ဧရာဝတီတိုင်းဒေသကြီး အစိုးရအဖွဲ့ဝန်ကြီးချုပ်ဦးတင်းမောင်ဝင်းသည် တိုင်းဒေသကြီး အစိုးရအဖွဲ့ဝင်ဝန်ကြီးများ၊ ဌာနဆိုင်ရာများလိုက်ပါလျက် ယနေ့ နေ့လည်ပိုင်းတွင် မြောင်းမြခရိုင်၊ အိမ်မဲမြို့နယ်ရှိ နယူးဧရာ(၁) မျိုးစပါး မိုးစပါးစံကွက်ရိတ်သိမ်းပွဲသို့ တက်ရောက်ကြည့်ရှုအားပေးခဲ့ပြီး အသက်(၈၅)နှစ်အထက် ဘိုး/ဘွားများအား လူမှုရေးပင်စင် ထောက်ပံ့ပေးအပ်ပွဲအခမ်းအနားသို့ တက်ရောက်အားပေးခဲ့သည်။

ဦးစွာ တိုင်းဒေသကြီး ဝန်ကြီးချုပ်နှင့်တာဝန်ရှိသူများသည် အိမ်မဲမြို့နယ်၊ ဘုရားကြီးကုန်းကျေးရွာအုပ်စု၊ ဆိတ်ချေးကုန်းကျေးရွာရှိ နိုင်ငံ့စီးပွားမြှင့်တင်ရေးရန်ပုံငွေ (၈)ဘီလီယံမှ သွင်းအားစုထောက်ပံ့ ငွေဖြင့်ဆောင်ရွက်ပြီး ပိုက်ဆံလျှော်သစ်စိမ်းမြေဩဇာ မြေခံထည့်သွင်းစိုက်ပျိုးထားသည့် တောင်သူဒေါ်သန်းထွေး၏ လယ်ဧက(၃)ဧကတွင်ပြုလုပ်သည့် နယူးဧရာ(၁)မျိုးစပါး မိုးစပါး စံကွက်ရိတ်သိမ်းပွဲသို့ တက်ရောက်ကြည့်ရှု အားပေးခဲ့ပြီး တောင်သူများနှင့်တွေ့ဆုံ၍ တစ်ဧက (၁၀)တင်းပိုမိုတိုးတက်ထွက်ရှိစေရေးအတွက် အထွက်တိုး မျိုးစပါးများပြောင်းလဲအသုံးပြုခြင်း၊ စိုက်နည်းစနစ်များပြောင်းလဲစိုက်ပျိုးခြင်း၊ သဘာဝမြေဩဇာများအချိုးကျသုံးစွဲခြင်း၊ ပိုက်ဆံလျှော်သစ်စိမ်းမြေဩဇာ များမြေခံထည့်သွင်း စိုက်ပျိုးခြင်းများဆောင်ရွက်ခဲ့ရာ တစ်ဧက အထွက်နှုန်းများတိုးတက်လာသည်ကိုတွေ့ရှိနေပြီဖြစ်ပါကြောင်း၊ သီးထပ်စွမ်းအားများတိုးမြှင့် ဆောင်ရွက်ရန်လိုပါကြောင်းနှင့် ပန်းတိုင်အထွက်နှုန်းများ ရရှိစေရေးဆက်လက်ဆောင်ရွက် သွားကြရန်ဆွေးနွေးပြောကြားခဲ့ပြီး စံကွက်ရိတ်သိမ်းနေမှုအား ကြည့်ရှုအားပေးခဲ့သည်။

အဆိုပါတောင်သူဒေါ်သန်းထွေး၏ နယူးဧရာ(၁)မျိုးစပါး မိုးစပါး စံကွက်ရိတ်သိမ်းခဲ့ရာတွင် တစ်ဧကလျှင် ပျမ်းမျှအထွက်နှုန်း(၁၃၄)တင်းထွက်ရှိခဲ့ပြီး အထွက်တိုး မျိုးစပါးများပြောင်းလဲ အသုံးပြုခြင်း၊ စိုက်နည်းစနစ်များပြောင်းလဲစိုက်ပျိုးခြင်း၊ သဘာဝမြေဩဇာများအချိုးကျ သုံးစွဲခြင်း၊ ပိုက်ဆံလျှော်သစ်စိမ်းမြေဩဇာများမြေခံထည့်သွင်းစိုက်ပျိုးခြင်းများအပြင် ရိတ်သိမ်း ခြွေလှေ့စက်မောင်းသင်တန်းဆင်းများမှ စနစ်တကျဖြင့်ရိတ်သိမ်းခြင်းတို့ကြောင့် လေလွင့်မှုများ နည်းပါးကာ အထွက်နှုန်းတိုးခြင်းဖြစ်ကြောင်းသိရသည်။ 

