လူငယ်များ စာဖတ်စွမ်းရည်တိုးတက်စေရေး၊ စာဖတ်ရှိန်မြင့်တင်ရေး၊ ဗလငါးတန်နှင့် ပြည်စုံသော လူငယ်လူရွယ်များ ဖြစ်လာစေရေး၊ လူအများနှင့်ဆွေးနွေးပြောဆိုမှုပြုတတ်စေရေး အစရှိသည့်ရည်ရွယ်ချက်များဖြင့် ဧရာဝတီတိုင်းဒေသကြီး လူငယ်ရေးရာကော်မတီနှင့် ပုသိမ် တက္ကသိုလ်တို့ပူးပေါင်းကျင်းပသည့် “လူငယ်စကားဝိုင်း” အခမ်းအနားကိုယနေ့နံနက်ပိုင်းက ပုသိမ်တက္ကသိုလ်၊ ဘွဲ့နှင်းသဘင်ခန်းမ၌ပြုလုပ်ခဲ့သည်။ ရှေးဦးစွာ ဧရာဝတီတိုင်းဒေသကြီးလူငယ်ရေးရာကော်မတီဥက္ကဋ္ဌ၊ တိုင်းဒေသကြီးအစိုးရ အဖွဲ့ဝန်ကြီးချုပ် ဦးတင်မောင်ဝင်းက“ ပုသိမ်တက္ကသိုလ်မှ ပါမောက္ခချုပ်၊ ဒုတိယပါမောက္ခချုပ်၊ ပါမောက္ခဌာနမှူးဆရာကြီး၊ ဆရာမကြီးများ၊ ကျောင်းသား၊ ကျောင်းသူများနှင့် မကြာခဏ တွေ့ဆုံခဲ့ပါကြောင်း၊ အခြေခံပညာ၊ အဆင့်မြင့်ပညာများတွင် လူငယ်စကားဝိုင်းများပြုလုပ် ပေးခြင်းအပြင် ဒေသဖွံ့ဖြိုးတိုးတက်ရေးအတွက် အလုပ်ရုံဆွေးနွေး ပွဲများ၊ စကားဝိုင်းများ ပြုလုပ်ပေးလျက်ရှိပါကြောင်း၊ လူငယ်များသည် မိမိတို့လေ့လာမှတ်သားထားသည်များ ပြန်လည် မျှဝေနိုင်ပြီး ကိုယ်ရည်ကိုယ်သွေးများ တိုးတက်လာကာ အခွင့်အလမ်းကောင်းများပိုမိုရရှိလာပြီး ပညာရဲရင့်ပွဲလယ်တင့်လာမည်ဖြစ်ပါကြောင်း၊ တက္ကသိုလ်၌ တက်ရောက်ပညာသင်ယူနေသည့် ကျောင်းသား၊ ကျောင်းသူများသည် စာပေ၊ အားကစား အနုပညာ ဘာသာရပ်များများကို လေ့လာသင်ယူပြီး ဗလငါးတန်နှင့်ပြည့်စုံသော လူငယ်လူရွယ်များဖြစ်လာစေရန် လူငယ်ကဏ္ဍကို မြှင့်တင်ဆောင်ရွက်ပေးလျက်ရှိပါကြောင်း၊ နောင်တစ်ချိန်တွင်နိုင်ငံ့တာဝန်များကို အရည်ချင်း ရှိရှိဖြင့်ထမ်းဆောင် မည့်သူများဖြစ်လာကြမည်ဖြစ်ပါကြောင်း၊ မြန်မာနိုင်ငံ၏ စုစုပေါင်းလူဦးရေ (၃၄)ရာခိုင်နှုန်း နီးပါးသည် အသက်(၁၅)မှ(၃၅)နှစ်အတွင်းရှိသည့် လူငယ်များဖြစ်ပါကြောင်း၊ မိမိတို့နိုင်ငံကို ဒီမိုကရေစီနှင့်ဖယ်ဒရယ်စနစ်ကိုအခြေခံသည့် ပြည်ထောင်စုကြီး တည်ဆောက် ရာတွင် ထူးချွန်သည့် လူ့စွမ်းအားအရင်းအမြစ်ဖြစ်သော အသိပညာရှင်၊ အတတ်ပညာရှင်များစွာ လိုအပ်မည်ဖြစ်ပါကြောင်း၊ အနာဂတ်နိုင်ငံတော်ကို တာဝန်ယူဆောင်ရွက်ကြရမည့် မျိုးဆက်သစ် လူငယ်များအပါအဝင် တစ်နိုင်ငံလုံး၏ လူ့စွမ်းအားအရင်းအမြစ်ဖွံ့ဖြိုး တိုးတက်ရေးသည် အခြေခံကျသည့်လိုအပ်ချက်ဖြစ်ပါကြောင်းနှင့် ပညာရေးကဏ္ဍကို နိုင်ငံတကာအဆင့်မီ မြှင့်တင် ဆောင်ရွက်ပေးလျက်ရှိရာ လူ့စွမ်းအားအရင်းအမြစ် ဖွံ့ဖြိုးတိုးတက်ရေးကိုလည်း အလေးထား အားပေးဆောင်ရွက်သွားရမှာ ဖြစ်ပါကြောင်း၊ လူငယ်တို့ရင်ဆိုင်ကြုံတွေ့နေရသည့် စိန်ခေါ်မှု