ဧရာဝတီတိုင်းဒေသကြီးဝန်ကြီးချုပ်နှင့်အဖွဲ့သည် ဇွန်လ ၂၃ ရက်နေ့ မွန်းလွဲပိုင်းတွင်  ပုသိမ်မြို့၊ အမှတ်(၁)အခြေခံပညာ အထက်တန်းကျောင်း၊ ရတနာတန်ဆောင်ခန်းမတွင်ပြုလုပ်သည့် ဧရာဝတီတိုင်းဒေသကြီး စာကြည့်တိုက်များဖွံ့ဖြိုးတိုးတက်ရေးနှင့် စာဖတ်ရှိန်မြှင့်တင်ရေးပွဲတော်ဆုချီးမြှင့်ပွဲအခမ်းအနားသို့ တက်ရောက်၍  တိုင်းဒေသကြီးဝန်ကြီးချုပ်က“ ဧရာဝတီတိုင်းဒေသကြီး စာကြည့်တိုက်များဖွံ့ဖြိုးတိုးတက်ရေးနှင့် စာဖတ်ရှိန်မြှင့်တင်ရေးပွဲတော်ကို နှစ်ရက်တာကျင်းပခဲ့ပါကြောင်းနှင့် ပြိုင်ပွဲများတွင် ကျောင်းသား၊ ကျောင်းသူများစိတ်ပါဝင်စားစွာ ပါဝင်ယှဉ်ပြိုင်ခဲ့သည်ကိုလည်းတွေ့ရပါကြောင်း၊ ယခုကဲ့သို့ ကျောင်းသား၊ ကျောင်းသူများဝင်ရောက်ယှဉ်ပြိုင်ခြင်းသည် “ ပညာရဲရင့်ပွဲလယ်တင့်” ဟူသည့်စကားအတိုင်း တပည့်များ၏ ကိုယ်ရည်ကိုယ်သွေးနှင့် စွမ်းရည်သတ္တိများကို တိုးတက်မြင့်မားအောင် ဆောင်ရွက်ပေးသည့် ဆရာများ၏ကျေးဇူးကြောင့်လည်းဖြစ်ပါကြောင်း၊ ကျေးလက်နေ ပြည်သူတို့ အလွယ်တကူ စာပေဖတ်ရှုလေ့လာနိုင်ရန်၊ အသိပညာဗဟုသုတတိုးပွားလာစေရန်၊ အမှားအမှန်ခွဲခြားနိုင်စေရန်၊ ယဉ်ကျေးသိမ့်မွေ့၍ ကိုယ်ကျင့်တရားကောင်းမွန်လာစေရန်၊ အသိပညာ ဗဟုသုတမြင့်မားပြီး လူမှုစီးပွားရေးဘဝ ဖွံ့ဖြိုးတိုးတက်မှုကို အထောက်အကူဖြစ်စေရန်၊ နိုင်ငံတော်ကို အကျိုးပြုမည့် သားကောင်းသမီးကောင်းများ ပေါ်ထွန်းလာစေရန်အတွက် စာကြည့်တိုက်များ ဖွံ့ဖြိုးတိုးတက်ရေး အခန်းကဏ္ဍသည် အလွန်အရေးပါကြောင်း၊ ကျောင်းစာကြည့်တိုက်များသည် ဆက်လက်ရှင်သန်နေရန်နှင့် ကျောင်းသား/သူလေးများအား စာပေ၊ ဗဟုသုတများ စဉ်ဆက်မပြတ်လေ့လာဖတ်ရှုနိုင်အောင် ဆောင်ရွက်ပေးကြရမည်ဖြစ်ပါကြောင်း၊ ဗလငါးတန်နှင့်ပြည့်စုံသော လူငယ်လူရွယ်များဖြစ်လာစေရန်အတွက် အခြေခံပညာကျောင်းများမှစတင်ပါကြောင်းနှင့် ကျောင်းနေအရွယ်ကလေးအားလုံး ရာနှုန်းပြည့်ကျောင်းတက်ရေးအတွက်လည်း ဆောင်ရွက်ရမည်ဖြစ်ပါကြောင်း၊ စာဖတ်ရှိန်မြှင့်တင်ရေးပွဲတော်များအား လစဉ်ဆောင်ရွက်သွားမည်ဖြစ်ပြီး