နေပြည်တော်တွင်ကျင်းပပြုလုပ်မည့် ၂၀၂၃ခုနှစ်၊စိန်ရတုလွတ်လပ်ရေးနေ့အထိမ်းအမှတ် နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌဖလား ပြည်နယ်နှင့်တိုင်းဒေသကြီး အသက်(၁၈)နှစ်အောက် အမျိုးသမီးဘောလုံးပြိုင်ပွဲသို့ ဝင်ရောက်ယှဉ်ပြိုင်မည့် ဧရာဝတီတိုင်းဒေသကြီးအသင်း ဖွဲ့စည်းနိုင်ရေးအတွက် ခြေစမ်းဘောလုံးပြိုင်ပွဲအား နိုဝင်ဘာလ ၂၉ ရက်နေ့ ညနေပိုင်းက ကိုးသိန်းဘောလုံးအားကစားကွင်း၌ ပြုလုပ်ရာ တိုင်းဒေသကြီးဝန်ကြီးချုပ် ဦးတင်မောင်ဝင်းနှင့်ဇနီး၊ အစိုးရအဖွဲ့ဝင် ဝန်ကြီးများနှင့်ဇနီးများ၊ ဘောလုံးဝါသနာရှင် ပြည်သူများတက်ရောက်ခဲ့ကြသည်။

ခြေစမ်းဘောလုံးပြိုင်ပွဲမစတင်မီ ဒိုင်လူကြီးများ ဦးဆောင်၍ နှစ်ဖက်ကစားသမားများ ကွင်းအတွင်းဝင်ရောက် နေရာယူကြပြီးနောက် တိုင်းဒေသကြီး ဝန်ကြီးချုပ်အား နှစ်ဖက်အသင်းမှ အားကစားသမားများ၊ကွင်းလယ်ဒိုင်၊စည်းကြပ်ဒိုင်များနှင့်တစ်ဦးချင်းမိတ်ဆက်ပေးသည်။ ယင်းနောက် ခြေစမ်းပွဲအား ဧရာဝတီ(က) အသင်းနှင့် ဧရာဝတီ(ခ)အသင်းတို့ အကြိတ်အနယ်ယှဉ်ပြိုင်ကစားခဲ့ကြရာ ဧရာဝတီ(က)အသင်းက ဧရာဝတီ(ခ)အသင်းအား ၄ ဂိုး- ၂ ဂိုးဖြင့်အနိုင်ရရှိခဲ့ကြောင်းသိရသည်။