ပြဿနာများကို ဖြေရှင်းကျော်လွှား၍ လူငယ်များ၏ လူမှုရေး၊ စီးပွားရေး၊ နိုင်ငံရေး၊ ပညာရေး၊ ယဉ်ကျေးမှု၊ အနာဂတ်အလားအလာကောင်းများကို ရှေ့ဆောင်လမ်းပြပေးနိုင်ရန် လူငယ်ရေးရာ မူဝါဒကို ရေးဆွဲအကောင်အထည် ဖော်ဆောင်ရွက်ခဲ့ပါကြောင်း၊ ယနေ့ပြုလုပ်သည့် လူငယ်စကားဝိုင်း များကို တက္ကသိုလ်၊ ကောလိပ်၊ အခြေခံပညာကျောင်းများတွင် ပြုလုပ်လျက်ရှိပါကြောင်းနှင့် ကျောင်းသား၊ ကျောင်းသူများအနေဖြင့်လည်း ဗလငါးတန်နှင့်ပြည့်စုံသည့် လူငယ်လူရွယ်များ ဖြစ်ကြပါစေကြောင်း”အဖွင့်အမှာစကား ပြောကြားသည်။  ဆက်လက်၍ ပုသိမ်တက္ကသိုလ် ပါမောက္ခချုပ်ဒေါက်တာသန်းထွန်းက လူငယ်စကားဝိုင်း ကျင်းပရခြင်းရည်ရွယ်ချက်များကို ရှင်းလင်းတင်ပြပြီးနောက် သမိုင်းဌာန၊ ပါမောက္ခ ဒေါက်တာ ကျော်မင်းမှ ဦးဆောင်ဆွေးနွေးသူအဖြစ်လည်းကောင်း၊ သတ္တဗေဒအထူးပြု စတုတ္ထနှစ် ကျောင်းသား မောင်အာကာမြတ်မင်းဇင်က လူငယ်နှင့်အားကစားခေါင်းစဉ်ဖြင့်လည်းကောင်း၊ ဓာတုဗေဒအထူးပြု ဒုတိယနှစ်ကျောင်းသူ မသင်းသီရိမြတ်သွယ်က လူငယ်နှင့်ကျန်းမာကြံ့ခိုင်ရေး ခေါင်းစဉ်ဖြင့်လည်းကောင်း၊ ဥပဒေပညာအထူးပြု ဒုတိယနှစ်ကျောင်းသား မောင်ဇင်လင်းထူးက လူငယ်နှင့်ယဉ်ကျေးမှု ခေါင်းစဉ်ဖြင့်လည်းကောင်း၊ မြန်မာစာအထူးပြု ဒုတိယနှစ်ကျောင်းသား မောင်မိုးယံထက်က  လူငယ်နှင့်မူးယစ်ဆေးဝါး ခေါင်းစဉ်ဖြင့်လည်းကောင်း အသီးသီးဆွေးနွေး ခဲ့ကြရာ တက်ရောက်လာကြသူများမှ သိရှိလိုသည်များအား မေးမြန်းဆွေးနွေးမှုများအပေါ် အသီးသီး ပြန်လည်ဆွေးနွေးခဲ့ကြပြီး တိုင်းဒေသကြီးဝန်ကြီးချုပ်မှ စကားဝိုင်းဆွေးနွေးပွဲနှင့် ပတ်သက်၍ ဖြည့်စွက်ဆွေးနွေးခဲ့ပြီး ဖြည့်ဆည်းဆောင်ရွက်ပေးခဲ့သည်။  ယင်းနောက် ဧရာဝတီတိုင်းဒေသကြီးလူငယ်ရေးရာကော်မတီဥက္ကဋ္ဌ၊ တိုင်းဒေသကြီး အစိုးရအဖွဲ့ ဝန်ကြီးချုပ်က လူငယ်စကားဝိုင်းတွင် ပါဝင်ဆွေးနွေးခဲ့သော သမိုင်းဌာန၊ ပါမောက္ခ နှင့်ကျောင်းသား၊ ကျောင်းသူများအတွက် အမှတ်တရလက်ဆောင်များအားလည်းကောင်း၊ တိုင်းဒေသကြီးအားကစားနှင့်ကာယပညာဦးစီးဌာနမှ ပုသိမ်တက္ကသိုလ်သို့ အားကစားပစ္စည်းများ အားလည်းကောင်း လှူဒါန်းပေးအပ်ခဲ့ရာ ကျောင်းသား၊ ကျောင်းသူများနှင့် ပုသိမ်တက္ကသိုလ် ပါမောက္ခချုပ်တို့က လက်ခံရယူခဲ့သည်။ ပုသိမ်တက္ကသိုလ်ဘွဲ့နှင်းသဘင်ခန်းမ၌ပြုလုပ်သည့် လူငယ်စကားဝိုင်းသို့ တိုင်းဒေသကြီး အစိုးရအဖွဲ့ဝင် ဝန်ကြီးများ၊ ဌာနဆိုင်ရာများ၊ ပုသိမ်တက္ကသိုလ်မှ ပါမောက္ခချုပ်၊ ဒုတိယ ပါမောက္ခချုပ်၊ ပါမောက္ခဌာနမှူးဆရာကြီး၊ ဆရာမကြီးများနှင့် ကျောင်းသား၊ ကျောင်းသူများ တက်ရောက်ခဲ့ကြကြောင်းသိရသည်။

