ဧရာဝတီတိုင်းဒေသကြီးအတွင်း ခရီးသွားလုပ်ငန်းဖွံ့ဖြိုးတိုးတက်ရေးအတွက် ပုသိမ်မြို့ ပေါ်ရှိလုပ်ငန်းရှင်များနှင့် တွေ့ဆုံပွဲအခမ်းအနားကို ယနေ့နံနက်ပိုင်းက ပုသိမ်မြို့၊ ဧရာရွှေဝါခန်းမတွင်ပြုလုပ်ရာ တွေ့ဆုံပွဲသို့ တိုင်းဒေသကြီးဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများ၊ ဌာနဆိုင်ရာများနှင့် လုပ်ငန်းရှင်များတက်ရောက်ခဲ့ကြသည်။

လုပ်ငန်းရှင်များနှင့်တွေ့ဆုံပွဲတွင် တိုင်းဒေသကြီးဝန်ကြီးချုပ်က“ မကြာမီပွင့်လင်းရာသီကို ရောက်ရှိလာတော့မည်ဖြစ်၍ ပြည်တွင်းပြည်ပခရီးသွားများ ပိုမိုလာရောက်လည်ပတ်ကြတော့ မှာဖြစ်ပါကြောင်း၊ မိမိတို့တိုင်းဒေသကြီးသည် ငွေဆောင်နှင့်ချောင်းသာကမ်းခြေခရီးသွား လုပ်ငန်းများအပြင် ဘုရားဖူးခရီးစဉ်များလည်းဖွံ့ဖြိုးသည့် တိုင်းဒေသကြီးဖြစ်ပါကြောင်း၊ ယခုနှစ်တွင် ဇန်နဝါရီလမှစက်တင်ဘာလအထိ ပြည်တွင်းပြည်ပခရီးသွား (၇) သိန်းကျော် ဝင်ရောက်ခဲ့ပါကြောင်းနှင့် စည်ပင်လိုင်စင်ရယူထားသည့် တည်းခိုခန်းများတွင်လည်း (၄)သိန်းကျော်ဝင်ရောက်ခဲ့ပြီး စုစုပေါင်း (၁၁) သိန်းကျော်ဝင်ရောက်ခဲ့ပါကြောင်း၊ ကမ်းခြေ ခရီးသွားလုပ်ငန်းနှင့်ဆက်စပ်၍ ပုသိမ်မြို့ပေါ်ရှိဟိုတယ်လုပ်ငန်းများ၊ စားသောက်ဆိုင်လုပ်ငန်း များသည်လည်းဖွံ့ဖြိုးလာပါကြောင်း၊ ဟိုတယ်များနှင့် တည်းခိုရိပ်သာများ၏ လျှပ်စစ်လိုအပ် ချက်များအတွက် ဆိုလာစနစ်၊ လေအားလျှပ်စစ်၊ ရေအားလျှပ်စစ်စနစ်များဖြင့် ဖြည့်ဆည်း ပေးနိုင်ရေးဆောင်ရွက်လျက်ရှိပါကြောင်း၊ ဟိုတယ်နှင့်တည်းခိုရိပ်သာများအနေဖြင့် လာရောက် တည်းခိုသည့် ခရီးသွားဧည့်သည်များအနေဖြင့် ပေးရသည့်ငွေကြေးတန်ဖိုးနှင့်ညီမျှသည့် ဝန်ဆောင်မှုများ၊ သန့်ရှင်းလတ်ဆက်သည့်အစားအစာများ၊ ဧည့်ဝတ်ကျေပွန်မှုများဖြင့် ဧည့်သည်များစိတ်ကျေနပ်မှုရှိစေရေးဆောင်ရွက်ပေးရန်လိုပါကြောင်း၊ လာရောက်လည်ပတ်သည့် ခရီးသွားဧည့်သည်များကို ထပ်ကာထပ်ကာလာချင်စိတ်များဖြစ်အောင် စိတ်ဝင်စားဖွယ်ရာ များဖြင့်ဆွဲဆောင်ရန်လည်းလိုပါကြောင်း၊ တိုင်းဒေသကြီးအတွင်းမှထွက်ရှိသည့် ကြိမ်ထည် ပစ္စည်းများအား ဟိုတယ်များတွင် အသုံးပြုပြသရောင်းချပေးနိုင်ရန်ဆောင်ရွက်လျက်ရှိပါ ကြောင်း၊ တိုင်းဒေသကြီးမှထွက်ရှိသည့် ဧရာဝတီပေါ်ဆန်းဆန်အပါအဝင် စားသောက်ကုန်များ၊ ကြိမ်၊ ဝါး၊ ဗေဒါ၊ သင်၊ အုန်းအသုံးပြုလက်မှုပစ္စည်းများသည်လည်း ခရီးသွားများကို ဆွဲဆောင်နိုင်သည့်ပစ္စည်းများဖြစ်ရာ ဒေသထွက်အမှတ်တရလက်ဆောင်ပစ္စည်း အရောင်းဆိုင် များအနေဖြင့် အရည်အသွေးကောင်းကောင်း၊ ထုပ်ပိုးမှုပုံစံကောင်းကောင်းဖြင့် မြင်သည်နှင့် ဝယ်ချင်စဖွယ်ဖြစ်အောင် ဆောင်ရွက်သွားကြရန်လည်းလိုပါကြောင်း၊ ပွင့်လင်းရာသီကို ရောက်ရှိလာပြီဖြစ်၍ တိုင်းဒေသကြီး၏ ခရီးသွားလုပ်ငန်းဖွံ့ဖြိုးတိုးတက်ရန်အတွက် အစွမ်းကုန် ကြိုးပမ်းဆောင်ရွက် ပေးကြရန်နှင့် တက်ရောက်လာသူများကလည်း အသေးစိတ်အပြန်အလှန် ဆွေးနွေးပေးကြ စေလိုကြောင်း”အမှာစကားများပြောကြားသည်။

ဆက်လက်၍ စီးပွားရေးရာဝန်ကြီးမှခရီးသွားလုပ်ငန်းဖွံ့ဖြိုးတိုးတက်ရေး အစည်းအဝေး တက်ရောက်ခဲ့မှုအခြေအနေများနှင့် တွေ့ဆုံပွဲသို့တက်ရောက်လာသူများ၏ အထွေထွေဆွေးနွေး တင်ပြချက်များအပေါ် တိုင်းဒေသကြီးဝန်ကြီးချုပ်က လိုအပ်သည်များကို ဖြည့်စွက်ဆွေးနွေးခဲ့ပြီး ခရီးသွားလုပ်ငန်းဖွံ့ဖြိုးတိုးတက်ရေးအတွက် တင်ပြချက်များအပေါ် သက်ဆိုင်ရာတာဝန်ရှိသူ များနှင့် ပေါင်းစပ်ညှိနှိုင်းဆောင်ရွက်ပေးခဲ့ကြောင်းသိရသည်။