ဧရာဝတီတိုင်းဒေသကြီး၊ စိုက်ပျိုးရေးဦးစီးဌာနက ကြီးမှူးဖွင့်လှစ်သည့် လက်မှတ်ရပိုးသတ်ဆေးသုံးစွဲသူများသင်တန်း (၁/၂၀၂၂)ဖွင့်ပွဲအား  ဇွန်လ ၂၂ ရက်နေ့ နံနက် ၈ နာရီခွဲအချိန်က တိုင်းဒေသကြီးစိုက်ပျိုးရေးဦးစီးဌာန အစည်းအဝေးခန်းမ၌ ပြုလုပ်ရာ တိုင်းဒေသကြီးဝန်ကြီးချုပ် ဦးတင်မောင်ဝင်း၊ အစိုးရအဖွဲ့ဝင်ဝန်ကြီများ၊ စိုက်ပျိုးရေးဦးဌာနမှ တာဝန်ရှိသူများနှင့် သင်တန်းသား၊ သင်တန်းသူများ တက်ရောက်ခဲ့ကြသည်။

ရှေးဦးစွာ တိုင်းဒေသကြီးဝန်ကြီးချုပ်က “ဧရာဝတီတိုင်းဒေသကြီးတွင် စိုက်ပျိုးရေးကဏ္ဍဖွံ့ဖြိုးတိုးတက်စေရန်အတွက်  ဖြစ်ပေါ်ကျရောက်တတ်သော ပိုးမွှားအန္တရာယ်များအား အမြန်ဆုံးပျောက်ကင်း ကုစားနိုင်ရန်နှင့် ပိုးသတ်ဆေးဥပဒေ၊ လုပ်ထုံးလုပ်နည်းများသိရှိလိုက်နာဆောင်ရွက်တတ်စေရန်၊ ပိုးသတ်ဆေးနှင့်ပိုးသတ်ဆေးအန္တရာယ်ကိုသိရှိနာလည်းအသုံးပြုတတ်စေရန် ရည်ရွယ်ဖွင့်လှစ်သည့် ရက်တိုသင်တန်းဖြစ်ပါကြောင်း၊ ယခုသင်တန်းတွင် ပိုးသတ်ဆေးများအား လက်တွေ့သုံးစွဲသူများပါရှိသကဲ့သို့ လက်မှတ်ရပိုးသတ်ဆေးများအား ရောင်းချနေသည့်သူများလည်းပါရှိကြောင်း၊ မိမိတို့ဒေသအတွင်း စိုက်ဧကနှင့်အထွက်နှုန်းများ တိုးတက်စေရန်အပြင် ကျန်းမာရေးနှင့် ညီညွတ်မျှတသည့် သီးနှံများထွက်ရှိပြီး ဈေးကွက်အတွင်း ရောင်းချနိုင်ရန်အတွက် ပိုးမွှားအန္တရာယ် ကင်းစင်ရန် လိုအပ်ကြောင်း၊ ပိုးသတ်ဆေးသုံးစွဲသူများ၊ ရောင်းချသူများအနေဖြင့် ပိုးသတ်ဆေးများ၏ အကျိုးအာနိသင်များ၊ အန္တရာယ်ဖြစ်စေနိုင်မှုများကို နှံ့နှံ့စပ်စပ်သိရှိကြရန်လိုအပ်ပြီး အသုံးပြုမည့် တောင်သူများအား သေချာစွာ အသိပညာပေး ညွှန်ကြားမှု ပြုနိုင်ရန်လည်း လိုအပ်ကြောင်း၊ သင်တန်းမှပို့ချမှုများကို သေချာလေ့လာမှတ်သားပြီး မိမိတို့အရပ်ဒေသများတွင်ပြန်လည်ဆင့်ပွားဆောင်ရွက်ပေးကြရန်နှင့် တိုင်းဒေသကြီး၏ စိုက်ပျိုးရေးလုပ်ငန်းများတွင် ပိုးမွှားအန္တရာယ်ကာကွယ်နှိမ်နှင်းရေးလုပ်ငန်းများအား ပိုးသတ်ဆေးသုံးစွဲသူများ၊ ရောင်းချသူများ၊
တောင်သူများ၊ ဌာနဆိုင်ရာများမှပူးပေါင်းဆောင်ရွက်ပေးကြရန်”ပြောကြားသည်။

ထို့နောက် တိုင်းဒေသကြီးစိုက်ပျိုးရေးဦးစီးဌာနမှူး ဦးစိန်မောင်မြင့်က သင်တန်းဖွင့်လှစ်ရခြင်း ရည်ရွယ်ချက်များအား လည်းကောင်း၊ စိုက်ပျိုးရေးဦးဌာန သီးနှံကာကွယ်ရေး (ရုံးချုပ်)မှ ဒုတိယညွှန်ကြားရေးမှူး ဒေါ်ခင်လေးဇံက သင်တန်းတွင်ပို့ချဆွေးနွေးမည့်ဘာသာရပ်များနှင့် သင်တန်းစည်းကမ်းများအားလည်းကောင်း ရှင်းလင်းပြောကြားခဲ့သည်။ အဆိုပါသင်တန်းအား ယခုလ ၂၂ ရက်နေ့မှ ၂၄ ရက်နေ့အထိ ၃ ရက်ကြာ ဖွင့်လှစ်သွားမည်ဖြစ်ပြီး သင်တန်းသား သင်တန်းသူ ၂၀၀ ဦး တက်ရောက်ခဲ့ကြကြောင်းသိရသည်။