၊ အချိုးကျ အပြည့်အဝ ထည့်သွင်းဆောင်ရွက်ကြရမည် ဖြစ်ကြောင်း၊ မိုးစပါးပန်းတိုင်အထွက်နှုန်းရောက်ရှိစေရေးအတွက် ဝိုင်းဝန်းဆောင်ရွက်ကြစေလိုကြောင်း" မှာကြားခဲ့သည်။ 

ထို့နောက် တိုင်းဒေသကြီးဝန်ကြီးချုပ်နှင့် တာဝန်ရှိသူများသည် ညနေပိုင်းတွင် ပုသိမ်မြို့၊ ကျောက်တိုင်ဘောလုံးကွင်းတွင် မြန်မာနေရှင်နယ်လိဂ် ၂၀၂၄-၂၀၂၅ အမှတ်ပေးဘောလုံး ပြိုင်ပွဲသို့ ဝင်ရောက်ယှဉ်ပြိုင်ရန်ပြင်ဆင်လျက်ရှိသည့် ဧရာဝတီယူနိုက်တက်ဘောလုံးအသင်းနှင့် မြန်မာ့လက်ရွေးစင် ယူ ၁၉ အသင်းတို့၏ လေ့ကျင့်ရေးခြေစမ်းပွဲအား ကြည့်ရှုအားပေးခဲ့ကြောင်း သိရှိရပါသည်။