တိုင်းဒေသကြီးအတွင်းရှိမြို့နယ်များတွင် ယခုထက်ပိုမိုစည်ကားအောင် ဆောင်ရွက်သွားမည်ဖြစ်ပါကြောင်း၊ စာကြည့်တိုက်များဖွံ့ဖြိုးတိုးတက်ရေးနှင့် စာဖတ်ရှိန်မြှင့်တင်ရေးပွဲတော်အောင်မြင်စွာကျင်းပနိုင်ရေး ဝိုင်းဝန်းပူးပေါင်းဆောင်ရွက်ပေးကြသည့် တာဝန်ရှိသူများအားလုံးကိုလည်း ကျေးဇူးအထူးတင်ရှိပါကြောင်း ” တိုက်တွန်းအမှာစကားများပြောကြားသည်။

ထို့နောက် တိုင်းဒေသကြီးဝန်ကြီးချုပ်နှင့်ဧည့်သည်တော်များသည် ပုသိမ်မြို့၊ အမှတ်(၁၀)အခြေခံပညာမူလတန်းကျောင်းမှ ကျောင်းသား၊ ကျောင်းသူလေးများ၏ တေးသီချင်းဖြင့်သီဆိုကပြဖြေမှုများကို ကြည့်ရှုအားပေးပြီးနောက် မူလတန်းအဆင့်(ကဗျာရွတ်)၊ အလယ်တန်းအဆင့်(ပုံပြော)၊ အထက်တန်းအဆင့်(ကျပန်းစကားပြော)၊ အလယ်တန်းအဆင့်(စာစီစာကုံး)၊ အထက်တန်းအဆင့်(စာစီစာကုံး)ပြိုင်ပွဲများတွင် အထူးဆု(၂)၊ အထူးဆု(၁)နှင့် တတိယဆုရရှိသူများအား တိုင်းရင်းသားရေးရာဝန်ကြီး၊ လူမှူရေးရာဝန်ကြီးနှင့် တိုင်းဒေသကြီးတရားသူကြီးချုပ်တို့ကလည်းကောင်း၊ မူလတန်းအဆင့်(ကဗျာရွတ်)၊ အလယ်တန်းအဆင့်(ပုံပြော)၊ အထက်တန်းအဆင့်(ကျပန်းစကားပြော)၊ အလယ်တန်းအဆင့်(စာစီစာကုံး)၊ အထက်တန်းအဆင့်(စာစီစာကုံး)ပြိုင်ပွဲများတွင် ဒုတိယဆုနှင့် ပထမဆုရရှိသူများအား တိုင်းဒေသကြီးဝန်ကြီးချုပ်နှင့် ဇနီးတို့ကလည်းကောင်းဆုများအသီးသီးချီးမြှင့်ခဲ့ကြသည်။

ထို့နောက် တိုင်းဒေသကြီးဝန်ကြီးချုပ်နှင့် ဇနီးတို့က တိုင်းဒေသကြီးအတွင်းရှိ စာကြည့်တိုက်(၁၀)တိုက်အတွက်အလှူငွေသိန်း(၃၀)၊ စာအုပ်စာစောင်(၂၄၈၀)အုပ်ကိုလည်းကောင်း၊ တိုင်းဒေသကြီးစာကြည့်တိုက်များဖောင်ဒေးရှင်းဥက္ကဋ္ဌက အလှူငွေငါးသိန်းကျပ်အားလည်းကောင်းပေးအပ်ရာ လူမှုရေးရာဝန်ကြီးကလက်ခံရယူခဲ့သည်။ ယင်းနောက် တိုင်းဒေသကြီးဝန်ကြီးချုပ်နှင့် ဧည့်သည်တော်များသည် ပုသိမ်မြို့၊ အမှတ်(၂၄) အခြေခံပညာမူလတန်းမှ ကျောင်းသား၊ ကျောင်းသူလေးများက တေးသီချင်းဖြင့်ကပြဖျော်မှုများကြည့်ရှုအားပေးကာ စုပေါင်းမှတ်တမ်းတင်ဓာတ်ပုံရိုက်ကူးခဲ့ကြပြီး အခမ်းအနားကိုရုပ်သိမ်းခဲ့ကြကြောင်းသိရသည်။