ဧရာဝတီတိုင်းဒေသကြီး၊  အနောက်တောင်တိုင်းစစ်ဌာနချုပ်၊ ဧရာဝတီခန်းမ၌ ပြုလုပ်သည့် ဥပေဒေဘောင်အတွင်းပြန်လည်ဝင် ရောက်ခဲ့သည့်ပြစ်မှုကျူးလွန်ခြင်းမရှိသော PDFသင်တန်းဆင်း အလင်းဝင်ရောက်လာသူများအား မိဘအုပ်ထိန်းသူများထံ လွှဲပြောင်း အပ်နှံခြင်းနှင့် နယ်မြေရှင်းလင်းစဉ် လက်နက်ခဲယမ်းများဖော်ထုတ်ဖမ်းဆီးရမိခဲ့သည့် လုံခြုံရေး တပ်ဖွဲ့ဝင်များအား ဂုဏ်ပြုချီးမြှင့်ခြင်းအခမ်းအနားကို ယနေ့နေ့လည်ပိုင်းက ကျင်းပပြုလုပ်ခဲ့ရာ တိုင်းဒေသကြီးဝန်ကြီးချုပ်ဦးတင်မောင်ဝင်း၊ အနောက်တောင်တိုင်းစစ်ဌာနချုပ်တိုင်းမှူး၊ ပုသိမ်လေတပ်စခန်းဌာနချုပ်မှူး၊ တိုင်းဒေသကြီးအစိုးရအဖွဲ့ဝင်များ၊ အလင်းဝင်ရောက်လာသူ များနှင့် မိဘအုပ်ထိန်းသူများတက်ရောက်ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်မှ “ တပ်မတော်က နိုင်ငံတော် တာဝန်ကို လွှဲပြောင်းရယူခဲ့သည့် ၂၀၂၁ ခုနှစ်ဖေဖော်ဝါရီလ ၁ ရက်နေ့နောက်ပိုင်း NLD ပါတီဝင်များ၊ ၎င်းပါတီကို ထောက်ခံသူအစွန်းရောက်များ၊ မတရား အသင်းနှင့် အကြမ်းဖက်များဖြစ်သည့် CRPH နှင့်NUG၊ CDM လှုံ့ဆော်မှုနှင့် နိုင်ငံတော်တည်ငြိမ်အေးချမ်း ရေးကိုမလိုလားသည့်ပြည်တွင်း၊ ပြည်ပမှ လူပုဂ္ဂိုလ်အဖွဲ့အစည်း များ၏ သွေးထိုးလှုံ့ဆော်မှု၊ ခြောက်လှန့်မှု၊ ဖြားယောင်းသွေးဆောင်မှုတို့ကြောင့်အချို့သော ကျောင်းသား/ကျောင်းသူများ၊ လူငယ်လူရွယ်များ၊ နိုင်ငံ့ဝန်ထမ်းများသည် ဆူပူဆန္ဒပြမှုများ၊ အကြမ်းဖက်လုပ်ငန်းများမှာ ပါဝင်လာခဲ့သည့်အတွက် ဖမ်းဆီးခံရမည်ကို စိုးရိမ်ထိတ်လန့် စိတ်များဖြင့် တိုင်းရင်းသားလက်နက်ကိုင်အဖွဲ့အစည်းရှိရာ နေရာဒေသများနှင့် ပြည်ပနိုင်ငံများ ကို တိမ်းရှောင်သွားခဲ့ကြပါကြောင်း၊ မတရားအသင်းများ၊ အကြမ်းဖက်အုပ်စုအဖွဲ့အစည်းများ ဖြစ်သည့် CRPH၊ NUG၊ ၎င်းတို့နှင့်ဆက်စပ်နေသည့် လူပုဂ္ဂိုလ်အချို့၏ အာဏာရှင်ဆန်သည့် ထုတ်ပြန်ချက်များ ပြောကြားချက်များအပေါ်မှာလည်း ထပ်မံစိုးရိမ်လျက်ရှိပြီး ရောက်ရှိနေသည့် နေရာဒေသများမှာလည်း လုံခြုံရေးအာမခံချက်မရှိ၊ လူမှုစီးပွားရေးအဆင်မပြေမှု အခက်အခဲ များစွာရင်ဆိုင်နေရပြီး မိမိနေထိုင်ရာနေရပ်ဒေသ အသီးသီးကိုပြန်လာလိုသည့်ဆန္ဒများ ဖြစ်ပေါ် လျက်ရှိကြောင်းသိရှိရပါကြောင်း၊ နေရပ်ဒေသအသီးသီးမှ စွန့်ခွာတိမ်းရှောင်နေရသူများသည် လည်း မိမိတို့နိုင်ငံသားများဖြစ်သောကြောင့် ၎င်းတို့ဒေသအသီးသီးသို့ ပြန်လည်ဝင်ရောက်ရေး နိုင်ငံတော်စီမံအုပ်ချုပ်ရေးကောင်စီက