ဧရာဝတီတိုင်းဒေသကြီး၊ ပုသိမ်မြို့ပညာရေးဒီဂရီကောလိပ်၊ ပညာရတနာခန်းမတွင် လုပ်ငန်းခွင်အကြို မူလတန်းဆရာအတတ်ပညာသင်တန်း PPTT (၁၁/၂၀၂၄)နှင့် (၄)နှစ်သင် ကျောင်းသား၊ ကျောင်းသူများအား ကြိုဆိုပွဲအခမ်းအနားကို ဇွန်လ ၇ ရက်နေ့ နံနက်ပိုင်းကပြုလုပ်ခဲ့ရာ အခမ်းအနားသို့ တိုင်းဒေသကြီးဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင်များ၊ ပညာရေးဒီဂရီကောလိပ်မှ ဆရာ၊ ဆရာမများနှင့် သင်တန်းသား၊ သင်တန်းသူများ တက်ရောက်ခဲ့ကြသည်။

ရှေးဦးစွာ အခမ်းအနားအား သင်တန်းသား၊ သင်တန်းသူများက ပုသိမ်ပညာရေးဒီဂရီကောလိပ်ကျောင်းသီချင်းဖြင့်ဖွင့်လှစ်ခဲ့ပြီးနောက် တိုင်းဒေသကြီးဝန်ကြီးချုပ်က“ တိုင်း​ဒေသကြီးအတွင်းရှိ ပုသိမ်၊ ​မြောင်းမြ၊ ဘိုက​လေးပညာ​ရေးဒီဂရီ​ကောလိပ်​(၃)​ခုတွင် PPTT (၁၁/၂၀၂၄)သင်တန်းများနှင့် ​လေးနှစ်သင် သင်တန်းများကိုဖွင့်လှစ်ခဲ့ရာ တိုင်း​ဒေသကြီးအစိုးရအဖွဲ့အ​နေဖြင့် ပညာ​ရေးဒီဂရီ​ကောလိပ်များသို့ သွား​ရောက်၍ ​ဆရာ၊ ဆရာမများဖြစ်လာမည့် ​သင်တန်းသား၊ သင်တန်းသူများအား တွေ့ဆုံအား​ပေး​ထောက်ပံ့လျက်ရှိပါ​ကြောင်း၊ ပုသိမ်ပညာ​ရေးဒီဂရီ​ကောလိပ်တွင် ​PPTT (၁၁/၂၀၂၄)သင်တန်းသား၊ သင်တန်းသူ (၄၉၄)ဦးနှင့် လေးနှစ်သင် သင်တန်းသား၊ သင်တန်းသူ (၈၁၈)ဦး စုစု​ပေါင်း (၁၃၁၂) ဦးအား ဆရာပတတ်ပညာများ သင်ကြား​ပေးလျှက်ရှိပါ​ကြောင်း၊ တိုင်းဒေသကြီးအတွင်းရှိ အခြေခံပညာကျောင်း၊ ဘုန်းတော်ကြီးသင်ပညာရေးကျောင်း၊ ကိုယ်ပိုင်ကျောင်းများအပါအဝင် စုစု​ပေါင်း (၇၂၉၀)ကျောင်းတွင် ဇွန်လ ၆ ရက်​နေ့အထိ ​ကျောင်းသား၊ ​ကျောင်းသူ စုစု​ပေါင်း(၁၁)သိန်း​ကျော် အပ်နှံတက်​ရောက်လျက်ရှိပါ​ကြောင်း၊ သင်တန်းသား၊ သင်တန်းသူ ​​မောင်မယ်များသည် ပညာရေးဒီဂရီကောလိပ်ကျောင်းတော်ကြီးတွင် ပညာသင်ကြားဆည်းပူးမှုများ ပြုလုပ်၍ မိမိတို့တာဝန်ကျရာ အခြေခံပညာကျောင်းအသီးသီးသို့ ဝင်ရောက်တာဝန်ထမ်းကြရမည်ဖြစ်ပါကြောင်း၊ နိုင်ငံတော်အနေဖြင့် လူငယ်များ၏ အခန်းကဏ္ဍကို ပိုမိုမြှင့်တင်ပေးလျက်ရှိရာ ဗလငါးတန်နှင့်ပြည့်စုံသည့် နိုင်ငံ့သားကောင်းများ ဖြစ်အောင် ဆရာ၊ ဆရာများမှ ပြုစုပျိုးထောင်ပေးရမှာဖြစ်ပါကြောင်း၊ ဆရာ၊ ဆရာမများသည်  တပည့်များ၏ လက်ဦးဆရာ စံနမူနာပြများဖြစ်သဖြင့် ဝတ်စားဆင်ယင်မှု၊ အ​ပြောအဆို၊ အ​နေအထိုင်မှစ၍ ဂရုပြုရန်လိုပါကြောင်း၊ မိမိတို့သင်တန်းများပြီးဆုံး၍ တာဝန်ကျရာဒေသများသို့ သွားရောက်တာဝန်ထမ်းဆောင်သည့်အခါတွင်လည်း ဒေသ၌ရှိသည့် ပညာရေးကိုလိုလားသည့် ကျောင်းသားမိဘများ၊ ရပ်မိ၊ ရပ်ဖများ၊ ကျောင်းသား၊ ကျောင်းသူများက ကြိုဆိုနေကြမည်ဖြစ်ပါကြောင်း၊ နိုင်ငံတော်အနေဖြင့် ကျောင်းနေအရွယ်ကလေးအားလုံး ရာနှုန်းပြည့်ကျောင်းတက်ရောက်ရေးနှင့် အနည်းဆုံး KG+9  ပြီးဆုံးသည်အထိ ပညာသင်ယူနိုင်ရေးဆောင်ရွက်ပေးလျက်ရှိပါကြောင်း၊ ကျောင်းသား၊ ကျောင်းသူများ အတန်းစဉ်ကူးပြောင်းမှုများပျက်ကွက်မှုမရှိစေရေး၊ ကျောင်းထွက်မှုမရှိစေရေး၊ ကျောင်းနေအရွယ်ကလေးအားလုံး ရာနှုန်းပြည့်ကျောင်းတက်ရောက်စေရေး ပူး​ပေါင်း​ဆောင်ရွက်​ပေးရမည်ဖြစ်ပါကြောင်း၊ ဆရာ၊ ဆရာမများသည် ကျောင်းသား၊ ကျောင်းသူများ၏ ကိုယ်ရည်ကိုယ်သွေးနှင့် စွမ်းရည်သတ္တိပြည့်ဝအောင် သင်ကြားပေးရမည်ဖြစ်ပြီး ခေတ်နှင့်အညီပြောင်းလဲလာသော ပညာရေးစနစ်ကို အစဉ် လေ့လာသင်ယူပြီး အမြဲကြိုးစားနေရမည့် ထာဝရကျောင်းသားကြီးများဖြစ်ပါကြောင်း၊  ပညာရေးကဏ္ဍအတွက် အားထားရသည့် ဆရာ၊ ဆရာမများဖြစ်လာမည့် သင်တန်းသား၊ သင်တန်းသူများအား မိမိအနေဖြင့်များစွာဂုဏ်ယူပါကြောင်းနှင့် အနာဂတ်တွင် နိုင်ငံ့တာဝန်များကို ပုခုံးပြောင်းထမ်းဆောင်မည့် ဗလငါးတန်နှင့်ပြည့်စုံသော လူငယ်လူရွယ်များနှင့် လူတော်လူကောင်းများ မွေးထုတ်ပေးနိုင်​ရေး၊ ​ကျောင်း​နေအရွယ်က​လေးအားလုံး ရာနှုန်းပြည့်​ကျောင်းတက်​ရောက်​စေ​ရေး၊ စဥ်ဆက်မပြတ်အတန်းစဥ်ကူး​ပြောင်းမှုများရှိ​စေ​ရေးအတွက် တက်ညီလက်ညီ ဝိုင်းဝန်း​ဆောင်ရွက်​ပေး​စေလို​ပါကြောင်း" ကြိုဆိုနှုတ်ခွန်းဆက်စကားပြောကြားပြီး သင်တန်းသား၊ သင်တန်းသူများအတွက် ထောက်ပံ့ငွေများကိုပေးအပ်ရာ ပုသိမ်ပညာရေးဒီဂရီကောလိပ် ကျောင်းအုပ်ကြီးက လက်ခံရယူခဲ့သည်။

ဆက်လက်၍ ပုသိမ်ပညာရေးဒီဂရီကောလိပ်ကျောင်းအုပ်ကြီးက သင်တန်းများဖွင့်လှစ်ရခြင်းအကြောင်းများကို ရှင်းလင်းတင်ပြပြီးနောက် တိုင်းဒေသကြီးဝန်ကြီးချုပ်နှင့် ဧည့်သည်တော်များသည် သင်တန်းသား၊ သင်တန်းသူများ၏ တေးသီချင်းများဖြင့် သီဆိုကပြဖျော်ဖြေမှုများကို ကြည့်ရှုအားပေးခဲ့ပြီး​သင်တန်းသား၊ သင်တန်းသူများအား ရင်းရင်းနှီးနှီးနှုတ်ဆက်ခဲ့သည်။