ဧရာဝတီတိုင်းဒေသကြီးဝန်ကြီးချုပ်နှင့်အဖွဲ့သည် ဟင်္သာတမြို့၊ ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန၊ သဘာဝဘေးအန္တရာယ်စီမံခန့်ခွဲမှုသင်တန်းကျောင်းတွင် ပြုလုပ်သည့် ဘေးအန္တရာယ်ကြောင့် ထိခိုက်ဆုံးရှုံးနိုင်ခြေ စီမံခန့်ခွဲမှုသင်တန်း (၁/၂၀၂၄) သင်တန်းဆင်းပွဲ အခမ်းအနားအား တက်ရောက်ခဲ့ပြီး ဝန်ကြီးချုပ်က“ သဘာဝဘေးအန္တရာယ်အမျိုးမျိုးရှိပြီး သဘာဝဘေးအန္တရာယ်များ ဖြစ်ပေါ်လာပါက ပျက်စီးဆုံးရှုံးမှုများလည်း များပြားပါကြောင်း၊ သင်တန်းကာလအတွင်း၌ သင်တန်းကျောင်းမှ နည်းပြများအပြင် မိတ်ဖက်ဌာနများဖြစ်သည့် မီးသတ်ဦးစီးဌာန၊ မိုးလေဝသနှင့်ဇလဗေဒညွှန်ကြားမှုဦးစီးဌာန၊ မြန်မာနိုင်ငံကြက်ခြေနီအသင်း၊ ပတ်ဝန်းကျင်ထိန်းသိမ်းရေးဦးစီးဌာန၊ ပြည်သူ့ကျန်းမာရေးဦးစီးဌာနတို့မှ နည်းပြများက သက်ဆိုင်ရာ ဘာသာရပ်များအား ဆွေးနွေးပို့ချခဲ့ခြင်း ဖြစ်သည့်တွက် ဗဟုသုတများစွာ ရရှိကြမည်ဟုမျှော်လင့်ပါကြောင်း၊ သဘာဝဘေးကျရောက်မှုများသည် ရုပ်ပိုင်းဆိုင်ရာ၊ လူမှုရေးပိုင်းဆိုင်ရာ၊ စီးပွားရေးပိုင်းဆိုင်ရာနှင့် သဘာဝပတ်ဝန်းကျင်ဆိုင်ရာ ထိခိုက်ခံရလွယ်မှုများသည့် နေရာများ၌ ဆိုးကျိုးသက်ရောက်မှု ပိုများသည်ကိုတွေ့ရမည်ဖြစ်ပါကြောင်း၊ ​တိုင်း​ဒေသကြီးတွင် ရေ​ဘေး၊ ​လေ​ဘေး သဘာဝေးအန္တရာယ်များကြောင့် ထိခိုက်ပျက်စီးမှုများကိုလျော့ချနိုင်ရန်အတွက် လေကာပင်များ၊ ဒီ​ရေ​တောများကိုလည်း ပိုမိုတိုးချဲ့စိုက်ပျိုးဆောင်ရွက်လျက်ရှိပါကြောင်း၊ မြန်မာနိုင်ငံအပါအဝင် ကမ္ဘာနဲ့ အဝှမ်းတွင်လည်းဘေးအန္တရာယ်များကြောင့် ပြည်သူလူထု၏ လူမှုစီးပွားဘဝနှင့် နိုင်ငံ၏ဖွံ့ဖြိုးတိုးတက်မှုများကို အဟန့်အတားဖြစ်စေသည်ကို တွေ့ရမှာဖြစ်ပါကြောင်း၊ ထိုကဲ့သို့ ဖွံ့ဖြိုးတိုးတက်မှု အရှိန်အဟုန်ကို အဟန့်အတားဖြစ်စေမည့် ခြိမ်းခြောက်မှုများကို တုံ့ပြန်ဆောင်ရွက်နိုင်နှင့် လျော့ပါးသက်သာစေရန်အတွက် သက်ဆိုင်ရာ ကဏ္ဍအလိုက် ဆောင်ရွက်ကြရမည်ဖြစ်ပြီး မိမိတို့အားလုံးက တက်ညီလက်ညီပူးပေါင်းဆောင်ရွက်သွားကြရန်လည်း လိုအပ်မှာဖြစ်ပါကြောင်း၊ သင်တန်းသား၊ သင်တန်းသူများသည် ယခုသင်တန်းကရရှိခဲ့ကြသည့် အသိအမြင်၊ ဗဟုသုတများအား မိမိတို့၏ ဒေသအသီးသီးသို့ ပြန်လည်ရောက်ရှိရာတွင် လက်တွေ့ ပြန်လည်မျှ​ဝေအသုံးချကြရန်လိုပါကြောင်းနှင့် မိမိတို့၏ ဌာနအနေဖြင့် လုပ်ငန်းအစီအစဉ်များ၊ စီမံချက်များရေးဆွဲသည့်အခါတွင်လည်း ဘေးလျော့ပါးရေး အမြင်များ၊ ဘေးလျော့ပါးရေး လုပ်ငန်းများကိုထည့်သွင်းပေါင်းစပ် ဆောင်ရွက်သွားကြ‌စေလိုကြောင်း” တိုက်တွန်းပြောကြာကြားသည်။

ထို့နောက် သဘာဝဘေးအန္တရာယ်စီမံခန့်ခွဲမှုသင်တန်းကျောင်းမှကျောင်းအုပ်ကြီးက သင်တန်းဆင်းအစီရင်ခံစာအား ဖတ်ကြားခဲ့ပြီးနောက် တိုင်း​ဒေသကြီးလူမှုရေးရာဝန်ကြီးက သင်တန်းသားများကိုယ်စား သင်တန်းသားတစ်ဦးအား သင်တန်းဆင်းလက်မှတ်များ ပေးအပ်ခဲ့သည်။ ဆက်လက်၍ တိုင်းဒေသကြီးဝန်ကြီးချုပ်ကသင်တန်းသူများကိုယ်စား သင်တန်းသူတစ်ဦးအား သင်တန်းဆင်းလက်မှတ်နှင့် စာပေထူးချွန်ဆုရ သင်တန်းသူတစ်ဦးအား ဆုများချီးမြှင့်ခဲ့ကြောင်းသိရသည်။