စီမံဆောင်ရွက်ပေးလျက်ရှိပါကြောင်း၊ လက်ရှိအချိန် တွင်  နိုင်ငံတော်စီမံအုပ်ချုပ်ရေးကောင်စီသည်  PDFအပါအဝင် အဖွဲ့အစည်းအမျိုးမျိုး အမည်ခံ၍ လက်နက်ကိုင်ဆန့်ကျင်လျက်ရှိသည့် အဖွဲ့အစည်းများအတွင်း ရောက်ရှိနေသူများအား နိုင်ငံတော်၏ ရှေ့လုပ်ငန်းစဉ်များတွင် ပူးပေါင်းပါဝင်ဆောင်ရွက်နိုင်ရေးအတွက် သတ်မှတ်ထား သော စည်းကမ်းချက်များနှင့်အညီ ဥပဒေဘောင်အတွင်းသို့ ပြန်လည်ဝင်ရောက်လိုပါက နွေးထွေးစွာကြိုဆိုလက်ခံလျက်ရှိပါကြောင်း၊  မိဘအုပ်ထိန်းသူများ၊ မိသားစုများထံ ပြန်လည် လွှဲပြောင်းပေးအပ်ပြီး နိုင်ငံအပေါ်အကျိုးပြုသူများဖြစ်ကြပါစေလို့ ဆုမွန်ကောင်း တောင်းပါ ကြောင်း”အမှာစကားပြောကြားသည်။ ထို့နောက် အနောက်တောင်တိုင်း စစ်ဌာနချုပ် တိုင်းမှူးက အမှာစကားများဆက်လက်ပြောကြားခဲ့ပြီးနောက် တိုင်းဒေသကြီးဝန်ကြီးချုပ်နှင့် တိုင်းမှူးတို့က ပြစ်မှုကျူးလွန်ခြင်းမရှိသော PDF သင်တန်းဆင်း အလင်းဝင်ရောက်လာသူများနှင့် နယ်မြေရှင်းလင်းစဉ် လက်နက်ခဲယမ်းများဖော်ထုတ်ဖမ်းဆီးရမိခဲ့သည့် လုံခြုံရေးတပ်ဖွဲ့ဝင်များအား အမှတ်တရလက်ဆောင်ပစ္စည်းများနှင့် ဂုဏ်ပြုဆုငွေများချီးမြှင့်ခဲ့ကြသည်။ ဆက်လက်၍ ပြစ်မှုကျူးလွန်ခြင်းမရှိသော PDFသင်တန်းဆင်း အလင်းဝင်ရောက်လာသူများ၏ မိသားစုဝင်များ ကိုယ်စား ဖခင်တစ်ဦးကကျေးဇူးတင်ဝမ်းမြောက်စကားများ ပြောကြားခဲ့ပြီး တိုင်းဒေသကြီး ဝန်ကြီးချုပ်နှင့်တာဝန်ရှိသူများသည် အမှတ်တရစုပေါင်းမှတ်တမ်းတင် ဓာတ်ပုံများရိုက်ကူးခဲ့ကာ ဖော်ထုတ်ဖမ်းဆီးရမိခဲ့သည့် လက်နက်ခဲယမ်းများအား ကြည့်ရှုစစ်ဆေးခဲ့ပြီး အလင်းဝင်ရောက် လာသူများ၊ မိဘအုပ်ထိန်းသူများနှင့်ရင်းရင်းနှီးနှီးတွေ့ဆုံ၍ လက်ဖက်ရည်ဖြင့်တည်ခင်းဧည့်ခံ ခဲ့ကြသည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် ပုသိမ်မြို့၊ အမှတ်(၆) ရပ်ကွက်တွင် လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန၊ ပုသိမ်မြို့နယ်ဦးစီးမှူးရုံးမှ မြေပြင်လူဦးရေ စာရင်းများတိုက်ဆိုင်စစ်ဆေးခြင်း၊ e - ID ဆာဗာ အတွင်းရေးသွင်းဖြည့်သွင်းခြင်းနှင့် ပန်းခင်းစီမံချက်(၂)၊ အိမ်ထောင်စုလူဦးရေစာရင်းနှင့် နိုင်ငံသားစိစစ်ရေးကဒ်ပြားဆောင်ရွက် ပေးနေမှုများအား ကြည့်ရှုစစ်ဆေးခဲ့ပြီး မြေပြင်လူဦးရေစာရင်းများပြည့်စုံမှန်ကန်စေရေး ဌာနဆိုင်ရာများ၊ အုပ်ချုပ်ရေးအဖွဲ့များ၊ ပြည်သူများအားလုံးပူးပေါင်း ဆောင်ရွက်ပေးကြရန်၊ စာရင်းဇယားများ မှားယွင်းမှုမရှိစေရေး အဆင့်ဆင့်ကြပ်မတ်ဆောင်ရွက်ရန်နှင့် သတ်မှတ်ကာလ အတွင်း စာရင်းများပြည့်စုံမှန်ကန်စေရေး အင်တိုက်အားတိုက်ဆောင်ရွက်ပေးကြရန် မှာကြားခဲ့ ကြောင်းသိရသည်။