ဆက်လက်၍ တိုင်းဒေသကြီး ဝန်ကြီးချုပ်နှင့်အဖွဲ့သည် အိမ်မဲမြို့နယ်၊ ဘုရားကြီးကုန်းကျေးရွာရှိ တောင်သူ ဦးစိန်မောင်သန်း၏ ဆင်းသုခမျိုးစေ့ထုတ်စိုက်ခင်း ဧက(၂၀)တွင် သစ်စိမ်းမြေဩဇာ ပိုက်ဆံလျှော်(၅)နှစ် မြေခံထည့်သွင်းခဲ့ပြီး ယခုနှစ်တွင် တိုင်းဟိဇီဝမြေဩဇာ တစ်ဧကလျှင် အရည်(၄)လီတာနှင့် အမှုန့်(၃၀) ကီလိုဂရမ် (၁၀)အိတ်ထည့်သွင်းဆောင်ရွက်ခဲ့ပြီး ဧက(၂၀)တွင် ယူရီးယား(၆)အိတ် သာသုံးခဲ့သော်လည်း ယခုနှစ်ထူးခြားချက်များမှာ အပင်အမြင့်ပုံမှန်ထက် (၈)လက်မမှ (၁) ပေ အထိမြင့်ခြင်း၊ တစ်နှံပါအစေ့များလာခြင်း၊ တစ်နှံပါအောင်စေ့များလာခြင်း၊ ကုန်းကျသော နေရာများတွင် အပင်ခြေအထက်(၂)လက်မခန့်မှအမြစ်များ ထပ်မံထွက်ရှိလာခြင်း၊ ပင်စည် တောင့်တင်းခြင်း စသည်ဖြင့်တွေ့ရှိလာမှုအပေါ် ကွင်းဆင်းစစ်ဆေး၍ စံကွက်ရိတ်သိမ်း ခြင်းပြုလုပ်ချိန်မှတ်တမ်းများနှင့်တကွရှင်းလင်းတင်ပြနိုင်စေရေးမှာကြားခဲ့သည်။

ထို့နောက် တိုင်းဒေသကြီးဝန်ကြီးချုပ်သည် တာဝန်ရှိသူများနှင့်အတူ အိမ်မဲမြို့နယ် အထွေထွေအုပ်ချုပ်ရေးဦးစီးဌာန၊ ရွှေပြည်တန်ခန်းမတွင် ပြုလုပ်သည့် အိမ်မဲမြို့နယ်အတွင်းရှိ အသက်(၈၅)နှစ်အထက် ဘိုး/ဘွားများအား လူမှုရေးပင်စင် ထောက်ပံ့ပေးအပ်ပွဲအခမ်းအနားသို့ တက်ရောက်၍ “ နိုင်ငံတော်မှ အသက်(၈၅)နှစ်အထက် သက်ကြီးဘိုး/ဘွားများအား လူမှုရေး ပင်စင်များထောက်ပံ့ပေးခြင်းနှင့် မြို့နယ်အတွင်းရှိလုပ်ငန်းရှင်များစုပေါင်း၍ အာဟာရပြည့် စားသောက်ဖွယ်ရာမျာဖြင့် ပေးအပ်ကန်တော့ခြင်းဖြစ်ပါကြောင်း၊ ဘိုးဘွားများအား အိမ်တိုင် ရာရောက် ထောက်ပံ့ပေးခြင်းများရှိသကဲ့သို့ အုပ်ချုပ်ရေးအဖွဲ့များမှ ဆက်လက်ထောက်ပံ့ ပေးအပ်ခြင်းများလည်းရှိပါကြောင်းနှင့် လိုအပ်သည်များကိုသုံးဆောင်နိုင်ရန်လည်း ဖြစ်ပါကြောင်း၊ အသက်(၈၅)နှစ်ထက် ဘိုးဘွားများသည် ပညာဉာဏ်နှင့် အတွေ့အကြုံများ ရင့်ကျက် သည့်သူများလည်း ဖြစ်ပါကြောင်း၊ ငယ်ရွယ်သူများအပေါ်တွင်လည်း စေတနာသဒ္ဒါတရား ထက်သန်စွာဖြင့် မိမိတို့တတ်သိကျွမ်းကျင်သည့် အသိပညာ၊ ဗဟုသုတများဖြင့် ဆုံးမပဲ့ပြင်ခဲ့သူ များလည်းဖြစ်ပါကြောင်း၊ ဘိုးဘွားများအား သက်ရှည်ကျန်းမာစွာဖြင့် စုံစုံလင်လင်တွေ့ရှိရပြီး ထောက်ပံ့ငွေများပေးအပ်နိုင်သည့်အတွက်လည်း လွန်စွာဂုဏ်ယူဝမ်းမြောက်မိပါကြောင်း” ဂုဏ်ပြုအမှာစကားများပြောကြားသည်။

ထို့နောက် တိုင်းဒေသကြီးဝန်ကြီးချုပ်နှင့် တာဝန်ရှိသူ များသည် အသက်(၈၅)နှစ်အထက် ဘိုး/ဘွားများအား လူမှုရေးပင်စင်၊ ဆန်နှင့်ကြက်ဥများ ထောက်ပံ့ပေးအပ်ပြီးနောက် တက်ရောက်လာကြသော သက်ကြီးဘိုး/ဘွားများကိုယ်စား အဘိုးတစ်ဦးက ကျေးဇူးတင်စကားများ ပြန်လည်ပြောကြားခဲ့ကြောင်းသိရသည်။