ဧရာဝတီတိုင်းဒေသကြီးဝန်ကြီးချုပ်သည် အနောက်တောင်တိုင်းစစ်ဌာနချုပ်တိုင်းမှူး၊ ပုသိမ်လေတပ်စခန်းဌာနချုပ်မှူး၊ တိုင်းဒေသကြီး အစိုးရအဖွဲ့ဝင်များ၊ ဌာနဆိုင်ရများနှင့်အတူ ပုသိမ်မြို့၊ ဧရာရွှေဝါခန်းမတွင် ပြုလုပ်သည့် မိုခါမုန်တိုင်းကြောင့်ထိခိုက်ပျက်စီးမှုများအတွက်  ရခိုင်ပြည်နယ်တွင် ကူညီကယ်ဆယ်ရေး လုပ်ငန်းများဆောင်ရွက်ခဲ့သည့် တိုင်းဒေသကြီးမီးသတ်တပ်ဖွဲ့ဝင်များအား ကြိုဆိုဂုဏ်ပြုပွဲ အခမ်းအနားတက်ရောက်၍ အမှာစကားပြောကြားခဲ့ရာတွင် တိုင်းဒေသကြီးအနေဖြင့် အလွန့်အလွန်အားကောင်းသည့် မိုခါမုန်တိုင်းမဖြစ်ပေါ်မီ လေဖိအားနည်းရပ်ဝန်းဖြစ်ပေါ်ချိန်မှ စ၍ ကြိုတင်ခန့်မှန်းချက်များအရ မုန်တိုင်းဦးတည်ရာလမ်းကြောင်းရှိ နေရာဒေသများနှင့် မြို့နယ်၊ ရပ်ကွက်၊ ကျေးရွာများအား ကြိုတင်ကာကွယ် ရေးလုပ်ငန်းများ၊ မုန်တိုင်းအန္တရာယ် သတိပေးချက်များထုတ်ပြန် ဆောင်ရွက်ထားရှိပြီး ကူညီကယ်ဆယ်ရေးအစုအဖွဲ့များ ဖွဲ့စည်း၍ ကြိုတင်ပြင်ဆင်မှုကောင်းကောင်းဖြင့် ပြင်ဆင်ဆောင်ရွက်ခဲ့ပါကြောင်း၊ မုန်တိုင်းအန္တရာယ် ကျရောက်ခဲ့ပါက ရှာဖွေကယ်ဆယ်ရေးလုပ်ငန်းအလျှင်အမြန်ဆောင်ရွက်နိုင်စေရေး၊ တပ်ရင်း တပ်ဖွဲ့များ၊ မီးသတ်တပ်ဖွဲ့ဝင်များ၊ ဌာနဆိုင်ရာများ၊ စေတနာ့ဝန်ထမ်းများပါဝင်သည့် လူအင်အားအစုအဖွဲ့များ၊ စားရေရိက္ခာများ၊ စက်ပစ္စည်းယန္တရားများ အသင့်စုဆောင်းထားရှိခဲ့ပါကြောင်း၊ ရခိုင်ပြည်နယ် အတွင်းသို့ မုန်တိုင်းဝင်ရောက်ခဲ့သည့်အခါတွင် အသင့်စုစည်းထားရှိပြီးဖြစ်သည့် တိုင်းဒေသကြီး မီးသတ်တပ်ဖွဲ့ဝင်များက သတ်မှတ်ထားသည့်ရည်မှန်းချက်နေရာများအမြန်ဆုံးရောက်ရှိ၍ ရှာဖွေ ကယ်ဆယ်ရေးလုပ်ငန်းများ သွားရောက်ကူညီဆောင်ရွက်ခဲ့ပါကြောင်း၊ မီးသတ်တပ်ဖွဲ့ဝင်များ၏ စုဖွဲ့မှုအားကောင်းကောင်းဖြင့် ကြိုးစားဆောင်ရွက်ခဲ့ကြ၍ အချိန်တိုအတွင်းသတ်မှတ်လုပ်ငန်း တာဝန်များကို အောင်မြင်စွာဆောင်ရွက်နိုင်ခဲ့သည်ကိုတွေ့ရှိရ၍ ဂုဏ်ယူပါကြောင်းနှင့် ယခုကြုံတွေ့ခဲ့ရသည့် အတွေ့အကြုံများဖြင့် သဘာဝဘေးကြိုတင်ကာကွယ်ရေးလုပ်ငန်းများ၊ ရှာဖွေကယ်ဆယ်ရေးလုပ်ငန်းများအစွမ်းကုန်ကြိုးစားဆောင်ရွက်ပေးကြရန် မှာကြားခဲ့သည်။ ဆက်လက်၍ ရခိုင်ပြည်နယ်တွင် ကူညီကယ်ဆယ်ရေးလုပ်ငန်းများ ဆောင်ရွက်ခဲ့သည့် တိုင်းဒေသကြီး ရှာဖွေကယ်ဆယ်ရေးတပ်ခွဲ(၁) အဖွဲ့ခေါင်းဆောင်မှ ကူညီကယ်ဆယ်ရေးလုပ်ငန်း များဆောင်ရွက်ခဲ့မှု အခြေအနေများရှင်းလင်းတင်ပြခဲ့ပြီးနောက် တိုင်းဒေသကြီးဝန်ကြီးချုပ်မှ ကူညီကယ်ဆယ်ရေးလုပ်ငန်းများ ဆောင်ရွက်ခဲ့ပြီးပြန်လည်ရောက်ရှိလာသည့် တိုင်းဒေသကြီး မီးသတ်တပ်ဖွဲ့ဝင်များအား ဂုဏ်ပြုနေ့လည်စာဖြင့် ဧည့်ခံကျွေးမွေးခဲ့ပြီး တပ်ဖွဲ့ဝင်များအား ရင်းရင်းနှီးနှီးတွေ့ဆုံအားပေးခဲ့ကြောင်းသိရသည်။

ဧရာဝတီတိုင်းဒေသကြီးတွင် မြို့သန့်ရှင်းသာယာရေးလုပ်ငန်းများ အပတ်စဉ်စနေ့နေ့ တိုင်းစုပေါင်းသန့်ရှင်းရေးလုပ်ငန်းများအား တပ်ရင်းတပ်ဖွဲ့များ၊ ဌာနဆိုင်ရာများ၊ ပြည်သူများ ပူးပေါင်းဆောင်ရွက်လျက်ရှိရာ တိုင်းဒေသကြီးအစိုးရအဖွဲ့ဝန်ကြီးချုပ်ဦးတင်မောင်ဝင်းသည် ယနေ့နံနက်ပိုင်းတွင် တိုင်းဒေသကြီးအစိုးရအဖွဲ့ဝင်များ၊ ဌာနဆိုင်ရာများလိုက်ပါလျက် ပုသိမ်မြို့ သန့်ရှင်းသာယာလှပရေး ဆောင်ရွက်နေမှုများကြည့်ရှုစစ်ဆေးခဲ့သည်။  ဦးစွာ တိုင်းဒေသကြီးဝန်ကြီးချုပ်နှင့်အဖွဲ့သည် ပုသိမ်မြို့၊ အမှတ်(၁) အခြေခံပညာအထက်တန်းကျောင်းတွင် ကျောင်းသားကျောင်းသူများ၊ တပ်ရင်းတပ်ဖွဲ့များ၊ ဌာနဆိုင်ရာများနှင့်ပြည်သူများက ကျောင်းပတ်ဝန်းကျင်သန့်ရှင်းရေးလုပ်ငန်းများ စုပေါင်းသန့်ရှင်းရေးဆောင်ရွက်နေမှုများကို ကြည့်ရှုစစ်ဆေးခဲ့ပြီး အမှိုက်များကင်စင်စေရေး၊ ရေစီးရေလာကောင်းမွန်စေရေး၊ သစ်ပင် သစ်ကိုင်းများခုတ်ထွင်ရှင်းလင်းစေရေး၊ အမှိုက်များစနစ်တကျစွန့်ပစ်ရေးမှာကြားခဲ့သည်။ထို့အတူ မရမ်းချိုဘုန်းတော်ကြီးကျောင်းတိုက်သို့သွားရောက်၍ ကျောင်းတိုက်ပတ်ဝန်းကျင် သန့်ရှင်းရေးဆောင်ရွက်နေမှုများကြည့်ရှုစစ်ဆေးခဲ့ပြီး လိုအပ်သည်များမှာကြားခဲ့သည်။ ဆက်လက်၍တိုင်းဒေသကြီးဝန်ကြီးချုပ်နှင့်အဖွဲ့သည် အမှတ်(၅) အခြေခံပညာမူလတန်းကျောင်း သို့သွားရောက်၍ ကျောင်းသားကျောင်းသူများအေးချမ်းပျော်ရွှင်စွာ ပညာသင်ကြားနေမှုများကို ကြည့်ရှုအားပေးခဲ့ပြီး လိုအပ်သည်များတင်ပြမှုအပေါ် သက်ဆိုင်ရာဌာနများနှင့်ပေါင်းစပ် ဆောင်ရွက်ပေးခဲ့ပြီး ဆရာ၊ ဆရာမများအား ထောက်ပံ့ငွေများပေးအပ်ခဲ့သည်။ ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ရွှေဝတ်မှုံစံပြဈေးသို့သွားရောက်၍ ဈေးသူဈေးသားများ ၏ ဈေးရောင်းဝယ်နေမှုများမေးမြန်းခဲ့ပြီး ပြည်သူများအား သက်သာသောနှုန်းထားများဖြင့် ရောင်းချပေးနိုင်ရေး၊ သယ်ယူစရိတ်များသက်သာစွာဝယ်ယူရောင်းချနိုင်စေရေး၊ သန့်ရှင်း လတ်ဆက်၍ ကျန်းမာရေးနှင့်ညီညွတ်သည့် ဒေသထွက်ဟင်းသီးဟင်းရွက်များ၊ စားသောက် ကုန်များရောင်းချနိုင်စေရေးမှာကြားခဲ့သည်။

ဧရာဝတီတိုင်းဒေသကြီး၊ (၂၀၂၃-၂၀၂၄)ပညာသင်နှစ် ကျောင်းကျန်းမာရေး သီတင်းပတ်လှုပ်ရှားမှုများ အခမ်းအနားအား ယနေ့နံနက်ပိုင်းက ပုသိမ်မြို့၊ အမှတ်(၁)အခြေခံပညာအထက်တန်းကျောင်း၊ ရတနာတန်ဆောင်ခန်းမတွင် ပြုလုပ်ခဲ့ရာ အခမ်းအနားသို့ တိုင်းဒေသကြီး ဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင် ဝန်ကြီးများ၊ ဌာနဆိုင်ရာများ၊ ဆရာ၊ ဆရာမများ၊ လူမှုရေးအသင်းအဖွဲ့များ၊ ကျောင်းသား၊ ကျောင်းသူများ တက်ရောက်ခဲ့ကြသည်။ ဦးစွာ အခမ်းအနားအား ပုသိမ်မြို့၊ အမှတ်(၇) အခြေခံပညာအထက်တန်းကျောင်းမှ ကျောင်းသား၊ ကျောင်းသူများက “မြန်မာ့ကျောင်း”သီချင်းဖြင့် သီဆိုဖျော်ဖြေဖွင့်လှစ်ခဲ့ပြီးနောက် တိုင်းဒေသကြီးဝန်ကြီးချုပ်က“ ယနေ့အခမ်းအနားသည် “၂၀၂၃-၂၀၂၄ ပညာသင်နှစ် ကျောင်းကျန်းမာရေး သီတင်းပတ်လှုပ်ရှားမှုများ အထိမ်းအမှတ်အခမ်းအနား” ဖြစ်ပြီး နှစ်စဉ် စာသင်နှစ်တစ်နှစ်၏ ဩဂုတ်လတွင် ကျောင်းသား၊ ကျောင်းသူများ၊ ပညာရေးနှင့် ကျန်းမာရေး ဝန်ထမ်းများအပါအဝင် ပြည်သူလူထုတစ်ရပ်လုံးတွင် ကျန်းမာရေးအဆင့်မြှင့်ကျောင်း လုပ်ငန်း စဉ်များကိုပိုမိုသိရှိလာပြီး ကျန်းမာရေးအဆင့်မြှင့်ကျောင်း ထူထောင်ရေးလုပ်ငန်းများတွင် ပူးပေါင်းပံ့ပိုးမှုများပိုမိုအားကောင်းလာစေရန်၊ ဗဟိုနှင့်ဒေသဆိုင်ရာအစိုးရအဖွဲ့များ၊ ဌာနဆိုင်ရာ များ၊ မိဘပြည်သူများ၏ ပူးပေါင်းပံ့ပိုးမှု ပိုမိုအားကောင်းလာစေရန်၊ သန့်ရှင်း၍ ကျန်းမာရေးနှင့် ညီညွတ်သောကျောင်းပတ်ဝန်းကျင်များပေါ်ထွန်းလာစေရေးနှင့် ရေရှည်တည်တံ့စေရေးအတွက် အထောက်အကူများရစေရန် ရည်ရွယ်ချက်များနှင့်ကျင်းပခြင်းဖြစ်ပါကြောင်း၊ နိုင်ငံအတွက် အရေးပါသည့် ကျောင်းသားလူငယ်များကိုအနာဂတ်တွင် စွမ်းရည်ပြည့်စုံသည့် နိုင်ငံသားကောင်း များဖြစ်လာစေရန်အတွက်ရည်မှန်းပြီး ယခုနှစ်အတွက် ဆောင်ပုဒ်မှာ“ကျန်းမာပျော်ရွှင် ပညာသင်၊ စွမ်းရည်ထက်မြက် အနာဂတ်အတွက်”ဖြစ်ပါကြောင်း၊ ကျောင်းသားလူငယ် များသည် နောင်အနာဂတ်တွင် နိုင်ငံတော်အတွက်အရေးပါသော အင်အားတစ်ရပ်ဖြစ်သည့် အတွက်ဘက်စုံဖွံ့ဖြိုးတိုးတက်ပြီး စွမ်းရည်ထက်မြက်သည့် နိုင်ငံ့သားကောင်း ရတနာများ ဖြစ်လာစေဖို့ရာ  စာသင်ကျောင်းများက အစပြုခြင်းဖြစ်ပါကြောင်း၊ ယခု ၂၀၂၃-၂၀၂၄ ပညာသင်နှစ်၊ ကျောင်းကျန်းမာရေးသီတင်းပတ်တွင် ဗဟိုအဆင့်နှင့် တိုင်းဒေသကြီး/ပြည်နယ် အဆင့်များ၌ အထိမ်းအမှတ်အခမ်းအနားများဖြင့် ကျောင်းကျန်းမာရေးလုပ်ငန်းများကို ကဏ္ဍပေါင်းစုံပူးပေါင်း၍ အားပေးဆောင်ရွက်သွားမည် ဖြစ်သကဲ့သို့ ကျောင်းအသီးသီးတွင်လည်း ကျောင်းသား၊ ကျောင်းသူများ၊ မိဘများ၊ ပညာရေးနှင့် ကျန်းမာရေးဝန်ထမ်းကပူးပေါင်း၍ ကျောင်းကျန်းမာရေး လုပ်ငန်းများကို ဆောင်ရွက်သွားကြမှာဖြစ်ပါကြောင်း၊ ကျောင်းကျန်းမာရေး လုပ်ငန်းများကို ကျန်းမာရေးဝန်ကြီးဌာနသာမက ကျောင်းသားလူငယ်များ၊ ဆရာ၊ ဆရာမများ၊ မိဘများ အားလုံးက မိမိတို့၏ ကျန်းမာရေးအဆင့်အတန်းတိုးမြှင့်စေရန် မိမိတို့ကိုယ်တိုင် ကြိုးစားဆောင်ရွက်ရမှာဖြစ်ပါကြောင်း၊ တိုင်းဒေသကြီးသည် ပညာရေးနှင့်ပတ်သက်ပါက ကျောင်းတက်ရောက်မှု၊ ကျောင်းဖွင့်လှစ်မှုနှင့် အတန်းစဉ်ကူးပြောင်းမှု အများဆုံးဖြစ်ပြီး တိုင်းဒေသကြီးတွင် ယခုပညာသင်နှစ်၌ အခြေခံပညာကျောင်း (၇) ထောင်ကျော်အားဖွင့်လှစ် ထားရှိပြီး ကျောင်းတက်ရောက်မှု (၁၁)သိန်းကျော်ရှိပါကြောင်းနှင့်ပညာရေးနှင့်ပတ်သက်ပါက စွမ်းစွမ်းတမံဆောင်ရွက်နေသည့် တိုင်းဒေသကြီးဖြစ်ပါကြောင်း၊ ကျောင်းနေအရွယ်ကလေးတိုင်း ကျောင်းတက်ရောက်နိုင်ရေးအတွက် ဆရာ၊ဆရာမများ၊ မိဘများ၊ ဒေသအာဏာပိုင်အဆင့်ဆင့် တို့ကလည်းပူးပေါင်းဆောင်ရွက်ရမှာဖြစ်ပါကြောင်း၊လူငယ်ကိုအခြေခံသည့် အနာဂတ်ကို တည်ဆောက်ရာတွင်  စာသင်ကျောင်းမှစတင်ပြီး ကျောင်းသားလူငယ်များ၏ ကျန်းမာရေးပြည့်စုံ ကောင်းမွန်နေရုံသာမက ဗလငါးတန်ပြည့်စုံသည့် လူငယ်များမွေးထုတ်နိုင်ရန်အတွက် ကျောင်းသား ကျောင်းသူများအပါအဝင် ပညာရေးနှင့်ကျန်းမာရေးကဏ္ဍ၊ အခြားနှီးနွယ်ဌာနများ၊ အဖွဲ့အစည်းများနဲ့ မိဘပြည်သူတို့ပူးပေါင်းပြီးဆောင်ရွက်ကြရန် ပြောကြားလိုပါကြောင်း” အဖွင့်အမှာစကား များပြောကြားသည်။ ဆက်လက်၍ တိုင်းဒေသကြီးဝန်ကြီးချုပ်နှင့် ဧည့်သည်တော်များသည် (၂၀၂၃-၂၀၂၄)ပညာသင်နှစ် ကျောင်းကျန်းမာရေး သီတင်းပတ်အထိမ်းအမှတ် ဗီဒီယိုပြသမှုနှင့် ပုသိမ်မြို့အမှတ်(၂၄)အခြေခံပညာမူလတန်းကျောင်းမှ ကျောင်းသား၊ ကျောင်းသူလေးများက “လက်ဆေးခြင်း”ကဗျာဖြင့် တေးသရုပ်ဖော်တင်ဆက်မှုတို့အား ကြည့်ရှုအားပေးသည်။ ထို့နောက် ပုသိမ်မြို့၊ အမှတ်(၇)အခြေခံပညာအထက်တန်းကျောင်းမှ ကျောင်းသား၊ကျောင်းသူ များက“ဇာတိမာန်”သီချင်းဖြင့် သီဆိုဖျော်ဖြေ၍ အခမ်းအနားအား ရုပ်သိမ်းခဲ့ပြီး ဝန်ကြီးချုပ်နှင့် ဧည့်သည်တော်များသည် မူလတန်းကျောင်းသား၊ ကျောင်းသူလေးများအား သန်ချဆေးများကိုလည်းကောင်း၊ အလယ်တန်းနှင့်အထက်တန်းကျောင်းသူလေးများအား သံဓာတ်ဆေးဝါးများကိုလည်းကောင်း တိုက်ကျွေးခဲ့ကြပြီး အမှတ်တရလက်ဆောင်ပစ္စည်းများ ပေးအပ်ခဲ့ကာ (၂၀၂၃-၂၀၂၄)ပညာသင်နှစ် ကျောင်းကျန်းမာရေး သီတင်းပတ်လှုပ်ရှားမှုများ အထိမ်းအမှတ်ပြခန်းများအား လှည့်လည်ကြည့်ရှုအားပေးခဲ့ကြောင်းသိရသည်။